ZANKHAT MOUTHAK

~Kattie Mawite

Ka pasal neih hun ding a nai mahmah ta. Himahleh kisakkholh luat in ka neikei a, lawp leng ka kilawp samkei. Pasal neih le ka lunglut kei. Himahleh nei di dinmun in ka om mawk hi. Mihing a piangkhia chu khatvei koppih neih chu alou theilou ahi chih leng ka haih tuankei, hinapi in kilawpna le kanei tuankei.Ahi a, ut in utkei leng pasal nei ding kahi veve ta hi. A ni ding leh bangkim a kigeelfel khin a, ahun ngak lel ahisim ta. Sungkuante bel gukbuai kha mah unte, kei bel ka muangchang khop mai. Ka pasal di sungte leh kei sungte kihoulem a kitenna saidek ka hilim uhi. Ka phur luat louh hang in, ka litluat na dile ka thei tuankei. Khatvei bel kalawmnu kiang ah pasal neih utlou kahihdan ka genkha ngei ta hi.Ahitak a gen in ka pasal dile ka thei ngeikei a, muh leng ka mungei kei himhim. Amelput dile ka suangtuahna inle a manban kei. A lemlak bek le ka mukha kei.

Tulai a dinchu haihuai tak leng ahita. Himahleh muh ut inle ka ngiat tuankei. Sungte kihoulem a hon gawm dek na nana uh chu, ahoihlou toh hon gawm ngal di uahia chi in ka lungmuang top mai ahi.Ahun in hon naih deuhdeuh ahihman in kisakkholh louh theihlouh ahita. Baangteng hileh chi in kei hihtheih dan tawk in kana kisakhol samta hi. Mi a kiten di chiang ua kilawp ten uh hiven, keibel ka huchikei a, lit le ka lin vulvul samkei. Hunte hong pai zelsam hiven, ka kitenni di uh ahong tungta. Pasalte'n "numeite chu phaklouh nahi uh. Theih ngeilouh, gamtat ngeilouhna insung a mouthak a kuan ngam" chia agen uh ka phawkkhe huaihuai hial hi. Ahi a, mi dinmun toh keia le a kibangkei. Mi bel, a lutna insung ua mithak di hitawk le uh leng, a pasal di bek uh toh kithei, phetlouh kum tamkuam tak ana kingaisa khawng ana hizomah uhi. Kei bel gen ngaihna a omkei. Ka pasal di ngat le ka theikei!! Mi ngaih inchu mihai toh ka kibang di chih le kahaih kei.Ahun a hong tung petmah ta! Hihtheih bang tawk in ka kichei sam a, mi mitmuh in bang mel kapu diam chih zaw ka theikei. Himahleh kei ki-etna ah tuh kilawm ka kisa mahmah. Moupuan ka duang a kibat in hon kilawmsak hia? Ahihkei leh a kibatna duang ziaka etlawm? Huai bel ka pasal di in amuhdan tuh keia dia ka lungkimna pen ahimai di.

Ka kitenna uh bel thupitak a sai ahikei a, amau tanau lamte leh kei tanau lamte theihpihtu leh mipi ahilel uhi.Pastor in hon gawm zoh a programme tengteng a kizoh in ka pasal te inlam ah kapai uhi. Huai ah kilopna chih leh bang le a om tuankei a, amau inkuan a laklut kahingal mai.

Ana khawl zual dih..... ka pasal min natawn a insung ua kalut hun ale thei nailou kahihdan ka kitheikhia hi. Himahleh bangchichi hiam in atheihdan kanei thou sam. Ka kiten nitak un ka lawmnu(theihpihtu) toh ka giakkhawm ua, ka pasal leng tuabang mah in a theihpihtu alawmpa toh agiak uhi.

Azingnawn in zingkal ka hong thou ua, mouthak hinkhua kipan ahingal mai. Nupite gen bang kaphawk a, tat ngeilouhna insunga gamtat chu, hai nalai lai haidiak mah kibang hi. Temta, munphiah leh vanzat nengchik maimai koih dile sawt kuamtak kingaihtuah masak angai hi.

Tuateng ban ah sanggam thak kanei a, nu-le-pa thak kaneih banah, keia din thilteng athak vek asuak. Amau adin leng kei athak kahi veve. Kifelsak luat di lah, denchiah sunzom zoukei khaleng,"hong luttung a zaw....." chih kiloh dia, felkei lawle lah, "mouthak lailai a....." chih hizel dia. Bangteng hileh, ka hihna ngeina pel in lem ka chingthei tuankei a, zenei leh gamta dialdial mi kahihman in ka ngeina bangbang toh ka om dialdial lel hi.

Huai hun in ken school khat ah sinsaktu na kasem hi. Anuamlou mahmah bel, theih ngeilouh toh kiten chih mawk pen ahi. Ka pasal himahleh theih ngeilouh chih mahtak, ka mai gal tuan samkei. Amanle hon maingal lawmlawm din ka gingta tuankei. Asungkuante bel thutuam, ahi disa in koih tale, amah bek maingal louh, phetlouh hou le houpih ngamlou a om tuh ka haiman ahi le ka chi hi. Himahleh ahi di teng ahi khinta. Bangteng hileh, ka pasal in kapom veve a, aman leng azi a hon pom veve ka gingta. Ka damsunga kahihna ding leh ka inn di mun a om tuh kahita mai ve.

Kithei ngeilou, kimungeilou kiteng himahle ung, ka pasal ahihna ziak adiam a, tleirawl kigukngaihte bang in ka gukngaih nakhat a om veve a, ka om heuhau phet hi. Itna hinkhua khonung pat di hile ung kilawm! A poikei, sawt daih zaw nave. Ki-it tak a kiteng a sawt daihlou sang in, kitenni apan in ki-it pan le tou zaw dia ka gintakna a om a, mi theih dia zumhuaipi himahleh, ka lungsim guk bel a kipak veve hi. Zum-le-zah khuallou in ka pasal kiang ah kava pai a, gen di tuan theilou in, "Umang" kava chi mawk hi. A hon en a, ka ki-entuah kha nilouh mawk ua, electric +ve leh -ve hetkhak mah bang in hon shock zot khat om leh a kilawm hial hi.

A ngaihbaang mahmah a, ka deih chitak leng ahibok. Pasal neih di kalit vulvul louh bang geih in a lithuai kei khop mai. Amit hah thrinthrian te, a mel ngaihhuainate leh a mizia mithiip tak ahihdante ka kitenni ua musuah teuhlou kahihdan ka phawk khia hi."Mawi" chi'n hon leh sap kik kha zozen a, gen di thei zawsam omlou in ka ki-nuihsan kha cheuh zozen uhi.Huchia, itna khum dan chiamkha dekpan ka kichihlai un an thuk hunta ahihdan ahon gen ua, keileng anthuk ding in ka kithawi khia hi. Huai zing in ka tanau nai mahmah te uh toh an kanekhawm dek uhi.

An teng a kithuk khit in ka pasal leng room sung apan a hong pawtkhia a, an ne din hong kisa hi.Hiai hun in mak kasak mahmah thilkhat a hong om. Huaituh, ka pasal in kamiz silh in necktie hon ok mawk a, lamdang kasa mahmah a, kamka heuhou zen in kana en hi. Annekna a akizom a pang kahihman un ka gukdot leh, college kailai ahihdan hon hilh hi a, college kai dia kisa ahihdan leng a hon gen bok hi. Thei chianglou petmah zaw kana hi. Colleg kailai I chih chiang in naupang chik ahihdi theihsa ahi a, kei kana gukbuai na khat a om taget. A college kai pen zaw le poi kasa zenzen kei, ahi thei mah ahi.

Ken ka sem dia, apoimoh leh ka vaak zomah ding. Himahleh, kaneu apan kana ut ngeilou khat tuh, kei sanga naupangzaw pasal a neih louh ding chih ahihman in ka patau pian pah hi. Akumzah ka theih leh, kei sangin kum khat in a naupang zaw petmah hi. Poi sa lengle a kikhelta. Ahi bangbang tuh ka pomsiam vek angai.Kei ana buaina khemkhem gige ahihleh, pasal eisanga naupangzaw nei le bang chi sap di? Sanga naupang zaw lah 'U' kichi nuam teuhlou. I Pasal ahih ngal alah 'U' chia sap kilawmzel... Tua ka buaina ahichet ta. Gal ngaihtuah hi nawnlou, atak a ding ta kahihman in ahun in hon pawkhe na di chihte ahithei nawnkei.

Kin-le-buang a saifel dite ahita! Huchi in, ka ut ngei hetlouh, ka sanga naupangzaw pasal a neikha kahihman in 'U' chia sam din ka kiminta. Kei sa a upat zawk ziak ahikei a, ka pasal ahihna ah ka zahtak etsakna dan a 'U' chi a sam hi in ka kingai hi.Huchia, kei kingaihtuah buai kawmkawm in an kane ua, kuamah theihlouh in ka a gukbuai mahmah lunglung hi. Ka buaina teng laka bangzah hiam ngaihtuah fel ta, nengchik thoveng deuhta chi a lungnuam tak a ka om lai in ka phone hong ging rengreng zenhouh hi. An nelai kahihman un ka kisuanglah sim a, pau hetlou leh kisuanglah sim pipi in ka et gaugau leh, SWIPE DOWN TO STOP ALARM chih ana kigelh a...... Ka zalmang ana hi maimah. Zankhat mouthak tuh kana himaimah ve. 

©Siamsinna leh Vakiangbu