PASAL NEITA VE !

~Kattie Mawite

Seng dim teek a singpua in ka lawmnu toh kapai uhi. Singtang ah bel peih leh peihlouh a gentheih kei. Sing ki neikei leh an le kihuan theilou di ahihman in lou kuan a ngaihkei nakleh singpua in kikuan zel hi. Kei bel singtang nasem khalou pawltak kahi a, himahleh sepkhak louh luat bel kanei samkei. Tuani in leng, school khawl laitak ahihman in singpua in kakuan uhi. Lamtou ah kapai tou nitnit ua, ka singpuak uh giksim ahihman in ka hatpai zoukei uhi. Huchia ka pai kawmkawm in ka houlim kha nilouh ua, siamsinna toh kisai ka kikumkha uhi.Huchia ka houlimlim lai un ka lawmnu'n, "Pasal neita ve ki chihchih mahmah ka zaning gawp. Nupi hi in papi hitaleh, hon mu masa hon mu nanung in pasal nei dia hon sawl uh. Mi'n bang lungsim neia bang dinmun a ding a chih theilou pi khawnga a utut uh mi genkhum ua, ka zachim gawp" hon chikhe mawk hi.

Ka lawmnu bel akum a gen in upa lua ahinai kei. Kum 20 valzek ahipan. Siamsinna lam ah B.A. zil lel ahi a, khatvei exam nawn leh zouthei di dinmun ahita hi. Agendan theichian nuam in kenleng, "Bang chidan in eita?" Chi in ka dong zom pah hi. Khatvei hong khoisa huau in, a gawl bang hon khuah thak zozen hi."Ngaihtuah ve, keile hi nangle hithou. Kei dinmun hon gen leng na theisiam di. Singtang a piang in singtang a khanglian kahi chileng ka khial kei ding. Kaneu apan skul kana kai a, tuni chiang in B.A. bang ka phatou ta. Himahleh huai ah nek muhna taak bangmah muhsuah ka nei naikei.Kaneu apan tunitan in ka nu-le-pa'n ka skul kaina ah bangzah asengta di ua? Tha-le-zung bangzah a sengta di ua? Lunggimna, mangbatna bangzah vei a tuak ta di ua? Gen a genseng di ahikei. Asum sen teng uh bang hisap tou a gawmtouh theih hileh bangzah a phata mawngmawng de aw chih bang theinuam top kahi.Huchi kawmkal ah, tu'n ka siamsinna ah bangmah pi muhtheih di omlou in pasal nei mawk leng kaneu apan tunitan bangmah complain omlou a hon vaklian tute a kipak duam? Kenchu ka gingta lawmlawm kei. Pasal ka neih di deihlou chu ahikei di ua, himahleh pasal ka neihnung leh tu-le-ta te tana hamphatpih theih di, khosakna neuchikbek zangkhaisak thei dia ka om di hon deihsak zaw di un ka gingta.Mi khenkhat in 'numei khawng lai zil saksak ngailou pi. Pasal anei ua, en kitangkha nawn tuanlou' chia agen naksek uh tuh dik kasa hetkei. Numeite zilsak a siamsak semsem di ahi kachi. Tulai khovel diakdiak ah, tapate sangin tanute'n a nu-le-pa a kipaksak zaw ua, it le a it zaw uh. Nu-le-pa tampi tanute' kep leh etkol a om uh chih haih vual louh ahi.Tuateng ban ah, numeite lai asiam uleh ta aneih chiang ua atate uh hilh thei pah unchin. Kenleng nau pasal chu kanei a, amah a hoihkei ka chihna hilou in, kenle ka nu-le-pa kipahna dia mun poimohtak luah kha veve kahi.Hiai singtang khosak haksa tak apan ka suahtak theihna omsun tuh ka laisimna himai hi in kathei. Ka siamsinna chauh nek a chingkei a, ka khosakna domkang ning ka chihleh tuh nasa sem a lai kasim a, sepna keitoh kituak hun ding kamuh ngeingei poimoh in kathei. Huai ziak a pasal neilou di bel ka chikei, himahleh neihpah ka sawm kholkei. Nu-le-pa lungtup leh kipahna mualsuah masak tuh Pathian deihdan le hi din ka gingta.

Ka nu-le-pa'n kei ziaka sum-le-pai, tha-le-zung leh ngaihtuahna asen tengteng uh ka din zou di/ka din di ka chi zenzen kei. Himahleh, kei ziak in ka nu-le-pa kipak sam uhenla, ka leitung pathian ahihna uh toh, kei ziak in khatvei bek pahtawina tangkha le uh chih ka ut petmah.Huaiziak tak in, pasal neih di tuh ka ngaihtuah nai tadih kei. "Pasal neita ve" chih kampau tuh baihlam lua himahleh, mi dinmun, lungsim leh lungtup theilou pi a, gentheih tah chi a mawk gengen pen zadah mahmah kahi"Chi in hon gen duanduan hi.Dik kasa khop mai.

A kupbeh na dile ka theikei. A thugen ka AMEN mahmah chih latsakna a kasengpuak gikpi toh ka lu ka suk ngauh louh ngal genbeh di dang kanei hauhkei.

©Siamsinna Leh Vakiangbu