GENERATION GAP

By ~ Lun Khuptong

Bang chik mah ah tangthu gelh ngei leh bang chik mah article gelh ngei kahi kei hi. Himahleh, awlmoh hau leh alanglang a facebook khong a mi post te sungin leh ngaihdan comment ve samte lak ah khat kahi hi. Huai chi komkom napi in puak nat leh khongaih kana hau mahmah hi. Khatvei Pa Khamkhokam Guite laibu gelh kasim na ah huchi a gen hi ''I AM A WAITER WRITER'' a chia a gelh lamtak kana mu aw chia thumu kisasim in keile khatveivei ka ngaihdan ahong pai chia zaw paragarph khat khong gelh theisam veng aw zaw chi'n ka lu bang ka susuk ngatngat hi.

Naupang chik himahleh 198Os lakvel mite lak ah khat kana hihi. Mipil leh siamte gendan in hiai hunvel lak ah piangte kha generation masapen kangtalai/lengpei khong ah tuang thei leh tablet/laptop tuailai lai a zang kopte ahi uh a chia ua. Huai agen uh kazak phet aw dik hina mai zen e a diak in Lamka leh a sehvel lakte ding diak bang kana sa mahmah hi.

Hiai komkal lak ah piangkhia leh khosa a hei tou kahi man in khang ki bansapna eite lak ah leng muh theih tam hina mahmah e chih ding kei mah mimal in kana nei gu sim hi. Kum nga guk lak khong ihih lai a tungpeng phial thoh khong pek a khoul kai niaunuau ah nisapi nuai a sun nitumtum a tai theite kihi a, tua pek khitkhit chiang ah kisil dia koimun hiam delh chenchen in a dakkal a dakkal ah kisil in ki damlou tuanlou ana hidan ahi hi. Awle tulai ate huchi bang in omle uh damlou ngeingei ding ahi chih ngam huai phial leh kilawm hin kana mu hi.

Huai kawmkal in i hon gen khiak nuam leh kana puaknat mahmahte hun khop a om hi. Eilak a diak in Lamka ah technology a hong changkang mahmah a tua technology changkhang mahmahte khovel ah businessman lianpipi ten a tawi dideuh ua kibawl mobile bang zah hiamte khong inlam ah mantam pipi ah a tawi uh video etna khong ah ki zang maite ka muh chian min a neihsa ua a lei uh himahleh huchi mah a deh aw chin kei mah mimal in kana kis sualsual ta get mai hi. Ahihleh, bang tuma bang ziak a huaite zang uh ata mai a. Internet connection khovel ah thiltung leh tutuam zakna ding a zat ding chih tuh thiltup pipen khat ahi mai thei chih tuh kangaih dan khat ahi. Himahleh, businessman leh mi poimohten tuate meeting a telman louhna ua leh bang hiam poimoh na liauliau a dia a connection khong uh ana himaimah zel hi. Awle, i neizou ua i hausa ua i leizou hi ahi chi ding hile hang lah min amau lokhiaksa a ngawingawi a lei ua atawi uh ahih lai in ei atam zaw ten ipa Bank account kikoppih a i lei ana hidaih mai zomah ahi hi. Internnet pack man ding bang leng ahon piak kei uh leh insung a heh theilai mite kihi zomah lai hi. Bang i gen ta dia huchi ding mah ahi hia? Chin hiai ah leng ka ngeihsutna a bei suk zel mai hi.

Koimun ah pan in midang ei Lamka ah hong zin ta le uh lah Pahtian thugen ding bang a bul ah hon panpih maimah sek uh hi. Eilah nu leh pa apan Khristian an kihita sam, Bang ziak ahi tamai diam? Mimuh a zaw ki khristain zou nailou deuh mah ahi diam? A tung ah ka gensa mah bang in awlmoh hau leh suangtuah ding zawng hatmi kihi siam hia phut hat ahon chi zomah duam ah maw. Huai ahon chi thei bang eilak ah leng i om mai thei himahleh, keina leh khiak dan zaw huai dan hilou eive unau ken kana awl moh ziak a hon genkhia a khat leh nih in ah theihsiam a ana kibawl theih khakleh chi ka hi zaw eh.

©Siamsinna leh Vakiangbu