HICHITEL DI ANA SA LENG ZAW...!!

By : Leon Guite

Nikhat office ah buaitaka nasem a ka omlai in, pasal khat nak noh hehu in ahongtailut hi. Kakiang ah gimtak a nak thuthu kawm, "Sap, kamin ahih leh Khuppu ahi a, ka innluahna hong etpih in, sikha laang ahi." chi in hong gen hi.

Kenleng ka buailaitak ahihmanin, thupilak lotel lou in bangziaka sikha lang chih hong gen mawk ahi hiam chih kana dong hi. Aman ahon dawnna pen ah kalung ahonglut thak mahmah hi. Hichi in ahon dawng hi, "Zanhal apan tua inn kaluah ahi a, azan masa inbel bangmah thawm a omkei, a zan nihna ahong hihtakin, lumpan chih ding in thawm ahong kipan a, gingthei tuamtuam toh sawt kuamtak bang khawng ahong kizut phei hi. Ka zi leh kataten lah hon imut san ua, khua himhim aphawk kei uhi. Keibel athawmteng za kahihman in laukawmtak in kana en en hi. Sawtkuamtak thawm ahong om nung in, numei kum 28 vel ding mi kakiang ah ahong ding guih hi. Laulua kahihman in puan kakilukhuh hi. Himahleh aman kapuan silh hon hawk khia in kakiang ah gen ut nei hileh kilawmtak in a hon en hi. Laulua ka hihman in bangmah genlou in lin petmah in ka ling hi. Aman leng lungkham meltak in hon en-en a, atawp in awl in amang hiau hi" chi in ahon dawng hi.

Ken le'ng Khuppu om na vengmin ka dong a, ahon hilh zoh in ka heutute hilh masak a, a amau thupiak dungzui a va enkhe ding kahih dan uh zasak in kapaisak nawn hi.

ASI apan a SI a promotion ka ngah nung in heutu te'n Mualzang khua ah hon koih uhi. Mualzang khua ahih leh Zogam a ding a khopi lian lua hilou lah nuamtak mai leh etlawm tak mai tang tung ah kiphah zihziah ahi hi. Akhua anuam mahmah a, buaina chihte bangmah zak omlou in athoveng mahmah hi. Himahleh tua ka thuzak in ahon sulung phawng mahmah hi. Bangziaka khopi galmuang tak ah hiai bang thil om mawk ahi a? Thului kisel om ngei ding ahi chi kawm in ka heutu te kiang ah ka report tou pah hi.

Ka heutute' hon thupiak bang in, kanuai a te mi 10 vel tonpih in Khuppu te' omna veng Phuntong street ka manoh uhi. Vengnawl lamdeuh ahih man in katun un ni akai ta hi. A inn uh vengnawl pek a om ahi a, amun a dai pah zikzik hi. Kou leng amun ka tun un aman gate ah ahonna ngak a, a zi leh taten alauhluat man un inn dang ah ana kisuan mai uh ahihdan hon hilh a, inn chabi kei kiang ah hon piak kawm in, tualthahna om hidia gingta in hoihtak a check bawl ding in ahon hasuan kawm in panpihtheih na kong bangkim a hon panpih dia mansa ahih dan ahon hilh hi.

Gate hong in innsung ah ka lut a, innsung ka lut phet a ka mit la pah khat ahih leh innkuan a lim kilakna kitak (family photo) ahi. Khuppu kiang ah kuate lim hihiam chih ka dong a, aman inn neitute' innkuan lim ahih dan ahon hilh hi.

Innsungteng hoihtaka ka etchet khitveng nung un, ka naupangten lau uh ahiman un pai ding in ahon ngen uhi. Himahleh kei bel athu suikhe teitei dia heututen thu ahonpiak uh ahihman in pai kasawm kei a, alau teng pai a, adangteng giah di ahih dan kagentak in kuamah hon paisan ut omsamlou in ka giak vek uhi. Keibel keichauh in lupna room ah kalum a, adangteng common room ah kagiak khawmsak hi.

Zan hong sawt hiaihiai in suahlam ah khapi in kei hun tung hitah e.... Chi hileh kilawm in ahong suak khe tou giaigiai hi. Huchihlaitakin, thakhat in khua ahong vaktakin ka heute toh Police Station lam zuan in ka kiknawn uhi. Ka naupangte lah lau lua kisa in, "Sir, hiaimun zaw hohnawn dah mai ni uh aw...." a hon chi chiat uhi. Kenlah bangmah gentam tuanlou kahihman in lamdang ahonsa mahmah uhi. Alak ua khat in kakiang ah, "Sir, nang zannitak a thawm zalou maw? Lauhuailua, keibang ka pang teng hong kisawksawk maimah. Ka kiang khawng ah ui lian pipi hong ham kongkong uh. Laulua kahi. Suty honpe maive aw..." hon chi hi.

Ken le'ng dawngtam lou in, thawm za kahih dan leh lau huailou a ei panpih di ut a hong veh ahihdan ka gen leh lamdang asa mahmah uhi. Huchi'n station katung ua, ka seniorte' kiang ah thil omdan teng report kapia hi. Amau leng case register bawl in a case pen kei suikhiak ding in ahon pekhia uhi. Tuatak in ken le'ng nitak chia amun phak nawn ngai ding a hihman in sun hun teng off ka ngen a ahon phalsak pah uhi.

Ka man tak in, inn lam kazuanpah a, toihnu fon kawm in sun chia aman aleh a inn ua va lengla thei di ka hihdan ka hilh suk pa hi. Aman leng ngaklah taka honna ngak ding ahih dan hon hilh pah hi. Kei le'ng lungnuamtak in inn ka tung a, hoihtak a kisil siang hiuhiau in ann ka hon ne hi.

Kapa damlou lupna ngak a om kiang ah, a vualzawlna ngen in kava tu hi. Aman hon vualzawl a, adam lai ngei a ji kaneih ding a deihdan ahon gen hi. Kanu ka en a, nupi mawltak himahleh innsung hoihtak a kemzou in, phunlou hial a kapa nasemzoulou lupna ngak a om akep ban ah kei atapa neihsun Lalboi a dia niteng thumna ahon neihsak zoh gige na ah thupi kasa mahmah hi.

Ann ka nekzoh in ka lunglai honkuai ka it Kimboi mu ding in a inn uh lengtonghoih street lam ka manoh vengveng hi. Ka tun in kamsiamtak in honna vaidawn a, singpi leh sang limtak ahon piak ban ah; a muk nou ngiingei a itna tak toh a hon tawp vengveng mahmah nuam peuhmah ei....?!!

Awl in ka it tak Kimboi toh itna thute ka hong kikum uhi. Ka pa hon thuhilhna te kagen leh, aman le'ng ka deihdan hon nial kei mah leh a laizilna zoh masak a ut thu kamsiamtak in a hon gen hi. Ken le'ng ka thil sui alakloh toh. Ama laizilna azoh hun chiang a ngaihtuah thak ding chi in ka gen hi. Huchia nuamtak a ka kithuahkhawm laitak un, ka phone ahong ginga, ka pick up leh ka sappa ana hi a, kintak a station lam zuan ding in ahon hilh hi. Kenleng ka it Kimboi kiang ah thu omdan hoihtak a gen in, kintak in station lam ka zuan pah vengveng hi.

Police Station katun takin Khuppu ana om a, aman kakiang ah misinu' pasal omna thei ahihdan ahon hilh hi. Amin ahih leh Lelpu kichi hi a, tulel a suamhat pawl te makai liantak khat ahihdan leh, khamtheih a sumdawnna liantak enkol ahihdan ahon hilh hi. Kenle'ng Khuppu bengvakna tung ah kipahthu kagen a, matkhiaka gawtna aphu tawk piak ding ahihdan ka hilh hi. Himahlei tu-le-tu a ngohna kichiantak omtheinailou phot ahihman in, sikha pen kiang ah athu dottel pah hoih sa in ka plan teng ka heutute ka hilh pah hi.

Heutute'n ka tup dan leh hih sawm dante nialna omlou leh hiai dinga muanpen ka hihdan ahon hilh uhi. Kenle'ng athuchian theih hunchianga lawm poimoh ding kahihdan leh ka kithuahpih ding kalawm hoih mahmah Muanpu, ASI, tulel a Lamka Police Station a ompen ana contact ding in kangen ngal hi.

Office nna teng ka zoh un, inn ah ka pai a, kisilsiang zoh in ka nu kapa toh ann kane khawm uhi. Ann nekzoh in ka sungte kiang ah ni bangzah hiam sung inn hongpha manlou maithei kahihdan leh lunghimoh lou ding in ka ngen hi.

Ka nu'n thumna hon neihsak in huchi'n lengtonghoih street lam manoh in kahong kipan khia hi. Tutung inbel kei vuak in kakuan hi. Ka naupangte'n laugawp uh ahihman un ka tonpih nawn se kei hi.

Amun katun in khua mial ding in akisata a, kha leng athupina suahkhe ut in mualdawn ah ahong dawk tou chiaichiai ta hi. Kei leng sikha toh kakimuh tuahna ding in mun ka bawlfel masa a, table khat doh in apang tuak ah chair ka koih hi. Akhat ah ka tu a, ka pistol leh ka lukhu table tung ah koih in sikha hong pai ding kana ngak hi. Ahong paipah louh man in ka ihmut suak lua in kana ihmu kha hi.

Ka mang in ka it Kimboi toh mun nuam mahmah khat ah kana vak khawm uhi. Itna thute kikum khawm in, pakhuan kilawm tak lak ah kana vak khawm helhel uhi. Kimboi in kakiang ah, "U Lal kon itlua, bangteng hongtung in, haksatnaten hon bawm mahleh, nanga din ka gin-om gige ding. Nang leng kei a din gin-om gige in aw..." chi a hon kawi kip tinten kawm in ka ang ah hongdaktou in amel kilawmtak toh hon entou hi. Ken len ka it Kimboi enkawm a dawng ding a kakisaklaitak in, thakhat in vanpi ahong ging a, kek ngaihtak hong kia in aging in ahon phawng hi. Thakhat a khanglou a, ka ma zawn ka et leh, sikha pen in kei honna ngak in ka ma a chair kikoih pen ah ana tu hi.

Ken leng kisuanglah kawm tak in ka imut san khak ziak in ngaihdam ka ngen hi. Aman leng theisiam ahihdan hon gen kawm in a tanchin ngaikhe dia hun kapiak ziak in hangsan ahonsak dan leh kipak mahmah ahihdan ahon hilh tei hi. Huchi'n awlawl in atanchin hiai bang in khase kawmtak in akallak ah gawlbing kawm a gentheilou a khawlzel in ahon hilh hi.

"Kou unau mi 3 kapha ua, kei numei omsun kahi. Ka pa contractor ahi a, kanu ahih leh ka saptuam ua Dorca President ahi. Ka pasal Lelpu toh kum 6 paisa a kithei kahi ua, sawt kingaiman lou in ka kitaipih pah uhi. Ka nu-le-paten ahon deihsak louh man un tamveitak kaihkhen ahon sawm ua, himahleh it lotel kahihman in ka pasal kalen tinten hi. Atawp in hon kaihkhen zoh louh nang uh chi'n, court ah kitenna ka bawl uhi. "

"Ka kiten tung un bel nuam kasa mahmah ua, kakituak mahmah uhi. Pasal nei hoih kisa in aguk in kakipak mahmah hi. Bangtan hiam kahong kiten nung un ta masapen ding in numei khat kahon nei uhi. Ta kaneih nung sawtlou in ka pasal omdan kikheng hiaihiai in ka hon thei hi. Nitak chiang in pawt khiak a ching sek a, ahong pailam himhim kathei ngeikei hi. Sun chiang inlah inn ah ihmu den zel ahihman in, ka pasal toh hun ka zang khawm tawm mahmah uhi."

Awl a ahu honla thak in tomchik ahong khawl a, huai hunlem la in kenle'ng apasal in bangziak a that mawk hi hiam? Chih leh tulel a apasal koi ah om ahia? Chi'n ka dong hi. A thugen teng laipuan ah ka gelh khia a, hoihtak in ka kemhoih zel hi.

Aman le'ng, "Awl in i gen di aw, ka khase lua a hoihtak in ka genpah theikei a na ngaihsiamna ka hon ngen hi. Kathuakna te hon theihpih a, ka thugen lunglut tak a hon ngaihkhiak sak di nang na om man in kakipak petmah hi." chi in ahon dawng hi.

Sana ka et leh zinglam dak 3:30 bang ana pel manta ahih man in ken le'ng, khua vakpahta di ahihman in na honsunzom thei ta ding hiam?" chi in ka dong hi. Hon dawng dia akisak laitak in, thakhat in huih a hong nung a, ui te naktak in ahong ham kongkong uhi. Huchih laitak in Ngainou in kakiang ah, "Sap hon ngaisiam in aw, ka hun a bei nawn di ahita. Ka lawmte ahongpai ta uh, nitak nawn chiang in sunzom nawn maini aw... Theisiam in aw..." ahon chi hi. Ken le'ng "awle" chi'n ka dawng a, aman leng mangpha hon khak in awl in a mang hiai hiai hi.

Zingkal ka khanloh tak in table tung ah kingai kawm a ihmu kana hi a, kintak a thoutou in kakim kakiang teng ka vel a, bangmah kamu kei. Ka lai gelh teng ka bag ah guang in, ka phone ka et leh ka it Kimboi apan msg 5 tak leh miskol 10 veitak ana om hi. Msg te ka sim leh ka ngaihsak louh ziaka alungsim anat dan leh, ka ngaihsak louh ziak diktak a kiang ah ka gen mateng hon houpih nawnlou ding ahih dan agen hi.

Ka it Kimboi ka phone dek leh a phone switch off in a om zomah a, ka ngaih toh ka hehtha hongsuakphut in, kin a kin in innlam zuan in katai pah hi.

Ka inn uah bang sese lou in Kimboi te innlam ah ka taisuak hi. A inn uh katun in anu chauh ana om a, Kimboi ka kan leh a pute veh dia tuzing mahmah a kisa tawm a zinkhia ahihdan ahon hilh hi. Kenleng dongsau nawn tuanlou in kana pai ding chi'n ka hong taisuah nawn hi. Ka inn uah tomchik bangzual in office lam ah kapaisuak ngal hi.

Office katun in bangmah leng ngaihtuah theilou in mun khat en in katu melmul hi. Sawt tak huchibang a ka om nung in ka it Kimboi ka phone zel a lah switch off chih ngen dawnna ka ngah hi. Ka thilsui pen lah lakloh, ka it toh kimuh a thu omdan hoihtak a theihsiamsak lah ut in ka lung abuai mahmah hi.

Atawp in ka training lai a ka kichiamna mah len den phot ding. "Ka gam ading amasa, ka it ananung in." chi'n ka gari lakhia in ann leng nenawn selou in ka lawm sikha omna lam nitum kuan in ka zuan nawn vengveng hi.

Lungkhamtak a ka tutna mun ngei mah a ka tut ngetngut lai in ka liang ahong kikhoih a, kiguih ka hih man in tua khut pen leng thakhat in akila kik zot zozen hi. Kua himahmah hiam? Chi a kinung hei kawm a ka et leh. Ngainou in nui hiuhiau kawm in, "Nahong hoh nawn thei a kakipaklua..." a hon chi hi. Ken leng ama kiang ah, "Na thubuaipen zohsiang pah ut kahih man in tunitak na gen khit mateng nahon paisan thei kei ding." ka chi thuksam hi.

Huchi'n aman ahon sunzom nawn a, ken laipuan in athugente kana gelh khe zel hi. "Kum khat leh akim khawng kahong kiten tak un, Ka Pasal Lelpu agial ahong dawk panpan ta hi. Niteng in ka sungte kiang ah sum ngen ding in a hon sawl gige a, ka nial chiang in vuak chitak in ahon vua hi. Atawp in ka nu-le-pa ka inn uah sam in ahong hoh tak un ka pa kiang ah lakh 3 apiak kei leh that ding ahihdan gen in vauna bawl hi."

"Ka pa'n leng pe ut sam lou in ki nialnial uhi. Kei leh kanu room khat ah sawl lut in ka om uhi. Bangtan hiam nung in kei mah leng sap khiak in ka om a, ka pa muh lai ngeingei in ka dek ah thau a kap in ka om a, kei nung in kapa leng kap in a om nawn hi." chi in khase tak a kap kawm in Ngainou in ahon gen hi.

Kenle'ng, "Huchi ahihleh, na luang uh koi ah phum a om hi hiam? Na nu leh natanu la bang dinmun a ding ahi ua?" chi in ka dong hi. Sawt tak akidik huthut nung in awl in, "kei leh kapa luang ahih leh huansung a, singgai bul ah ahon phum a, kanu ahih leh tun mihai kepna ah a om a, ka tanu ahih leh koi gam tung ahia chih kathei kei." chi'n ahon dawng hi.

Ka kiang ah athugen ut teng agenkhit in atawpna din ka kiang ah, "Sap, hehpihtak in kei leh ka innkuante phu honlaksak in, lungmuangtak a kakha a tawldam theihna ding in. Kanu ngeileng tun Agape Hospital ah etkol in a omlel vaveh zelzel sam in aw... Na hon poimoh na dang a om leh hiai inn ah hong inla kamin in honsam lechin ka hong pai pah ding." chi a hon gen zoh in awl in kongkhak lam zuan in apaimang nawn ta hi.

Zingkal ka khanloh in katutna ngeimah ah kana omlailai a, kintak in kathutheihte ka heutute kiang ah report bawl ut in ka kikhoh khepah vengveng hi. Ka heutute kiang ah bangkim ka muh khiak teng report ka bawl khit nung in, amau phalna la in ka nuai ate mi 5 tonpih in Ngainou hon hilh namun ah a luang uh kava tou khia ua, postmortem bawl ding in hospital ah kathon uhi.

Postmortem result teng ahong mankhit in court ah case file in Ngainou' pasal Lelpu mat theihna ding dan ka ngaihtuah uhi. Hearing ni ding ahongtun in, court ah mipi atam mahmah hi. Newspaper teng in headline ah tuangsak vek uh ahihman in mipite'n hiaibang tualthahna sawtpi imguk a aompen thangpai in lampi zuihna nei in solkal ah memorandum khia in tualthattu kintak a matkhiak a, akituahpih bang gawtna peding in solkal ngen uhi.

Zinglam dak 10 agin toh kiton in court hearing pat ahi a, lekha ka gelh khiak teng court clerk in simkhiakna ahon nei hi. Lungmuangtak a Lelpu mat theih dia thang-awk ahita chi a ka omlai in buaina khat a hong dawk kheta hi. Huaibel, Lelpu ukil pa'n hiai laigelh pen a gentu suai a omkei a, phuahtawm maimai leh Lelpu sukminsiat utna maimai ahi ahon chi hi.

Ngainou suai a omkei ngut hi. Mipiteng leh ka heutute natawm in kei ahon mohsa ua, zuauphuaktawm a thubawl hin ahon ngoh uhi. Hiaibang zahlakna chikmah in katuak kha ngeikei a, tuak din leng kakikoih kha kei himhim hi. Gending theilou a, zahlaktaka bangtan hiam kun dedu in ka kingaihtuah ngetngut a, thakhat in Ngainou suai lak theih ding ahih dan ka hon ngaihtuah khe guih a, judge pa' phalna ngen in Suai la ding in kintak in kakuan khia hi.

Amun katun in Ngainou kasam pah a, himahleh bangmah dawnna kamukei. Kasam zel a himahleh kuamah in ahon dawng kei hi. Lungkhamtak leh kingaisetak kawm a khemzoh dimdem a om kahi maw chi a khasetak a ka omlaitak in ka kiang ah Ngainou ahong ding a, awl in, "Lalpu, ka hongpaitheih pahlouh jiak in hon ngaidam in aw, na poimoh kathei hi. Table tung ah na lai leh na pen koih in suai kahon kai ding. Vualzou ding nahi, lungkham ken." chi in ahon houpih hi. Ken leng a chih bang in ka hihpah a, na mit sing in ahon cih man in ka mit ka si a, sawtlou nung in hak din ahon sawl hi. Kamit ka hahtak in Ngainou a om nawnkei, himahleh table tung a laipuan ah a suai kikai sa in ana om hi.

Ken leng Ngainou kiang ah za in zakei mah leh kipahthu gen molhmolh in, kinohtak in Court lam kamanoh pah hi. Ka tun in suai omna kalak a, himahleh ka bawltawm ahi chi'n Lelpu Ukil pa apang tinten hi.

Bangtanhiam kiseltuahna a omnung in Lelpu te azou ding bang a ahong kilat tak un, Ngainou in Court ah kiteng ahihdan uh agen kaphawk khe guih hi. Huaitakin court a akitenna certificate uh toh tua laipuan a suai kikai pen Judge in a hon en tuak a, kibang geih ahihman in Lelpu ngei leng kilep khezou nawn lou in mohtansak in a omta hi.

Lelpu Police Station ah thudot in a om a, akipuanna apan in gintak huailou phial hin lamdang sakna toh kadim hi. Ngainou ngei inle'ng, "HICHI DI SALENG ZAW...." achih ngei kagingta hi.

Mualzang khua nuam mahmah mun a Phuntong Street kichih namun veng nuam mahmah ah Lelpu in khovak ahon mu hi. Anu-le-pa te kituaklou in niteng in kina gige uhi. Apa'n nitak teng a zukham in anu a vaw gige hi. Etkolna hoihlou apan khangkhia chih mahtak Lelpu ngei leng a ut adah a khosa in niteng in sualna tuamtuam sem in, gilou pawl khat toh hun zang in omden uhi. Amau pawlte, "DRAGON FORCE" kichi in mite suam in khamtheih in sumdawng ua, galvan hoih taktak toh khosa den uhi.

Lelpu mahleng Solkal in wanted in koih ua, alutang manzou penpen dangka tampi piak ding chi in thupuan bawl uhi. Amah ngei leng akiselna ding in mintuam zang in sumdawngmi dan a kibawl in hinkhua honzang hi. Himahleh, a thilhih a tawp tuankei, aguk in a gang pawlpi te toh kithuzak tuah in gamtang khawm zel uhi.

Hun hongpaizel in, nikhat Lelpu in a dawr ah van hong leh nungak melhoihtak mai khat hon mukha hi. Hoihsa lua ahihman in niteng sunteng in alunglai ah vei den in ngaihtuah den hi. "Kamuh nawn hunhun tuh...." Chi'n hunlem zong in phe tettet zozen hi.

Nikhat tua nungaknu mah in a dawr ah meh ding lei in vapai kha nawn a, huai hunlem la in Lelpu in ana houpih pah hi. Bangtan hiam ahong kihou nung un, Lelpu'n amin dong a, nungaknu in amin Ngainou ahih dan leh dawr apan a a inn uh gamla lou ahih dan kamsiamtak in hilh hi.

Huchi'n ahong kimutam deuhdeuh ua, Lelpu kam khumpi kha ahihtoh tomkha sungin Ngainou lungsim teng a zoupah hi. Ngainou in Lelpu nasep leh hihna bangmah theilou ahihman in mihoih tak tak ding sa in deihchibang na tel hi.

Lelpu inbel amelhoihna chauh leh anu-le-pa gou etlahna ziak maimai in angai bang in a om hi. Ngainou pa' lah hausatak ahihman in Lelpu in atan theihna di dan lampi ngaihtuah in, tua ding in Ngainou zang hi.

Huchi'n sawt kingai manlou in ahong kitaipih pah uhi. Ngainou nu-le-pate'n Lelpu omdan leh asulnung bangtan hiam theihna nei uh ahihman un, amakpa ding un deih deksuai lou uhi. Tamveitak atanu uh sapkik sawm mahle uh Lelpu kamkhum nialzoulou in kaikhen zoulou uhi. Anu-le-pa ten khen sawm teitei uh ahihman in atawp in akhen nawn theihlouh nang un court ah kitenna bawl uhi.

Akiten tunglai teng uh bel Lelpu'n a zi duat mahmah a, it tak bang in enkol hi. Ngainou ngei inleng pasal neihoih kisa in aguk in kipak mahmah hi. Himahleh, apasal bel lawmte toh a thil hih uh a ngeingei in apaizomzel a, inn ah giak vang mahmah in a zi toh hun tam zang man lou hi. Hiai in anupa kal uh kinakna tun zeuhzeuh a, himahleh, Lelpu in a dawr van di khawng ngaihtuah ngai ban ah akhenchianga manhak nikhua khawng a dawr a giak den khazel chi'n a zi khem lungdam zou zel hi.

Kum khat leh akim bang ahong kiten nung un tanu deihthoh huaitak mai ahon nei uhi. Ngainou in apasal kipak mahmah di asak leh, apasal in lah bangmah gen lou, ngaihsaklou deuhdeuh in om hi. Inn ah lah giak ngei nawn lou, ahong pai sunsun chiang in zukhamsa ngen in inn pai a, a zi phil nang zong in, hehpihna bei in vaw gige hi.

Ngainou khasia kisa in hunteng zanga, apasal neikhial kisa in khasia in kapden hi. Niteng in apasal in a pate' kia sum ngen ding in sawl gige a, aman anial chiang in vuak in omzel hi. Nikhat akilam-et hetlouh in Lelpu in a zi Ngainou kiang ah nui heuhau kawm in...

"Itluat, tuni na innkuante toh ann nekhawm ding ihih man in, meh limpen huan ni in kipaktak in ine khawm ding uh, ama a konna suk gentheih khakna te hon ngaidam in aw" chi'n gen hi.

Ngainou in apasal kam apan a zak ngei nawn louh, za ding ale a kinep phak louh thute azak takin kipakpetmah a, anute hong tungkal ngaklah tak in nui hiuhiau kawm in omden hi. Himahleh apasal thilgel bang hi hiam chih atheipha sekei hi. A pasal neihnunga, a sungkuante toh akimuh masakni pen ama ading leh asungkuante ading in hiai leitung ah ahunzat khawm tawpni uh asuak maimah hi. Anu'n apata ua siluang amuhtak in pawna lua in alungsim paisual in tu'n lungsim vengloute kepna mun ah kep in a om hi.

Lelpu ahih leh a tungthu a thutanna tawp ngak in tan-in mial bikbek sung ah khum in a omta hi. Hiai thubuaipen ven khat a veng photta ahihman in, a case closed hun ding tung a heutute thu ngak in ka om lellel uhi.

Office apan gimtak leh tawltak mai lah lungsim zangkhai tak in innlam kazuan hi. Inn katun in, ka nu'n kong ah honna vaidawn a, athumna te lohchinga damtak a innlum katung nawn theih man in Pathian kiang ah kipahthu ahon gen pih hi.

Ka kisil siang zoh in kanun laithon khat nuisim heuhau in ahon pia a, kenleng lamdang satak in ka la a, ka et leh ka itpen Kimboi apan anahi hi. Kipaktak in simpah ut in kaphel pah vutvut aleh ka botkek khazomah lai a, heh kisa a kaphun numnum leh ka nu'n nakpitak in hon na nuihsan ek-ek zomah hi. Kei leng heh kisa in kanu kiang ah, "Nabang a na nuih?" ka chih leh, nui hiuhiau kawm in, "Bawi i itpen te apan a thu zak ding kilawptak leh ngaklah tak a i phiat tettet bang in, na omlouh zek chiang bang un, kou na nu-le-pate'n nou kata te uh toh nuamsatak leh ki it tuah tak a hun zatkhawm nawn kal ngaklah taka phe tettet kawm a honna ngak gige kahi uh." chi'n a hon dawng hi.

Kanu thugen kazak tak in ka hehna tengteng ahong bei guih a, ka nu hon itna kamu chian semsem hi. Ken le'ng kanu kiang ah ngaihdam ngen kawm in, ka itpen laithon kanu zak ding in kasim khia hi. Tua laithon ah Kimboi in ahon hehsan khakna te ngaihdam hon ngen a, ka ngaihdam theih a, kapom nawn theih ding aleh zingchiang mahmah a hongpai ding ahihziak in, Station ah ana dawn ngeingei ding in a hon ngen hi.

Kanu'n ka ngaihdan ahon dong a, ken leng Kimboi ka itdan leh ka suk heh khakna ziak diktak ka hilh hi. Huchi'n aman kakiang ah ki ngaidamtuah ding leh, hoihtaka hinkhua zangkhawm dinga ahon deihsakdan ahon hilh hi. Tua nitak lungnuamtak in ka om a, zing khua ahong vak dingkal ngaklah tak kawm in imu theilou zen in ka it Kimboi toh ka kimuh hunchiang ua ka houpih ding dan, ka om dingdan ngaihtuah in kei chauh in kuamah theihlouh in ka zalkhun tung ah ka nui heuhau den hi. 

Katheihlouh kal in kana ihmu kha a, thakhat in ka phone ging in ahon phawng hi. Ka pick up leh ka SHO pa ana hi a, akintheibangpen a Police Station lam zuan ding in ahon sam hi. Ken leng bangthu om a chih kakan dek pat leh a koih man a, kintaka kisa in zinglam dak 3 vel in Police Station kazuan hi.

Amun katuntak in police siluang 5 anakikham a, lamdang sakawm tak in SHO pa kiang ah ka dot leh, aw ling delhdelh kawm in Lelpu alawmten hong pokhia uh ahihdan ahon hilh hi.

Huchi'n apoimoh hih di omteng kahih fel vek zoh un, asi teng luang damdawi inn ah post mortem bawl ding in kakhak uhi. Mipite lah sousang gawp uh ahihman in khosung pumpi buai chihtak in buai hi. Police te'n amoh tang kahihman un, akintheilam a Lelpu leh akaih zatam te kintaka mankhe ding in mohpuakna kakhut ah hon pekhia uhi.

Kei le'ng ka it Kimboi dawn ding in kintak in station lam kava delh hi. Gari ahong tuntak in ka it mel di kamu takei hi. Ka zonzon hang in kamu kei a gari pupa ka dot leh lah mukhalou ahihdan ahon hilh hi. A dendeuh in a innkiangte uh tangval khat ka kiang ah ahong pai a, lampi a zun tha dia gari a pan a ka kum khiak un ka mu kha a, hilehle ka kipat khiak nawn un kamu kha nawn kei a hon chi hi.

Ka lung akham mahmah mai a, bang loh a hoih ding ahia le? Ka it Kimboi, koi lam ah vaitham nahi a? Chi'n ka khoisa vungvung hi. Min ana man uh ahi diam? A hih kei leh gari in taisan kha? Ka lung a buai mahmah hi.

Atawp in awl in kanchian thak mai ning chi a kiknawn ka sawm lai tak in, Kimboi pa'n a hon phone a, kin tak in ka inn uah hong hoh in, ki houlim nang poimoh kintak khat om ahi, ahon chi hi. A aw te ling in heh na aw ahi chih a chiang mahmah hi. Ken lah ajiak dot na di vual in ka theikei a, "AWLE" chih chauh a dawng in ka phone ka koih hi.

Kin takin Kimboite' inn lam zuan in kataiphei pah a, ka tun in Pa Lam(Kimboi pa) in kakiang ah, "Lalboi, poi kasapetmah, zannitak a Lelpu hong pawkhe te'n Kimboi bus a pan zuntha ding a kumkhelai ana man ua, tun atat khiakna ding in lakh 50 a hon ngen uh. Bang loh a pha ding ahi a le? Chi in khoisa vungvung in lungkhamtak in ahon gen hi. Anu lah athu azak apan a khophawk lou a puk tutan halhkhe theilou in buaipih angai den in a om hi.

Ka hehtha lah suak, Kimboi ka ngaihna gu toh, gen ding pen le theilou in mun khat en in ka tu gegu hi. Atawp in kipasal sak in, Pa Lam kiangah, "pa aw, lungkham ken, damtak in Kimboi hon tonpih nawn ngeingei ding kahi aw." chih teng gen khe thei hamham in PS lam manoh in katai khe nawn hi.

Lampi ah gari in hattak a ka tai kawm in ka ngaihtuahna apaisau petmah hi. Huihmut ding natawm ka phallouh, duat tak a ka etkol, ka it Kimboi ka ngai petmah a, bang chi'n a om dia? Aman tuten ut leh dah in a bawl ding ua, hehpihna bei in maw ka it a kimawl pih mai ding uh. Ka phal kei, kaphal thei mahmah kei. Atung ah khut kha masa penpen a taksa tum zakhat kasuah ding. "AW HICHI DI ANA SALENG ZAW MAW.... Kei mahmah in hong pi ding hinga.... Kimboi koi ah om nahia? Hon ngaidam in aw..." Chi in kakikou khe kha zozen hi.

Thakhat in apuakbuk ging kaza a, bangtan hiam bangmah theilou a om kahi ding a. Khua ka phawktak in ka kim ah mi ana tam mahmah hi. Awl a thoutou in ka enkual vel a, lamdang kasa mahmah hi. Ka lawmpa Muanpu'n ka khut ah hon len in ka hattai luat ziak a lam nawl a singkung pou khat phukha kahih dan ahon hilh hi. Ka hehluat ziak leh Kimboi ka ngaihtuah luatziak a, hiaibangteng tung ana hi hi. Vangphat huaitak in, liam nak lou in ka om a, ka tal neuchik keh chihlouh bangmah kachi kei vanglak hi.

Ka liamna thupi lou ahihman in, SP chamber ah Lelpu mat dingdan leh Kimboi hutkhiak dingdan kaki kum khawm uhi. Guerilla Warfare training siamnel tak a zou ngat mi 20 katel khia ua, kei leh ka lawm Muanpu in ka makaih ding uh chi'n kathupuk uhi.

Amasapen ding in koimun ah kibu ua, koimun pansan uhiam? Chih leh galvan tawi uh ban ah a kivei kimvel dan teng uh hoihtak in ka enkhe masa uhi.

Khuppu ngei inleng bangkim atheihteng hon hilh kim sipsip ahihman in, bangkim a fel diam in ka koih ua, luhkhiak hunsung dingleng gintaksanga haksat tuak lou a katheihman un 20 minutes sung ngei a zoh siang ding in kathupuk uhi.

Kanu ka phone a thu omdan tomkimtak in ka hilh a, ana lungkhamlou a, honna thumsak ding in ka ngen hi. Ka lawmpa Muanpu toh tukhawm in thuvangtang ka houlim khawm ua, a posting na mun lamka PS apan a ken kasap touh ahihdan leh ka sapna ziak kahilh cheuh hi. Ban ah, ka it mahmah Kimboi ngeileng tua migiloute khut ah om lel ahihdan ka hilh hi.

Kimboi pa'n ahon phone a. Zingchiangtan a asum ngetzah uh apiak kei leh atanu ahing amulou ding chi a hilh a om ahihdan ahon hilh hi. Kenleng tam gen lou in, ana patau lou ding in ka hilh hi.

Dakchiam geih in galvan bukim tak a kithuam in, galdou siam leh kisualdan tuamtuam siam tungtuan a telkhiak te makaih in kakuan khia uhi. Hilh a ka om bang ngei un gate a duty chih louh duty dang himhim a omkei hi. Amun ngeileng muanmoh huai lou mah ahihman a lungmuang tak a om ahih uh ka ging.

Thawm neilou in duty te ka gawl-et pheipah ua, kintak in inn ka um kimvel pah uhi. Muanpu telin mi 4 toh Kimboi omna kazong ua, kamuhtak un kintak in gate polam ah ka pikhia ua, gari a koih in ka mabang uh kasawn phei zel uhi. Ka hunchiam sung ua zou man ngei ding in kinoh tak in ka gamtang uhi.

Ka gamtat dan uh Israel army te'n thei le uh, Entebbe aluh lai uh angai ngot du. Second khat lel leng zekai lou in ka tup bang un ka che ziahziah thei uhi.

Sepaih duty ding ngak a akoihte uh thawm nei hetlou a bangzah hiam ka koih hoih khit un. A inn dantan sungnung ka tungta uhi. Amau ahih uleh muang mahmah lel ahih man un ana khophawk nai vet kei uhi. Lelpu suahtakna lawm in nuamsatak in zu-le-sa ne in khophawk lou in nungak bangzah hiam toh ana laam lalaih zomah uhi.

Ka panmun diteng uh hawm fel khin diam in ka thupiak hun ngak in ka naupangte mansa in om khinkhian uhi. Bangtanhiam kangak zek nung un, a Boss pa uh hong dingkhia in, "Tuni kipahni ahi, Lelpu amang tuni in imu nawnta uh. Huaiziakin, amah kipahpihna in hun nuam ibawl ding uh. Kuamah kidam omlou hial in nuam isak dan bang chiat in awle...." chi'n ahong kikou khia a, Lelpu kaitou in akiang ah dingsak hi. A dangteng in Lelpu kipahpihna in akhut uh beng zuazua uhi.

Boss in a thugen ban zomin, "Tu nitak Lelpu treat na ding inleh kipahpih etsakna ding in tuni a i nungak mat uh kapia hi." chi a hon puang khiak leh Lelpu bang vualzou kisa in ana nui huahhuah zomah lai hi.

Ka hehtha hongsuak phut in ka ki-ip zou kei dektak hi. Ka tupdan lou a thil ahongpai khak di lau in ka kidek teitei hi. Katupdan tak uh ahih leh Lelpu chihlouh siah thah vek ding, Lelpu hingmat ding chih ahi. Himahleh, Lelpu kamuh tak in amah mah thah ka ut tinten a, katha athak mahmah tettet hi.

Boss pa'n Kimboi akhumna uapan vapikhe ding in mi 2 a sawl a, kenleng kalungsim in, "A khut them neng leng khoihkha kei ni uteh." chi in ana pang khinkhian in ahong pawt masasa kana balsial nuai pah geihgeih uhi. Ahun atungta chih in ka lawmte signal kapiaktak in, thautang vuahzu bangmai in ka hawt khum ta ziahziah mai uhi. Bangtan hiam nung in khawlphot ding in thu kapia a, a sung ah awl in ka lut uhi. Mi asi leh aliam toh, ana sa toh mau in amau vengvung uhi. Lelpu leh Boss pa bel kamu kei uhi. Anataikhe man uh ana hi ding a, himahleh sau ataiman tuankei ding uh, um kolh vek a om ahihman un.

Room teng a amau gel ka ban zon ua, atawp in room khat ah kalut leh ka ki gin ma in pasal lian mahmah khat in hon na mantang geigoi a, ka kipek khiak sawm hang in hatlua ahihman in ka kipek khe zoukei. Ahon pomkip deuhdeuh a, ka tha awl in ahong zoi hiaihiai in, khophawk lou bang in ka ki omsak a, ahon letna awl a ahon khahkol tak in, alu ah kathaneihteng in kakhut nih in kituaktak in kasuphei a, kipukdinga kisa a awn doidoi lai. Kinung hei in back kick in a lu kapek phei nawn a, thou nawn ding in hatna anei nawn himhim kei hi. Kapamlam ka et leh, ka lawm Muanpu leh Boss pa ana ki kungfu ziahziah ve uh aw....

Ken le'ng Lelpu omna dinga ka gintak teng ka dap kual pah a, himahleh kamu zoukei hi. Muanpu leh Boss pa kisual kithakim mah mah ua, Muanpu'n zoulou dia ahong kilatsimtak in kava huh tei hi. Gintaksang in Boss pa ana hat viau a, zoh hak mahmah el-ul hi. Atawp in kanih ua pangkhawm in khat in anuailam, khat in atunglam chi a ka hon beih taktak uhleh atawp in hondal zoulou in ahong puk khong hi.

Thatawl gawp sim ahihman in, Muanpu toh awl a pawt khe dinga, ka hong kisak uhleh Muanpu hong ki dive phei in hon bohpuk a, huaitoh kiton in thau ahong ging phei a, Muanpu kha ahi ngei dinga, a hong ikh numnum mawk hi. Kenle'ng lamdang sa kawm a ka et phei leh, Lelpu'n thau a kap ahi cih kathei hi. Kintak a ka pistol dok khia in, Lelpu ahon kap nawn dinga kisapen akhe kakap sak a, ahong puksuk toh kiton in akhut kakap sak nawn hi. Na sa in atuk velvel lel a, kap zan gawp ut mahleng, ka mission uh thei kahihman in kalawmte hong tailut te kiang ah akhut kol bunsak ding in thu kapia a, innkong lam ah paipawt pih uhi.

Muanpu liamna ka etsak a, hamphathuaitak in chimaini, a pang lak ah thautang lut in aguh leh adang bangmah hihkha lou in pailet a, adinmun lauthawng huailou ahihman in lung anuam tuam mahmah hi.

Kagintak khel ua anatam deuhziak un 20 minutes sunga zoh ding a kagel uh minute 5 a pel in, minutes 25 geih in ka mission uh kazou uhi. Ka team te ngeileng Muanpu chihlou aliam-abai omlou in damtak in ka kimu khawm thei uhi. Tuaziak a kipahthu genna thumna nei in amun kanuseta uhi.

Kimboi kiang ah kava tu a, amanleng ahon muhtak in honna koipah a, kap kawm in kipahthu bang ahon gen molhmolh zozen hi. Lawmte lak ah angailua dan a va omlah nuamsa chiahlou kahihman in lungmuan in kiptaka kawi kawm in kahong paizel ua, phalvak in PS katung uhi.

Kenle'ng lawmte tawldamsak kawm in gari in Kimboi a inn uah kava kha hi. Lampi ah kamkhat mah kihoulou in a inn uh katung uhi. Kong kakiuh uh leh kimboi pa'n kong ahon honga, Kimboi leh kei nui hiuhiau kawm a innkong ah ding ahon muhtak in bangmah genmanlou in innsung ah atailut thak a, sawtlou nung in aji toh hong kiton pawt in kipaktak a chibai kibuk in innsung kalut uhi.

Kimboi pan kakiang ah Kimboi damtak a inn katut nawn man in kipahthu ahon gen a, adeihdan tak a Kimboi toh sawt hal nawnlou a kigawm pah mai ding in hon hasuan phut mawk hi. Kipaklua lah kisuanglah kawm in Kimboi toh ki-en tuah in kanui ua, ken leng Kimboi pa kiang ah kei adinga Kimboi itlou a ahon piak ziak in kipahthu gen in, kasungkuante deihdan toh mah leng hong kituak kawikawi ahiman in hunlemtang masapen a programme bawl hileh kadeihthu dang-awk sim kawm in kagen namnam sam hi.

Sawtpi om nuam mah leng PS lam ah poimoh ding kahihman in ka it Kimboite innkuan nusia in PS lam manoh in lungnuamtak leh zangkhai tak in kahong tai khe vengveng nawn a, ahon mupeuh in hon kipahpih uh hileh kilawm in kamu a, kua theihlouh in ka pawng nuih nuih kha veivai mawk hi.

Lelpu tung ah hihding bangkim bawlfel leh thudotna neih khit nung in, Court ah atungthu ngaihtuah in om a, atung ah case 15 bulh khum in avek in mohtansak in om vek hi. Amah adinga gawtna niampen piak ding hileh leng si tak mah ahi chi'n khailup ding in thutan khum in om hi.

Huchi'n Lelpu mipite mitmuh ngei in, athil hihkhelh ten mohtankhum in KHAILUP in a omta hi. Kei leh ka team te kipahpihna leh vaidawnna programme PS ah heutute makaih in om a, kaisansak vek in ka om uhi. Muanpu ngeileng a liamna apan hongdam siang in ASI apan SI a kaisansak a aom ban ah, bravery award piak in omlai a. Tuakia hilou in keitoh munkhat a semkhawm ding in Mualzang PS ah posting in om ngal hi. Hiai vaidawnna kikhop ah Kimboi te innkuan inleng ahong uap thei ua, kipaktak a kou innkuan toh kimu in Inspector Lalpu (keimah... He2) toh lem kilakhawm in nek dingte nekhawm in nuamtak in hun kahon zang uhi.

Kipahna abukim sem na ding in Pathian ompihna leh innkuante lemsakpihna in Kimboi toh dansiangthou a kikhut suihna thupitak in EBCC, Lengtonghoih Street ah kanei uhi. Kuapeuh in hon kipahpih chiat abang ua, kitenna uap mipi tam mahmah ahih man in, gan goh sial 5, vok 7 leh bawng 3 inleng mipite nekding pedaihzoulou phial khop in thupi a kakipak petmah hi.

Ka kiten zoh uh ni 3 nung in Phuntong Street lam ah Ngainou kha muding in kava pai uhi. Khuppu kava mu masa a, ahon panpihna te ziaka kipahthu gen kawm in, Police Department in ana sephoih na tung ah citation leh award apiakte ahun a hong sang theilou ahihman in piakkhiakna kavanei hi. Khuppu te inn ah kanupa un amau innkuan toh nuamtak leh kipaktak a kithuahkhawm in nitak ann kanekhawm uhi.

Khua ahong mial tak in Kimboi in lau ahihman in ahon zui ngamkei a, keichauh in Ngainou muding in kava pai hi. A inn uh katun tak in "Ngainou" chi'n kasam a, sawt kihal lou in ka ang ah nuihmai tak in ahong kilang a, amah chauh hilou in apa toh anahi ua, chibai hon buk kawm un Ngainou in kakiang ah, "Lalpu, kei a dinga na nasep thupi tak ziak in kaki pakpetmah hi. Ka pasal HICHI DI SALENG ZAW... Ana kitenpihlou hial ding kahi. Himahleh, tun bel thudik apawt ta a, kei leh kapa ka kha uh muangtak in katawl damthei ta ding uh. Nangziak vek ahi, natung ah kipak mahmah ung." Chi'n ahon gen hi.

Kamkhat lel leng ka dawn ma in Ngainou pa'n kakiang ah, "Lalpu kadamlai in khatvei mah leng kahon mukhakei, himahleh kou adinga na nnasep thupitakte ziak in kahon muanga, tuaziak in kagou tengteng nang honpiak sawm kahi. Na taklam panga almirah a drawer nuainung pen hong inla, file lui a san rong pen honla in." ahon chi a. Kenle'n va pai in kavala khia hi.

Ngainou pa'n laidal khat lakhe ding in hon sawl a, mitsi ding in ahonsawl hi. Bangtan hiam nung in kaliang ah akhut a hon khoih in hak theita ding kahihdan ahon hilh hi.

Ka mit kahong hahkhiaktak in Ngainou leh apan nui hiuhiau kawm in tualai dal ahon pia ua, ka et leh a gou tengteng, tua ka omna uh inn tel in van tuamtuam ban ah bank a sumhul omteng 50 crores huvel ding kakhut ah kakep ding in ahon pekhia uhi. Lamdang kasa mahmah a, ka chibang ahong ling hial hi. Akiang uah. "hiai zah zouzai zaw kei ading vual in katheikei. Na tanau laina te uh kiang ah hawm khe lehang hilou hiam?" chi a ka gen leh Ngainou pa'n hichi'n ahon dawng hi.

"Lalpu, nidang in kagen thei mahmah uhi. Nek ding natawm neizoulou in haksatak in ka khosa ua, kuamah honpanpih ding kaneikei uh. Ka tanau, ka sanggam, ka pianpih laizom te natawm in a hon taisan ua, amitsik natawm un ahon en ut kei uhi. Damlouh-hitan katuahni un hong veh a, hongpanpih ding ka laizomte khatmah a omkei uh. Akiang uah panpihna ngen a kava tai hang in panpih mahlak ah, a inn ua apan kamsia a thadahpa, chi a hawl khiak in ka om hi." chi'n khoisa vungvung kawm in ahon gen a, akiang ah Ngainou khasia in ana kidik dilhdilh hi.

Ahon gen zomzel a, "Hun hongpaizel in vanphat huaitak in, ka hong kitoksuah thei a, ka hong hauhsak khiak tak in, nidanga hon simmoh a hon hawlkhete'n ka gou enlah in ka puk nang kong bangkim ngaihtuah in ka gou tan teitei sawm in aguk in ahon gal thei mahmah uhi. Kasihnung natan in kagou tansawm in amau kal ah leng kituak lou in ki galbawl zomah lai uhi. Huaiziakin, kagou tengteng amau khut ah alut sang in nang mimuanhuai khut ah kon kepsak ka ut zaw. Nang na ut bangbang in ana zang in aw..." chi'n a hon gen hi. Tua zoh in Ngainou in kapanpih na ziaka akha uh tawldam tak a omthei ahih ziak a kipahthu gen kawm in mangpha ahon khak a, a pata un awl in muhphak louhna gam ah ahon paisanta uhi.

Zingkhua hong vak philhphelh tak in keileng pawt khe ding in kakisa a, table tung ah lim khat kamu a, la a ka et leh numei naupang melhoih tak lim anahi hi. A lem nunglam ah Mawi chih akigelh a, anuai ah Hope Children Home, Mualzang. Chih akigelh hi. Kenle'ng Ngainu tanu ahi chih katheipah a, Ngainu in atanu kana kep ding a deih a, ka zonkhiak theih nang a anutsiat hingei ding in ka gingta hi.

Keileng kisa mengmeng in Khuppu te in ah kava pai a, amau leng anathou vekta uh ahihman in, common room ah singpi dawn kawm in nitaka ka thiltuah teng report pekawm in thuvantang kahoulim uhi. Ka mansiangtak un Kimboi kiang ah, Hope Children Home vaphak ngai ding ahih dan ka hilh hi. Aman leng lamdangsatak in aziak ahon dong a, kengleng Ngainou in atanu kemtu dia hon muang a kakhut ah hon koih ahihdan ka hilh hi. Kimboi in ka thiltup hon niallou a, honkipahpih zaw ahihdan ahon hilh hi. Huchi'n Khuppu te toh mangpha kikhak in, Ngainou tanu Mawi pi ding in HCH lam kamanoh vengveng uhi.

Gintaksang in amuh haksa sim viau a, avengmin ki gelh lou ahihman in sawtpi ka zong nilouh uhi. Atawp in vengnawl khat ah kava mu khongkhong ua, Mawinu vamu in thu omdanteng va hilh pah ding lah hilou deuh ahihman in, apa lawmhoih mahmah kahih dan kagen a, ka kiang ua om dia pi sawm kahihdan ka hilh pah hi. Amah leng thumangtak in ava kisa pah a, keileng Home neitupa toh ki hou in apoimoh dingteng ka saifel khit un, innlam zuan in Mawinu tonpih in kahong paita uhi.

Lampi ah Mawinu in thu tuamtuam tampi ahon donga, mipaunuam leh teitak ahihman in, dawn senglou phial dotna in a hon buak khum zungzung hi. Ka dawn theih teng ka dawng a, kongtai zel lai un thakhat in kakiang ah, "Uncle, tua kapa koi ah om ahia? Kanu la bangchita, ka mu ut lota, akiang ah khatvei bek hon hohpih in aw." chi'n ahon gen hi. Ka kiguih zot zozen a, adawn dingdan theih ahaksa khop mai, naupang kum 8 mi ding kiang ah bangchin a atheihsiam theih ding in ka dawng dia?

Adawn dingdan theituan lou kahihman un, "AWLE" chihchauh a dawng in ka hong taizel ua, inn katun un kanu'n sangkil ah honna dawn hi. Mawinu amuh in lamdang sa ahi ding a, kei bang ahon en tuantuan zozen hi. Ken leng ka mit in ka hilh jauh a, theisiam in kipaktak in Mawinu a na vaidawn thakthak hi.

Kimbawi in ann ahon huan mengmeng a, huchih sung in thil omdan tengteng ka nu-le-pa ka hilh kim sipsip a, Mawinu kata banga kem ding kahihdan ka hilh hi. Amau leng kipak mahmah in atunu taktak uh mah banga enkol ding uh ahih dan ahon hilh uhi. Kimboi ahongman siangtak in kapa kiang ah kapai khawm ua, kapan vualzawlna hon pia in thumna hon neihsak a, huchi'n kipaktak in zing an kahon neta uhi.

Ann nekzoh in Mawinu kasam a, akiang ah thu omdan teng atheihsiam di tan in ka hilh hi. A nu-le-pa'n omlouhsan ahihdan leh ken amah kata bang a ittak leh duat tak a enkol ding kahihdan ka hilh hi. Kimboi pen nu a chih ding ban ah kanu leh pa te pi leh pu a chih ding ahihdan tanpha hoihtak in ka hilh hi.

Naupang neuchik himahleh thil atheisiam mahmah a, amah ngei inleng thumangtak a omding ahih dan leh kei thu lou a gamtang lou ding, thumang ding ahih dan ahon gen tiautiau hi. Naupang kum 8 mi in tuabang thu ahon genkhiak theih mawk lamdang kasa mahmah ua, hehpihlua leh kipahpih lua in Kimboi in pom tonton kawm in kahpih kha zozen hi.

Ka innkuan un Mawinu nu' han kava veh ua, pak koih in zahna kava pia uhi. Huchimah bang in apa han ah kava hih tei ua, ka kiklam un hotel ah ann limtak ne malam in kipaktak in inn kalut nawn uhi.

Mihausa tanu himahleh Kimboi a fel mahmah a, mi mitmei ven asiam a, sep lit neilou in nna teng thanuam tak in sem zou gige hi. Ka nu-le-pa te bang keisang mah a it zaw bang hial in it tak leh duat tak in akem zou hi. Mawinu ngei leng ata bang in enkol a, nu in ata a itna bangbang itna toh a en kol hi. Kimboi ka en vengveng a, a mel lah hoih, fel zomah, hiaibang a numei hoih Ruby suang manpha tunglampek a om kei zi ana hih mahmah kipak petmah in akiang ah, "HICHI TEL DING HONSA LENG ZAW SAWT PEK A HON KITEEN PIH TA DING HING A...." chi'n ka gen hi. Amah ngei inleng, "HICHI DI SA LENG ZAW NON KHAAM MA PEK APAN A NA INNSUNG AH HONG LUT PAH DING HING A..." chi'n ahon chiamnuih thuk a, kipaktak a nui khawm hiauhiau in ka maban ah bangteng hongtung mah leh lungkhamna ding kathei nawnkei. Lungkimna ngen in ka dim hi..........

Beita

©Siamsinna leh Vakiangbu