KA ZAK A TA TLAT!
By~ Muana Guite
CLASS X AH :
Classroom chu a dai khup mai, ka English Miss uh hon lut chu kuamah
pau ngam leh tang ngam ka om kei uh. Ka ma a tu numei chu ka melh
cheuhcheuh a, a sam vom tle silsel in a etlawm na a behlap zual a, ka
lam hon en phei chu 'Ka bestfriend' ka na chih nu a hi a, himahleh ahi
tak in zaw lawm chauh in ka en nawn kei...'Kei a hi leh zaw' chi'n
duhthu ka na sam zel a, himah leh aman hu chi'n hon na en kei zel dia ka
chi zel a. Skul kai tawp chiah kou tegel chauh ka kiton zel ua, ka
lungsim a om ka gen khe ut hilehle ka ngam kei zel. Itna simthu leel mai
ka ut....himahleh KA ZAK A TA TLAT !
CLASS XII AH :
Ka phone hong ging chia chia , amah ana hi a. Kap kawm in a Ui uh a
sih thu hon hilh a, ka thawmhau lua hon pawt ve chi'n hon zawn a.
Huchi'n kei le ka va hoh pah a, kou tegel chauh om in nektheih tuamtuam
ne kawm in ka houlim ua. A mel ka en a, ka et chian deuhdeuh leh a hoih
deuhdeuh mai hi. A mit hah te bang a nalh petmah a, ka movie et uh le en
hi napi in ka lungsim ah a etlawm na kia a om..."Kei a hi leh" chi'n
duh thu ka sam a, himahleh aman hu chi'n hon en kei zel dia..Dakkal 3 ka
tut khawm sung un, ka lungsim a om teng gen ka ut himahleh ka ngam
kei...Itna Simthu leel mai ka ut.. himahleh "KA ZAK A TA TLAT !
COLLEGE AH :
Admission bawl hun ta, ka kiang ah hong pai in 'Na kai na na ah ka
kai di, nang lou inchhu mundang ah ka kai kei di' hon chi a ka kiang ah
hon tu hi. 'Kei a hi leh zaw' chia ka lungsim a ka ngaihtuah teng gen
khiak mai ka ut himah leh aman hu chi dan in hon en kei zel dia......
itna simthu leel ka ut... himahleh KA ZAK A TA TLAT !
GRADUATION DAY AH :
Hun le Ni te khawl lou a pai ahih mah bang in kum 3 chu hon tungpah
mai a, Graduation Day hon hipah mawk hi. Graduation Day Prog. ka zat
lai ua stage tung ah hong ding khia bang chu a piannalh dan leh a
melhoih na te chu mitkhap lou hial in ka na en a..... kipak lua a tawm
kawm a hon kawi lai in 'Kei a hi leh zaw' chi'n duhthu ka na sam a,
himahleh aman huchin hon en kei zel dia... ka lungsim a om teng gen ka
ut, himahleh ka ngam kei..., Itna simthu leel mai ka ut..... himahleh KA
ZAK A TA TLAT !
KITENG NI IN :
Tun chu Biakinn sung ah tutna tawp pen ah ka lawm te toh ka tu khawm
ta uh, sawt lou nung in ka 'Best Friend' chia ka na gen gige chu Mou
puanak kilawm tak toh hiai biakinn hong lut ding hi. Hong lut ta ngei
mai a, a etlawm khop mai... hon muh teitei na dia a langsar deuh in ka
na tu a, hon mu petmah a, hon nuih cheuh a, himahleh kei a di'n nuih a
hak lua..."Ka Nupi hi mai leh" chi'n duhthu ka na sam a, Pastor in 'A
rem theih louh na a om hia?' chia hun a hon lai in, ka lawmhoih pen ahi a
ka IT mahmah chih mipi theih di'n kikou khiak mai ka ut, himah leh aman
hu chi'n ana pom kei zel dia... ka lungsim a om teng gen mai ka ut a...
himahleh ka ngam kei... Itna simthu leel mai ka ut .... himahleh KA
ZAK A TA TLAT !
A KI VUI NI IN :
Khang nih lian zet a bei nung in 'Ka Best Friend' a zalna piandang
chu mittui toh ka en a. Naupang pasal fel deuh mai khat in 'Hiai va pia
oh' hon chi uh chi'n envelope hon pia a, kipahthu ka gen ma in ana mang
man daih hi. Kei le mipi lak apat pai khia in mun thoveng deuh khat ah
ka va tu hi...
Huchi'n ah envelope chu ka hong a, lehkhathawn lui mel tak ana om
hi... etmai in hun sawtpi pai ta a kigelh ahi chih a chiang mahmah
hi.... huchi'n ah lehkhathawn chu kon simta hi......
"Amah a hi mai leng" chi'n ka 'Best Friend' chu ka en zel a, duhthu
ka na sam zel...himahleh aman huchi'n hon en kei zel dia.. ka lungsim a
om teng ka gen ut, himahleh ka ngam kei zel.... kon IT LUA chih mai ka
ut, himahleh 'KA ZAK A TA TLAT !'.... kon NGAILUA hon chi leh zaw 'KEN
LE KON NGAILUA' chih ka ut tel mai......
Hiai lehkha thawm ka sim zoh inchu...hon lungphawng sak khop mai a,
hon deng kha khop mai... mittui pawt kawm in 'KA LUNGSIM BANGBANG A NA
NEI EIVE MAW' ka chi a, mittui chu dan vual louh in hon luang khe
zoihzoih hi....
Lehkhathawn nuai lam ah chu a kigelh ni
'Dt 26 Aug 1982' chih ka mu a ka lungsim ah phawk khiak guih ka nei...
Eheu, Cl X ka hih kum eive le... tuni toh a ni kibang, chi'n huai lai
in ITNA SIMTHU ANA LEEL MAI LENG ZAW MAW.... kisik na in ka pum dim a,
ka mittui chu hon pawt nawn hi ...
*MORAL - Thil bang peuh lehkha sim na, naa sep na, kimawlna lam...ah
'Ka na hih khak louh', 'Ka na gen khak louh' chia kisik sang in..... a
hun in gen/hih ni, kisik zaw a gentheih huai lua.
©Siamsinna leh Vakiangbu
Comments
Post a Comment