LAWMVUALTE DIA KA THUMNA

By ~ Paumuanlal Guite

Hun leh kum albang mangsa, nun in noplai niteng toh..
Zangni paal leh nuai simlei paallun,
Kei di’n lungkham kahna mun leh gam ahi…….
Chih laa khawng sak a athu diktak le ngaihtuah hetlouh laini khawng ana nuam hina maizen e….

“Bang achi de aw… a damdam na de aw, tuni daina maizen e…” chia lungsim a kiphawk a, kilunghimoh mahmah lai hun khawng, ka call lah pick up lou a, ka message lah hon reply hetlou a ka tunga lungnoplouhna nei eidiam aw, ahihkeileh buailua eidiam chi a I lungbuai mahmah hunlai khawng lunglai ah chikleh ngilhni tuang a tung thei ding hiam???

A kallak ah kithuhilh a, nang huchi deuh, hichi’n na hong omta ding aw… ahihkeileh na huchih dan hoih leh nalh kasa chia kihoutuah a, midangte’n lamdang hong sak ding khop ua kimaingal taka kichiamnuih lainite nak nop hina maizen e…..

Lakiik theileng maw… lakiik theileng maw…
Mualliamsa hunte lakiik theileng maw……

Ann nekhawm, ahihkeh hun saulou bang zangkhawm a, kisuklimna tuamtuam hunte bang zanga, leitung a midang omlou hia chih theih ding phial a nuamsatak a omlai nite, zankhosawt zong gelbanlou a nuihchiam leel a nuihkhawm zaizai a, zansawt nunga lamdung khawng a chiak zaizai lai nite’n lah lenmual hong khumsanta…. Koi mun hiam khawng a hunnuam zangkhawm a, kizuih nainai lainite khawng chiautui in luan mangpih hita hiam aw….

Chimlou chiambang nuihkhawmna munte zong,
Tu in zuansialna ding lel hita…..
Chia zaila ana oih bang uh lungtang tawng ah hong lang chiaichiai mai…. Ngai in luankhi nuul zongleng tong hong dong ding simlei ah omlou e….. Hunte lah chikmah chiang a ei duhthusam banga hong kiik nawnlou ding a maw….

Nangpa/nangnu kihisakna chia, tulai bangchi e chia kitot lai hunnuamte khawng, nikhat, ninih a kithuzak louh khakchiang banga a omthei lua leng om khollou a bangchi a chia kikantuah sauhsauh lai khawng, thil banghiam hih ding aom leh kizawntuah diamdiam a, pawtkhiatna ding bang aom chiang a kingak diamdiam a kizuih liailiai lai nite kua mitkha ah mangthei nawn ding hiam??? Kuahiam in hon dem a hon kou khak hun chiang banga athu thei toh theichianglou toh hehna hun a hehkhawm a, kipah hun a kipahkhawm diamdiam hunlai khawng ngilhni chikleh tuang a tung ngei dia…….

Nunnopna pakbang vul zouta,
Nunlui liamsa ngai in naubang kap veng…..

Kingaina mahmah, ahihhang alah kilangsak tuanlou, kiguuk mitmei ven tuah lai hunte khawng bang ana nuamlua ahihdan theih phiing aom, lah kikhel sim hita… Lim kilaak khawng nainai hunte khawng, ei tegel, eiteng thum, I vek un kilakhawm ni uh, fuhlou lua khatvei hon lathak aw chih khawng toh nuih zaizai hunlai khawng khatvei hong kileh kiik theileh uthuai na e maw….

Nungak/tangval thu a buaina neihkhak chiang banga kihehnem tuah a, huchi zenzen kei in, Pathian in nang adia ahoih zaw ding lem hon gelsakna ding ahi, maban ah leng kituaktak a omkhawm thei hizaw nahi uh, kingaisia in lungkham zenzen ken chi khawng a kihehnep a, kinuihsak sawm teitei lai khawng, ahuntak in haksapi himahleh tuchiang in nak nop hina maizen e……

Huai ah vahoh ni, ahihkeh hiai va hih ni, tuni kou inn honpha uau, ann honne ngal ding in chi banga deihsaktak leh damtak a kisap a kihouhou lai hunte khawng bei thei ngeikei leh chih nak uthuaina e… Diklouhnate bang kibawl diktuah a, tai ngaihna mun a kitai a, phat ngaihna mun a kiphat a, thu selguk chih omlou a thilteng kihilhtuah vek hunlai nite bang vaivut suakmai ding in a phalhuai thei mahmah kei….

I sulnung gamdai ah hambang vai veng…
Tungsolkha mualdawn ah hong taang chian…..

Akallak chiang in lungsim leh ngaihtuahna khenkhat kikalh kha in kiguuk nuaksan, kihoupih lou lah hilou, lah hoihtak a kihoupih tuah chiahlou khawng a om bauhbauh a, call bang ki pick up sak utlou, a zalou lem kineih, lawmte lak khawng a kimitsik daudau sim khawng aom khawmlai bang nuamlaw thak dan ahi maw….

Hichibang mai aomlai in,
Lenna heina dang zong, heina dangzong,
Ngilhni omlou nunlui, pamlua sang e…
Gamgua bang kaan zouta….
Lenkum kavei zou diam…… chih hong suak zel….

Lawmteng toh  kihoukhawm nainai, dem khak ngalte dem chihtak a kidem huan, phat ngalte lah phat petmah a kiphat huan, lawmta laka kisukkawt vanglak lelah a kawtkhapen ading bang a daak ngam ding leng banglou khop a omlai hunnuamte mangngilh hak mahmah ding abang maimah ve….

Ahihhang in hunte hong mualliam zel a, lawm ittak te toh kikhen hun bang hong tungzel a, kihoupih gige te toh kithei nawnlou bathun bang leng hong om zel hi…. Hiaibang hunte tung ngeikei leh chih huai vungvung himai….

Huai kawmkawm in ka lawmvualte ading in ken bangmah hihzou kei mahleng kei ading in lawm leh vualte’n thil tampi honna hihsak ua, ka hoihlouhna tampi honna liahkhuh in ka diklouhna mun ah honna bawldik sak zel uhi. Hiai teng kei adin kipahhuai in nuam hina maizen e….

Lawm leh vualte tengteng aw, noute ading in thil thupi ka hon hihsak ut thei mahmah, ahihhang in hihzoh lah ka neikei, himahleh bangkim hihthei tung Pathian nei I hihman in aman ka lawm leh vualte tengteng aleh tampi in vualzawl henla, khotuah henla, a sep leh bawl peuh uah makaih in pitou tawntung ta hen chih ka thumna ahi…….

Aw khatvei bek kimu theileng…
Khatvei bek na meel muleng…
Simlei nunnop pallun sang in,
A leh za in etlawm chia……

©Siamsinna leh Vakiangbu