PENGLAM DAWI-UM (Action, adventure, thriller & Love Story)

By~ Leon Guite 

THUMASA:

"Penglam in dawi-um a nei.... E.... Ai.... E.... Ai.... O..."

Nidanglai tangthute ah Penglam in hai mahmah napi in leh sepkhiak thupi bangmah neilou napi a, bangziaka huchitel a minthang ahia le? Mihaite' tanchin kuamah in agenpeihlouh lai a bangziaka amah ahai dan chiltui kaizen a gengen theih mawk ahia? Khangthu a dinga aman poimohna bang ahia aneih? Bangziaka Mihai Penglam kou mi-le-sa ahi, chi a ei singtangmi tribe tuamtuamte iki tuh souhsouh uh?

Gen dan in Penglam pen Chimnuai khua ah piang hi. Aman Hangsai toh Sawtkuam tak Champhai ukh hi. Bangziaka mihai chi a, ahaina ngen kigen in mi 7000 val tung ah ukpi a pangthei hi hiam? Thu lamdang khat bel hi veve maw.... A thuguk bel om hipeuhmah chih chiangsa ahi hi. Tua pen suikhiakna thu enkhawm ding hi hang.

BUNG 1: PENGLAM DAWI-UM NEIH LAM MUHKHIAKNA

Kum 2230 AD, Oct. 19. Ahi a, ngeina bang in, Zogam University nuai a, Archeological Department nuai a Sinlai naupan te'n tha-it tak in lab. ah nasem in, buaitak in om uhi. Huchihlaitak in mikhat in tup mawng loupi in a vanzat hon suke kha in apam a glass a kibawl van koihna khat hon dengtam kha hi.

Tua glass bawm pen zatnawn louh ding vante koih khawm na mun ahihman in kuamah in ngaihsak luat in anei kei uhi. Van suke pa'n ava et hoih aleh akawm ah map lui mahmah ta khat mu hi. Tua ah chiamteh na (symbol) tuamtuam ki gelh bialbual hi. Lamdang salua ahihman in alawmte en-sak hi. Amau leng lamdangsa lua uh ahimanin a Head of Department pa uh kiang ah va tawi uhi. HOD in hoihtak a a et vengveng nung in dil hileh kilawm (love sign) mu a, tua pen Rih/Lih Dil hiding in muangmoh pah hi. Aziak bel Zogam ah, dil omte tuabang melpu omlou a, Rih dil pen a mel tuabang geih ahih man ahi hi.

Huchi'n, Archeologist suan huai mahmah tulel a Lamka PS, a Inspector semlel Lianpu, {Amah bel, archeology, master, hi a, himahleh ZCS, (Zogam Civil Service) exam na ah ZPS (Zogam Police Service) mu a Lamka Police Station, ah Inspector a kum 2 sem pan ahi hi.} kiang ah va ensak hi. Lianpu in hoihtak a avel khitnung in, tua sign te'n a gen ut uh bang hiam (deciphered) chih hon thei khia a, lamdang sa mahmah in HoD pa kiang ah, GOU thupi tak kawk muhna map ahi. "PENGLAM DAWI-UM" nidangpek apan a mite'n deih a ana zonzon uh muh khiak theih ahita ve chi'n kilawptak in gen hi.

Adiktak in Penglam in dawi-um nei ahihdan sawtpek apan theih ahita hi. Asihma zek in munkhat ah phuisam khum in a dawi-um sel hi. Hiai a dawi-um in thil hihthei mahmah a, Amah mi hai phetphut in hiai a dawi-um ziak a mi sang tampi tung ah vaihawm zou ana hilel hi.

Helpawl ban ah, pawl tuamtuam in, hiai Penglam Dawi-Um zonsuah a amau khut ah koih tum in nakpitak in ana zong uhi. Himahleh, loching omlou in lohsapna toh kik den ua, a omna mun thei a omleh sum tampi piak a om ding chi'n thusuah ana bawl den uhi. Tua ahihman in, hiai thupen puan khiak in om taleh, atunga i gente pawl hong kipanthak nawn ding uh ahihman in, buaina liangpi hongpiang thei ahihna ah, Lianpu (keimah kahi) in HoD kiang ah, hiaithu kuamah kiang ah gen lou a im bikbek ding in hilh hi.

Huchi'n Lianpu'n a heutute teng leh officer muanhuai taktak te toh meeting nei in, hiai gou thupi midang khut ah alut ma ngei a zonkhiaka, kepbit ding in thupuk uhi. Tua ding in, amakai ding in muang mahmah in, training bangkim nounel tak a zou dimdemsa, bangpeuh a dia muanhuai Tangval Lianpu, Inspector seh in om a, amah panpihtu ding in a lawm a muan mahmah, amah banga training bangkim zousa Tangval Muanpu, SI seh in om uhi.

Hiai thupen im bikbek ding chih himahleh, student kamtam khat in ana kamteh kha ahihman in, a zing in news paper "ZOGAM AW" ah hong kisuah mawk a, huaitakin, police lam leng patau in, kin-le-buang a gamtat ngai ahihman in, apoimoh dingteng galvan etc. kaikhawm in ki gingsa leh mansa in ki om hi.

BUNG 2: CHINGNOU TOH KIMUHNA

Bangkim, vanzat dingte mansa vek a koih nung in, inlam zuan in kahongpai hi. Kalnawn Seppatni lah, damsunga genmangmawh ding khualzinna, si ding maw? Hing a innlum zuan nawn ding? Chih theihlou pan ding akihihman in ni 2 (nih) omlaiteng amanpha pen a zang dinga heututen thu honpia uh ahihmanin, programme bawl ding in ka kisa hi. Ahihhang in ka buaimahmah hi, banghang hiam chih leh anuamtheipen a hun zat ding chih himawk ahihman in.

Atawp in Lengtonghoih Park ah vavak halh ding chi'n ka bike toh katai khu vengveng hi. Amun katun in ni akaisimta a, phalbi kipan dek kuan hita in etna lampeuh om diidiai in lunglen kidang mahmah hi. Gate ah awl in kalut phei a, tuikikhoh khia omna mun lam zuan in muangtak in kapai phei hi.

Huchih laitakin, Zolianu nih kei lam zuan in ahong paiphei uhi. Akhatpen in kamit alapah a, "melhoihtak, sam kai zilzial etlawmtak mai, duang kikhai, hichizaw deuhleh maw Toupa," chihna ding omlou phial in hon zuan zaw mundang ka etsan ngam mahmah kei. Amau lah kalungsim theilou mah ahi ding ua, hon ngaihsak mahmah kei uhi. Kakiang ahong tun un, zahtak man in kapam lam en in amau ngaihsak hetlou bang in kana ding hi. Himahleh, ka mitsik in a omdan teng uh amu veve hi. Hon kheng geih uh chih ding in, ahoih zaw pen (ka lungkuai pen chimai ni.) in ahon kawk cheuh kawm in alawmnu kiah bang hiam a gen a, a nih un keilam hon en ua, a nui heuhau tuak uhi. Ken lah muvek kahih man in, agen uh katheihlouh ziak mah in ka zakta in ka lu bang akbawm chia pha hial in kathei hi.

Sawtlou nung in akikou uh kaza a, ka etphei leh tangval thum in ana hihbuai laitak uh kamu a, kintak a delh in khat a awm a man in ka supai a, huchihlaitakin khak in hon pek ding in akisa a, keileng ana kihem in back horse kick in a biang ka pek phei ek hi. Na sa in atuk pah velvel a, a thouzou nawn sekei. Akhatpen in lau lua in, alawmte gel ngaihsakman lou in zuktal bang in atai khe tonton maimah hi.

Kei le'ng ki pa sak deuhmai in nungak tegel kava naih a, bangchi uhiam? Chih kava dong hi. Etlawm in kei ziaka bangmah chi manlou ahihdan uleh, akipahthu ahon gen kawm in amin Chingnou ahih dan hon hilh hi. Kenleng kamin ka hilh pah a, kimu zel ding chi'n a number ka ngen a, ki houzel ding aw chi'n hoh nang poimoh tak aneihziak un ka kikhen phot uhi.

BUNG:3 HUN TOMKHAH NUNNOPLAI NI

Kapai kawm in kakingaihtuah a, lamdang kasa mahmah hi. Chingnou mel lawmtak mai ka mitkha ah amangthei kei a, a tongsuah nemtak te ka bil ah a gingden hi. It taktak ka hi diam? Khat vei kimuhna ah itna apiang thei mawk dia hia? Ka gingta kei. Himahleh ngaih chihtak in ka ngai mawk hi. Nitak in Chingnou ka phone pah a, kamsiamtak in ahon houpih hi. A aw zak lel in leng nuam tuam kasa mahmah a, kahi susuih zozen hi. Sawtkuamtak kakihou nung un azing nitaklam dak 3 a Lengtonghoih park mah ah kimu ding chi'n mangpha ka kikhak phot uhi.

Kalum a himahleh, ka ihmu thei mahmah kei. Ka mitkha ah Chingnou mel etlawmtak mai alang den hi. Atawp in dam leh sih leh sih chi'n kimuh chiang a, itna thu gen ding chi a kihehnem in ka ki khim teitei a, atawp in ka ihmu thei khongsam hi.

Azing in inn na septheih bangbang sem in ka om a, dak 2 lak vel a kihahsiang in Lengtonghoih park ka zuan vengveng hi. Amun katun in Chingnou ana omta a, amah kia in ngaklah meltak in ana tu ngiungiau hi. Akiang katun tak in kipahmeltak a hon en in nui kawm hiuhiau in ka kiang ah, "U Lian, na hong hoh thei a, kakipak petmah." ahon chi hi. Ken leng, "Chingnou, sawtpi konna ki ngaksak kha a, na ngaihdamna ka hon ngen hi." ka chitei molhmolh sam hi.

Huchi'n, thu tuamtuam houlim in nuamsatak in kua tu kua ta englou in hun ka hon zang khawm ua, aman bang ngaihdan anei diam ah, ken bel nuam kasa mahmah hi. Atawp in pai hun pahta ding ahihman in ka kuansan pen pat ka hon sawmta hi. Akiang ah, "A hihleh Chingnou, iki thuah patna ahi a, kilawmlou bangsim mah leh, thukhat kon dong ut a, non dawng thei diam?" chi'n ka dong hi. Aman leng ka mit mahmah hon en kilkel in, "U Lian, eikhawng na hon dot nop tak in chu, kon dawng thei mah kei dia..." chi'n hon melh cheuh kawm in ahon dawng hi. Kare! Ahon melh tak in electric shock mah ka bang zot zozen a, ka dot nop pentak dong thei pah lou in bangtan hiam ka khawl dedu kha zozen hi.

Aman leng lamdang honsa ahingei dinga, hon sawi kawm in, "U Lian bangchi e?" hon chi tuantuan zozen hi. Kei leng thakhat a halh zot in kisuanglah kawm tak in ngaihdam ka ngen a, akiang ah.. "Ching, ahih leh, tulel in ngaihzawng na nei hia?" chi'n ka dong hi. Aman leng kin deuh in, "Hi, tulaitak in khat kanei." chi'n ahon dawng hi. Na kasa mahmah, kah khiak ngoihngoih bang ka ut top mai. Himahleh, ki pasalsak in akiang ah haksa sakawm pi in, "Ching, ahoihlua, kon kipahpih petmah..." chih teng gen thei hamham in ka lei ka dangtawng ah a belh a, adang kagen thei nawnkei, ka mittui galpan din ahong kisa mawk a, atheih ding lau in nuailam en in ka kun dedu kha nilouh hi.

Chingnou in ka omdan teng honna enden ahihmanin, awl in akhut in kalu hon phot touhsak kawm in, "U Lian bangchi e? Ngaih kanei ka chih kha ami na hon dong naikei hilou maw? Ami natheihnop aleh hon dongve aw tun, hon hilh dia mansa kahi." chi'n nuihmai kawmtak in ahon houpih hi. Ami theileng banga kei a dia apoimohna? Ka lunggim nang phet a hon ngaikha kana hi maw? Chi'n aguk in kahtam kalou nulhnulh hi. Kenleng awl in leh haksa sakawm tak in akiang ah, "Chingnou, ami thei ding in kaphu kei, himahleh na hon hilh theih in zaw ka kipak mahmah ding. Na it pen ahampha mah ding maw...." ka chi khe numnum thei sam hi.

Huaitakin, aman awl chik in ka bilbul ah, "U Lian, kamuh tung pan a, a ka itpen maw............. NANG nahi, nangkia nahi........." chi'n ahon gen siausiau hi. Hiaithu kipah huai kazaktak in, om dingdan kathei nawn hauh kei. Tawm lonlon a ki kou khiak vongvong ka ut petmah. Ka lungsim kipahna'n a dim a, ka kah nuih kha phiaiphuai zozen hi. Ka kianga tu ka It Chingnou ka kawiphei a, aman leng kiptak a hon kawi thuk in, akiang ah, "Chingnou, ka kipakpetmah, kenleng nang kon it in kon ngaipetmah, a tawntung a dingkip din hanchiam ni maw..." chi'n amuk ah deihthoh tak in ka tawp vengveng a, aman leng ki damlou hial in ahon tawp thuk tei sam hi. Hiai hun zet in zaw PENGLAM DAWI-UM ka phawk kha vet kei. Huaisang a thupi leh manpha zaw ka itpen Chingnou toh ki ittak a hunzang khawm lah kahi ngal a....

Huchi'n Chingnou toh khenlou ding chi'n tongchiam in, nuamtak in hun ka zang khawm uhi. Bangtan hiam nung in park apan in kapawt khia ua, Mauluang restaurant ah gilkial hehnem in, a inntan kava kha hi. Inn ah api-pute toh kimeltheih tuahna hon bawl a, gintak khel in anasiam mahmah ua, anuam tuam mahmah hi. Anu-le-pa bel a kholam uah om uh ahihdan hon hilh a, amah ngei le'ng apute veh a hongzin zual ahih dan ahon hilh hi.

Bangtanhiam nung in paidin kong kisa khia a, Chingnou in kelkong tan hongkha in ka bilbul ah nemtak in, "Mangpha aw, ULian, hong ngailua ing." chi'n ka muk hon tawp phei cheuh in ka dawnna ngak man lou in zum meltak in inn sung ah atailut pah hi.

Tuni zet chu.... Kei ading in hun nuampen ahimai. Kumpi Solomon natawm in atheihsiam louh leh, a genkhiak zohlouh khop a thupi "ITNA" tang kahiman in, kuamah ka eng nawn kei rengreng. Nuamtak a ihmu hithit in a zing in ka it Chingnou toh hun anuam thei bangpen azang in, kua hin, kua sih leng kaphawk kei uhi. Nitaklam dak 4 agin in ka phone ah msg ahong lut a, Chingnou kiang ah, "hon ngaisiam in aw." chi a ka etleh ka phuzot hial hi. Ka heutupa un ahon khak ana hi a, tuni nitaklam dak 5 a Station ah ki report ding chih ana hi hi. Kare! Itpen toh hun zat khawm leh ka MISSION ding bang ka mangngilh kha zozen ve.

Chingnou kiang ah, atheih dia kilawm teng hilh in, dak 5 a ka ki report ngai ahihdan ka hilh a, aman leng hon theisiam mahmah hi. Huchi'n keileng Chingnou te inn apan kipankhia in Police Station lam manoh in bike in k'ong taiphei hi. Bangtan hiam katai nung in, Lailam lei ka honpel phei a, kong taipheizek leh, thakhat in Salem Veng lam apan mi 5 ding khawng Van a hongtaisuk in kama ah lampi laitak ah ahong khawl uhi.

Ka ma ah a hong kumkhia ua, keilam zuan in tem le, sik khainiang khawng tawi in ahong paiphei uhi. Kei leng pilvangtak in, ka gari apan kakum khia a, panmun lem ding enkawm in awl in kaki khin phei hi. Amel uh ka en a, katheih ngei a omkei hi. Kei khoih dia hongkuan uh ahi chih bel kathei chiang mahmah hi. Ken leng lau tuanlou kahihman in, training nung a ka zilte zang kha taktak lou kahih man in zatna ding hun lemtang om chi'n poi kasa lokei vanglak hi.

Bangmah gentam chih omlou a kibohtuah kahipen mai uh. A gintak banglou tak un ka gamtang ziahziah a, a hongkuan masasa leilak denna in kana zang ziahziah hi. Agintak uh banglou ka hihman in, atawp in amakai pa un ka kiang ah, "Nathil zon dek uh natawp san kei uleh, amun lam ah na han ding tohsa in kana koih uh chih thei in aw." chi'n a hon gen a, dawng lou in ka et thoh lel hi. Amau leng bai kawm luailuai in gari sung ah lut in ataikhe vengveng uhi.

Kei leng Station lam zuan in kataisuk nawn hi. Katai kawm in, ka thil sawm uh ana theikha om ahi chih ka thei a, kou department sung mahmah akipan a alehpan om ding in muanmohna kanei pah hi. Pilvan mahmah ngai ahi chikawm in Station ka tungsuk a, ka lawm ding teng ana tung kimvek uh ahihman in, pautamlou in kakisa pah tingteng hi. Kaman siangtak un, ann kane ua, thumna nei in kuankhiak hun ding ngak in ka tu khipkhep uhi.

BUNG 4: OPERATION PENGLAM DAWI-UM -I

Nitak dak 7:30 geih in Zogam Army siam tungtuan a tel khiak The Black Panther apan tel khiak mi 20 ding makaih in ka lawm leh kamuan mahmah Muanpu toh lenna in Champhai gammang lam zuan in kaleng khe vengveng uhi. Koimun ah kinga a, koimun pansan ding chih hilh lawk in ka omkei uh. Amun tunchia heutute'n hon chih na munmun uh manoh ding chihtan lel hilh in ka om uhi.

Kakhut ua map leh ka galvan chikim uh bang ah nek ding kapuak teng uh toh maitawm a maban sawn ding kahi mai uhi. Hiaibang operation lau huai ah katel kha kei a, katelpatna leh commander hihna kathuah pah ngal hi. Ka lin mahmah a, hiai bang makaih ding in chin kakisa kei, himahleh hiai mohpuakna ka liangzang ah kinga ahihman in zohlouh a koihmai ding ka ngaingam tuan kei hi.

Ka innkuante ka ngaihtuah a, si taleng kanu-pa tek tak te bang asuak ding ua, ka itpen Chingnou kei tellou in bangchi'n ana om dia aw..... Kik maibang ka ut a, alehlam ah lah ka mohpuakna sembuchinglou a kik mai ding ka ngaingam tuan kei. Ka it lah a tenna khua min dongkha lou zomah, damtak in kiknawn mahleng, kakimu kha nawn ding uam? Akhomin bek ka dot khaklouh ka kisik petmah a, bangteng hileh ka MISSION semsuah masa ding in kaki hanchiam thakthak hi.

Bangtan hiam kaleeng nung un, lenna cockpit apan in thu hong kipuang a, amun tungdek kahihman un ki gingsa a omchiat ding a theihsak in ka om uhi. Kou leng mansa diam a om in khut kilen in thumna kanei ua, kuamah taisia omlou ding, Gam a ding leh Pathian a dinga, ginomtak a pang ding in kaki hanchiam thakthak uhi. Minute 10 vel zoh in lenna sung ah asan khat hon vak teuteu a, lenna tawlam awl a hong ki hong in, a hing rong ahong vak tak in khat khit khat in ka ki tawm khe sauhsauh uhi.

Lei katun un ka kinaihkhawm pah ua, pilvangtak a gamtang in, ka kim ka pam uh ka dapvel pah uhi. Bangmah muanmoh ding omlou chi a lungmuangtak a ka omlai un, thakhat in thautang vuahzu bangmai in ka kiim ka paam teng uah hon kap khum uhi. Kou leng panmun kintak a la in ka mazawn uh thau ginna mun hi a katheihna teng uh ka ban kap uhi. Bangtan hiam nung in hon kaptute ahong dai ua, huai hunlemtang la in ka ma a kokhuk khat manoh a katai phei leh, honna kap nawn ua, enlah bangmah kimu theilou lawmte si uhia? dam uhia? Chih natawm theilou in kamazawn chiat uah kibuaipihman zosam omlou in thau ka thrut phei ziahziah uhi.

Sawtkuamtak ka kikap tuah nung un galte thawm ahong dai pianta a, himahleh akal lak in thau khat veivei a hong ging cheuh zel hi. A ginna gamla hiaihiai ahih man in, nungkik uh ahi chih kathei ua, awl a kisam khawm in ka kimuh tak un kalak ua khat ka kim ta kei uhi.

Galten man uhia? Ahihkei leh kaplup a om chih bangmah kathei kei ua, a zon dingdan lah omlou khua miallua ahihchiang in chi'n khovak chianga zong mai ding in kathupuk uhi.

Khua ahongvak tak in, ka kimvel uh nai chik a siluang tampi ana lum lemlum ua, lamdang bang kasa zozen hi. Ka ngaihtuah thak leh ki kawi khathei phial a kinaih a kikaptuah kana hi phiangsan uhi. Kalawmpa uh ka zong ua, muh in a omkei. Galte'n man uh hiding chi'n kouleng apaina lam uh hidia gintakna mun zui in kahong kipankhia uhi.

Ka ngaihtuahna apaisau petmah a, bangziaka amun katun uh ana thei uh ahia? Bangziaka aguktak a kuankhia kakichih lai ua amau ka tuk na mun ding uh theikhin a honna umkual thei uh ahia? Thuguk ana hilh zel khat bel om peuhmah chih na ahia, hitaleh kua ahi dia le? Ka kuanpih te a hidiam? Department a kaseppih te?

Ka gintakdan inbel kou akuante lak hilou in, ka heutute uh lak a khat hiding in kamuangmoh tinten a, hehna in kadim hi. Huchi'n ka muan mahmah kou department a sem khat Mangboi kichi thuguk lam saipawl a kazat uh ka houpih a, thu omdanteng hilh in a poimoh banga, ana suikhe ding in ka hilh hi.

Munkhat ah khawl in kalawmte kiang ah, "Galten i omlam uh thei ahihtakman un, haksa chiteng palsuak a i dou uh apoimohta, i hinna uh natawm phal a pan ilak uh angaita, ilak mahmah uah leng melma om ahihman in pilvangtak a gamtat akul hi. Hiai Operation zoh ahihmateng khawl maimai chih a omthei kei ding hi. Tua ding in nakiman na uh hiam?" chi'n chouna kabawl hi. Amau leng gam-le-nam a dinga hinna phala haksa chiteng a bul apan a atawp pha a palsuak ngam a kipia ahihdan uh ahon gen uhi.

Tuatak in akiang uah, "Tuni in i Gam adinga thil thupi semsuah ding a muangtak a kon tel khiak na hi uh, hattak in ipang ding ua, i Zogam a ding in kisit lou hial in pangchiatni, Toupa aw honpanpih in." chi'n thumna kanei nawn ua, bangteng hongtung zongleh gam a ding a sem ding, taiselou ding chi a kichiam in Zogam Salpha Chilgehlou ten mabang sawn in ka hong kipan khe nawn uhi.

BUNG 5: PUMDAL

Ama agensa bang in Penglam dawi-um pen a deih tam peuhmah hi. Nidang inleng muhsuah tum in pawl tampitak in mun kilkawi teng zong uhi. Himahleh kuamah in muzoulou in amau leh amau ki haza tuah in ki that tuah zelzul uhi.

Tua pawl tuamtuam te lak ah tuni dong a hat leh kuamah zohlouh a lauh mahmah uh, "DRAGON FORCE" kichite'n midang a zongdia kuante ana man in ana that zel uhi. Koute katun masak ni ua honna lambun te le amau pawl mah ahi hi.

Amakai pa uh ahih leh Pumdal kichi ahi a, amin a sam ngamlou in General chih ngen in sam uhi. Mi gilou, poisak neilou ahi a, Solkar lubuk (MLA'S & MP'S) bangzah hiam te thuzoh in zalentak in gamtang thei hi. Tua gammang sung ah khopi bawl in asepaihte 1000 val toh azi atate toh nuamsa tak in Kumpi banga vaihawm in om hi.

Gammang sungteng athunuai ah koih in, athulou a gamtangte hehpihna bei in soisa a, that zialzial hi. Penglam dawi-um muhkhiakna ding in amah vaihawm na gamteng paikan ngai ahih man in amah dou masak poimoh hi.

Thuguk ngah dungzui in kalawmpa uh ngei leng amau khut ah om ahihman in, a omna muntak thei ut in kei le Muanpu ban ah midang 2 in civil dress a kivan in Sing a sumdawng dan a kigen in akhopi sung va enkhe ding in kakuan uhi. Ana thupi ngei ngut a, Lamka khopi sanga a changkang zaw bang phial in athupi mahmah hi. Hat kisa huntawk thou ahihman un, agalmuang mahmah hi. Asepaihte ngeileng a zi-le-ta teng uh toh atengkhawm vek mai ua, khopi taktak khat mah a suak zou hi.

Asunga tengte khat lawmbawl tawm in ama makaihna in muangtak leh pilvangtak in kholai ka vakvel ua, apoimohna munteng aguk a limla in, kapai zel uhi. Pumdal in kiang katun un, lampi bawl tampi ana om neinoi ua, kou honton pih pa kiang ah hiaite kuate hi uhiam? Chi a kadot leh, galmat ahih dan uh ahon hilh hi. General pa thupiak kalh peuhmah te thah ahihma un na sepding pia ua, ana sepding kipiate azoh hunchiang a thah a omzel uh ahihdan ahon hilh hi.

Ka heh mahmah mai a, hiai Pumdal kichi dam dia tak in ka koih kei, sipah leh hoih zaw ding chi'n ka hatang ka gawi tettet hi. A gamtat dan, nidanga tangthu a kigen Vietnam leh Cambodia agam a Khmer Rogue te makai Polpot sang in zong nasia kasa zaw hi.

Khosung kavak vel khit un, pai ding in kakisa ua, huailaitak in kalawmpa uh amatpen uh, nasem zou lawmte toh a tan-inn zuan a pailai ka galmuh hi. Damlai ahihman in kakipak petmah a, lehlam ah bel ka hehpihpetmah hi.

Huchi'n awl a ommun zuan ding a ka hongpailaitak un numei nui ging biahbiah khat kaza hi. Ka zak khak ngei bang kasa petmah, himahleh, koimun ah kazak ahi a chih katheikhezou kei hi. Ka it Chingnou nuih ging toh kibang kasa mahmah hi. Amah lah hiai mun ah om ding in gintakna kanei ngal kei a, pai ding chi a lawmte sap sawm a kanung hei leh gintak hetlouh pi'n ki phukha dek phial in tua nungak toh kaki angngat kha chot uhi. Lamdang sakawmtak a amel ka et leh ka ang a ding pen ka it Chingnou anahi maimah hi. Milak ah pom tonton bang ka ut hial hi. Himahleh mitheih ding utlou kahihman in bangmah bel ka loh samkei a, haksa satak in kakidek teitei hi.

Kibawl lamdang kahihman in Chingnou inbel ahon thei sekei hi. Kakiang ah, "U aw, ka hihkhelh hi, honngaidam in aw." chi'n ahon paisan hi. Melmak gam hikei leh zaw bangchituk in anuam dia? Ka hehtha bang asuak maimah hi. Apaikhit nung in naupang khat kasam a, den a nungak pen kua hihiam chih ka dong khemkhem hi. Naupang in amin Chingnou ahihdan leh General pa tanu neihsun ahihdan ahon hilh hi. Kaphuzot zozen a, kalungsim in, "Chingnou, ka itpen, nang maw dougal nahih sese..." ka chi vungvung phet hi.

Chingnou in ka nna sep ding thei hileh bang ngaihdan anei dia? Ahon it lailai diam? Ahihkei leh ka thang-awkna ding lampi a zong zaw mai diam? Theihhaktak ahi. Huaiziakin, kei a dinga chidamhuaipen tuh ka Mission kazoh mateng Chingnou kitheihsak louh himhim ding chih ahi hi. Kataksuah zou na diam ah.(he2)

Ka camp uh katun nawntak un, heutute apan thupiak thak kamu ua, huaibel Dragon Force te panlak ma ngei a Penglam Dawi-um valak khiak ding chih ahi. Aziakbel, amau dawisiam khat zang ua, tulel a amun tung pawl omta uh ahihman in kintat kei leh amau khut ah lut thei ahihman in kintat ding in thupiak khauhtak ahon pia uhi.

Kouleng kintaka kisa in lawmpa pen dama a omlai nak leh awl a hunkhe thak mai ding chi'n Penglam Dawi um omna lam Rih Dil kiang zuan in a zan mah in ka paikhe ngal uhi.

BUNG 6: LAUH HUAI!

Ka lawmte toh gamlak, chiknawng lak peuh ah lam haksatak pal in mialnuai ah ka hong pai uhi. Bangtanhiam kapainung un gammang sahpetmah na mun katung uhi, sing lianpipi in kavei leh tak uah ahon umkimvel ua, lampi neuchik khat zui in kathau ua torch ompen chauh salvak in haksatak in suangphon lak ah kahong pai ngekngek uhi.

Lampi thakhat a ana kawi ahiding a, amial toh amasapen pan, theilou in amazawn phusuakkha in ahong kipai a, tolh suk in atumsuk vungvung phet hi. Amah atolh suk toh kiton in lamdangtak in akianga loupa buk omteng leng atolh suk duam uhi, alum in lumsuk vengvung mai a, aloh ngaihna theilou in ka gal et mai uhi. Ka kimteng ua, singkung omteng thakhat in a hong ling zoizoi ua, mi lau a kikou hileh kilawm lah aheh mah bang zel in hon kikou khum loiloi zel hi. Kalawm teng lah lau gawp uh, kalawmpa uhlah koitan tung ahia chih theihlouh in mangbangtak in ka om uhi. Thawm lah ngaih deuhdeuh mai mah ahihman in ka omna mun chiat uah, pauhetlou in thau kamsa in ka om khipkhep uhi.

Huchihlaitak in kasak ah naknoh hehu kawm a hon naih om kaza a kathau angim kawm a torch a ka salh leh kalawmpa uh ana hi a, singbul khat mankha a huaipansan a hong kaltou thei ana hi hi. Kasam pah a amahleng kakiang ah hong taiphei pah hi.

Thawm ging hong kipan nawn a, amasang a nasazaw sem in mitampi kikou kawm a koulam hon manoh bang in a om a, kakiang uh ahong tun chiang in aleng mang duam zel uhi. Huchihlai in kalawmte uh khat thakhat in ahong puk a, kipek ek-ek in mitoh kibuan hileh kilawm in akilep vutvut hi. Kouleng kigingsa a om den kahihman un, thakhat in kalawmpa ka manphei a, atung a ompa mutheikei mah leng ka suphei zialzial phet hi. Atawp in khah khong ahi ding a, kalawmpa uh zawi ningniang a hong lum in gim mel tak in anak thuthu zozen hi.

Hiai huntak inbel ahangsanpen natawm in leng lau mahmah unteh, kim teng ah thil gimse mahmah in ahon vel vutvut den a, akhenchiang bang in lawmte khat khawng ahon sawnthal vut zel hi. Thau a vakap mawk dan lah omlou ahihman in, ahih dingdan tuan aom kei. Ka gumthuak mai uhi. Akhat te lah kisan deuhdeuh ahihman in munkhat ah ka kikhinkhawm ua, ka mazawn chiat uh kathau ua ngim in ka omden uhi. Akhenchiang in kama uah ganhing mel pu in ahong tawm lonlon zel ua, koubel kap hetlou in Pathian panpihna ngen in kathum den uhi.

Ahehna uh sang mahmah ta ahi ding a, thakhat in ka omna sak ua singkhat a zung teng toh hong kibot khia in ka pam uah ahong puksuk zoih hi. Lau mahmah mahle ung, mihing hilou mawk ahihchiang un aloh ding dan omtuanlou hi.

Atawp in hichi'n omom mawk le ung hoihlou ding ahi chi'n kalawmte toh paikhiat vai kahon sawm uhi. Amasa ngam ding omlou, ananung a pang ngam ding omtuanlou in kabuai mahmah ua, atawp in Muanpu'n makai in ken anunung ka huk hi. Kapai kawm un akallak in kabiang uh ahong kibeng ek zel a, kei anunung pen kakhetul ahong kisui den hi. Nuammoh tak leh laukawm taka bangtan hiam kapainung un awl in khua ahongvak toh kiton in thawm leng ahong dai hiaihiai hi. Ka khonung ngaihtuah thak leh Sikhate lampi tawn a paipai kha kahihman ua, sikhate heh a tuabang a katung uah gamtang uh hiding in ka um mahmah bilbel hi.

Khua ahong vak siangtakin munkhat ah ka khawltawl dam uhi. Ka lawmte ka en a, pasal pha taktak ngen himahle uh, zan nitak a kathiltuah uh ziak in amel uah lauhna mel muh theih in a om hi. Kuamah apau ka omkei ua, gim mahmah chiat kahi ding ua, khawl maimai ding kachi uh himahleh ka ihmu kha vek uhi.

Ka ihmut kal in mang kanei a, kamang in mikhat kakiang ah hongpai in hichi'n ahon chi hi, "Nathil zon uh, phui kisam khum ahihman in huai phui kisam pen mah a lakkhiak theih ding ahi. Tua phui kisamthu pen Ngaizawl khua a mikhat Mang Thang kichi chauh in thei hi. Amah va zongkhe masa un." chi'n hon na hilh hi. Ka khanloh tak in kalawmte ka phawng a, thil omdan hilh in, Ngaizawl khua zuan in kahong kipan khe nawn uhi.

Lampi ahaksa mahmah a, compass leh map zang in chikmah a kamuh ngeilouh uh khua zuan in kakizui zel uhi. Munkhat kense lak ah kapai lai un, thakhat in ka tunglam uh ahong ging suk humhum a, kouleng kintak a khoubang ah belh in katang pang uhi. Aging pen in hon naihsuk hiaihiai a, lum in ahong lum suk honhon hi. Thakhat in katung uh ahong mial suk ngoingoi a, kei ananungpen a om kahihman in kamuchiang mahmah hi. Gulpi nih kilai anahi ua, khatpen mei in kaban hon zepkha in kakhang uah ahon zepkhe suk a, sawlbawk khat mankha in kaki khai geigoi hi. Keleng lah kanuailam atawng muh phak hilou, kaltouhna ding pansan lah bangmah omlou ahihman in kalawmte ka sam tuaituai phet hi.

Kalawmte lah mangbang, hamhaih gawp in hihmasak dingpen theilou in abuai mahmah uhi. Keilah kakhut khamgawpta, khah lenglah mangthangsuk ding, haksa kasa mahmah mai a, ka lauhtha bang hongsuak in kalawmte ka kikou khum loiloi petmah hi. Atawp in Muanpu'n a kawng a khau khih in awl in ahong lakhe tou thei hamham hi. Ka gim mahmah mai a, sihna khat pumpelh nawn aki hi peuhmah hi.

Gim mahmah lengle khawl maimai theihlouh ahihman in, ka hong kisa khe nawn ua, sawt tak kapai nung un nitak ninem kuan in sih/dawp khat ka hon tuak uhi.

Nidanga pu-pate' gen sih ah Sikha teng nuam mahmah chih zakha kahihman in, akintheibangpen a, tua sih pelh ka ut hi. Himahleh mawk pelh theih ahi mawk kei, hon subuaitu om mah bang in paina ding theilou in sawttak ka buai uhi. Atawp in lampi khat kamu ua, huai lampi tawn a pai dinga kahong kisak laitak un numei nuih ging ka honza uhi. Kouleng kintaka sawlbawk kawm ah kisel in kana en gu uhi. Bangtan hiam nung in nungak thum samsau zihziah melhoihtak mai leh duangchingtak mai ahong suak khia ua, khat in puandum tenga, akhatpen in malaam teng in adang khat in ngoutekhelh teng hi. Akilawmpet mah uhi. Mit tai peuhmah hi, lawmte khat in hiaibangthu theikhalou ahihman in, lamdangsalua in hon houpih kha thahah hi.

Huaiphet in, bangteng ahong kipan nawn ahimai, nungak thumteng thakhat in ahong mang ua, sih kim a singkung omteng nuih chihtak in ahong nui khe lualua mawk uhi. Gamsa khat apum lian mahmah khat koulam zuan in ahong paiphei a, kouleng ahong naihluat a, ahon sualsawm leh kap ding chi'n panmun la in kan tangpang uhi. Asa pen muangtak in ahong pai zel a, kanuai lak ahong tuntak in, kenleng kap sawm a ka ngim vengveng laitak in, keilam ah ahong dak tou a, kare!! Maizen, apum aletlet maizen toh, alu khuttum chiah lek apha mawk hi. Lamdangsalua kahihman in kap lou in kana en nilouh a, asa pen in kou hon mu hileh kilawm in ahon nuihsan zomah hi. Lamdangsa kawmtak a ka et heuhou laitak un ahong pau khia a, hichi'n ahon chi hi, "Na thilzon uh kapu uh Penglam thilneih manpha mahmah ahihman in kuamah khut ah alut ding kadeih kei uh, himahleh noubel, siatna dinga zanglou a, kepbit sawm nahihman un, lak theihna phalna ka hon pia hi. Himahleh pilvang un, migilou khut ah na khahsuah uhleh, nouteng in amoh napovek ding uh." chi'n ahon paisan hi.

Huchi'n thawm ging thupitak in ahon zui a, lau lua kahihman un akinthei bangpen a hiai mun nusia ut in, lampi haksa mah leh gimlam natawm phawk louzen in 100 m race kidemna nei mah bang hatthei bangpen in kaki taisiak uhi.

BUNG 7: NGAIZAWL KHOPI AH

Sawtkuamtak kapainung un Ngaizawl kho kiang katung khongkhong uhi. Khosung envel ding in khat kasawl ua, kou adangteng in khomual ah kana ngak uhi. Ngaizawl ahih leh Unau Chinte khua hi a, nidangpek a Mizoram, India nuai a aomlai pek a khua om, kumlui mahmah ahi, akhokiang ah, Khawzawl, Mizo khua thupitak a om a, Champhai apan km 70 vel ding khawng a gamla Sialkal Tlangdung a om khua khat ahi hi.

Tun bel pha mahmah in inn1000 vel om dinga tuat ahi. Hiaizah zouzai lak ah Mang Thang vazon khiak ding chihpen thu namai ahikei ding chih theihsa ahi. Bangtanhiam lawmpa ka ngak nung un, kinoh deuh in ahong tai a, kakiang uh ahong tun tak in, "Dragon Force ten putek Mang Thang kichi aman ua, tun a inn uah hensa in thu adong ua, den mahmah chiang a puakkhiak asawm uh. Agen dan un aman Penglam Dawi-um lakkhiak theihna ding Phuisam pen atheihziak ahi a chi uh." chi'n ahon gen hi.

Koule'ng khosung ah va lut lehang, khosung mi a dinga, lauhuai thei dinga katheihman un khaw nawl ah tangpangin ahongpai uh kana ngak uhi.

Dakkal khat dingkhawng kangak nung un truck khat leh, Jeep nih in ahong tai ua, jeep khat masa in alai ah truck anunung ah jeep mah chih dan in ahong kizom phei uhi. Anunung pen ah Mang Thang atuangsak ua, Katupdan uhtoh kibang nawntalou ahihman in, amasa jeep pen mi 3 in ka bei ua, truck pen RPG in kakap dalh phung uhi. Anunungpen atainang omlou truck in dal kha ahihman in, ka umkual ua, asunga tuangteng khut tunglam ngat in ahong pawt khe vek uhi. Mi 5 apha ua, thudot ding 2 hawi in adang thumteng kakaplum ua, a jeep uh zang in Mi 2 leh Mang Thang toh Ngaizawl khua zuan in kapai kik uhi.

Thau leh bomb ging zuauzua te za uh ahihman un, kho mipite lau ana kibu gaivek phial uhi. Khosung adai zikzik a, kouleng taisuak in VCP (Village Council President, amau nidanga Mizoram state a omlai ua, apaidan uh tutan in a zuilai uhi.) Pa inn ah kakinga uhi. Mipiten Zogam Sepaihte kahih lam uh atheihtak un, ahong taikhawm siausiau ua, neksenglouh atam nek ding hontawi ua, nungakten kakisil na ding uh tui hon bawlsak in nuam kasa mahmah hanhan uhi.

Galmuangtaka om chih hithei tuanlou ahihman in, Ngaizawl police te duty sak in koubel ka tawl utoh, tawldamtak lah pilvang tak in ka om hanhan uhi. Dragon Force te'n thiltung teng thei ding uh ahihman in, hongkuan nawn ngeingei ding uh chih theihsa ahi a, mipite pilvangtak a gamtang ding leh, buaina ahong om leh kihemkhe pah thei ding in kathu hilh ua, a hih dingdan teng uh, apai dingdan teng uh hilh in, galte hongpai ding ngak kawm in ka tawldam uhi.

Nitak ann VCP in zindouna in vok ahon goh a, VC member teng toh kithuahkhawm na leh meltheihtuahna chi'n annkuang ahon umpih hi. (VIP khualzin mah kisak in om zozen aka... Ha2) nitak dak 8 tan in bangmah thawm akiza kei a, gimluatziak in nuamtak in ka imu hithit ua, huchihlaitak in, gamlapi apan a ging ngaihpetmah khat in a hon phawng zot a, hong kuan petmah ta uh ahi maw.... Chin kou mi 21 te group 3 a khen in Group khat a honglutna ding lam uah panmun ka bawlsak a (Ngaizawl khua ahihleh tangtung a om khua ahi a, khosunglutna din lampi khatkia om a, kholaizangtak ah lampi pai in khonawl langkhat lam ah paisuak a, lampi dang omlou hi.) group nih na ten khosung ah panmun bawl in athumna te'n khonawl ah panmunla in apoimohna mun teng a panpih dinga mansa in ka om uhi. Police omteng ahih leh mipite ana kem ding in kathu hilh uhi.

Kangaihtuah thak leh, ahonglut tung na mun uah tamdeuh poimoh ding sakna a om man in kou group apan mi 2 leh group2 na te apan mikhat sawlbeh in Group1 na te kava belsak thak hi.

Panmun teng hawmzou in galte hongpai ding ngak kawm in mipite munbitzaw ah ka nawn khia ua, mansiang vekta chih ding in khomual lam ah.....

Thau nasatak in ahong ging zungzung ngai hi. Muanpu ka hou pih a, thu omdan ka dot aleh, "tam sim mahmah uh ahihman in nanzoh haksa sim mahmah inteh." chi'n ahon dawng hi. Kenleng, "huchi ahihleh, lutsak unla, alai ah umkual in beithakni hang." chi'n ka plan uh khekthak in khosung ka umkual thak uhi. Amau bel tam simtak ahihman un, kimuang mahmah sam uh ahi dinga, lauh neilou bangmai in khosung honglut ut uhi. Innteng aban et hang un kuamah amukei uhi. Koubel thau khah tadih nailou ka hihman un, ka omlam uh theilou hi unteh. Bangmah muh aneihlouh tak un, khosung mawltual ah kisamkhawm ua, fall-in nei in amakai pa uh hang lala in thu gen matmat hi. Kou huai hunlemtang la in, bomb leh thau zang in kabei suk ua, khuaibu phutkha mahbang in alang alang kidenna in adalhzak zengzung phet uhi.

Khawllou hial in kakap zomzel ua, mawltual sungten ah misi luang alum zelzul maimah hi. Lawmte kiang ah kimawlna din ana kap zomzel un chi'n Muanpu leh Khualpu sam in khosung kava enkhia uhi. Khosung adai zikzik a, pilvangtak in kim-le-kiang enchian zel in kapai uhi. VCP inn katun un, innsung ana vak a, innkongtual ah laizial tep kawm a kihou kamu uhi. Kouleng kintak in dailing liah ah kisel in, awl in bokvak kheukheu kawm a kava naih uleh galte ana hi ua, mi 5 inn kong ah ana ding ua, adang innsung ah omleng a om uh chih theih in a thawm uh akiza thei hi. VCP man uh hingei ding in agintak huai a, kouleng thau ah agindaihna te bulh in mi 5 teng ka kemhoih pah uhi. Awl a inn naih in, tukvelh apan in innsung teng ka ban et ua, common room ah gintak bang ngei in VCP chair toh henbelhsa in a om a, asoisakna uh si kai niau nuau kawm in atu akiang ah a zi atu a, khat in azi man in room dang ah kaihlut asawm a, akhat ut lou in akikou ek-ek hi. VCP lah lau lua in kap kawm in azi bangmah lohlou ding in angen ngutngut hi. Adawnna azak sun lah nuihsan lualua chauh ahimai. Beidong kisa in thumna nei in akap khe lualua phet hi.

Kouleng kintak a panmun ding kihawm in, Muanpu'n VCP' Zi va hunkhe ding chi'n, kou Khualpu toh Common room ateng mohpuakna kipia in kapan mun ding uh kanaih uhi. Kong tuan hong kawm in kalut a, kathau kakhah zom ngal hi. Kanung ah Khualpu'n hon zathuap in ahong tawm lut tei a, huchih laitak in.

Kongkhak lam apan mikhat hong lut in kalawm Khualpu nakpi tak in ahon tuanphei a, kei honboh phei kha ahihman in kathau tawilai khahsuah in kanih un tuanglai ah kakipuksuk uhi.

Ki nailua kahihman un, thau zat khelh baihlam, chihbel lawmte kapkhak phut theih ahihman in lauhuai sa in thagum a kinawk tuah chu kahipen mai uhi. Amau lah mi 5 vel ding ahi ua, kou mi nih toh kong kibei uhzaw nasa mahmah thousam, Jackie Chan style, Jetli styte zangthei vek thousam himahleng, amun neulua ahihman in ka John Cena style hun bangle tam mahmah din ka gingta hi.(he2)

Muanpu inleng asep ding zou in koulak ahong lut suk a, kathum un ka kibeih huan nekhnekh lel uhi. Atawp in zaw hon nangzou nawn samlou uh ahi dinga, tuangtung ah kisat zotzot geuh uhi. Kouleng VCP pa phel in a zitoh ka pawt khiak pih ua, khomite kiselna lam ah vakha ding in police 2 thu kapia a, amau avakha uhi. Kalawm dangte unleng a na uh zou in Dragon Force te mi 200 vel ding tua nitak in gawtmun lam ah transfer order kasuah khum tep uhi.

Azing in kho miten katung uah kipahthugenna in thumsakna ahon nei ua, vok gou in annkuang umkhawmna kanei uhi. Hiai Ngaizawl khua ah nidang inleng Dragon Force te valut zel in a ut teng uh demand bawl in khomite gelgawt thei mahmah sek uhi. Pasal kum18 tunglam mi amau khutlum thuakkha lou vang mahmah din gingta bilbel ing. Tunbel kouziaka galte tampi thah a om a, galte lak ah lauhna tun ding leh, tubang Dragon Force te'n amau pawng bawl ngam nawnlou dinga upna nei uh ahihman in katung uah lungdam mahmah uhi. Anungakte uh lah siamthei mahmah ua, chi golhna te bang hong meksak in kam nemtak toh hong houpih chiang un, gimna tengbang bei in, ka it Chingnou bang hong mangngilh sak zou dektak ve uh e... Hauh de!!

Huchi'n Mang Thang thu kadong ua, aman atheihdan teng hon hilh in, hon panpih ding ahihdan ahon hilh hi. Tulel a Penglam Dawi-um omna bel Ngaizawl apan in mel 90-100 kikal dingvel in gamla a, gamkawm ah omlai ahihban ah, lampi ah katuah ding uh lauhuai tampi zong omlai ding ahihdan ahon hilh hi.

Amasa in Dragon Force te kaphut suak uh ngai masa dinga, tua zoh in Burmese Army tamtak ka phut paisuak uh hong ngai nawn ding hi. Amau bel Dragon Force tetoh pangkhawm zong ahi uhi. Tuazoh chiang in muhtheihlouh te kamaituah uh hong ngailai ding ahihman in amau toh kizawl a kihou thei Mang Thang pen poimoh mahmah kana hilel tak uhi.

Ka thautangte uleh vanzat tuamtuam ten hon daihzoulou ding ahihman in, munpi lamte ka thukhak ua, huai ngakna kawm in Ngaizawl ah bangtan hiam kanituang uhi. Ka lawmte ngei leng tangval ngen ahih utoh, hun awl mang nuamsam ding uh chi in zalen deuh in ka omsak a, nuam asa thei mahmah vanglak uhi. Khawzawl toh kinai khah ahihman in Khawzawl khua bang kava pha ua, Tuichang lui ah bang nga kava man zel uhi.

Mangboi toh kakithuzak zel ua, amanleng ka thupiak ana semsuah in, koute paina teng Dragon Force te ana hilh den tupa theihsuah ahong hita a, Mangboi ading ale Lamka mun lauhuai thei dinmun ahih man in(theikhe le uh) galvan supply dingte ahong kuan chiang ua amau hon zui ding in ka hilh hi. Supply Department lamte ngei leng thu kape ngal hi.

Maban pai dingdan kalung abuai petmah mai a, Penglam dawi-um vala khe ta mawng le ung le, lamtawn agal ka nawk suk nawn uh angai dinga, ka it Chingnou ka tan theihna ding in apa ka dou angai nawn dinga, huaiteng kazoh chiang in ka DSP uh Khuppu tung ah case bawl a, amah ka delh nilouh uh angai nawn ding. Hiaibel thuguk tawpkhawk ahihman in SP toh hoihtaka kahoulim nung un, ka vaitun lamchiang ua ngaihtuah ding in kathupuk uhi. Chih bel, amah ngei inleng anuai ah sepaih bangzah hiam neisam ahihman in phawng pah lou a, a ihmut sanlaitak tanzawk ding chih ahi hi.

Ka supply ngakte uh gintaksang a hong zekai zaw uh ahihman in Ngaizawl ah sawtsim ka tang kha uhi. Keibel kinoh sim mahleng, kalawmten nuamsa lel uh ahihman un khawk asa vet kei uhi. Chimthawina in kouleng lawm Muanpu toh a chang in nungak hel in kapawt zel ua, lawm Muan ngeileng kapawt khiak hunchiang ua nungkaih veithei ding dinmun in hong om mawk veh e....

BUNG 8: OPERATION PENGLAM DAWI-UM -II

NGAIZAWL-KHAWZAWL

Galvan poimoh dingteng ahong tun tak in, Mangboi inleng ahon zuithei a, huchi'n kipatkhiakvai kahon sawm nawn uhi. Nitak in kou lawmtateng suty kakipia ua, Ngaizawl Police te duty sak in Muanpu nungak Siamnou hel in kava kholai leng uhi. Sawtkuamtak houlim nung in Muanpu chance pia in Mangboi toh ken kapaisan uhi.

Giahna mun ah VC member tetoh houlim khawm in kipahthu bang kakigen tuah ua, apaizoh un, lumding in kakisa ua, lawmte le khat khit kha hongtung siausiau ua, galvante hoihtak a enchianthak in kalum uhi. Kalawm uh Muanpu bel melmuh phak in omnaikei a, ka phone a, amah chauh hongpai phot maiding a ka chiamnuih leh, heh kisa in atui-ke nuih vengvong maimah hi.

Zingkal baihtaka thou in, kakisa mengmeng ua kavan dingteng uh gari ah koih in Mang Thang vapi ding in tangvalte nih kasawl hi. Muanpu ahih leh munkhat ah lungkham mel deuh in mukpuak zen in ana tu a, akiang ah pai in, "Bangchi e Muan? Tuni na nguaina e..." kava chih thahah leh, heh kisa in, "ZAN NITAK HON SAMPAH HIVECHIN." hon chikhe loiloi mawk hi. Lawmte teng toh "Zawlngaih sunglut pa" chi'n ka chiamnuih ua, kanuih san ek-ek uleh amah leng atawp in hong nui nanalh sam hi. Akiang ah, "Muanpu, huchih pahpah ding hilou, idam dia lohchingtak a ikik hunchiang un, lundeihnu ipi sukna kei ding maw..." chi'n ka khem lungdam a, aman leng theisiam mahmah in Mang Thang te ahong tun tak utoh, gari a tuang in Khawzawl manoh in kho mipite toh mangpha kikhak in ka tailiam vengveng uhi.

Khawzawl katun un khosung lut taktak ma in, Mualvawm Field kiang a, nidang pek a Mizo gallai a site theih gige na dinga mualsuang hoihtak mai kidohna ah kava khawl masa ua, Zogam history a i simsim te theihkhiak thakthak in om a, lung ahon suleng mahmah hi. Amaute zahna ka pia ua, tuazoh in akhosung ua lut in BDO office gei a, singkung liantak khat, nidanglai pekpek a pi-pute'n Japan gallai achih hunlai ua, Japan ten Khawzawl mihangsan nih akhailupna uh kava en nawn uhi. Amaute kipiakna in koute tha hon guan mahmah in "Keile'ng Zogam ading in ka hinna sitlou hial in aw." chi'n hanchiamna kanei thakthak uhi.

KHAWZAWL-CHAMPHAI

Huchi'n bangmah buaina omlou in Khawzawl nusia in Champhai zuan in kahong pai zel uhi. Katup dantak un bel, Champhai khosung lutlou a, a khokiang laka Dragon Force te munpi luhkhiak phei masaka, tuazoh Zokhothar a Burma Sepaih te camp luh phei nawn ding chih ahi hi. (kimuang mahmah gemgam chio?)

Champhai manoh a lungmuangtak a kahong tai uhleh, saulou katai nung un ka mazawn uh gamlasim tak ah checkpost khat ana om kamu mawk ua, lamdangsatak in thuguk honpeten lah hiai Checkpost omlam hon hilh khalou ua, chi'n kabuai mahmah phi'ng uhi. Etletna a ka et uleh Dragon Force te ana hi ua, kalungsim in, "Pumlam thuneihna liantak ahive maw?" kachiphet hi.

Checkpost maimai ahihman in mi tamlou khah a om ua, amaute beih di ahaksat tuak kei himahleh check post apan gamla lou ah a camp uh om ngei ding ahihman in, camp a omte theihlouh a ka koih hoih uh angai hi. Huaiding in Muanpu toh kanih un Civil dress a kivan in pistol leh temta kapua ua, bike hongtai masa pen kham in a hekpa kalawmte kiang uah ka nusia uhi. Huchi'n check post omna mun kazuan uhi. Amun kaphak madeuh un Muanpu akumkhia a, aman aguk a sentri te anunglam uah ana beih ding, ken gari ahon kham chiang ua, Muanpu khoihkhak louh teng kana beih ding chih dan ahihi.

Muanpu aman khit in keileng muangchangtak in ka taiphei a gate katun tak in mi 2 in keilam hon zuan in ka license ahon ngen uhi. Ken leng ka za-ip sawk kawm in license lakhe di awmtak ing kakisa a, huchih laitak in Muanpu'n sentri ate gel hon khoihpuk a, kenleng ka sakhau apan a temta lakhia in, lawmte kiginma in khat gawl-at phei in akhat pen a dip ah kasun suk hi. Kaman siangtak un duty te ahinglai mah bang in kakoih ua, lawmte sam in maban kahon sawn zel uhi.

Galte munpi naih deuhdeuh ka hihman un pilvan tawp khawk in katai zel ua, lampi ah galte toh kituah phut theih ahihman in lamlianpi tawnngam lou in gamlak lampi bawltawm tawn in kahong taizel uhi. Atawp in Champhai khokiang katung ua, gamlak ah giahna ding bawl in kakhawl tawldam uhi. Kaban uah Dragon Force te munpi khat om ahihman in huai enkhe ding in Khualpu makaih in tangval thum kasawl uhi.

DRAGON FORCE TE CAMP BULUH NA

Enkhetute ahong tun nawntak un, amuh bangbang uh report ahon pepah uhi. Tua hiai Dagon Force te camp bel mundang ate bangloutak in mun zang, lian lou khat ah om ahia, akim teng mual in a umsuak a, alutna ding lampi kibawl khat chauh a om hi. Hiai camp ah mi 500 ding khawng om a hisap ahi a, galmat bangzah hiamte leng hiaimun ah nasem dinga khum in a om uhi. Koubel tomkhah kahihman un aguk a valut a, bomb thang kam ding, ahon phawk ma ua, khoih chimit vek ding chih ahihi.

Huchi'n Mang Thang leh van paw dinga ka tonpih uh Ngaizawl khomi mi 5 te nusia in khuamial in kakuan khia uhi. Kou omna mun apan gamla lou ahihman in minute 30 sung in katung pheipah uhi. Lampi ngeina pen tawn lou in gamlak ah kalut tou ua, duty omlouhna mun khat ah pawt khia in camp um na ding a dai akaih uh mun katung ta uhi. Panmun kaki hawm ua, tangval 5 in bomb kapuakte uh duty post teng ah leh gari tuamtuam akoihte uah bomb anakam ding in, keile Muanpu in a galvan koihkhawm namun ah bomb te vala a giahna inn kim teng ah bomb kam ding in, minute 20 sung a zohvek ding leh minute 25 na ah bomb puahsak a, awl a asung a lutnawn a, saltangte suahtaksak ding chih katup uh ahi hi.

Tua tanmun piakkhak louh teng in Sniper mi 2 toh kim-le-kiang ana envel ua, kilteng ah patrolling pai om zel ahihman in huaite ana enkai ding in thu kapia hi. Huchi'n umna sikdai teptan in ka lut ua, ka tangvalte amuanhuai thei mahmah mai uhi. Kintak in agamtang ua, zawng khuak nekha ngen mahbang in gamtang zetzet lel uhi.

Kana ding ua kipiateng buaina bangmah omlou in kazouthei ua, gari kataikhiakna ding uh khat chihlouh adangteng ah bomb ka kamvek uhi. Kouleng Muanpu toh kana uh zou chi'n lawmte omna mun zotsawma kakisaklaitak un, ka omna kiang ua inn khat akong hong kihong in mi 2 hong pusuak uhi. Amaute kana etzui uleh, saltangte khumkhawmna munlam ah vapai in mikhat ahon kaikhia uhi. Ami kaihkhiak pen uh kuadang ana hilou in, kakuan tung ua amat uh kalawmpa uh ana hi a, kouleng Muanpu toh ana kisa in kakiang uh ahongtun tak un kana boh phei ua, anih un ka dawtlum pah uhi.

Ka lawm uh Sangboi in kou kahihlam uh atheihtak in kipak mahmah in keibang ahon pom tonton kha zozen hi. Athau ding pia in ma kasawn sawmlai tak un, kathawm uh hon za uh ahi ding ua, mi 10 vel kou omna lam zuan in ahong paiphei uhi. Kibukna ding lah omlou ahihman in lawmte hilh in a bomb kamte uh supuak din thu kapia hi. Bomb puak toh kiton in kouleng ka ang ua hamhaihtak leh lungbuaitaka omte ka kap ngal ua, huchih kawmkawm in munbit zaw zuan in katai khia uhi. Amau mah leng buaigawp leh hamhaih gawp uh ahihman un, amau leh amau bang akikap tuah kha ek-ek uhi.

Ka galdou khakna laklak ah hiai camp kaluh na uh thupipen phial ding in ka um hi. Aziakbel bomb puak te mahmah thupi in, armageddon kidouna tungta mawng leh leng hiai bang a bomb kihah zat ding in umtuan keng, khawl louhial in a ki brass mah bang in bomb minute 10 sung dingvel ahong puak zom ziahziah a, tuatoh kiton a buildingte, bunker te puakdalh a aneng kitheh khe zungzung kal ah galte mangbang kikou aw te izak khawm chiang in thupilou chihna vual ding kathei kei hi.

Sepaih hinglai teng kaban kap phei nawn ua, saltangte honkhia in gari khat a tuangsak in katai khesak uhi. Kouleng ka gari zat dingpen ah katuang ua, main gate phusia in katai khia uhi. Polam a lawmte honngak te omna katun un bomb kam sukpuak nailouh teng ka supuak nawn ua, tua ni in Dragon Force te camp thupi leh akisaktheihpih mahmah uh, Tactical Headquarter ding a azat uh, vaivut kasuah dimdem uhi.

Kamansiang vek un ka munlam uh kazuan nawn ua, kimtak a ka kiknawn theih ban uah, kalawm uh toh dam a kakimuh khawm theih nawn man un Pathian kiang ah kipahthu genna kanei uhi. Huchi'n duty lou teng kalum ua, katha tawl mahleh ka imu thei kei, innlam a om kanu-kapa te bang ana chi ding ua aw? Ka it Chingnou in a ginomna ana lenkip lai diam? Hon ngaihsak lou chi'n midang ana nei maimah diam? Chi'n aselam khawng a kipe kha mawkmawk in kakhasiat tha bang ahong suak dek mawkmawk hi. Theihlouh kal a imu kha kana hi dinga, kakhanloh tak in khua ana vak mahmah ta hi.

BURMESE ARMY TE TOH KIBEIHNA:

Kamansiangtak un Zokhawthar lam manoh in kong kizuikhe nawn uhi. Tunbel Rih Dil kanaih mahmah ta uhi. Ka target uh ahihleh Rih Dil naklam mel 7 dingkhawng a gamla ahi a, gammang sahtak nisa kimuh mengmeng louh na leh sih/dawp pian lak ngen ahi hi.

Bangtanhiam kapainung un, kasak zek uah mipau thawm kaza ua, loupabuk lak a kisel in kana engu uhi. Ahongpainai zel ua, apau uh a chiang mahmahta, Burmese ngen in ahong kihou suk bolhbolh uhi. Akihoudan uapan in amuang mahmah uh chih atheihtheih hi. Kakiang chin uah hongpai ua, hon sikkha dek hial zozen mahle uh lamdangtak in ahon mu hetkei uhi.

Amau bel mi 20 vel ding ahi ua, ka kibukna sakzek uah sun ann neding in ahong khawl khawm uhi. Hiaihun lemtang ala in amau kava umkual ua, avek ua man in, kakaplum vek uhi. A annpuakte uh gilkiallua ahihman in kanek sak ek mai mah uhi. Huchi'n tha hong om deuh in ma kahonsawn zel ua, thupiak thak kamuh man un, a camp uh luhlou thak maiding in kakisa thak uhi.

Huchia a camp uh pel ding a kisa a lamtuam zuan a kapailai un thakhat in kanung kama uah honna umkual ua, kavek ua hon man in a camp uh ahon zotpihta uhi. Kavan teng uh honlaksak vek ua, kalawmte teng muantuam a koih in Kei vuak room khat ah ahon koih uhi.

Ka thiltup uh vuaksuak mai ding abangta, tun mat in ka om ua, chikchianga pawt khe ding chih theihzoh ahikei bak ah, hing-le-dam a pawtkhe nawn ding in kaki koih kei himhim hi. Kalawmte toh kihou theilou ding in kei kia in room neuchik khat mial khepkhup, namse mahmah ah ahon koih uhi.

Ka ngaihtuahna apaisau khop mai, inn ah nuamsa tak a ka omlainite ka ngaipetmah mai a, abiktak in ka it Chingnou toh Lengtonghoih Park a nuamsatak a ka kithuahlai nite uh kamitkha in ahonglang dundun a, ka mit ah khitui khamvual louh in ahongluang suk giaigiai hi. Chik leh tua hunnuam te tuang ahongtung nawn ta dia!!!

Pasaltoupi, Zogam Salpha khat himahleng, ka omna pindan thawpik mahmah sung ah ka it Chingnou ngai in ka luankhi'n hontum den hi. Ka it ka ngaimahmah mai a amah bek omleh zaw nuamtuam ding hia ka chi vungvung hi.

Katheihlouh kal in kana imu kha a, kamang in ka it Chingnou toh phaizang mun nuamtak ah kana vakkhawm helhel uhi. Ka ki itdan khawng uleh, maban ding khawng gena nuamsatak aka omlai un thakhat in huihpi hong nunga, meilomte hong kizial in vuahpi ahongzu hi. Bukna ding zong a Chingnou khut lenkawm a katai vialvial lai un thakhat in kek ahongkia a, kakal uh thil vom ngeingui khat in hong tuamchip a muh phaklouh na gam ah ka It Chingnou hon lakmangsak hi. Kasam ek-ek a, himahleh ahon dawngding kuamah a omkei. Thakhat in kek ahongkia a, kakhanglou guih hi.

Ka mang ka ngaihtuah dedu mai a, bang ahongchipet diam aw chi a kangaihtuah laitak in mi nih ka pindan ah ahonglut ua, kakhut tegel ah honlen in ahon kaipawt uhi. Room mialsim mahmah khat ah ahon koih ua, electric vakpha ngellou khat avak a, agei ah kigawtna vanzat tuamtuam tamtak aki koih neinoi hi. Kalungsim in "Ehe! Hon soisak sawm uh eive maw" ka chi hi.

Chair khat ah hontusak ua, kama ah dohkan kikoih in alangkhat lam ah mikhat hatmel deuhmai khat ading a, sawtlou nung in hon thudong ding in mikhat fel meldeuhmai ahong lut a, file ahontawi pen kama ah hon vawkphei in kama a chair khat ah keitoh ki ang ngat in ahong tu hi.

Thudot ahon panpah a, ka thiltup uh leh bangziaka hiaitan gam vatung kahi uhiam? Chih ahon dong hi. Bangmah dawnna kape kei, a hon dong zomzel a, himahleh adeihbang in kei apan dawnna amukei hi.

Kei apan dawnna bangmah amuhlouh takin kakiang a omte thu pia in ahon kaiding tou ua, munkhat ah hon lumsak in sikchiangpum liandeuhtak khat in ka ngal ahon hualsak hi. Anat dan genvual ahikei, athuaklouten atheikei du, natak ahi. Hiaibang gawtna sanga khawkzaw tham in hon ngaklai ahihdan kahaih kei, himahleh, amau lungkimna tan dawnna piak ka tum hauhkei hi.

Hon gawt kawmkawm in thu ahon dongzel a, kamkhat mah in kadawng tuankei. Huchi'n towel la in kakam ahon tuam ua, ketli in tui khawllou hial in ahon sungsuk uhi. Ahaksapetmah, nak zoulou in kakipek ek-ek hi. Amau lah tawptuanlou uh ahihman in, ut in ut keile ki doh mai angai hi. Hiai kigawtna pen zaw ahaksa petmah. Ahon gawtna teng lak uah haksa kasak pen ahihi. Bangtan hon gawt uh ahia katheikei. Khawphawklou a om kahi dinga, kakhanloh takin ka pindan lui mah ah kana om nawn hi. Katha azawi petmah, tha himhim kaneikei. Hichibang dinmun a sawt ka omleh ka si hak kei ding in kagingta hi.

Damna dinga pawtkhiak pah poimoh ahihman in, hunlemtang kazong hi. Nikhat camp a omten nunnopbawlna nei ahi ngei dingua, a puak romrom phet uhi. Hiaibang hunlemtang omnawnlou ding ahi chi'n hunlem kana ngak hi. Ka vangpha ahi dinga, sawt kihallou in annpe ding in sepaih khat ka room ah ahonglut hi. Kei kahihleh kana ki ihmu sak khemkhem a, ann koihkhin pawt dinga kisa a ahon nungngat phet in kawlphia banga kin in ka bohphei a, a lu ah man in ka gawl heklup geih hi. A uniform teng a kithuam in a thau toh ka pawt khia a, anunnop bawlna uah telvek uh ahihman un kuamah muh ding a omse kei uhi.

Kintakin, kalawmte omna lam manoh in kataiphei a, kimtak in room khat ah ana omkhawm lelaih vanglak uhi. Kongkhak hong in kasam pawt pah a, kavek un ka galvante uh akoihna lam uh kazuan ua, kaman siang vektak un, kilh chih ah bomb te kam in dainawl lam zuanin katai khia uhi.

Hon gawtna uh ka hatang thak law tettet petmah ahih man in, hiaite pawl hing hawi lou ding chi'n panmun kahawm vek a, luh suk ding in kahong kisa uhi. Amau lah nuamsa petmah in zu kham in lu-le-taw phawklou zen in lam in alaam maimah uhi.

Kaman siangvek tak un RPG in a stage tung ua lam nuainuaite ka hawt dalh phei a, tuatoh kiton in lawmten alomlom a omkhawmte lak ah, granade paihkhum in thautang vuahzu bangmai in ka hawt khum uhi. Burmate dawilok deuh chihmahtak, au in a au chelchul maimah uhi.

Ka luhzomtou zel ua, kei hon gawtpa kamuh khak tak in, ka delh phei a a awm ah man in hon soisakna buk sung ngei ah pilut in ama hon hih bangbang in atung ah kahih suk miatmiat lel hi. Lau kisa in ngaihdam bang ahon ngen tottot zozen hi. Lungdamthei mahmah lou in, towel kala a, akam ah hensuk in tui kabuak suk hi. Kei hon gawt lai a hon nuihsan vengvang pa pen tun mitkau zen in aki sat zotzot a, alehlam ah hehpih huai thak dek zozen hi.

Ka sepding teng uh kazoh un lai poimoh omteng kaikhawm in ka taikhe nawn ua, gamla deuh a kakihepkhiak nung un camp sung ka bomb kamte un ka kap dalh phungphung nawn uhi. Huchi'n munkhat ah khovak ngak in kakhawl ua, kamaban uh sahtakmai omlai te Pathiang kiang ah nga in tutan hing-le-dam a ahon pina te ziaka kipahthu gen in thumna kanei uhi.

Tun kamaban uah hon dal thei khat chauh a omta a, himahleh ka dou ding tengteng lak ua lauhuaipen ahihi. Ahangbel, muhtheih louhte himawk ahih man un lau huai mahmah in aguk in lit huai mahmah mawk hi. Koute hon mule uh Pathian hingbia ka hihman un, ma kasawn ding uh hon phal ding un ka umbilbel kei hi. Tuahang in, a ki zawl pih uh Mang Thang pen hiai hun ading in mi poimoh mahmah khat suak hi.

Ka SP pa uh ka houpih a, tulel a ka dinmun uh hilh in, hun sawt lutsak nawnlou ding kahih dan uh ka hilh a, DSP pa omdan ana enkai lai ding in ka ngen hi.

Agam omdanteng Pu Mang Thang in theisuaksa dimdem ahihman in ama makaihna nuai ah kuan ding in kakisa ua, himahleh amah pen tek sim mahmahta ahihman in ka deihbang ua kintaka zohpah bel ka ki gingta kei hi. Huchi'n khawltawl dam in azingchiang a kipan khe ding in ka hong kisa ta uhi.

BUNG 9: OPERATION PENGLAM DAWI-UM -III

DAWI TE TOH KIBEIHNA

Khua ahongvak siangtak in ka maban uh sahtak omlai phusuak ding in kon kipankhe nawnta uhi. Vanpo dinga katonpih te uh lau huaina teng ah subuai utlou in a thaman uh pia in kakiksak uhi. Pu Mang Thang makaih in adangteng kahong kipan kheta uhi.

Pu Mang Thang hatzou nawnlou ahihman in akhenchianga puak thoh zozen in kahong paizel ua, agimpetmah mai a, ahehpih huai petmah hi. Himahleh, amah omlou a ka mission uh lohching theilou ding ahihman in haksa mah leh kapai teitei uhi.

RIH dil katung pah ua, khawllou in kapai zomzel uhi. Rih dil kheng khin, anak lam kon zuihpat uleh thawm zak in a ompah ngal hi. Dil kianga, zawng honte'n tua thawm gingte thei mahmah uh ahihman un, om muang theilou in lau in tai zungzung phet uhi. Kou leng lau mah le ung ama akatuah masak ua damtak a hon suakta sak ua, ka paiding dan natawm uh manglam natan a hon hilh uh ahiman un muan nakhat kanei veve uhi.(kamuan uh ahong bang nadiam ah)

Huchi'n gammang kawm kahong lut thuk deuhdeuh ua, mial hiaihiai in lampi natawm zuih haksa hiaihiai hi. Ma kasawn hat thei hetkei mawk uhi. Huihzang vot tak mai ahong nung hiauhiau a, votsa in kaling tou den uhi. Bangtan hiam kapainung un thakhat in amasa apaipen ahong kisawn leng phei vulvul mawk a, kou leng thakhat a khawl in bangthu ahong omhiam chi'n thawmhau tak in kadak giaugiau uhi.

Huchia thawmhau taka kadin lai un, thakhat in kamazawn uah singkung sangtak khat a zungtoh hong kidawk khia in kama uh khak in ahong kikhung suk zeizoi hi. Thawm thupi mahmah in ahon zui a, kilteng ah muhtheihlouh ten ahon sawk souhsouh ua, chizau hauh chu nasatak ahi. Lau mahmah lehangle hon zel mawk uh ahih chiang un, kavek un alaam mah kabang nainai uhi. (Huailaitaka ka omdan uh tu akhonunga ingaihtuah thak leh, nuih viaivuai in a om aka. He2)

Hiaitan kathuak nung natawm ua nungkik lou a ka om tak un, a huaise zaw in ahonzui a, kalawmte khat khit khat hong ki domkang in saklam-khanglam ah ki denna in ahong om ua, tuzet in zaw a degree uh asang mahmahta. Pu Mang Thang natawm a ngei bet zialzial uhi. Kei ngei leng mi avom belbul, mul hau thiapthuap khat in ahong pom geigoi a, nak zoulou in sawt simtak ka om hi. Hon khah lou dinga katheihtak in ka khi a Khros lem kitak kalak leh thakhat a honkhah in aleng mang vengveng hi. Dam lai chu aki hipeuhmah phota, thawm bangtan hiam hong dai in kalawmte ngei leng apukna mun chiat uapan in ahong thou khe liailiai uhi.

Pu Mang Thang kasam a, bangziaka dawiten hon hichi dal mawk uhiam? Ka chih leh aman i lut dek un phalna ilak louh ziak ua heh ahi uh. Huaiziakin denchiang in ahon sawlpeuh mah uh idou a izoh uh angai ding ahon chi hi.

Lauhuai mahleh ngal hapaksa tumkik zenzen lou e chi'n maban kahon sawn pan nawn uhi. Huchih lai in thakhat in ka ma uah gulpi liangtak khat in honna tang a, hon nek sawm in akam ana ka hehaw zozen hi. Kenleng lawmte bok ding in ka sawl a, RPG in aluteng lengzak ding khop in ka kap dalh phung hi.

Lampi dungteng ah, hon kai paithei toh, hon domkang volvol toh nuamlou hial in kapai zel ua, akhen chiang in sawlbawk khawng in ahon zep zialzial zel uhi. Pu Mang Thang toh dawite ki hou den ua, agen uh bel banga ahia chih akithei kei ahihhang in khat veivei ahong kibeng puak sot zel uhi. Atawp in Penglam dawi-um selna mun katung khong ua, Pu Mang Thang in leng, "dawiten phalna hon peta uh ahi. Ahihziakin, nou lou kuamah dang khut ah alut louh ding, alut ngeingei leh nouteng thah a om ngeingei ding nahi uh" a honchi hi.

PENGLAM DAWI-UM

Amun katun un, kadak kimvel a lamdang sakna in kadim hi. Dil lianlou khat ana om a, atui siang kilkel a, anuai a thil om tengteng chiangtakin akimu thei hi. Dil gei ah khousangtak mai a om a, khou apan in tui siangtak mai hong kaisuk in tua dil ah aluanglut hi. Akim teng loupa hing dipdipa, pak chituamtuam tamtak in umkimvel in kilawm mahmah hi. Gammang mial ngeingoi in a um kimvel lai in, hiai dil kimlak teng vak mahmah phimphiam a, lamdangsakna in kadim uhi.

Kana uh zohpah a, hiaimun khomialma ngei a nutsiat ut kahihman un, Pu Mang Thang in a nasep ding ahon pan a, a vanzat dingteng hon lemfel in, ak ngawng ahon at a, asi kuang sungkhat ah ahon taksak hi. Tuazoh in phui honsam a, aksi koihna kuang hon domkang in tua dil tuilak ah a aksi hon sungbua hi. Thakhat in vanpi hong ginga, kek ngaihpi hongkia in kou agei a omteng sak-le-khang denna ka dalh zak uhi.

Phuisampa'n khawllou in phui asam tou zel a, lamdangtak in aksi aluanna teng ah tui sehnih hong kisuah in alai ah leihul ahong dawk khia hi. Huai leihul apan in, dil laizangtak ah suang kil thum nei khat hong dawktou giaigiai a, tua suangpen hong kihong in asung ah, saidawium khat ching khau hoihtak a gak khat ahong dawk tou hi. Pu Mang Thang in tuapen vanaih in vala khia a, bag khat a guang in phuisam in ahong pawt khe nawn hi. Tuazoh in kuanga aksi omlaiteng dil sung ah sungbaw nawn a, tuachi'n diltuite hong kigawm nawn in ngeina bang in ahong om nawn hi.

Pu Thang amansiangtak in, kintak a hiaimun nusia in kahong kipan khe nawn ua, dawite agilou deuh, lungkimlou deuh om uh ahi dinga, lamtawn in ahon subuai den uhi.(kathil tuahteng uh akim sipsip a gen ding hileng tampi pha ding ahihman in tamlou chik kimlou tak in kahon gelh nimnem hi.)

Huchi'n gammang ka hon kheng thei khongkhong ua, lampi ah buaina bangmah tuak nawn sam lou in ka giahbuk uh ka hong tung thei nawn uhi. Giahbuk katun un, ka SP pa uh ka phone a, thiltup pen lazou ka hihdan uleh, maban pai dingdan ka dong hi. Aman ka nasep natung uah, kipahthu ahon gen kawm in, ka thilhih teng uh Gen. Pum Dal in theivek ahihman in koute hon na lamtan dinga asepaihte hon sawl ahihdan ahon hilh a, pilvang ding in ahon thukhak ngal hi.

Tun bel ka maban ah sep ding thum chauh a omta. Huaite bel Gen. Pum Dal leh akaih zatam te nuai chimit ding. DSP pa leh akaihzatam te tungah action lak ding leh ka it Chingnou zonkhiaka, amah toh khenlou a tulkhawm ding chih ahita hi.

DRAGON FORCE TOH KIBEIHNA NANUNG:

Zingkhua hongvak in giahna mun nusia in bangmah buaina omlou in Ngaizawl khua katung uhi. Khomipite'n thupi tak in honna dawn ua, vaitun zu lup in nuamsatak in hunte kazang uhi.

Ngaizawl khua ah nithum ka nituang ua, Nov. kha ahihtak man in a vot hiauhiau ta hi. Nitak chiang in Muanpu toh nungak hel in kava pawt zel ua, lawm Muanpu ading in akipahna bukim mah leh kei ading in lunglen supuangtu ahi maimah hi. Lawmte nuamsatak in kuamah englou a laitual alenlai un keibel ka it Chingnou ngai in ka lakmai luankhi'n zel hi.

Hun in khawllou a honpaisan zel ahihman in ka paikhiakni ding uh ahong tung nawnta a, kakisa mengmeng ua, kaman siangtak un, ahongpi ding lenna omna lam manoh in kapaikhia uhi. Khaw mipi te toh kimuh theih laisiah mangpha kikhak in khut ka vai leplep uhi.

Lenna ah tuang in Dragon Force te munpi kazuan ua, kalawmte kiang ah, ahitheitan a civil bangmah loh lou ding in ka ngen a, tup pipen bel Gen. Pumdal mat a, ahing a puak khiak ding ahihdan ka hilh hi.

Mun thoveng deuh khat ah ka kumkhia ua, panmun ding leh sep ding dan hoihtaka ka kikup khit nung un, galte Headquarter manoh in ka kuan kheta uhi. Katupdan tak uh ahih leh, Muanpu leh Mangboi in group khat makaih in sepaihte ana subuai ding ua, kei leh Khualpu ban ah midang nga ten, General pa palace thupitak luhsuah ding chih ahi hi.

Zan khua ahongmial tak in kana ding uh kasempan pah ngal uhi. Kou leng General palace umna bang (wall) ah kakal tou ua, khau gui zang in insawng tunglam ah kaki khaitou uhi. Innsung ah kalut ua, mi muhkhak om masa sa ka koih hoih tawmtawm uhi.

General pa lupna pindan hi dia gintakna khat ah kalut ua, gintak louh lam daih in a sepaih officer te giahna room ana hikha laizanga, zun nawn ding hi awmtaka khat toh kiphukha phial in ka khawl kha zot zozen uhi.

Amah leng kiguih petmah zaw ahi dinga, hong kikou khe gawp in a lumlaiteng ahong khanglou vek uhi. Kenleng kama a dingpa akam humsak in ka temta puak in agawl ka atsuk a, adangte kathau un ka ban kap thal vek uhi. Tun ka tup dan ua, thawm neilou a gamtat ding thil hithei ahinawn kei. Kathawm uh za in sepaih dangte ahong tai khawm souhsouh ua, General Palace galmuangtak pen kidouna phual asuak ta, sepaih hong dawk masa te kana kap lum tawmtawm ua, tam mahle uh kou lam ah kuamah ahong dak khe ngamse kei uhi.

Hichibanga ka panmun ua ka om det mawk uleh hoihlou ding chi'n kong taikhia ua, ka taikawm un galte ka kakap zom zel ua, ka ma uh haksa hetlou in kaphu vang zou uhi.

Atawp in, General Pum Dal om na pindan ka tung ua, amah guard tu min 5 toh ana omkhawm uh kava tuak kha uhi. Generalpa hingmat dinga thupiaka ka om man un thau zat lau huai ahihman in aguard te toh khuttum a kibeihmai ahong poimohta hi.

Kei leh Khualpu ban ah kalawmte mi nga kahi ua, mi nga dangte kiang ah sepaih hing omlaiteng va enkai ding in kasawl a, Generalpa tanu amuh uleh hon pi ngal ding in thu kapia hi.

Huchi'n khualpu toh pang in bodyguard mi 5 teng toh kong kibei nekhnekh mai ua, gintaksang in ana khauh mahmah vanglak uhi (ngamthoh thou maw... Hehe). Thumvei tak ahon pekpuk ua, atawp in hon suheh khong ua, keitoh mithum kibei hive ung, taikawma kitawm in, khat a awm ah katuan a, lei tuk ma in kiheiphei kawm a khat lu pekphei kawm a kilep in khatpen a awm ah kakhuk in ka talh suk hi. Puk vek mahle uh, ahong thou nawn ua, kilualtak in ahon kibeih huan uhi. Kidal theihtawp in kana kidal a, hunlemtang kamuh phet in tusuk in kakhe heikual in ka pek puk vek hi. Mithum himahle uh, keibang a training hoih neikhalou ahi ding ua, ahon zou kei nasa mahmah uh chih ding hinteh. Khatvei mahleng thou nawnlou ding in athum un ka khenpuk vek hi. Khualpu ngei ingleng a langte zouthoh sam ahi ding a, akhatpen si kainiau nuau in tanglou in munkhat ah ana lum a, akhatpen toh kungfu style tuamtuam in aki bei zetzet mai uhi.

Bangtanhiam nung in aman leng ana ahon zou tei a, huchi'n Generalpa mat sawm in amalam ka zuanphei hi. Huchihlaitak in thau ahong ginga, agintoh kiton in mikhat in kapang ah ahon sawnpuk a, kapuk zoh sawtlou in katung ah amah leng ahongpuk suk hi. Lamdangsakawm tak a ka et aleh, numei ahihlam katheikhia a, lamdangsasem kawm a amel ka etleh.... Maizen!! Katung ah sisan kai niuniau in ka itpen Chingnou in nasa a kap hithit kawm in ahon kawibelh tinten hi.

Om dingdan kathei zoukei, gen dingpen leng katheizou kei, na kasa petmah, ka it mahmah Chingnou, amel muh ding kal ngaklah taka kangak pen toh kaki muh dan uh atuamtel mai, hiaibang dinglam theilengzaw maw..... Ka thilh hih dingpen zekaisak ding hinga, Tung Pathian aw, katung ah na vaihawm dan lamdang hina e.... Kipaktak in non kimutuah saka, khasetak leh lungkhamtak a maw non khen mai ding. TOUPA aw hon hehpih inla, ka it Chingnou hinna hon humbit sak teitei lai maive maw.... Chi'n khasetak in kidek zoulou in ka kap khe huphup hi.

Chingnou in kakhut hon len in kakiang ah, "U Lian, nang hon mu ut in hun sawttak konna ngak a, nang toh tul khawm ding chi'n haksatna teng thuak ngap in kana pang sam hi. Himahleh, tuni in nangtoh kimu a nuamtak a khosa khawm ding chi a kaki ngaihtuah lai in, ei ngaihtuah louh lamdaih in thil ahong pai hi. Himahleh, kakisik kei, na angsung ngeingei ah, ka it angsung lai-tat ding kahih man in kakha amuang hi. U Lian hon mangngilh ken aw...." ahonchi a, azak ahaksatel mai, ka itpen kamuh ni kipaktak a om ding kakisak leh lungkhamna asuak maimah hi.

Kenleng haksa sakawm tak in Chingnou kiang ah, "Chingnou aw, pang teitei in, dam ding nahi, nahong dam chiang in khen nawnlou dinga tuibang kigawmta ding ihi. Pangteitei in aw ka it...." chi'n ka heh nem molhmolh a, medics te sam in, amau etkol ding in kapia a, amau leng damdawi zang in hoihtak in a enkol pah uhi. General pa' leng kei hong kap sawm lai atanu kapkha ahihman in akisik mahmah a, khitui kai zungzung in a tanu kiang ah ngaihdam angen hi. Mihuham, poisak neilou te natawm leng itna ma ah zaw mittui luanglou a omsam kei hi.

BUNG 10: THE FINAL CHAPTER

LAMKA KHOPI AH

Huchi'n kanasep ding uh bangkim, azu-aham thuaka, haksatna chiteng thuak kawm a ka zoh nung un, General pa inn a thuguk poimoh taktak koihna file teng toh, General pa man in Lamka khopi zuan in lenna in kong kipan khia uhi.

Lenna sung ah Chingnou kiang ah katu dena, amah lah khua phawk lou in anak litlit lel hi. Ka en a, kahehpih mahmah hi. Hihtheih bangmah kanei kei, Pathian kiang ah thumsak louh ngal. Hiaihun kan akahah thumlam katheikhakei hi. Lamtawntung a thumden kahi chileng kakhial lawmlawm kei ding hi. Lawmte lah innlum tung ding chi'n kipak mahmah in a chiak kheukhou uhi. Keibel innlum tung ding himahleng, ka it toh damtak in katung na diam? Chih theihlouh ahihman in, kalung akhampetmah hi.

Bangtan hiam kalennung un, Lamka katung ua, Tuibuang helipad ah SP leh akaih zatam ten honna dawn in ambulance zang in kintak in Chingnou, damdawi inn ah apua ngal uhi. Kou adangteng bel PS zuan in ka paitou pah uhi. PS katun un, kaki report ua, tuazoh in ka thil puak uh, "PENGLAM DAWI-UM" leh "TOP SECRET FILE" te SP khut ah piakkhiakna kanei uhi.

Kamansiang takin, damdawi innlam kazuan pah a, Chingnou dinmun doctor pa kava dong hi. Doctor in adinmun lauhuai lotel lou ahihdan ahon hilh a, ka hahuai zozen hi. Tu mahmah a kamuh theih ding leh dinglouh ka donga, doctor in hon phal nailouh man in ka kiksan phot hi.

Inn katunga, ka innkuante toh damtak a kakimuh nawn ziak un, Pathian kiang ah kipahthu genna nei in annkuang um khawmna kanei uhi. Kou kipahluat ziak in ka ak uh pum 5 tak in sihloh maimah veh e... Hehe.

DSP KHUPPU' MATNA:

SP in kathil muhsuah teng uh DGP kiang ah report bangkim ana petou hi. Director's level ah meeting poimohtak nei in, Gam-le-Nam melma pa matkhiaka akituahpih bang action lak ding in thupuk uhi. DSP ngei inleng athupuk na uh ana zagu in galvan tamtak toh mi bangzah hiam thuzoh in gamnuai ah kibu ding in taikhia hi. Tuahang in aom na mun ah vabuluh a vaman khe ding in kei leg ka naupangte mah muang in hon sawl nawn uhi.

Kuankhiak hun nawnpah ding ahihman in, hun awl kaneih liai teng Chingnou kiang ah kazang bei hi. Apa sualnate ziak in kuamah in katanau te uh ahi chi ut a omkei ua, kei kia kahimai ding e amau a dia akinaihpih pen uh.(he2) Chingnou leng ani-ani in hoihlam amanoh hiaihiai a, kalkhat nung in ahong tukhe zou ta hi. Kei ahon muh chiang in pau peihlou sasa in hon kipaksak ut in nuihmai tak in ahon houpih teitei sek hi. Ken leng ahon itdan theilua kahihman in ka khohei dan peuh ah amah it kahih dan kalang sak gige hi.

Nikhat ka nu-le-pate leng damdawi inn ah Chingnou veh in ahong hoh ua, Chingno khamuan in thumsakna nei uhi. Kapa'n Chingnou kiang ah, lungkhamlou hial ding leh, adamsiang hunhun a kei toh ka kigawm pah ding uh alunggulh dan khawng agen pih hi. Chingnou le'ng amit ah kipahna mittui hongluangkhia in kapa kiang ah chitakpetmah leh, kisuanglah kawmtak in kipahthu gen hi. Ka it Chingnou mel kamuh in ka hehpihtha hongsuak deuhdeuh in ka itna lian deuhdeuh a, kei natawm ka khasiat tha lamlam bang hong suak dek mawkmawk hi. Ka nu-le-pa zahtak lou hileng, va kawi a va tawp ekh-ekh bang ka ut maimah hi.

Bangtan hiam ki-etkol nung in Chingnou leng damsiang chiah naikei mahleh, damdawi inn apan in pawtkhe ta ding ahihdan doctor in hon hilh a, huchi'n kuamah belh ding neituanlou ahihman in kou inn ah ka ompih uhi. Keileng ka suty hunsung abeitak toh kiton in joining kava bawl nawnta hi.

Ka join toh kiton in kana ding patpah ahong ngai get hi. Thuguk kangah dan un, tulaitak in Khuppu in tuailai bangzah hiamte a mau pawl ading in lathak a, tulel in Khianglam gampel a, M tang bul ah training bawlpih lel ahihdan kaza uhi. Tuate betdaihpah ahihkei leh tununga hong buaihuai thei ahihman un, kintheilama kana uh zou dinga thupiak in ka om uhi.

December khabul ahongtun hialtak inbel Khristmas gim hong nam panpanta ahihman in, lunglen hong kipan nawnta a, hiaibang hunlaitaka galdou dinga pawtkhiak ding chihpen thil nuam ahi hetkei. Sih ding laulua hikeimah lehang sungkuan kim a Khristmas zatkhawm ut huai lua ahihman in, aguk in ka lin mahmah ua, katha uh dah peuhmah hi. Himahleh, mithunuai ah om kahihman un, ding un, ahon chih uleh ka din uh ngai a, tu un ahon chih uleh katut mai uh ngai ahih man in, ka kuankhiak uh angai thouthou hi.

December 7 ni a kuankhe ding kahi ua, tuani zing in ka innkuante toh kikhopna nei in kanu, kapa, Chingnou leh ka naute'n ka lutung ah akhut uh nga in ahon thumsak ua, kalung amuang mahmah hi. Ka mansiang takin, Chingnou kakiang ah hongpai in akhi ohlai sut in ka ngawng ah ahon vial a, huchih kawm in kakiang ah, "U Lian, hiai khi in, na ngawng amawng tawp neilou a ahon velh suak bang in ka itna in nang mong neilou a hon vial den ahi chih mangngilh kenla, kei na it Chingnou in inn ah nang honna ngak den kahi chih theikawm in hong vaitham sawt ken aw..." ahon chi hi. Ken leng akiang ah, "Ching aw, nang non itna sangmah a ken hon it zaw kahihman in, hong vaitham sawtlou ding hing, haibang honna ngak in aw..." chi'n ka dawngsam hi. Huchi'n mangpha kikhak in ka Station lam uh kazuan hi.

Sun hun sungteng class la in, ka beih ding dan uh, ka pan dingdante uh, leh apoimoh teng kisinsakna leh galvante etdik thakna in hun kazang uhi. Nitaklam in Pastor in kou akuankhe dingteng thumsakna hon nei in Sacrament te ne in Pathian kiang ah kipumpiakna kanei uhi. Ka mimat dingpa uh nidanga lawm hoih mahmah leh asuk-atou, anuam-ahaksa ah kizuihpih gige leh sepkhawm pih ngei ahihman in lungsim guktak hon sunkha in nuamchiah lou a, ki om hiaihuai maimah hi.

Kaman siangvektak un gari in Lamzang tan kapai ua, khuga dam tung ah long in kagal kai uhi. Huchi'n aban teng khe in kapai uhi, zankhua a khawllou hial apai kahihman un ka gimsim mahmah chiat ua, munkhat ah khovak ngak in kakhawl tawldam uhi.

Kha avak pha mahmah mai a, khua avot mahmah tentun zawkmah toh innlam ngaihna alian mahmah hi. Lungsim ah Khrismas la bang a chang in ahong suak khe thepthup zel a, lunglenglua in siamlou pi in kasa nulhnulh hi. Ka gei ah Muanpu leh Khuppu te'n honna nuihsan ekh-ekh ua, keilah ka lunglen toh kaheh tha lamlam bang aleh suah dek maimah hi.

Khua ahong vaksiang tak in kapai zomzel ua, bangmah buaina omlou in nitak lam dak 4 lak vel in a camp mun uh ka tung uhi. Tawldam chih om manlou in panmun ka ki hawmpah ngal ua, katup dan tak un a ann nek lai tak ua luhsuk ding chih ahi. Sniper man mi 4 te kilteng ah kapang sak a, kou adangteng mun nih ah kikhen in a tunglam a pangten luh suk a, a phi lam a pangten ataikhe masasa ana thah ding uh chih ahi.

Huchi'n panmun dingteng tungkim panphet chih in a ann nek dak uh ahong ginga, lungmuangtak a ann ne dinga apaikhawm laitak un, mang a amatphak louh uh, tuakkha dinga leng aki koih louh uh ahong kipanta. Kipan dinga kathupiak amuh tak un, ka tangval muanhuai ten, thautang vuahzu bangmai in ana uh ahon panta ua, akiging manlouh ziak un, a puk in apuk zel zul maimah uhi. Alauh luat nalam un, hamhaih gawp in avial tai den ua, sniper man te'n lah atarget uh miss lou in ka bei zialzial uhi.

Bangtan hiam kakap zoh un, a camp sung uh kalut suk ua, Room teng kabang check hivek ua, Khuppu mel ding dan himhim muh in a omkei, huailai takin mikhat akiselna mun apan taipawt din akisa a, kintak in akhe kakap sak pah hi. Alau petmah mai hi a, aling keuhkeuh zozen hi. Amah ahih leh a 2C-in-C uh ahi a, akiang ah, a Heutupa uh le C-in-C uh omna kadot leh ahon hilh nuamkei hi. Ka dong teitei a, agen nuam tuankei. Huaitakin ka hehtha hong suak loguih in table tung ah akhutpek phah sak in tem in kadot suk sak ek hi. Asi bang ahong phul khe zozen a, na salua in a au tuaituai phet hi. Ka dot nawn leh, thuakpeih nawn samlou ahi dinga, tunitak a Khianglam ah giak ding uh ahihdan ahon hilh khongkhong hi.

Huchi'n akinthei bangpen in Khianglam khua kazuan ua, khawllou hial a dakkal 7 kapai nung un zinglam dak khat in katung uhi. Hausapa in ah giak ngei dinga ka gintak man un, inn umkual in kongkhak ka kiu uhi. Hausapa'n kong ahong hon kawm in ahong pau zauzau a, "tu zang khang lailai a, bang hawl a kineih nahi uh vei, pei unla lum meimei ta un." chikawm zatzat in kong ahong hong hi. Kou ahon muhtak in kiguih zot zen in gen ding beitop in milim mah bang in dang dilhdelh zoutop hi.

Kenleng bangmah gentam lou in Khuppu te giah leh giahlouh ka dong a, atung in giaklou chimahleh, a om a man a, inkong ah puan-ak alou a underpant vuak toh ka dinsak tak in giak uh ahihdan hon hilh hi. Ama phalna lamasalou a, a innsung check utlou kahihdan ka hilh hi. Huchi'n innsung ah lut in, nuamsatak a, bangmah phawk lou a ihmu hithit Khuppu leh a muan mahmah a C-in-C, Suanboi kaman khia uhi.

Khovak ngakse lou in kakipan khe ngal ua, longa tuang in damtui ka kan ua, huchi'n kakuan ua ka gari zatmah un katai suk ua, phalvak in Lamka katung suk uhi.

DAN BANG THUKHENNA:

Huchi'n court ah Pum Dal, Khuppu leh Suanboi te din sak in a om ua, thil hoihlou hihding a akikhutzop nate uh theihsuah in om hi. Pum Dal in Burma apan in khamtheih leh galvan hon lalut in Khuppu in a hawmzakna lam ana enkai a, Penglam dawi-um laksuahna ding ah leng kong bangkim ah, kikhutzop in kou akuankhete dal theih tawp a hon dal sawm in ana pang khawm uhi.

Atung ua ngohna kibawlte ah kisiamtanna ding bangmah neilou uh ahihman un, PumDal pen kum 200 damsung suangkul tang ding a thutan khum in oma, Khuppu kum 150 tang dia thutan khum a om in Suanboi pen kum 50 tang dinga thutan khum in om hi. Ka ngaihtuah thakthak leh Khuppu analeh panlou hileh ka Mission uh haksa hetlou a kazoh ding ban uah, Pum Dal leng tutan in gamsung siatna dinga kipei in ahunteng zanglai ding hi. Khuppu lehpanna ziak in, Pum Dal nasepte hih tawp in omthei a, ahoihna khat bel om veve hi.

Kal khat zoh nung in, Chingnou toh apa veh in kakuan ua, Pum Dal in athil hoihlou hihte kisik mahmah in atanu ittak kiang ah apa dinga chinlou akisak dan gen in ngaihdam ngen in kap keuhkeuh hi. Chingnou ngei inleng apa hehpihlua in gen ding theilou in kah khum mai hi. Atawp in apa kiang a, "Pa aw, khovel theih in mi thulim loupen, mi huham, mullit huai leh lauhuai pen ana hita mah lechinle..... Kei ading in Pa thupipen, hon itpen le, lungnel pen nahi gige. Pa aw, hon it hon ngailua ing..." chi'n kap huphup hi. Anep dingdan tuan theilou leh, pata te ki itna ziaka kei natawm nehnou gai kahihman in banglam nga in kana ki guk nulnul sam hi.

Atawp in Pum Dal in kei honsam in kamin hon donga, kenleng kamin ka hilh tak in ka kiang ah, "Lianpu, natung ah kakipak petmah, nangziaka lamdik lou tawn kahih dan kaki theisuah a, thupi kisa a ut teng semthei a bawlthei ding kisa a ka omlai in, kalungtang kisathei non kaihniam sak a, tua kia hilou in, katangtawn mun ding lauhuai ahih dan mu a, Pathian itna kamuh theihna dinga ka lampi ding hon sialsaktu nang na hihman in. Natung ah kipahna alian mahmah hi. Kei lah kadamsung hiai mun ah hun zang den ding kahihtak man in, ka tanu ittak mai hoihtak in ittak leh duattak in honna kepsak ding in ka hon ngen hi. Hehpihtak in honna kepsak in aw..." chi'n kanih ua kalu tung uah khut nga in ahon vualzawl hi.

Kimuh hun dakchiam gingta ahihman in kenle'ng Ka sunghpa... Eh! Chingnou pa kiang ah, Chingnou hoihtaka kem ding kahihdan leh, hunlemtang teng a va veh zel ding ka hih dan uh hilh in, taan in pawtkhiak san in innlam zuan in kapaita uhi.

ATAWP IN KIPAHNA BUKIM TOH:

Chiamsa bang ngei in, kou akuankhete vaidawnna ni ding ahongtungta a, keileh kalawmteng sepaih form kilawmtak toh kizem in ka innkuante chiat utoh Reception Hall ah kalut uhi.

Dak chiam geih in program pat ahi a, DGP in koute vaidawnna hon nei in. Gam-le-Nam a ding a misuan huai pente ahon chih leh keibel kisuanglah leh zakta lua in kana ki ip tuntun hi. Ahon muan dan leh midangten leng koute hon enton a, Gam-le-nam a dinga isep theih nalam chiat ah ginom leh muanhuai tak a semchiat din leh mipiten koute nasep etton a nei ding in hasuan hi.

Kou mi 23 teng kavek un dohsang tung ah ahon dingsak vek a, kipahpihna Medal of Honor ahon pia hi. Hiai medal sang ding in phu kakisa hetkei. Gam-le-nam a dinga kalkhat suanpan inga, ka maban ah ka nasep ding tampi omlai ahihman in hiai medal sang dina chitna nei in kaki koih kei hi. Himahleh, ahon muanna uh ka tung ah angak ngam uh bel thupi sapeuhmah ing.

Medal ahon piak ban uah, kou teng kaisang sak in ka om ua, kei pen DSP mun awng luahtou ding in ahon kaisang sak uhi. Ka sungte akipak petmah ua, a biktak in Chingnou in ahon kipahpih kholdiak hi. (Penglam Dawi-um pen ahih leh ama min manmawhna ding a kibawl Penglam Museum ah mite et theih ding in, Glass sah mahmah sung ah koih in om hi.)

Programme zoh in innkong ah nekding tuamtuam tamtak omte ne in nuamtak in hun kazang uhi. Huchih lai in Muanpu kakiang ah ahong pai a, "Lianpu, na thuchiam kha thei gige in aw.." ahong chiphut a, kenleng lamdang salua in akiang ah, "Bang le atel a Muanpu?" ka chih leh, heh kisa in chiamnuih thutak kawm in, "I vakuan touh ngai ding ave aw." ahon chi a, katheih khiat tak in kanuih ahong za lopetmah a, kanui tawp theikei dek zozen hi. Chingnou inlah lamdang salua in hon mantang zen in sawt tak ahon en kawi vongvong zozen hi , ken leng Muanpu kiang ah, "hi zenzen e Muan, kou a ma in nou a ilawm masa ding uh aw..." ka chih leh "Huai ding mah aka i ut, huai aka kazak ut." chi'n amah leng ahong nui khe khong sam hi.

Huchi'n, Kei, Muanpu leh Chingnou leh Muanpu inndongtate Ngaizawl ah vahoh in Siamnou pen Muanpu a ding in kava ngen uhi. Amau leng lemsa in buaina om hetlou in ani ding ka bikhiah pah uhi. Katup dan un, mi hih ngeilouh dan a, nikhat, hun kibang ah, amau leh kou kitenna saikhawm ding chih ahi hi.

Huchi'n nungak-tangval lai a Khrismas va zat nawn sese sang in chi'n Dec. 21 ni in dansiangthou a kikhutsuihna Kei leh Chingboi ban ah Muanpu leh Siamnou ten kanei uhi. Koute theihpih tu ding in Muanpu te kazang ua, kou leng amau theihpih tu ding in kapang ngal uhi. Hiai ni in deihsaktu tamtak ten thilpiak thupitak tak leh manpha taktak ahonpiak te un ka inn uh a dimzou hi.

Himahleh, ka kipahna subuching diak pen ahih leh Chingnou pa ngei a taan in apan tomchik sung phalna toh hong pawt khe thei in ka nih ua tung ah akhut nga a, ahon vualzawlna in ka kitenna uh thupi suaksak a, manphatak ahon suahman in kakipakpetmah hi.

Chingnoupa' ngeileng Zogam President pa kiang ah zahngaihna ka ngetsak ua, tan inn ah atan sung a arecord hoihtakte ziak in kum 5 suangkulh tang man hamham in President in ngaihdamna pia in tan inn apan hong pawtkhia hi. Mundang ah omsak tuanlou in kou toh omkhawm ding in kasam a, kavek un innkhat ah ka omkhawm uhi. Tuzet in zaw bangmah taksap kanei nawn kei ka lung akim mahmah a, ka kipahna a bukim mahmah hi. 

Simtu te tengteng tung ah lungdam thu ong puak ing ana kihawm siausiau un aw... LUNGDAM!

©Siamsinna leh Vakiangbu