MIKHUAL DAAK

Written by: Chin Za

"Thou ta ve delhlup sa neek sawm na maw..?" Chia ka inn kiang ua nungak khat a nu'n a phawn ging in kei zong hon khanglou sak a, sana ka et leh dak 8:30 bang ana gingtou vengvong hi.

Ka lungsim in 'Nidang a jaw zing khawvak kuan a aktal hon khuang ngelngel a khangma ngeilou hi ing a, tun lah Zogam ah sangak tam lawta, Aktal zong khuang ngam nawnlou a, khangma gige keita ve ua" ka lungsim a chikawm in Ka thoukhia hi.

Ka sungkuan te zong Anne din ana kisa lellel ua, ka nu'n kuanglai a Dolhou pok mehdia a thuuk kamuh bangchu GOOD MORNING lou hi mai. 😢

Dolhou pok Ka duhlouh ban ah Netheilou himhim kahih sawnsawn jiak in Bekanthu toh kameh suk mai ve.

Ann kanek lai un, Sidaak hong ging vongvong a, a gin dan in zong Misi tuh mikhual ahi chih a chiang mahmah.

Oho..! Huai a mualsuang gelh pa a kipak mah di chu..! Hiai eive mihing hinkhua, khat asih leh midang khat a dia hin na hithei.. Mihing ngeina mah ahi ichi Thei diam!?

Khawlai lam a mike in zong "Nungak tangval te haan kuan ding hong paikhawm un" chiin hon sam a Phatuam ngai dia phuut luih thoh tulai a mihing te paidan ahih tak jiak in kei zong haan lam manoh in Ka kuan ta hi.

Amun katun leh gintaak sang in HAANKUAN ana tam mahmah mai ua, HAAN TOU bel atam het kei uh. Akuan tan a Phatuam ngai zou leh A sep tan a phatuam ngai in a ki khen litlet hi.

Mihing ihih natak uh ahi, ichi nawn diam?

Misi pa Bel mikhual ahih jiak in Dak 12 ma ngei a vuui ding chih ahi top mai..!

A innkuan ten ' Khual gam a kipan a tate'n hong delh ding ua dak 1/2 tan beek hon ngak pih un' chia a nget lai un, 'hiai i paidan uh hilou ngak theihlouh ding ahih dan Vaal upa khat in Phatuam ngai tak in gen.

Ka saptuam sung ua upa ordain bang jah hiam ten Minkhum na bu a et ua leh misi pa min omkhalou, ban ah donsuk dontouh apiak khak louh jiak in Saptuam in 'Mikhual ahi' chia inntek na laa theilou hi liuleu mai..! A vui tu ding pastor ki daih lou hilou (vuui theilou) kalak ua vaal upa taltaak deuh khat in thuumna toh hon vuui liam thei khong khong hi.

Hiai zong mihing ngeina mah ahi ichi nawn diam?

Nitak leengkhawm ding in Ka veng ua Nungak gol mahmah Niangbawi kichi ka tawn tou hi. Niangbawi ahih leh Nungak fel ahih ban ah a meel zong siat a se hetlou ahi.

Niangbawi te inn Ka tun in ann ana ne lellel ua, ken zong Ka ngaak jek hi. Niangbawi in, 'Ann hon nekpih ve, meh Bel lim khollou DOLHOU POK ahi tel a hi ve'n hon chi a, ken zong "Dolhou khawng alim law voi meh dia zong lim kasak lawi ahi, enlah dolhou zong meh zoukhang" kachi kheempeuh na a jingkar a Ka duhlouh sa...!

Niangbawi zong manta ahih man in leenkhawm na lam Juan in Ka kijui khe ta ua, gintaak banglou tak in mi Ana tam hetkei hi.

Laa chang gen nu'n a mobile a Pathian ngaihla enkawm a laa hon viik taktak bang jaw ka star top, Ka lasak uh athu sang in zong a phone in bangzah a man tel de aw chih Ka buaipih khop apha hi. Chih chu a laa gen sang a aphone hoih jaw ahih chia...! Midang te Bel suunpih lua hi awmtak in a kuun ngeungau geuh ua, ken bel huai nitak phone Ka tawi khak louh jiak in kuun theivual kahi kei.

Misi pa mikhual ahih khaak jiak in jing nitak leenkhawm na omnawn lou ding ahih Dan pasal khat in hon gen zoh in thuumna toh leenkhawm na hun hon khaak ta hi.

Hiai zong phattuam ngaihna khat ahi ichi uh.

✔ Thukup:

1. Ei khawsung/Vengsung mi hilou, Khual gam a pan ei khua a sihna hontuak a omchiang a Mikhual daak ikhet khum ua, mikhual vuui a i ki vui mawk uh ahoih pen ahi mah diam? Hankuang fee leh hanmual man bangzah hiam lathou hang a, huai i laak ngal leh en zong khawtual gaal a igaal a i vui ding hi Lou di maw..!

I chipih i mihin pih khat in utthu hilou a sihna hon tuah Chiang a ei a bang a ina gaal theih in i Motto uh, Phattuam ngaihna leh Christian hindan tawisang ichih te juikha jaw lou ding hiam?

I tup leh ngiim te hoih law jejen a juui zoulou lam houh ihi jaw diam?

2. Ei saptuam sung mi hikhalou khat in sihna hon tuak vuui tu ding nasan omlouh na Christian gam ah i om uhi.

a vui ding pastor ki daihlou leh inntek na la ding saptuam upa omlou zong hi bok Lou..!

Vuitu ding omlou, Inntek na la ding omlou te saptuam in i vui ding ahi jaw diam?

gingtu chiatchiat i ki mikhual et a MIKHUAL DAAK i ki khetkhum theih laiteng "Khrist a Ka unau pih" ichi thei ding uam?

3. Sihna kichi mihing ngeina dan lel hilou in Pathian geelkholh mahmah ahih jiak in pumpelh vual hilou hi. Huai jiak in kentuh sihna ituah te a damlai te toh KIKHEN NA TAKTAK ahi kachi lou thei kei. tunung chiah kimu nawn ding himah leng Inu ipa i sanggam Ana paisa te toh i ki meeltheih lai ding uam ? ki thei Lou..! Piang thak Lou te ngial bang tuh ki khen na taktak ahi ichilou theikei hi. Huai jiak in Sihna ituah chiah Ata atu a uu anau in a meel muh ut a khualgam aki pan hong paite ki ngak pih zek in lungkim tak a vuiliam hi leh PHATTUAM NGAIHNA ahi jaw diam??

awle, Saptuam leh khawtaang ah Sum tampipi ithoh luut ua, huai in hon inntek sak hi. sihna ihon tuak a i saptuam leh khawsung mi ten Khawtual vui a hon vuui lai un tunglam a inn tek na la ding omlou, vaangam a MIKHUAL DAAK hon ki khetkhum phiing ding houh ahi kha diam maw..! Huai hunchiang in Mihing ngeina Dan mah ahi chiin i ki siamtan thei ding uam?

Kazou...!!

©Siamsinna leh Vakiangbu