SAPKIK THEIHLOUH HUN MUALLIAMSA...!

By ~ Mary Naulak

2030 kum, December kha a ziltawpni nitak khat ahi a zan dak 11pm bang gingta ahihman in electric vak louh ni zan ahih toh khosung a dai zikzik hi. Kholak a ui khat leh nih nek ding zong a vial vak cihlouh ngal mihing muh ding himhim a om non kei hi. A tam zaw te sun a anaasep na uh tawl kisa a ihmut lim tak a a ihmut hihhit lai un tangval Thangboi' sungkuan te a din zaw ihmut theihna d vual ahi het kei. A lupna tung ah anatna a thuak gim luat tak ziak a khua le phawk zou nonlou phial in Thangboi a lum dildel a, anaak leplep hi. A lupna kim ah a nu leh pa leh a tanau te uh bangzah hiam a tu ua hong dam khe ding cih lametna himhim om nonlou a hih man in a loh ding dan tuan theilou in a et thoh maimah ua gen ding thei zaw sam le omlou in dai tak in a tu khipkhep uh hi. Huai hun tak in zaw phimzang khat tuanglai ah ke sak kha lengle a ging zak theih hial d khop a dai a hihman in a thawmhau huai ngei, zingkhua hong vak khe zok leh cih kia micih lungsim a om a hipen mai. 

A kallak in gennop nei hileh kilawm in paulah pipi in Thangboi in a nu a sam zel a akhut bang hon zak khe suamsuam zel hi. Akhenciang bang in hong kap khe thethup a hehpih huai petmah hi. A nu a kiang ah tu in a sam khawng a zut sak thiamthiam a, "Bawi bang a na gen ut? Na kiang a om den keive...hon pai khiak san lou hial d ka hi. Lungmuang tak in om in aw..." cia mittui paak niuniau a hon gen ciang bang in a kiang a om te a din zaw kidek zoh vual ding ahi kei amittui uh a anul nul mai uh hi. A mah lah gim lua ahih man in a pau zou tuan kei a amit a khup suk diudiau zel hi. A kal lak in na sa in hong thum hithit zel a achi khawng khamsa in akipek pek maimah hi. A khut a khe khawng a meksak ciang unlah naa asa zel a anu bang in, "Bawi bang hon lawh d ka mahmah a? Na thuak gim tel maw...tomcik bek hon thuak khel thei leng zaw maw na tawldam deuh d hiven." chi'n a kap keuhkeuh mai hi. Ana thuak nopna damdoi a kap uhleh zaw bangtan hiam hong ihmu thei zek hi. 

Phalbi khovot san lai tak ahi a lungkham mangbang tawp khok a hih uh toh zan a sawt petmah a khua hong vak khe ngei nonlou d mah a bang zozen hi.A nu leh pa' tapa neihsun Thangboi...tangval melhoih tak mai a tuailai thahat san d lai tak a natna gilou tak mai in a nuai gawp ziak a mihing mel le pu zou nonlou khop a gawng se gawpta, lupna tung a haksa sa tak mai a sih sual a om maizaw a et hak lua, huai hun tak a ahehpih huai dan gen vual leng ahi kei, a mah haw mahmah te nangawn in mu kha le uh leng a hehpih lou tuan het kei diuh.

Hucia bangtan hiam hong ihmut theih tak in damlou ompih te a din neukha cik tawldam huai zaw deuh mah leh kuaman a ihmut san ngam tuan kei ua a tutpih ngiungeu uh hi. Zinglam dak 2 vel d khawng hong ging in khosung ah ui hong ham vengvung mai a "Bang thil hong tung d amahmah dia aw..." cia thawmhau tak a aom lai un Thangboi hong khang lou a...neukha cik hong halh zaw deuh a hihman in a nu kiang ah, "Nu hon phong tou in ka tu ut" hon ci a a nu'n le phong tou pah in a tung ah a kingai sak hi. A kiang a amah ompih te bang hon ban et daudau a amit a pat kham vuallouh in mitui hong luang khe zungzung hi. A tawp in a nu lam hon nga in... "Nu kei na tapa uh na kinepna om sun uh hi sam ing a, ka tung a na kilametna uh hon suk buchin sak ut mah leng tha hatna lah nei nonlou ing a, apoi lua maw nu...ka na hai sawt lawkha a ahi. Tua lah hon dampih zou nonlou d ka hita a, na tung ua kana hihkhelh khak tengteng hon ngaidam un aw. Nu...ka tuailai hun in khovel nopsakna te ana tel zaw lou in ka Pa toh na hon thu hilhna te uh honna mangkha hileng tua kei hicia omlou d ing a ka lawm leh vualte mah bang a Pathian phat a nuamsa tak a om d hive'ng maw. 

Kenle tom cik bek ka hinkhua Pathian a din ka zang utlua...ka bawl thak theih lah om nonlou a ka KISIK LUA hon ngaidam un aw..." ci'n awl a amit hon si in a nu tung ah akingai suk hi. Anaak bang haksa honsa hiaihiai a atheih tawp suah in pang mah leh thahatna himhim a nei non ta kei, a tawp in pangzou non mahmah lou in khelah tak mai in a kha a khah khe ta…

I hun paisa te Sam kik ut in bang chi teng in pan la in kawl mong tawp dong va dak in; Khovel kilh chih teng dap suak zozen in ;Sum leh pai iip pi sangkhat dim nei mah le hang le...bang teng a thawn vek hi lel ding hi. Thangboi a lup na tung a alaitah di kuan a ahun paisa te bawl pha thak ut a mittui kai nil nial a akisik dan a mel a ki lang te leh a kampau te'n im vual louh in hun mualliam sa te lak kik theih ahih louh dan achian mai hi...a nu leh apa ten a room sung ah tu khip khep in atapa uh kum 30 ahinkhua zang khin man lou, a tut mualliam pih ta uh hi…

Thangboi ahihleh neucik a hih lai in naupang thumang tak leh fel tak ahih man in thil bangkim ah a nu leh pa kipak sak tu a hi gige a, kisaktheih pih in a suang mahmah ua a tung ah lametna lian tak leng a nei uh hi. Himah leh a hong khang liang zel a kum 16 a phak in pawl sawm niam het lou a hon zou khia, Thangboi in amaban a bang thil hong tung ding hiam chih neu chik le theih lawk na a nei kei hi. A nu leh pa lametna na khel in kum 14 ahih a pat in naupang lai chi het lou din tep theih muam theih te leh numei leh pasal kal a thanghuai tak a kipolhna te ah ana piching khin pah lin len hi. Nu leh pa government nasem tuak leh tapa amah kia a neih sunsun uh ahiman in aduh-adeih te tasam lou hial in a hoih na di ahih khak leh chi'n anu leh pa'n ana suk bu chin sak zel ua, duat tak leh hawmthoh tak in ana ki kem tou den uhi. Sum bang a deih zahzah neizou a hihman in lawm leh vual kipolh pih ding ahau a lawm te toh nopbawl na a zu leh sa ne in thaanghuai tak in a hun a zang tou gige mai hi. Nungak bang a deihdeih in ngai uh ahih man in nopsa leh che thei kisa mahmah in amah siamtu Pathian phawk khak inleng a nei ngeikei himhim hi. 

A lawm te lak ah a se pipi om mah leh hoih pipi di le ana bei tuan kei hi. Amau te'n i tuailai hun sung tomcik ah khovel nopsak na te sang in Pathian a di'n i hun te zang zaw ni. Ei ut dandan in omleng i sihnung cia meidil a kipai kha dia uthuai lou lua ahi. Hong pai in Lawm a kikhel ma in Toupa kiang zuan ni..."ci'n zawn zel mah leh uh Thangboi a ut het kei a, "I tualai hun tom cik sung i nopsak dan tak a i zat ken bang cik cia nop i sak hun d hong om non mawk dia? Denciang a zi bang kinei ut sam dia huai hun cia I zi leh ta toh buai leng hici bang hun nuam kizang kha thei nonlou d ahi. Leitung a tom cik I damsung a nop thei pen in I zang ngal kei dia. Ka nopsakna d hon dal tum in na Pathian thu uh hon genpih non kei un...Nou zaw na mihoih theilua ua, vangam a na pai dek ciang un na khe uah kong kiluai tou na d aw" ci khawng in ana chiamnuih bawl zomah hi. A tuailai hinkhua kum 18 a phak ma a kipat khovel noptal na a ana kibual khin dimdem ta ahih man in a duh leh ngaih kibat pih te toh ki pawl tou in nuamsa huntawk kisa in a lungkim mahmah a, niteng a siat lam manoh hiaihiai a hih lam kiphawk thou sam mah leh asaltan na khuk apat suahtak na di ngaihsut na neu chik le a neithei non kei hi. Bang ci teng in thuhilh in vua in sal mah le uh anu leh pa adin bel bawltheih luat a om non kei a asiatna a uang deuhdeuh zaw hi. Lawm leh vual lak a leng a nu leh pa neihsa suang a ki champ sak deuh ahi man in mitoh kisel buai a kisual cihte bang a thang sak, a khenchiang inlah overdose a buaisia a damdoi inn a tut hun uh leng a tam mahmah hi. Amah ziak in anu leh pa leh a tanau te'n zahlak na tam vei khop ana tuak tou khin dimdem uh hi. 

A pallai hun manpha mah mah te leh a hat lai ni te ah hinkho thu lim lou hon zat te ama adin nidang chia 'kisik hun' om ngei dia lah phathuam non lou ding cih tan le a gel pha sam kei a, a nu leh pa tha khek ding, mi dang te panpih ding leh a tangtawn gou ding a khol khawm na di hun hoih pen te ah Thangboi in mit del bang mai a khovel a zat touh na te atheih louh kal a kum te tampi na ki vei man a, ahat lai ni te kiam hiai hiai ahi chih ana phawk pha dek kei hi. A lawm leh vual te'n bel a tuailai ni te uh siamtu pa deih lam a zang ding in leh a tangtawn gou ding uh kholkhom ding in a hun te uh Pathian a dia zang di'n a ki pia ua a hihtheih tawp ua Pathian phat in nuam asa mahmah uhi. Himahleh lungtang khauh mahmah Thangboi in bel anoptal luat ziak in bang lampeuh ah leng kipahna himhim a nei thei non kei hi. A thilchin zongsat te ziak in a mel mahmah leng a se gawp a huai ban ah ngaihzawng dukdak le neithei lou a azulhzau luat man in numei tampi tak a khase sak a huai ziak in ittu ding diktak leng a muzou non kei a lawm kipolh pih d gina tak leng nei nonlou ahih man in tangkhat kisa in thawmhau tak leh sakmel vul ningniang in a tuailai hun hoih teng a zang zaw maimah hi.

Lungtang khauh mah mah hi na pi in a taksa te hong hat non lou in kiak lam hon nawt hiai hiai chiang in Thangboi in pathian lou ngal belh ding om lou ahih dan a phawk suah deuh deuh a hi mah leh ama adin hun a tam non het kei hi. A hun paisa te khawng a ngaihtuah kik zel a, lawm leh vual te toh nopsa tak a lungkhamna himhim le neilou a aaut dandan a omtheih lai hunte khawng amah a din mittui luanna ngen a suak ta hi. Alawm te siamtu Pathian phat a nopsa tak a om te bang angaihtuah ciang in enghuai uh asa thei petmah a lah amau kiang a va kihel sam ding in ahoihlouh na te amah leh amah kizephawk lua a hihman in a ngam kei zel a khase tak in a gal et thoh lel mai hi. Aman leng a tuailai hun hoih lai teng Pathian a din ana zangkha hileh hileh zaw Jesu nungzui muan huai ana hi sam d hi a tun lah bangteng a kikhel maimah ta hi. A taksa adia thil hoih lou kum tampi a pat ana chiin zongsat te gu in zen ahi ngei dia thou zou lou in lupna ngak in hong om maimah a nidang a kipasal sak mahmah a, Lungtang khauh tak nei ana himahleh tu hun in zaw a pangzou non kei, natna cituam tuam thuak in haksa tak in lupna ngak in a pang maimah hi. A hinkhua a ngaihtuah ciang in haksa asa mahmah a, kisikna a pum dim in a kapkap mai mah hi. A hun paisa lah bawl thak thei nonlou a ataksa mahmah leng se gawpta ahihciang in a hun om lai teng ah a kha bek hotdam a aom theih lai khak leh ci in Pathian thu lunggulh na hon nei in a nu leh pa kiang ah evangelist khat bek hon hun khe din hon chial sak un chi'n a ngen ta hi.

A deih na bang in Pathian mi zat mah mah Evangelist Muanpu asap sak ua Pathian hon itdan thu khawng a genpih hi. Aman eite mi khial vek i hi ua himah leh bangcituk in mikhial himah lehang pathian in ngaihdam zoh lou nei lou ahih dan; Isai: 1: 18.TOUPAN, Hongpai un, ngaihtuah khawm dih ve ni! Na khelhnate uh san au bangin aom mahleh, vuk bangin a ngou ding; san dup bangin san khin mahleh belam mul bangin a om ding. cih bible tang pansan in hotdam na thu a genpih hi. A tawp in Thangboi in akhelh na hong ki phok khia a kisik a Pathian kiang ah ngaihdam ngen in a hinkhua om lai teng amah a dia zang din hong ki lan khe thei ta hi. Himah anatna te ziak in a ut bang in Pathian a din a kizang thei nonta kei, lupna tung ah a hunpai sa te amah ut dan dan a ana zat khak te khawng ngaihtuah in pamaih a sa petmah a tomcik bek dam kik thei hihleh amah siamtu Pathian in a adeihna bang a amah a dia kizat a ut mahmah a himah leh thil tenglah kikhel ta ahih man in kisik a mittui nul louh ngal ahih theih a om non kei hi. Aman bel nidang a hiai bang hun lem mu lou hi zenzen kei a Toupa ana zot louh ziak him him a tua a hun na nung ah ki phok khiak na nei pan phing in a kha gawtmun pai lou din a hun tawp kuan in hondampa a sang man hamham hi. A hat lai ni te a tua bang in Pathian a di'n na ki pe kha pah hi leh zaw a hinkhua hiai bang a omlou dia a pallaini teng aJesu' nungzui muanhuai ana hi sam d hia cih a ngaihsut chiang in kisik chih louh a gen di thumal khat le amu kei hi..

The end...

©Siamsinna leh Vakiangbu