MY NAME IS KHAN, I'M NOT A TERRORIST

By: Leon Guite

Khovel buai i chi mawk na a a khovel pen buai hilou in a sung a teng mihingte buai kihizaw veh aw maw. Khantouhna nasaktak mai tu kumzabi 21 na ah ei Lamka khopi leh a sehvel lak ah hong tunghi. Western culture leh Korean lifestyle in i lak uah thu anei zou mahmah hi. Khovel khantouhna mu inhuaidan in hin i sawm a, i neih leh lam chin lou pi in neih val in khantouhna i delh hi. khovel khantouhna in a hoihna tampi hon tun mahleh siatna tampi mahmah hon bungkhia hi. Changkanna i chih in tuailaite' lungsim ah mun luah gai ahihman in khovel khantouhna toh kimil a khosak theih na ding in sum-le-pai poimoh mahmah hi. Tua omlou in bangmah hih theih louh a, tuaziak in mitampi sum-le-pai' sal ah kitang hi.

Khantouhna in abiiktak in khangdawngte lak nasa tak in hon luh a, gamdang mite' hindan TV leh vanzat tuamtuam a i muhte pansan in i lungsim uah huaite ngaihsanna leh huaite hih bang hih ut tei na chi hong kituh hi. Korean lifestyle in khangdawngte lungsim luah zou mahmah a, amaukichei dan a kichei in amau hindan zuih i sawm uhi. Ahihziak in amau bang a sum-le-pai kiningching neilou i hihman un haksatna kituak toupah a, sum deih na hong lian mahmah hi. Tuaziak in sum muhna di ahihnak leh khoksakna beihial a gamtang ngam ding khop in i lungsim uah Setan in nna nakpitak in sem a, agah leng tun kilou tou lel-lel hi. Sum deihna ziak in tuailai nungak tampi ten ataksate uh zuak in khelhna sal ah tang ua, tualai pasal tampi te'n changkanna lunggulh ziak in khamtheih sal ah tampitak kitang lel-lel hi. Tumlam te hindan enton in i hunte uh i zang ua, nupa hilou pi in nupa kipolhna thanghuai in i kipawl ua, i gam ua mun poimoh deuh a i neih uh , Khuga dam, Ngaloi, Pangzawl bus terminal leh a dangdang mun te sex zatna munpi a suak ta, huai gah lou in sex video leak ahong tam a, nau sukkiak ahong pung a, khateng, kumteng phial in naungek piangtung kipaih chih news ah muh in a omden hi. Khrisitian ka hi, ka gam uh Khristian gam ahi chih ngam huailou khop in khelhna sal ah i tang ua, Sodom leh Gommora khuate sang in i khelhna uh a sang zawta, India gam a AIDS vei percentage sangpen lak a telpha district ah i teng ua, tua ziak in milak ah ahoihlou lam in i minthang ua, namdangte'n i numei te uh easy mahmah ding in a hon koih ding ua, atawpchiang in zaw mundang i hong pawt khiak chiang un, MY NAME IS CHINGNOU, I'M NOT A WHORE chi a kichiamna nei a innluah ding i zon uh ahong ngaih hun a sawt nawn kei ding.

Khristian gam i chi a, diktatna in vaihawm dia i gintak lai in, corruption in a hon nawmvalh gai a, officer alianpen a pan officerlou teng tan in nekguk leh golhguk ching in hun i zang uhi. Khovelpaidan aka, chi'n i ngazam ua, himahleh lungtang sungnung tawng pen in bel ahon awi tuankei hilou hia? Lawmte khat in, Imphal lam a office ah i hoh chiang in huai a sem Namdangte'n Churachandpur lamte ahong chiang un nitha a tung mahmah a chi uh, a chih ka theilai. A ziak bel, va golhgu zel i hihchia, nekgukna Churachandpur lamte pat ahi chi nuam dan ahi uh.Khristian ka hi, piangthak ka hi i chi na ua zaw i hinkhua uah Khristian i hihna uh khatle langkhe lou hiveh aw, atawp chiang in namdangte lak ah, MY NAME IS THANGPU, I'M NOT CORRUPTED. I chih hun uh a hong tung pah dia ahiziak in muanmoh in i om thouthou ding uhi.

Khovel paidan aka, khovel ah i omsung a khovel paidan zuih di mah aka hia i chi ua, ahihleh khovel in a negu hia? khovel in khamtheih a kham sek hia? Khovel a kizuak hia leh? Akhovel i gen pen hilou in a sung a tengte mah ahi a paisual. leitung pen a ngeimah in a om a, niteng hunteng in amah siamtu in sepdia a piak bangbang khawllou hial in a sem hi. Asung a mihingte mah hiveh aw a suse tu. Huai mihing tuh nang leh kei i hi uh. Election i chi ua, mikhat a din sih ngam in i pang uh, bangziak ahia? Sum-le-pai i deihziak uh, sepna i deih ziak chauh uh hilim veh aw, easy money in i lungsim uh aluah zou a, nnasem peih lou in a nuamlam kia a summuh i sawm ua, huai in i hinkhua leh i kim leh kiang te subuai ana hizaw hi. I panpihte a din sih ngam in i pang ua, tualthah na tawm poisa lou in khat leh khat i kidelh tuah ua, atawp chiang in a hatlou zopen sialpuk in a om a, ahatlou ahihziak in a tungtang thu, adikna natawm gen ngamlou in a sungkuan leh tanau laina ten sialpi vuahthuak in athuak ua, kamkhat gen zek le uh ka hum a hipah geih mai hilou hia? a polawng in hoihtak bang in i om ua, siangthou mahmah bang in i gamta ua, ahihziak in a sunglam meimapawn damthei lou in i society uh a pumdim ta. Khangtou i kisak lai in kiakniam lam manoh deuhdeuh i hihlam uh theilou in mahni masialna in i dim ua, kei ka tan zoh nak leh chi in midangte ngaihsakna, hehpihna a om nawn kei. Mihausate mah in mizawngte tan ding panpihna teng i huimang vek ua, Government scheme tuamtuam, gentheite tundingna ding teng mihaute gilpi sukletna a suak gaita, piangthak i kichi a, biakinn ah thu hoih taktakgen in i laam deldal ua, innlam i tun chiang un i thugente i laam pih daidai te un i lungsim uah bangmah gen anei tuan kei. Atawp chiang in zaw, MY NAME IS LALPU, I'M NOT BORN AGAIN. Chi'n Pathian mai ah i kipuan ni ding uh ahong tunghak nawn kei ding.

Khovel paidan a i hinsungteng buaina toh i hing khawm dia, khovel hoihlou khek tu ding keimah ka hi chi a diktattak leh siangthou tak a hing ding a i kipat hun chiang in buaina in ahon paisan ding. Tulai a buaina i tuahte lamdang sa in ngoh theih tuamtuam i ngoh ua, ken zaw buaina ituah ziak uh eimah ziak ahi ka chi zaw. Khelhna sal a tang, khelhna chikim a kibualte i hi ua, khelhna kiselgu tamtak hong langkhe lou tampi om te ziak a Pathian in i kisikna ding ua buaina ahon tunsak ahika chizaw hi. Eilam i kibawlhoih masak mateng zaw i buaina un hon taisan kei dia, hiaisang a huaise zaw in ahong ngak zomah lai ding. Diktatna toh hing in, Pathian lau kawm in siangthou tak a hinkhua ana zang hile hang tua i buaina uh tuak din ka ki gingta kei bilbel ve. Adam leh Evi in thil ahih khelh ua amau moh ahihdan kipuang lou a ngoh di dang a zon ziak un Eden huan nuamtak apan nohkhiak in a om uh, Kei hihkhelh ahi hon ngaidam in chi in Pathian kiang ah ngaihdam ana ngen hile uh Pathian in angaidam dia Eden huan apan nohkhiak a om di un a gintak huai kei. Tuamah bang in, eiten le buaina i tuah un eilam ki-en lou in midang mohsak ding i zong ua, i khelhna uh mulou in midang khelhna kia i mu ua, tua ziak a 3 bills hong gingkhia a ei singtangmite i tenna uah mikhual suak ding a process pai a hizaw diam? Chih sim in om hi. I omdan uh i khek kei ua, i khelhna te uh kisiklou a uang zosem a i gamtat touh zel uh leh bel, i gamsung na tawm ah, MY NAME IS LIANPU, I'M NOT A FOREIGNER chi phenphan kawm a thuak toutou ding i bang uhi. Pilta ni. Midang khelhna te en nawn lou in eimah khelhna mah en in thupha tawi le hang, ei buao ngailou a Pathian ini gam i nam sung ah lemna muanna hon tun mai ding hizaw hi. Huaiziak in tuban MY NAME IS KHAN, I'M NOT A TERRORIST chi a ei-le-ei kigen veng ngai lou a miten hiaipa/hiainu mihoih midiktat ahi a, piangthak diktak ahi ahon chihtheihna ding un panlathak ni. Na hinkhua ahoihlam in nangmah kigen kenla, migen ding in koih in. Tua ding in nangmah kibawlpha inla panla thak in.

©Siamsinna leh Vakiangbu