A PIANGLOU INNKUAN HIMAI LE MAW!!
By ~ ZM Tonsing
A neulai ua kipan in Thangbawite’ Unau a pa un sihsan pah hi. A nu
utoh hiai khovel ah gentheitak in khosa uhi. Thangbawite’ unau bel mi
thum ahi ua, Thangbawi a U pen, a ma nuai ah Lianpu leh a nautum uh
Kimbawi ahi ua, genthei leh khosakna haksat ziak in Kimbawi chihlouh
laisim zou dang omlou uhi. Kimbawi a kinepna pen uh ahi mai hi.
A nu uh ngeileng a pasal a suunna toh a damtheihlouh banah a nak
kingaihtuah theihluatziak in teksuak mahmah a, nna leng sempeihlou hi.
Tua kawmkal ah, a milai pen uh Lianpu lah hiai khovel khelhna:
khamtheih-guihtheih sal a tang, Kimbawi lah siamsinlai ahih ziak in a
innkuan khosakna uh, nek-le-tak dinmun Thangbawi liangkou ah abuk-abek
in kinga hi. Thangbawi tangval lai himahleh a pa’n omlouhsan ahihman in
pa’ dinmun ah a din kul hi. A innkuan khosakna uh Thangbawi’ tung a
kinga ahih man in niteng a kilohtawm in Thangbawi buai thei mahmah a,
lawm-le-vual leng gina tak in pawlman ngeilou hi.
Thangbawi’ lohkhiatsa kia ne a, a innkuan uh paitou liangliang phet
ahihna ah nikhat a kuankei lel leleng a ngawl mai ding, ak bang nektawm
zong ahihna uah ngap-le-ngaplouh chih omlou in Thangbawi a kuan gige
kiphamoh hi. Tua kawmkal ah Lianpu’n lah a innkuan khosak haksatna uh
thei banteuhlou, sum apoimawh zahzah ngen a, piak ding omlouh chiang a a
innsung vante’ uh po-khia a a ma’ gawlvang dikia khual lel ahi hi.
Hiaikia mai hile zaw pha dawmdeuh di hi ven: kholak a mivanpeuh gu in a
sungkuante sulunggim thei mahmah hi. Himahleh, Thangbawi upen ahih
dungzui in a lungsim ngeileng piching mahmah a, a naupa’ gamtatna
nungteng ah ngaihdam nget a ngaih leleng ngen in kuan ngiaungiau sek hi.
Lianpu pen sal in, vua in bang chizongteng in tai mahle hangleng
phatuam nawndia gingta lou ahih man in Thangbawi in bel bangmah le gen
ngeilou a, kamsia in leng houpih ngeisam lou hi. Hiai pen Lianpu’n phaze
sa in a innsung uah kiphasak thei mahmah mai a, hang pangpang theizel
hi.
Gentheitak himahle uh kituak leh kithurual, banah, kipanpihtuah
siausiau hile u’bel a noplouhnang a om kei. Himahleh, tua chilou a,
nitengphial a innsung a kitok lingling theikhawng om laidep ahihna uah, a
gentheih u’toh lunggel thei Thangbawi a di’n lawm-le-vual lak a leng
maizum huai mahmah ahih man in lawm-le-vual leng pawl ngam tatak lou hi.
Tuakawmkal ah, Thangbawi leh Lynda kal a itna bel itna taktak, a
uplahhuailou itna ahihman in Thangbawi lungmung mahmah hi. Himahleh,
lehlam ah, Lynda te’ bel apu-apa’ khang ua kipan a minuamsa,
neih-le-lam a kua-mah englou ahihna uah Thangbawi bel Lynda’ aa di’n
chin kisalou a, ahihhang in Lynda in ahihleh Thangbawi itna taktoh it,
it petmah ahih man in neih-le-lam a leng Thangbawi-te’ toh tehvual di
hilou, tangpal zatam Thangbawi a itna ziak in ana nawlkhin sek hi.
Thangbawi-te’ a di’n pantheihna lam chiteng a kisitlou keei in ahih
theih khomkhom in pang gige hi. Thangbawi-te’ a dia Lynda kipiakzoh
nate Thangbawi a din kisuanlah huai thei mahmah a, banah, Lynda
kipiakzohdan thupi, ama’ ziak a Thangbawi-te’ innkuan paitou thei
liangliang phet ahihna uah Thangbawi a di’n leng Lynda koihkhiak vual
ahi kei.
Hunte hongpai zel in, Kimbawi leng a siamsinna ah lohchingtou zel
ahihna ah Thangbawi in leng maban khualna’n gamdang a koih hon sawmta
hi. Himahleh, huai a ding a sum poimawh; koi a la ding, kua kia ba
ding?? Mite’n lah a gentheihdan uh a theihchiat sa, nektawm di khopleng
su-tuah lahte ahihna uah sum zong le u’leng a lohsamsa ahi uhi. Hiai
theikawm in Kimbawi in bel gamdang a om ut mahmah mahleh a innkuan
khosakna un chinlou chih theilua ahih man in utlou dan in om mai a, inn
mun mah a laisim a, a u’ sepsep seppih a, neknek nekkhawm diing chi’n
gen mahleh Thangbawi’ ngaihdan ahi dekkei. Siamsinna pen a kikhelthei
ahi a, sep-le-bawl, kho-ul kaizen a nnasep bel a kikhelkei. Thangbawi
in a ma’ sulnung, a sanggamte’n a zuih ua, a luahtouh ding uh deihlou
ahih man in maban khualna’n Kimbawi ahih theih dandan a laisim sak
diing, a poimawh leh a pa’ gam neihsa na ngawn zuakleng khoksalou ahih
dan gen hi. Ahi a, nuta/unau-te’ kihouna bel Lianpu in a theihpih
dekkei, theihpih ta mawng leleng poisakna a neikei, a sum zat-tawm di
ngen in buai thei mahmah sek hi. A piaklouh chiang ua lah insung a kitok
zialzial sek ahih man in neih dandan piak zel mai ngai hi.
Sum lakna di lah theituanlou, Kimbawi laisim khawlsak a, maban
limchitak, a bul patsa tua va dinkhawl pih leulou di lah ngaingamlou,
hi sa thei mahmah lou ahih man in Thangbawi in a Nu houpih in a inn mun
uh zuak mai a, Kimbawi maban pen sutzop sak teitei di’n thupuk uhi.
Kimbawi a honglohching zel a leh inn mun pen bel neih di sa chi’n
kihehnem mai ua, a dik mah leng ahi hi. Ahihhang in hiai thupen Kimbawi
theisak a sawm kei uh. Ahi a, a inn mun zuak uh Lynda in leng ana
theikha ahih man in Thangbawi kiang a a zuaknasan un dong a, Thangbawi a
di’n bel a gen a kithalawp huai hetkei. Khatnu’n lah kuhkaltak a a
zuaknasan uh dong teitei ahihna ah Thangbawi a in leng a gen veve ngai
hi. Lynda ngei in leng inn mun hial, a pa’ neihsa, tua a pa omlouhsan
nung a zuak-hial di hi a sa theisam kei, a phalkei. Tuaziakin, sumpen
awl a dikkiik ahihleleng dikkiik zawk mai diing in Lynda in Kimbawi
laisimna dia sum poimawh zahzah ngaihtuahsak di’n gen hi. Lynda in bel
sumlaknang a theilo di, himahleh, huai zahzah sumba ta mawk le uh nek
di khop lelle sutuah lahte’n bangchik chiang a dinkiik zou diing?
Kimbawi a honglohching ngeingei ding chihlah genthei lou ua!
Lynda kipiakzohna ziak a Thangbawi-te’n a innmun uh zuaklou in
Kimbawi in a maban sunzom thei di dinmun in a hong om ua a kipak mahmah
ua lah a kisuahlahna u’bel genvual ahi kei banah, sum huai zahzah
bangchi ditkiik ding, koi a sum la ding?? Ngaihtuah but ahihlouh kia
gentaklouh, lam-etna’n le a bankei! Chitak leh tupguh neitak a laisim
a, innkuan haksatna uh dawnzangkhai teitei tum in Kimbawi chuh a
siamsinna maban sunzom dia a kuan a ngai ta hi. Miteng lunggulhna mun
gamdang a laisima om diing himahleh Kimbawi bel tulel dinmun et-in zaw a
phur kei, pahleng a kipak sam kei. A innkuanpihte a en a, a kho-ngaih
in a hehpih mahmah mai, zinmang san di hi a sa thei mahmah kei… a u
Lianpu lah hichi mai, a nu’n lah bangmah sempeihlou, a u Thangbawi a
hehpih mahmah a lah maban khualna a a va zinkhiak himhim a man leng
poimawh a sa phetlou in a innkuanpihte’n leng a zinmah hoihsa ahih man
un.
Kimbawi zinnung sawtlou in Thangbawi’ nu leng damlou in honggimsim
mahmah zo-mah hi. Lynda kiang a sumbat dikkiik nang buai a lunggim tak a
a omlai a tua a nu’n damlouhna a hontuah zawkmah chiang in Thangbawi a
di’n chuh khovel a piankhak leng a kisik huai ngawihngawh mai.
Thawnbawi’ lunggimna khel a lunggimna khovel a a vaang mahmah di. A nu
lah ngaplou ahihna a nna sepsan theihlouh phetlouh pawt leng pawtsan
ngam huailou ahih man in Thangbawi in a nu a ompih nilouh ngai hi.
Lianpu lah hichi mai, sum ngetlah tawplou, van guk lah tawptuanlou…
tanau-laina, innsak-innkhang lah vehtu leh ittu diing omlou ahihman in a
mau’ nuta kia lungngai tak in kikem uhi. Lynda in bel sunchiang in va
ompih zel mahleh Lynda nu-le-pan Lynda a dia Thangbawi deih mahmah lou
ahihna uah khatvei changchang bang Lynda a va hohchiang in va kaikhe
zel uhi.
Tuabanah, khomi-te’n Lynda leh Thangbawi kingaih a theihchiang un
Thangbawi haza thei mahmah ua, Lynda’ nu-le-pa kiang khong ah
zuauthupeuh in va heksek uhi. Khenkhat ngial in Thangbawi kiang ah
Lynda toh a kiteng ua leh Lynda that diing chihtanpha in vauna bawlsek
uhi. Thangbawi mahmah in leng a mah Lynda aa di’n chin a kisa kei a lah
a tung a a hoihna-te ziak in koihkhiak vual hi’n a theikei. Bangchi
zongteng in a gentheihdan uh Lynda kiang ah genmahleh Lynda in theilou
hituanlou, nek-nek nekhawm dawnkhawm a, a nuam leh haksa thuakkhawm
ding a Lynda in a it ahih man in huaite in zaw a koihkhe zou kei di.
Ahi a, Thangbawi in leng Lynda ngailou bel ahi zenzen kei, himahleh,
kiteng in om le uh leng Lynda hinna laksak a om diing ahihman in a it
Lynda toh a kimuhsawt zawkna ding ua a kitenpihlouh a, midang toh a
kiten mai hoihzaw a sa. A neu ua kipan a itna khaugui bang ana zoppih
leh itna thuktak ana piaksa tua laakkiik ding hi a sa kei zel thamlou
in Lynda a mau’ a dia a kipiakzohna, a tung ua a hoihna te a mangngilh
kei. Huan, a senchil vangngaih, itna a neihteng a a it Lynda singdang’
ang a a zal ding a phalsam kei. Lynda toh a kiteng ziak ua ama’ hinna
lak ding hile zaw poi a sakei, Lynda a utnak leh. Himahleh, a ma’ hinna
hilou a, Lynda’ hinna lakmang a om ding… Tu’n Lynda hinna laksak in om
mawk leh chikmah chiang a kimu ngeinawnlou di hi ung ua….
Huchia thupukna kichiantak la-thei zoklou a a om nilouh sung in
Thangbawi a dia thukipahhuai leh zaknophuai hikei mahleh Lynda in pasal
nei diing chihthu hong om hi. Thutak hia zuau chih bel a theikei,
Lynda lah a nu-le-pan khum bi-chilh uh kithuzak theilou, Thangbawi
ngeileng a nu ngaplou pawtkhiatsan theihlouh ahih man in a thuzak
dandan chuh a gintak mai a ngai hi. Hiai thu bel Thangbawi in lamdang a
sa kei, up-leng a um lel kei, Lynda nu-le-pan a deihsak louh lam uh a
theihsa, a tanu neihsun uh ahihman in Lynda bel a kunzou lo-tel ding uh
banah, Lynda in leng a thu uh a nial leng a gingta sam kei. Tuaziakin,
Thangbawi in leng Lynda ngai mahmah mah leh puakdan siam a kizil mai a
ngai hi. Himahleh, neih-le-lam chinlah ziaka a itpen tangkhalou
ahihman in puaksiam haksa a sa mahmah mai. Kiteenni ding a hongtung
petmah a, mite’n kipaktaka mou a loplai un Thangbawi-te’ nuta in bel a
mau’ bangkaw sung ah khitui-naptui toh hun a zang maimah uhi.
Hunbangtan hiam nung in Thangbawi’ nu leng hong damsiang deuhta ahih
man in Thangbawi in leng nna sepsan theita hi. Lynda toh kiteng khalou
ahih man un Lynda kiang a a sumbat uh ditkiik pah a, Lynda maipha zong
in sumloh in kuanpah tingteng gige mai hi. Kimbawi in leng a siamsinna
tukuma zouta ding ahih man in a nih ua nnasem a, sumloh theituakta
diing ahihman un Thangbawi kipak gu mahmah a, thaleng naktak in guan
hi. Lungsim guk a kipaktak a niteng a nasem a a kuanna lam ah nikhat a
nasepna ah tuahsia kha in a hinna hon chan kha maimah hi. Kimbawi in a
laizilna hon zohchiang a sum lohpih thei a, a innkuan khosakna uh
nengkhah bek nuamzaw deuh ding chia phur petmah zaw hive’n… Kimbawi in
lah a laizilna zounailou, Lianpu lah hichi mai, a kivakna pen uh
Thangbawi in lah omlouhsanta ahih man in Thangbawi’ nu a din bel khovel
a ana piankhak uh a kisiik huai vulvul petmah. A tate’ a en a, sum loh
theilah om lou, aman lah bangmah sem peihsam lou. Bangne a bang dawn
diing?? A pianglou innkuan hisuk mai le maw!!!
Kimbawi in leng a U pa’ luang lapkei mahleh hongpai ngai hi. Ittu
leh hehpihtu diing neilou banah, Lianpu gamtat hoihlouh ziak a miteng
in koihdan tuamkhat neita a hih man un a dahpih di le a om kei. A nuta
un a ki-en ua, hihtheih bangmah a neikei uh, a hihtheih uh omsun bel a
khitui uh a kinulsak uh ahi mai! Lianpu a muhchiang un a khasiattha uh
suak deuhdeuh a lah Lianpu’n khoksakna a neikei, a ngeingei in a
ngeithou a ma’ damdawi man di a omnak a ahih leh a sungte’n bang ne uh
a, ngawl uhia chihleng phawkse lou banah, inn a leng om ngeivetlou hi.
Huan, Lianpu in a u pa omlouhpen phaze-sa hileh kilawm in a innsung uah
kimaingal sak mahmah diak a, a sungte’ muh ngawingawi in leng poisakna
himhim neilou in a innsung vante uh a ma’ gawlsung kia a di’n po-khe
sek hi. Pauzek le u’lah innsung a kitom zak mai, a sungkuante vuak
thohsek ahih man in bangmah a gen ngam ngeikei uhi.
Sawtlou nung in Lianpu in kholak a alawmte, a mah’ bangbang a
khamtheih-guihtheih sal a tangkhat zi di’n honnei zo-mah hi. A nupa un
nasep di mawngmawng ngaihsak lou, sanggamte’ kiang a damdawi man di
ngen in niteng in hunzang ua, piak ahihlouh chiang un innsung a kitok
sek uhi. Banah, Lianpu mahmah leng a zi’n thuzohlua ahih man in nidang
sangmah in leng gilou zaw a, a sungte’ niteng in paikhe di’n vau sek
hi. Kimbawi te nuta genthei kisa mahmah ua, Kimbawi in leng a laizilna
pen lakloh lua hinapi’n sutzop sawm nawnlou hi. A laizilna sunzom din
kuan leh a nu’ gentheihdidan mukhollua ahihman in kuansan ngamlou
gentaklouh, a nu a hehpihziak in pasal neihsan mawkleng sawm lou hi.
Damlouh-hiitan a tuah chiang un leng a sihkhak ding uh lautheikhol uhi.
Chihbel khat si leh khat genthei law ding a hih man in kitaisan ngam
mahmah lou uhi.
Niteng a Lianpu’n inn a pat pawtkhe dia sawl veu ahihna ah, nikhat
ngial tempawng toh vau in a pawtkhiat kei ua leh satlum di chin kisa
teitoi mai a, nuta-te’ gel lenglau lua in inn a pan a taipawt mai uh
ngai hi. A taipawt hang un koilam zuan ding, koi a pai diing chih a
theikei uh. Mite’n lah nuihsan lel zo-mah! Chimawh lua a a hong paipai
na lam uah Thangbawi-te’ pata han hongtung ua, Kimbawi leh a nu’n
Thangbawi leh a pa’ hantung ah kikawi chitchet kawm in hilh leh gen a
phatuam lou ding himahleh a omlouhsan nung ua a gentheihdan te uh hilh
in khitui-naptui toh om in chimawh leh ittu ding bei kisa in, kingaise
petmah ahih man un “A Pianglou Innkuan Himai Le Maw” chikhe hial uhi.
!!!!Kichai!!!!!
©Siamsinna leh Vakiangbu
Comments
Post a Comment