CHENG NGA

By : AchillesLal Yatze

Phalbi lai ahi a, nitak bangleng dak tam aging nailou chiang inleng mi dai pah in khopi sung hitaleh mi theng pahpah hi. Huaiban ah, khopi sung a chidam louh toh, guta-lata, suamhat leh dawi thilhih theihna uanglua ahih man in mi nitak sawt pawtngam neilou uhi.

Alou theilou a hohna di poimoh tenten nei ahihman in nungak Chingte, a omna apan mal lampang a apu te hohdi'n a kuankhia hi. Kum 19 phatou pan ahi a, mi melhoih tak, ngou hinhian, leh duangching tak ahi. A ngaihzawng a Ulal toh lah akal uh asiat laitak ahihman in thawmhau kisa mahleh amah chauh a apai angai hi. A pu te athilhih di poimoh tuamtuam te a zoh in paidi'n ahong kisata a, a Pu in zan lah ana sawtman ta ahih ziakin a auto tuanman di sum bangzah hiam hawm hi.

Auto a zon chiang inlah a muzou zokkei a, a om sunsun telah mi tuangdim, khatkhat lah reserved sa ngen khawng ahi uhi. Huchih hun in thawmhau leh khattang aki sakna alian tuan mahmah. A hunluite bang ngaihtuah kiik in a U Lal toh apoimoh hunte ua aki thuah tittit lai uhkhawng angai petmah hi. Panpih tu di bei bang akisa a, numei ahih toh a mittui bang ahong taak khe tialtial hial hi. Huchimai a om theilou ahihman in aman leng a tuan theihna diing auto zong in a gamla zawsem ava zong hi.

Ava zon nalam ah, lampi luun lawtel lou khat a auto khawl amu a, lungdam kisa in a naak huai zezen hi. Kipak lua in Toupa kiang bang ah a lungsim in kipahthu genpah hi. Chingte leng huai auto omna zuan in a paiphei chenchen pah a.... Auto omna ava tungngei a, a hektupa ana kuun deuduau hi. Chingte inleng hoihtak in a enchian a, mi hi niapnuap, tek simta leh gitlouh melpu bang in amu. A lungsim nuamchiah kei mahleh adidang omtuan lou ahihman in Chingte inleng mipa phawng halh in a inn tan uh khadi'n angen hi.

Mipa inlah bang in adawng kei himahleh 'aw' a chih nadan a auto hon start sawmta. Start hingzou zoklou zawmah, a mipa lah ahih vutvut toh Chingte alungsim a nopmoh mahmah ta. Atawp in ahong taikhe theikhong ua, mipa bang in hattak a taipih in, Chingte in awltai di'n ngen mahleh limsak ahikei. Chingte lah lau gawp, mun mial ngemngom nalak khawngleh mi inn omlouh nadeuh atun chiangbang un alau petmah hi. Mipa lah pau mahmah lou in om in a om thutthut maimah hi. Mun khenkhat bang ah a auto light bang hongmit, a engine bang hongkhawl chih khawng a ahong omchiang in Ching a diip akaw petmah. Panpih tu di danglah anei tuankei, a lungsim bang ah thil hoihlou ci tuamtuam lut in alut zungzung hi.

A pu te ava hohkhak bang aki siik zezen a, mikhat bek hiam ahih keileh a Ulal bang azot teitei khak louh poi asa petmah a, lah aphatuam nawn tuankei. A tawptawp in Chingte te inn ahong tungphial ta ua, a inn uhleng ki galmuh thei hita, Chingte lungsim bang hong nuamtuam zot zezen hi.

A inn kong uh ahong tung ua, Chingte ngeileng alung amuang petmah ta. Kumkhe zok in driver pa kiah a tuan man ava dongpah somsom hi. Dawnna bangmah a mukei, auto hekpa a tutna mun ah tu in, tang hetlou in Chingte et in a en gegu hi. Chingte inleng a tuanman zah di adong thak zel a, thumvei, livei lam adot khitnung in, auto hekpa melsuah hong ki lamdang zot a, thakhat in, ngaih a ngaih in, Chingte kiang ah, "CHENG NGA" achi khe zot hi. Chingte leng aki guih zot zawzen a, amanleng a bag sung a sum note a mai khakkhak lakhe zok in auto hekpa piak toh thuah in a inn uah kinoh tak in tailut santa hi.

~~~~~beita~~~~~

©Siamsinna leh Vakiangbu