KA SAAN GIMSI
By ~ Pau Lian
Hun awl neihsun teng lah lung ngaihna, hun awl lou teng lah nin huai
na. Hun manpha leh hun zatdan siamna kichi lah omthei nawn ding ahi kei.
Mihing khat a piangkhia hingal a mihing ngeina a om ding ka phulouh a
diam ka chih hun atam hi. Mite bang a maitai a, bengvak leh kiim leh
kiang toh ki houlim siamna lah ka mansuah ta, bengngong hilou napi a kho
zalou leh phavang ompa chi a mite chiamnuih ka hita. Hun kipah huai
nite lah dahna leh lungngaih na toh mekmat ahi ta. Hunlui ngaihna in
kipahna sang in dahna hon tun a, tua hunlui ngaihna ah lametna leng a om
theih nawnlouh man in ka taksa mahmah a ding inleng punna leh khamuanna
ahih nak sang in manna leh supna lianpi ahi hi. Kholak kavak ni nangawn
inleng mit a ka muh te a chituam ta, nidang a huaimun ka phak ni a a
ban a ka let nu puansilh leh kizepna bangbang ka muh ni in ka kiguih a,
ka diip bang a hawm mawk sek hi. Amah bang a samnei ka mu a, amah ding
kasa khanak, kinoh tak a ka pai ni natawm inleng ama perfume gim
bangbang a gimnei ka tuah khak ni in amah ding kasa a, ki guih tak in
ka ki nunghei a, khawl zen in ka enkik kha teitei hi. Hiai lametna ka
neihlai bangziak a diam aw ka chi a, a tawp in itna ka neilai a ki lamen
lai ka hi ka chi a, himahleh amah toh ki ton a ki letkhop lamen thei
nawn ka hikei chih ka theih ban ah ama adia sawtpek a itna tehpih neilou
kana piaksa bei nailou ahi chih leng ka thei tham a, lamet vuallouh pi a
ki lamen ka hih man in hai lawh ding ka bang ta hi.
Lametna omlou hileh kuan ahia mi khat kiang a a itna a piak ding?
Nang a pan lametna omlou hileh kuan ahia a itna hon piak thuk ding?
Lametna tel lou itna tuh haina ahi. Tu in amah toh ki iit ki ngaih ding
lamet vual hi nawnkei mah leh iit lai ka hih man in ahai ka hi ta, a
sakmel bek ka muh nop lai teitei pen hai siat luatna ahi zomah ve ka chi
hi. Khovel a mi pilpen Solomon theihsiam zawhlouh itna, mi hatpen
Samson sihpih itna, kei mihing maimai a ding in a haksa mah inteh ka chi
lou theikei hi. Hiai hun hon phawksak tu, Phavang huihkhi vottak nung
in ka ngaih gimsi hon puak gige pen lamdang kasa, nai i gamla tak ah ka
om hun inleng ka hunlui phawksuah na hiai phalbi hun ahi hi.
Amah ka muh masak ni a ka bilkha a Lamka ... Lamka... Lamka chi a
kikou vengvung tuh ka gal ua mei kai thieithiai kawm apan ka zak tutan
leng ka zalai hi. Ka tuanna rickshaw ah thakhat in naupang khat hong ki
luai in, "Lamka pai di maw" hong chi a, kou leng ka lawmpa toh "hi" kana
chi tuah lat zezen uhi. Naupang pan leng direct bus ah aw hon chih zawh
nung sawtlou in bus station ka tung ua, kholak huih vot a hih man in
kin leh buang a ticket la in bus ah ka kaltou ua lastline ah kana tu uh
hi. Sawtlou ka tut nung un gari engine hong ging a,paiding hita inte
maw chi a ka ngaihtuah lai in bus nunglam kongkhak ah numei khat in van
lianpi hon ngatou guih a, a kongbul a tu ka hih man in kei kiang ah "ka
bag hon doptouh sak ve maw" chi in nuihmai tak in hon ngen a, kenleng
pau sese lou in kana domtou a, tutna nuai a ka henlut zawh in ka tutna
mah ah kana tunawn hi.
Sawtlou nung in tua nu bus ah hon kaltou a, ka lawmpa toh ka kal uah
hong tut toh et laplap hon thuah hi. Bus leng ki pankhia ahih tak man in
keileng ihmu dia kisa pah in ka tutdan ka hei leh aman, 'i tutna iki
khek aw? ken gari kham ing a" hon chi hi. "Utkei sim mah leng denchiah
hon luakkhum kha mawk leteh na zum lodia" chi a nui kawm in kaki khekpih
a, ama tutna a tutou in ki houlou in ka imut sawm nawn ngal hi. Ihmu
utsim lah ihmu theilou a ka om nilouh kal in kakiang a tunu'n tuh gari
hon kham petmah ta, lodia kisa in zum pipi in hon uak a, kama ua tu nupi
khat in awlmoh lua in anung zutsak in chi in hon sawl zomah hi. Amah
lah zum, keilah zum, chikmah a ki theingei leng hilou ka hih man un nuam
loupi in ka om ua, atawp in a sungnim leng hong daita a hong ihmu hi.
Ihmu a gimchi tak a a om te ka ensuk zel a, a khenchiang in hon
khanglou a, hon en kawm a nui in a ihmut a sunzom zel hi. Ka lawmpa lah
ihmu ahih man in ki houlim pih ding omlou in bus polam a tuilou a
buhpawl ki sekhawm tekhawng, saklam mualdawn a mei kai nieuniau
tekhawng ka en a, lamkiang a mualbou lian loulou leh inn omte khawng ka
etsung in Lamka ka hong tailut ta uhi. Kenleng ka lawmpa ka phawng a,
"na veng uh ki tung dek ei" ka chi leh aman leng "na khang a nu le koi
vengte ale, phawng ve, tuang suak khana ve" hon chi a kenleng ka phawng
hi. Amah leh chihmoh chitak in hong dak laplap a thakhat in handyman pa
asam a, khawlsa in a chih toh kiton in bus leng a khawl ngal a, amah a
kum zawh in kenleng a bag tutna nuai a om pen dopkhiak sak in amah ka
pesuk hi. Bus tainawn dia kisa ahih man in ka katutna a tunawn in bus
tukverh apan ka dak khiak leh nuihmai tak in hon bye bye a, kenleng ka
bye bye zensam hi.
Ka lawmpa kiang ah "na theikha ngei hia?" chi a ka dot leh ana
theikha kei a, "deih bawl simpah na maw" hon chi zomah hi. Kenleng
huchilam hi pahpah khol lou e chi kawm in ka kumna ding mun a tuntak
ziak in ka dingkhia a ka kumsanta hi.
Tua bus a ka muhnu bel thei ngeikei mahleng ka mitkha ah amang
theikei, lawm leh vualte lak ah mah kua a chi in vadong utkhol kei mah
leng ka paina peuh ah amah muhkhak kaki lamen, ka theihngei leng hilou
napi in ka lungsim ah a thamden a, munawn bang hi lengle bang va genpih a
bang va nekpih ding leng hilou napi in khatvei bek muh khak lamen in
kal va suan a vadiang a amah va zong hial hikei mah leng ka mit, ka
lungsim ngaihsut na leh ki nepna in ama omna ding mun a hisap denta hi.
Hun te hong pai a, zingni hong suah hun in zong mah leng kamu kei,
sun hun in ka zong a lah kamu tuankei, nitum kuan in ka zong zel a, ka
lungsim tuh khomial bang in mialsak in aom a, muh zawh ding ahi kei,
amah kua ahi diam aw ka chi a lah ka thei zou kei, amin bek theinuam na
ing e ka chi a lah bang chi va theih khonung ding ahi chi in ka buai.
Ahun tak a kanlou lah tua kha khat bang pailiam ta a buaipih lai chi in
kei leh kei bang nuihzak huai in kaki koih a, huchi a lamen tak a ka
omlai in nikhat tuh ka tanau te uh inn a moulawp na ah amah bangbang
limlak kava mukha hi. Mi tampi ki lakkhopna ahih man in amah ahi chih
theihchiang haksa sa in ka lung a buai zawsem hi.
Haichilh kahi tave maw ka chi a lah ka tawp thei kei, ami zongkhia a,
gennop teng gentei ut ka hih man in moulop vai a veng tak in innteknu
kiang hielhial ah huai limlak a nu kua a chih ka kan ta hi. Innteek nu'n
leng "hiai maw? bang di eita?" chi in nuikawm in hon kan a kenleng ka
muhkhak ngei danteng ka hilh zawh in innteek nu'n leng "ka inn ua omnu
ahi, Phai lamte ahi, tua christmas zang dia innlam a pai, college
lutnawn hunchiah hon kik nawn inteh" chi in a pawt khe ngal hi. Huai hun
in ka tawl nateng a dam guih a, ser 50 ka lu a ka khuklai hon lakkhiak
sak mah bang in thoveng kasa mahmah mawk hi.
Huaini a pat in lamen tak in kangak a, ki pahna thupi tak leh lungsim
guk tak a vei tuntun in ka om hi. A sakmel te munawn leng lungkim mai
ding in kaki ngaihsun a, a kal lak in lah bang pi piang khe tuanlou dia
ka gintak thepthup na ten ka lung a su-am mahmah hi.
Kinve, kinve chi a hun awl chik a pai ka nawh ton bang a om, himah
leh ngaklah huai hunte nawh hat thu a paikin thei ahi kei. Nikhat lel
leng kum tampi bang tuk in ka ngai a, christmas leh kumthak hunnuam te
natawm inleng ka lungzuan na anem zoukei, ka lawm te natawm in lamdang
hon sa ua, damlouh na nei hiding peuh in hon ngawh uhi. Kenlah ka lawmte
hilh nuamlou, amau lah theinuam kisa in ka ki sui tuahtuah sek ua,
kenlah huai minu, amin ka theihlouh nu thu leh la ka guk sui a, ka
lawmten bel kei ngaihtuah na a sui ua, a mankhe tuankei uhi.
Huchi a kha khat val bang ka ngak nung in school kai te lut a hong
hun nawn ta, ka ngaklah gige a hong tung hial tak in amah mu ding in
kaki sakhol ta hi. Hiai hun sot pek a pan ka ngak himah leh a huntak in
huphulh na takkhat ka nei mawk a, lawh ding dan theilou ka hih man in ka
lawmte kiang ah ka thuguuk teng ka hilh ta hi.
Hiai zahta a na vei nung a maw lawmte na hilh pat, napaa kei tel mai
chi peuh in hon tawng ua, ken leng gen ding tuan theilou in ka lawmte
kiang ah nitak chiah va pawt ni uh chi in kaki thukim ta uh hi. Nitak
lam annek lai bang in houh ka om ding dan leh ka kampau ding dan ka
ngaih tuahtuah a, sungte houpih na natawm zaman ngel lou in ka dakkhe
heihuai hi.
Nitak a hong tung petmah ta, ka puanak silh ding natawm telbuai zen
in kakisa a, ka sam te nalh deuh in sak leh khang ka kawk sak a, pasal
simpi kisa mah leng huaini in zaw liimlang mai a din a chimhuai hetkei
hi. Kuan khe ding a ka kisak chiang bang in ka fuh louh na om khak ding
lau in kava ki enthak thak hi. Lungtung tak leh ki deihkhop tak in ka
pawtkhia a, lawmteng toh tua nungak, nauvei bang a ka vei nu mu ding in
ka kuanta uhi.
Huphulh na toh kidim hileng kilawm in ka om a, nakhak bang kasa a, ka
chi peuh a liing hi. Lawm ten bel hon muang lua uh ahi ding a, tua ka
pawt na ding nu uh tungtang bangmah hon dongkei uhi. Sawt kuamtak ka pai
nung un atawp in ka hohna ding uh ka tungta uhi. Ka lak ua a pauthei
pen pa kiang ah lut masa ding in ka ngen ua, ut ding kasak leh a ut
dekkei zomah hi. Kei a thei omsun ka hih man un ka lawmte'n hon bing
sawl ua, varandah tanpha ah kaki phu nonoih zezen uhi. Atawp in kenleng
hu lazen in kongkhak kava kiuh a, inn sung a pan in aw in "kua e? mi
khemkhem lou in hon lut, vuak ut maw? chi a hong ki gen tak in ka lawmte
toh kaki entuah ua, ka taikiik khonkhon thethup uhi. Taikik chi a gate
lam ka manawh lai un thakhat in gate hong ki hong a, papi lian venvon
khat hon lut a, eh bang hih uh e? hon chih leh kavek un thakhat in
kakhawl guih uhi. Kenleng tua papi pa thei ka hih man in Pathang,
kikhawm tawpta hia, nungak hon heldek kei ve ua ka chih leh hon nuihsan
a, lut lel ve ua chi in hon paisan a, kou leng a nung ka zui nainai mawk
uhi.
Innsung ka lut un meiphu awi in nupi-laa khat, naungek pom toh tua ka
muhchil tongsan ngaihnou tu ka mupah hi. Amau leng kamsiam tak in ana
vaidawm ua, ki guih huai bang kasa zezen hi. Huchih lai in nupi pen in
den a kong hon kieu te nou nahi tawk di uh maw chi in hon dong a, ka
lawmpa uh, a pauthei pen pa'n, himah ung e, hon ki vak nasa lua a ka
taikik ualeh Pathang toh ki phunon kha ung a tua hong kik thak a hon
chih leh innteek te anuih uh zalua ahi dia, a nui nilouh uhi. Kei a
ding in bel, nungak kei aituam a dia deihbawl a hoh masak napen ahih
toh meiphu awi bang leng lawmte a sangmah inleng lumzaw a, kho-ul peuh
in kava pumkawt maimah hi. Paulou hial mah in ka tu a, ka nungak helnu
uh aguk in kana melh cheuh zel hi. Huchi a sawt kuamtak ka pau nung un,
lawmte'n pai ta ding a chih man un ka pai maita uhi.
Lampi ah lawmte'n hon mawhsa ua, himah leh ken bel ka mawhna ding ka
mukei ka chi teitei hi. Inntek te mai a va om tuuktuuk aki lawmlouh ban
ah lawmte lak a kou vaki houtuam ding leng dik kasakei ka chi hi.
Lawmte mah inleng huai hipen mah e hon chihpih ua, zingchiah hoh nawn
dia gen tani hon chi uhi. Kenleng aw ka chi a, himah le ka guk buaina
pen bel kha tampi numei guk ngaih ing a, va pawt hialta ing a amin ka
dot tel louh nuam kasa kei hi. Vangphat huaitak in ka lawmte'n leng a
min hon kanpha kei ua, zum lou phot, suakta chi in innlam chiat ah kaki
khenta uhi.
Nitak lupna tung a ki ngaihtuah a nui heuhau a, talsam te bang veilam
leh taklam a zuut zihzeh a, huai ka mitkha a dawknu mel, ka thousilen
tung dum a hong ki langkhe diandian tuh ka enchim theikei. Mitkha lel
maw ka tan ding? hi zenzen lou e, na gimsi lel maw nawn piak ding? hilou
hial ding, na itna dembei zingchiang a kipan in kei a ahi ta ding,
sakmin theihlouh himah leteh ka itna nang a din ka lankhia, chi in ka
lungsim ah kinepna tawpkhawk toh hun sawttak lupna tung ah ka zangta hi.
Ki ngaihtuah a lametna chikim toh om ka kisak kal in ka ihmu ta,
zingsang khovot tak nuai ah ihmu lou lah thoukhe peihlou in
kakingaihtuah nilouh a, mi bang a neizou a, phone te tawizou hileng, zum
leh zah tampi te pumpelh a agal a gen mai a, zawh lelah kilawk chih a,
zawh kei lelah mahut mu chih mai di zaw hiven, izawn i ngau ziak a thil
khempeuh gumphut ngai maimah a chih khawng peuh ka ngaihtuah hi. Sun a
nasep ding ki bikhiah sa tampi tak om te bang lin tuntun kawm in ka
thoukhe khong a, kihah zawh a anne in, niteng nasep, cement tok din ka
kuan ta hi.
Nasem dia kuanna lampi ah tua nu college uniform silh a hong pai ka
mu guih hi. Thakhat a thil muh a hih ziak in kaki guih a, nasep na van
niin deuh toh aki hih man in keileng kaki zumpih a, kaki heiphei a,
lawmpa pang lam ah kaki bukbawl mawk hi. Himahleh aman a gal a hon
mukhin tuh ahi ngei dia, kaki tuahtak un hon nuihsan a, kenleng
kamsiamlou pi in, na nalh lua, kainuam ou ka chita hi.
Tua hun tomchik, minute thum sung lel ding a nuihmai mel kilawm tak
in ka nikhat nasep hon hatsak hi in kamu hi. Tua nuihmai in ka tal a kho
ul kai te a ziak beilou ding a hi chih hon musak a, tualniam in mibang
a khosa hikei mah leng, khatvei tei tua nuihmai kilawm kakiang a
niteng, hunteng leh dakkal teng a mu ding ka hi chih ngam na lungsim
hon pia hi. Zingtung a pan tawl kisakna omlou a sepzawhna huai nuihmai
ahi. Amah ka ngaihtuah hunsung in nasep bang tawp a hun hialta hi.
Khovel hichi ding mah eive maw, a ziak a san om a hin ding mah eive chih
huaini in ka zilkhe ta hi. Ka thanop naziak bel bangmah dang ahi kei.
Tua itna ziak a thanuam tak a sem a, mite toh kikim a om a, amah tangzou
dia sum leh pai neih a suk lungkim ding chih ahi penta hi.
Nitak a hong hita, kanglam mual a khapi hong suak te mei ziing ten a
tuam thieuthiau ka en a, phur tak in lawmte pawt dia tawn din ka kuanta
hi. Lampi a ka paikawm in ka gen ding teng ka kaikhawm a ki muangtak in
lawmte tawh ngaih siang lam ka zuan ta uhi.
Ka hoh na ding mun uh ka tun un a inn uh mei ana ki sumit chet a,
varandah ka tun un ka hel ding nu uh a hong pawtkhia hi. Ken leng tuanu
kiang ah, kare ei hon ki hawh a, koi a hoh dek e ka chih leh aman leng,
ka lawmnu kiang a book vala zual di chi kahi, hon zui ve ua poilou pi,
naichik ahi hon chi a, kou leng phaze sa in ka zui ta uhi. A lawmnu
kiang ka tun un mi ana tam mahmah mai ua, lut ngamlou in innkong ah kana
ngak uhi. Huchih lai in lawmten, hun lemtang a hi. Kou kava pawt khe di
ua, nou ana ki hou un, kong paipah ding uh chi in hon pawtsan ua, nuam
sakei sim mah leng ka ngaihdan tak ahih man in ka lawmte bang pil uh
kasa thakthak a, ka pakta a, a guktak in kaki pak petmah hi.
Keivuak a sawtlou ka ngak nung in lawmnu a hong pawt ta, a lawmnu toh
mangpha hon kikhak zawh un ka kiang ah "na lawmte la" hon chi hi.
Kenleng "kuva va lei uh ahi, hon paipah unte" ka chi a, ka paipihta hi.
Lampi ka paikhawm hial leh gen ding teng a mang vek mawk a, amin bang
ka kankha zezen hi. Aman leng ka min maw Ngangaih ahi hon chi a, ken
leng kamin ka hilh hi. Sawtlou paipan kaki sak kal un a inn uh ka tung
mawk a, gen manlou in a innsung uah ka tu nilouh hi. Tuilum hon suah a,
kenleng kipak chi khalou zenzen kawm a ka dawn leh, "min thil hon
hihsak leh kipak chih di eive" chi in hon chiamnuih a, kenleng, "eh
eimah ve maw, kipak lua aw" chi in ka nui nilouh uhi. A tawp in,
denchiang in lawmte hon tottot sang in chi in Ngangaih kiang ah,
"Ngaih, imaw, na gintak louh lamtak leng ahi maithei, tangval nei leng
na hi maithei, gen dia kilawm lou gen ka hih lele nawn theisiam dia,
hoihlou non sak lele gen mai leteh.....kon muhtung a pat hoih honsa ing
a, hon ngai ing a, nang lah thei mahmah louding chi ing a, poisa ing
a, kon hilh mai eivoi, min thilthak hon hilh leh kipah na in nala thei
diam? nang le a dawnna non piak sam kaki lamen" ka chih leh hon nuihsan
a, theikhang maw hon chi a, huai a chihban genbeh manlou in ka lawmte
hong lut uhi.
Hun sawt kuamtah ka vei, gen ngamlou a sawtpi ka omnung a ka gen
khong, tua itna thu pen, a dawnna a hou telmai hi. Theikhang maw chih in
kei kinawh na lungsim a patausak hi. Innlam ka manawh kawm in ka
genkhawm ua, tulai mite lungsim etkhiakna te theisiam leh kizentak a tua
Ngangaih mitsuan a, kuhkal na toh pang a, ginna lungtang toh len tinten
ding ka hi ka chih phanphan bel ka lawmte a din chiamnuih banglel ahi.
Ka lawm Khualboi ngial in na nungak beih nu a pil chi a, ama lung tuak
din na pil kilkel angai ding hon chi hi. Kenleng bangteng hileh mihing
ki buuk-kak na hi phot ven, a selam kipe nai lou hial ding ka hi chi in
ka lungsim a dawilok na himhim omlou a ka gen zawh in innlam chiat ah ka
kikhen ta uhi.
January huih vottak nuai ah zankhua in ihmu mawh zen in ka lunggeel
aki kheng tuah a, hithei ding a diam? hithei louding a diam? hithei
keileh ka posiam diam? bang ka chi di? ka chi a, a tawp in, a hihtheih
keitaak leh le pomsiam mai na veng chi in ka ihmu ta hi.
Zingkhua kilawm tak te hong vak nawnta, ka lupna pam a tukverh ah
nisa hong taang lut in, huih vot ten ka biang te a mut a, votsa a kaki
lukhuh dek leh ka lupna kong ah kanu hon dak in, thouta ve, Pathianni
annkuang kikhawp hunta ahi chi in a paikhia a keileng ka thoupah a,
kihah zokzok in kikhopna neih nalam ka zuanta hi. Kikhopna neih zawh in
ann ne in kikhawm ding in kakuan ta uhi.
Kikhawp sung natawm in chim manlou in ka lungsim ah Ngangaih a omden
hi. Ka kiang nai a om hetlou hina pi leh amah awlmawh huailou hina pi in
ka awlmoh mawk hi. Kingai nailou himah le ung kingai dan bang in kaki
ngaihtuah a, hehpih na in ka dim a, bang a hih de aw... bang a chi om de
aw chihpeuh ka ngaihtuah hi. Huchia kikhawp a bul apan a tawptan thu
tampi ka suangtuah lai in kikhawp a tawpta. Biakinn kong a lawmte toh
kingak tuah in, inn leng phalou zen in Ngangaih te innlam zuan in ka
diang pah thangthang uhi.
Ngangaih te inn ka tun un amau leng kikhawm tawp panphet, kikhekzou
in innkong ah nisalum awi in a tu uhi. Nisa lum awikawm a saisek khawng
nek a nopdan, phalbi khovot lai a kituak penpen...mei awi kawm a kanpuak
kang toh nisalum awi kawm a sek sawhbawl nek ahi ka chih leh Ngangaih
in, duh uh maw, ka hau telmai uh chi in inn phaitam ah valou din hon
zawn a, lawmte'n hon zui ding uh kasak leh hon zui nuam omlou in kei toh
Ngangaih ka kuankha uh hi.
Hiaibang hunhoih ka muh lamdang sa in sek ka lou mengmeng a, ka
lawhzawh in Ngangaih kiang ah, zan a ka thilgen bang ngaihdan na nei,
gen chiang lou lua chin a kei lung nuamlou pi a om keive ka chihleh
Ngangaih in, kinawh lua maw, mak tak aka maw? ka gintak louh lamtak hi
inchin, mak salua, a dawng didan le thei bunlou ka hi hon chi hi.
Kenleng ama kiang ah, huchi a hih leh na hih theh ding leh hihtheih louh
ding hon gen bek ve ka chih leh hon en kilkel a, ka hithei kei ding, ka
naupang lolai, ka pichin deuh chiah kon dawng pan di chi in asektawi
toh a ki heiphei a, kenleng a khut a man in kon ngak di, kon ngak teitei
ding, na ki awi a non khem leh bel nang leng na vangpha tuankei ding
chi in a khut ka letlai ka khah a, aman leng huai tantan zaw ka genngam
hetkei hon chih qet in kenleng ama kiang ah, nangzaw genngam kei mah
niteh, hilehleng ken gen ka hi ka chi a lawmte omna lam ah ka paita uhi.
Lawmte'n lamdang sasim kawm in hon en ua, gamla sim ahi di maw, sawt
nava lou tel ua honna chi vengvung phet uhi. Kenleng zumsim hi zenpi,
lawmte kiang ah hunlem zangdik ivoi ka chi a, ka sek lawi te uh ne in
nitak lamtan chiamnui in ka om ua, Ngangaih annhuan ding kuan in ka
paita uhi.
Hiai hun chet in zaw keilampang ki mawhsak theih na ding ka zong, kei
pillouh leh siamlouh man a suanlam bawl a diam aw ka chi a, hon sit
houh ahi zaw diam ka chi zel a, ka lung kiakna bel a bei thei mahmah
kei, genzel a, lawhsam zel lengle kei a dia manna omlou hi a ka
ngaihtuah man in khatvei zaw kah angaih leh leng kah mai a, ek neja
angaih leh leng nek mai ding ahi chi in hunlem ka zongta hi.
Hunlem muh kaki lamet lai in kamu theikei. Nitak man hunteng in va
pawt mah le ung lawmte toh ki phe vengvung a hihna toh hun lem a vang
mahmah mai hi. A kal lak ah ki hepkhiak bawl sim in ka thei a, a kal
inlah hon maingal mahmah zel hi. Tangkhat a va lengla ding ka chih
chiang inlah kingai leng hisamlou chi in ka utkei zel hi. Huchi a
awlawl a kaki ziat sung in pawl 12 te exam hun a hong nai petmah ta,
nitak pawt bel hithei nawn taktak lou. Sun chia lah nasem a kikuan zel
ahih man in lemtang hun a ki tuak nawnkei. Exam te hong hun ta a, kimu
lou a sawtpi ka om nung un sun khat nasep na a van kimlou lei dia bazar
lam kava hawh leh Ngangaih leh a lawmte exam zou toh lampi ah kaki tuak
ua, kenleng mupah ka hih man in na hih hoih hia Ngaih ka chi hi. Aman
leng, theikhang maw, haksa loveh aw hon chih ban ah, na vanglua hon chi
mawk hi. Kenleng kalnawn nilaini himah lou maw na zawh ni ding uh? huai
nitak chiah kong hoh di ka chih leh hitham hon chi a, huchi in ka paina
ding tuak ah ka kikhen ta uh hi.
Ka hinkhua a ding a ka ngaklah nipen tua Nilaini zan a hong tungta,
phalbi beikuan leng ahita, phalbi leh nipi ki khen kuan, huisiang
nuamtak nung hiauhiau lak ah thuduh na tawpkhawk toh bangthu ka zadia
chikawm in keivuak in kava pawtta hi. Nilaini ahih man in a sungte
kikhawm in avek un ana pawt uhi. Kenleng bangziak a nang kikhawmlou
neita ka chih leh Ngangaih inleng, ken vanlak di nei ing a huaiziak a ki
khawmlou ka hi. Nang non pawt di ngak a ana om ka hi, kong kisa dia
pawt ni chi in a hong kisa a, aman tak un ka pawt ta uhi.
Van a aksi tang singseng te ka en zel a, nou aksi te na hi uh tuni a
kaki pahna thuguk a thei ka chi a, ka lungsim guuk a paupau mai hi. Ka
phakna ding uh ka phak zawh un lampi saulam tawn in awlawl in ka pai
uhi. Kenleng a khut ka letsak a, bang mah a genkei. Huchi in kenleng a
kiang ah, Ngaih, hon ngak gige ka hi aw ka chi a aman leng hitham e hon
chi hi. Ka khut te a ling a, himah leh lenkha nawnlou thei ka hi ka chih
man in ka aam a, a kiang ah, hiaibang hun hoih muh kei a dia ka phulouh
ahi, hun paisa ah kineel lokei mah lehang tua pan inbel kon maingal tani
aw aki khel naikeh ka chi hi. Aman leng, kikhel chih omthei ahi,
zingchiah paileng chiktan ommang a, chiktan kimulou ding i hia chih
kuaman i genthei kei hon chi hi. Keileng ka kingaihtuah a, eh Ngaih, huai
khawng chi ken, khovel neuchik lel ahi, i kimu na di, lungkham ken, hon
ngakden ding ka hi, na thu gensa zui in, zuikei tale teh leng ka chi a, a
inn uh ka tun tak ziak un va lut nawn tuanse lou in ka kikhen
ua, painuam, mangpha chi in a innsung uh a lut matan ka en nilouh louh
hi..
Inn ka tun in ka lum a, a melte ka mitkha in kamu a, phalbi leh nipi
kikimkhen kuan a a huikhi laang hiauhiau toh KA NGAIHNOU GIMSI ka
mangngilh thei diam ka chi a, hampha kisakna a pumdim in a thuk zaw leh a
sauzaw ka ngaih tuah kha kei. Huai nitak a ka kimuh uh a patna hiding a
ka ngahtuah lai in ka ngaihtuah na toh a kituak thei nawn kei. Kimu zel
a, a thukzaw a kalsuan ut himah leng khosakna mun kibatlouh ban ah amah
ngei leng siamsinna sangzaw lamen a mundang a a om man in akum a sim ka
kimukei uhi. Kei mimal tak ah leng panpihtu bei ka hihdan ka mu a, niteng
nekzonna dia sum leh pai zang ngamlou a khol in khatvei tei Ngangaih
toh kimuh a hinkhua a lamet louh dantak a zatpih ding ka chih himah leh a
lem thei kei hi.
Kum khat val vingveng ka kimuh louh hial nung un ka patau khongkhong
ta a, ka lawmte kiang ah katai a, lawmte'n leng tulai vai deuh din, phone
bang na lei dia, na kihou bek kei di ua, sum a tasam lua le na hi nawn dia
maw hon chi uh. Huai hun inbel, sepna nei a, officer liantak hilou hial a
ding a phone va tawi ka utdan hi ngelkei mah leh a tawp a hi salou in ka
lei a, a contact na ding ka zongzong a, kamu theikei zomah hi. Chimawh
mangbang tai ngeina chi in lawmte kiang ah a contact dingdan hon kansak
un ka chih nilouh nung in vangphat na ziak liauliau in ka mukhong ta hi.
Ngangaih nuihmai mel lungsim a phawk kawm in a number ka mek
a, hallo, Ngangaih hia ka houpih ka chih leh pasal khat in, hilou e, nang
kua na hia chi in hon dong hi. Ken leng ka hihna ka genzawh in nang kua
na hia leh ka chih leh tua phone a paupa'n, kei maw, Ngangaih pasal ka
hi. Ka zi office a kai a, nitak lam in poimawh gending na neih leh hon
phone thak leteh chi in a koih ta hi. Kinem tak a om a, kamkhum tak
zadia ka kigintak lai in nemtak bang a paukhia, a zatu a ding a zu bang a
khaa ka zak in ka lungtang tawng a deng a, et ding bei in ka om hi.
Haiman a ngaihluat chan ka hi ka chi a, chinlahman leh fellah man a ka
tantawk hunlui phawkna, a gimsi uh diik a, a hun a hong tunchia aw sial
thuak mai lel a hita maw ka tantawk chi a, naa satak leh khase kawm tak
in, Khukhup in a tangthu a gen denta hi.
beita.beita.beita
©Siamsinna leh Vakiangbu
Comments
Post a Comment