PHUALVA BANG ITNA
By Leon Guite
On November 22 at 4:37pm, Thursday
12th January 2134 AD Seppatni zinglam dak 3:14 geih agin toh kiton in ka phone ahong ging hi. Ihmut suak mahmah kawma kize uaiuai kawm in ahon phonetu kua a chih en sese lou a pick up in "Kua e nang? Khovak ngak theilou maw?" ka chih khum lelo leh kare !! Sappa ana hi a, "Mr. Lianpu, na SP pa hi ing ei... Sapte zahna nengchik bek neita in ka hon chi gige hilou maw? Kintakin Police Station hon zuan in, dak 4 ginma ngei a na hong tun ngai ahi. Hunchiam a na hong tun kei leh gawtna honpe ding ka hi aw..." chi'n a phone ahon koihkhum hi.
Ka SP pa uh ahihlam theil eng zaw dawng gega lou ding hing a... Chih ngaihtuah kawm in ka dawn dan leh ama hon dawnthuk dan ka nuih hong za lophut in keikia in ka nuikhe lualua phet hi. Kintak a kisa in Police Station ka zuanpah hi. Ka tun in ka lawmdang teng leng ana kimvekta ua, ka SP un Lianpu nang a fel ding pen bang dinga zekai a pang gige na hia? Chi'n ahon tai a, lawmte lak ah nuamlou leh kisuaklah tak in ka om liailuai hi. SP office ah ka lut vek ua, ka mantak un ka SP pa uh Thangpu in ahon sapna ziak ahon genpah in panlak dingdan toh hon gen pah zungzung hi.
Ahon sapna ziakbel nitak dak 12 lakvel in New Lamka Khominthang veng ah inn khat meltheihlouh pawl khat in valuh ua, inn neipu athah ban uah, a nupi uh suam in a tate teng uh kaplum in taisan uhi. Tuapen city policete a ding a zahlak huai mahmah thiltung ahihman a kintak a panlakpah poimoh ahih dan leh, ahuntak a panlakpah ahih keileh city policete ading a zahlak huai mahmah ding ahih dan a hon gen hi.
Huchi'n SP makaih in thiltunna mun zuan in ka kuan khepah uhi. Phalbi suklai ahihman in khua avot mahmah mai a, meizing sahtak te'n lampi tuamchip in ka hat tai theikei uhi. Awlawl in ka tai ua, amun ka tun un khua avak ta hi. Mi anatam mahmah mai ua, kou ahon muh un mikhenkhat in zekai hon sa lua uh ahi ding a, ahong sousang mahmah ua, suang a hon dengpawl bang ana om man uh ahi ding a, ka lu suangkhat in hon kha a, ana mahmah mawk hi. Ka hehtha lah suak lah bangmah lohtheih om tuanlou ahihman in "Tuni ka vangphat tuak kei mahmah na e" ka chi numnum phet hi.
Ka tun phet un kou sep ding a poimoh omte ka sem pah fitfit ua, dotnop leh dot tuak omte innkim-innkiangte kiang ah dong in siluang teng hoih tak a lem in post mortem bawl ding in damdawi inn ah ka khak suk uhi. Tuahsia tuak innkuante minga apha ua, amau lak ah anu uh chihlouh teng in sihna tuak ua, anupen uh leng khuaphawk lou in adinmun lauthawng huaitak in om hi. Et ding leh bawlding teng ka et ua ka bawl khit vek nung un TUALTHAHNA CASE dan a case file in Police Station lam ka manoh ua, innteknu ngei leng damdawi inn ah etkol ding in ambulance sam in siluang teng toh ka pawkhia uhi.
Police Station ka tun un SP in ama room ah kei leh ka lawm Khualpu hon sam lut in tua case pen suikhe zou ngei ding a hon muang a , kou gel hon sep ahihdan ahon gen hi. Hiai case ka suisuah zoh uh leh hon kaisangsak ding ban ah ka innkuante uh natawm in hamphatna tampi mu thei ding uh ahih dan ahon hilh hi.
Huchi'n ka lawm Khualpu toh ka nasep ding uh ka pan pah uhi. Zing annek zoh a kisa pah in Khominthang lam ka zuan pah ua, tuahsia tuakte tanaute leh inkim-inkiang, ban ah alawm leh vualte uh ka muhkhak teng kiang uah thu dotna ka neipah uhi.
Ka thudotna uapan in inntekpa min ahihleh Thangpu hi a, sepna kichiantak neilou, mitoh kina ngeilou leh mihoihtak ahihdan a gen vek uhi. Ahih hang in a khosak dante leh a inn khawng ka et chiang in sep kichian neilou ding in khosathei mahmah, building inn hoihtak sung ah teng ahih dan ka mu a, athugente uh leh ka muhte kikhailua sa in lamdang sakna in ka dim hi.
Sep kichian neilou lah khosa thei mahmah mawk ahih chiang in aguk a sep nei a, huai in a mah buaina tun kha hiding in ka muangmoh tinten hi. Huchi'n a innvengte khat kasam tuam a, akiangah Thangpu in bangsem sek hiam chih ka dong hi. Himahleh, aman leng sau thei tuanlou a, zin khe mun mahmah ahih dan leh inn a om sunsun chiang a leng popawt lou a om sek leh zansawt nung natawm a mi hausa pipi toh a inn uah kithuah den sek ahihdan ahon hilh hi.
Ka deih bang uh dawnna ka muhlouh ziak un innsung teng hoihtak a envel thak ding leh post mortem result ngak a, huai pansan a panla tou ding in Khualpu toh ka kithukim uhi. Innsung teng ka hon envel uh leh thautang kapsa khat leh kap nailouh a catridge toh omlai ka mu ua, huaite la in Thangpu inn nusia in ka paikhia uhi.
Khualpu toh maban panlak ding dan kikum a lunglut tak a kihoulim kawm a ka pailaitak un ka nunglam uah gari horn kimek khum ging ka za ua, kou leng thakhat a khawl a kinunghei kawm a ka et uh leh.... Activa khat ka nung chin uah ahong khawl a, tua activa tung ah tuang nungak khat asam ngat silsial hoih mahmah huih in amut leng singseng kawm a heh mel tak a koute honna en khat toh ka kimaituah kha uhi. Amel ka muh leh ka dip a hong kisai pah dipdip a chikmah a milak a zakta ngeiloupa kha, hiai nungak melhoihtak leh duangchingtak ma ah ka dipte kisai kin in nervous na in ka dim hi.
A hon hounate zalou phial in amel kamka heuhou kawm in mitdim zen in ka na en a, hichizaw deuh leh zaw chi a sawisel na ding himhim ka mukei. Siamtu'n zaw siamdik hina e ka chi vungvung hi. Huchia bangmah phawklou zen a, amel ka na et laitak in a gari horn hon mek khum leh thakhat in ka halh khia hi. Amah ngeileng koute hon hansan zungzung kawm in ahon taisan a, anung ka enzui vungvung phet uhi. Ka lawmpan ka omdan teng hon mu ahihman in ahon nuihsan ek-ek a, ken bel bangmah a dawngtam theilou in hoihna e mw.... Ka chi vungvung phet hi.
Police Station ka tun un SP pan ka hohna uh thu uh honna dong pah hi. Kenleng ka nungak muh in ka lungtang teng luah gai ahih man in bangmah dang a dawng lou in, "Sir, amel nak hoih himai...." ka chih phut mawk leh ka gei a Khualpu ding in a tong in ahon phuphei zot a ka thugen ka theikhe phut a, genkhial kisalua in ka veinuih heihui top mai ve.
SP in lah ka dawn dan lamdang sa mahmah in ahon en heihoi zozen hi. Kei leng kisuanglah mahmah kawm in ka muhdan teng uh report ka pepah zungzung hi. Report kapiak zoh in SP pan "Lianpu, nangle muhkhak louh d vamukha na ve maw ? Denchiah na thil suikhiak dipen suikheman lou in nna dang in hon suibuai kha ding e. " chi'n ahon chiamnuih hi. Kenleng "Sir, na lungtunna tan ah suikhiak teitei ka hon sawm dia, thildang buaipih lou in ka hong pang ding aw." chi'n ka dawng sam a, himahleh ka lungsim tak ah bel ka mi muhnu in munlian zaw tham aluah tlats hi. Bang ahong chitel diam ah ?
SP room apan ka pawtkhiak un Khualpu in ka om dan teng chiamnuihna in ahon zang ek-ek hi. Ken lah gen ding tuan theilou in Khualpu kiang ah, tua nungak melhoih nu hon zon khiakpih ding in ka ngen zosop hi. Aman bel thupi ngaihlou hi awmtak in, "SP pa kiang ah na thuchiam kitheih lel oh." ahon chih khum a, kei lah heh kisa mahmah kawm in, "Utleh, non zon khiakpih kei leh ithilsui pen nangkia hon suisak ding ka hi aw..." ka chih leh amah leng hong nui heuhau in adang gentuan lou in, "Hi e...!" chih teng chauh in ahon dawng hi.
Inn ka tun tan in leng ka lungsim ah bangmah dang a omthei himhim kei. Amel hoihtak leh aduang kilawm tak mai hichizaw deuhleh chi a soiselna ding himhim omlou, hoih bukim tak tuh ka mitkha apan ataikhe thei nawnkei hi. Amah muhnawn kal ka ngak lah mahmah mai a, himahleh, bangchi muh ding? Koi ah mu nawn ding chih gentheih louh ahihman in ka lung akham petmah hi.
Atawp in ka theih ngeilouh ngai in maumau mawk leng ka sepding teng sem buching zoulou ding, banah; ka sepna na tawm in thuak kha thei ahih man in ngaihtuahlouh phot mai ka hon tum hi. Ka lungsim apan koih khiak ka tup nak peuhleh akip deuhdeuh maimah a, mangngilh tum a ka pan nak peuhleh ahong lang chiang deuhdeuh mai hi.
Atawp in himahmah kei, ka hichi omom leh hoihlou ding hiveh chi'n vak halh ka hon sawm ta hi. Awlin Lennuam Bar lam ka hon zuan a, amun ka tun in mi anatam sim mahmah ta uhi. Kenleng whisky order in table awng khat ah katu suk a, awl in ka hon dawnpanta hi. Ka pam ah anawl lam deuh ah tangval 4 vel in leng zu ana dawntei ua, amau bel kham sim mahmahta uh ahi ding a, a aw uh ahong ngaihsim mahmah ta hi. Pilvangtak in athugente uh ngaikhe kawmkawm in kenleng kei a ka dawn kawmzel hi. Bangtan hiam nung in alak ua khat in alawmte kiang ah hichi'n ahon chi hi. "Lawmte zannitak a i thilhih bangbang uh om nawnleh ud huailai na e maw... Sum lah tam, nop lah nuamsi..." chi'n ahong nui hakhak hi. Alawmte khat in ana dawng a, "Huaizaw hina a, kenzaw naupangte kha hehpih hiveng aw, amau bangmah lohlouh di zaw hiven..." ahonchi hi. Alawmten ana chiamnuih khum ua, "Tuangpu piangthak! Tuangpu piangthak!" chi'n anuihsan lualua uhi.
Kenleng ka theih utpen thu gen uh ahih dan ka theipah a, pilvang zawsem in athugen uh ka na ngaikhia hi. Ahong pauzom zel ua, alak ua khat in, "Poina om mahmah kei, boss pa deihdan tak in i sem ua tun sum tampi toh i om keìhkaih uh hilou maw... Tunitak chu ROCK di himai... " chi'n ahong nuikhe lualua uhi. Kenbel ka nna hong kipia pen gintaklouh lam daih a hong baihlam mahmah ding ahih dan thei in, thuchian theisem nuam in amau kiang ka va zuan phei a, akiang uh ka tun in, "Lawmte nuamsa na uchia, keilah keikia in kuamah lawm di le neizou lou in ka om a .... Kongbel thei diam?" chi'n ka va kingen hi. Amau leng honna AW pah ua, ken leng Whisky buk 3 order nawn in amau toh dawn khawm in ka hong houlim panta uhi.
Amasa in ka min ka gen masa a, sepna neilou leh mawk om maimai sep ding deih a zong lellel ka hihdan ka gen hi. Amau leng aminte uh hon hilh pah ua, banglam sep lunglut ka hi hiam ? Chih ahon dong uhi. Ken leng thumu kisa in a om bangbang, bang nna hitaleh ka gilvah nang leh, nuamtak a khosak nang ahih nak leh seplit neilou ka hih dan ka gen pah hi. Amau leng hon gingta uh ahi ding a, amau kiang ka ding nak leh a boss pa uh kiang ah gen ding ahihdan uh leh ziangchiang a hiaimun mah ah kimu nawn ding chi'n ahon hilh uhi. Ken leng poilou ahihdan leh kei bangbang a bangkim sem ut ka lawmte khat om a, amah toh leng kimu ding chi in ka kikhen phot uhi.
Gintaksang a ka thilsui hong baihlam zaw ding a gintakna ka neihziak in ka kipak mahmah hi. Alehlam ah bel lau huai mahmah ding a, ka hihna atheih nini uh ka hinna a beini himai ding ahihman in pilvan mahmah ngai ding hi. Ka thiltup pen ka sappa'n hon awi keita leh kei a ding a leng buai huai mahmah ding ahihman in ka lung a buai mahmah a, himahleh a thu suikhiak pen kei a ding chauh hilou a, kou department a ding a poimoh mahmah ahih man in hon nialngam ding in bel ka um kei hi.
Azing in Khualpu kiang ah ka thiltuah teng ban ah ka tup dan teng ka hilh pah hi. Aman bel alauthawng sim mahmah hi. Himahleh ka hong kikup sawt deuh uh leh aman leng hon amen khong a, huchi'n SP pa mu din a office ka vazuan uhi.
SP kiang ka tun un amah toh ka thiltuah teng ban ah ka tup dan teng ka hilh suk pah hi. Ka tupdan bel amau lak ah under cover dan a om ding in, tualthahna ziak leh anasep dangte uh suisuah ding chih ahi hi. Ka sap pan hon lauh pih mahmah a, himahleh migiloute nasepdan theihkhiakna di lampi hoihpen ahih zel man in ahon kham ngam kei zel hi. Hun sawt tak ka kihou nung un kou sung natawm ah kou mi thum teng chih louh athei a om louh ding chih ahi a, kei bel Commando Special Course Training zouphet Lamka Police Station ah join pan ka hih ziak in kuamah ahon thei leng a om naikei uhi. Khualpu ahih leh Lamka mi mah ahihman in keichauh kuan mai ding in ka thupuk thak ua, Khualpu in bel angeina bang a nnate ana semtou ding in ka thupuk thakthak uhi.
Huchi'n SP in DGP ahoupih a thu omdan teng ahilh pah hi. Aman leng ka thupukna uh hon pompih pah a, Police Department sung a kei tungtang chiamtehna om bangkim sel vek in tun bel aguk a sem khat ka hong suak ta hi.
Kana ding kei leh kei kiguan himahleh ka ngaihtuah chiang in ka lin mahmah mai hi. Ahia lah ka gam a dia ka hinna chiam khinta ka hihman in nungtolh bel ka sawm kei himhim hi. Ka ma ah hondal thei thil tampi om mah leh, Phualvate ki it bang a khat in a dang khat a dia a hinna apiak ngam bang khop a ka gam ka lei ah itna nei ka hihman in, ka ma ah bangteng ahong tung zong in, Sihna in honna vaidawn ding himahleh. Ka gam a ding a kal ka suan khiak pen khutchin vom chia lel leng nungtolh ka sawm nawn kei himhim hi.
Nitak ahong hihtak in Lennuam Bar ka manoh pah a, ka lawmthak dingte leng ana kimkhinta uh ahih man in amau kiang ka vanaih pah hi. Zan nitak a ka min Ginpu chi a ka gen ahihman in amau leng Ginpu chih ngen in ahon sam uhi. Amau lak a boss pen hingei ding a ka gintak khat in ka kiang ah, "ahihleh Ginpu, bang nna ahia na sepnop pen?" chi'n ahon dong hi. Ken leng, "ka tung a sep ding kipia om peuhmah ka pu kipahna ding ahihnak leh sep lit ka neikei." chi'n ka dawng thuk sam hi. Aman leng "Huchi ahihleh, hoih e ! Ka boss pa uh natungtang ka houlim pih khinta a, amah leng nang toh kimuh alunglut lam ahi." chi'n a hon dawng a, huchi'n boss pa mu ding in ka paita uhi.
Bangtan hiam ka tainung un VIP lane ah ahon lut pih ua, inn lian pha mahmah leh thupi mahmah khat kong ah ahon khawlpih uhi. Ka kum khia ua, innsung lam ah lut ding a thupiaka ka om man in innsung lam zuan in kalbi ah ka kahtou hi. Kongkhak ka tun in kong khak tung ah name plate kitak kamuh in thak khat in hon kiguihsak zot a, lamdangsa tak in ka khawl dedu kha zozen hi. Tua name plate ah hiaibang in a kigelh hi. "Shri Tongpu Minister Home & Power, Govt. of Zogam."
Mikhat in ka tong ah hong phu zauh in innsung ah lut ding in ahon hilh hi. Keileng kibawlthak in huchi'n innsung ka lut ta hi. Innsung ka lut tak in mi 4 tutna ah tu in ana houlim uhi. Minister pu amel ka theihsa ahi a, ka lut phet in mikhat in amah ava hou gu zauh a, huchi'n a khut in ama kianglam zuan ding in ahon sam hi.
Akiang ka tun tak in, ka min leh ka hinkhua paisate ahon dong masa hi. Kenleng ka min Ginpu ahi chi'n ka min diklou ka gen a, ban ah ka nu-le-pate om nawnlou leh keivuak a inn-le-lou neilou a khosa ka hihdan ka gen hi.
Huchi'n boss pan "banglam siam deuh na nei a?" Chi'n ahon dong hi. Ken bel "siamluat neilou lah a om bangbang sem thei." chi'n ka dawang thuk tei hi. Huchi'n mikhat sam in amah zui ding in ahon hilh hi. Tua mipan room liantak khat ah ahon lut pih a, tua room laizang tak ah boxing ring a om hi. Boss pan mitoh hon kisualsak dek eive ka chi lungsim a, huchi'n ka puante ahon kheksak ua, boxing glove hon bun sak ua, boxing ring sungah ahon pai pih uhi.
Ka dak vel a, kuatoh hon kisusak dek uh ahidia aw ? Chi a ka ngaihtuah laitak in mivomte salian mahmah khat ka ang ah ahong ding lenlun a, simmoh chitak in ahon en lelu hi. Huchi'n boss pa hong pai in ka kiang ah, "Na ang a dingpa nikum a UFC World Champion ahi. Amah toh round 5 na kisual ding ua, tua hun sung a kisurrender lou a na pansuak zoh leh ka nuai ah na sem thei ding a, na kisurrender ngeingei leh na hinna in athuak ding." chi'n ahon hilh hi. Ken bel Special Commando Training ah kisualdan bangkim ka zil siamsa ahih manin ka langpa ka huphulh vak kei hi.
Huchi'n ka hong kibei pah fitfit ua, ahon thazoh tuan kei. Ama sang a kinzaw a gamtang in ka bei suk pah fitfit hi. Kei sual dia hong tai phei pen, kei ana kihem in a dip lak tak ka na pek sak a, naa sa a kun a omlai pen kai ding tou in kitawm kawm a kilep in a khabe ah ka pek tou a, kithal puk suk in tang nawn lou in a lum beiibui hi. Huchi'n vualzou a puan in ka om a, direct membership hihna certificate ka ngah hi.
Ka boss uh Minister Tongpu pen mite theih a diktat leh Pathian lau bang in om mahleh, aguk tak in Golden Triangle kimvel a khamtheih a sumdawngte enkoltu lianpen ahi hi. Apawl min ding in "The Swan" chih phuak a, amau tua khamtheih a sumdawngte enkai in tuate apan in sum khonkhawm zel uhi. Amau theihlouh a gamtangte hehpihna bei in soisa ua, miteng lauh ahi uhi. Pawl tuamtuam amau kalh a gamtangte hih chimit pahpah ua, hat mahmah ahihman un leh aheutupa pen uh politician zahtak huaitak khat ahih man in kuamah in amau kalh in bangmah sem ngamlou uhi.
Keileng amau lak ah tel ka hihtak man in ka boss pa uh thu ka zuih angai a, amah suklungkim pen kei a ding a ka thilsuina ah mavanna hong hiding in ka gingta tinten hi. Ka pu chih dandan a gamtang ka hihman in ahon muang mahmah a, ama personal guard ding in ahon guangtou pah hi.
Bosspa bel ofis a kai chiang in guard tuam nei a, himahleh athilguk sainate ah kei leh midang thum in ka guard zel uhi. Ama ofis kai sungteng hun awl kinei den ahihman in aguk in a innsung omdan leh athuguk koih khawm namunte zong in innsung innpua ah ka vak vevel sek hi. Lawmte muh in bel lauhuai thil omkha a omhiam chih khawng enkhe dan in ka omzel a, kuamah in muanmoh et in ahon enkei vanglak uhi.
Nikhat huchia ka vakvel lai in room khat ah piano tum a numei siamtak a lasa hiauhiau ging ka za hi. Ken leng kua himahmah dia aw tua siamtak a lasa chin awl in ka vanaihphei hi. Kongkhak neukhah kihong ahihman in ken leng ka mit kita zahzah guang zen a ka et leh....... Kare! Ka lungphu bang ahong kin zozen a, lamdang satak in tang theilou phial in ka om kha nilouh hi. Mu nawn ding a ka kigintak louh, a tongsuah za ding a leng gintakna ka neihlouh a, mangngilh mai tum a sunteng, zanteng a ka sual hang a ka mangngilh zohlou ETLAWM ana himaimah hi.
Lamdang ka sa mahmah mai a, bang chidan a hiaimun ah omthei ahi a ? Boss pa tanu ahi diam ? Ka lung abuai mahmah hi. Boss pa tanu hileh kei bang leltak a ding a phulouh hiding hia, Boss pa'n lah keibang leltak a ding a atanu hawmthoh phal mawklou dia... Chi'n ka ngaihtuahna a paisau man mahmah hi. Himahleh ETLAWM ka muh nawn theih bel ka lung akim mahmah zel a, lehlam ah ka kipak mahmah hi.
Thawm neikha zek ka hi ding a, ka ngaihtuahna apat ka hong halh khiaktak in lasa ging adaita a, ETLAWM ngeileng ka mu ta kei hi. Kei leng awl a dingkhia in paikhe ding a kisa a ka kihei laitak in ka lu ahong puaksuk bok a, ana bel ahikei bang hiam a khet a om chu ka hi peuhmah hi. Lamdang sakawm tak a ka dak touh leh ka ma ah hehmel deuhtak in ETLAWM in honna en gegu a, ka lu puakbok ka chih pen leng a laibu tawi a a hon khet ana hihi.
Kei leng kisuanglah lua in ngaihdam ka ngen molhmolh mai a, nervous lua ka hihman in bang teng genkhia ka hi a chih ka theikei. Ka biang ah akhut a ahon bet nawn na in gen ding bei in a hon koih top hi. Paulou hial in a ang ah, goh ding belam apu' ang ah adaih dide bang in ka kun diudiau a, amah leng heh mahmah sam mahleh ka omdan ahon muhtak in hehpihna hon neisam ahi ding a kamdam tak in a hon houpih hi.
Banghang a hiaimun ah omkha leh hong paikha ka hi hiam chih a hon dong a, ken leng Minister pu guard a om ka hih dan leh siamtak a a lasak ka zak ziak a mu ut a va enkha mah ka hihdan ka gen hi. Amel en ut mahmah mah leng, amai ka en ngamkei, ka kun den a, aman leng ka omdan teng hon mu ahi ding a nemtak in, "Kei mite'n Kimte chi'n a hon sam uh, u nang bangchi'n a hon sam ua ?" chi'n a hon houpih hi. Kenleng ka min Ginpu ahih dan genkawm a awl a ka ettouh leh, nuikawm hiuhiau in ngaihbang tak in a honna en a, ka zum tha a suak deuhdeuh a lah, amel nuihmai ka muh in ka lungtang kipahna in a puak zak dek phial hi.
Huchi'n hun awl a neihteng in Kimte toh ka kithuah zel ua, lapeuh sakhawm in nuamtak in hun ka zang zel uhi. Ka itna thu genkei mahleng ka omdan leh heivel dante ah kilangkhia ahihman in Kimte in a thei mahmah a, amanle genkhe keimah leh a hon thuah dan in bel ngaihnatna riau khat hon nei hiding in ka gingta tinten hi. Himahleh, alehlam khat ah ka ngaihtuah chiang in kei bang leltak hon ngai ding in ka um theikei zel a, lawm bang a hon thuah maimai hiding hitah e... Chin kei mah ka kipesia khasek hi.
Nikhat a room ah a hon sam a, a kiang ah hon tusak in piano tumkawm in "Ngaih namel etlawm, maimit suanchim keiveng..." chihla siamtak in a hon awi ngiahngiah a, huai kawm in hon melh cheuhcheuh in a hon nuihsan hiuhiau zel hi. Nuam ka sa mahmah mai a, a lasak pen kei a hon sak khum himai leh aw... Chi'n ka ngaihtuah vungvung hi. Huchih laitak in awl in ka bil bul ah, "U Ginpu, hih simlei tung ah, nangkan a hoih tangdang omken chia..." hon chiphei siausiau a, gingta lousim lah kipak mahmah hemhom kawm in ken leng, "Tak sinthu maw?" ka chikhe numnum sam hi. Tua tak in aman leng ka mittak hon en kilkel in aw nemtak in, "U Ginpu aw, tak simthu mah hi, numeisia lel himahleng, kon muhtung a kipan in kon na vei mahmah a, chik leh mel kimu nawn ding hiam ? Chih theilou in hun tengin Pathian kiang ah namel muh ut in ka na thumthum hi...."
Tun nang toh kimu a, kithuah thei a ka om taak man in ka lungdam mahmah hi. Ka om dan apan in zong kong deih mahmah chih thei ding in hon um ing. Aih hang nang mabang hong panlou na hih chiang in, zum-le-zah khuallou in itna simthu hong lel ing. Hong sang in maw..." chi'n kisuanlah mel tak in a hon gen hi. Tua aw khum ka zak ut mahmah, chik mah a za dinga ka kinep louh ka zak tak in kipahna in ka dim hi. Ka kipah luatna lam in bangmah a dawng lou in ka dai nilouh kha zozen hi. Bangmah genlou a ka daih dide tak in Kimte in ka kiang ah, "U Gin, bangchi na hiam? Nang, kei hong ngailou maw ? Nu aw kei dahlua ing. Ken hong ngailua... Hong hehpih samlou ding maw , U Gin..." chi'n khasetak in ka mai natawm en ngamlou in nuailam nga a kun in a mittui hong luang zungzung hi.
Ka itpen huihmut ding natawm ka phallouh, kei ngai a ka ma a kap ka muh in awl a alu phawng tou in a kiang ah, "Kimte, kap keive... Ken zong hong ngailua ing. Hizong kei pen mi naran, na pa vengtu maimai ka hihman in nang a ding a chin kisalou lua ka hihman a hong gen ngamlou ka hizaw hi. Ken zong hong ngailua ing. Aih hang tunung chiang a nang hon khase saktu leh na pa hih thangpaitu maimai ka hih khak ding lau lua ing." chi'n ka dawng hi. Tuatak in aman ka kiang ah, "U Ginpu aw, itna in milian-mineu khenlou hi. Ken nang ka pasal ding a kon tel na hi a, mihing dai kuaman a kaih zohlouh bang in kon itna zong kuamah in nang apan lakhe zoulou ding hi. PHUALVA BANG ITNA toh hong it hi ing U Ginpu aw." chi'n ka ngawng ah hon kaw in amuk nem ngingei kuamah tawp khak nailouh in ka muk ah hon tawp a, ken leng deihthoh tak in ka na tawp vengveng hi.
Hunte khawllou in paizel a, tua dungzuiin Kimte toh ka ki itna uh leng hunteng in a khang deuhdeuh hi. Kuamah theihlouh kal a kimu zel in kou khomkhom in nuam ka sathei mahmah uhi.
Nikhat boss pa omlouh kal in a file koih khawmnate ka na etsak leh, thu kiselgu tamtak, dan in a phallouh nasep aneihte tamtak ka vamu hi. Poimoh ka sak teng lim ka la zel a, aban a file omte en ding a ka kisak laitak in kongkhak a hong ging a, kei leng kintak a file te koihlut in ka lutna mun mah ah pawt nawn in ka na engu hi. Boss pa leh milian mahmah khat zahtak huai melpu mahmah khat ahi uhi. A kihouna uh ka ngaigu a, a gen dan un a sum dawnna uh sukbuai sawm a kipei om ana hi a. Pan lakpah kei leh a sum sinna uh buai ding ahihdan gen in a kihoulim uhi. A thugen uh ngai utlai mah leng. Dutyte'n hon mukha thei uh ahihman in awl in ka kihep khiaksan zawta hi. Ka thilmuh teng ka SP pa uh ka hilh pah hi. Aman leng pilvang tak a a dang zon behlai a, amah mat theihna ding kichiantak zong lai ding in ahon ngen hi.
Bangtan hiam nung in boss pa'n mikhat a hong samsak a, kei leng kintak in a room ah ka valut pah hi. A room ka va ut tak in boss pa'n thu omdan tamlou a hon hilh a, Golden Triangle lam ah a pawlte sawllut ding ahihdan leh, tua hun sungteng amah muanmoh a kai louhna ding a holiday zang dia zinkhiak sawm ahihdan hon hilh hi. A omlouh sung teng kei mah ngei a innsung kei na etkol ding a muang mahmah a hon koih ahihdan a hon hilh hi.
Ka tup dan a thil paitou zel ahihman in ka kipak mahmah a, himahleh boss pa ang ah poisa mahmah dan in ka om khemkhem hi. A kiang ah, buaina a tuahna tung ah poisa petmah dan in ka gen a, a omlouh sungteng hoihtak a ia nn a na enkai ding ka hihdan ka hilh pah hi.
Room apan ka pawt khiak tak in ka kipak mahmah a, inn sung teng ah ka ut bang a che thei ding, ka itpen Kimte toh kuamah mitmei venglou a hun zangkhawm thei ding chih ka ngaihtuah chiang in kipaklua in ka kikou khe kha dek zozen hi. Himahleh, ka kipahna in sawt a daih kei, ka thiltup ahi bang in a paitheita kei hi. Boss pa amah chauh a zin ding ka sak leh a zinkhiak ni in a zi leh Kimte a tonpih maimah hi. Ka plan kimkhat dik mahleh, akim khat fail ahihman in gen ding theilou in ka vandak heihawi maimah hi.
Huchi'n Boss pa omlouh sung hunlem la in innsung teng ka pheklek vek hi. Atawp in file khat ka et leh a sung ah hiai bang kigelh ka mu hi.
"7th January 2134 AD ni in Mr. Pumgin (54) s/o Tuankhen of Khominthang in, pawlpi dan kalh a, siah apiak utlouh ziak leh, pawlpi theihlouh a pawldang toh kizom a khamtheih zuakna ah pan alak ziakin atungthu sawttak ngaihtuah ahihnung in Capital Punishment piak ding a lemsak ahi." chin kigelh hi. Kintak in xerox ka bawl mengmeng a, thuguk gelhna tuamtuam tampi petmah toh kintak in ka SP pa uh ka khaksuk ngal hi.
Tun bel ka thiltup khat zou phot ka suakta a, himahleh bang chi'n boss pa theih louh in ka paikhe dia ? Hon theih hunhun bel kei a ding a sihni ahi mai. Amah mat khiak hita mawng lele a pawlpi pen hat lotel mahmah ahihman in mawk a suk chimit vual ahikei hi. Himahleh, huaipen kei buai nang ahikei a, boss pa apan bang chi'n ka kihumbit dia? Ka it Kimte bang chih leng ka tangthei dia? Chih ahita hi.
Nikhat Kimte in a hon phone a, sawt khoptak itna thute kikum a nuamsa tak a ka kihou laitak un, apa'n Kimte phone laksuh in hiai bang a hon genkhum hi. "Mr.LIANPU @ GINPU ASI, 2NG BN. ZOGAM POLICE FORCE, nang kei leh ka nasep na suse ding a hong lut in bang ding a ka tanu natawm hon laksak sawm na hia ? Tuni mahmah in mat na hi ding a, ka hong tun nawn ma ngei in na lu tan ahi ding." chi'n phone a hon koih khum hi.
Ken leng theih khiak a om ka hih tak man in ka dinmun lauhhuai dan thei in kin tak a kihep khiak mai ka hon sawm hi. Ka it Kimte lah apa'n kei a ding a aphal ngaihna om nawnlou ahihman in ka lung a kham mahmah mai hi. Amah tellou a damsung hinkhua zat mai ding ka ngaingam mahmah kei hi. Amah tangzou lou ding thouthou tai khiakse louh a kimat sak a sih mai ka ut zaw hi. Himahleh, kei omkei leng midang in a ut dandan ua bawl mai ding uhia, mi khut thak nulna lel ding in ka it Kimte ka phalkei, haksa mahleh taikhiak phot a, awl a amah Kimte va guk khiak thak zawk mai ding chi'n taikhe ding in ka hong kisa hi.
Ka kim ka vel teng pilvangtak a enkawm in kal ka hon suan khia hi. Huchih lai in gari ahong ging a, inn sawng nuailam ka etsuk leh thau tawi mibangzah hiam gari apan kumkhia in inn sunglam manoh in a hong taiphei uhi. Keileng kintak a tai in, ka thau koih khawmna pindan uah ka valut a, M-18 leh 9mm ban ah atang tamkhop tak la in muh masak kap ding in ka na ki ging khol hi.
Awl awl in inn nunglam zuan in ka kikhin phei zel a, innsawng nihna ah om ka hih man in pilvangtak in kalbi ah ka kumsuk hi. Ka muh masak sak ka kaplum tawmtawm zel a, maban ka sawn thei zel hi. Ka kalbi zuih kipatna bul pen innsung liantak khat ana hi a, huaimun ah tangpang om ngei ding ua gingta in pilvangtak in ka en kimvel hi. Kuamah ka muh louh man in awl in kongkhak lam ka zuan phei hi. Huchih laitak in, ka nunglam apan thau ahong ging a, ka bil gei lak ahong sa phei hehu hi. Keileng kintak akilep phei in, kalbi bul ah ka kibu hi.
Thau ging a hong dai a, ka dak touh leh khat in hon kap nawn ahih man in ka lu ka khut a sel kawm in sual ah ka bok hi. Hon naih deuhdeuh tak un, hichi'n omom mawk leng nuamtak a hon kap lum thei ding uh ahih dan ka ngaihtuah khe guih hi. Huchi'n amau gintak louh na lampang pen ah kitholh phei in amaute ka M-18 tawi pen in ka hawt phei a, avek un ka kaplum theipah hi.
Kintak a kongkhak hong in huansung ah ka tai lut hi. Huan sung alian sim mahmah mai a, kintak in tha neih teng in ka tai a, ka nung a hon delhte kap kawm zel in dai lam ka manoh hi. Inn nunglam pen sik len maimai a ki um ahihman in sik len ah kaltou in huchi'n huang pawlam ka tung thei hi. Sihna apan ka suahtak theihman in hon suaktasak tu Pa kiang ah kipahthu gen in thumna ka nei hi. Ka thum zoh in SP pa ka phone a, thil paidan teng leh ka omna mun ka hilh hi. Huchi'n SP pa ngei makaih in a hong pi ua, damtak in Police Station ka tung nawnta hi.
Huchi'n DGP kiang ah report bangkim ka pia a, ka undercover hihna lakhia in ngeina bang in service ka zom nawnta hi. Minister Tongpu in a hon theihkhiak ziak bang ziak hihiam chih lamdang ka sa mahmah hi. A hang dia ka gintakna bel, a organisation sukbei na ding in Parliament in thu Pass uh a, tuading a Zogam Army te Golden Triangle lam ah sawl khia hi. Hiaithu hong piankhiak phut mawk pen Minister Tongpu in kei report ziak ahih dan theikhia ahihman in kei pen man ding leh that ding in a sepaihte hon sawl ana hi hi.
Hunte khawllou in pailiam zel a, ka lungzuanna kibehlap dingin phavang hun nuamtak a hong tung nawnta hi. Etna lamlam khaw lenmui kaiten lungzuan behlap mahmah hi. Ka it Kimte toh nuamtak a kholhkhawm lai nite thelbang hong thou zel a, Kimte ngailua ka hihman in lakmai luankhi'n zel hi.
Ka mintak na tawm theilou ahih manin a hon theihkhiak hunchiang in kei khem zohsa a om chi a hon hehsan ding in ka gingta mawk hi. Ka dinmun diktak thei ding a, apa matsawm a pan ka lak dante a hon theih hun chiang in a hon itna pen huatna a hong suah maimah khak ding ka lau mahmah hi.
Huchia lung buaitak a kingaihtuah ngetngut a ka omlai in ka phone a hong ging a, ka et leh number theih ngeilouh khat ana hi a, companyte a hinteh chin ngaihsak lou in ka sakhau ah ka guangsuk nawn hi. Sawtlou nung in a hong ging thak nawn a, pick up kawm in "Hello, kua na hia? Bang chisim ?" ka ch leh tua hon houpih pen in aw nemtak in leh ngaihbang tak kawm in, "U Lianpu, na it Kimte hing ei... Hon mangnglhta na maw ? Ken zaw hunteng in nang kon itna alian deuhdeuh hi." chi'n a hon dawng hi. Ken leng ka itpen aw ka zaktak in kisuanglah mahmah kawm in number thak ahih ziak a thei pahlou ka hihdan gen in ngaihdam ka ngen a, bang chidan a ka mintak thei hihiam? Chih ka dong hi. Aman a pate kihouna apan a ka mintak thei ahih dan ahon hilh a, ka dinmun lau huai ahihdan leh apate'n thah dia hon zong uh ahihdan gen in pilvang ding in ahon hilh hi. Huaitak in ken leng gen ut tampi om ahihman in aman theih ding aleh, Zo-awi Cafe ah kimuh ut ka hih dan ka hilh hi. Aman leng zingchiang sun dak 10 aman ding ahihdan hon hilh hi. Huchi'n kimuh hun ding bikhiah in mangpha kikhak in a phone akoihta hi.
Azing in Zo-awi cafe ka zuanpah a, room kil khat kuamah hon sukbuailouh na ding uh tel in ka it Kimte hong pai ding ka na ngak hi. Amah leng hunchiam geih in a hong tung a, kawi a tawp tonton ut mah leng kidek teitei in "Dam maw?" chi'n ka chibai zawta hi. Nek ding tuamtuam order in, huchi'n kihouna kon panta uhi.
Kimte kiang ah, "Kimte, kon ngai petmah mai. Nang tellou a khosak khak ding ka ngaihtuah chiang in, liang phel satkhiak bang tuk in naa ka sa hi. Ahia, na zuapa dougal ka suah tak man in nang na tawm in hon pampaih thei na hihman in poi ka sa hi. Kimte, bang ka chita dia?" chi'n ka it sakmel na tawm en ngamlou in nuailam ka en a, ka mittui khaam vuallouh in a hong tak suk keuhkeuh hi. Kimte in a khut nemtak toh ka khabe ah hon domtou in, "U Lianpu aw, bangmah ah kilungkham sak ken, na nasep ka thei a, nasep ding mah sem na hihman in gam-le-nam a ding na kipiak zohna, lauhuaina natawm na gam itna ziak a namaituah ngamna ah thupi ka hon sa petmah hi. Ka pa dougal na hih zong in kei a ding a khovel a ka it penpen na hihi. Gam-le-nam a ding a ginomtak a na panna, lauhuai chiteng hangsan tak a na palsuak ngam bang in, kei na it Kimte a ding in ginom tak leh hangsan tak in hong pang laive maw?" chi'n nemtak in a hon gen khia hi.
Tuabang thu ka itpen apan ka zaktak in ka kipak mahmah hi. Ken leng bang teng haksatna hong tung mahleh ka itpen ading a doutou zel ding leh, ginomtak a Vaphual nupa ki-ittak te hinna natawm kipe phalte bang a ka hinna natawm itlou a pang ding ka hihdan ka hilh hi. Kipak mahmah in a hon kawiphei a, "U Lian, ithu chiamte lenkip in, haksa bang teng hong tung mahleh ginomtak in pang ni maw. Kei nang a ka hi a, nang leng kei a, na hi . I kal sihna lou ngal bang mah in hon khen kei hen." chi'n ka muk ah a hon tawp a, ken leng ittak a ana tawp thuk in nuamtak in hunte ka hon zangtou uhi.
Hunte hong paizel in damtak in ka duty ka sunzom theizel a, Kimte toh leng ka ki itna uh alian semsem hi. Hun teng a kimu theilou himahle ung phone tungtawn in ka kithuzak thei zel uhi. Ka kal uh leng hoihtou zel in, daltu tammah leh aguk in khat veivei ka kimu thei zel uhi.
Nikhat Zo-awi cafe ah kimu khin kipaktak a ka pawt khiak laitak un thau a hong ging a, kintak in Kimte leilak ah ka sawn paisuk a kei ngei leng ka liangtung zek ah thautang hong lengleng in hon khakei deuh a, ka nung a glass a kibawl baang a kha tam zoih hi. Kintak in Kimte khut ah man in inn kil khat ah ka taipih a, amah lah laulua in lin petmah in aling maimah hi.
Taxi khat sam in Kimte ka tuan pih a, mun thoveng khat ah kei ka kum a, amah a inntan uh ka khasak hi. Kei leng gari dang man in Police Station lam zuan in ka tai vengveng hi. Ka ngaihtuah a, bang ziak a kap a om ka hi dia aw ? Kuate ahi dia hon thah sawmte ? Ka ngaihtuah nilouh a lah ka theikhe zou kei hi.
Nitak in Kimte ka phone leh a phone switch off a kichi a, ka ngaihpha thei nawnkei hi. Tusun a thiltung pen The Swan te hi ngeingei ding in ka muangmoh tinten hi. Minister Tongpu in a tanu gamtatna teng ana thei a, ka kihou zelzelte uh leh ka kimuh zelzelte uh ana thei a, a naupangte hon sawl hiding hitah e ! Ka chi lungsim hi. Poi ka sa mahmah mai a, ka itpen toh kithuzakna lah tanta bang ka loh ta dia le ? Ka lung a leng mahmah mai a, kha lah vak hoih semsem ahih man in Kimte ka ngaihna a hong uang semsem hi. Nuamtak leh kipaktak a ka hun zatkhawm lainite uh a hong lang deuhdeuh mai a, omzou nawnlou in lungzuan noptuam khak leh chi'n champagne thawl khat lakhia in ka dawn suk ek tei hi. Ka gawl ah a hong lutsuk a ka sung a hong sa hiaihiai a, ka kham deuh leh nuamtuam ding ka sak leh Kimte ngen ka lungsim ah hong lang in kuamah theih pihlouh in ka it ngailua in ka kap phemphom thahah hi.
Huchia lungzuang tak a ka tut ngiungiau lai in ka phone a hong ging a ka lak leh Kimte ana hi a, a aw ka zak leh kipaklua in ka halh zot zozen hi. Himahleh hon thugen in ka lung a liap sak mahmah mai a, sawt tak kiheh nem tuah theiding omtuan lou in ka kikah khum ngoihngoih uhi.
Kimte in hichi'n a hon chi hi, "U Lian, ka pa'n i omdan leh i ki it dan a hon thei hi. Tusun a hong kapte le ka pa'n a sawl ahi. Tun ka pa'n gamdangmi ka theih louh khat toh hon gawm sawm ahi, U Lian hehpihtak in hong gukhe maive maw... Kei ka pawt khiak ding phal ahinawn kei hehpihtakin hong gukhe mai in." chi'n a hon ngen ngutngut hi. Ka itpen midang toh a kiten ding uh kaphal thei mahmah kei, lah bang ka loh ta dia le ? A inn uah va lut mawk thei ka hi kei... Amah lah kongpua akaan khiak ding natawm phal hinawn lou... Aw vangsia hinang e... Bang kalawh tadia le ???
Ka lungsim a paisau petmah mai a, ka dai dedu kha zozen hi. Paulou a ka omtak in Kimte patau in "U Lian bangchi e ? Hon dawng ve nang hong lakhe lou ding maw ? Kei midang a dia hon phal na hi hiam ? Phualva bang chiampel kei ni non chih lainite ngilhta na hiam ?" honchi hi. Ken leng, "Ka it Kimte aw, kon it kon ngaih nathei hi. Nang tellou a hinkhua zat ding ka ngaihsut chiangin hin ka ngap mahmah kei hi. Ahia napa galkap te'n thuah nih thuahthum a hon veng uh ahih chiang in bang ka loh ta dia ? Na pa thu naman mai hoih zaw maidiam ka it Kimte ?" chi'n khoisa huthut kawm in ka dawng hi.
Amah leng lungbuai gawp ahi ding a, "A chih leh U Lian, bangloh ding chi na maw ? Hon taihsan sawm na hi hiam ? Nang toh ka kiten khak keileh zaw kei si mai ding hi ing. Nang tellou a nuntak ding pen hi sathei keng. Hong gukhe ding maw ? Kei ana si mai ding ?" chi'n a hon dong hi. Dawn ahaksa ngei mai, ka it bang din midang kawi din ka phal thei dia ? Phallou ding. Himahleh, kei a ahih theihna ding a lampi teng khak tan a omta ahihman in ka loh theih bangmah a om tuankei hi. Huchi kawmkawm inleng kei ziak a ahinna ataan ding ka phal tuankei hi. Aman hon paisan leh, kei leng ka hinzoh ka kigingta kei hi.
Huchi'n Kimte kiang ah, "Ka it Kimte aw, kei ngeileng nang tellou in ka hing zou tuankei ding. I mailam hun ding Pathian lou ngal athei omlou ahihman in A ang ah ki tulut peuhmah phot ni. Aman i haksatnate thei a, hon dawn zangkhai dia mansa a om gige ahi aw." chih teng kag en khethei hamham hi. Huaitak in Kimte in, "U Lian na chih dandan aw, ken zaw kon ngailua, U LIAN KON NGAILUA..." hon chi a, ken leng "Kimte kenle kon ngai petmah. " chi'n sawtkuam tak bang mah dang genthei nawnlou in ka kikahkhum uhi. Atawp in Kimte kiang ah, "Itluat hichi'n omom lehang hoih lou ding ahi. Zan asawt tak toh imu phot maini maw... Thum peuh lehang, maban hong hoih na ding ahi aw..."ka chih leh aman leng, "Awle U Lian hon muang ka hi aw... Hunsak phot maini kon ngailua mangpha , imutlim aw U Lian." a hon chi a, ken leng, "Awle Kimte, nangle mangpha hoihtak leh imut lim aw... Kenle kon ngailua..."Chi'n ka phone ka koih hi.
Hunte hong paizel in Khrismas gim bang a hong namsim hiauhiauta a, lungzuang theite a ding in lenmui kai zilzial te'n lungzuan a thousak thei mahmah hi. Kou leng Khualpu toh ka nna uh zohsiang meng ut in Minister Tongpu mat theihna ding ngaihtuah in ka buaithei petmah uhi. Huchihlai in, Pumgin zi damdawi inn ah admit a ompen in leng anat na leh aliamna thuak zoulou in mual hon liamsan nawn hi.
Huaitakin, mipi hong sousang nawn in tualthattu kintak a matkhiak hihen chi'n lampi zuihna nei uhi. Huchi'n kou leng kintak a gamtang in Tongpute lawmta teng Lennuam Bar a hunnuam zang a omlai ka vamankhia ua, amaute kipuanna apan in Minister Tongpu tung ah Arrest Warrant bawl khum in hunlem masa pen ah mat ding in tua hunlem ngak in ka omta uhi.
Zogam Army te'n leng Golden Triangle lam ah The Swan organisationte doutou zel in amunpi uh luhkhiak sawm in kisa lellel uhi. Huchih laitak in nikhat news paper ka sim leh lung hon phawng mahmah khat ka simkha hi. Tua thu bel hiai ahi.
"ka tanu Kimte 18th Dec. 2134 ni a pasal nei ding khakkhiakna ka inn mun ah 12th Dec. 2134 AD 10 am in neih ka sawm a, hiaihun hong uap chiat ding in ngaina tute na vek un ka hon chial uhi~Minister Tongpu & Family. "
Ka kiguih zozen a, lamdang sa in naa ka sa mahmah hi. Aw ka it Kimte, midang ang ah na zal mai ding zaw... Pamlua chia maw ka it. Bang kalawh ta dia ? Ka mittui khamvual louh in a hong tak khia a, ka news sim natawm a kawt zou vek hi. Om ding dan theilou in ka omdan peuh ning kitelna in adim hi. A tawp in Kimte ka phone sawm leh switch off a kichi den hi. Tamveipi call thak mahleng dawnna angeimah ka za den hi. Aw ka itpen Kimte O ka zak ut-ut maizen toh . Ka O zak sunsun lah companyte pre-voice khumsa ana hileltak mai maw ? Ka it bang chi'n na om a ? Non ngaihtuah khasam hiam ? Chi'n kuamah phawk phaklouh in luankhi toh ka pum dim den hi.
A tawp in hikei a kikhakni ding ngeingei un ka lawmte toh ka vakuan ding a, Minister pu mat a kikhakna program pen sukbuai ding chi'n ka thupukta hi. Ka kansui sau deuh leh Kimte pasal ding vaivomte khat hi a, apa ahih leh sumdawng hausa mahmah khat ahihi. Vaite ahi chih ka theihtak in ka it Kimte namdangte a ding in ka phal thei mahmah kei a a kitenma ngei ua sukbuai teitei ding chih ngaihdan toh kintak a kisa in Police Station lam manawh in ka diang khia hi.
Huchi in ka plan teng SP pa ka hilh vek a, hon phal chiah kei mahleh, hiaibang a hunlem dang om non tuanlou ding ahihman in a tawp in lem a hon sakpih khong hi. Huchi'n Dec 12 zinglam dak 9 geih in kei leh Khualpu makaih in police personnel bangzah hiam toh Minister pa inn zuan in ka taikhia uhi. Ka tun un dak 10:30 apelta a, programme pan ut in ana chiau vengvung uhi. Mi atam mahmah mai a, kou leng gate dutyte police mah ahihman un haksa hetlou in gate ah ka lut thei uhi. Kei leh Khualpu civil dress a kivan ka hi ua, ka lawm dangte uh bel uniform kimtak toh innkong lam ah koih in thu ka piak hunhun a hong lut ngal thei ding in mansa in ka koih hi.
Dohsang tung ah ka it Kimte mel mualtak in a tu a, zon nei hileh kilawm tak in a hong dak giaugiau zel hi. Himahleh, a zon utpen mulou ahihman in akhitui nul zel in aguk in kapkap hi. Ka hehpih mahmah mai a, ama ut ziak a pasal nei hilou ahi chih a chiang mahmah hi. Ka kiang a te nangawn in leng ahehpih huai dan kia a gengen mai mah ua, zak haksa ka a mahmah mai, ka itpen midang chihphet louh namdang ang ah zaalmai ding chih ka ngaihtuah chiang in naa ka sa mahmah mai a, ka hehpih petmah hi. A khenchiang in gim mahmah leh lawkhe ut bang in a hong om zel a, ka ngaih apha thei naonkei. Apa thugen ding a a hong dintouh tak in ka pawlte hong lut ding a thu pia in dohsang tunglam Khualpu toh ka va naih ua, Kimte in hon muhtak in ngaihtak a, kikou in "U Lian, hong zekai na chia, hon ngaklah lua keive..." chi'n keilam manawh a hong taiphei tum in a hong dingtou hi. Himahleh, thahatna himhim nei nawnlou ahihman in a lawmnu ang ah apuksuk hi. Mipite'n lamdang a sa mahmah mai ua, a phun nuainuai phet uhi. Huchih lai tak in ken bel thil dangte ngaihsak lou in Minister Tongpu kiang ah, "Minister pu aw, i gamdan bang in, Pumginte innkuan thahna thu ah leh khamtheih thil a sumdawng a, poikhoihlou tampi na thahte hang in dan bang tak in ka hon man hi. " chi'n arrest warrant lak in a khut tegel ah sikkol ka bunsak a, ka heute kiang ah Police station lam zot pih ding in thu ka pia hi.
Kimte kiang lam ka vanaih phei a, a kam khawng ah si a hong pawt mawk a lamdang ka sa mahmah mai hi. It tak in ka ang ah ka pombelh a, a si hong pawtte ka hah siangsak hi. Khua a phawk nawn kei a, ambulance sam in kintak in mipi lungbuai mahmahte nusia in damdawi innlam ah ka paipih hi. Damdawi inn ka tun un doctor in theihtawp suah in panla mahleh, zekai gawp in ka it Kimte in thupina gam a hon zotsan hi. Naa ka sa petmah mai a atung ah bohkhum in gen ding theilou in ka kahkhum ek-ek a, amin sam in kikou kou mah leng hon dawng ding khatmah a om nawnta kei hi.
Doctor in hon sam a, a sihna ziak gu a nek ziak ahihdan a hon hilh hi. Kei hon it ziak a ahinna natawm pengam ka it Kimte luang a tawpna pen ding in ka va enthak a, amuk awl a tawpsak in abilbuk ah, "Ka it Kimte, thangvan gibang khen om nawnlouhna mun ah honna ngak in aw... Kei leng hong pai pahta ding ka hi. Tua ah gibang khenlou a laitual lengkhawm ding in. I tonchiam PHUALVA BANG CHIAMPELLOU DING chi a ITNA i kipiak tuah pen, leitung ah tangtun zoukei mahle hang,Thangvan ah tangtun ni maw... Kimuh kik mateng zalmangpha ka it Kimte aw hon ngailua ing." chi'n lungsim giktak toh damdawi in nusia in ka paikheta hi.
(Author's note: Minister Tongpu bel damsung suangkul tang ding a mohpaih a om in, Ngalngam taaninn ah a hun omlai teng zang ding in lutta hi. Lianpu pen Kimte sihnung ann le nelou tui natawm dawnlou in omden a, sawlou nung in a it Kimte kiang zuan ding in akha akhah ta hi. Paradise ah Kimte in ana dawn in khen nawnlou in nuamtak leh kipaktak in Pathian phat khawm in a omdenta uhi. )
BEITA
On 29-11-2012, Thursday, at 05:00pm
© Siamsinna leh Vakiangbu
On November 22 at 4:37pm, Thursday
12th January 2134 AD Seppatni zinglam dak 3:14 geih agin toh kiton in ka phone ahong ging hi. Ihmut suak mahmah kawma kize uaiuai kawm in ahon phonetu kua a chih en sese lou a pick up in "Kua e nang? Khovak ngak theilou maw?" ka chih khum lelo leh kare !! Sappa ana hi a, "Mr. Lianpu, na SP pa hi ing ei... Sapte zahna nengchik bek neita in ka hon chi gige hilou maw? Kintakin Police Station hon zuan in, dak 4 ginma ngei a na hong tun ngai ahi. Hunchiam a na hong tun kei leh gawtna honpe ding ka hi aw..." chi'n a phone ahon koihkhum hi.
Ka SP pa uh ahihlam theil eng zaw dawng gega lou ding hing a... Chih ngaihtuah kawm in ka dawn dan leh ama hon dawnthuk dan ka nuih hong za lophut in keikia in ka nuikhe lualua phet hi. Kintak a kisa in Police Station ka zuanpah hi. Ka tun in ka lawmdang teng leng ana kimvekta ua, ka SP un Lianpu nang a fel ding pen bang dinga zekai a pang gige na hia? Chi'n ahon tai a, lawmte lak ah nuamlou leh kisuaklah tak in ka om liailuai hi. SP office ah ka lut vek ua, ka mantak un ka SP pa uh Thangpu in ahon sapna ziak ahon genpah in panlak dingdan toh hon gen pah zungzung hi.
Ahon sapna ziakbel nitak dak 12 lakvel in New Lamka Khominthang veng ah inn khat meltheihlouh pawl khat in valuh ua, inn neipu athah ban uah, a nupi uh suam in a tate teng uh kaplum in taisan uhi. Tuapen city policete a ding a zahlak huai mahmah thiltung ahihman a kintak a panlakpah poimoh ahih dan leh, ahuntak a panlakpah ahih keileh city policete ading a zahlak huai mahmah ding ahih dan a hon gen hi.
Huchi'n SP makaih in thiltunna mun zuan in ka kuan khepah uhi. Phalbi suklai ahihman in khua avot mahmah mai a, meizing sahtak te'n lampi tuamchip in ka hat tai theikei uhi. Awlawl in ka tai ua, amun ka tun un khua avak ta hi. Mi anatam mahmah mai ua, kou ahon muh un mikhenkhat in zekai hon sa lua uh ahi ding a, ahong sousang mahmah ua, suang a hon dengpawl bang ana om man uh ahi ding a, ka lu suangkhat in hon kha a, ana mahmah mawk hi. Ka hehtha lah suak lah bangmah lohtheih om tuanlou ahihman in "Tuni ka vangphat tuak kei mahmah na e" ka chi numnum phet hi.
Ka tun phet un kou sep ding a poimoh omte ka sem pah fitfit ua, dotnop leh dot tuak omte innkim-innkiangte kiang ah dong in siluang teng hoih tak a lem in post mortem bawl ding in damdawi inn ah ka khak suk uhi. Tuahsia tuak innkuante minga apha ua, amau lak ah anu uh chihlouh teng in sihna tuak ua, anupen uh leng khuaphawk lou in adinmun lauthawng huaitak in om hi. Et ding leh bawlding teng ka et ua ka bawl khit vek nung un TUALTHAHNA CASE dan a case file in Police Station lam ka manoh ua, innteknu ngei leng damdawi inn ah etkol ding in ambulance sam in siluang teng toh ka pawkhia uhi.
Police Station ka tun un SP in ama room ah kei leh ka lawm Khualpu hon sam lut in tua case pen suikhe zou ngei ding a hon muang a , kou gel hon sep ahihdan ahon gen hi. Hiai case ka suisuah zoh uh leh hon kaisangsak ding ban ah ka innkuante uh natawm in hamphatna tampi mu thei ding uh ahih dan ahon hilh hi.
Huchi'n ka lawm Khualpu toh ka nasep ding uh ka pan pah uhi. Zing annek zoh a kisa pah in Khominthang lam ka zuan pah ua, tuahsia tuakte tanaute leh inkim-inkiang, ban ah alawm leh vualte uh ka muhkhak teng kiang uah thu dotna ka neipah uhi.
Ka thudotna uapan in inntekpa min ahihleh Thangpu hi a, sepna kichiantak neilou, mitoh kina ngeilou leh mihoihtak ahihdan a gen vek uhi. Ahih hang in a khosak dante leh a inn khawng ka et chiang in sep kichian neilou ding in khosathei mahmah, building inn hoihtak sung ah teng ahih dan ka mu a, athugente uh leh ka muhte kikhailua sa in lamdang sakna in ka dim hi.
Sep kichian neilou lah khosa thei mahmah mawk ahih chiang in aguk a sep nei a, huai in a mah buaina tun kha hiding in ka muangmoh tinten hi. Huchi'n a innvengte khat kasam tuam a, akiangah Thangpu in bangsem sek hiam chih ka dong hi. Himahleh, aman leng sau thei tuanlou a, zin khe mun mahmah ahih dan leh inn a om sunsun chiang a leng popawt lou a om sek leh zansawt nung natawm a mi hausa pipi toh a inn uah kithuah den sek ahihdan ahon hilh hi.
Ka deih bang uh dawnna ka muhlouh ziak un innsung teng hoihtak a envel thak ding leh post mortem result ngak a, huai pansan a panla tou ding in Khualpu toh ka kithukim uhi. Innsung teng ka hon envel uh leh thautang kapsa khat leh kap nailouh a catridge toh omlai ka mu ua, huaite la in Thangpu inn nusia in ka paikhia uhi.
Khualpu toh maban panlak ding dan kikum a lunglut tak a kihoulim kawm a ka pailaitak un ka nunglam uah gari horn kimek khum ging ka za ua, kou leng thakhat a khawl a kinunghei kawm a ka et uh leh.... Activa khat ka nung chin uah ahong khawl a, tua activa tung ah tuang nungak khat asam ngat silsial hoih mahmah huih in amut leng singseng kawm a heh mel tak a koute honna en khat toh ka kimaituah kha uhi. Amel ka muh leh ka dip a hong kisai pah dipdip a chikmah a milak a zakta ngeiloupa kha, hiai nungak melhoihtak leh duangchingtak ma ah ka dipte kisai kin in nervous na in ka dim hi.
A hon hounate zalou phial in amel kamka heuhou kawm in mitdim zen in ka na en a, hichizaw deuh leh zaw chi a sawisel na ding himhim ka mukei. Siamtu'n zaw siamdik hina e ka chi vungvung hi. Huchia bangmah phawklou zen a, amel ka na et laitak in a gari horn hon mek khum leh thakhat in ka halh khia hi. Amah ngeileng koute hon hansan zungzung kawm in ahon taisan a, anung ka enzui vungvung phet uhi. Ka lawmpan ka omdan teng hon mu ahihman in ahon nuihsan ek-ek a, ken bel bangmah a dawngtam theilou in hoihna e mw.... Ka chi vungvung phet hi.
Police Station ka tun un SP pan ka hohna uh thu uh honna dong pah hi. Kenleng ka nungak muh in ka lungtang teng luah gai ahih man in bangmah dang a dawng lou in, "Sir, amel nak hoih himai...." ka chih phut mawk leh ka gei a Khualpu ding in a tong in ahon phuphei zot a ka thugen ka theikhe phut a, genkhial kisalua in ka veinuih heihui top mai ve.
SP in lah ka dawn dan lamdang sa mahmah in ahon en heihoi zozen hi. Kei leng kisuanglah mahmah kawm in ka muhdan teng uh report ka pepah zungzung hi. Report kapiak zoh in SP pan "Lianpu, nangle muhkhak louh d vamukha na ve maw ? Denchiah na thil suikhiak dipen suikheman lou in nna dang in hon suibuai kha ding e. " chi'n ahon chiamnuih hi. Kenleng "Sir, na lungtunna tan ah suikhiak teitei ka hon sawm dia, thildang buaipih lou in ka hong pang ding aw." chi'n ka dawng sam a, himahleh ka lungsim tak ah bel ka mi muhnu in munlian zaw tham aluah tlats hi. Bang ahong chitel diam ah ?
SP room apan ka pawtkhiak un Khualpu in ka om dan teng chiamnuihna in ahon zang ek-ek hi. Ken lah gen ding tuan theilou in Khualpu kiang ah, tua nungak melhoih nu hon zon khiakpih ding in ka ngen zosop hi. Aman bel thupi ngaihlou hi awmtak in, "SP pa kiang ah na thuchiam kitheih lel oh." ahon chih khum a, kei lah heh kisa mahmah kawm in, "Utleh, non zon khiakpih kei leh ithilsui pen nangkia hon suisak ding ka hi aw..." ka chih leh amah leng hong nui heuhau in adang gentuan lou in, "Hi e...!" chih teng chauh in ahon dawng hi.
Inn ka tun tan in leng ka lungsim ah bangmah dang a omthei himhim kei. Amel hoihtak leh aduang kilawm tak mai hichizaw deuhleh chi a soiselna ding himhim omlou, hoih bukim tak tuh ka mitkha apan ataikhe thei nawnkei hi. Amah muhnawn kal ka ngak lah mahmah mai a, himahleh, bangchi muh ding? Koi ah mu nawn ding chih gentheih louh ahihman in ka lung akham petmah hi.
Atawp in ka theih ngeilouh ngai in maumau mawk leng ka sepding teng sem buching zoulou ding, banah; ka sepna na tawm in thuak kha thei ahih man in ngaihtuahlouh phot mai ka hon tum hi. Ka lungsim apan koih khiak ka tup nak peuhleh akip deuhdeuh maimah a, mangngilh tum a ka pan nak peuhleh ahong lang chiang deuhdeuh mai hi.
Atawp in himahmah kei, ka hichi omom leh hoihlou ding hiveh chi'n vak halh ka hon sawm ta hi. Awlin Lennuam Bar lam ka hon zuan a, amun ka tun in mi anatam sim mahmah ta uhi. Kenleng whisky order in table awng khat ah katu suk a, awl in ka hon dawnpanta hi. Ka pam ah anawl lam deuh ah tangval 4 vel in leng zu ana dawntei ua, amau bel kham sim mahmahta uh ahi ding a, a aw uh ahong ngaihsim mahmah ta hi. Pilvangtak in athugente uh ngaikhe kawmkawm in kenleng kei a ka dawn kawmzel hi. Bangtan hiam nung in alak ua khat in alawmte kiang ah hichi'n ahon chi hi. "Lawmte zannitak a i thilhih bangbang uh om nawnleh ud huailai na e maw... Sum lah tam, nop lah nuamsi..." chi'n ahong nui hakhak hi. Alawmte khat in ana dawng a, "Huaizaw hina a, kenzaw naupangte kha hehpih hiveng aw, amau bangmah lohlouh di zaw hiven..." ahonchi hi. Alawmten ana chiamnuih khum ua, "Tuangpu piangthak! Tuangpu piangthak!" chi'n anuihsan lualua uhi.
Kenleng ka theih utpen thu gen uh ahih dan ka theipah a, pilvang zawsem in athugen uh ka na ngaikhia hi. Ahong pauzom zel ua, alak ua khat in, "Poina om mahmah kei, boss pa deihdan tak in i sem ua tun sum tampi toh i om keìhkaih uh hilou maw... Tunitak chu ROCK di himai... " chi'n ahong nuikhe lualua uhi. Kenbel ka nna hong kipia pen gintaklouh lam daih a hong baihlam mahmah ding ahih dan thei in, thuchian theisem nuam in amau kiang ka va zuan phei a, akiang uh ka tun in, "Lawmte nuamsa na uchia, keilah keikia in kuamah lawm di le neizou lou in ka om a .... Kongbel thei diam?" chi'n ka va kingen hi. Amau leng honna AW pah ua, ken leng Whisky buk 3 order nawn in amau toh dawn khawm in ka hong houlim panta uhi.
Amasa in ka min ka gen masa a, sepna neilou leh mawk om maimai sep ding deih a zong lellel ka hihdan ka gen hi. Amau leng aminte uh hon hilh pah ua, banglam sep lunglut ka hi hiam ? Chih ahon dong uhi. Ken leng thumu kisa in a om bangbang, bang nna hitaleh ka gilvah nang leh, nuamtak a khosak nang ahih nak leh seplit neilou ka hih dan ka gen pah hi. Amau leng hon gingta uh ahi ding a, amau kiang ka ding nak leh a boss pa uh kiang ah gen ding ahihdan uh leh ziangchiang a hiaimun mah ah kimu nawn ding chi'n ahon hilh uhi. Ken leng poilou ahihdan leh kei bangbang a bangkim sem ut ka lawmte khat om a, amah toh leng kimu ding chi in ka kikhen phot uhi.
Gintaksang a ka thilsui hong baihlam zaw ding a gintakna ka neihziak in ka kipak mahmah hi. Alehlam ah bel lau huai mahmah ding a, ka hihna atheih nini uh ka hinna a beini himai ding ahihman in pilvan mahmah ngai ding hi. Ka thiltup pen ka sappa'n hon awi keita leh kei a ding a leng buai huai mahmah ding ahihman in ka lung a buai mahmah a, himahleh a thu suikhiak pen kei a ding chauh hilou a, kou department a ding a poimoh mahmah ahih man in hon nialngam ding in bel ka um kei hi.
Azing in Khualpu kiang ah ka thiltuah teng ban ah ka tup dan teng ka hilh pah hi. Aman bel alauthawng sim mahmah hi. Himahleh ka hong kikup sawt deuh uh leh aman leng hon amen khong a, huchi'n SP pa mu din a office ka vazuan uhi.
SP kiang ka tun un amah toh ka thiltuah teng ban ah ka tup dan teng ka hilh suk pah hi. Ka tupdan bel amau lak ah under cover dan a om ding in, tualthahna ziak leh anasep dangte uh suisuah ding chih ahi hi. Ka sap pan hon lauh pih mahmah a, himahleh migiloute nasepdan theihkhiakna di lampi hoihpen ahih zel man in ahon kham ngam kei zel hi. Hun sawt tak ka kihou nung un kou sung natawm ah kou mi thum teng chih louh athei a om louh ding chih ahi a, kei bel Commando Special Course Training zouphet Lamka Police Station ah join pan ka hih ziak in kuamah ahon thei leng a om naikei uhi. Khualpu ahih leh Lamka mi mah ahihman in keichauh kuan mai ding in ka thupuk thak ua, Khualpu in bel angeina bang a nnate ana semtou ding in ka thupuk thakthak uhi.
Huchi'n SP in DGP ahoupih a thu omdan teng ahilh pah hi. Aman leng ka thupukna uh hon pompih pah a, Police Department sung a kei tungtang chiamtehna om bangkim sel vek in tun bel aguk a sem khat ka hong suak ta hi.
Kana ding kei leh kei kiguan himahleh ka ngaihtuah chiang in ka lin mahmah mai hi. Ahia lah ka gam a dia ka hinna chiam khinta ka hihman in nungtolh bel ka sawm kei himhim hi. Ka ma ah hondal thei thil tampi om mah leh, Phualvate ki it bang a khat in a dang khat a dia a hinna apiak ngam bang khop a ka gam ka lei ah itna nei ka hihman in, ka ma ah bangteng ahong tung zong in, Sihna in honna vaidawn ding himahleh. Ka gam a ding a kal ka suan khiak pen khutchin vom chia lel leng nungtolh ka sawm nawn kei himhim hi.
Nitak ahong hihtak in Lennuam Bar ka manoh pah a, ka lawmthak dingte leng ana kimkhinta uh ahih man in amau kiang ka vanaih pah hi. Zan nitak a ka min Ginpu chi a ka gen ahihman in amau leng Ginpu chih ngen in ahon sam uhi. Amau lak a boss pen hingei ding a ka gintak khat in ka kiang ah, "ahihleh Ginpu, bang nna ahia na sepnop pen?" chi'n ahon dong hi. Ken leng, "ka tung a sep ding kipia om peuhmah ka pu kipahna ding ahihnak leh sep lit ka neikei." chi'n ka dawng thuk sam hi. Aman leng "Huchi ahihleh, hoih e ! Ka boss pa uh natungtang ka houlim pih khinta a, amah leng nang toh kimuh alunglut lam ahi." chi'n a hon dawng a, huchi'n boss pa mu ding in ka paita uhi.
Bangtan hiam ka tainung un VIP lane ah ahon lut pih ua, inn lian pha mahmah leh thupi mahmah khat kong ah ahon khawlpih uhi. Ka kum khia ua, innsung lam ah lut ding a thupiaka ka om man in innsung lam zuan in kalbi ah ka kahtou hi. Kongkhak ka tun in kong khak tung ah name plate kitak kamuh in thak khat in hon kiguihsak zot a, lamdangsa tak in ka khawl dedu kha zozen hi. Tua name plate ah hiaibang in a kigelh hi. "Shri Tongpu Minister Home & Power, Govt. of Zogam."
Mikhat in ka tong ah hong phu zauh in innsung ah lut ding in ahon hilh hi. Keileng kibawlthak in huchi'n innsung ka lut ta hi. Innsung ka lut tak in mi 4 tutna ah tu in ana houlim uhi. Minister pu amel ka theihsa ahi a, ka lut phet in mikhat in amah ava hou gu zauh a, huchi'n a khut in ama kianglam zuan ding in ahon sam hi.
Akiang ka tun tak in, ka min leh ka hinkhua paisate ahon dong masa hi. Kenleng ka min Ginpu ahi chi'n ka min diklou ka gen a, ban ah ka nu-le-pate om nawnlou leh keivuak a inn-le-lou neilou a khosa ka hihdan ka gen hi.
Huchi'n boss pan "banglam siam deuh na nei a?" Chi'n ahon dong hi. Ken bel "siamluat neilou lah a om bangbang sem thei." chi'n ka dawang thuk tei hi. Huchi'n mikhat sam in amah zui ding in ahon hilh hi. Tua mipan room liantak khat ah ahon lut pih a, tua room laizang tak ah boxing ring a om hi. Boss pan mitoh hon kisualsak dek eive ka chi lungsim a, huchi'n ka puante ahon kheksak ua, boxing glove hon bun sak ua, boxing ring sungah ahon pai pih uhi.
Ka dak vel a, kuatoh hon kisusak dek uh ahidia aw ? Chi a ka ngaihtuah laitak in mivomte salian mahmah khat ka ang ah ahong ding lenlun a, simmoh chitak in ahon en lelu hi. Huchi'n boss pa hong pai in ka kiang ah, "Na ang a dingpa nikum a UFC World Champion ahi. Amah toh round 5 na kisual ding ua, tua hun sung a kisurrender lou a na pansuak zoh leh ka nuai ah na sem thei ding a, na kisurrender ngeingei leh na hinna in athuak ding." chi'n ahon hilh hi. Ken bel Special Commando Training ah kisualdan bangkim ka zil siamsa ahih manin ka langpa ka huphulh vak kei hi.
Huchi'n ka hong kibei pah fitfit ua, ahon thazoh tuan kei. Ama sang a kinzaw a gamtang in ka bei suk pah fitfit hi. Kei sual dia hong tai phei pen, kei ana kihem in a dip lak tak ka na pek sak a, naa sa a kun a omlai pen kai ding tou in kitawm kawm a kilep in a khabe ah ka pek tou a, kithal puk suk in tang nawn lou in a lum beiibui hi. Huchi'n vualzou a puan in ka om a, direct membership hihna certificate ka ngah hi.
Ka boss uh Minister Tongpu pen mite theih a diktat leh Pathian lau bang in om mahleh, aguk tak in Golden Triangle kimvel a khamtheih a sumdawngte enkoltu lianpen ahi hi. Apawl min ding in "The Swan" chih phuak a, amau tua khamtheih a sumdawngte enkai in tuate apan in sum khonkhawm zel uhi. Amau theihlouh a gamtangte hehpihna bei in soisa ua, miteng lauh ahi uhi. Pawl tuamtuam amau kalh a gamtangte hih chimit pahpah ua, hat mahmah ahihman un leh aheutupa pen uh politician zahtak huaitak khat ahih man in kuamah in amau kalh in bangmah sem ngamlou uhi.
Keileng amau lak ah tel ka hihtak man in ka boss pa uh thu ka zuih angai a, amah suklungkim pen kei a ding a ka thilsuina ah mavanna hong hiding in ka gingta tinten hi. Ka pu chih dandan a gamtang ka hihman in ahon muang mahmah a, ama personal guard ding in ahon guangtou pah hi.
Bosspa bel ofis a kai chiang in guard tuam nei a, himahleh athilguk sainate ah kei leh midang thum in ka guard zel uhi. Ama ofis kai sungteng hun awl kinei den ahihman in aguk in a innsung omdan leh athuguk koih khawm namunte zong in innsung innpua ah ka vak vevel sek hi. Lawmte muh in bel lauhuai thil omkha a omhiam chih khawng enkhe dan in ka omzel a, kuamah in muanmoh et in ahon enkei vanglak uhi.
Nikhat huchia ka vakvel lai in room khat ah piano tum a numei siamtak a lasa hiauhiau ging ka za hi. Ken leng kua himahmah dia aw tua siamtak a lasa chin awl in ka vanaihphei hi. Kongkhak neukhah kihong ahihman in ken leng ka mit kita zahzah guang zen a ka et leh....... Kare! Ka lungphu bang ahong kin zozen a, lamdang satak in tang theilou phial in ka om kha nilouh hi. Mu nawn ding a ka kigintak louh, a tongsuah za ding a leng gintakna ka neihlouh a, mangngilh mai tum a sunteng, zanteng a ka sual hang a ka mangngilh zohlou ETLAWM ana himaimah hi.
Lamdang ka sa mahmah mai a, bang chidan a hiaimun ah omthei ahi a ? Boss pa tanu ahi diam ? Ka lung abuai mahmah hi. Boss pa tanu hileh kei bang leltak a ding a phulouh hiding hia, Boss pa'n lah keibang leltak a ding a atanu hawmthoh phal mawklou dia... Chi'n ka ngaihtuahna a paisau man mahmah hi. Himahleh ETLAWM ka muh nawn theih bel ka lung akim mahmah zel a, lehlam ah ka kipak mahmah hi.
Thawm neikha zek ka hi ding a, ka ngaihtuahna apat ka hong halh khiaktak in lasa ging adaita a, ETLAWM ngeileng ka mu ta kei hi. Kei leng awl a dingkhia in paikhe ding a kisa a ka kihei laitak in ka lu ahong puaksuk bok a, ana bel ahikei bang hiam a khet a om chu ka hi peuhmah hi. Lamdang sakawm tak a ka dak touh leh ka ma ah hehmel deuhtak in ETLAWM in honna en gegu a, ka lu puakbok ka chih pen leng a laibu tawi a a hon khet ana hihi.
Kei leng kisuanglah lua in ngaihdam ka ngen molhmolh mai a, nervous lua ka hihman in bang teng genkhia ka hi a chih ka theikei. Ka biang ah akhut a ahon bet nawn na in gen ding bei in a hon koih top hi. Paulou hial in a ang ah, goh ding belam apu' ang ah adaih dide bang in ka kun diudiau a, amah leng heh mahmah sam mahleh ka omdan ahon muhtak in hehpihna hon neisam ahi ding a kamdam tak in a hon houpih hi.
Banghang a hiaimun ah omkha leh hong paikha ka hi hiam chih a hon dong a, ken leng Minister pu guard a om ka hih dan leh siamtak a a lasak ka zak ziak a mu ut a va enkha mah ka hihdan ka gen hi. Amel en ut mahmah mah leng, amai ka en ngamkei, ka kun den a, aman leng ka omdan teng hon mu ahi ding a nemtak in, "Kei mite'n Kimte chi'n a hon sam uh, u nang bangchi'n a hon sam ua ?" chi'n a hon houpih hi. Kenleng ka min Ginpu ahih dan genkawm a awl a ka ettouh leh, nuikawm hiuhiau in ngaihbang tak in a honna en a, ka zum tha a suak deuhdeuh a lah, amel nuihmai ka muh in ka lungtang kipahna in a puak zak dek phial hi.
Huchi'n hun awl a neihteng in Kimte toh ka kithuah zel ua, lapeuh sakhawm in nuamtak in hun ka zang zel uhi. Ka itna thu genkei mahleng ka omdan leh heivel dante ah kilangkhia ahihman in Kimte in a thei mahmah a, amanle genkhe keimah leh a hon thuah dan in bel ngaihnatna riau khat hon nei hiding in ka gingta tinten hi. Himahleh, alehlam khat ah ka ngaihtuah chiang in kei bang leltak hon ngai ding in ka um theikei zel a, lawm bang a hon thuah maimai hiding hitah e... Chin kei mah ka kipesia khasek hi.
Nikhat a room ah a hon sam a, a kiang ah hon tusak in piano tumkawm in "Ngaih namel etlawm, maimit suanchim keiveng..." chihla siamtak in a hon awi ngiahngiah a, huai kawm in hon melh cheuhcheuh in a hon nuihsan hiuhiau zel hi. Nuam ka sa mahmah mai a, a lasak pen kei a hon sak khum himai leh aw... Chi'n ka ngaihtuah vungvung hi. Huchih laitak in awl in ka bil bul ah, "U Ginpu, hih simlei tung ah, nangkan a hoih tangdang omken chia..." hon chiphei siausiau a, gingta lousim lah kipak mahmah hemhom kawm in ken leng, "Tak sinthu maw?" ka chikhe numnum sam hi. Tua tak in aman leng ka mittak hon en kilkel in aw nemtak in, "U Ginpu aw, tak simthu mah hi, numeisia lel himahleng, kon muhtung a kipan in kon na vei mahmah a, chik leh mel kimu nawn ding hiam ? Chih theilou in hun tengin Pathian kiang ah namel muh ut in ka na thumthum hi...."
Tun nang toh kimu a, kithuah thei a ka om taak man in ka lungdam mahmah hi. Ka om dan apan in zong kong deih mahmah chih thei ding in hon um ing. Aih hang nang mabang hong panlou na hih chiang in, zum-le-zah khuallou in itna simthu hong lel ing. Hong sang in maw..." chi'n kisuanlah mel tak in a hon gen hi. Tua aw khum ka zak ut mahmah, chik mah a za dinga ka kinep louh ka zak tak in kipahna in ka dim hi. Ka kipah luatna lam in bangmah a dawng lou in ka dai nilouh kha zozen hi. Bangmah genlou a ka daih dide tak in Kimte in ka kiang ah, "U Gin, bangchi na hiam? Nang, kei hong ngailou maw ? Nu aw kei dahlua ing. Ken hong ngailua... Hong hehpih samlou ding maw , U Gin..." chi'n khasetak in ka mai natawm en ngamlou in nuailam nga a kun in a mittui hong luang zungzung hi.
Ka itpen huihmut ding natawm ka phallouh, kei ngai a ka ma a kap ka muh in awl a alu phawng tou in a kiang ah, "Kimte, kap keive... Ken zong hong ngailua ing. Hizong kei pen mi naran, na pa vengtu maimai ka hihman in nang a ding a chin kisalou lua ka hihman a hong gen ngamlou ka hizaw hi. Ken zong hong ngailua ing. Aih hang tunung chiang a nang hon khase saktu leh na pa hih thangpaitu maimai ka hih khak ding lau lua ing." chi'n ka dawng hi. Tuatak in aman ka kiang ah, "U Ginpu aw, itna in milian-mineu khenlou hi. Ken nang ka pasal ding a kon tel na hi a, mihing dai kuaman a kaih zohlouh bang in kon itna zong kuamah in nang apan lakhe zoulou ding hi. PHUALVA BANG ITNA toh hong it hi ing U Ginpu aw." chi'n ka ngawng ah hon kaw in amuk nem ngingei kuamah tawp khak nailouh in ka muk ah hon tawp a, ken leng deihthoh tak in ka na tawp vengveng hi.
Hunte khawllou in paizel a, tua dungzuiin Kimte toh ka ki itna uh leng hunteng in a khang deuhdeuh hi. Kuamah theihlouh kal a kimu zel in kou khomkhom in nuam ka sathei mahmah uhi.
Nikhat boss pa omlouh kal in a file koih khawmnate ka na etsak leh, thu kiselgu tamtak, dan in a phallouh nasep aneihte tamtak ka vamu hi. Poimoh ka sak teng lim ka la zel a, aban a file omte en ding a ka kisak laitak in kongkhak a hong ging a, kei leng kintak a file te koihlut in ka lutna mun mah ah pawt nawn in ka na engu hi. Boss pa leh milian mahmah khat zahtak huai melpu mahmah khat ahi uhi. A kihouna uh ka ngaigu a, a gen dan un a sum dawnna uh sukbuai sawm a kipei om ana hi a. Pan lakpah kei leh a sum sinna uh buai ding ahihdan gen in a kihoulim uhi. A thugen uh ngai utlai mah leng. Dutyte'n hon mukha thei uh ahihman in awl in ka kihep khiaksan zawta hi. Ka thilmuh teng ka SP pa uh ka hilh pah hi. Aman leng pilvang tak a a dang zon behlai a, amah mat theihna ding kichiantak zong lai ding in ahon ngen hi.
Bangtan hiam nung in boss pa'n mikhat a hong samsak a, kei leng kintak in a room ah ka valut pah hi. A room ka va ut tak in boss pa'n thu omdan tamlou a hon hilh a, Golden Triangle lam ah a pawlte sawllut ding ahihdan leh, tua hun sungteng amah muanmoh a kai louhna ding a holiday zang dia zinkhiak sawm ahihdan hon hilh hi. A omlouh sung teng kei mah ngei a innsung kei na etkol ding a muang mahmah a hon koih ahihdan a hon hilh hi.
Ka tup dan a thil paitou zel ahihman in ka kipak mahmah a, himahleh boss pa ang ah poisa mahmah dan in ka om khemkhem hi. A kiang ah, buaina a tuahna tung ah poisa petmah dan in ka gen a, a omlouh sungteng hoihtak a ia nn a na enkai ding ka hihdan ka hilh pah hi.
Room apan ka pawt khiak tak in ka kipak mahmah a, inn sung teng ah ka ut bang a che thei ding, ka itpen Kimte toh kuamah mitmei venglou a hun zangkhawm thei ding chih ka ngaihtuah chiang in kipaklua in ka kikou khe kha dek zozen hi. Himahleh, ka kipahna in sawt a daih kei, ka thiltup ahi bang in a paitheita kei hi. Boss pa amah chauh a zin ding ka sak leh a zinkhiak ni in a zi leh Kimte a tonpih maimah hi. Ka plan kimkhat dik mahleh, akim khat fail ahihman in gen ding theilou in ka vandak heihawi maimah hi.
Huchi'n Boss pa omlouh sung hunlem la in innsung teng ka pheklek vek hi. Atawp in file khat ka et leh a sung ah hiai bang kigelh ka mu hi.
"7th January 2134 AD ni in Mr. Pumgin (54) s/o Tuankhen of Khominthang in, pawlpi dan kalh a, siah apiak utlouh ziak leh, pawlpi theihlouh a pawldang toh kizom a khamtheih zuakna ah pan alak ziakin atungthu sawttak ngaihtuah ahihnung in Capital Punishment piak ding a lemsak ahi." chin kigelh hi. Kintak in xerox ka bawl mengmeng a, thuguk gelhna tuamtuam tampi petmah toh kintak in ka SP pa uh ka khaksuk ngal hi.
Tun bel ka thiltup khat zou phot ka suakta a, himahleh bang chi'n boss pa theih louh in ka paikhe dia ? Hon theih hunhun bel kei a ding a sihni ahi mai. Amah mat khiak hita mawng lele a pawlpi pen hat lotel mahmah ahihman in mawk a suk chimit vual ahikei hi. Himahleh, huaipen kei buai nang ahikei a, boss pa apan bang chi'n ka kihumbit dia? Ka it Kimte bang chih leng ka tangthei dia? Chih ahita hi.
Nikhat Kimte in a hon phone a, sawt khoptak itna thute kikum a nuamsa tak a ka kihou laitak un, apa'n Kimte phone laksuh in hiai bang a hon genkhum hi. "Mr.LIANPU @ GINPU ASI, 2NG BN. ZOGAM POLICE FORCE, nang kei leh ka nasep na suse ding a hong lut in bang ding a ka tanu natawm hon laksak sawm na hia ? Tuni mahmah in mat na hi ding a, ka hong tun nawn ma ngei in na lu tan ahi ding." chi'n phone a hon koih khum hi.
Ken leng theih khiak a om ka hih tak man in ka dinmun lauhhuai dan thei in kin tak a kihep khiak mai ka hon sawm hi. Ka it Kimte lah apa'n kei a ding a aphal ngaihna om nawnlou ahihman in ka lung a kham mahmah mai hi. Amah tellou a damsung hinkhua zat mai ding ka ngaingam mahmah kei hi. Amah tangzou lou ding thouthou tai khiakse louh a kimat sak a sih mai ka ut zaw hi. Himahleh, kei omkei leng midang in a ut dandan ua bawl mai ding uhia, mi khut thak nulna lel ding in ka it Kimte ka phalkei, haksa mahleh taikhiak phot a, awl a amah Kimte va guk khiak thak zawk mai ding chi'n taikhe ding in ka hong kisa hi.
Ka kim ka vel teng pilvangtak a enkawm in kal ka hon suan khia hi. Huchih lai in gari ahong ging a, inn sawng nuailam ka etsuk leh thau tawi mibangzah hiam gari apan kumkhia in inn sunglam manoh in a hong taiphei uhi. Keileng kintak a tai in, ka thau koih khawmna pindan uah ka valut a, M-18 leh 9mm ban ah atang tamkhop tak la in muh masak kap ding in ka na ki ging khol hi.
Awl awl in inn nunglam zuan in ka kikhin phei zel a, innsawng nihna ah om ka hih man in pilvangtak in kalbi ah ka kumsuk hi. Ka muh masak sak ka kaplum tawmtawm zel a, maban ka sawn thei zel hi. Ka kalbi zuih kipatna bul pen innsung liantak khat ana hi a, huaimun ah tangpang om ngei ding ua gingta in pilvangtak in ka en kimvel hi. Kuamah ka muh louh man in awl in kongkhak lam ka zuan phei hi. Huchih laitak in, ka nunglam apan thau ahong ging a, ka bil gei lak ahong sa phei hehu hi. Keileng kintak akilep phei in, kalbi bul ah ka kibu hi.
Thau ging a hong dai a, ka dak touh leh khat in hon kap nawn ahih man in ka lu ka khut a sel kawm in sual ah ka bok hi. Hon naih deuhdeuh tak un, hichi'n omom mawk leng nuamtak a hon kap lum thei ding uh ahih dan ka ngaihtuah khe guih hi. Huchi'n amau gintak louh na lampang pen ah kitholh phei in amaute ka M-18 tawi pen in ka hawt phei a, avek un ka kaplum theipah hi.
Kintak a kongkhak hong in huansung ah ka tai lut hi. Huan sung alian sim mahmah mai a, kintak in tha neih teng in ka tai a, ka nung a hon delhte kap kawm zel in dai lam ka manoh hi. Inn nunglam pen sik len maimai a ki um ahihman in sik len ah kaltou in huchi'n huang pawlam ka tung thei hi. Sihna apan ka suahtak theihman in hon suaktasak tu Pa kiang ah kipahthu gen in thumna ka nei hi. Ka thum zoh in SP pa ka phone a, thil paidan teng leh ka omna mun ka hilh hi. Huchi'n SP pa ngei makaih in a hong pi ua, damtak in Police Station ka tung nawnta hi.
Huchi'n DGP kiang ah report bangkim ka pia a, ka undercover hihna lakhia in ngeina bang in service ka zom nawnta hi. Minister Tongpu in a hon theihkhiak ziak bang ziak hihiam chih lamdang ka sa mahmah hi. A hang dia ka gintakna bel, a organisation sukbei na ding in Parliament in thu Pass uh a, tuading a Zogam Army te Golden Triangle lam ah sawl khia hi. Hiaithu hong piankhiak phut mawk pen Minister Tongpu in kei report ziak ahih dan theikhia ahihman in kei pen man ding leh that ding in a sepaihte hon sawl ana hi hi.
Hunte khawllou in pailiam zel a, ka lungzuanna kibehlap dingin phavang hun nuamtak a hong tung nawnta hi. Etna lamlam khaw lenmui kaiten lungzuan behlap mahmah hi. Ka it Kimte toh nuamtak a kholhkhawm lai nite thelbang hong thou zel a, Kimte ngailua ka hihman in lakmai luankhi'n zel hi.
Ka mintak na tawm theilou ahih manin a hon theihkhiak hunchiang in kei khem zohsa a om chi a hon hehsan ding in ka gingta mawk hi. Ka dinmun diktak thei ding a, apa matsawm a pan ka lak dante a hon theih hun chiang in a hon itna pen huatna a hong suah maimah khak ding ka lau mahmah hi.
Huchia lung buaitak a kingaihtuah ngetngut a ka omlai in ka phone a hong ging a, ka et leh number theih ngeilouh khat ana hi a, companyte a hinteh chin ngaihsak lou in ka sakhau ah ka guangsuk nawn hi. Sawtlou nung in a hong ging thak nawn a, pick up kawm in "Hello, kua na hia? Bang chisim ?" ka ch leh tua hon houpih pen in aw nemtak in leh ngaihbang tak kawm in, "U Lianpu, na it Kimte hing ei... Hon mangnglhta na maw ? Ken zaw hunteng in nang kon itna alian deuhdeuh hi." chi'n a hon dawng hi. Ken leng ka itpen aw ka zaktak in kisuanglah mahmah kawm in number thak ahih ziak a thei pahlou ka hihdan gen in ngaihdam ka ngen a, bang chidan a ka mintak thei hihiam? Chih ka dong hi. Aman a pate kihouna apan a ka mintak thei ahih dan ahon hilh a, ka dinmun lau huai ahihdan leh apate'n thah dia hon zong uh ahihdan gen in pilvang ding in ahon hilh hi. Huaitak in ken leng gen ut tampi om ahihman in aman theih ding aleh, Zo-awi Cafe ah kimuh ut ka hih dan ka hilh hi. Aman leng zingchiang sun dak 10 aman ding ahihdan hon hilh hi. Huchi'n kimuh hun ding bikhiah in mangpha kikhak in a phone akoihta hi.
Azing in Zo-awi cafe ka zuanpah a, room kil khat kuamah hon sukbuailouh na ding uh tel in ka it Kimte hong pai ding ka na ngak hi. Amah leng hunchiam geih in a hong tung a, kawi a tawp tonton ut mah leng kidek teitei in "Dam maw?" chi'n ka chibai zawta hi. Nek ding tuamtuam order in, huchi'n kihouna kon panta uhi.
Kimte kiang ah, "Kimte, kon ngai petmah mai. Nang tellou a khosak khak ding ka ngaihtuah chiang in, liang phel satkhiak bang tuk in naa ka sa hi. Ahia, na zuapa dougal ka suah tak man in nang na tawm in hon pampaih thei na hihman in poi ka sa hi. Kimte, bang ka chita dia?" chi'n ka it sakmel na tawm en ngamlou in nuailam ka en a, ka mittui khaam vuallouh in a hong tak suk keuhkeuh hi. Kimte in a khut nemtak toh ka khabe ah hon domtou in, "U Lianpu aw, bangmah ah kilungkham sak ken, na nasep ka thei a, nasep ding mah sem na hihman in gam-le-nam a ding na kipiak zohna, lauhuaina natawm na gam itna ziak a namaituah ngamna ah thupi ka hon sa petmah hi. Ka pa dougal na hih zong in kei a ding a khovel a ka it penpen na hihi. Gam-le-nam a ding a ginomtak a na panna, lauhuai chiteng hangsan tak a na palsuak ngam bang in, kei na it Kimte a ding in ginom tak leh hangsan tak in hong pang laive maw?" chi'n nemtak in a hon gen khia hi.
Tuabang thu ka itpen apan ka zaktak in ka kipak mahmah hi. Ken leng bang teng haksatna hong tung mahleh ka itpen ading a doutou zel ding leh, ginomtak a Vaphual nupa ki-ittak te hinna natawm kipe phalte bang a ka hinna natawm itlou a pang ding ka hihdan ka hilh hi. Kipak mahmah in a hon kawiphei a, "U Lian, ithu chiamte lenkip in, haksa bang teng hong tung mahleh ginomtak in pang ni maw. Kei nang a ka hi a, nang leng kei a, na hi . I kal sihna lou ngal bang mah in hon khen kei hen." chi'n ka muk ah a hon tawp a, ken leng ittak a ana tawp thuk in nuamtak in hunte ka hon zangtou uhi.
Hunte hong paizel in damtak in ka duty ka sunzom theizel a, Kimte toh leng ka ki itna uh alian semsem hi. Hun teng a kimu theilou himahle ung phone tungtawn in ka kithuzak thei zel uhi. Ka kal uh leng hoihtou zel in, daltu tammah leh aguk in khat veivei ka kimu thei zel uhi.
Nikhat Zo-awi cafe ah kimu khin kipaktak a ka pawt khiak laitak un thau a hong ging a, kintak in Kimte leilak ah ka sawn paisuk a kei ngei leng ka liangtung zek ah thautang hong lengleng in hon khakei deuh a, ka nung a glass a kibawl baang a kha tam zoih hi. Kintak in Kimte khut ah man in inn kil khat ah ka taipih a, amah lah laulua in lin petmah in aling maimah hi.
Taxi khat sam in Kimte ka tuan pih a, mun thoveng khat ah kei ka kum a, amah a inntan uh ka khasak hi. Kei leng gari dang man in Police Station lam zuan in ka tai vengveng hi. Ka ngaihtuah a, bang ziak a kap a om ka hi dia aw ? Kuate ahi dia hon thah sawmte ? Ka ngaihtuah nilouh a lah ka theikhe zou kei hi.
Nitak in Kimte ka phone leh a phone switch off a kichi a, ka ngaihpha thei nawnkei hi. Tusun a thiltung pen The Swan te hi ngeingei ding in ka muangmoh tinten hi. Minister Tongpu in a tanu gamtatna teng ana thei a, ka kihou zelzelte uh leh ka kimuh zelzelte uh ana thei a, a naupangte hon sawl hiding hitah e ! Ka chi lungsim hi. Poi ka sa mahmah mai a, ka itpen toh kithuzakna lah tanta bang ka loh ta dia le ? Ka lung a leng mahmah mai a, kha lah vak hoih semsem ahih man in Kimte ka ngaihna a hong uang semsem hi. Nuamtak leh kipaktak a ka hun zatkhawm lainite uh a hong lang deuhdeuh mai a, omzou nawnlou in lungzuan noptuam khak leh chi'n champagne thawl khat lakhia in ka dawn suk ek tei hi. Ka gawl ah a hong lutsuk a ka sung a hong sa hiaihiai a, ka kham deuh leh nuamtuam ding ka sak leh Kimte ngen ka lungsim ah hong lang in kuamah theih pihlouh in ka it ngailua in ka kap phemphom thahah hi.
Huchia lungzuang tak a ka tut ngiungiau lai in ka phone a hong ging a ka lak leh Kimte ana hi a, a aw ka zak leh kipaklua in ka halh zot zozen hi. Himahleh hon thugen in ka lung a liap sak mahmah mai a, sawt tak kiheh nem tuah theiding omtuan lou in ka kikah khum ngoihngoih uhi.
Kimte in hichi'n a hon chi hi, "U Lian, ka pa'n i omdan leh i ki it dan a hon thei hi. Tusun a hong kapte le ka pa'n a sawl ahi. Tun ka pa'n gamdangmi ka theih louh khat toh hon gawm sawm ahi, U Lian hehpihtak in hong gukhe maive maw... Kei ka pawt khiak ding phal ahinawn kei hehpihtakin hong gukhe mai in." chi'n a hon ngen ngutngut hi. Ka itpen midang toh a kiten ding uh kaphal thei mahmah kei, lah bang ka loh ta dia le ? A inn uah va lut mawk thei ka hi kei... Amah lah kongpua akaan khiak ding natawm phal hinawn lou... Aw vangsia hinang e... Bang kalawh tadia le ???
Ka lungsim a paisau petmah mai a, ka dai dedu kha zozen hi. Paulou a ka omtak in Kimte patau in "U Lian bangchi e ? Hon dawng ve nang hong lakhe lou ding maw ? Kei midang a dia hon phal na hi hiam ? Phualva bang chiampel kei ni non chih lainite ngilhta na hiam ?" honchi hi. Ken leng, "Ka it Kimte aw, kon it kon ngaih nathei hi. Nang tellou a hinkhua zat ding ka ngaihsut chiangin hin ka ngap mahmah kei hi. Ahia napa galkap te'n thuah nih thuahthum a hon veng uh ahih chiang in bang ka loh ta dia ? Na pa thu naman mai hoih zaw maidiam ka it Kimte ?" chi'n khoisa huthut kawm in ka dawng hi.
Amah leng lungbuai gawp ahi ding a, "A chih leh U Lian, bangloh ding chi na maw ? Hon taihsan sawm na hi hiam ? Nang toh ka kiten khak keileh zaw kei si mai ding hi ing. Nang tellou a nuntak ding pen hi sathei keng. Hong gukhe ding maw ? Kei ana si mai ding ?" chi'n a hon dong hi. Dawn ahaksa ngei mai, ka it bang din midang kawi din ka phal thei dia ? Phallou ding. Himahleh, kei a ahih theihna ding a lampi teng khak tan a omta ahihman in ka loh theih bangmah a om tuankei hi. Huchi kawmkawm inleng kei ziak a ahinna ataan ding ka phal tuankei hi. Aman hon paisan leh, kei leng ka hinzoh ka kigingta kei hi.
Huchi'n Kimte kiang ah, "Ka it Kimte aw, kei ngeileng nang tellou in ka hing zou tuankei ding. I mailam hun ding Pathian lou ngal athei omlou ahihman in A ang ah ki tulut peuhmah phot ni. Aman i haksatnate thei a, hon dawn zangkhai dia mansa a om gige ahi aw." chih teng kag en khethei hamham hi. Huaitak in Kimte in, "U Lian na chih dandan aw, ken zaw kon ngailua, U LIAN KON NGAILUA..." hon chi a, ken leng "Kimte kenle kon ngai petmah. " chi'n sawtkuam tak bang mah dang genthei nawnlou in ka kikahkhum uhi. Atawp in Kimte kiang ah, "Itluat hichi'n omom lehang hoih lou ding ahi. Zan asawt tak toh imu phot maini maw... Thum peuh lehang, maban hong hoih na ding ahi aw..."ka chih leh aman leng, "Awle U Lian hon muang ka hi aw... Hunsak phot maini kon ngailua mangpha , imutlim aw U Lian." a hon chi a, ken leng, "Awle Kimte, nangle mangpha hoihtak leh imut lim aw... Kenle kon ngailua..."Chi'n ka phone ka koih hi.
Hunte hong paizel in Khrismas gim bang a hong namsim hiauhiauta a, lungzuang theite a ding in lenmui kai zilzial te'n lungzuan a thousak thei mahmah hi. Kou leng Khualpu toh ka nna uh zohsiang meng ut in Minister Tongpu mat theihna ding ngaihtuah in ka buaithei petmah uhi. Huchihlai in, Pumgin zi damdawi inn ah admit a ompen in leng anat na leh aliamna thuak zoulou in mual hon liamsan nawn hi.
Huaitakin, mipi hong sousang nawn in tualthattu kintak a matkhiak hihen chi'n lampi zuihna nei uhi. Huchi'n kou leng kintak a gamtang in Tongpute lawmta teng Lennuam Bar a hunnuam zang a omlai ka vamankhia ua, amaute kipuanna apan in Minister Tongpu tung ah Arrest Warrant bawl khum in hunlem masa pen ah mat ding in tua hunlem ngak in ka omta uhi.
Zogam Army te'n leng Golden Triangle lam ah The Swan organisationte doutou zel in amunpi uh luhkhiak sawm in kisa lellel uhi. Huchih laitak in nikhat news paper ka sim leh lung hon phawng mahmah khat ka simkha hi. Tua thu bel hiai ahi.
"ka tanu Kimte 18th Dec. 2134 ni a pasal nei ding khakkhiakna ka inn mun ah 12th Dec. 2134 AD 10 am in neih ka sawm a, hiaihun hong uap chiat ding in ngaina tute na vek un ka hon chial uhi~Minister Tongpu & Family. "
Ka kiguih zozen a, lamdang sa in naa ka sa mahmah hi. Aw ka it Kimte, midang ang ah na zal mai ding zaw... Pamlua chia maw ka it. Bang kalawh ta dia ? Ka mittui khamvual louh in a hong tak khia a, ka news sim natawm a kawt zou vek hi. Om ding dan theilou in ka omdan peuh ning kitelna in adim hi. A tawp in Kimte ka phone sawm leh switch off a kichi den hi. Tamveipi call thak mahleng dawnna angeimah ka za den hi. Aw ka itpen Kimte O ka zak ut-ut maizen toh . Ka O zak sunsun lah companyte pre-voice khumsa ana hileltak mai maw ? Ka it bang chi'n na om a ? Non ngaihtuah khasam hiam ? Chi'n kuamah phawk phaklouh in luankhi toh ka pum dim den hi.
A tawp in hikei a kikhakni ding ngeingei un ka lawmte toh ka vakuan ding a, Minister pu mat a kikhakna program pen sukbuai ding chi'n ka thupukta hi. Ka kansui sau deuh leh Kimte pasal ding vaivomte khat hi a, apa ahih leh sumdawng hausa mahmah khat ahihi. Vaite ahi chih ka theihtak in ka it Kimte namdangte a ding in ka phal thei mahmah kei a a kitenma ngei ua sukbuai teitei ding chih ngaihdan toh kintak a kisa in Police Station lam manawh in ka diang khia hi.
Huchi in ka plan teng SP pa ka hilh vek a, hon phal chiah kei mahleh, hiaibang a hunlem dang om non tuanlou ding ahihman in a tawp in lem a hon sakpih khong hi. Huchi'n Dec 12 zinglam dak 9 geih in kei leh Khualpu makaih in police personnel bangzah hiam toh Minister pa inn zuan in ka taikhia uhi. Ka tun un dak 10:30 apelta a, programme pan ut in ana chiau vengvung uhi. Mi atam mahmah mai a, kou leng gate dutyte police mah ahihman un haksa hetlou in gate ah ka lut thei uhi. Kei leh Khualpu civil dress a kivan ka hi ua, ka lawm dangte uh bel uniform kimtak toh innkong lam ah koih in thu ka piak hunhun a hong lut ngal thei ding in mansa in ka koih hi.
Dohsang tung ah ka it Kimte mel mualtak in a tu a, zon nei hileh kilawm tak in a hong dak giaugiau zel hi. Himahleh, a zon utpen mulou ahihman in akhitui nul zel in aguk in kapkap hi. Ka hehpih mahmah mai a, ama ut ziak a pasal nei hilou ahi chih a chiang mahmah hi. Ka kiang a te nangawn in leng ahehpih huai dan kia a gengen mai mah ua, zak haksa ka a mahmah mai, ka itpen midang chihphet louh namdang ang ah zaalmai ding chih ka ngaihtuah chiang in naa ka sa mahmah mai a, ka hehpih petmah hi. A khenchiang in gim mahmah leh lawkhe ut bang in a hong om zel a, ka ngaih apha thei naonkei. Apa thugen ding a a hong dintouh tak in ka pawlte hong lut ding a thu pia in dohsang tunglam Khualpu toh ka va naih ua, Kimte in hon muhtak in ngaihtak a, kikou in "U Lian, hong zekai na chia, hon ngaklah lua keive..." chi'n keilam manawh a hong taiphei tum in a hong dingtou hi. Himahleh, thahatna himhim nei nawnlou ahihman in a lawmnu ang ah apuksuk hi. Mipite'n lamdang a sa mahmah mai ua, a phun nuainuai phet uhi. Huchih lai tak in ken bel thil dangte ngaihsak lou in Minister Tongpu kiang ah, "Minister pu aw, i gamdan bang in, Pumginte innkuan thahna thu ah leh khamtheih thil a sumdawng a, poikhoihlou tampi na thahte hang in dan bang tak in ka hon man hi. " chi'n arrest warrant lak in a khut tegel ah sikkol ka bunsak a, ka heute kiang ah Police station lam zot pih ding in thu ka pia hi.
Kimte kiang lam ka vanaih phei a, a kam khawng ah si a hong pawt mawk a lamdang ka sa mahmah mai hi. It tak in ka ang ah ka pombelh a, a si hong pawtte ka hah siangsak hi. Khua a phawk nawn kei a, ambulance sam in kintak in mipi lungbuai mahmahte nusia in damdawi innlam ah ka paipih hi. Damdawi inn ka tun un doctor in theihtawp suah in panla mahleh, zekai gawp in ka it Kimte in thupina gam a hon zotsan hi. Naa ka sa petmah mai a atung ah bohkhum in gen ding theilou in ka kahkhum ek-ek a, amin sam in kikou kou mah leng hon dawng ding khatmah a om nawnta kei hi.
Doctor in hon sam a, a sihna ziak gu a nek ziak ahihdan a hon hilh hi. Kei hon it ziak a ahinna natawm pengam ka it Kimte luang a tawpna pen ding in ka va enthak a, amuk awl a tawpsak in abilbuk ah, "Ka it Kimte, thangvan gibang khen om nawnlouhna mun ah honna ngak in aw... Kei leng hong pai pahta ding ka hi. Tua ah gibang khenlou a laitual lengkhawm ding in. I tonchiam PHUALVA BANG CHIAMPELLOU DING chi a ITNA i kipiak tuah pen, leitung ah tangtun zoukei mahle hang,Thangvan ah tangtun ni maw... Kimuh kik mateng zalmangpha ka it Kimte aw hon ngailua ing." chi'n lungsim giktak toh damdawi in nusia in ka paikheta hi.
(Author's note: Minister Tongpu bel damsung suangkul tang ding a mohpaih a om in, Ngalngam taaninn ah a hun omlai teng zang ding in lutta hi. Lianpu pen Kimte sihnung ann le nelou tui natawm dawnlou in omden a, sawlou nung in a it Kimte kiang zuan ding in akha akhah ta hi. Paradise ah Kimte in ana dawn in khen nawnlou in nuamtak leh kipaktak in Pathian phat khawm in a omdenta uhi. )
BEITA
On 29-11-2012, Thursday, at 05:00pm
© Siamsinna leh Vakiangbu
Comments
Post a Comment