ITNA KA TUAH
Written by ~ Lun Khuptong
November 18, Sunday, at 11:56pm
(Hiai story leh asung a min kizangte phuahtawm vek ahi.)
Kimte nasem inlam zuan a pailel Hauz Khas Metro station a hong tun in
kum ding in ahon kisa a,a metro card lakhia in gate ah swept zat in
gate No. 1 lam zuan in apaiphei vangvang hi. Gate No. 1 [IIT Gate]
achihna mun uh ahi a , huai apan Auto la a Munirka zuan dia kisa lai ,
auto en vialvial a a omlai in a lawmnu Siamte car nalhtak mai apan hong
kumkhia, a mu a, aman leng kum sawm bang kimu nawnlou ahihman un "Eh!
Nang lah nana hi maimah a" chih toh thuah in chibai a buk hi. "Ka mit
bang leng gingta lah phial ka hi" chi in "hiaimun ah nang hon muh ding
ka kilam-en kei himhim" chi kawm in aban gending zawk theilou tuak in a
numberte uh kikheng tuah in mangpha chih toh thuah in, asauliim tuak uh
zuandi'n ahong kikhenta uhi.
Kimte inleng Siamte a car a lut a tailiam khit in auto la in Munirka
lam ahon zuan panta hi. Kum sawmbang kimu lou a ahinkhua uh kikheng
dante Auto tung ah ahon ngaihtuah khepan ta hi. Meipite lah zing demdom
hileh kilawm in amu a nipi lai ahihman in vuah bang zudek hidi'n agingta
mai hi. Himahleh, alungsim a lungkim taktak thei kei a Siamte pasal kua
ahi deh aw Car hoihtak nei a nuamtak a a khosak mai tuh chi in leh amah
hinna toh tehkaak in a lungsim suangtuahna ahong kipan ta hi. Munirka
Anupam Restaurant ahong tun un Auto pu in kitungta Madam a chihleh
akiguih zozen hi. Aman leh thupha selou in a paiman ding pia in
a kumkheta hi. Inn ahong tungta apasal lah zukhamsa in ana lum a,amah
lunggel susau ding phet in chibawlsim kawm in "Bang chi e" chin a houpih
a, a thugen leng theih theituan sam lou in a pau nomnom hi. Aman leng
ki hahsiang in nitak an ding khawng uh ahon bawl panta ahi. Himahleh,
tuni a thilmuh leh tuahte a lungsim ah hichin ahon ngaihtuah khepanta
hi. Huchitel a gou a om in a ka mel lah nidang bang zou nawnta lou ka
lawmnu'n bang ngaihdan anei de aw chi'n ahong ki ngaihtuah panta hi.
Himahleh, alawmnu'n leng sau theikei mahleh namdangte toh aki ngaihlam
uh thei ahihman in ngaihdan khat nei di'n bel upna chiang anei hi.
Himahleh, aman bel a lawm it mahmah Siamte na ngawn kuahiam apasal chih
leng thei nawnlou ahihman in tua namdang pasal a neih apan in apasal in a
contact teng delete sak a tan hing bang phial a ahinpih
ahihman in a lunggel ahong paisau panta ahi. Nitak an huan bangle huchi
kawmkawm a honzou theita ahihman in apasal phong in anne ding achi a
apasal in leng gentam lou in an ahon netei ua himahleh ki houtam lou in
ahong khamtuak ua lum din ahong kisa ta uhi. Kimte leng ihmuthei zok lou
in a, alunggel ahon paisau panta ahi, tua nitak in a lupna gei ua
sanapi ging bang ngaihdiak asa hial hi. A tawptawp in a lawmnu call a
nikhat ahindan tengteng genkhiak na ding hunlem a muhleh genkhiak ding
chih thupukna nei in ahong ihmu thei khongkhong ta hi.
Kal bangzah hiam zoh in Kimte leng a lunggel ki ip zounonlou ahih man
in, Siamte ahon call ta mai hi. Ahon call zoh ni bangzah hiamzoh in
amaute gel leng Asian Garden Restaurant [Qutub Minar leh Lotus temple
kigal muhtheihna mun Restaurant ahi] ah nisim 18-11-12 nitaklam dak khat
a ki mu ding in thupukna ahon neita uhi. Kimte in tua ni ding a ngaklah
mahmah mai a, himahleh a lawmnu milian pasal nei ahihziak in hun nei
mengmeng lou ahihna ah tua Sunday nitak lam a hun awl neilel ahihziak in
tua ni mah fixed uh ana hi hi. Kimte lah inn ah a om lehleng lungnuam
taktak thei nawnlou anin tha bangsuak in niteng in a sepna lam a lah a
kuanlouh theihlouh chi kom in nnasem di'n a kuan khe nalnal zelsam hi.
Inn a a om hun in annasepna mun khonglah lamdang vek sa hial in a sak
akhang a etna munte tai dundun hileh kilawm peuh a mu in tua niding
nisawm bang in samlai pen ngaklah sim mahmah lehleng aki ip teitei mai
hi. A mel etlel inle kuahiam lunggel thei deuhte'n enle uh lungsim ah
puaklah mahmah khat nei ahi achilou kei ding uhi. Huchi kawmkawm in amah
leng huai ni chiah ka bang chi ki gen pat zozen deh aw chi kawmkawm in a
niteng hun tuh ahon zangtou touta mai hi.
A pasal leng kham gige phial himahleh niteng a tengkhawm gige ahih
man un a zi mel amuh chiahzaw lungkhamna nei ahi ding a chisam a ava dot
tei chiang inlah Kimte in tam a dawnglou in ka nnasepna ka gimlua a ahi
chizel in aban dot dingdan thei tuanlou in a kholsan zel hi. A pasal
lah aki teen ua pan nidang a ki ngaihlai uh bang nawnlou, inn a Kimte
loh khiak sunsunte ne a omlel ahih man in. Bang hiam chisim lehleng ki
suanglah kawm sim ahi ding a thiltam bangmah leeng dong ngamlou in a om
sek hi. Hunbel ngakneilou a mualliam zel chi mahle hang Kimte a ding in
hunte awl pai asak hun a tam mahmah hi. Ni bang zah hiam a ngak nung in,
a neu apan a lawm hoih mahmah thilteng ana ki share tuahpihsa muhding
ni tuh ahong tung pet mahta hi. Amah leng zingsang leng ihmu sawt
theilou in ahong thoukhe pah a Breakfast dingte bawl in a bawlkhit in a
pasal leng hong thouta ahihman in breakfast hon ne ua aman leng a
nekkawm un a pasal kiang ah tunitak lam ka khol ni sunsun potna dingnei
kahi a chi a aman leng poilou ka nitak pack manding hon nutsiat leteh
chi belap in huchi teng kia in a dawng hi. Aman leng a a kalkhat
nnasepna vante a diahsa te sawp mengmeng in a sopzoh in, gawng sim
mahleh alawmnu toh ki muding hihman in a van neih sunsunte honsilh in
amel bang ahitheitan in a van neihte a bawl in ahong kisa panta hi. A
dip bang hawm in khatveivei chia class- board exam tung pen a exam pe
dekmah bang in ki sai dutdut hileh kilawm hial in a thei hi. Aki sakkhit
in Anupam Restaurant a Auto la in Asian Garden Restaurant lam a honzuan
vangvang ta mai hi. Alungsim a kipak simna pi in a lit mahmah na khat a
omzel hi. Ka lawmnu ka muh masak pen in bangchin ka houpih de aw a chih
kawmkawm lai in a mun a hong tungta hi. Amah leng auto ah atuanman
pekhin in Restaurant aki chiamna munding uh zuan in ahong pai phei
belhbelh ta hi.
A restaurant uh ana lun mahmah a mi leng tamsim mahmah mai hi. A
sawngthumna ah paiding ahihman in lift in a tuangtouta hi. Minutes sawm
khong in sam lai ahihman in alawmnu leng ana tungnaikei a a view hoih
deuhna mun tua bel Lotus Temple leh Qutub Minar kimuh theihna ding hon
tel in receiptionist te k iang ah ka lawmnu Siamte kichi ahong paileh
huai best view sit kichi zozen Table numbat 7 na muh ah honsawl in chi
malam in, Coffee order in coffee ana dawn hi. Aman a tutna mun apan a
gamla theihtop a ettop theihna te dong en a ana khodakkal in a lawmnu
ahong tung petmah ta hi. Amah leng a lawmnu amuh in Hi! Siamte, chin
alawm nun a hun geih a hong tun chet keiveh maw chia pautuh in azakette
lakhia in tutna ah ahon tuta uhi. Waiterte hong pai ua Starter nih order
gaih in, in houlim tuh ahon pan uhi.
Kimte in Siamte lawm it koi ah om a bang chia khosa na hiam chin a
houlimna hon pan hi. Siamte in Kei Parliament a sem Director khat toh ki
teng ung a tua Chanakya Puri ah ka pasl toh a naute khat toh a quarter
ah ka khosa lel uh chi hi. Aaman leng genzom in kha pasal in hon it a
Inn ah ka omlai [pasal nei a ka kuan khiak ma] mahbang in nuamtak in ka
ut ut in ka om thei hi. Aman toh kituak in Pathian ni khong in bang Biak
Inn te kaikhawm in Pathian thute bang kikum in Eimi mahmah ahihziak in
hihna ki theisa deihdan ki theisa aki hihman in nuam hi. Ut teng
genkhawm in hun awl ka neih chiang un kaki kum sek uhi, nang lawm hoih
ka neilam leh ka neu apan ka kithuakpih chia ka ki ten tung ua zaw hon
na gengen hi ing a. Inn lam a na nute ka dot chia lah na number na ngon
amau leng ana neilou uhi. Hon contact ut mahleng na number ka
neihlouhman in hon contact theilou kahi mai ve chi in gen hi. Huai ban
ah ka kipahni pen Dan siangthou a kiteenni, in bang ka hon ngaihnatna a
lian mahmah mai hi. Himahleh, contact theihlou a om na hihchia huai ni a
ding inleng hon chial theilou kahi mai ve.... chi'n poi kasak dan huai
ni a na hongtel theihlouh kha....Nang bang a i ngaihdan leh nundante
ikigen tuahna leng omlou ahihman in, huai ni diak in ka hon ngaina
tuanse mahmah hi.... chia Siamte in ahon gen lai in a lawmnu a et
pheileh a mit a mittui pak pilphel a mu pheipah a va naih phei in lawm
bang chi na hia ? Chin'n lungkham meltak in a dong pah a.
Kimte in lawm aw ............ ahong ki dit huthut ta mai in. Siamte
inleng hihding tuan theilou in a hand bag a facial tissue paper dok khia
in a mittuite ahon siaksak hi. Kimte in alawmnu'n a mittui siaksak a
muh in aki khasiat laak a ahong kidik nak semsem hi. Muh mai inleng
banghiam puaknat khat nei ahi chi theihding in a mel bang a honndang
hial ta mai hi. Siamte in leng a melmuh apan theisim ahihman in awl in.
Lawm aw na lawm hoih Siamte kha kahi, nidang a ikipah a i dahnate khat
leng kiiim hetlou a i genkhawm lai nite bang a tua leng nang panpih na
ngaihna a omleh kimansa kahi chin in thu ahon gen pan non a... Dahna,
lungkhamna/lunggimna leh kipahna na neih aleh leng hon gen in aw chi'n
awl in ahon nget thohta mai hi. Aman leng alawmnu meldang hial a muh in
hehpih mahmah in a biang ah khitui ahong takhial hi. Kimte in leng tui
table a ompen ahon don khit in, a thu gendek hileh kilawm in ahong kisa
a...Siamte in Lawm bang a na lunggimna hon gen in chin amah mit a
khituite nulkhawm a ahon genleh, Kimte in.. lawm a vek sipsip in ka hon
gen ding aw. Himehleh, koi ahon pan zozen ding ka hiam ? chihbang leng a
buailam kahi a chi khe theita hi, bangmah gentam manlou in Siamte in
ahon pautuh a... lawm na utna bangbang in hon gen in tuni chu eigel
ading mawngmawng a hun ka hon zekkhiak ahi achih behlap lai hi.
Kimte in lawm aw 2006 a Jesus and Mary Collage a BA i zohkhit uh kum
tawplam a na hontheih bang in ka ngaihzawngpa Vaite huai Munirka ah
ompa na thei maw ahon chikhe ta hi. Huai phet in Siamte in leng thei mah
ing ei achi a na ki ngaihdan uh thupi lua maw huaipa toh chu chih
behlap khawm in huchi bang a hon kipe zou kuamah ka mu kei chi leh.....
Kimte himah e ... himahleh, chin a thugen ahon gen zawm nawn a... Kum
2007 tawm lam in ki it lua leh ki ngailua aman lah i deihdeih hon leisak
in chin, Birthday/Christmas/New Year/Valentine's Day gift te bang
manpha pipi Mobile Black Berry khong ahih kei leh van manpha pipite ahon
pe sek hi. En leng in sung nuamsa a khosa thei ding sa in Movie en bang
ahih keileh Party hoh khom in hun kahon zang khawm panta ua. Tua ah
maban hon nei in sawn bang kana paiman hial hi achi kheta mai hi. A mel
ah zumna toh kisuanglah thuah in a mel dang kiuhkeuh toh khitui a mit ah
ahong pot non leuleu hi. Kidik kawm in enle aman nuamsa thou hon enkai
zou nading leh hon it amah kan ka mu kei ding chi'n eimi hon deih a hon
hel tampi omte taisan in Munirka ah inkhat luahkhawm vai ka hon sawm ta
uhi. Kei leng huai laitak in Lam Lila Hotel ah Steward na kasep lai
ahihman in kha thum bang ahong pai zoh in ka gil bang kilang simta
ahihman in. Min meltheihte leh seppihte khong hontheih ding bang kalau
simta hi. Tua bangkal a om kahihman in khanih khong ahong hih in inn ka
luah khawmta mai uhi.
Lungsim a pona tak kawm a gen ahi chih Siamte inleng a thei mahmah
hi, Siamte in aban na non genzawm theilai diam awl chik in a chi a,
Kimte leng kidik ditdit kawm in .. AW .. Chi in tomchik a hong khol a
ahon gen zawm non hi. Khakhat khong pha minmen ding ka hong om khawm zoh
un a nute'n leng amah a hon thei kheta uh hi. Huchin ah amah bang mah
semlou anute nek bawlsa ne leh apa apan a sum piakte khong a ana hing
maimah pen Insuan nuamsapi apan himehle uh kei ahon deihsak louh ziak un
anute'n bangmah sum-leh-pai a panpih utna a nei nonta kei uh hi. Tua
ahih man in, amah leng kining ahi ding a sum zingsang lam ka kuan ma
teng in ahon ngen gige a ka piak ut louh chiah ka bagte hon suh in ka
ATM Cardte hon laksak in vuak toh ahon thuah zomah lai hi. Nitak inntun
chaih ann lah huan ning chilou in nang ziak a inn apan a nawhkhiak a ka
om sum-leh-pai bang mah ka nei nonkei na hon vak ding himai , ken
bangmah semlou ding ci suk gop2 in a ut chiah ahon tuan ek2 sek mai hi.
Aban genzawm thei nonlou dek zozen in ahong kidik hithit non a......
Siamte in a nung a zutsak kawm in, Lawm hon gen zom in kei ka hi poikei
na hinkhua ka hon thuakpih lua chih toh thuah in aman leng a mit a nuai
nelhnelh ta mai hi. Kimte inleng aban ahon gen zom non dek a akam ahon
kaat leh a khapkhe kha dek zozen a ki-ip zolou mah chu hiding ahi. Mahni
hinkhua mikia gen khiak ahaksat dan kilatna himai lou ding a diam ahon
chisak hi...!
Tua ka naupai penlah khali phial ahon phata a, lian simta ahih toh
ahon vuaknate lah na ka sa thei mahmah a ahon vuak zelna ah ka gil khong
a zukham chia hon totsak kha sek ahihman in, ka gil khong nana a ka
vaki-etsak leh doctor in nanaupai kisia ahi , i lakkhiak ngai ding ahi
ana chita mai hi. Tua ahih man in sum neih-leh-neihlouh chilou in a zing
chiang mahmah in hopistal ah kiadmit in nau tuh ka lakheta mai uh hi.
Kalthum hiam mahmah inn ah ka om a ka gim mahmah mai hi. Ann lah gina
tak inleng ahon pe ut kei a....! Ka haksatnate a Sungkuante Achih
patleh khamvual louh ahi ding a amit tui ahong tak khe non ta mai hi.
Siamte in aw ..... Ka lawmhoih Kimte chin a kawi phei mai hi....
akhase mahmah mai hi. Aw hon chikhe thak in, Ka Nu leh Ka Pa thugente
ana mang hileng maw , Siamte ahon chikhe non hi....! Mi bang a neizou
hikei mahle ung hichi lawmlawm a zaw ka Nu-leh-pan hon koih samlou ding
uh hia a chi kheta mai hi. Ka Nun ka hinkhua ahon thuhilhnate ana mang
himai zen leng aw chi'n ahong mau tuaituai mai hi. Ka pate toh ka
kithuzak louhna u lah a sawtta mahmah mai hi a chi a. Nu-leh-pate kia ka
haksatna gen ding ka chihleh ka ngamnon himhim kei mai hi. Tua kialeng
hilou in ka pasal in ka contact details tengteng ahon delete sak sek a,
amah number chihlou ka ofis number ahi mai hi ka number neih. Ka Nu hon
itna lian hina maizen e aw. Nu na hon thuhilhnate ana mang hileng zaw ,
pa hon ngamdam ve maw, bang a hon chikhe kha hialta hi....! Kimte
inleng a tissue paper kuah teng bang zang khin phial in a mit tuite ana
siaksak nilouh hi. Siamte in lawmlawm mai maw Lawm. Bang i genta dia ,
aban na genzom utlai hiam ? A chihleh a lu susuk ngaih in, Tomkhah ahong
khol non a...!!!
Bang pentak hiam ka thuak lah mahmah tun ka hon genkhe ding a chita
hi....! Awle, Siamte in chin a dong hiathiat a. I maw Ka ki Itlai ua
huchi tuk a hon care siam a ka deih2 ka duhduh hon nesak a, ka ut nana a
hon hohpih a. Delhi khodung khovai hon fan pih thei pan tua ahon
bawlnate na ka sa mahmah mai hi, ahon chita hi. Huai kia leng hilou in
ka kiten uh a Nute a theih uapan, amau Inn ahpan amah noh khia in, a
car leh avan manpha teng leng hong laksak ua. Sum-leh-pai apiak uh ahon
tawpsan ua, Hichi bang ka tung a atun, nang ziak ahi chin kei tung ah
khutkhak na in ahon zang a . Nna leng semlou ding nang na hon vak ding
ahi chia kiphin in zu khong sun nitumtum a kham in, inn a TV en leh
zudawn ana in azang maimah hi. Hiate tengteng suangkuante kia gen leng
ka gen ngam kei himhim mai a sialpi vuahthuak in ka thuak thoh mai hi a
chita hi...!
Aw aw awiiiii... Chin Siamte in alawmnu kawi phei in a kidik huanta
mai uh hi. A gei ua tute bang leng mangbang ahih man un, bang chi uh e
.... A chi phei sasauh mai uh hi.
Siamte in hichin thu ahon genta hi. Lawm, lawm it aw na thuaknate ka
ngaihtuah chiang in na ka sa mahmah mai a, Na hin dingdan ka ngaihtuah
lel in leng thuakzawh ka ngap kei hi. Mi theih dia na pasal neihdante
na khosak dante uh leh na lawm-leh-vualte bang mungam nonlou ding kia
thamlou in ei society lak ah leng kihel ngam nonlou ding na hi chih tuh
ahaih vual kei hi. Hiate na thuak a na taksa bang leng chiang kang mah
bang hial ahita ve uah ... Mihing mel bang pulou phial na hita mai a,
Nidang chizen sam leng J&M Collage ikai lai khong ua zaw nang bang
in i duang zen etlawm leh ana kichi gusim maimah sek hia aw...ahon
chilai hi. Tun zaw Vaite hindan leh a nuntang khosak khohei uh na thei
chian ta ding maw ahon cisuk guapguap hi. Kimte inleng Thei chian lotel
chih kia in a dawng hi.
A chihleh, nang tun ah bang chih leng hoih nasa hiam chi in Siamte
in a Lawmnu a hon dong hi. Ka thei zou kei e. Keizaw hiai hakkol ah pan
suahtak ka ut lota hi. Hiai apan nang alampi ding na hon ngaihtuah sak a
peksuah ahita mai hi ka thil tup chin Kimte in ahon dawng hi. Huai phet
leng hilou ka sungkuante phone leh bang ngaihdan a nei di uam ? Ahih
kei leh ahon it lai ding uam? Chihte leng ka question lianpen ahi a chi
non a.
Tomkhah kingaihtuah vungvung kawm in, Aw ! I Society leh khotang
mite'n hon mu le uh bang chin ahon mu ding ua. Kei ziak a vaite tampi
in I Nam I Pau ihamte i tawndante hon simmoh sak a bang mahlou a honna
koih maimah ding uh hia chih bang leng ka ngaihtuahna ah a lian mahmah
khat ahi ahon chi leuleu a . I society , i lawmdangte, ka Nu Leh Pa ka
sungkuante bang leng muh ding sih tuk phial in ka ngai maimah hi. Lawm
bang loh ding ka hiam ahon chi khia hi.
Huchi in Siamte in ahon dawng a, Lawm it aw lungkham ken. Ka hon
panpih ding . Na suang kuante number ka na zong khe dia ? Ka na kansak
dia Kimte in hichi bang ngaihtuahna anei a bang chin planning i bawl
ding uam chihte ken ka na sai fel vek ding a hon chita hi. Na hong pot
khiak chiah kuamah inn dang zuanlou in kou inn ah na hong kibu dia .
Airport ah ka hong kha ding ua Ticket leh thil bang kimte ken ka hon
saisak vek ding a huai ah lampipi hong om ding ahi. Himehleh, na pasal
tua i kimuhte , ka numberte na hilh hetkei dia ken hial thil teng ka hon
sai fel chiang in nang ka hon contact dia na Sepna number nangon hon
pia inla alampi ding hong om ding ahi, Chi in. Aman hichin ahon khamuan
a .. Na Nu napante na suangkuante I society hitaleh na muhnngamlouh
ding bel ka theih himahleh, a kisik theiloute sa a kisik theite hoih
zolai ahi. Chi kawm in lawm ihihna kei ka pan theihna sunsun den a ka
gen ah ka na pang teitei ding , a chita hi. Huchin ah nang leng hah pan
zosem in na hong pang dia na loh khiak sunsunte in na pasal zudawn na
ding kia hilou in nang taksa ading inleng na hon neding ahi achita
hi. Kimte in leng himah e a chi a. Huchi in, kingaihtuah a dah mahmah
melpu a awmlai pen amai ah nuih mel ahon suak ta hi. Aman leng hilua
ahi . A chih leh tuni leng ka pawt sot lota a hon na muangmoh dia ka tun
chia ka thuak ek ngai non mai thei ahi. Ka linlua kei zaw katan zaw
ahaksa ngei mai achi hi. Tung leng a zuman ding hon ngen dia ka neih
sunsun ka piak louh theihlouh ding ahi chi a hong gen zomah lai
hi...Huai ziak in Inlam zuan maita ni chih toh din thuah in ahong kizui
pawtta uh hi. Restaurant apan Kimte a car a Munirka tan va kha in,
Siamte in 1000 note a khut a tawsak kawm in hiai ana kem in a chi a
huchin a inlam tuak ah a kikhenta uh hi.
Kimte Inn a lut ma in akongbul uh atun in apasal phone a pau ging
zuapzuap aza pah a zukhamsa ahi chih leng a thei ngal hi. A lut ding a
lin sim mahmah a, himehleh lutlou thei lah hilou ahih man in ah. A kong
kiu in apasal in hong tung hakna chia koi ah hoh e hon chipah hi bang va
hihna hia zawl dang sai na hi maw chi toh a bag suhsak a thuah a abag
apan a ATM card laksak in apasal a pawt ngal hi. Amah lah Restaurant a a
kidikdikna khong gim gop ahihman in nitak nekding leng bawl peihlou in a
lupna a lum in a ihmu hithit mai hi.
Tua bang kal a Siamte zong intung in nitak a alup tak un, Apasal
kia'ng ah A Lawmnu thil hilh tengteng kim sipsip a hilh in ipanpih ngai
ahi. Amah ka neu apan ka lawm hoih mahmah ka na kituahpih gige sa ahi a.
A sungte number zing chiang apan zong sawm ka hi achi hi . Apasal in na
panpih mah ken nanglou panpih ding neilou ahihman in na panpih ngeingei
ding ahi, achita hi. Huchi in a zingchiang apan a sungkuante number
ahon zong panta hi. A vengte uh a theite khong hon dong in, ni thum
khit in Apa number ahon mukhe khong khongta hi.
Siamte in Apasal kiang ah bang chin ka gendia bang chin apate kiah
gen leng hoih ding ahia ? apa number zan in ka neita chi'n a gen a.
Huchin a pasal in ahon advice a. Apa kiah nang hoihtak in na kigen dia
Kimte gen tengteng kim sipsip in na gen dia. Amah suahtak ut a tua
haksatna a tuah apan pot ut leh kibawl hoih ut ahihdan khong hoihtak in
na gen sak dia , nang apalai hiding na hih manin kha pilvang tak in na
gensak ding hi. A ziak ahihleh Kimte leng a nungaklai a nu-leh-pa
thumanglou a , Hinkhua ana zang a , hiaitan tung ahih ziak in apate'n
etsaan theilai ahihna uah, na pilvaan mahmah ding ahi cin a hilh hi. .
Apa na houpih tam ngamkei leh a nu number apa kiah na ngen dia na
houpih ding aw, achi hi.
Siamte in Apasal chi bang in a pa houpih ngam chiahlou ahih man in a
nu number apa (Kimte pa) kia la in a Nu ahoupihta hi. Anu bang agen sung
teng kidik hithit in a gen khit in . Bang chi leh leng ka ta ka sisan
ka hinsa ahihman in Itlou thei ka hi kei a, A oifs number hon pia in
achita hi. Kia thamlou in bang chidan in thil isai thei dia ? Nang
mahmah hon poimoh ding ka hih man un anun a chi zawmta hi. Siamte in Nu
Ching huai zaw poilou lua ken leng ka lawm adia ka hihtheih teng tuh
hihdai kimansa ka Pasal kia leng ka genkhit vek ahi ta, achi hi. Nu
Ching in hichin hihni leh nang leh Kimte hong ki hounon unla, a hong pot
khiak theih ding ni khong hoihtak in hon ngaihtuah unla huai ahong pot
khiak theih ni ding chiang in , direct a huai nitak hia or Sun hia? a
ding in Flight ticket book ngal ding in ah, na A/C number hon hilh inla a
flight ticket man ding ka hon khak ngal ding, zing chiah achita hi.
Huchi in mangpha chin a kihouna uh a sutawp ta uh hi.
Siamte inleng Kimte Ofis phone number ah zingchiang in call pah in.
Lawm nunute leng ka houpih khinta a Papa houpih ngamlou ka hih man in
nunu kia thilteng ka gen khinta kisuanglahna ding omlou ahi. Nunu
papate kihonglua uh ahi achi suk a . Kimte leng kipak lua in ka thuakgim
nate atam lota suahtak ka utna sotpek ahita himahleh, kuamah panpih
ding ka mu zoukei a ahi. Nang huai ni a ka hon muhkhak nak thaman lua
ahi. Nang tung a ka kipahna a bei ngeikei ding ka damsung in chi hi.
Siamte in pautuh in, i Maw nunun na flight ticket manding bangleng tuni a
hon khak ding ka hi, abaih theih pen a na hong pot theih dingdan i
ngaihtuah ding himai. Lemgelna a poimohta aziak ahih leh bel na kikheng
na ding na tawm Inn apan na lakkhiak theihkei lehleng a poikei. Himahleh
bang chik chiang in na hong pot thei diam, chihpen ahi ka buaina. Na
flight ticket ding bang lak ngai ding ahih man in, kia thamlou in
Airport tan itun aman[nna pasal in] ahon trace theihlouh na ding a thil
ibawl ngai ahi, chin a kihou ua. Tua zawh in Kimte in lawm aw ka kipak
lopetmah buaisim ka hihman in ken huai ka hong pot theih ding hun ka hon
hilh dia, hichi'n hunsak phot ni aw, chin ahong kihou ta uh hi.
Bang teng hileh ka suahtak na ni ding ngaklahta ing chin Kimte bang
alungsim a kipahna guk bang nei hileh kilawm kisa in, huai laitak bang
mel a muh theih hileh a melbang kipah mel in lang leh kilawm asa hial
hi. Nidang hundang adan in alungsim leng neukha kha hong pai hoihtheita
ahihman in. A ngaihtuahna leng ahong lamzang deuhta a ann leh tui
ginatak a ne ngeilou himahleh, tun zaw ann leh tui neklut leng ahong
nuam deuhta hi. A lungsim in a sepna a om kawm in, Aw Siamte nang ka
hon muhkhak kipak hina maizen ing e. Pathian in ahon sawl hiding eive
maw chi'n ahong kingaihtuah khe vungvung a , Pathian min bang leng
mangngilh phial hita mah leh a hinkhua a "ITNA A TUAHTE" ahon ngaihtuah
khe panta a. A lamhaihna leh sulkik a lel nuam dante ahong lang kheta
hi. I tung sunni tumlam a zaw ana suak samlou ahi ve !!! , chi'n ana
sep a sem zomta hi.
Kimte in Apasal a et chiang in, huchia zukhamsa in om in hehsan gige
mahleh it in a it mawk a, paisan ding achih chiang in khat veivei
nungkaih bang, suakta utlua hinapi in, avei thei zel hi. Himahleh, tua
bang kal a ahaatang thak tinten na bel ..ITNA DIKLOU A TUAH kha nna sa
mahmah in , Takkheh ! chia a haapet in Kei hon it taktaklou pasal a
neikha ka hi zaw a bang dia khen ngamlou ding ka hiam chi'n thathak
ahonla ding ka hi chih thupukna amah leh mah in a kichiam hi. Ken hon
itloute leh Society tuam a hon huai thei ding leh ittheih ding omlouhna
mun ah bang dia hiaitan lawmlawm ana vaitham ka hita hiam ? Khalam a
suahtaknate zaw genphak hikei mahleng Ka Neu apan a Khristian Innkhuan
apan khangkhia hisam ing a, bang dia hichi bang a ana tuak ka hiam,
bang haina in honna buak ahiam? Hichi bang hinkhua zang dia ka na kipiak
mai maw !! ka Innkuan ka lawmte natan leng theih phaklouh a, amah ka
itna liauliau a hinkhua ana zang hi'ng a. Himahleh, tua hiai bang tan ka
tun, Maizen ! maizen ! silou phet a hai ka hih dan leh, Lawm le
vualte'n Vaite ana gengen uh ka thei telta. Mite'n ahon gensak lai un
ahon hazat ziak ding bang u leh ahon muhdan ziak uh ahi chi peuh in ka
na la zawmah a. Nunu Papate gen kia bang leng kibawl hoihna tham ana hi
a chin , alungsim suangtuahna ah ahong lang ta dundun mai hi. Gen leng
le gen zohlouh a gelh a le gelh senglou ding Hinkhua " ITNA KA TUAH "
tuh miten a kip akoi in hon theihpih kei mahle uh. Kenbel, tunzaw
hiai bang namdangte Itna taklou leh kimawlna ding lel a hon na zat ut
pen uh, theisiam mahmah ta ing e, chi'n amahleh amah kihasuan non
leuleu hi. Ka suahtakna lampi ding ka genta ding hi. Hiai bang hinkhua
ka damsung a ka zat ding zaw ka ngainam kei a, ka kiphal kei chi behlap
in a kichiam thakthak zozen hi.
Kimte in leng kal khat khit in a lawmnu ( Siamte) kiah, Lawm
kalnawn Nilaini a ka pasal nitaklam a alawmte toh party ding chi ahih
man in Dakkhat khong a pot ding ka hi chi a , huai ni nitaklam hia ahih
keileh a zingchiang zingkal dakthum lak ding khong a flight ticket ah om
diam hon enve chin Ofis apan phone in ahilh pheita hi. A Lawm nunleng
tun ka hon en ding zing chiah dakkhat khong in Nunu na ofis phone number
ah ka hon houpih ut a chi a ana ngaihven in aw Siamte in chi hi. awle
chi'n kenleng nitak lam chiah lenna ticket ka na en ding a lem leh ka na
langal ding aw chi toh mangpha kikhak in ah lawmnu toh ahong ki houna
ahon nei nonta uh hi.
Kalkhat khit kalkhat ahong paiin, a chih ni hun uh hongtung ding hita
leh huaiban a Siamte toh a lemgel teng uh Kimte Nute,n leng theita ahih
man un. Siamte in Nitak zan dak giat a ding in Indigo Flight zan pai
ding khat a om a , huai ah napai mai ka hon deihsak zaw a huai ading in
ticket ka na lata maive chi in, nunute'n leng honna don ding uh ahi ,
Amau leng hilhkhin ka hita chi in Thohlenni nitaklam in Siamte in Kimte ,
a ofis number in ahilh pheita hi. Tua a zing chian in Apasal pawt ma in
aman leng Nasem dingdan a kisa khia in a Inn gei deuh ua Apasal pawtta
hiam chin ah theihbatna ding mun a ngak in apasal pawt khit in Inn ah
paipah in bang mah dang toilou in a van neih sunsun silh in leh a mobile
leh handbag neuchik a kikhekna zualtheih thilte tawi tetauh in inn tuh
ahon taisanta hi.
Kimte in Siamte phone pheipah in Inn apan ka pawtta a, RK Puram
Sec-IV Outer Mudrika Bus Station ah ka om achi a, Siamte in ka hong kuan
ngal honna ngak in chih toh innkong lam delh tuah in car hekhiak in a
vapokhe geihta mai hi. Lampi ah houlim zomah in Kimte in a kipah dante
leh nuam asakdante gen in hun ahon zang ua , Kimte in Inn ah Ka laibu
kal a note ka nusia a, Hichin ka gelh i achi hi.
Videsh Kumar,
Honna zong ken aw, ken Nang ITNA TAKLOU ka tan khamta ka
hi manin hinkhua nuam zaw zang ding in Inn ka taisanta. Keibang leltak a
numei hai North East mi innocent deuhte ana khem nonlou ding in ngetna
ka hon nei hi. Kei thuak teng leng hun ka sata hi. Himahleh, nangleng ka
pasal ana hikhata na hihman in hai nuamdah inla ana kibawl hoihta in.
Mihing i hinkhua ah haksatna i tuahte'n hon hilhpil ahih man in tun zaw
kei a kipan sum-leh-pai na hon ngen phanon kei dia, vuak leng na hon
vawpha nonkei himhim ding. Kei ding in suahtakna ni thupi ahita hi. Hon
gen non mahmah ken ken leng ka mumang nangon inleng muhding in leng ka
hon deih non kei hi. A tawpna pen ding in ITNA TAKLOU na hon pia a
kimawl na ding lel a na hon zat pen keidin ka sulkiklelhna lampi hizaw
ahi. Hon it hon ngai chimahle chin na itna taklouh dan ka thei chiangta
Iki it iki ngaihlai bang toh iteen khawm nung Sun-leh-zan a kikhia
ahihlam ka thei chiang lota hi. Nou Vai pasalte bel huchi himhim nana
hihlam uh i kingaihlai a lawm-leh-vual , nu-leh-pa te'n ahon gen uh adik
kimvek ahi chih kei mahmah in a taktak in ka chianta hi.
Mangpha
Kimte.
Chin ka gelh , a mawk mai a amuh ding inbel ka koih kei a , nikhat
ninih khit a, a nasim a ana muh tei ding a ka gelh ahi achita hi.
Huchi'n Inn ahong tung ua Siamte in, nekding a bawlsate ahon ne
mengmeng ua dakguk lambang ahong gingsuk pah a. Siamte in apasal kiah
ka Lawmnu i vakha ding chin Airpot lam zuan in leh lamkal a sim card
zatding athak khat lei in a hong taikhe ziahziah ta uh hi. Dakkal khat
khong omlai ahih manin tomchik airport a nektheih khong nekhawm in a
kithuah ua . Siamte in suahtakna ni ding ahita a, Nang dia ka pan , a
kipatna ahimai thei a, a tawpna leng ahi mai thei, himahle ka number na
neih hiven innlam thute i kihilh tuah zel ding uh aw. Kou leng innlam
kon na zotsan tading uh , Chin Kimte leng Airport sung alut in chibai
kibuk in mangpha chikawm in, bye bye a kichituah ta uh hi.
BEITA
[Siamte in thu a zak dan in khabang zah hiam zawh in,
Kimte a Inn ua nu-leh-pa toh nuam satak a om in, Kumkhat khit khong in,
Kimte in Eimi Pasal a nei in nuamsa tak in akhosa uh, chi hi ]
November 21, Tuesday, at 11:45am
©Siamsinna leh Vakiangbu
Comments
Post a Comment