NUNLUI

By: K Minlun Haolai

Nitak lam hong hi a khua muikuan in ka hul liap tung a tu ka lung ngaih leh ka lungsim as nidang a ka neulai hunte hong lang zungzung mai a ka lawm kithuah pihte khawng ka lung sim ah a baan baan in hong lang hi. Ka Nokia 1110 hoih nawn lou simpi mek in contact ka baan mek suk dan dan a leh huai lai a ka lawmte contact khat chauh ana om kha lai a hiai kon dial dia a dang te amah kiang ah kon dong tawm mai di chi’n ka dial leh ana zang nawn kei zawmah lai hi. Lawmte khat bek a contact number theih le neilou chi’n ka kimawh sa sim hi. Inn sung ah ka lut a ka singlem ka hong a ka limlak te ka baan et a, ka lawmte toh ka kilim lak te uh kon muh bang chuh ka lungtang bang tingting chiin hon phawng zou hial hi. Ka skul kai lai hunte uh ka hon ngaih tuah khia a, skul kai a lawmte toh noptak a kithutuak tak leh hih na lampeuh a kithu mang dial dial hun lai te khawng ka ngaih tuah chiang in ah tua hunte bang hong kik thei hi leh maw ka chi a lah a hithei ahi nawn ta kei

Ka neulai a ka om dan te ka hon ngaih tuah veng veng in ka hon sut thak chen chen hi.

Zing thou phet tui tawi in huai zoh lai sim meng meng in ah thei law khol loupi, sim thei milmial chih chiang in ah theita chi in konglam kikhoh pawt in kong khak ging le zaman nawn lou phial in lawmte toh ka kimawl zel uhi. Zinglam dak 7:30 khawng hong ging chiang a sung ten hong sam un ah ut lou sim pipi khawng a pai nemnem in ann ki ne meng meng hi.  Ann ne zou phet kihah siang nawn meng meng in mai bang le nul man lou phial phial khawng in ka kisa zel hi. Huai kisa zou in skul lam a tung masa hih ut ziak in skul lam ma nawh in ka tai chen chen zel hi. Skul a tung masa pen a pang in a hong tung hak deuh te bang kana tawt bawl zel hi. Lawmte hong tung kimta chih chiang in, lawmta mi 5 leh 6 lak di khawng kizui in junior class te khawng ah va hoh in, va tawng in, ka va kimawl pih sek zel uhi. Huai lou in junior te va suheh chih khawng bang nop kasak lampang tak uh ahi. Tui duh le hilou pi in khel ziak man mai mai khawng in a tui puak te uh khawng ka va dawn beisak sek uhi.

  Pasal tha thak lai tak leh harh lel laitak chih mah tak in numei te samkilh kawng va laksak in ka sel sak zel ua, a khen chiang in class lak lai khawng in ah numei ma a tu te bang lastic khawng in ka pawng kap kap mai uhi. Ei a dia phat tuam na di khat le om kei mah leh khel ziak khawng in nop kisak in sak thoh mai hi. I junior te class te khawng a va ban lut zat zat hun lai te khawng toh i ngaihtuah chiang in tu khawng bang in ei tung khawng a hon tung hileh bang chi din mun in i ding tel di aw chih phet in a om lel hi. Skul kai tawp ching in lawmte toh sawt deuh kithuah leh sawt deuh kizuih theih na di’ng bang in lampi sau lam bang kitawn zel hi. Inn tung phet in sun ann ne in huai zawh chiang a kholai lam kizuan nawn leu leu hi. Lawmte toh kimuh tuah in khotaw lam khawng a mi koltu huan khawng a koltu gu di’ng khawng a a lom lom in kikuan zel a, koltu duh ngel khollou pi lah khel man mai mai ziak khawng a koltu te bang va baan sat sak chih khawng nuam kisa mah mah hi.

  Nitak ann nek khit khomui kuan ahih chiang a nungak hel di pian a lawmte toh mun khat a kingak khawm nei nai zel in kingak na bang a hun tam pipi lut zel, a tung hak te bang heh san bawl in kihan khum lala chih khawng thang a kithang sak mai. Kua mah a heh chih lah om ngeilou in gen di khop bang thei a thei mai, chih dan bang siam a siam thei mai. Tulai dan khawng a mobile phone khawng om hi mai zen leh text message khawng a hong kinve chia kisap sap in om in teh. hehehe.... Lawmte kim ta chih chia koi lam e tunitak i hel di uh chia kikan nai nai zel in hel khak ngeilouh na deuh om khak chia huai te hel dia kuan zel. Mi va hel mun luat le hon ngaih na uh dau deuh ahi chih ka thupi uh a hih chia mi khat vei hel in ni thum khawng hel lou in adang a tuan zel, amau hon miss ua hon sap chiang a va hoh thak chih khawng ka dan uh ahi hi. Nungak te inn a hoh di chi a kuan nai nai in a inn uh tung chiang a a lut masa di kinolh tuah tuah in hoh lou a kik ni bang le tam a tam hin maw.... Huchi hun lai khawng mah nuam hi na maizen e chih in om phet lel hi.

I hong lian deuh sim a pil i hong kisak sim deuh bang a chuh lawmte toh gang chi dan deuh pian sim in mi 7/8 lak khawng i hong kithuah a nitak chiang in LAMKA khotual teng khawng i hon fangkual bang chuh kei kaan om di hia kichi nuam phial hizeih a tak a lah bang le hi ngel khol lou. Hahahaha...... Gang dang khawng toh kituah khak ngei ngei leh chuh kisual lou chih omlou chi le a uang lo diam ah. A thu leh laa le om le hilou kipawng pawsual chih khawng kithang a kithang sak mai. I ngaih tuah thak thak leh hai a hai huai mai eilah huai hun lai a ki a kipil sak. Ka nuih aza ka gen lel a le le. Kisual chih i sung kuan ten a hon theih ua leh tai kithuak zaw mah lai, a hon tai chiang bang ua kisuang lah law dan dan a kiom in hih di theih lou man a lai khawng va kisim thak jojen, a zing chiang alah a ngei ngei a kingei thou.

  Summer suty i hon nei bang chuh aw nak nawp hina maizen eeee!!!! Nungak i hon ngai tei sam a, sunni sapi nuai a a hel dia kikuan chen chen in nitum dong va kiom, a bang pi va hih kei mah le a kiang ua om khawng nawp kisa a kisa hi veh aw. Nitak ann ne dia inn a pai cheuh in ann nek zawh chia nungak te inn mah tung kik zel. Ei inn tak tak bang chuh zin tun na mah bang hial aka hia. Huai hun lai leh tulai a kikhai gawp ka chi lou thei kei. Tulai kihel om thou mah lele huai lai hun a bang nawn teuh kei chi leng ka khial kei di. Tulai a ten itna kimawl na di bang in ana zang mai mah ua, nidang a kingai te kan kan chih di kathei kei, ana kip deuh se uh hileh kilawm a bang. Tulai zaw a hi nawn mah mah kei, text message a kihel a hih ka leh facebook tungtawn a kithei in kingai chih khawng hi ta. Et na khat in chuh a hon dawn za’ng khai mah mah lel ve.

  Nidang hunlai te khawng mah nuam zaw hilou maw? chi mawk le nou nathei kha di uam ah hehehehe.......Khopi lam deuh a piang ten bel huai bang hun nuam na zang kha kei di’ng ua hi ven ah, kipil sak mah mah bang om lai huai hun nuam le zang kha lou khawng chi gawp gawp ni. Huai lai in chi thak thak le ah lawm leh vual te toh kithuah a khat-leh-khat kina kisual, kivua na hang a lah a khonung thu-leh-laa chih gen-leh-sak om tuan nawn lou hichia veng mai hi in kathei hi. Tulai in bel a khonung thu a heh a heh thak chih khawng, a thau kha ten ah phuba lak sawm tei tei in va kuan lang lang khem peuh bang mah lah lohtak neilou. Veng naak sa’ng a sau pi buai loh chih bang tam a tam mai. Laisiam na lam hi in pilna lam hita leh tulai a te a pil diak ua, naupang chik chik in nidang lai a upa pipi ngaih tuah na tan le a ngaih tuah thei ta phial uhi. Ki-el na ngen ahita a, vual tungtuang louh di lau ngen in i om ta ua a kipah huai him him.

  Tua teng ngaih tuah a ka tut dedu lai in ah ka Nokia 1110 hoih lou pi a hong ging leng leng nawn jejen a, ka kiguih zen. Ka et a leh Idea Cellular Company te ana hilai zang ua ka ngaih tuah na teng a hon khek gai vek ua ka thang a pai pet mah. Huchi in ka hun lui te sut sut leng zong hun mual liam sate gong kiik thei nawn lou di’ng ahih chiang in chi in hun lui ngaih huai te MANGPHA khak in ah mailam hun di’ng geel ding hi chi’n ah ka zaal khun tung a tawl dam din’ng in ah ka lim et te ka singlem ah ka guang kik nawn hi.

KA THU KHIT NA IN:

Ka seen vual lawm kholh pih te aw na heina peuh peuh uah sian huai na’n tang bang dam in . . . . . koppih leh von deih zatam hoih tak mai leh a inn sung nuam bawl thak diin sian in hon huai in tangbang hong dam un aw.

Special Thanks To: UMuan Ton's Dsp @ George Tonsing For his dedication in helping me in writing this story which without him i could have never complete. May God bless him!

©Siamsinna leh Vakiangbu