HON NGILH KEI NING
By ~ Tuan Phualte
I Will Remember You
(A short love story inspired by this song)
I Will Remember You
----by Amy Grant
I will be walking one day
Down a street far away
And see a face in the crowd and smile
Knowing how you made me laugh
Hearing sweet echoes of you from the past
I will remember you.
Look in my eyes while you're near
Tell me what's happening here
See that I don't want to say, good-bye
Our love is frozen in time
I'll be your champion and you'll be mine
I will remember
I will remember you.
Later on
When this fire is an ember
Later on
When the night's not so tender
Given time
Though it's hard to remember darlin'
I will be holding
I'll still be holding to you
I will remember you.
So many years come and gone
And yet the memory is strong
One word we never could learn
Good-bye
True love is frozen in time
I'll be your champion and you'll be mine
I will remember you
So please remember
I will remember you
I will remember you
I will remember you
I will remember you.
**************************************************************
“Ulal, oi damjel maw?”
Chia aw gin na lam adak phei leh Grace ana hi maimah a, Biakinn kong
ah kibingtuah kha phut in, gen ding zosam thei leng omlou in tawlpikhat
sung chuh a ki entuah kha heuhou zawzen uhi. Mi’n lamdang asak khak
ding uh venna in Lalboi in leng ava naihphei a nuikawm in chibai a
kibuuk ua, akhut-te ubang a kimek kip tuahkha tinten ua, hileleng amau
bel akhut lamlam uh leng a phawk ban kei hial uhi.
Lalboi lungsim ah bang dang om theilou in Amy Grant lasak ‘I Will
Remember You’ chih la aging nilouh hi. Tua adinmun lel utoh kituak asak
luat man in. Grace toh high school akai lai un ana kingai khangei ua, a
nih ua dia first love tuak ahihman un a ki theihsiam dan uleng ana
thuuk mahmah bik hi. Ki it kingai maimai hilou in lawmhoih tak ana hi
zomah lai uhi. Banah, hiai la khelkhel angaihtuah khak na ziak ahihleh
huailai a atuailai lungsim utoh amau a ki-it nak ua leh kihtak leng
neilou a khovel leng choungap ding khop a aki-it lai un anih un hiai la
hoih anasa tuak mahmah ua, asa nu leng melhoih sa in ala kaih leh a thu
mahmah leng hoih ana sak tuak mahmah uh ahi hi. Huailai in bel ala thu
sang mah in leng ala kaih mahmah nalh ana sa ua. Tu’n bel hiai la in
amau gel kalah naakpi tak in gen a nei taktak ta mawk a, anih un milak
pi ah gawlbing ekok leh lungsim nih ngaihtuahna kibang khat nei in a
khut uh bang ana kilen kha den tinten hial mah utuh ahi hi.
Lungsim taktak toh ana ki-it in ana kingai mah le uh leng Sian lemgel
louh hia zin’ doh-ai hia kiteng khalou in ana kikhen kha mawk uhi. Tun
bel kum 15 bang ana pailiam ta a, Lalboi ngial bang in houh azi in a
beisanna kum khat bang ana pailiam manta a, tanu kum khat a upa khat
anutsiat zomah hi. Grace toh a kikhen khak nung uh ngaihzawng tatak
leng neithei nonlou a, alehkhasim lammah chi tinten ana ahi hi.
Hilehleng asungkuan te thumanna in Vungnou toh ana kiteng ua. Grace toh
a ki-it dan loudeuh un bel Vungnou toh amau khomkhom in a ki-it veve
thou uhi.
Hilehleng hinna leh sihna tung a thunei leh vaihawm Tupa’n mihing-te
tungah lamdang taktak in na asem thei jel a, mihing-te ki lamet louhdan
tak in vai ahawm thei him hi. Himahleh Pathian lemgelte atungin
theihsiam hak bang sek mah leh leng atawp a ei hoihzawk na ding ahi chih
tuh Lalboi in ahaih tuan kei hi. Ahilel a gen in lehkhajil nalam leh
sepna lamah nakpitak a vualjawl in om mah leh leng itna lampang a
vangtah leh tongkhong kisa mahmah in khat veivei bang aki ngaise thei
sek hi. A tanunu pai belbel a pau kisin pan melhoih tak leh maitai
chiutiau a et chiang in bel mi muhlouh kal in khamvual louh in khitui
anul khanak sek hi.
Tu’n azi in abeisan pen puakdan siamta leh a tanunu’ ading leh a
khotaang’ uadia ahinkhua omlai teng manpha tak a zang ding, leh koppih
leng nei non selou dia a lungsim a khensatna abawl khitphet a Grace toh
hichibang a aki muhphut un akidektheihna dengdel takmai leh dawnsuang
khe dia kisa pan kiangkiang teng nuai chimit vek zou in athei hial hi.
Hiai numei nu pen, chihmah chiang a leng bei ngei nonlou ding itna
tawplou a ana it gige lai ahi chih amah-le-amah a kithei ngal mai a.
Nidanga lungsim guh takmai toh ana khaamzoh gige leh ngaihtuah pha dia
leng a kigintak nonlouh, Grace a itna na ngoihngoih te tuh tu’n athak in
khamvual hinon talou in hong suak khe sonson non uhi.
“Grace, nang lah nana hi maimah a. Damjel chih ding hi’n teh. Nang lah?” chih teng chauh in Lalboi in adawng thei lel hi.
“Kei leng damjel,” chi’n Grace in a dawng a. Mi lak a deih bang a
kihou thei lou uh ahihman in huai teng khawng a kihou thei lel uhi. A
khut un bel thu tampi mahmah a gen uhi.
Grace in amai a dingpa mel a enngam mahmah kei. Azi in abeisan dan
khawng leng athei vek a, tanu neuchik khat nei ahi chih leng a thei a,
alainat law mahmah hi. Nidang a thahat takmai leh mel et mai a leng
lungsim leh thatang hat mi ahi chih theih dikhop a kilang khepa tuh tua
lungsim sung guk tak a sukbai a om ahi chih etmai a leng theihtheih
dikhop a om pen et hak asa lua a, alungtang teipi a sut bang in na asa
hi. Aman leng hiai Lalboi a itna pen sidek neng nailou ahi chih aki
thei mai a, tua a kimuh un aman leng nidanga ala deih mahmah uh alungsim
ua om tuak ahi chih athei mai hi.
Grace leng Lalboi toh a kikhen nung un mundang a om khia sepna bang
leng va nei khia ahi hi. Ngaihzawng bang nei zezeuh leh leng pasal zaw
anei hial kei hi. Angaihzawng te’n kiteng din kunsek mah le uh kiten
ding tatak pen hi asa thei kei bilbel mawk a, huai naksang in huchia
akut chiang bang un a kikhen kholoh zomah sek uhi. Huchibang a aman
leng kum 15 bang ana zangbei ahimawk hi.
Lalboi toh a kikhen un chu aman pawl 10 azou pan a, Lalboi pen in bel
12 a zou ta hi. Akal ua kum 2 kechet ahi hi. Huchia ki it tak leh
kitheisiam takmai a aom lai un akal ua thuseleng te ziakin amau-le-amau
leng kimuang zou nonlou in a kikhen khak loh hit-het uhi. Huailai in
naupang chiklai himah le uh leng a ki-itna uh bel ana piching mahmah
khin hi. Tu in bel piching tuak ahita ua, angaihtuah na uah leng
piching ta, pil leh suanhuai huntawk ahituak ta uhi.
Huchia hong kimuh hial ua khut bang hong kilet hial ua leh hun-le-kum
te tuh kileh hei thak a kum 15 a nungtawn thak bangmai in Grace in a
thei a, ana kikhen khak na thu khawng uh angaihtuah na ah hong om
zungzung a, haihuai leh naupan huai, lung pichin huailou athakin asa non
mahmah hi. Hilehleng huai bel hun paisa hita ven, ma-te? Tubel tu ahi
a, tu I chih tuh thilpiak manpha tak ahi Saap ten chisek mah uh hilou
hia? Itna diktak leh thuuk tak mai lungsim nih in a kikop pen uh tuh
mawk na abei mai dia Pathian in leng lemsa lou hin teh. Tua a kimuh
khak uleh thil omdan teng khawng amau gel ki-itna pen khoilet leh
sukpichinna dia Pathian in hunlem amau adia bawlsak non bang a ngai in
Grace tuh kipahna gen vuallouh in a pumdim a. A lungsim gukin Pathian
kiangah kipahthu agen zaw ta hi.
Huchia Biakinn konga adin khawm lai un Lalboi nu’n Lalboi tanunu hon
angpawm in hong pawt khia a, Grace amuh in hong kikou phei zaakzaak a, a
kichi bai uhi.
“Grace! Lawmlawm, ana damlai na maw,’ chi’n Lalboi nu hong nui phei lahlah a.
“Hi, dam lai sam. Nou lah na dam vek na umaw Numang? Oi, hiai Ulal
nau hia? Ka iplah lua. Koi dih ken kon pawm khel di,’ chi’n Numang nau
pom lai a suh a, aman angpom kawm in Lalboi toh thuvantaang khawng
kikum in innlam zuan in Biakinn kong apan apai kheta uhi.
Numang in anung et vangvang a, kilawm khawm uh asa mahmah a, a tate
(Grace pen ta bang a ana et gige him leh ana deih gige him ahi)
kituaktak a tonkhawm utuh lungmuan na riau khat anei mawk hi. Huchia a
om lai in a innveng nu akiang ah hongkhawl tei a.
“Lawm, akilawm khawm tel uh maw. Amau gel di mah abang uh,’ chi’n hong chiamnui a.
“Ahi ding mah ahi a eivoi,’ Numang in leng chiamnui kawm lah thutak kawmtak in a chi a, a mittui anul hi.
Lalboi toh Grace pen alawmte uh ahaza pawlkhat a om ziak ua ana
kikhen khak na ziak khawng uh Numang in leng ana thei law tham a, poi
ana sak mahmah ahi hi. Lalboi pen achihtak dan atheihluat ziakin midang
Grace angaihbang a ngai maimai lou ding ahi chih leng a thei lua hi.
Hileh leng lungsim pichingtak nei mi ahi chih leng a thei lua a, thil
hoihtak a I gen pih leh thil omdan theisiam pahpah mi leng a hi hi.
Huaiziak tak ahi, Grace mundang a ava om mangdet nunga aman leng Vungnou
nu-le-pa toh kithutuak a, Lalboi toh ana gawm na san. Vungnou toh
kiteng dia a kut lai in leng Lalboi ut kholkei mah leh thil omdan
pomsiam leh theisiam pahpah mi ahihziakin hong kiteng ngei ua, amau
khomkhom in nuam asa mahmah thou uhi.
Himah leh ahunlou pi a Vungnou hong sih phut chuh Numang in leng puak
hak asak mahmah ahi hi. Adiakin atapapa angaihtuah chiang in, pasal
chihmahtak angaihtuahna te leh a thilvei te gen khe mengmeng lou a
alungsim a po kekuih mi ahihziakin a tapapa tung a vangtahna
athuap-athuap a hong tung bang in angai a, a thuaknat pih mahmah hi.
Tuipi dai dide a aluan leh thuuk (deep) ut mahmah ahi chih thupil kigen
khah Lalboi tung ahouh dikdiak ahi chih athei lua hi. Huaiziak in
Pathian lemgel khah theihsiam hak ana sa mahmah hi aman leng.
Himahleh tua Lalboi leh Grace lampi a tonkhawm leh Grace in Lalboi
tanunu Hoihnu angpom kawm a nui khawm lalaih uh amuh a leh halhthak na
khat a hong nei ta hi. Toupa, na lemgel hiai hi’n teh maw, achi lungsim
a, a innveng nu toh amau leng innlam zuan in apai sam ta uhi.
©Siamsinna leh Vakiangbu
©Siamsinna leh Vakiangbu
Comments
Post a Comment