ITNA

By ~ Bhyak Hawxel

Hiai gentheihna leitung a ka pian khiatma apan inleng ka nu'n genthei tak leh gimtak a hon pai ana hihziak in ka pian khiatni apan duat tak a kep in kana om chih tunung in ka theipan hi. Damthei loutak a kana omtou gige ziak in unau ah neupen hikei mahleng a neupen banghial in hon kem uhi. Ka nu leh ka pate'n tunung a hon genchiang un hiaitan hon dampih ding a hon lam et louhdan uh hon gensek uhi. Kum 2 kapelh in skul hon kai sak pah uhi. Kanu leh kpa'n lehkha lam angai poimoh mahmah ua,ka homework leh lehkha ka sim ding chiang in ka bul ah honhilh ding a hon ompih gige man un lehkha lam ah buai na neilou in class ah leng asiam pawl hi in ka ki thei hi.

Kou sungkuan ka hih uleh mi 6 ka hi ua unau 4, pasal 2 leh numei 2 ka hi uhi. Kei alianpen ka hi hi. Kapa ahih leh sumdawng mi ahi a lehkha lam ah graduate zou ahi a kanu ahih leh inn ah koute enkol di'n a om hi. Lehkha lam a pawl10 zou ahihsam man in lehkha chu honhilh hilhthei hi. Mi bang a hausa hikei mah le ung kou khomkhom in nuam kasa zou sam uhi. Mite eng vungvung ding in hin koihlouh man un hampha kakisa hi.

Hunte hon pai liam zelzel a dam theihlou kawm pipi himahleng pawl nga kon zousamta hi klas ah leng pasal himahleng lawmpawl lua in ka omkei hi. Mibang a damthei ka hihlouh man in lawmte chih nateng ah leng ka zui zoukei sek hi. Pawl 6 kasim kum in final ekzam ding kuan in khosik in gim chihtak in gim

in ka hong damlou taguih mai hi. Exam ding maban ahihman in ka lungkham gu mahmah a keisang in ka nu leh pate alunggim zaw a katheih man in kaki halh sak alehkha sim teitei katum sek a himahleh kahi thei tatak kei hu. Kanu, ka bul ah mualdeuh a om kamuh chiang in ka hehpih mahmah a himahleh ka hehnem thekei hi. Ekzam hun ahongtung a keichu ka exam theita kei hi. Huai hun inchu ka pa le a sumdawn nalam ah a zinkhe kei hi. Ka naute lehkha sim kanu'n aveng a kanu'n inn na teng leh kei hon enkol hi. Kha 2 sungbang regular tak a daktor kiangphak gige chu a nin huai mahmah hi.

Huchin Pathian hehpihna toh k'ong damkhe zow hamham a, huaizoh apad tuh hun pai kin abang hial hei. Damlouh na ziakin Krismas le Kumthak te deih bang in ka zang zoukei hi. Huchin admisson bawl ahon hun nonta a, keicu pawl ngei a tut ding lin mahmah ka hi. Himahleh vangphat huai tak in skul hehtu lianpen deihsak na in ka pawl ka suan thei hi. Pawl 7 bang hong kihisam ta skul lut di ni bang in zumhuai sak na sim bang hong omthei mok dan hi.

Hiai kum inchu ka damlouh nawn khak ding ka lau petmah hi. Lawm le ka pawl vak kei hi. Lawm ngaina lua ka hikei, ka pau tawm ziakin min le hon nel vak kei uhi. Dam in kum bang hong bei ding kuan ahi ta a, ka naute lehkha hilh dingin ka nu le pa man gige lou ahih manin ken le ka hih theih khomkhom in ka hilh zel hi. Pasal himahleng a lianpen ka hi na ziakin ka naunu sep innsung na khong ka seppih zel hi. Kumtawp exam zou result bang le hong suak ta a, ka naute pawl 4, 2, 1 ahi ua amauteng le pass ua keile ka pawl ua 3na ka hi zou sam hi. Pawl suan thei vek din ka om ua kou khomkhom in ka kipak ciat uhi.

Hunte hon pai liam zel in, skul lut thei non ding in ka om nonta uhi. Tutung inchu ki tangval sak pian ngen in ka pawl te aom ua, a group a ki thuah in nitak ciangin nungak hel ci dan khong in pot sek uhi. Ken bel lom dingin ka pawl ua lehkha siam thei mahmah 1 toh ki thuah in kou bel lehkha ka buai pih zo tangpi uhi. Ka pawlte khen1 bang in pawt dingin hon zon sek mah le uh ka paten hon phallow ding ci in ka nial sek hi.

Hunte hon pai in kumkim exam khin khakhat khol na hun ding ka nei uhi. Ka pawlte u chu lampi dung khong a pot zaizai sek uh. Keibel ka innkuante toh hunzangin ka om uhi. nuam le kasa zo mai hi. Nitak khat chu ka naunu'n a lawmnu kiang a hoh dingin hon zon a keile kholai pawt himhim a, ki sukharh bang ka ut manin kava zui hi. Huchin lut in tutna 1 a ka tusuk pah hi kei bel pawtam lou in ka naute kihouna khong kana ngai vel maimai hi. Ka nau lawmnu a unu toh ana om uhi. Ka nau in alawmnu min Parte ahi a, a unu Chingboi ahi ci in amau zak dingin hon gen a, amanle ka upa a hihle Lalboi ahi hon ci a kenle ka nau kiah, Siami sese cin ka cih komin Chingboi ka et phei guih le honna nuihsan a, keile ki suanglah kompi in ka nui mai hi. Dak 8 bang pel dek ta Siami paita le hilou mo ka cihleh. Ana khol ve ka gending u ka zow naikei hon c a, Parte in na kin ngei zezen hon na ci thuk komin U lal ana kithuah pi ve a cim gop a hinteh hon ci a, koule Chingboi toh ki entuah kha in chingboi in, nunagk hel hile lah pai ut nai mahmah kenteh honna ci a, kenle sese sek mai kana ci napnap hi. Hucia ka omom sung un dak 9 a ging dek a pai din ka kesa taktak ta uhi.

Sun khat Siami toh ka nu bazar lam a phak kal un Parte te unau honh hoh ua, kei kia insung a tv en in kana omkha hi. Hong lut ua ka nau, ka nu toh bazar pawt hong tung dek ta ding u ci in ka tutna tung ua lum lai ka thoutou hi. Parte in na naute gel la leh hon ci a, room ah game kimol khog hi unteh ka cihleh, keile kava lut deh ki kimol nuam ci in Chingboi leh kei vuak hon omsak in room a hon lutsan hi. Kou gel cu pawtam lou tuak ka hi na ua gen di vak le ka theikei uhi. Ka tv et uhi nuihna ding omlua hikei mah leh a changin ki-en tuah in ka nuikhom kha sek uhi. Kenle Ching nang bang na en nuam deuh a korea firm (film ci di pen zum ziak in firm ka ci kha hi) k cih zoh in ka nuih ek uhi. Chingboi in hon en zel a a nuih pen kana en nak lokha anuam sak lou mel deuh in a nuih lai hon top a ka ki-en tuah dedu kha ua keile nuamsa lou in ka etna bang ka kheng lolop h. Chingboi kana muh mun sim himahleh tuhun in ahoihna tak ka mukia a, huaizoh nung cu ka dip bang hong hom pian simta hi. Huchi in ka nute hong tung ua room lama ka naute leh Partete le hon potkhia ua, Ka zang tuam deuh a bang hi.

Hunte hong pai zel in skul ka hong lut non ta uhi. Niteng in Parte te unau toh kiton gige ka hihman un ka hon ki nel ta mahmah uh. Nuam le kasa panpan h. Chingboi toh bang sms tungtawn in ka ki thuzak zel ua, ka no sak na zong uh khong ka ki dong kual ua ka mi ngaihsang zong khong uh ka gen khomkhom zel uhi. Niteng a skul kuan leh top a kiton gige ka hi na ua min muangmoh na ciang bang hon nei uhi. Kou bel huai lam thu himhim ka phok kei uhi. Chingboi bang skul a miten melhoih a agen pol uh a hi man in, kei bang hon iplah un ka thei hi. Himahleh skul abel teachers ten hon deihsak dan a atheihman un bang hon loh ngekei uhi. Kholai alah ka vak tamlouh ziakin a khut uh ka thuak kha ngekei hi. Kenlah Chingboi toh hunzat nuam kasa semsem a, amah hong kailouh di bang ka lau thei petmah hi.

Kumtawp exam zou in khol ka hita uhi. Ka pan a sumdawng na lama hon tonpih som a, kenle zui dingin ka kisa pah hi. Ka zin pat nang ahi a phur na ciang ka nei hi. Zingkar a zinpah ding ka hihman un, nitak le ka imu man lua in ka kitheikei hi. Ka zin ni ding uh hon tungta hi. Ka pa toh station lam manoh in auto in ka tuang suk uh. Chingboi te veng ka ton kha ua Chingboi ka mu a, ka sam a hon mupah kei a keile ka dak khiat le hon mu a, kenle bangmh ka gen man nonkei a ka nuihsan top hi. Station ka tung zohnung uh sot lou in ka taikhe pah vanglak uhi. Zan khovak a ka pai zoh un sunin ka zin na mun ding uh Gwahati ka tung uh. Hotel ah ka om ua tuni chu hicia om maimai phot ding ka pan hon ci hi. Ka cim petmah a Chingboi ka ngaihtuah na a aom den mai hi. Huai nitakin chu chingboi ka hici vei luat pen zo ki iit kingaite omdan toh ki bang ding in ka koih hi. Amel muh ding ka ut petmah hi. Hucia ka om kom a imukha ka hi dia, zingkarin ka pan bawi thouta in ci in hon phong hi.

Ka hih ding teng uh ka zoh un pai ding lam kon sai ta uh. Ka pai dek ni un gari pai aomkei h. Bandh cih dan ten hon nok kha a, krismas bang innlam a zat khak louh ding ka lau petmah ta hi. Vangphat huai takin ka hon pai thei khongkhong uh. Ka tung nizan in Chingboi kiah hoh ngal ut na in ka dim mok hi. Annezou in hoh di ka dia hohlou di ci a ki ngaihtuah na lama khua hong mial dek man hi atop a top inchu kava hoh som ta hi. A innkong uh ka tung in ka naak huai phot zezen hi. Kong kiuh ding bang haksa a bang sim himahleh hoh ngal a ci in kong ka kiuh le Chingboi aw ngei in hon lut in ahon kici a ka dai deda zezen a, ka ki ging louh lai takin kong hon ki hong guih a, "oi Ulal hon lut in" hon ci a ka lut ngal a, tutna pang 1 a tu in midang te ka kan le biakinn kai ua kei kia a innngak dia om ka hi hon ci a, kenle kon hoh fuh ngei ci in ka nuih tuak uhi. Chingboi in na zin di lam le non hilh louh vial hon c a, kenle hon hilh le kanna kenteh non phok kha tuankei dia ka ca leh ki oi thou hiaikhong va kici tel hon ci hi. Kenle non phok a moleh ka ci leh phok lotel nang non phok louhman hon cih khum hi. Hucin keile zum leh zah khual lou in, ka kiangah tu din ka sam kha guih mok hi.

Amah le hong tu a, hon tut hial lezo ci khong bang hon liing hi. Kenle Ching ken honna ngai keive cih teng haksa sa pipi in ka hon genkhe ek maizo, kei kana sah leh gum omding in ka gingta kei top hi. Aman lamdang sak ci takin hon en a, na cih maimai hi ahon ci a, kenle hilou eive ching hon theisiam ve, kon ngaihna pen kana im det himahleh tua hon genkhe mai ka hi, kon iitna hon theihsiam pih in ka ci leh ahon kun a adai a keile ka gen di pen theizok lou in ka dai a huaizoh in "Ching bang ci e" ka ci non leh kon kingaihtuah lai d Ulal hon ci hi. Kenle nang cih dandan himai ci in ka lungsim bang hong hom a gen di ka theikei a, ki houlou a tut tut dile a nute hong tung le mak asak khak di u ka lauh man in Ching kana pai dile ci in ka ding a, aman bel o cih teng a hon dawng in a nguai mah abang hi. Gate a Parte leh a nute kikhom top toh ka ki tuak ua, "Ulal na pai baih dek ngei ei hon ki tungpan a" hon ci a, kenle "nang omlou neihciah pai kana som mai ka hi" ci in ka ciamnuih a, "mangpha phot ole nidangciah kong hoh thak ding" ci in innlam manoh in lungsim nuam lou tak mai in ka pai ta hi.Inn ka tung in lupna ki den na in ka nei ngal hi. Ka nau Siami in honna theisim ahi dia, ka room ah hon pai a, na pawt na cu lohcing hetlou dan neive mo hon ci a, kenle khemkhem eive kana cihleh ka nau hon ki suanglah tuak lua a, kenle im nuamlou in ka thil tuah ka gen leh nangpa huai gen di bangziak a non hilh louh eita, Uching pen nou pawlte 1 toh kingai hile kilawm eivoi, hon ci a taktak mo ka cihleh himah keidia Parte gen ahi ahon ci a, ami ka dot leh Lialian kici pa peen toh hon cih leh thil phok suah ka nei hi. Skul kai lai a kei honna iplah gige te ana hilel uhi. Chingboi adeihziak uh a hi dan ka theikhia h. Ngaihzong a neihziak a Chingboi inle hon dawng didan haksa ana sa a hi tuak hi.

Zingkhua hong vak in zannitak a ka thugen bang ka ki zumpih petmah hi. Ann le ka ne tam peihkei hi. Ka naunu la hon engbawl nuam ki sa in Chingboi te inn ka hoh dek non zui ut hia peuh hon ci hi. Sun nitum in bangmah dang hihlou le bangmah dang le ka ngaihtuah theikei hi. Hon ngailou ahi banga koih in dotkik ka som non ta kei hi. Zum na leh ki suanlah na in ka diim hi. Hun te pai mengmeng henla Chingboi ngilh ni tuang tung hun ding ngak ka hita hi. Kana iit lokha man ka hi ding a ka tha bang zoi sak zou hi in ka ki thei a himahleh ka nau theih a huchih ka utlouh banah ka nuten ka omdan hon theih ding uh ka lauh ziakin ka pang teitei a, mi ngaih haksa hina mai e ci ka thei ta hi.

Nite bang hon pai zel in krismas ma nitak kikhop vek ding ci a innkuante'n hon som man un kava kikhom tei ta hi. Gintak louh pi in Chingboi tele hon kikhom ding toh lampia akituak in houpih som kei mah leng aman hon houpih a hon houpih na lel ka dawng hi. Biakinn sunga ka tut in ka dawnna te bang khauh sim in ka theia hai ka kisa mahmah mai hi. A tutna ding zong bol a ka dakdak lai in ka pam lam deuh uah, numei bangzah hiam tuten ana houpih dan un ka theia himahleh ka zum ziakin hon houpih na uh za lou himahleng amau lam himhim ka en ngam nonkei hi. Hucia ka om sungin top kal ka ngak lah petmah a huchin hon toppih khongkhong uhi. Kongkhak apat Chingboi ka lam deuh ua pai ka mu a houpih ka som lai takin ka nunglam apat Ulal ci a honsam kaza a ka ki heileh denlama biakinn sunga ka muh numei te ana hi uhi.

Huaite hon sapna lam ka et zoh in Chingboi toh pasal 1 ana ki hou uhi. Huai numei te'n ka kiang hong tun un, pai dek ngal mo hon ci ua kenle 'hi' ka cihleh kiton ngal ni uh ci in ka kiton uhi. Inn ka tung in Chingboi houpih pa bang kana thiik gu sim petmah hi. Keile hih ding omlouh toh ka lum pah mai a, himahleh imu zok thei ding ka hikei hi. Hucia ka om lai in ka fon ahong ging a ka etleh no. ka thei ngei kei a ka pick up leh o kilawm tak mai in 'Ulal bang hi e? ahon ci a, kenle"bang hihlou, nang kua mo?" ka cih suk ngal leh "Kimboi ka hi", tuni kikhop na a' ci hon gen le kintakin "eh zenzen ka no. khong nana neia" ka cih leh "ki deih eihcia" ci in ahon nui ka kalh a, hucia ki hou in zingciah biakinn kai non di mo, hon ngai in o ci te khong hon gen a, huaizoh nung in mangpha kikhak in ka ki hou zou uhi. Keile sotlou nungin imut sawm in ka mit ka si suk ngal hi.Zingkhua hong vaka, khua dam sa pi in ka thou a ka nu meh huan na kiangah kava tu hi. Krismas ni ahi a kikhop ngai ding ahihmanin annezou in kikhom dingin ka kisa non uhi. Innkuan lemlak te ki lak zoh in biakinn lam kon manoh uhi. Kimboi toh le ki mu in krismas chibai te ka kibuk uhi. Hucia biakinn kai ka top un, ka nau leh Parte innkong a ana om ka mu a, amau lam kava manoh hi. Kei kava tung zoh sotlou in Chingboi le hong pai a krismas chibai ka ki buk uhi. Zumhuai bang a bang a, ka houpih ngam ciahkei a, aman "Ulal nong kikhom a na fel lua" hon ci a, kenle"fel man hilou pi a" ci in bangbang hiam gen in, innlam manoh a ka pai lai un Kimboi toh ka ki tuak ua tunitak kikhom din kon ton di hon ci hi. Inn ka tung un ann khong ka huan pah uhi krismas ann biakinn lama nek ding ahihman in manpah angai hi.

Annezou inntung zoh sotlou in nitak kikhop hong hun tung pah ding ahihziak in kisak pah a kuanpah ka ut hi. Krismas ni hial incu mi a tam mahmah hi. Huaiziak in tutna bang aki tangzou kei kha sek hi. Mibang a ngaihzong te toh omkhom a innkong khoh omding hileh chu apoi ahikei dia, himahleh tu dinmun inzo huaibang te manglam di bang lel ahi. Kimboi in kon ton di ci mahleh kuan san mai ka ut hi. Tuni a annek zoh a Chingboi toh ka kiton un Kimboi toh kingai mo ci a hon dot in ka lungsim ah huai a om den anuam kasa kei hi. Kimboi in bel hon ngai ahi ka ci theikei himahleh a omdante ki thei tung pan din aomdan mak kasa hi. Hon hici maingal pen bangziak hi ding hiam? Cih khong ngaihtuah koma ka kisak komkom leh ka man pah vanglak a, kuan dia gate lam ka manoh le, Kimboi leh a lawmnu'n hon ton ding toh ka kituak ua, kenle kuan ngal niu ci in ka kuanpih hi. Kikhop top in, Chingboi lengkhom dia zot ka som a Kimbawi in hon zon a himahleh zuau gen in ka lomte 1 ka zon mana ci in Chingboi ka suanlam hi. Top in Chingboi gate kiangah ana ding kiangah, Kimboi ka kiang a om pen zak din nitak lenkhop di na theilai na mo ka cisuk top a, Chingboi in mak sa pi in "hi ka theilai" ci a nuikom a hon dawng pen in hon kipak sak mahmah mai hi. Kimboi in hon maingal luatlouh ka ut man ahi. Ki theipan a hon hici maingal pen kei hindan toh ana ki tuak kha lou citciat hi. Chingboi in ka iitna pen dawng kik kei mahleh kinem takin ka ngak hi.

Inntung in ka vante kheng in, a lum thei di pen a ki tuam in, Chingboi zon dingin ka kisa khe ta hi. Tulai chu ka nau tellou inle ka maingal na nekcik hon omta a, keivuak a tuni hun zat ka ut mahmah hi. Himahleh gintak banglou pi in a innkong uh ka tun hial leh ka diip bang hong kisai liiiliit mai sam hi. Kenle a top a top in ka fon a "innkong ah ka omta" ka cih zoh sot lou in hon pot a, kingai ding te bang hial a kon ki zuih hial uh lehzo, kipahna banghiam nei ka bang hial hi. Lenkhop na di mun a ana omsa ten bang hon na en lelu uh bang kasa hial hi. Kei ngaihtuah na lel ahizo diam ah? Hucia kiil 1 a tu in, daak le ka dak khe ngam kei hi. Pasal pen himahleng pau masak di lel le ka ngamkei hi. Ki suanlah na mahmah ka nei hi. Chingboi in ka iitna hon san sak louh hi zen pi hicia ka tutpih hial pen ka ki oi kei, himahleh nuam kasa gu mahmah hi. Huaite ngaihtuah a ka om lai in "Ulal bang ci dedu e?" ci in Chingboi in hon ci a, keile ki guih zot in "eh bang hikei nang toh omkhom nuam kasa lua ahi" ka ci le, nuamsa hilechin zo "hon hoh zel di hichin a" hon ci a kenle kon hoh zel voi ka ci le, ka gingkei non hohlouh na a sot lota voi hon ci thuk non hi. Kenle min ka thilgen te uh azaak ding uh ka lauhman in pai mi lengkhom atam na a, va pawt khe ni o ka cile, o ci in a lu hon su ngauh a, innkong lam ka zuan pah uhi. Pawt na di le omkei hichin paipai mai nio ka cih le "hi thamtham e" hon ci hi. Kenle "Ching ngaihdam hon ngen nuamlua keive" ka ci leh "bangziak oi" hon cih zoh in "midang a na hihlam theikom pi in tuzan na hun hicin kon zat pih kha a" ka ci le "poi mahmah kei amah zin aka" hon ci a ka nih un gen didang theih nonlouh manin ka nui top uhi.

Dak 10 bang hong gingtak toh lenkhop na a pai non selou in, Chingboi a innkong tan uh kava kha a, huchin keile inn ah ka paingal a, tunitak chu kei din manghilh ahak mahmah ding hi cih leh ka kipah ni pen a ka ciam teh na danin calendar a date bang kava git kual top hi. Imutlim taka imu in zingkho vak inle lupna apat kipak tak a thou khia in bathroom lam ah ki hahzou a ka pai phei lai, tutna a ana tu ka nau nu'n kipah mel vanglak honna ci ta get hi. Kenlag dawng tuanse lou in ka nuihsan lel hi. Nite bang hon pai zel in kumlui khak ni ding zan inle Chingboi toh zat ka ut mahmah mai a, ka zon non hi lengkhom din. Aman le hon nial lou in ahon zui non hi. Huaizan inchu ka pamlam uah le Kimboi te lomta aom uhi. Lengkhop laa kisa panpan a huai lai takin Chingboi in a phone a sms hon ging pen a etzoh in " innkong a kava pot zual" cih toh pot a thuah ngal hi. Sawtsim tak va om a keile kava pawt khiat leh, lamsak lam a pasal 1 toh ki mai tuah ka mu a, ka ki nung hei dek le ka mitsiik apan in, tua pasal pan a biang betsak ek ahihlam ka mu zual kha a ka etkik toh amau kianglam kava naih ngal hi. Kenle tua pan beng non ka muh in kintakin kava su suk pah a, tua pa zong hehlua ahi dia suk hon thuah non hi. Chingboi inle khawl wah ci a hon ki kou in, "Ulal bangziak a non hicih mok?" Hon cih zoh in tua pan "kou gel kal a hon ki golh koh, amah ka ngaihzong ahi, nang na ngai ahi maithei hilele Chingboi in ahon deihkei himhim di" hon cihkom in himahlou mo Ching cikom in hon engbawl nuihsan hi. Chingboi inle" Ulal non panpihna ahi cih ka thei hilele thu theiciang phot ve, nang toh kingai ihi sama" hon cih khum hial inzo Kenle ka pona lua a " Ching, kon ngai kha mah himahleh tunung in bangmah ka gen non sama" ka ci a, ka ki hei phei leh Kimboi ka pamlam ua ana ding ka mu a "kei ngaihzong huai ahi" ci in kava naih a kava tawpkha ta ek mai hi. Lengkhop na toh ka omna uh ki nai sim mah leh, a lenkhop na uh huusa ziakin bangmah hon theihpih kei vanglak uhi.

Huaizan apat in kana ngaih le hilou pi Kimboi toh iitna gui zop ding haksa sa mahleh, alou theilou ahita hi. Chingboi in hon hucih bawl hangin ka ngaihna a kiam zoukei hi. Kimboi in bel honna ngai ahihdan hon gen zel hi, hmahleh kei adin cu Chingboi ahi veve lai hi. Chingboi ka muh ciang in bel ka hehtha bang hon suak tuntun sek mah leh ka muhlouh kal in bel ka ngaithei mahmah hi. Kimboi in hon ngaihdan hon gen ciangin ka dawnkik didan bang ka theikei sek hi. Kei din lungziin huai mahmah mai hi. Mihing 1 a piang sam a ngaih louh toh ki ngai bang hinkhua ka zat uh cu hithei kasa kei hi. Huaiziak mahin Kimboi te innah le kava lengla vang thei mahmah hi. Aman hon zot tuntun ciang inchu kava hoh sek sam hi. Hucibang a kha 2 vel ka hong omom nung un, Kimboi ngaih na ciang ka hon nei pan ta hi. Huai hun inchu zot ngai nonlou in kava hoh zel samta hi. Amanle kon ngai dedeuh hon cih ciang bangin ka kipak a, kon ngai hon cih te bang zak nop kasa mahmah sek hi.

Hunte hon liam zel in skul ka hong kai zelzel a pawl10 sim thei bang ka hita hi. Kimboi toh bel skul 1 a kai khom ka hikei uhi. Chingboi toh bel kai na ki bat manin, skul khawl ni leh kailouh khak ni ci te lou in ka mu gige hi. Mi tampi lak himah leh kama zong bawl gige ziak a leng mu gige mah ka hi. A ngaihzong toh kikhen ta uh ahihdan skul a lomte gen bangin ka zak hiauhiau banah ka nau ngei leng va hoh zel ahihman in ahon gen sek hi. Himahleh ka nau in huaithu hon genciah ka bang ding ka ci nonkei ka ci khum sek hi. Nikhat skul kai top in ka nau toh Parte toh ka ton lai un, gate kongah Chingboi in anau te ana ngak in a ding hi. Nidang a kei ka omciah paituam zel hi na pi huai ni in chu ka ton khom vek uhi. Ka nau ten ka lomte ka ngak diu om nougel na pai un kon delh ding uh ci in kou gel vuak hon tonsak uhi. Sawtpi ki hou hetlou a ka ton nung un, Chingboi in Ulal hon hehsan lai na bang ngei" ci in awl in ahon gen a, kenbel za lou lem ki neih in ka dawng keia. Huaizoh in " na no. kheng mo?" hon ci non a "hi" ci in ka dawng a, huaizoh in "na no. hon pe vele" hon ci a, kenle lai them 1 a gelh in ka pia a. Ka inn pai phei na bul uh ka tungin ka ki hei pheisan pah hi. Aheh san ka hikei himahleh ka zum luat ziak lel ahizo maithei hi, kinep nonlouh nung a ki ton khak bang ki guih huai petmah sam hi.

Huaizan in ahon phone a himahleh ka la pah kei hi. La lengle bangmah gen ding ka thei tuankei ding hi. Himahleh ahon msg ka mu a ka reply mai hi. "Hon hehsan lai mo?" hon ci a kenle "theikhang" ka cile "hon genciang in" ahon ci a, kenle huai hon dong di na hile "hon msg non koh" ka ci khum suk pah mai hi. Ken hicibang te ka ngaihdan hilou ahi, hon bawldan ka manghilh nonkei di ka cih sa ahi a. Huchin amanle ka hih khelh om teng hon ngaidam ding in hon ngen a himahleh ka reply nonkei hi. Kimboi in ahon call a kenle thil omdan gen ut mahleng gen leng hoihlouh lam anot zo kha di ka ci a ka genta kei hi. Zing nitak ciah pot ni mo? Ka ci a, aw hon ci pah hi. Kimboi in hun lem aneih nak leh ka gente hon nial ngeikei hi, hampha bang ka kisa hi. Amah omlou hile tu khong a Chingboi in hon ngaihlouh zenpi ngai a duangvul ding lai Kimboi aom ziak a, hicia hunzang ka hi. Hicibang a iit ding a ka ki ging louh himahleh tu in ka iitpen ahi a, iitpen toh houlung kup kei din amanpha in kipahna in ka dim hi.

Ngaklah takin huai ni bang ka omden hi. Ka pawt khom vang ziak unle ka phur mahmah hi. Ka ngaklah bang geih in ahun ding ka cih in, inn apat ki lop takin Kimboi manoh ding ka pai ngal hi. Huchin ah mun hoihtak mai mite ki muh nang le hun awl zat na dia abawl uh LENGTONGHOIH PARK cih a amin vuah na mun ah kava pai uhi. Mibang ana om lomlom kei uhi, tutna ding mun nuamtaka ki bawl, atung bang leng hoihtaka abawl uh ahi. Khavak louhman a mitam lou bang le a hihtuak hi. Kou vual lak ding mi atam zo hi. Huaimun a ka iitpen liang tung a khut nga in ka ki iitdan uh ka ki kum uhi. Ka ki iitna uh la lian deuhdeuh abang ta mai hi. "Kim kon ngailua, nang bang a ka iit om nonlou ding om le om ngeilou ding ahi" ka ci ngutngut a, Kimbawi ngei inle "non iitna sang a keia lianzo ding eve, Ulal nang hon taisan lechin le ken hon taisan zou non himhim lou ding ka hita" ci a hon gen bangzo zak nop mahmah eive. Kenle hichin ka sunzom hi "ka iitna nang kiangah pat lak khiat himhim ka som nonkei Kim, nang a ka hi den dia, nang leng kei a hi den in o" ka ci le "Ulal hiden mah keidia, midang non ngaihsan lele kencu tua na gente manghilh lou di inga, ka luankhi nul na lel suak di ahi" hon cih zoh in "Kim midang iit theihna din ka lungtang in hatna a nei nonkei" cih toh ka ang a kiptakin ka koi hi. Amanle bangmah genlou in ahon dai a, bang ci e? Ci a ka et suk le, ol a hon dak tou in ka muuk ah ahon top a, kenle deihthoh takin, iitna taktak toh kana topta hi. Amasa pen dana top maimai ahi nonkei a, iitna taak leh taklouh ki khaih dan ka theiciang sem hi.

Hun inlah hon ngak lou ahihciang in zante hon sawt luatma in ci in innlam zuan in ka hong pai ta uhi. Inntung in ka pa ana lum naikeia, kenle "pa na lum hak ngei" ka ci le,"nang hon ngak ka hi, tu tantan pawt hial louh ding evoi, skul kai lai na hi ua, maban khual di pen na hicih om nonlouh ding ahi, tunle lumpah inla zingsang ciah thoupah sawm in hihding om ahi" ahon cih zoh in lumna lam manoh in ka paingal hi. Ka pa bel thil gen pahpah lou ahihmanin tua hon thilgen tele om khengval lua honsa ta ahi di ci peuh ka ngaihtuah komkom in Kimboi toh ka hun zat dan tele hon thilgen te bang ka ngaihtuah kik thakthak hi. Zingkal in ka pa cih bang ngei in ka thoupah hi. Ka thohzoh sawtlou in ka pa hon thou a, inn kim te hahsiang pih hon som ahi lel hi. Eilah ki tangval sak toh huaikhong hih ding ki lin sim mah leh, pa hial in hon som cu hih teitei a ngaita hi. Hucia ka omlai in Parte hon pai kana mu a kenle ka fel mo ci a ka na ciamnuih leh a nung a Chingboi hon pai pen in na fel mahmah ve hon ci cu a zumhuai petmah hi. Skul khawl sunsun ahihcia kana ci thuk tei mok hi.

Tuazan in Kimboi in hon text keia, kenle ka text ciah lah hon reply tuankei hi. Ka cal lehlah ki pick up tuanlou hi. Ka lung a buai mahmah a, ka hehtha lamlam hon suak zomah hi. Ka imutheipah kei top zezen hi. Awl a ana imu kha cu ka hi ngeidia ka khanloh in ni bang ana suak lotel ta hi. Annezou skul kai din ka kisa non uhi. Ka man in ka kuan pah hi. Skul gate ah ka lut dek in, ka nunglam apat hon sam aom a, ka et kik leh Kimboi lawmnu ana hi a, kenle bang thu om ade o ci in ama hon thugen di kana ngak a, hichin hon ci ta hi" Kimboi in fon hon lak suh ua hon contact lou ka hi a ci ve" hon cih in kenle "bangziak a?"ka ci pah lolop ngal, huchin ka pawtkhom nitak ua a nute'n paihak sa ua, fon lak suh uh ahihdan ka theikhia hi. Poi kasa petmah hi, a nu leh pate'n le tai zomah ding ua cih khong ka ngaihtuah a ka hehpih a ka ngaihna bang ka pung semsem abang hi. Cikciah ki hou non ding uh ka hia cih gentheih ahi nonta kei hi. Skul lah kai na kibang lou, ki veng 1 bek lah hilou, ahaksa mahmah hi. A chang in ka lung a kia a, a chang inlah ka lung a muang zel hi lungleng taka om vungvung hun atam zota ngal a, ka ngai thei mahmah hi.

Chingboi inle hon text ciangin ka reply zel ta hi. Niteng leh hunteng in ka hon ki houkha non zel uhi. Skul kuan leh tawp in ka ki ton pan nonta zel uhi. Himahleh ginomtakin Kimboi hon text ding ka ngak gige lai hi. Alehlam ah Chingboi toh kingai dinga hon muangmoh mahmah ta ua, kou kal bel huaidan ahikei a, a utut uh gen leu le poikei adik kei nak leh ci komkom in ka ki hah polh semsem lai ziak un, Kimboi kiangah bang thu ana tung kha adiam ah, ni1 a lawmte fon apat in ahon cal a "Ulal gintak na bangkei lua, kei adia ginom dia thuciam hon manghilh san tel ding mo?" hon ci a kenle a hikei min a utut uh gen leu le ken nang ahi kon ngaih" ci in ka ngaihdan te gen mahleng hon gingta nuamlou a bang a, kenle loh ding dan tuan ka theikei hi. Hon ngai nonlou mo Kim ka cihleh kon ngailua hon ci a, huaizoh bangmah gen man nonlou in, ka nute hon pai ci in ahon koihsan ta hi. Ka kikal uh kikhen tuk in ka koih a ka pona mahmah mai hi. Huaizoh nung sawtlou in, Kimboi toh ka kingaih ding uh a nute'n ana haal uh ahihdan ka theikhia a ,ka khase lua hi. Ka iitpen toh kikhen ngai ahon bang ta hi. Amau adin chinglou mah ka hi, ka iitluat ziak in mittui ka nulnul mai hi. Huaizoh sawtlou in Kimbawi ten apa posting na lam ah hon ki pem san ta ua muh na di lampi kei adin aom nonta kei hi.

Hucia hinkhua zang zel in pawl10 te bang le ka hon zou ta hi. Kimbawi toh pawl10 zohciah college ki bang a kai khom ni ka ci te uh bang hong laang dundun mai sam hi. Hih theih lah omtuanlou hichia ki theimoh bawl a ka om mai angai ta hi. Huaiban ah ka hun tamzo Chingboi toh zang gige mah leng Kimboi adin ka ginom na ka mansuah tuan himhim kei hi. Hon houpih sawm non himhim lou himahleh a thuzak kik gige ka ki lamen veve hi. Huchia Kimbawi thu ka zak nuam mahmah a, a o zak non a kon ngai hon cih kik ka lamen lai in, a thu ka zak sun pasal nei cih hilel pen ka thuak siam theikei hi. Chingboi kiangah le ka gen a hon hehnem na in kannat na neilou a bang hi. Hicia ka gentheih hun a ka na iit ngeisa Chingboi in hoihtaka hon bawl ciangin ka ngaihna hong om non hin ka thei hi. Himahleh ka iitna thugen non ka sawm kei hi. Kimbawi hon bawldan pona lua in hicia ka omom kanna lou ci in, ki hih halh bang ka ut hi. Ka pa zin na va zuih di cih la ka peih hetkei zel hi. Gentheih takin hinkhua ka zang hi. Huchia ka omlai in Chingboi in hon hoihbawl mahmah a, nidang a hon bawl dante bang ngaihdam hon ngen a, kenlah huaite kon ngaihdam na sot ta ahi ka ci hi. Iitna simthu ki lan tuahkei mah le ung, ka kal uah nidang sang a ki iitna gui ompen kip zo in ka thei hi. Amah tellou in ka bukim nonkei, iitna simthu gending inlah zumhuai sak na pi neihziak in ka gen kha ngeikei.

Hichibang a ka om hang un iitna kichi leh kingaihna kichi a lem bang a ngaihtuah in huaite buaipih louh a, lehkha sim mengmeng a nu leh pa panpih ka utzo ta hi. Huaite lamet na ziakin mundang aomding bang ka nu leh pan hon ngaihtuah sakin, koimun hoih ding hiam ci a, a geel lai un keibel inn apat gamlat na a ka om utkei hi. Ka damtheih louh leh mundang a om ngeilou ka hihziak in gamla a va om a lungleng tak a hun zat sangin Imphal tana om a, khawl hun tomchik omcia le innlam pai zel zok ka ut bang in Imphal ah kai dingin ka kisa kheta hi. Ka pai dek ni in lawm leh vualte'n hon kha sam uhi. Ka nu'n Pathian kiangah thu hon ngetsak in, ka pan ka omna ding hostel tana hon kha dingin ka pa toh ka kuan khe ta uhi. Amun ka tungin nop mel kasa mahmah hi. Ka room mate di pa lah Paite mi mah ahi a, anop cit mahmah hi. Ka pa'n pawl12 ka hihtan adi hostel fee bang hon piak zohsak ngal a apoimoh ding zah sum te hon piak zoh in, innlam ah pai din kei kia hon notsiat hun hial inzo ka mittui bang hon luang sam hi. Huchi'n kimu non di'n mangpha ka kikhak ta uhi.

Tua zan chu lungleng in thil tuamtuam ngaihtuah in ka imu thei kei hi. Pasal toupi himahleng ka kap kha maimah hi. Roommate pa hon theih ding ka lau hi. Skul kai na ah la atamzo meitei te hi ua, pautheih nai louh toh aam bang hai top a bang hial hi. Ka lompa Khampu in honna panpih in a thilgen te uh bang hon hilh hi. Khampu bel pawl5 ahih apat hiailam a ana om sa ahi a, apai dan uh a theisiam mahmah ta hi. Amah ana om khak ka hampha ka kisa petmah hi. Nute fone ding in pco lam kava manoh ngal hi. Fone hostel a hon toi phallouh uh ahi. Hon hostel omsak na u ahihleh strict mahmah le hoih mahmah pasal te omna vuak hostel a hi a, nuam leng anuam hi, a siangthou a, amun lah a dai a lehkha sim nuamte adin suun leh zaanin sim theih hi. Keibel suun a lehkha sim mi ka hilouh ziak in ka omtung inchu suun in lehkha ka sim ngeikei hi. Nitaklam top ciangin le, ka sim ngeikei hi. Eilam tangpi paidan nitak a, lehkha sim zual cite danin kava om hi. Himahleh kha1/2 ka om nung in bel, amau cindan te ka zui panpan a lehkha sim lou hih ding om tuan lou ahihman in lehkha sim nop dan bang ka theikhia hi. Haksa sak hun a dot theih ding heutu a om hi, asiam mahmah uhi. Himahleh mi hilh dan a siam luat louhziak in ken kava theisiam pahpah kei sek hi. 2/3 vei bang ka dong tuan zihzeh zel hi. Gintak sangin na ki sot mahmah ve ka lompan hon ci zel hi. Kumkim tan omzoh inchu pau leng theih ka neita hi. Suti sung innlam kava pai sam hi.

Innlam omsung Chingboi toh kava kimu zel ua, ka ngaihna pen ahon lang khe zel hi.Huai hun inle gen ka som tuankei hi. Athawn mai ding iitna hizel khak ding lauhna in ka diim hi. A nuihmai etlawm tak le a sakmel etlawm tak te etchiim huai hetkei kei mah leh ka maban omlai te zom din ka pai nonta hi. Tutung inchu nuam kasa mahmah ta hi. Haksa nate bang tuak tou komkom in hunte hon pai zungzung in pawl 12 zou in innlam ka kik ta hi. Tua hun inchu anuam mahmah ta hi. Maban zop ding thu mah ka ngaihtuah zok pen a ka nu leh pa toh ka houlimna uh le tua pen mah ahi. Kimbawi bang ka ngaihtuah khak hun aom lai sam hi. Chingboi toh leng lomta hoihtak bangin ka hon kithuah nonthei ta uhi. Amah bel pawl 10 tan kan a sutzom sawm nonkei hi. Kenbel ngaimahmah leng le ka sepna neih zohciang a pasal ana neih nai keileh huaiciah iitna a nihvei na dia lat a huaipen damsung daih ngeingei ding iitna ahih ka deih hi. Kenbel tu ta dih in ngaihzong a ki buaisak non ka utkei hi. Kimbawi ziaka ka pawl10 exam lai aleng deih bang tak suahzou lou ka hihlam ka thei tinten hi. A langkhat a iitna omzia hon theisak tu Chingboi mah cih tinten ka ut hi. Tu inbel lehkha sim phot a huaizoh ciang adin ka koih hi. Ngaihzong neih amasa a ka koih sungin bang lou teng hong tung zouta a, huai thei tinten komin ka maban ka buaipih zota hi.

Ka maban zom dingin ka pan Imphal tan hon kha a, huai aom ka lompa Khampu toh maban zom dingin Mumbai tual ka hong tungta uh cu. A mangbat huai mahmah hi. Innlam a vaite eipau a ut dandan a houpih dan abang non hetkei hi. Lompan vaipau tamlou theih sunsun te ziakin ka omnang uh innah ka tung thei khong uhi. Huaizan incu ann ka ngol top uhi. Zingkhua vak ciah skul kai nang zon a hostel ding bang le etngal ut huai ziakin ka lumpah uhi. Gimsim tuak ka hi dua ka ihmupah vanglak uhi. Zingkhua hon vak a, ki hahsiang in college ding en in kava kuankhia uhi. Ahaksa mahmah mai hi. Innlam bang a ngaih huai vungvung hi. Huchia haksa pipi a ka om nung un, kal 1 zoh in kai na ding leh hostel omna ding ka mu ta uhi. Hostel lut tung ni a honna muhnop dan uchu lamdang himai, China te di khong honna sa uh, mi bang simmoh bawlsim vial zomah lai u, eilak hile cu hon hicih ngam hetlou deu hia, bang kichi vengveng mai sam eive, thil bang a theihlouh tanpha uh hon ki theihsak ciang ua zo heh huai lotel sam aka. Hilele migam ah lehkha zir dia om ka hihlam manghilh lou ka hihman in ka ngaihsak ngeikei hi. Ka lompa chu aheh thei mahmah mai hi. Himahleh ngaihsak louh hamham ka som uhi. Hucia kha 2 bang kon om nung unchu honna khel bawl tenle hon pawl zota uhi. Nou namte na dohzoh dan uh a thupi lua huchia kon engbawl dan in koulak mi engbawl le ung heh ding ua hon kisual pih ta ding uhi. Ana en un tunle ci in, a mite uh khat ava engbawl le hon ki en tuah gega ngal phet uhi.

Gintak sangin a polhnop thei mahmah uhi. Alehlam a a chalak na viau uh aom hi. Lungsim nei taka polh leh pilvang angai mahmah hi. Kum1 bang omta mah leng innlam pai ka sawm kei hi. Ka lompa Khampu in hon paisan toh ka chim thei mahmah a, Chingboi ngen toh ka ki hou uh a hipen mai hi. Ka na iitsa gige ahihman in ka iitna lah a uang semsem a, haksa kasa gop hi. Keile kei in ka ki dal hamham a himahleh a haksa lua hi. Ni1 gintak louh pi in ahon iitdan thu hon gen a lamdang kasa lua hi. Kenle ka gingta kei na kam mahmah in hon gen in ka cih le huaizoh sotlou in ahon call ngal hi, "Ulal hon gingta lou mo?" hon ci a "hi ka gingta kei, Ching" ka cih leh "hon hehsan lai mo?" hon ci a," kei kon gingta kei himhim ahi" ka cih leh "nang non gen lai in theinai lou ka cih zoh in, non dong kik nonkei a eivoi" hon cih in keile ka ki mohsa sim a himahleh "nang midang nei neihciah kon gen kanna nonlou pi" ka ci suk non hi. Huaizoh in "nangle Kimbawi toh na kingaih ziak uhi" hon ci a, kenle Kimbawi toh huai a kingai nailou ka hihdan te ka gen hi. Hucia kon gen zoh in amanle hon hilh ciang a, ki iitna gui zom thei ding in ka hon om ta uhi.

Huaini kei adin kipah na pen te lak a 1 hi dingin ka gingta hi. Gibang khen ding lel noulou dingin ka ki ciam uhi. Ka ki iitdan uh te ka gen ua anuam mahmah hi. Amel muh kal ka ngak lah petmah hi. Innlam pai khak louh bang ka kisik hi. Tunlah ka suti uh bei a hita a pai ding dan aomkei hi. Nuamsa takin ka om tou den hi. Ka lompa le hon tungta a, skul te ka lut pan non uhi. Niteng in Chingboi toh kihou gige in ka om uhi. Hicia ka iitpen in iitna simthu hon lel a, tua kingai hinkhua ka zat uh zo nuam kasa mahmah hi. Kipahna om gige lou ahi cih ka theihsa mah bangin. Kipak taka ka om gige lai un zingkhua vak ma lak in ka fone hon ging a kenle halh milmial in ka dawng a, innlam apat ka paneu ten ka pa a khual zinna lama xcident a si ahih thu ahon hilh un, ka manglam ding bang kasa a, ka manglam himai leh ci in dan vuallouh in mittui hong luang hi. Ka room kong uah pai khia in ka kap ta ekek mai hi. Ka lawmpa'n ka kap lam hon thei in hon dong a kenle ka gentheih dandan in ka gen a amanle hon hehnem hi. Kipasal sakin kahlouh ka sawm ciah ka hithei mahmah kei hi. Ka posiam kei himahleh puaksiam teitei ka sawm a lah a haksa mahmah mai.

Innlam lah exam lai ka hihman un paithei ka hikei hi. Ka pa luang lel le mulou ding ka cih ciah hithei kasa zou mahmah kei himahleh ka nun na pan hoihtaka na lehkha sim ding deihzo ahi ci in hon gen a, Chingboi inle "I pa kou hoihtakin kana vui ding uh, lungmuang in ei adia hoih Pathian in hon lemgel sak ahi" khong hon cih ciah dik kasa mahmah hi. Hon kem tu ka pa ken kem manlou a hon mualliamsan puak hak kasa lo mahmah a, ka luankhi in hul ni neilou ding abang a, himahleh kei khut a ka inkuan uh kinga ta a hihmanin ka hahpan sem angai a haksa pi in tha thak lak a, ka skul kai sunzom lengle ka pa lah om nonlou a, ka nu gentheih na ding maimai sangin semna hoihlua hikei leleng ki vak na di khop zong ka ut zota hi. Exam gige mahleng ka ching zou ngeikei hi. Lung bang ake sim manta hi, hileleng ka hahpan semsem a, kava exam non hi. Huaipen result ngak lou in innlam ah septheih bang omzok khak le ci in, innlam zuan in ka paita hi. Chingboi leh ka innkuante mel ka muh in ka kipak a, ka pa om hileh ci in aomding dan te ka mitkha a hong langin ka mittui hong luang a, huaite ka nute muhma in ka nul a, kum 2 bang ki mulou ka hihna uah sawt tak ki muh louh ka bang ua, tuam sot bang ka kisa uhi. Chingboi ngeileng ana hoihsemsem banah ka zahtak lo dek mok hi. Lamka lam manoh a gari a kon tuang kom un, thu vantang te ka houliim uhi.

Innah ka omnung kha1 vel a hita a ,ka result uh leng suak a, ka ching thu internet tungtawn in kana thei hi. Kouleng kipahna in ka diim uhi. Mite adin thil houchik himahleh kou adin bel Bank Clerk maimai himahleh a thupi kasa uhi. Pathian kiangah kipahthu genzoh in, ka pa bang ka phok ua, mittui nulna hong suak mahleh kipahluat man ahi o pa khong ka lungsim a ci in, omlai hileh ci in ka pa ka ngaihna a uang mahmah hi. Chingboi inle hiaithu hon theihpih ahi dia, kipahpih na thu hon gen din hong hoh hi. Kouleng ka pa han ah hoh din kana zon ua, ka vek un ka kisa ua ka pa haan manoh in ka pai uhi. Amun ka tung un "Pa, na tapa in nidang a non gen pih zel bang a, sepna lianlou himahleh kei adia kivak na tham muta keive, pa kon ngaihna hon theihpih lechin zo pa na inkuante nemdia hon pai di neive" ci in mittui toh hun ka zang uhi. Ka pau sunzom in "hiai ah ka zi ding a ka geel om eive pa om lechin hon deihsak a kipak a lam hial ding neive mo" khong ka ci hi. Ka inkuan un genkhe theikei mahle ung tu hun taka ka pa ka ngaihdan uh zo ka pa ngei inle hon theihpih di'n ka lamen hi. Gentheihna leh lungngaihna ka zat zoh nungin kei adin kawlni ahon suak ta, ka iitpen toh damsung loubang tulkhom dingin gui khaubang ka zom khomta uhi.

Mihing hinkhua nuam gige leh kipahna gige hilou, dahna leh lungngaihna in hon zui gige ding mah ahi cih ka theisiam ta hi. Lungngaihlai hun in lungnopna sangin dahna ten hon bawm khom nak zo mah leh, kipah ni hon suak veve ding hi. Heh lai in thupukna bawl lou leng ahoih pen ahi. Kipahna leh lungngaihna kizui bang in ki-iitna leh kihuatna leng kizui thei a, iitna in ngaihdam zohlouh neilou a, iitna ziakin bel ki theihsiam louhna om mahleh kingaihdam theih zel ding ahi. Iitna ziakin haksa leh nuam kituak ding hi.

______BEITA!BEITA____

©Siamsinna leh Vakiangbu