DAWI NUNGAK TOH KIHEEL (true story)

By ~ Alex Guite

1982, July khatawplam, summer vocation zangzou tangval Thangboi tuh Lamka manoh in 17 km vel a gamla akhua uh Sugnu road in atot khakna zuan in cycle in hong tai hi. Nipilai, huaileng sun nisat laitak ahihman in lampi ah Thangboi tuh a chi bang honglum gawp petmah hi. Huchi'n Tuilehluan leh luita kisuktuahna mun hongtun in a lu tui ah hon diah vot a, huaimun bel phamsa pu Zenhang Valte in adamlai a suangphuh lianlou khat a phuhna mun ahi. Thangboi lampi a hong paizel na ah khualum pen uang mahmah ahihman in, atotkhak khua khat ah khawphoklou in hong puuksia a, Lamka damdawi inn ah puaklut in om maimah hi. Khophawk lou hial a Damdawi inn a lum, mitsi den himahleh mumangpau in, akhenchiah a nuih toh, nungak paudan khawng a pau toh phaphetlou ahihman in asungte' hi in a kiang a om a zakhate'n lamdangsa in a pauteng ana chiamteh den uh. Alehlam ah Thangboi tuh dawi nungak Vungngaih kichi toh ana kihel in ana kihou uh ana himaimah uh chih awl a theihsuah in hong om hi..

Dawi nungak Vungngaih in "Uthang, ta lawmlawm kisathei sengseng teh lampi a napaisuh napaitouh a hing kimelh zing a, mi kihetmoh bawl".. hon chihle Thangboi in.."Vung, eipi pawl X zil pan naupanglai, i zawn toh nangbang melhoih i hon en ngam mawh di maw.?" chi a hong kihou zel in Vungngaih in Thangboi a inn ua hoh di'n chial nilouh hi. Thangboi in seel hinapi in hong paizel na uah Vungngaih te inn ah hong kizuilut khamawk uhi, huaibel Khawpibung khanglam,Valpakot khensuk, suahlampang Suangpikawl tuh nahi a. Huchi'n inn kongpi hon kaan panpan uh chihding in Thangboi' lamdangsakna toh hong kidim in hong dakkhop mah hi. Thupi leh lamdangsa bel hi deuh in a mel ah kilang hi. Thangboi in "kadei aw, kalaisai, thupi na mai e, Vung huh agallam mual tung a inn te pi koi a ahiai??"..achihleh Vungngaihi in " kei uh a avele, na hing ngaih leh ikite'n khitchiah a bon a ei a ding hi.. hua agallam ah hotel kilawmtak kigalmuhte leng ka naunu pasal a ah" Vungngaih in hon chii zomah hi. Vuungngaih in "Uthang kuva na duh ei, za na tep diai" a cihle Thangboi in duhlou ahihdan gen in huchin Thangboi in a pamlam a huansung hon et leh tua huansung dimphial ah Gari neu leh alian om zengzung te kua a hiam chi a adot leh Vungngaih in "na hing ngaih leh ikitenchiah ei a ding ave" hon chi nawn a apamdeuhlam hon etnawn leh Vatawt rong hing (green) zihziah tampi hon mu a hoihsa lua ahihman in Vungngaih kiang ah kei le hon hawm in a chiin a ngen a Vungngaih in "hitheinai sih lawm aw, i hong kite'n zohchiah a bon a ei a ding ave" chin phallou hi.

Huchia hong vakvel na uah singkung hing ngiingei, akungte lah sangthei ta buang, vaan sun phial, a singteh khempeuh te hoihtak a ki heuhsiang sipsip ngen Thangboi in hon muhleh lamdangsa petmah in "kadei aw, hih singkungte pi sangthei na lawmlawm, atehte pi a bangchi a kituahtah a na heuh uh ei?".. ahon chi a Vungngaih in "hite HINNA SING sitheiloo, ateh a hiangte vanlai a ka len kawmkawm a ka heuh uh hiven, misite zong hih singteh a akizut leh hing kiit in, zong sithei nawnlou uhi".. hon chi hi.

Thangboi in "Vung aw, nuamsa ma leng i tung sun ni zong a tumkuan petmah hita, keizong va pai phot va'ng" a chihleh Vungngaih in "hinailou e, annelou in na pai sih in, na zekai le zong ken kong kha na ding" chi in phallou tinten hi. Annedia hong kithawi ta ua, hong tu panpan uh ichihleh Thangboi tuh thakhat ngamkhat a hong kikou ek hial mah in, "Vungngaih ken hibangte neithei lou..!" huaituh bang hi hiam ichih leh lung, lungme leh a chituamtuam special deuhmai a kikang puak khawng ana hihi. Vungngaih inbel chil phul hialmah in, Thangboi lam en kawm in, ne din sawl nawn a Thangboi adin bel heihah! Van sang ei.! Vungngaih in a special zawte hon tawinawn a Thangboi mai a akuang hon luikhiak phet leh Thangboi tuh angaihzaw sem a kikou khiak leh dinkhiak hon thuah hi. Thangboi bel huai amuh leh a chibang hong kiling hita mai....huaituh bang hipeuh mah hiam ichihle mihing khutbom leh khezung khawng ana hi zouzen ven chin, a khutchin khawng uh hon muh leh Thangboi tuh si daang phial hih tuak hi. Huaiphet in Vungngaih in a Inn kong lam ua Haigah minte hon lou in Thangboi tuh hon nesakta hi.

Thangboi in pai kia hon sawm ahihman in, Vungngaih in a inntan uh Jeep ah hon kha in hong kikhen kuan un VUNGNGAIH in a kiten hun ding uh ani chiam bang hon bawl tawm zok hial hi. Himahleh thil poimoh mahmah khat gen khum hi. Huaichu bang hiam ichih leh, akiten masang siah ua Thangboi in Uisisan mawngmawng a a kibuah/kidiah louh ding thupiak khauhtak leh poimohtak Thangboi kiang ah hon hilh hi. Huai thei vilvel in Thangboi damdawi inn pan a hong pawt a ahalh deuhtak in asungte'n Ui gou pah in a si a lusiip apan in hon buahkhum uhi.. Vungngaih in a om na mun apat thil ana theipah lel hiding ahihman in heh mahmah ding in gintak huai hi.. Uisisan himhim ana khoih kha ken kon chih hilou maw chi a kap hial din gintat huai hi. Thangboi ngailua himahleh bangmah kizopna himhium a uisisan kinuh ziak mah a om thei nawn hit hetlo hiding hiven, huai nungsang bel hucibang dawi nungak apat sukbuaina Thangboi in tuak kha nawnlou hi.

Source : Zogam Thuchin Mualsang

©Siamsinna leh Vakiangbu