KAWL APAN KAWLING (CALLING)
By ~ Rex Peapy Tangpua
Kum 1993 Phavang lai ahi a, nikhat ka pa toh inndong tawm di chi in ka pa lawmpa toh ka 3 un ka kuankhia uhi.
Ka gamkuanna uh bel ka theihluatsa, lawmte khawng toh vasa beng
khawng a ka hoh gige sekna uh ahi a, vagik thaang khawng kam a ka na
palpal sa uh ahi.
Huai gam ah Kawl sang lolou, saupi kikhung a om a, a nuaiah lui
lianlou luang in khua apan a kisawp phakna lel a gamla ahi. Huai kawl
in minthanna mah2 khat a nei a, huaibel bangdang hilou in nitaklam
nitum kuan chiang in Lasi nungakte kimawl in a nui toh a chiak vengvung
sek uhi.
Nitaklam a lui a kisil dia kuanchiang in a nuihging uh kiza sek a, kuaman le lauh di in kingaihtuah nawnlou hi.
Huchiin ka pa toh singtuai khawng sat in ken a hawng kana kheh/khok
a, ka pa lawmpa, Pa Gin bel ka gaal lam uah a om hi. Kouleng
bangzahhiam ka satkhit un ka gaklom ua, Pa Gin hongpai ngak in kana
khawl uhi.
Huchia ka khawl laitak un ka sak ua Kawl apat numei kikou tuaituai ka za ua.......huai chet ahi tua ka gen tup tak.
Ka lawmte khat min sam in hong kikou vongvong maimah a, "Lalpu (min
khek).... hongpaita veeeen.... Lalpuuuu" chi in aw liingsim golgol in a
kikou tuaituai hi.
Lalpu kichi ka lawmpa lou midang omlou ahihman in ka mangbang mahmah
a, kapa kiangah paimai ka kinget leh a lawmpa ngaklai di hon chi a,
ka lungsim in, "Ka lawmpa mang ahi de aw, bang thil om ahi de aw"
chiin ka ngaihtuah nilouh hi.
Huchia ka omlai un khatvei hong kisam nawn a, ka pa lawmpa le
hongpai in "Paikin zaw ni uh innlam ah thu hoihlou om ahi di" a hon
chi a, huchin paidi'n ka kisa uhi.
Ka lungsim a nuamthei hetkei a, a ziak bel huai kawltung lak sese a
numei in a hongsap, thukin om ahihlele pasal bek kisawl le uh chih
khawng ka ngaihtuah nilouh hi.
A kawlpen sang lua hikei mahleh a nuai a kom ziakin huai in a
sangsak tuan mahmah hi. A kawl lehlam/nunglam apat in bel a kawl
tungvum a kikal thei a, ngeisok paak khawng lou in ka hohkha sek uhi.
Ka lawmpa a mang hia? Innlam a thu hoihlou om ziaka gamvak lai hong
kisam uh adiam? Ka lung a muangthei hetkei a, banghiam thilhoihlou a
tuah di kana laugu mahmah hi.
Inn ka tunkuan un a inn uh tawn malam di chi'n ka pate ka ngen a,
huchi'n ka tawn uhi. A inn uh ka tun un bangmah thu theilou in a sungte
ana om ua, thil omdan ka gen uleh amau leng a ngaih uh phalou in
ganzong a a kuanna ua va zon mai ding a ut hial uhi. Himahleh ka pate'n
hungaih lai phot un a chih ziakun a khawl kik uhi.
A lamdang mahmah ahihleh huai ka lawmpa hong kisap lai in amau le
lawmte toh sakol zong a kou omna khang zek a om ana hi ua, amau leng a
za chiang mahmah uhi. Lawmpa Lalpu'n bel dawng ana sawm a, himahleh
lawmte'n gamlak a kisap mawk dawng di ana phalkei uhi.
Nitak annekhin phet lawmte kiang kava pha pah a, amau leng lamdang a
sak thu uh a gen ua, huai hun a lawmte khat gendan in, "2vei hong
kisap tak a singkung a kal a ka daktouh leh kawltung apat hilou in kawl
laizang lak apan ahi" chi hi. Huaiziakmah a Lalpu dawng di ana
phallou uh ana hidan ahi. Ana dawng mawk leh bang a chi diam maw chi
in gintak thu khawng ka kigen den ua nitak sawtpi ka houlim nainai
uhi.
Bangziaka huai Kawl a Lasi nungakte'n ka lawm uh, mel a et di chi
lelah etlahhuai lua hi hetlou, sapan dilhdelh leh gawng gekgak pentak a
sap tuaituai mawk uh ahi de aw..... A min koi a a bangchi theih uh
ahi de aw...... Dawn butlouh dotna chu a hi peuhmah ve.
Tuni chiang in ahihleh huchibang Lasi nungakte thawmging huai kawl
ah zak di om nawnlou hi. Khang kibansam uhia peem mang gai uh??
Kawl apan a Calling Letter muh mai zaw a zate leh sap a om adi'n leng a mulkimhuai aka...numei aw himahleh.!
©Siamsinna leh Vakiangbu
Comments
Post a Comment