LUNGGIMNA/LUNGZUANNA KHEN AAH!!!
By : Bhyak Hawxel
Episode-I
Khua bang vot hiauhiau ta ahihman in Mangboi te lawmta in Lalpu te
inkong tual ah mei seem kom in laa khong saa leh houliim komin a tu
depdap mai uhi. Huailai in Mangboi bel a zawlluinu kampau te ngilh lou
leh pona takin na om hi. Sengualte'n lah nuam in zailaa oi ua, amah adin
lungngaihna lel hi. A iit tungtuan gige in singdang siang zuan in a
heisan ta cih a geelciang in a dip teipi a sut bangin nasa hi. Amah leng
lawmte lak a omom mahleh a lungsim mundang daih aom ahihmanin, "Thang,
Lal, Muansang kana pai phot di tuni I football pek na uh ka gimsim a,
ka pai phot di nouteng hon kipawl lai un" ci in innlam zuan din alawmte a
nu se ta hi. Inntung lup ngal a sawm leh a naupa'n "u hiai game ka
install thei mahmah kei hon hihsak dih" ana ci a, aman zong bangmah
genlou in va install sak pah a, azoh in lupna ki den na in nei ngal hi.
Ahizong a zalkhun a maimit siing moh denin nunluite a geel hi. Hucia
omom imuthei mahmah lou ahihman in, dena anaupa game a install sak te
khong kimawl din ava thou khe thak hi. Akimawlna va lunglut lokha ahi
dia dak1 bang na ging veval man hi. Amahle lup hon sawm non hi, a lupma a
a zawllui nu lim et zual sawm hi na zenpi, a folder bang open dia kisa
lai hon tawp kik in khemkhem lunglen na di phet ci in, a computer cu hon
off ta daih mai a lup taktak ahon sawm ta hi. Nitak dang dan a, fone a
laa ngaih hon sawm leh a fone a siat lam hon phok khe guih a, lupkawm a
laa ngaih, na ngeina seh man mahmah keivele mo? Ci a nui heuhau kawm
in vot dek na e cih toh puan ki luhkhuh thuah in, sawtlou in hon imuta
hi.
Episode-II
Nitak a imut hak ziakin imut kham zou hetlou pi in Mangboi ahon thou
khe bambam hi. Apan va phong lou hile bel a thoupah hetkei hial di.
Khovot toh imut khamlouh toh Skul kai ding bang a lin mahmah hi. A kai
leh kai louh ding lungbuai a, a lungsim a suangtuah den hi. Huchin Tukar
lel kai ta di ahihlam uh hon phok suah guih kai ahon sawmta. Hon kisa
mengmeng in, a man in a lawmpa hong kuan ding na ngak hi. Sawtlou
nungin alawmpa hong kuan a skul lam hon manoh ngal uhi. Kihouliim kawm a
ahong pai lai un, Nenem te lawmta toh kituak guih uhi. Kihoupih tuanse
cih om lou in aki pel tuah hiau uhi. Lalpu inzong lamdang sa sim kom
in,"bang ci uh e?" cin dong pah hi. Mangboi inbel "ka houpih man kei a
hi" cin dawng ta daih hi. Skul kai mahleh, class lak hun na tawm inle
abil ah bangmah lutlou leh bangdang ngaihsak lou in Nenem a ngaihtuah
den mai, nidang a skul kuan ding aki tuah khak ciang ua,"kainuam" cih
bek a aki houlai te uh bang a mitkha leh a ngaihtuahna a lang dundun mai
hi. Hunsawt kuamtak na kingai a ki iittak a hinkhua na zang khom sa
himahle uh tunzo, bangkim nunlui asuak ta. Huchia om ahihlam alawmten
hon muh ciang un lamdangsa in, bangthu om hi hiam ci in theinuam mahmah
uhi. Mangboi ngei inleng gentheihna kikup khawm pih dingin a lawmte kiah
Nenem toh akikhen tak dan uh ahilh hi. Amau lamdang sa in kam ka
heuhou geuh uhi. Nitak ciang a va hoh a, bangthu ziak a kikhen ding lel
hiam cih va dong ding, ci in a lawmte'n nitak ciah va hoh himhim din
thupukna alak pih uhi. Nitaklam hon hih in Mangboi in bel, Nenem teh va
hoh ding a liin gu mahmah mai hi. Hon ngai nonlou kianga va hoh ding cih
zo liit huai lotel ding mah hiven mo? Nenem in Mangboi kiangah khenna
thugen lel le genlou a singdang na belhsan ahihziak mah in, Mangboi
adin a thuak hak ding mah hi.
Episode-III
Khavak kiukiau nuai ah lawmta 4 te Nenem te inn hoh dingin ahon pawt
suah ta uhi. Kho omdan vawt mah leh zan pawt na dia hun nuam mahmah
ahi ngei dia amau ten le anop dante houliim na in zang kawm in ahon pai
laihlaih uhi . Tuazan a huihsiang hiauhiau leh khavak kiukiau ten,
Mangboi lungzuan nang a paw khe tam mahmah uhi, a apawt khom helhel
laite uh ahong laang denden zel hi. A Lawmte houliim nate le phok pih se
lou in, amau gel lungtuak a lenlai sulnung te na sut den mai hi.
Kipasal sak takin om sawm mah le huai in ngilh zoh na ape theikei, a
lungtang tengteng a ana iitkhak bang haihuai asa maimah ta hi. A Sengual
tenlah theihpih lou u hiam? amau teng houliim in buai mahmah uhi.
Ciamnuih khong a gen kawmkawm un sawtlou nungin Nenem te innkong hon
tung ua, Muansang makaihna in Nenem te innsung ahon lut uhi. Nenem bel a
pi toh lel ana om ua, hoh fuh bang akisa sim uhi, a hohna nu un bel
kam1 inle ana houpih kei hi. A pi'n hon tu un ana ci keile le tutngam
huai lou hial ding khop a bang hi. Mangboi leng a ning kil khat a tu in a
lawmte pau na khong na ngaikhe lel hi. Minute10 di vel ompan cih
dingin, pasal1 hon lut guih a, Nenem kiangah va tu pah hi. Tuazoh
sawtlou in Nenem pen rum lam ah va lut a, Mangboi te lawmta in bang
lamdang sa simtaka a om lai un ahon pawtkhe non a tua pa toh kizui pawt
ngal hiau uhi (kawt huaimah di cu mo? hehe). Tua Lawmta teng in zong
zumhuai sa in hohkhak bang kisik mahmah mai uhi, ding ngal dinglah hi
salou, omlai dia lah a hohna nu un pawtsan mok, hucih komkom in ki-en
tuah in, mit a sign kipia in diing ding a hon kisak kawm un "pi kana pai
phot ding uh" ci in Nenem te inn apat hon pawtkhe ta uhi. Innpai dia
lah baih sa deuh lai ahihman un, Lalpu anu kiangah hoh dingin hon kikui
non leuleu uhi. Huailak anu bel na siam mahmah a, insung a mitam sim
ahihman un, innkong a mei hon seem uhi. Dena ava hohna nu (Nenem) omdan
te gen in, tuanu(Nenem)pen ciamnuih bawl nang a suaklel tahi. Api kia
omkhak bang vangphat huai asa uhi. Midang omlai le bel tuasang a maizum
zo tham ding uh ahihdan khong gen in nui zuazua uhi. Lalpu leh anungak
nu kituak tak a tu Mangboi in hon muhciang in Nenem te innkong a mei oi
kawma kikoi lai te bang hon phok suah nonzel hi. Amah adin zo a amuh
peuh lungzuang puangsak tulel a suak gai ta uh.
Episode-IV
A christmas/new year suti ma a last day ni ding uh ahong hita
(winter vacation dan cile ciangpen inteh). Amau lawmta teng pawl XII
exam ding ngen ahi ta uhi. Mangboi adin kumdang a last day ni a zatdan
toh aki khai mahmah ta, lawmte toh phe velvul a aom sek lai uh toh
akikhai petmah ta, apau le a pau ngap vak kei, himahleh a lawmte'n bel a
theisiam mahmah uh. A lungtang ah bangdang mah a awm theihlouh ziak
ahi (Nenem toh a hunluite kia om cihna ahi). Amau pawlten tawp cianga
pawtding ahon sawm uhi, Mangboi inbel a ngap hetkei, himahleh a lawm 3
ten hahzot lua ua, va tel tei mai hi, neu apat kipol tou ahihman un a
thugen te uh a hihtheih liai leh kithuman tuah zel uh. A kigen minthang
sek mahmah "NGAKIK" hoh hon sawm uh a mi 20 ding vel ten amau lak a gari
neikha te a zangin,Ppearson lam ah hon tai tou ta uhi. Mangboi in a
gari hek kom in nidang a Nenem toh hiai lamah sawmvei val bang ana tai
sek nasa uh ahihmanin, hunlui ngen geel ding aom tou den hi. Kitheihmoh
bawl sawm mah leh a et khak na peuh in,"hiai zawn non et kawm ua
kipaktak a na nuihkhom laite uh, na theilai hia?" ci ana hilh hile
akilawm omtak in, nunlui puanbang a thak sak zel uhi. Hunlui tamtak
geel a ahon tai kawm un a hoh nang uh cu ahon tungta uhi. Dena te
sangin tua a omna mun un midang te phok pih louh in Mangboi adin
lungzuan na ding ahon pholh khe nak mahmah mai, Nenem toh a tutkhom na
mun uh khong amuh ciangin kitheihmoh bawl sawm mah leh "hiailak a
mawngbang kawi lung ki tuak a na tutkhom lai uh na theilai na maw?" ci
hileh ki lawm in hunlui ahon kipholh suah thakthak zel hi. Huchia Nenem
leh a nunnop lai uh mualliam sate a geelgeel sungin, pai ahon sawm kik
ta uhi.
Episode-V
A kiklam un Mangboi mitkha a a hunlui te laang suk dundun den ahihman
in ngaihtuah dang neithei mahmah lou ahi ngei dia, awl khah a lamkoi na
ah tai koi sawm himahleh car toh ahon kinok tuah kha ta uhi. Huai hunin
aman bel bangmah phok lou pah ngal hi. A lawmte a nunga mi 2 a puak gel
zo bangmah a cikei vanglak uh. Damdawi innah paw ngal in a innkuante
ahilh zoh uh sawtlou in ahon tung uhi. A nu bang lung himoh mahmah in
doctor kia'h ahon dotleh lunghimoh luat na di omlou ahi, hon haal hak
zek maithei ding ahihmanin, ahon halh khia ci na theih ciang un leng
lamdang sa lua in va omkei un ci in, damlou dang et a sunzom non hi.
Huaiteng acih zohin a lung uh a nuamtuan mahmah hi . Dakkal 2 zoh in
ahon haal a akiim leh kiang en in lamdang asak tuak mahmah mai hi, amel
teng uh a ban etzoh in "bang ci dan a?" hon ci khe nanalh a, a lawmten
le thil omdan hilh pah uh a, a hilh zoh un ahon nui nalnal non get hi.
Hoihlam nawt zel ahihman in, ni 2 zohin innlam a paithei ta uhi. Huchia
hun hon zangtou in chrismas hong tung petmah ding ahita a, Mangboi adin
zo a ngaklah huai hetkei ding, nunlui geel a nunnop laite lungzuang
taka ngaihtuah suah thak sak a genthei taka aom ding lah theisah ahihman
in Mangboi ngei inle a lin mahmah mai. Krismas ma nitak in a lawmte toh
a innkong tual a mei oi in krismas zat dingdan khong houlim uhi,
Mangboi in "kenzo lungzuang takin ka zang di" hon cihleh a lawmte'n
bang ci zong a la kha uh a diam ahon nui zaizai uhi. Dak10 bang hon
ging hial takin a lawmte'n pai vai hon sawm ua, apaizoh un amahle lum
ngal hi. Imu theilou ahihman in, zan hong sawt semsem leh lengkhop ging
husa hon kiza semsem in "nunnuam in laa sa ni hondampa hon piangta"
cih la hon sak ging uh hon zak leh, Nenem toh a lenkhop khom lai ua,
hiailaa hon sak khak pih lai ua, krismas laa lak a nalh kasak pen eive,
a cih lai hon phok suah hi. Hunlui te geel a, nunlui noplai nite amah
adin a tantawk lel ahita. Nenem lah bang ci bang hinkhua zanga cih le a
theiban nonta kei. Va hoh ngam ding leng ahi non samkei hi.
Epidode-VI
Zanciang a imuthei lou, annkam lah limlou bangmah dang lah ngaihtuah
theilou, hiaidan a sawt sim tak ana om tak ziak a ngei dinga, hon thoh
khiat apat, a lung aam honsa pah hi. Tha le zoi mahmah ahihlam amahleh
amah zong kitheician mahmah hi. Hucia bangmah zo ci zen dia ki ginglou
ta lou in a innkuante kiah le a gense kei hi. Thakhat a anne dia hon
ding touh leh ahon puk ta. Kintaka damdawi in zot pih in aom ngal hi.
Apan awl a daktor va houpih in a dinmun lauh hihiam? Cih te ava dot leh
daktor inzong "tunzo aki theichiang zou naikei, aki ngaihtuah nak luat
ziak hi pen ding" cih na hilh hi. Huai in a inkuante a lunggim sak
mahmah mai hi. Khua lah ahon phok khe hak a, daktor te leng lungbuai
pian uhi. Himahleh a anaak dan bel a hoih mahmah lai. A pa ngei leng
daktor kiangah va pai non in ekcident kha ngei ahihdan ava gen leh, a
lu lam khong tat kha deuh ahi dia ci in hoihtakin hon encian ta uhi.
Ahon et zoh uh sawtlou in a natna ding theihsuah in hon om ta, a
inkuante kiangah thil omdan bangkiim hilh ngal uhi. Mangboi pen aki
ngaihtuah nak luat ziak leh ahun zat dante'n atha su chau uh a hiziak a
hiaibang a hon om ahi, huci maimai hileh glucose kai in awl a honpha
pha pah theiding himahleh, a serious sak tu bel a ekcident lai ua a lu
ana tatkhak sak ziak ahi. A nu leh pa lungkham mel pu takin daktor ava
houpih non in a tapa uh tanchin va dong zel uhi. Daktor ten zong
"theihtawp suah in pan kon la dua hon damsiang ding ahi, lung himoh kei
un" na ci zel ua. Huchia sawtsim taka ngak nung un Mangboi ahon halh
khiat in a nu leh pan lamdang asa mahmah mai uhi. A houpih ciang unlah,
dawng lou in a nuihsan heihoi ta maimah hi. Apian na nu-leh-pa lel leng
a thei nonta kei, numei amuh peuh Nenem ci in sam zel zomah hi. Nurse
te amah enkhe dinga va pai peuhmah khong ana hai houpih lomlom zel hi.
Krismas amau inkuan adin lungngaihna ahi ta mai, Mangboi in bel hichia
aom khong nuamsa zo phial leh aki lawm hi. Hichibang in omkei leh leng
nunlui geel a luangzuang tak aom veve ding ahi. A chang in a nu-leh-pate
kiang bang a nou kua e? peuh cihkhum suk zialzial sek in, huai
hunciang in a mangbat na uh kibehlap sak semsem in ahihtheih sun uh
atapa uh adin tawplou in na thum sak sak uhi. Daktor kiang bangah a
tapa uh damna dingin bangpeuh hihngam ahihdante uh gen in, lungkham tak
leh lungsim mual takin om mah le u, a tapapa uh muh in bel kipah mel a
put uh angai hi. Mangboi hihtheih sun Nenem min genkhiat ahihman in,
Nenem min a lou mun mahmah mai.Episode-VIIHuchidan teng khong a atapapa
uh hon om chiang in, a inkuanpihte adin mangbat huai lotel, ahong damna
din bang la hihtheih neilou ua, a hihtheih omsun uh zo, Pathian kiangah a
damna di ngeksak a ana thum uh a hilel. Kal 1 sung hilhial hon hicih
ciangin lung himoh ua anun a lawmte kiangah dot mai hon sawmta hi. A
lawmte'n Nenem toh Mangboi kal theih na ciang nei dingin gingta ua, ni1
a lawm polh tangpi sek te lak a, ana polh diak Lalpu kiangah a va dong
hi. Lalpu inle "Nenem toh kum 1 val bang ana kingaih nung un, zanlam in
Mangboi in a kikhen lam uh hon gen a, amanle akikhen na ziak uh theilou
a, Nenem kiah zan1 akikhen na ziak uh dong dia kava hoh un, pasal dang
toh ahon pawtsan hiau a, huai apat Mangboi in pona semsem in ka thei"
ci in a thutheih teng na hilh hi. Mangboi nu'n zong "thil omdan Nenem
kiangah va dot khiat sawm lai un aw?" ci in damdawi innlam ah honna
poimoh kha man di ua ci in apai non pah hi. Lalpu in zong, sol a aom
bang in, a lawmte kiangah genin Nenem va muhsawm uhi. Himahleh bang ci
muhtheih ding hiam ci in buai mahmah uhi. Ava muhma un Mangboi bang
condition aom ahiam cihte theih masak ut in Mangboi kiangah zinglam ann a
nek zoh phet in ava hoh ua. Mangboi ava muh hial uhle zo amau leng
lamdang asa mahmah mai uhi. Neu apat akithuah touh pih dette na tawm na
thei nonta kei hi. Va houpih theikei mah le uh sun nitum in ava om pih
uhi. "Nenem" cih tengzaw a genmun mahmah lai hi. Amau leng nitaklam hon
hih kuan in Mangboi nu kia'h Nenem kiangah tuzan ka phak sawm ua kana
pai phot ding uh ci in alawmpa uh paisan non phot uhi.
Episode-VIII
Lalpu te lawmta annezou hon kingak khom in, ahong kimtak un Nenem te
innah hoh dingin ahong kipankhe ta uhi. Lampi a houliim kawm in Mangboi a
hehpihdante uh genkhom in,"Krismas le kumthak kizangzou ta eihciang in
Mangboi va ompih gige thei le, thil neucik cik hon theih suah hun hon om
din ka ging" ci in Thathang in hon gen leh, hi honsak pih mahmah ua,
huci khong gena hong houliim kawm un Nenem te gate kong hong tung ta
uhi. A lut masa ding bang a kinolh tuahtuah uhi. Khatvei lamdan ahih
non ding a lauh luatman uh ahi. Huchia hon omom un hi non mahmah kei ci
in a vek ua lutkhom ngal din hon kithukim ta uhi. Lengla dang bang ana
ompetmah uhi, a lengla te laka khat in "Mangboi dam deuh lou hia?" ci
in ahon dong khe guih hi. Amau le Nenem kia'h a gen uh ngailou a hon ki
genkhiat pen phaze sa petmah uhi. A lit mahmah 1 uh cu genzou tuk ahi
mai uhi. Mangboi tanchin te in hon houliim ngal uhi. Nenem in bang
lamdang asa mahmah cih amel apat inleng a laang pah hi. Himahleh
Mangboi in Nenem min a genkhiat mun mahmah pen a genkei uhi. Lengla
dang te ngaihdan bang ana hilou kha theih ahihman in, lengla teng pai
zohciah thil omdan gen a sawm hang un, amau pai ma paisawm lou hi omtak
in 1 a tu belbul den hi. Dak9 bang hon pelh hial takin, hi non mahmah
kei ci in, Lalpu te lawmta honding khe khiat a sawmta uhi. Nenem in
khouh bawlsim lai mahleh hunlem om tuanlou ding ahihman in pai a tum
teitei zo uhi. A gentup/dotnop pen uh genthei lou a aom uh poisa petmah
ua hilele a damlouh lam bek cu theihta ahihmanin hoh non leu ana dong
sau zota din a ging uhi. A gensa bang un Zingciah Mangboi va ompih ding
in hon kithukim ua, huchin innlam ciat zuan din hon kikhen ta uhi.
Tuazan in Nenem in a UMang hon ngaihtuah petmah mai hi. A hunluite uh
bang a geelphak ngei hetlouh himahleh tuazan in ahon geel kha nonta hi.
Ana iit masa zo tu leng ahihmanin iitna ciang neilai ahihlam Nenem
ngei inle akithei hi.
Episode-IX
Zingkal khovot lai nii ki lawmtak hon suak aam huai mahmah te awi
dingin Mangboi leng damdawi inn konglam ah a nuten a tutpih uhi. Huchia
aomlai un Lalpu te lawmta hong pai Mangboi in na galmuh a,mitleng
phlou hial khop in na en mai hi. Akiang uh hon tun in "Nenem la"ci in
na kan guih mok hi,lawmta te zong aki guih hial ua,"denciah hon pai
ding ahi" ci in mangbang takin adawng ta mai uhi. Daktor check up round
a honpai hunta ahihchiang in amau leng a room ah va kha in kongah na
omsan phot uhi. Daktor in a etzoh in Lalpu te lawmta va lutpah uhi,
Mangboi tawlet(window) a kingai zen a na dak pawt amuh un akalsuan bang
uh atawp chat uhi. Bangtan hiam a khawlzoh un,"Mangboi" ci a asap uh
leh awl a hon ki hei komin a mittui nul ahi cih ciangtakin alawmten
leng amuh un lamdang bang sa sim komin, A kiang va naih phei ua apau zo
sam ding omlou in ava tu depdap uhi. Mangboi inle awl a hon pau in
"bang hon hih sawm uh e?" na ci hi. Amau leng a lawmpa uh omdan a
theihsa uh ahihmanin "nang toh ki pol dia hon pai keive ua, kou non
theilai na mo?" a cih uh leh "Lalpu" ahon ci khe guih a amau leng hon
ki et laplap lai un "Muansang,Thathang" hon c zom non hi. Amau leng
kipak in a lawmpa uh bang a kawi tonton uhi. Nidang a ki houliim
khom,kichiamnuih a aomsek laite uh zan zek bangmah leh tu a lawmta kim a
aom hang un nidang bangin a houliim thei nonta kei uhi. Huchia a omlai
uh anuten hon tuak kha ua lamdang bang sa hial uhi. Lalpu te pai dia
akisak uhleh Mangboi in Lalpu na len a pai phallou in a lu hon pei a,
anuten leng giahpih dingin khou mai uhi,ana kihahthuah bik ziak uale
ngai deuh se mahleng ahi. Lalpu inleng a lawmte kiangah Nenem kiang a
va hoh ding in sawl hi. Muansang leh Thatang in tuzan manzou lou
ding,zingciah kava hohsawm ding uh aw ci in innlam a zuanta uhi.
Huaizan in Nenem in Lalpu te lawmta hon hoh ding un bang kinem sim hi.
Mangboi tanchin bang theinuam mahmah mai hi. Himahleh lawmta ten bel
tuazan in hohding, a sawm khaklouh zan uh ahi citciat hi. Alehlam a
Lalpu in Mangboi khavak nuaiah vak kualpih in nidang a avak khom lai te
uh khong a genpih ciah ahon nui hemham zel a, achang in bang a mittui
khong ahon nul zel hi. Mangboi in bel Nenem leh a hunluite uh theihna
chiang anei veve lai ahihtuak hi.
Episode-X
Muansang leh Thathang leng zingkar lam annek zoh dak10 vel dingin,
Nenem te inn hoh hon sawmta uhi. Mi leng omlou zo ding ua hoihzo ding
mah ahi cih ngaihdan neikom in hon ki zui pawt ta uhi. Ana omkei daih le
mo Thang I choh get awm peuh ci kom a hon paipai uh leh hon tung khong
petmah ua, Nenem leng puansop zou phet ka hi ci in gim melsim takin na
tu hi. Amau leng gen masak ding theilou a aom lai un, Nenem in"Mangboi
bang ci a damdeuh ta hia?" hon ci hi. Amau gel inleng "damdeuh cih
theih le hikei himahleh koubel ka min ua hon saam thei ta hi veo" ci
kawmin leh a thu theihdandan un a hilh uhi. Muansang inle "Nem thil kon
dotnop uh om eive" a cile Nenem inleng "hon dong ve bang thu a" hon ci
zoh phet in "Nou Mangboi toh bang ci dana kikhen uh e, bang thuziak
a?" hon ci kheta hi. Nenem le bangmah genlou in ahon daai deda a, azoh
sotlou in hon daak tou a, a aw te hon khuahsiang zoh in, " Kou mo
kikhen ding le sawm nonlou ding damsung a khuambang kip den ding a ka
kichiamsa uh ahi a, kenleng UMangboi ka ngai petmah hi. Ken kana ngaih
masak ka hihziak tak inle kana ngai khol diak hi. Huchia ginomtak leh
nuamsa a ka omzel lai un Zankhat hon hoh ni zan in, ka zawllui pa
Bangalore aom hon tung hon hoh toh aki tuak geih a ka kiangah UMangboi
tu lou eihchiang a, ka zawlluipa hon tupah a kenle nuamsa lou in
UMangboi kiah kava tut leh UMangboi in kana pai d cih leh din hon thuah
khum a, kenle innkong tan a va delh kawm in va sam mahleng ka sap na
himhim hon ngaihsak nonkei" hiaiteng hon genzoh in Nenem in hu bang hon
la huai hial top hi. Huailaitakin Thathang in huchia kikhen mai cio?
Hon cih leh Nenem in "anakhawl phot ve wa hon genlai d kevoi" hon cile
Muansang in ana chiamnuih dawnin "next" ana ci a, huchin Nenem in
nuikawm in apau hon sunzom non hi. Huaizan in hon hoh pa le ngaihsak
lou a lumsuak ngal ka hi, azoh ka cal ciah le apai theikei acih le
Muansang in "a fon paih sia eivoi" hon ci hi. Nenem inle ngaihzong dang
le neilou himahleh non hoh ni zan ua pen UMangboi ka engbol nopman ahi
hon ci hi. Huchia hon genzoh in ahon houliim ua Mangboi in "na min lou
mun mahmah ahi" te hon ci ua a tanchiin hon hilh tak un, Nenem in
hehpih petmah a,"keiziaka hici a hitel zo ka ngaingam kei,ka iitpen
ahihci tel" ci in khase takin hon kap a. Lawmta gel in loh dingdan tuan
theilou in hon pha na ding ahi Nem citeng lel gen d a thei uhi.
Episode-XI
Nenem ngei inle Mangboi amah ziaka hiaitan tung ahihlam ahaih kei
hial a, hon poimoh na aomleh panpih theidia masa ka hi ahon cihte,
lawmta gel in hon zak in thumu kisa in, huaibang a cihtheih kipak
petmah uhi. Ahouliim nate uh hon zoh in"tuzan Mangboi kiang ka phak non
uh ngai ding ahihman in kana pai ding uh aw" ci in a ding khe ta hi.
Lawmta gel a pai zoh in Nenem mangbang takin a UMang damzoh nonlouh
ding bang na laulua in dip bang hawm hial khopin na om hi. Aveh bek va
pai bang hoih asa hial top a, himahleh a ngaihtuah ciah Mangboi in ana
theinonkei leh zumhuai pi hon hikha ding ahihciang in ci in, vehlouh
mah hoih ding hi khong ci'n a lungsim bang na kheng mun mahmah hi.
Hucia amah leh amah lungsim suangtuah a ana aomlai in,alehlam ah
damdawi innah Mangboi na buai mahmah a, Nenem min sam in kikou ekek sek
hi, a kiang ate adia bengseng khak ding a lauhman un room tuam ah
aompih ta ua. Daktor inlah aomdan amuh ciah damdawi hiaizah zanga. A
theihtawp a suah hangin a dinmun inlah hoihlam lah nawt tuanlouh
eihciang in a lung a buai simta. Ihmut theihna a kap gige lah
ahitheikei. Daktor inzong a nute awl a houpih in " tua asap gige nu
bang houh om theihlou ding hia?" ci in na dong hi. Mangboi nun tua teng
azak in a lawmte va sam in "Nenem nava muthei ta uh hia?" ci a adot
leh Muansang leh Thathang in ava hoh lai ua Nenem genteng agen uhle,
Mangboi nu mel mualtak bang hon vaak kiau mah ahon bang hial hi. Huchin
"Nenem va sam mai un daktor in amah om poimoh in hoih dingin a gingta
a" ci in asawl ta hi. Nenem zong a zaalkhun a maimit sing lou hial in a
UMang toh a hunluite uh na geel den mai hi, ana engbawl khak khong aki
mohsa mahmah ta, lah kikhel phot asuak ta hi. Huchia khase taka aomlai
in a gate kong ua pat "Nenem" cia kisam ging azak in zan sawtnung nung
a kua ei dia o c ia a ngaihtuah lah dawng tuanlou a aomlai in, apan a
room khongkhak hon kieu ging a,"Nenem na lawmten common room ah ahon
ngak uh ei" ci in ava sama amah le ava pot khait leh Muansang leh
Thathang ana hi ua,"Nougel tunungnung a bang thu om a"ci kawmin Umang
thu mah lah ahi dia cih na ngaihtuah pah hi. Thu omdan teng ahilh zoh
un a pate kiah genin a vanlum te hon aa in, damdawi innlam manoh in,
lampi ah kuamah mongmong muh ding leng om nonlou phalbi zan vawt tak
nuaiah gari neu a mi3 ki pua in hon tai cencen mai uhi.
Episode-XII
Damdawi inn ahong tung un, Nenem in Mangboi ahon muh in bang le
genthei lou in, mittui bang hon dai mahmah ngal a, huaiten a mit te a
paak sak phiphia mai hi. Mangboi inlah bang genlou in na en heihoi mai
a, Nenem inleng kua om hiam chih te leng khual zou non selou in a UMang
kiang va naih in va kawi belh tawntawn kawm in ahon ki diik hiithiit
ta mai hi. Mangboi inlah phunlou paulou in aomdan ngei in na om heuhou
kawmin Nenem hichia hon om hial leh zo amah ngei inleng theihna ciang
ana neihman in a mittui hon luang khe teisam hi. A kiim-leh-kiang ate
adin le ana nehnou huai mahmah ahi ngei dia,na ki diik pawl bang om
hial uhi. Nenem inleng " U, hon ngaidam in aw keiziak ngen eive mo, kon
taisan nonkei di kon ngailua", hiaiteng kan le agen zom thei non
tuankei. Huchia bangtan ahon om nung un Mangboi alu nasa in ahon buai
non zel hi. Daktor inzong kintaka hon delh ngal in,nou innkong ah na om
phot un chi in a sawl khe phot hi,"amah vuak i omsak zual ding uh" ci
in hon pawt khevek ngal uhi. Huchia aom aung un Nenem leh Mangboi nu
zong thil omdante gen in ahon houliim uhi, Nenem inle " Nu, UMang ka
ompih den d,hichibang hinkhua zang mah leh ka taisan nonkei ding" hon
cih leh,Mangboi nu'n zong "Nem hilou ahi, Mangboi dinmun lah
kigentheilou a maw?..." apau sutzom non ma in Nenem in na pau tuh
in,hichin hon cih hi "Keiziak a hiaitan tung ahi a,hichi mai in ka en
liam theikei di, ka kem damzou non d ka ci theikei himahleh ka damsung
in ka kem d bel ka ci ngam, huaiziakin hehpihtakin khengval honsa kei
unla hon phalsak un" hon cih te Mangboi nu'n azak in kipah luatziak in a
mittui te bang hon luang hial hi,"Hiaite non ci theih kou adin kipah
huai hi na maizen e, amah ngei inle nang ahi ahon poimoh"....ci in
agending teng le agenzoh mah in,Mangboi in Nenem sam ahi acih ziak
un,Mangboi kiangah va paingal uhi.
Episode-XIII
Huchin Mangboi kiang ah ava om hang un, Mangboi in Nenem te ana en
nak mahmah a,himahleh Nenem ahihlam a theihciit himhim keia "Nenem" chi
in a kikou veve lai hi. Nenem in "kei ka hi UMang hiaiah ka om voi"
acih in omzia aneih kei,a mangbat huai mahmah mai hi. Nenem leng a
mittuite hon luang in a UMang va naih phei in ava koi top mai hi,
huailou hih dingdan tuan atheikei. Huchin awl in Mangboi leng ahon dai
non phot in sawtlou nungin ahon imu non hi,a imut hunlou ngal a kem te
adin tawldam na hun ape kei phial hi. Mangboi nu le kisuanglah gawp in a
lawmte kiangah hichin a hon ci tei tawpmai, "Naute o nou leng na gim
lota ding ua Mangboi hcia hon hoih kalin paisan phot ve ua mo innah va
tawldam phot unla kou kep theih dandan in daktor leh nurse te toh kana
kem phot mai ding ua,na manchiang un non pha zel veve ding uh o,non
panpih nate uh kipak lua ka hi uh o,na lawmpa uh non ngai poimoh ua"
ahon ci nalhnalh leh Nenem in "Ulal nou bang nana ompih mun deuh diu
toh nou ana pai unla kei kon omlai ding" ci'n hon gen hi, Mangboi nu'n
agen hon sunzom in "Nem nangle gim lo x na hi,Mangboi hon daih sung
innlam ah va tawldam phot unla, hon hoh thak un ka cihna dan ahi,na
melte uh bang a mual gai lota,na gimlua ua" ahon cih in, kisuanglah
taka hon ci ahihlam, amel et in a theiciang mahmah ua, Nenem inle "kava
pai phot mai d uh ole, non poimoh kin khak n uh aomleh" ci in a no.
pia in pai hon sawmta uhi. Lalpu inzong "Nu-ngaak koule zingciah skul
lutta ding mahle ka hi ua,kana pai phot dua kon pha zel ding uh,
Mangboi leng hon hoihpah hen o" ci in a lawmpa uh nosia in hon kikhen
ta uhi. Zing khua hon vakin Lalpu te lawmta zong skul lam manoh in skul
kai non din hon kuan kawm un a lawmpa uh hon tellouh thawmhau huai asa
mahmah ua, Nidang a skul kuan leh tawp a, a tawn khawm lai ua a
houliim zel dante uh bang ngaihhuai asa vungvung uhi, neu apat ana ki
pawl tou den ana ki suk hehkhak ni uh omsek mahleh huaizo lawmta ngeina
ahihmanin tutan dong kipol tou charchar ahihman un akingai na thei
mahmah ua,a lawmpa a panpih theihdandan in a panpih den uhi.
Episode-XIV
Nenem suun in chim aki sa mahmah mai hi, amah lah skul lut nai
ciahlou ahihman in, thiltuam tuam ngaihtuah in ana om tei top hi, a
iittak a UMang toh a hunluite uh geel in, singdang englou a a lenkhawm
lai te uh khong ngaihtuah in luankhi nul na in hun na zang hi. Hiaibang
dinmun a a Iittak a UMang aompen amah ziak ahihlam haihlou in, hichia
etliam mai ding haksa asa mahmah a, a kiangah hihtheih neikei mahleh va
ompih det a ut hial hi. Hicibang a Nenem ciim tek leh lungzuang taka
aom lai in a, damdawi inn lam ate ana buai mahmah nonta uh ahi ding ua
Nenem phone hon ging a amanle kintaka a pick up le, damdawi inn lam
aten poimoh a sam na hilel uhi. Nenem inle kintak a auto la zawk in
damdawi innlam manoh ngal hi. Mangboi lah kipek cih takin ana kipek a
Nenem tunglam himhim leng na phok kei hial uhi. Daktor leh nurse ten
theihtawp suah a manbet in damdawi a hon kap in, huaia kap zoh uh
sawtlou in ahon dai thei vanglak a, azoh sawtlou mah in amit te awl a
hon sii in a imu ngal hi. Nenem zong a UMang kiangah va tu in a khut ah
va len in "UMang hon theilai mahteh maw? Banah na gensek, Nau na
damlouh ciah na kiangah kon om ding a, na khut in kon len den d, na cih
bangin ken tun kon lenta a, chikmah ciah le hon taisan nonlou ding ka
hi, hehpihtakin "nau"ci a non sap zel dan in hon sam non tave, non sap
lou sawt gop eive" ci in a ki diik hiithiit kawm in a UMang in phok pih
kei mahleh a khut kip tak mai in alen hi. Hucia aom kawm a Nenem leng
imukha ahi dinga Mangboi in khua ahon phok in a khut a lak khiat dek
leh Nenem le ahon halh phut a, "UMang thouta maw"a cih leh bang genlou
in Mangboi ahon nui zenzen a Nenem leng kipak lua in a UMang ahon koi
tonton hial hi. Mangboi ahai nuih maimai leng amah adin kipahna pen a
suak hial hi. Mangboi nuten hichia aomkhom uh khong ana muh un a 2 un
hehpih huai sa in a mittui uh bang na daai mahmah pian sek hi. Nenem in
hichia Mangboi aom nung a iittak a akep pen thupi sa petmah ua.
Mangboi nu-leh-pan bel a tapa uh damsiang dinga a lamet non louhman un
Nenem lah melse hetlou khat ahihmanin "pasal hoihtak na mu ding"khong a
cih pi ciang un,"ka UMang kei adia hoihpen ahi" aci zel hi. Ana
hikhelh nasa te khong agen zel a huaiziak a UMang hici ahi a "ken hichi
mai a koidap theilou ding ka hi", a ci bilbel tawp mai.
Episode-XV
Huchin Nenem in skul a lutma sung uh a UMang kem dingin aki pekhe
top mai hi, akipiak khiatna Mangboi te innkuan adin akipah huai mahmah
ding hi. Amah omzong a phatuam petmah mai a, Mangboi ngeileng, a natna
dan zel ten a pha vaang deuh in a theihial ua, dam mahmah ta leng abang
a himahleh a paukhe ngei tuankei himhim hi. Nenem in pau dingin sawl
zel mah leh sawl leh sawllouh akibang veve hi. Huchia aom kawmkawm un,
nidang a ana pawtkhom na sek te uh khong ah va phak pih a, banah lim
aki lak khawm nate uh khong a etkik pih zelzel hi. Nenem in skul a
lutnung unle a tawp chiang un a UMang va ompih ding in va pai gige hi.
Nenem in Mangboi houpih theih in omkei mahleh a kiangah omnuam asa veve
hi. Lalpu te lawmta bel exam ding kuan ahi ta ua,a lawmpa uh kiang
leng va pha man zihzeh nonlou uhi. Mangboi lah exam theiding dinmun in
aom nonta kei. Hunte hon pai zel in Lalpu te bang leng a result uh ahon
suak ta a pawl12 lohching tak in a zoukhe chiat uhi. Mundang khopi zo
ah a lehkha uh sunzom ding ngen in akisa ta ua, himahleh Mangboi tellou
ding cih a ngaihtuah ciang un poi asa petmah uhi. Nidang a maban
sutzop ciang a leng I omkhop vek uh ci tu pen tua amau lak atel theilou
ding cih khong, a ngaihtuah ciang un Mangboi a hehpih luatna ziak un a
mittui uh bang ahon pawt a, a lawmpa a ngaihna uh a zual mahmah hi.
Innlam uh khelah tak mai kawmin maban a sutzop uh ngai ahihmanin, khopi
ah siamsin dingin a lawmpa uh leh a iit-a-ngaihte uh leh innkuante
nusia in a kuankheta uh.
Hunte hon liam zungzung in Mangboi damlou a,akep nung uh kum 2 bang
hon val hial ta hi, huaitan dong akikep nung unzo hon hoih tou mahmah
in alang ta hi. Himahleh a chang abel buai theilai ahihmanin daktor ten
huaiding in mundang ah a sawl kheta uhi. Hoihtak a kum 2 bang enkol a
aom zohnon nung un ahon tungkik un,ahon hoih mahmah ta cih anuihmai
etmai inle akithei hi. Huchih hun in a lawmte leng graduate ta leh
sepna hoihtak tak neisa in innlam ahon kik siausiau ta uhi. Huai hun a
kiimtak a aomlai un, ki-ho lou nana chu ci in Nenem leh Mangboi in ana
ki-iitna uh su buching dingin leh sihtanpha,a nuam-ahaksa thuak khawm
dingin ki-iit ki-ngaite ni akigen valentine day ni chet "14 Feb 2012"
in nunkhat a luaikhom dingin guikhaubang azawm ta uhi. Amau ki-iitna
ngaihnat pih mi zatam te mai ah nupa ahi uh cih puangsuah ahita. Kum
tamtak mangbat leh lungzin huaitak banah lunggimtaka ana zat uh tu in
amau adin kipahna gah ahon suak ta. Haksatnate kala kipaktak leh
nuamsatak in ahinkhua uh a zangta uh.
__BEITA!BEITA_ :))
©Siamsinna leh Vakiangbu
Comments
Post a Comment