DAMTAKIN MANGPHA NUNLUI NGAI IN LUANKHI NUL LOU AW
By: Bhyak Hawxel
(Requested by NGAIHVUNG GUITE)
Muikhua hong zingkuan in lungleng sim ka hi dia, ka hunlui geel in ka
lungzuan na muut mang sawm hileh kilawm in huihsiang hiauhiaute'n hon
seem ngelngel uhi. Kum 2 vel ka na kingaihpih khak ka Ulian bang lungsim
ah ahong lang thakthak hi. Kingai nawnkei mahle ung ka ngaihtuahna ah
ahong laang mahmah hi. Ka kitheih masakni ua pat ka hon ngaihtuah tou
khata a, ka hunlui uh hia bang ahi.
Nitaklam khat kuangsil a ka omlai in ka lawmnu kintakin ahong tailut a
bangthu hon gendek hiam ka chi lai in, "Ngaih i maw ka u Sang lawmpa
Lialian in Ngangaih ka call leh la ngeilou, gending poimoh nei ka hi hon
call sak aw hon chi" chih hon gen in kenle "Ka fone ginglam ka phok
mahmah sama" ka chi a ka fone kava la a ka etleh misscall ana om mah
ngei hi. Ka lawmnu'n hon hahsawl ziakin ka call-ta mai hi. "Hello" hon
chi a, kenle " Bang di chi sim?" ka chileh "Ngangaih himahteh maw?" hon
chi a "Himah ing" ka chih leh "Nawn thei maw?" hon chi leuleu a "Hon
theichiang lou" ka chileh "Lialian ka hi" hon chi a, "Na gen dile na
theih lolouh toh ka koih di" chih leh koih khum ka thuah hi. Kikim in
honna hehsan mahmah a, "Gen di aneih ziak eive" ahon chih khum hi.
Huaizoh sawtlou in message ahong lut a, ahon ngaihdan leh hon ngaihdan
thugen honna sawm ahihdante hon hi. Ka lawmnu’n honna deihsak mahmah a
kingaih pih in, huaithu keikiah hon gensa nang leh nang kigen phot
lechin kon panpih di ka chih ahi a, dawng mahmah in hon chih ziakin
kenle huaizan mah in ka kingaihpihta hi.
Huaizan inle ka ngaihtuah kha den hi. Mi thum toh bang ana kingai
ngei kha samta himahleng iitna kichi theichian loupi a pawl sagih ka hih
apat ngaihzawng ana neikha ka hi. Pawl kua ka hih kum a Lialian toh
kingai himahle ung, huai hun inle ka kingaihtung un ka theichiang nai
tuankei hi. Hilele amah toh ka kingaih nizan un ka dip khong bang a hawm
mahmah hi. Lauh nei khong ka bang hial in ka kithei.
Skul ah ka lawmte kiangah gending bang zumhuai kasa mawk hi. Kikim
toh lah skul ah kai khom ka hikei uhi. Zumpipi in ka lawm polh mah mi
nihte kiang ah ka gen hi. A khat in bel hon kipahpih mahmah a, a khat
inchu "Zeih zezen" chi in ahon nuihsan a, huai in hon suzum mahmah hi.
Midang kiang a agen ding uhle ka phal hetkei hi. Ka genkei ding uh chi
mahle uh, numeite kikamtam ahihman in agen ding uh ka lau veve hi. Skul
kaitawp in ka kaina uh kibang loupi in ka kimu kha ua ka kinuihsan lel
uhi. Tua nitaklam in mi apat ngaihzawng bangle nei zelzual ahihdan ka
theihte ziakin kingaihpih louh zawk sawm in, ahon message chiah
kingailou in om thakni chih sawm in ka gelh ding teng bang gelhsa in ka
koih hialta hi. Annek zoh in ahon text ngei a, huai ka muh in ka gintak
sangin hehpihna ahon neizawta hi. Hon ngaihdan hon gente leh sawtpi apat
honna ngaisa ahihdante hon gen in, ka thilgen sawmte gen nawnlou in,
midang hon neihsan mailou a, hon ngaihsung kenle ngai mahmah ding ka
hihdante ka genzaw daihta hi.
Huchia hun zang zelin ahon ngaihdante hon genchiang in kana gingta a
ka kipak thei petmah hi. Hon iit taktak inle ka thei, a hampha ka kisa
hi. Midang inle deih bawl uh ahihdan bang ka theihchiah ka lungkham
lawsek hi. Iit takpi leh iit lotelta ka hi. Midang ka ngai thei nonkei
nang nawng om apat khong hon chihte,a zak nopdan tuni chiang inle ka
mangngilh theikei. Sihtanpha ading tan in iitna hon chiam tele azak
noplua a, kenle ka lungtang taktak ka peta hi. Zankhat ka nute misigal
dinga ahoh lai un, hong hoh teitei dingin ka sam hi. A niallou in ahonh
hoh a, alawmte bangzah hiam toh ahi uhi. Ka kizahtak ziak uh adiam, ka
paungam kei tuak uhi. A lawmte bel hong pau ua chiamnuih khong hon
genchiang un, kana nuih louhngal uh kougel in bangmah kana hihthei kei
uhi. Na pate hong pai nawnma un ka pai di uh aw chi in hon chiamnuih a
pai dingin akisata uhi. Gate chiang ka khak zoh in ka lutnawn ngal hi.
Ka nute hong tung ua, lumdin ka kisa ngal hi. Lup kawm inle ka ki-text
ua, ka imutsuah lam e ka gen ngamkei a, ka imutsan ding kalau a, aman le
hon imutsan ding ka lauhman in ka reply pah tottot sek hi. Ka ki-iitdan
uh khong ka kigentuah ua, kenzaw huai hun khong ale ana ngai lawgawp ka
hita hi. Ka hun omsung teng amah toh zat ahihnak leh manpha kasa hi. Ka
lehkha lam e bah loh gawp bang le kana hita, skul kai in inn ah om in
koimunpeuh ah omleng le Lialian lou in ka hithei nawnkei. Hai gawp khong
ka kisakhun atam mahmah hi, hilele kei ut ziaka hichia ngai lotel le ka
hikei a, iitna ziak ahi ka chi a, aman hon ngaihziak inle ka lungmuang
mahmah hi.
Kha nga bang ka hong kingaih hial unzaw ka kingaihlam uh ahong thang
mahmahta a, thu le laa gentheih, ahoihlou lam mah gending ahau zaw ua,
huai in hon lunggimsak thei mahmah hi. Himahleh aman ahihlouhdan hon
genchiah ka gingta zel hi. Ka ngaihluat ziak a midang gen gingta theilou
ka hi pen mai. Haksa sak hun atam a, hon kipahsak hun le atam hi.
Muangtaka ka omlai in, nikhat ka skul ua ka lawmnu’n a innlam ua a
lawmte khat toh kingai uh ahihdan ahon gen a hilele ka gingtakei hi.
Amah lah huai hunlai in a fone asia a chih ziakin ka kithuzak theikei
ua, adik leh diklouh ka dong theikei. Huai Biakhoih toh kingai a chihpen
uh chu gingtaklouh theih ding ahikei, aki-textna tan uh hon lak a, a
number tuam zang mahleh, a text gelhdan akibang a, ka omlaina tawm inle
fone a akihoulai un a aw hon ngaisak hi, a thilgente bang ana lua,
keipen toh kingailou ahihdan leh ken ka deihziak a kitheikha maimai
hidan in bangkim agen hi. Huai hun in ka posiam hetkei. Keikiang ah a
fone sia chi a hichidan a aompen ka posiam mahmah kei hi. Afone sia
chilou a, a midang toh kithuzak maimai hilezaw ka posiam deuh maithei
ding hilele ngaihzawng a neihzawk mahpen na kasalua. Huai hun in bangmah
le ngaihtuah theilou in hon koih a, kei adin haksa mahmah hi. Ngai
petmah kawmpi in ka kikhen uh hoih kasak zawk ziakin kikhen mai ding in
thutanna ka bawlta hi. Himahleh huai hun inle hon text ma text ka sawm
kei,a ziak bel afone sia hon chih khumlam ka mangngilh kei. Kenle a
lawmpa kiah hon gensak din ka sawlta mai hi. Iit in ngai mahleng midang
keisa’h a su kipak zaw ding mu ahihmanin ken huai hun in taisan kei
lengle aman lah hon phok tuanlou ding ka hihziak a khending simthu lel
mah ka hi.
Huaibang thu a lawmpa kiah ka gen hial lezo ahon fone pah hi. Number
dang zang ahihmanin kana theikei a kana pick up kha hi. Amah di sa leng
ka pick up hetkei di. Hichin hon chipah hi, "Nang huai Biakhoih thugen
gingta di maw?" "Hi huchi kan a thudik om nawn kenteh" ka chi suk pah a,
"Gingta mahmah ken aw? Nang ahi kon ngaih, midang ngaithei di ka hi
nawnkei, ka u toh ahi akingaih uh" hon chihlai in ka pautuh a, "Nang hon
khemkhem tel di maw?" ka chih leh "Hon khemlou ka hi, hon khen mahmah
ken nanglou in ka hitheikei di" hon chih in ka khase lua a, ka dawng
keileh "Bang chi e? Hon ngai nawnlou maw?" hon chi a kenzaw ka ngaihluat
ziakin ka mittuiluang kawmin "Kon ngaihluat ziaka hichi ka hi, na
thilgen kon gingta dia, migen din om nawn mahmah ken aw" ka chita hi. Ka
iitluat ziakin ka khenzou kei a, athilgen ka gingta pah zel hi. A u toh
kingai a, Biakhoih in Lialian pen toh kingai dana agen mawkpen lamdang
sa lotel mahleng ka dong sau ut nonkei hi. Ka lunggimna di ahihsang in
Lianlian in hon khen hilele ka ngaihluat ziak in, kipah ka tumta mai hi.
Huaizan in, Lialian in nang U chia nawn saptak di ken nau chi in kon
samta di, ei kisam kha ngeilou hon chi a, kenle dik kasa hi. Amin a ka
sap ngamlouh leh samkha ngei din ka kigingkei, aman le nihvei kan hon
sam nai din ka gingkei hi. Huchia kituak tak a kong om nawn theihpen un
ka ki iitna uh ahon khauhsak semsem bang in ka theizou hi. Ahon text
tungciang bang in "Ka nau ngaih aw" hon chi zel a, hiai inle ahon
kipaksaklua hi. Kenle U chi in ka sam a, ka chih khaklouh hun chiang
bang in ana hehzel hi. Atak in bel ka kihouvang petmah uhi. Pathianni
sunnung chiang bang in amah lawmte leh kei lawmte toh mi 5/6 vel ding ka
pawt zel uhi. Huaichiah le kihoulou in ka kitawn tawp zel ua, lawmte’n
hon engbawl nakthei mahmah uhi.
Kituaktak leh ki-iit tak a hunzat kei adin manpha kasa a, ka U ngei
inle manpha sa din ka gingta mahmah hi. Zan khat kou adin kimuh theih
nang hun ding ahon om zenzen a huai nitak inchu kou gel vuak ka pawt
khom uhi. A guktakin ka kipak mahmah hi. A sakmel leh nuihmaite etchim
ahaksa a,neemtak a a aw suakte zaaknop hina tel e, "Nau pau deuh ve" hon
chi a "Nang hong pau zaw ve, ken gen dile thei mahmah lou" ka chi leh
"Na hon iitdante le gen di omlou hia?" hon chih in "Om thamtham e, kon
ngailua kon iitlua" ka chi khethei hamham hi. Ka zahtak luatziak in
bangmah ka genthei kei hi. Huai zahtak na zo iitluat man ahi a, min i
iit taktakte kizahtak a sianthouna toh ki-iit hi a chih uh, dik mahmah
ahihlam ka U in hon hilh chiang bangin ka ngai top hi. Amanle hon
ngaihdante hon gen a, keia lou dingin na pammaih lua khong hon chihte
azak anop mahmah mai hi. Innlam ka manoh kawm un tunglam a solkha leh
si-alte vel kawm zel in, amau bang a ka lenkhop hunding uh ka ngaklah
mahmah uhi. Huaizan kan a ka kingaih nung ua nuam kasak ka thei naikei.
Midang hon neihsan dingin le ka gingkei a kenle midang ngaihding leh
midang poimoh nonlou in ka omthei hi. Ka U ka iitna zo pathain lou ngal
hon theihpih om ding inle ka gingkei himhim. Min na ngaihzawngpa’n hon
ngailua eive khong hon chih uh bang azak anop mahmah mai hi. Ka hinkhua
sunuamtu leh iitna tak hon hilhtu ka U ahi a, chikmah chiah ka taisan
zoukei ding chih ngeile ka kithei lotelta hi.
Hunte hong pai zel in kipahna om gige leh lungkim gige theilouh
ahihziak in, ka U thu a kigen zelte’n ka lungtang ahon su na nawn mahmah
hi. Huaizan in hon text in "U na ki-awilua" ka chipah hi, amanle "Ngaih
na thugen ka theisiam kei" ahon chi a, kenle chiang deuh takin hichin
ka chi suk hi "Ngaihzawng dang na nei" ka chih leh,"Kua chih eita?" hon
chi a, "ka theih mai ahi" ka chih leh ahon call ngal a, "Mi genteng
gingta gige di na hileh nawn ngaikei ahi, huaiziak in hon taisan zaw aw,
i utdan tuakin omzaw ni" hon chih zoh in ka pau le ngak nawnlou in ahon
koih khum ngal a, huaizoh in ka text chiang inle ahon reply nawnkei, ka
call chiah lah hon cut sak in "busy" akichih louhchiah "switch off"
chihte lel ka zak ahita a, ka lungtang ana mahmah hi. Huaini zanin
kikhen ka hita maimah uhi. Hichitan tung di sa leng zaw haksa sapipi
agenlou mai di hinga khong chi in ka mittui a luang zungzung mai, hucia
adawnnate pawna lawtel dipi in bangziak a huai thu ka gense ade aw? chi
in ka kimohsa lua hi. Ka ngaihluat ziakin midang toh hon kop hilele tua
sangin ka thuaknuam deuh din ka gingta hi. Kei adia siamlouh tangpa ahi
hiam mawo? chihleh a hoihlou lamteng in dotna tamtak ka kibawl khum hi.
Ka mittui nul senglouh a luankhete kuaman hon theipih kei uh, ka
lukham(pillow) mohnei loupi ka kahkhum ekek mai. Hichi mai ding kana sak
louhziak a pona mahmah diak ka hihman in huai hun apat thilhoih himhim
ka kipethei nonkei. Nikhat tei ahon theihsiam a, ahong kik nawn ding ka
ngak hi. Ka ngakna a thawn mai ahihlouh nangin pathian kiah ka ngen gige
mai hi. Kinepna liantak nei in Lialian in "Ngaih,hon ngaidam in" hon
chih ding ka kinem lai veve.
Nitamtak huchin aom den zou a, atawp atawp in ka kidekzou nawn mahmah
kei a, kenle amuh ngeingei ding chi in hicibangin text ka gelhta hi "U,
hiaibang teng maw nawn tansak ding, nang adia ka ginomna gah hiai tel
di maw? U, ngaihtuahthak lai inla, na theihsiam chiah iitna tak toh hong
kik in aw, ken hon ngak den ding ka hi, nang kon iitna zaw lamdang lua
eive, hon theisiampih inla, ka hihkhelh omte hon ngaidam inla hong kik
nawn inla hunthak panta ni. Kon iitna na theihsiam hun ngak in ka iitna
neihsun toh kon ngak gige ding ;((" hiaitan gelh in ka khak(sent) ta hi,
tampi gelhnuam mahleng ka khasiat luatziak in ka lungtang ah bangmah
aomkei. Ka iitna neihsun ka piak in hon taisan mahleh kei iitna zaw
adang ngeikei. Min ka U(amah midanga hita mahleh ka kineisak mahmah lai
veve) ngaihzawngnu khong ahon genchiah amau bang ka ho khazel hi. Ka hai
ziak ahi, ka U ginom hileh huaite toh kingailou ding hi ua khong ka chi
a, ka U amoh zaw ding himahleh amoh in ka mu theikei a, amohna di
himhim le ka mukei hi. Ka mangngilh sawm chiahlah a sakmel leh nuihmaite
ka lungtang ah ahon lang semsem hi. Hichipi in amah mangngilh nang in
hatna bangmah ka neikei. Ka lawmten hon hehnem zoukei ua, hai honsa in
ahon thuhilh hang un, kenbel bangmah in kala kei, iitna ziaka haigai mah
ka hitave. Nitak tengin ahon text di ngak mahleng aman a sawm louhpi
inzaw chikciah hon text-na hong lut maizen diam maw? Hon text ka muhsun
"zalmangpha" chih khong lel ahi. Ka lawmte kiangah ka U ka ngaihdan ka
genzelte lah amau adin nuihchiam hon lel nang lel uh ahi. Hilele poikasa
kei ahon huchih theih mah uh ahi. "Hucibang pasal khong ngaih ngailou"
chi a hon thuhilhnate uh ken ka zui zoukei hi. Achang in mihainu hon chi
ua, bang chi tukin pan hon lakpih mahle uh, ka iitna in kiam lam sang
in punlam a manoh zelzaw hi.
Huihkhi langte le a vot hiauhiauta, khuabang le hong vot pan ahita,
huai hunte’n hon lungleng sak in kum paisa a ka christmas zatkhawm laite
uh, banah ka veng ua lengkhom dia ka zot lai a nial hetlou a hong
lenkhoppih laite ahon lang dundun hi. Krismas leng maban ah om ahizomah
a, huai hunchia ka gentheih didan khong ngaihtuah in, kumlui ka khak zan
ua, hon koi khak masaknipen leng ka mangngilh theih nailouh ziakin ka U
tellou a hiai hun hong tung dingte ka huphulh mahmah mai hi. Hunluite
gel a ka omlai in ka fone ahon ging a ka U in "Ngaih, bang hih e?” hon
chih ka muh in ka kiguih hial hi. Ka reply ding ka kilawp petmah a amah
ngai a om ka hihdante ka gen suk pah mai a, hon phok nonlou hita nite
peuh hon chi a, ka ngaihdante ka gen dent mai hi. Huai a ka ngaihdan ka
gente atak a ka thuak zah kimkhat lelle ahinaikei. Hon text lel amah
adin bangmah hikei mahleh kei adin zaw zankhat hoihtak a imut theihna
hon pe hialtu hi. Huaini apat ka kihoukha zeuhzeuh zel uhi, hilele
midang a hita dan a ka koihman in, ahuntam ka zatsak ngamkei a, ka
ki-text chiang unle mangpha khong ka khak kha pahpah hi. Atak inzaw
zanhak a hon text peih lehleng kenzaw ka ngaplaw petmah hi. Hunluite
bang hon genchiah keidin mittui daina lel hita, kon ngai hon chi samsek
a, a chih maimai hita leleng, keidin kipahna pen ahia, aman huai hon
phokpih din ka gingkei, kei chihte leh kei iitluatna lungtang amah adin
bangmah ahizoukei a poi kasa lua. Hilele ka iitna thawn din ka gingta
keia kinepna lianpi ka neilai veve.
Kinep phaklouhpi in, kingai dinmun in ka hon omnawon ua, krismaste
bang ka hon zang khom nawn uhi. Kei din kipahna kawlni suak bang mai
ahi. Kumluite kha khom in kumthak kawlni hong engta a, koule kituak a
heikhom den a hunluite ngilh in houlung tuak in lenkhop sawm in maban
ding gelzawta dingin ka kichiam uhi. Ka U ngei inle hunlui a hon
bawldante a ngaihdam ahon ngena, ginomta ding ahihdante hon gena,keile
kipahna a diim in ka ngaihdante genin "Nawn bawldan ngei a nawn bawl zel
lehzaw, nang apat khatveitei hong kik nawnlou dia mang ta di ka hi"
chih khong in ka gen hi. Ka ngaihluat ziaka hichia hon ngai dan a om
maimai ade aw ka chih hunle atam mahmah mai hi. Sunkhat hong pawtlai in
puan kana sawp a, "ana tu in aw ulian" ka ci a “Awle hong hohta lawlaw
chu kon ngak di" hon chi a, ka puansawp kawm khong inle thu vangtang ka
gen uhi. Huai kawmkawm in ka hong man khong a, himahleh ka mantak in a
paingal asawm mawk a, khamlai mahleng le apai thouthou hi. Kenle
lamdangsa a fone apat ka dotleh, ka hih di poimoh om ahi hon theisiam in
aw hon chi a ka theisiam pah zel hi. “Nau nang tellou a hithei lou
keive, nang tellou a hinle ka ngap kei" hon chizel a huaichiah "U
huaidante khong non chihchia a zaknoplua eive, hon taisan nawn lechin
hiaite khong ngaihtuah di inga ka thuaksiam kei di" ka chi thuk zela hon
taisan nawnlou ding ahihdan hon genzel hi. Kenzo a kamsuak peuhmah ka
gingta zel mai hi. Iitluat ziak mahmah ahi pen mai.
Huchia ka lung ahong muang panpan leh ginom taktak din ka gingta hi.
Ka ki-text chiang unlah hon ngaihdante hon gengen hi, kenle amah sang
ale ngaizaw ding ka hihdante khong ka gen hi. Huchia ka kihoulai un ka
lung sunuam loutu din "Nau midang toh kingai in hon thei non lechin bang
nawn chih di" chih hon gen in "Midang nei zel mo?" ka chile "Huaidan le
hikei" hon chihtakin ka lung asu nuam nawn mahmah keia, "hon gen aw
please" ka chi a ahon gen nuam zok kei hi. Ka hah dotluat ziakin
"Chiching (khatvei ahon kop sannanu ahi) in kou kikhen dana ana koihlou
mawk eivoi, nau bang ka loh di khending inlah ka hehpih zel a" hiaithu
hon chih in bangmah ka genthei nawnta kei, ka mittui hong dai mahmah a,
chiangtakin le message ka muthei nawnkei a gelh leh ka gelh thei nonkei,
haksa sa lotel hinapi in “U khen koh hoihtakin kingai zaw un” ka chi
kheta mai hi. “Nau hileh nang toh kei bang chi di maw? Nang le kon
taisan zoukei, aman hon ngailua a hehpihlua inga khen ngamlou keivoi”
hon chi non a, kei hehpih tak louh maw? Kenle kon ngailua hilou mo?
Keidin mun aneutel, chihpeuh in keile kei ka kichih khum hi. Amah
kiangah bel "Na hamphalua hoihtakin hong kingai un aw, kei tusun i
pawtna ka gimlua (ka pawtna gim ka hikei, ka lungtang a gimluat ziak
ahi) a kana imu di, damtakin mangpha uU" chiin mittui toh ka omta mai
hi. Huaizan ka mittui luangte khamvual ding ahi nonta kei. Haksatna keia
hiding in ka koihta, ka iitpen in keisang a midang heihpih zaw leh amau
iitna, kei iitna sanga theisiam zaw chi in ka khase mahmah mai hi. Ngai
mahleng kei adin mun aom nawnkei, huaizan keidin ahaksatdan ka ka
mangngilh nawnkei ding.
Huaizan ka imukei himhim ka thoh inla ka mit bang ana bok hi. Mikhat
ziaka ka hichih pen hai kakisa mahmah mai, lah kei utziak hilou zel a.
Lialian in ahon call a,h imahleh pick up ka sawmkei himhim, tamvei tak
ka ging pai suak sak hi. Huaizoh nunglam in message ahon khak hi "Nau,
hon khen mahmah ken aw, Chiching khen na ding ka hi, i nunlui mualliam
mai din ka phalthei kei, nang tellou in zaw ka omzou kei di, kon huchih
nawn mahmah kei di,hon ngaidam in keimoh ngen ahi" chih hon khak hi.
Kenbel na kanasak luatman in ka gending ka theikei a, ngai lotel mahleng
muang nonloupipi in kingaihpih leng kei gentheih nang ahihman in haksa
ka thuakna di vek ahihman in, hiaibang in ka chita hi "U, ahithei
nawnkei nuamtakin hon om zaw un, keizaw ka tantawk a lungkim dan kana
kizil zaw di, hilele nang tuk a kana ngaih aomkei chih hon theihpih in,
maban hun thei di ki-omlou ahihman in, hong om bangbang ka pal touzawta
mai di" ka chi thuk hi. Aman "Huchidan ka utkei, nunlui ka gelchiah
hichia mang mai din ka phalkei, hon ngaidam inla hon kikhenpih ken, ka
damsung in huaibang in ka om nawnkei na di" hon chi a kenle ka reply
didan ka theihlouh sungin, hiai ahon khak non hi "Nau, nawn chiamsa
ngilh di maw?" hiai ka muh in ka heh toh ka khasiat toh ka lungsim ana
petmah hi, amah ka thuciam uh a peeltu pen ahihlam ka theilua a,ka heh
petmah mai hi. Ka sms tawpnapen khak sawm in ka gelh ding bang ka
ngaihtuah nak mahmah hi.
"U haksa sa in nasa mahmah lengle nang hinkhua apat ka kihepkhiat hun
lawota ahi, kei hihtheih aomkei a, ka tantawk a lungkimdan ka zil
sawmta, nou nuam in hong leng zo un, damtakin mangpha nunlui ngai in
luankhi nullou aw, na luankhi nul ding hon phallou ka hi, keizo hichin
ka omta di, damni mangpha" hiaiteng chi in luankhi nul in ka om a, haksa
kasa mahmah mai hi. Hiaiteng ka ngaihtuah kawm a ka om in ka mittui
bang ana pawt theilai sam hi. Huchin dak tam ana ging sim man a lum din
ka kisa ngal hi.
Kum nih bang ka kingaihpih ka ulian ngilh zoulou in ka kikhen nung uh
kumkhat sung ngaihzong himhim ka neithei nawnkei hi. Gentheih leh haksa
tak a ka thil puaknat mahmah lai a, "U nikhat tei ken hon mangsan di
keive" ka chih bangin tun ka mangsanta, huai hunzoh in hon iitdanthu ka
lawmte kiangah genzel mahleh iit in ngai mahleng ka muangzoh nonlouh
manin ahithei nawnkei hi. Kei gentawp theihsun zaw DAMTAKIN MANGPHA chih
ahita.
N.B: Na kingaihlai un iit in duat takin kem un, numeite’n duat poimoh
uh ahi, na duat zohkei uh lele theisiam un, haksa sa kawmpi a ahaksatna
uh hon genlouh hun uh tamlua ahi. Na iitna leh ngaihna uh azekai nung a
na gen un akanna nonkei, pilvang takin iitna i kem ding uh aw.
__BEITA!BEITA__
©Siamsinna leh Vakiangbu
Comments
Post a Comment