SIHNA'N GIBANG KHEN MATENG...!!
By : Sang Hilsia
On 24-11-2012, Saturday at 8:55am
[Kei' min cihlouh min khem zang ka hi a, kei' min toh kibang na om khak zezen ua leh, poi ana sa kei un. ]
Nikhat, skul (college) canteen ah kei kia ka tut lai in, ka kiang ah numei khat a hong pai a,"Hi ! Usang, lonely na cia, kong tu thei diam..?" hon ci a, ka et leh ka klasmate te mah Siamte ahi a, kenle,"tu thei tham e", ka chi a, huciin amah le a hong tu hi. Mipautam lou ka hih toh gen di le ka thei kei a, aman a hon houpih na teng ka dawng lel hi. Bang tan hiam paulou a ka om nung un,"Usang, tuni sum ka pokha kei a, ka gil a kial sim a, sum na neih lem leh non ba sak thei diam..? Hunlem masa pen2 ah piak kon sawm di, kisuanlah huai sim na a, kon ngen mai" hon ci a, kenle,"kisuanlah na di bang mah om lou ahi, na duh2 va la ou, dencia sum ka pe na di, dit kik ngai hial lou e lawmta kal ah", ka chi a, amah le ding pah in ava la pah a, ka kiang ah ahong tu nawn hi. Ka nek kawm un,"kare usang, nang om kei lecin gilkial a kibuai di a kei maw; na na om zenzen a, kipahhuai lua", ci in kamsiamtak in kipahthu hon gen a, "khemkhem, kipahna tham kei" ka cih leh, "mood fuh lou sim hia le ? ! cih sim2 te toh kinakha u maw ?" ci'n nui selsal kawm in hon ciamnuih a,"kihu cihpih di bek om leh ka cimah ve", cih teng in ka dawng nawn hi. "Usang na pau ut kei ngei, kong tut leh hehsim na hi hia le", hon ci nawn a, "mawkmawk eive", ci'n ka dawng leuhlauh zel a. Mi pau nuam mahmah a hi a, a paupau a, himahleh ken kam khat khawng in ka dawng leuhlauh zel a. Mi pau tawm mahmah ka hih ziak in, ka mizia thei loute' a di'n bel heh gige ka bang hi. Hucia ka om sung un, daak a hong ging a, klas la di'n ka kizui pawt ta uhi.
Klas ka lak lai un, Siamte kia ka lungsim ah a hong lang a, thildang le ka ngaihtuah thei kei hi. Nidang a mu ngeilou leh houpih ngeilou hikei mahleng, tuni a ka om dan a tuam a, ka hi heuhau mawk hi. Canteen a ka om dante uh, kamsiamtak a hon houpih dante leh ka dawn dante bang ka suangtuah nilouh hi. Ka dawn dante bang ka kisiik mahmah a, bang a cingaih de aw. Khauh a salaw dia a ngaisiamkei kha de aw, cih peuh ngaih tuah in ka na guk buai mahmah hi. Tawp ciang a a fon number nget di ka ci hi. Hucia thil ngaih tuah a ka om lai in, ka Sir pa un chalk in hon deng a, ka tal a hon kha a, miteng in hon en duam ua, ka zum mah2 a, ka lu bang lian tultul hial in ka thei hi. Sir pa'n ding dia hon sawl ziak in, ka ding tou a, ka daak khiat leh, Siamte in lamdang sak citak in hon na en kil kel a, ka zum zosem hi. Huai tan di ka sak leh, a explain na apat dotna a hon dong a, ana ngaihsak lou ka hih na ah, bangmah ka thei kei. Sir pa le heh lua ahi ngei dia,"if you are not interested, you are welcome to leave the class..", ci'n kam neem tak in a hon ci a, himahleh ka pawt khe zen kei a, awl in ka tu suk nawn hi. Ka na ngaihtuah na tengteng, ka maizum na di phet a hong suak maimah hi. Siamte houpih ngam di ka hi nawn ta kei a, huai ban ah, a fone number nget di plan ka bawl teng fail bei., ahaiiiiii....!!!
Tawp a kuamah le houpih ngam lou in kei kia a pai di ka cih leh, ka nunglam apat hon kisam ging ka za a, kinunghei a ka et leh, Siamte ahi a, ka zum mahmah mai hi. "Hon na ngak ou usang", hon cih ziak in ka na ngak a. Ka kiang hong tun tak in, "nang kia na pai a, kiton le la..", hon ci a, "aw..poilou", ka ci lel hi. Ka zum toh, gen di le ka thei kei a, a mel le hoihtak in ka en ngam kei. Bangtan hiam ka pai nung un,"usang tuni bang ana ci om e ? Na zum mah di maw..?", hon ci ta phut a. Kenle," kon na ngaihtuah lo kha a eive", ka cih leh, "na zuau hi", ci'n ka liang a hon beng kauh a, kenle serious deuh in,"ka tak tak", ci teng a ka dawn leh, lamdang sak citak in a hon en a, a mel bang a hong lamdang hial in ka thei hi . Amah le gen di thei lou a diam ah ahihkeileh zum sim a diam ah, a hong pau nawn kei a, ka kisuanglah sim hi. Pau lou a bang tan hiam ka pai nung un, a inn paina uh lamkaak ka tung ua,"painuam in oleh usang..." hon ci a, "nangle painuam", ka cithuk hi. "Eh ! Usang na fon number non pe thei diam...?" ci'n hong nung kik a, kenle,"hi tham e", cih toh piak ka thuah hi. Ka kipak gu mahmah a, a ziak bel ken ama a ngen ngam lou ka hih ziak in. Huci in ka innlam tuak uh ka zuan ta uhi. Ka lampai kawm in a hon houpih dante khawng ka ngaihtuah nilouh a, a kamsiam dante, a nuihmaite leh a mel kilawm mahmah te ka mitkha ah a hong lang dundun hi. Kingaihtuah kawm a ka paipai leh suang ka sui kha laizang a, na ka sa mahmah a, ka tawm longlong zezen hi. Huciin khe nna pi in inn ka tung ta hi. Ka room ah ka lutsuak ngal a, kikhek ngal in, singpi khawng dawn in ka tawldam hi. Singpi khawng dawn zou in, hih di le om tuan lou ci in, ka guitar ka lakhia a, zaila ka awi ngiahngiah mai hi.
Siamte' te ahihleh mineizou mahmah ahi ua, neih-le-lam ah kuamah eng lou ahi uh. Huai ban ah, apa mifel leh kizen, khosung a dia hoih ahih nakleh hihlit neilou mi ahi. Mite' kingakna taak ahi uhi. Alehlam ah, kou bel Pathian hehpihna toh khosa thei lou lua ka hi sam kei ua, himahleh Siamte te toh bel teh theih vual ka hi kei zel uhi. Mi hausa mahmah ta, deih deih nei zou a nezou ahihhang un, Siamte in kisaktheihna himhim nei lou a, mikingainiam tak, paunuam leh polhnop mahmah hi. A melhoih mahmah a, duangcing in a maitai zou gige a, huai in a hon hiip mahmah hi. A hauhsak mahmah hang un, kicheina uang bawl mi ahikei a, simple taktak in a om a, a kilawm lah tuankei hi. Huan ah, kholaimi lua ahi kei a, poimawh lou a pawt mengmeng lou mi ahi hi. Alehlam ah kei ka hihleh, lai lam a lunglut khol lou, sang taktak a pass ngei lou, pass hamham cìh khawng ka hi tangpi hi. Lai lam ah mitung ah ka leng kei himhim hi. Himahleh, music leh sport ka siam mahmah ziak in mite' theih phak in ka om veve a, ka skul uah hon thei loute bel mithak hi deuh uhi. Function na leh Biakinn a programme liandeuh a om ciang in kei lou a hitheilou sim khat in a om a, khat veivei kisaktheih huai simsim hi..!! Music ka lunglut na bel ka nu apat ka cilou thei kei. A ziak bel, neucik ka hih apan ka nu'n laa hon sak pih zel a, huaiban ah, a nungak lai a tuailai lak a kizang mahmah mi ahi hi. Sport lam a bel, ka pa ka suun leuleu a, football hi in volley ball hi ta leh ka siam mahmah a, huai kia le hilou in, basket ball, handball, table tennis cihte zong ka kimawl lah tuan kei. Ka nu-le-pa' talent neikhawm ka himai a, hamphatna cikhat hi in ka thei. Tutan inleng ka nu toh guitar tum a laa ka sak khawm hun uh a tam mahmah a, huan ah, ka pa toh nitaklam khawng in ka kimawl khawm lai thou ua, kou khomkhom in nuam kasa mahmah ua, kua dang ka eng tuan kei uhi. Ka nu-le-pa'n a hon duat mahmah ua, huai theilua ka hihman in, a lungsim uh suknat di ka veng mahmah a, ka hih theih tan in a thu uh nial ka sawm kei hi. Deih teng nei zou kei mah leng, ka poimoh teng bel ka nei vek hi. Poimoh ka sak louh ngen ngei lou ka hih ziak in, poimoh ci a ka gente hon leisak khial kei uhi. Tangval sim hi ta mahleng, pawt ding hiam, lawmte'n pawt dia hon zot u hiam in leng, ka nu-le-pa'n hon phalkei ua leh, ka pawt kei a, amau thumang in, inn ah ka om zaw a, huai in ka nu-le-pa kipaksak mahmah a, a kha uh muang sak mahmah hi. Pasal himahleng, innsung nasep ah ka hih theih dandan in ka nu ka kithuahpih zel hi.
Ka hih zel dan in, nitaklam ann nezou varandah ah ka tu a, Siamte toh sun a ka kithuahdan khawng uh ka lungsim ah a hong lang dundun mai a. Keile lamdang ka kisa hial hi. Gentam ngailou a Siamte in ka lungtang tengteng luah dim khin ahita mai hi. Ka lungsim in ka vei mahmah a, thildang ngaihtuah theilou in, Siamte kia ka lungsim ah a om den mai a, aman le hi ci dan in hon na ngaihtuah sam de o peuh ka ci hi. Hucia bangtan hiam ka tut nung in, ka fone ah message a hong lud a ka et leh number vuak ahi a,"Usang, bang hih e..? Ann ne ta..? ci'n a kigelh a, kenle kua amah mah de aw, hon hoih theih tuak mahmah e ci in,"He, ne khinta, nang kua e? ka ci thuk a,"Siamte ka hi", ci'n a hon dawng nawn a, huci'n kenle dawng nawn tuanlou in, a number save in, laisim di'n innsung ah ka lut ta hi. Huai ni apat, Siamte in a hon wish khial ngei kei a, kenle hoih taktak in ka dawng zel hi. Ka kihou tam deuhdeuh ua, ka kimaingal deuhdeuh ua, keile paunuam deuh hi'n ka kithei hi. Huaiban ah,imm neilou in ka haksatna bangkim uh ka kihilh tuah zel uhi. Hunte hong mualliam zel a, ka kithuah tam deuhdeuh ua, ka iitna hong lian mahmah a, amanle hon iitna ciang nei hi'n a om dan apat ka thei hi. Huciin, ka ki message ciang un leng ka iitna thu ka heem gen zel hi .Amanle hope hon pia hileh kilawm tak in a hon dawng zel hi. Bangtan hiam ka iitna thugenkhe ngamlou in ka om a, himahleh imm thei nawn vuallou ka hih ziak in, ka iitna thu gen ka sawm ta hi. Fone a va gen di lah ka ut kei deuh a, kam mah in kigen leh ka ci a, gen di thupuk na ka bawl ta hi. Skul a kimuh lem hun a gen di ci in kei le ka lum ta hi.
Zingkhua hongvaak a, poimoh moh hihzou in, ann ne zou phet skul kai di'n ka kisapah a, ka phur mahmah hi. Skul kai dia ka kuan kawm in, ka gen didante ngaihtuah in ka buai mahmah a, bangmah lou kal in skul ka tung hi. Room ka lut tak in Siamte ka mu kei a, daak le ging nailou hi ven ci in ka lungmuang mahmah lai hi. Dak hong ging a lah, Siamte mel ka mu ta kei. Ka hehtha bang a suak a, ka nguizou top a, skul kai ka phur na teng le bei zou hial hi. Bang ziak a hong kai ou ahi de aw, cih peuh ka ngaihtuah hi. Skul tawp in inn lam zuan in ka pai vengveng hi. Inntung in, singpi khawng dawn in ka kihahsiang a, hih di le om kei ci in guitar ka tum nawn a. Sawt kihal lou in ka nu'n,"Sangboi, na lawmte hong hoh", hon ci a, kenle ka room apat,"hon lut sak mai ou", ci'n ka dawng a."Kong lut thei diam usang", hong ki ci a, Siamte ahi a.
Ka gintak louhpi a hong hoh ahih ziak in, lamdang kasa zezen a, ka muh in ka kiguih hial hi."hong lut in Siam", ka ci a, tutna piak ka thuah hi. Ka nervous mahmah mawk a, ka kho-ul in hon buak lut lut in ka thei hial hi. "Usang keile guitar tum dan hon hilh ve, kei le nang dan dan in ka tum siam ut", nui kawm in a hon ci a. "He....he....(zumsim) ei hon hilh khong na ut nak incu, kon hilh lo tham di", ka ci tei a, "nang hilh khawng i ut louh maizen in a kua dang hilh i ut mawk di hia usang", cih kawm in, omze neitak in hon melh ceuh a. Huciin kenle ka theih dandan in ka hilh hi. Huai kawm in skul a hong kai louh ziakte hon gen a, note kopy di khawng a om leh hong kan dia hong hoh a hih dan hon gen hi. A hong kailouh ka miss thu ka gen leh, aman le hon miss lua a hih dan hon gen tei hi. Hucia bang tan hiam a om nung in, pai hon sawm a, kenle ka va kha hi.
Hiai hun lem a la in, ka iitna thu gen kon sawm ta hi. Bang tan hiam ka pai nung un, aw liing pipelh kawm in,"Siam, hon gen ding lah ka kisuanglah a, hon gen louh ding lah", ka cih pat leh, "hon gen ve usang, kisuanlah na d om lou pi", hon na ci pah a, huai in hangsanna hon pia hi. Hu la thak zezen in, "Siam, kei na mit a nin neng tu zou le hilou himahleng, mihing khat a ana piang khesam ka hih man in, kon na iit mahmah hi. Neih-le-lam ah non theisa ka hi. Himahleh zum-le-zah khual lou in kon na iit mahmah a, kon iitna non sansak thei diam ? Na ngaihdan loulam ahih leh hon ngaisiam in aw...", ka ci khe khongkhong a, zaang tuan inle ka kithei hi. Siamte le nuailam nga in a kun hi. "ka iitna hon san sak thei lou di na hih leh, sengual lai ah nuihciam hon lel ken aw ", ka ci beh hi. Amah le awl a hon daak tou in, "usang na gen bang in, iitna mah a thupi pen ahi. Himahleh, iitna hici mai a kipiak theih hilou ahih man in, kong kingaihtuah lai di aw, ngaihsiat in ngai ken aw usang", hon ci a, "ole hitham e, kon nangak den di, hon iit gige ka hi", ka cithuk hi. Ka kihou sung un, a innkong uh ka tung ua, ka kikhen ta uhi. Sawt pek a pan a ka thil gel leh tup hih tangtung a ka kitheih man in, ka lungsim a nuam tuan mahmah hi. Himahleh, bang ci'n hon dawng dia, hon NO ta leh ka zum di dan khawng ka ngaihtuah khol hi. Huciin kei le inn ka tung a, ann nek lah hun nailou deuh ci in, ka guitar mah ka tum nawn a. Ka tumtum lai in, ka lungsim ah laa khat a hong lang lian mahmah a, kon sa ta hi <<<<-----
*Melmuh ciil lunglai hong kuai lianu aw..
I Love You kon cih ding lah zeh in zum veng...
But I can't stop loving you,
Gawm ding simthu lel mai ni..
Leenpih gual zatam zong tuibang gawm ta...
#Aw saannem ngaih aw nang lou in..
Aw saannen ngaih aw without you..
Khattang kumsawt gamgua bang hing zou kei ning..
**Where ever you go, na lailung sung ah..
Ka vang mubang hon ngai om cih gel in..
I've no one to rely on,
Nang lou belh ding dang nei ke'ng..
Selung geel siam inla tongdam hon sang in..
Ka sak zoh nung sawt lou in, ka nu'n ann ne di'n hon sam hi. Nidang bang lou tak in, Siamte in nitak in a hon message kei a, ka lung a himoh mahmah a, ka thilgente ngai theilou a de aw, a lungsim lou lam genkha ka de aw ci in ka kingaihtuah a, ka lung a nuam thei kei hi. Ken ka message hial d lah ka ut kei zel a, atawp in ka lum mai hi.
Zingkhua hong vak a, ngeina dan in skul kai di'n ka kisa nawn hi. Siamte mel muh kilamen in skul ka kuan hi. Skul ka tun in room lut ngal in zon bawl mah leng ka mu kei hi. Bang ci a de aw, hong kailou nawn di a de aw cia ka kingaihtuah lai in, ka nung lam apat ka liang a hong kibeng keuhkeuh a, ka et leh Siamte a hi a, nuih mai tak in, "hi ! usang, morning", hon ci a, kenle, "morning, morning", ka ci namnam hi. A mit in kong lam a melh zauh a, kenle a gen om zia thei ka hih man in ka kizui pawt ua, park lam manoh in ka pai uhi. Park pen ka skul huangsung mah ua om a hi a, a mun a nuam mahmah a, a etlawm in a tawldam huai mahmah hi. Koule singkung nuai khat a tutna kidoh ah ka tu ua, ka gei uah diil lian lawlou khat a om a, a tui a siang petmah hi. Bang tan hiam thu vantang ka houlim nung un, "Siam zan a kon gen pen bang ngaihdan na nei ?", ci'n ka dong a. Aman le, "usang, non iitna na gen ma pek in le kon iitna nang kon pe khinta. Non iitna thu non gen ka zaak in ka lungsung nop na in a dim hi. Non iitna kon san sak thei lo tham di usang. Tuni a kipan nang a ka hi den ding a, nang le kei a na hi den di aw usang..", ci in ka khut hon len a, ka liang ah hong kingai suk hi. Kenle ka iitna hon sansak ziak a kipahthu gen in leh, bang teng hong tung zong taisan ngei lou di ka hih dan ka hilh hi. Klas lak di lam le ngaihtuah nawn selou in, ka ki iitna thute uh gen in, singdang kuamah englou in hun ka zang khawm ta uhi. Gin om den a, SIHNA'N GIBANG KHEN MATENG ki iit den ding leh gin om den ding in thuciam ka bawl ngal uhi. Hiai ni bel ka damsung a dia ni poimawh le mangngilh vuallouh a hong hi hi.. Kei a di'n bel hiai leitung ka pian khiat apat ka iitna mi ka piak masak pen ahi.
Hunte hong pailiam zel in, phalbi lam a hong hita a, khua bang le vot sim mahmah ta hi. Nikhat Siamte in a inn ua hoh din hon zawn a, nial mah leng hon nget ngutngut ziak in ka lawmpa Lalte toh hoh di ka hih dan ka gen hi. A inn ua hoh ngeilou hikei mahleng, a nute' om a hoh ngei lou ka hi a, skul tawp ciang a vabang ceuh lel ka hih na ah, a guuk in ka lin mahmah hi. Himahleh ka iitpen' hon cial na nial vual ka hihlouh man in, hoh di thupuk na bawl ka hi hi. Nitaklam in ka lawmpa Lalpu message in, Siamte teh hoh dia tawn tou di ka hihdan ka hilh a, aman le lem hon sakpih hi. Nitak ann ne khin in, ka gensa bang in Lalte ka tawn a, Siamte te' innlam kon manoh ta uhi. A inn uh ka tun tak un, ka lawmpa lut masa dia ka sawl leh, nang a neitu deuh, na lut masak ken a, ci'n hon ciamnuih a, huci ahihleh ci in kong ka kiuh a. Siamte in a hong hon a, "hong hoh mo usang? ulal nang le mo ?", ci in kamsiamtak in hon na vaidawn a, a nuam mahmah hi. Hucia bangtan hiam meiphu awi kawm a tuilum dawn di khawng suang a nuam satak a ka om lai un, Siamte' nu room apat a hong pawt a, "THANGMUANSANG, BANG HONG HIH E ? STUDENT MAIMAI HILAI LOU MO, NUNGAK KHAWNG NA HEL. PAWT PAWT LOU IN NA LAI KHAWNG SIM ZAW VE, SIAMTE NGAIHBAWL A HONG HOH NA HI D MO ? NANG PHIANGSAN A DI'N KA TANU NU KA PHAL TEUH KEI. LAI LA SIAM LOU, SANGGAM LE NEILOU HI LOU NA MO ? BANG A KIVAK SAWM E, NA GUITAR TUMTUM A NEK PIANG DI NA SA A HIA. SANGGAM BELH DI NEILOU LEL TAK NEI VELE. TUN LE TUTU LOU IN PAIZOK", hon ci motmot mai a, na kasa petmah hi. "Hi e, nungaak", ci in ka pawt ngal a, ka lawmpan hon zuih leh zuih louh le ka theikei a, ka manoh na lam le thei lou in ka pai vutvut a..
Siamte nu hon cih dan ka posiam kei mahmah a, mi khasebaih le kingaise baih mahmah mi ka hih ziak in na kasa mahmah a, ka mit a pat khitui kham vuallouh in a hong luang suk zungzung hi. Bangdang teng sang inle sanggan neilou hon cih pen in ka lungtang nasak mahmah hi. Pianpih sanggam neilou bel ka hi kei. Unau thum ka hi ua, kei a neupen ka hi. Vangsiatna ziak in ka U lian pen numei in kum 8 mi a hih in sinna ziak in hon mualliam san a, huan ah, keitung a geih pen pasal in kum 11 mi ahih in tui ah kia in hon na mualliam santa. Hicibang a vangsiatna ka tuah pen kenle thei den mah ka hi a, ka u te ngai a khitui-naptui ka sen ni atam a, unau kituak tak a om te ka muh ciang in ka eng thei mahmah hi. Himahleh ka leitung hinkhua ah ka u te' mel ka mu nawn ta kei ding.. Siamte nu hon cihdan mangngilh sawm mah leng, ka mangngilh thei het kei hi. Sanggam nei hileng zaw, mi simmawh, mi nelhsiah a om lou di hi ing a, ci in Pathian bang ka mawhsa a, himahleh phatuam di a om kei. Siamte in hon call den a, pick-up lou in ka ging den sak zel a, Lalte inle hon call den a, pick-up tuan lou in, ka SWITCH OFF zaw ta hi.
Zan le sawt nailou ahih man in, ka u te' kivuina hanmual lam manoh in khitui-naptui toh ka zuan hi. Ka u te hantung ah ka tu a, bangmah le genthei lou in ka kap ek ek mai hi. Ka kah lai in, ka nunglam apat vak thupi tak a hong om a, "Bawi....", ci a hon kisam ging ka za a, ding tou a ka et leh ka u tegel a hi ua, lamdang ka sa mahmah hi. Amau puan ngou a silh ua, a vak pha mahmah uhi. "Bawi, na thuak kon theihpih mahmah uh, himahleh kisulungkham kenla, kipasal sak in. Hampha na hih dan kithei inla, i nu-le-pa nang khut a om a hi uh. Duat tak leh hawmthoh tak in na enkoi di aw.. Tun haksa sa in kap mah lecin, nikhat tei nuamsa mahmah di na hi. Pathian in hon ompih gige ahi, amah muang in", ci'n a hon gen ua, a mang hiau uhi. Ka manglam a bang hial a, gintak haksa ka sa sim a lah, ka mit mahmah a ka muh a hih ziak in gingta lou vual ka hikei. Huci'n keile innlam zuan in ka pai ta hi. Inn tung phet, ka room a lut ngal in lum mah leng ìhmu vual ka hi kei hi. Hicibang a mi' muhsit ka tuah pat na ahi a, huai le kuadang hilou in, ka iit Siamte nu ahi. Sawt kuam tak ihmu lou a ka om nung in, ka ihmu khong khong a. Ihmu pan ka kisak leh ka nun hong phawng a, ka lu ana mahmah a, ka mit le ka hak zou mahmah kei a, ka luna a, thou ngam lou di ka hih dan ka gen hi. Ka lungsim ah bangmah le a om kei a, thoh di lungsim le neilou in ka lum bet den hi. Skul le kailou in lupna tung ah hun ka zang den a, ka kingaihtuah khop a, kuamah theihpih louh in ka khitui ka nulnul mai hi. Gimlua zaw ka hingei dia, nitaklam deuh in ka ihmu nawn hi. Sawt simtak ka ihmut nung in, ka room ah guitar ging leh la kisaging in hon phawng a, awl a ka daak touh leh Siamte ana hi maimah a, lamdang kasa zezen hi. Keile ihmu dan in ka ki lim neih lai a, a lasak ka na ngaingai a, siam ka sa mahmah hi. Ka lungsim in Siamte laa hici tel a siam na hi maw ka ci lel hi... A aw hoih in, a siang mahmah a, siam ka sak lampang tak ahi hi. A lasak ka ngaihngaih leh nalh ka sa mahmah a:
*Ngaih na mel etlawm, maimit suan encim thei ke'ng.
Hi simlei tung ah, nang kaan a hoih tang dang om kei cia...
#Haksatna-le-nopna thuak khawm in, en kaan tan khawm ni.
Lunglau ken ngaih aw, na siang ah kei hong om den ning.
Singdang englou'n, maciang aw......suan khawm ni..
Hiai laa hon sa zaw, siam in nehsoh ka sa mahmah mai. Keile bangtan hiam a theilou dan a ka om nung in, thawm ka nei a. A lasak hong khawl zot a, ka lupna tung ah, ka kiang ah hong tu hi.. Ka mit a bawk a, a san zawmah a, ka mel a hon muh leh a mel bang hong tuam hial in ka thei. Amel ah kisuanlah na haih vual ahi kei. Bang mah le gen tuan selou in ka sam hon zut hiauhiau a, hong kun suk a, ka tal a hon tawp sak hi. Pau het lou in ka lum dildel a, haksat na tuak mah le ung, hon iit den di a hih dan hon gen a, ka kipak mahmah hi. Kipak mamah mahleng ka pau tuan kei hi.
Kum nawn hong hi leh pawl XII board exam di ka hi a, huai a dia kisak khawl ka pan ta hi. Krismas khawng nai mahleh ka exam na mah ka pibawl zawk a, lengkhawm khawng le tellouh di ka tup ahi. Krismas lah nai deuhdeuh, lungleng tak in ka om hi. Skul kikai nonlou ahih man in, Siamte toh ka kimuh theih na di uh lampi a om kei. A inn ua lah hoh ngam di ka hi nawn ngal kei a... Himahleh fone tungtawn in bel ka kithuzak den uhi.
Mikhen khat ki-iit, ki-ngai te bang lou tak in, ka kal uah mi hong kigolh lou in nuam ka sa mahmah ua, ka thoveng mahmah uhi. Himahleh, Siamte nu'n hon sit mahmah hi. Huai thei lua ka hih man in, laisiam lou hon cih thei den kawm in, lai hoih tak in ka sim hi. Krismas khawng hong hileh, kienjoy zek ut sam ding hi ven, ci in ama in ka hahpan mahmah hi. Khat veivei, Siamte ka inn uah hong guk hoh zel a, sun nileng bang in lai ka sim khawm sek ua, nuam mahmah hi. Ni te hong pailiam zel a, Krismas a hong nai deuhdeuh ta a, Krismas lopna programme ni 20 nitak in a kipan a, nitak teng in ka kikhawm zel hi. Siamte toh ka ki-iitna uh a ni ni in a khang a, ka ki iitna thu uh gen louh ni a om kei. Krismas ni a hong tung ta ngei a, hondam pa Jesu Kris pianni lawm di'n a kiphur thei mahmah hi. Ahihhang'n, kou inkuan a di'n bel hunlui ngaih na, iit-le-ngaih hon na mualliam san sa te phawk kik na ni ahi a, innkuan kim in Krismas zang nuam laiveng, cih a hi mai hi. Keile kikhawm di ci in, nalh thei pen in ka kichei hi. Ka coat suit, a cream rong pen silh in, ka khedap BATA no. 6 avom bun in, kamis a sandup ka silh a, neck-tie ka ok a, ka sam ka koih tou firfer hi....( Lolzalolzz.z.......). Nalh kisa huntawk ka hi dia, limlang ah ka kien tuantuan a. Man ta ci in Siamte toh kingak di ka cih na lam zuan in ka paita hi. Amun ka tun in ana tung nai kei a, minute 5 vel ka ngak nung in, numei khat, kei lam manoh a hong pai ka mu hi. A duang la cing mahmah, puan ak sandup silh, khedap saang huntawk bun, amel la hoih mahmah mai, kua amah mah de o ci a ka na et vengveng leh ka ngaihnou ana hi mai mah a.... haih sim le ka hi mai ! Ka kiang hong tun tak in, "kare, hong nalh na tel cia Siam, hon haih dek i kei maw.. Krismas chibai", ci'n nui vevu kawm in Krismas chibai ka buk a, aman le, "usang, na iitpen haih tel di maw? Kei zaw ka kingaisia", ci'n hon ciamnuih thuk tei a, chibai hon buk hi. Kou adia bel, ka damsung ua Krismas ka zat khawm masak na pen uh ahi hi. Biak inn lam manawh in kong kizui ta ua, biakinn ka tun un Pastor te, Upa te leh mi tuamtuam biakinn kong ah Krismas chibai buk in ana kivual deudau uhi. Biakinn sung ka lut dek un, ka lawmpa Lalte in, "merry christmass, nice couple, na kituak lua uh", cih toh hon thumbs up a, Krismas chibai buk hon thuah hi. Kenle,"kipak e Lal", ci'n ka dawng hi. Siamte toh ka kien tuah ua, ka nui lel uhi. Mi lah kitam petmah, biakinn dim phitphet uhi. Special programme khawng om a, tuailai pawl te'n special number in laa hon sa ua, siam sa lua zaw ka hi ngei dia, ka "HALLELUI" kha zezen a, Siamte zum kisa in hon sik ek a. Thugen bang cu nuamlua in ka na lusu su a, Siamte in hon phawng phawng a, ka nuihsan lel hi. Kikhop tawp in, kou le hunlem zong in ka pawt ua, Siamte toh ka om nak le bel ka deih teng kim himai hi. Nitaklam ann nek hun dek in, inn lam pai di ka ci ua, Siamte nu te le lengkhawm ahih man un, amau in ah ka pai uhi. Siamte kikhek di'n a room ah alut a, ken common room ah ka na ngak a. Sawt lou nung in, "usang hong lut dih", ci'n hon sam a, kei le ka va lut hi. "Koi pen nalh nasa zo usang? Nalh nasak pen ka silh di", ci'n a khut langnih tuak a apuan ak tawi a hon lak a, "a nalh tuak ka sa, na taklam a na tawi pen silh lecin", ka ci a, hucin aman le thumang tak in a silh hi. Aman tak in kou inlam ah ka pai leuleu ua, kei le kikhek in, biakinn lam a ann ne di'n ka kizui pawt ta uhi. Ann nek zoh incu ka kikhen phot ua, nitak kikhawm nawn di ka kici uhi. Nitak hunte bang le ka zang khawm thei ua, nuam ka sa mahmah uhi. Kikhop tawp in ka lengkhawm ua, mi lah kitam, phur thei mahmah mai, lasak la nuam, ka iit pen toh hi zomah ka hih cia, nuam petmah himai. Dak 10 vel hong hih in, lengkhawm kitawp a, nuam sa mahmah na pi in ka pai siausiau ta uhi. Kenle Siamte ka va kha a, lamtawn in ka kikawi den ua, hun zat khawm nop ka sak dan u leh ka ki iit dan te uh gen kawm in ka pai uhi. A inn uh ka tun tak un, mangpha khak a paimai di ka sawm leh, ka khut ah hon len a, ka et leh, ka liang ah a khut a hon koih tou a, kawi hon thuah in, a khatvei na di'n ka muk ah a hon tawp tenten a, kenle deihthoh tak in ka na tawp thuk tei a, ka kitawp ta nilouh uhi..
Hunte pai zungzung in, Krismas-Kumthak te kizang zou ta. A ni ni in ka exam na di uh a hong nai hiai a, ka hah simthei mahmah a, Siamte nu' lungtang khek ut vilvel ka hih man in, rizal hoihtak muh sawm in ka pang tinten hi. Ka nute'n le hi citel a laisim a ka hahpat lam thei ngeilou a hih na uah lamdang hon sak u toh hon kipahpih mahmah ua, hon tosawn ngitnget uhi.. Bang mah lou kal in exam hun hongtungta ngei a, hih hoihthou a ka kitheih ziak in, lungmuanna khat ka nei hi. Siamte bel laisiam mahmah ahih ziak in dotse ngailou a, ahih hoih di theihsa ahi. Lai ka sim khawm ciang khawng unleng, kei sang in a thei masa zaw gige hi. Exam zou, hih di om lou ci in, khat veivei nitha kiloh in ka kuan zel hi. Nitak ciang a inn a om lel, nungak hel di lah agen le gen ngam huai nawn lou ahihciang a maw.
Nikhat, ka kisil kaal in ka fone ana ging a, ka nu'n ana la a, company te ahihdan a hon gen hi. Himahleh, Siamte toh ka kaal thu uh a hon dong a, kenle iimlou hial in ka hilh vek a, ka vahoh nitak a anu hon na bawl dan leh a lungtang khek vilvel ut a, lai hoihtak a sim ka hihdan khawng ka gen leh hon pakta mahmah hi. Bang cidan a Siamte toh ka kal thu uh hon dong a de aw, ka cih leh, ka wallpaper a Siamte toh Krismas lai a lim ka kilak na uh koih ka hi a, company te' call lai a va lakha hi ven, huai a amuh ahih dan hon gen a, ka zum sim mahmah hi. Hun-le-ni te hong pailiam zungzung a, rizal suah di a hong kigen thang vengvung ta hi. Niteng in zingciang a suak di cih a hi ta mai, zingkhua hong vak a lah zingciang di cih hi zel. Zingciang cih cih kal in kaal khat bang a hong kivei a, a tawp incu a hong suak ta ngei a. Ka gintak sang in ka hih hoih mahmah a, 1stDiv. bang ka tung tou velvol mawk a, lamdang bang ka kisa mahmah hi. Siamte ngei leng 1stDiv. in a pass a, himahleh amah a per cent a sang zaw a, zum huai ka sa sim hi. Himahleh, lametna khen ah lohcinna ka ngah cu kipak lotel himai, Pathian kiang a kipahthu ka gen hi.
Kenle maban sutzop di dan ngaihtuah in, mundang a pai sawmlou in inn mun mah ah hih ka sawm hi. Hucimah bang in, Siamte inle inn mun mah ah hih in, koleg khat ah ka kai khawm ua, subject lak le kibang zomah in klas khat ah ka tu khawm nawn ua, ka kithuah den uhi. Iit pen toh sun nileng a kithuah a nuam ngeimai, ni bang tom ka sa thei mahmah a, koleg kai di bang cu kiphur thei himai. Nuam ka sa tuak mahmah ua, klas off neih ciang bang in library khawng, canteen khawng leh park khawng ah hun ka zang tangpi uhi. Kikhanglian deuhdeuh, ka ki iitna u le lian deuhdeuh in, ka thuciam sa uh peellou a SIHNA'N GIBANG KHEN MATENG ci in, ka thuciam sa uh ka hih kip semsem uhi. Siamte in lah, "Usang ken kumtawn a di'n kon telta, nanglou pasal dang ka neikei di, vangtah na ziak a kikhen khak na a om tak lele, pasal neilou in ka om di", hon ci a, "nang kan a khovel a ka iit leh hon iit tu di zong di hi leng le, ka mu zou tuan kei di, kon iit lua Usang... ", hon ci in ka aang ah a hong belh a. Kenle ciamnuih in, "a dik hi", ka cih leh, "seisui mi le thulak kei vanglak", hon ci a. "Siam kon ciamnuih ahi, kenle..", ka cih pat leh, ka aang apat thakhat in hong thou a, "ki ciamnuih le ahun tawk om, mi'n thutak a gen leh kihiciamnuih cih himhim ka lungkim dek kei", hon ci a, kei le ka kisuanglah petmah a, "ngaihdam lua o Siam, ka paukhial kha", ka ci a, hong dawng kei hi. Ka ngaihnou aw khauh ka zak pat na ahi a, na ka sa mahmah a, aw khauh za theilou ka hi a, kei' moh himahleh ka khasiat tha a suak mahmah a, pau lou in amel le en ngamlou in ka kuun den a.. Hucia ka om ahon muh in angaih a pha kei mahmah a, ka mel a hon en a, ka mai mual mahmah in, ka mit paak lik liak a, hon theisiam ngal in, "Usang bang ci e ? Hi ci keive, kon cikhauh lawkha a eive mo, hehpihtak in hon ngaidam in o usang. Ka hihkhial lua, hon ngaidam ve mo usang..." hon ci ngutngut a, ka ngawng ah hon kawi bet hi. Ka khasiat baih leh ka kingaihsiat baih lam a theih sa ahi a, kisuanglah mahmah in hon kawi kawm inle ngaihdam a hon ngen thakthak hi. Kenle ngaihdam ka ngen a, ka kingaidam tuah uhi. Himahleh ka pautam nawn kei, ama gen teng khawng ka dawng lel hi. Hucia ka om cia nuam asa kei a, hon nuih sak sawm teitei in thil tuamtuam khawng hon gen a, a hon iit dante khawng a gen a, himahleh hon sunui zouta kei !! Aman le bangmah gen nawn tuanlou in ka khut hon len a, ka aang ah a hong kingai suk hi.
Kenle koleg ka kai kawm in exam piak theihtheih ka pia a, huai te' lak ah SSC Combined Higher Secondary Level (10+2) ka exam na ah lohcinna kon ngah a, ka kipak petmah a, ka nu-le-pa bang kei sang in a kipak zaw uh abang hial hi. Kou area a exam pe teng lak a kei kia in lohcinna ngah ka hih man in, kho mipi hon kipahpih lou a om kei uhi. Kaam lopna ci a hong chibai a, kipahpih etsakna a chini hon tawi pawl bang om a, ka kipak petmah a, bang mah lou apat hici bang a lohcinna hon pia, Pathian' min ka phat lou thei kei hi. Kaam ka hon nei hial cu ka tup leh ka ngim gige, Siamte nu' lungtang ka khek vilvel zou hi. Amau le kipahpih na ch in, a inn ua ann ne di'n hon cial uhi. Khatvei nitak a ka hoh nung ua ka hoh nawn pat na ahi. Krismas lai a pen cih lou a. Numawi (Siamte' nu) inle hon na bawl khak dan kisik mahmah ahih dan hon gen in, ngaihdam hon ngen a, ka ut hunhun a a inn ua hoh thei di ka hih dan le hon gen tel bok. Huci in, sungkuan khat bang in ka khosa uhi. Siamte le midang pe lou a, kei a di mahmah ahihdan hon gen bang tu, kipah nak om lua hi'n mo. Ka vahoh ciang bang in le a siam mahmah a, Siamte sang in a hon houpih masa zaw gige hi. Keile ka kimaingal sak mahmah ta a, singpi bang ka nget lecu min pah himai...(hehe).
Hunte hong mualliam zungzung a, ka sepna lam di a ka kuan hun ta a, keile ka iit mahmah ka nu-le-pa banah Siamte nusia in ka kuan ta hi. Siamte in konna ngak den di a ci a.
Ka sepna bang nuam ka sa mahmah a, kei a di mawngmawng in ka ngai a, ka kipak mahmah hi. Ka thanuam a, diktat in ka ginom a, ka heutute'n le a hon deihsak mahmah uhi.
Kum 2 khawng kon sepnung in, ka pa le a sepna a kipan hong pension a, ka nu toh kia a om uhi. Thawmhau kisa sim uh adiam a, ka pa'n mou neih a lunggulh thu hon gen hi. Kenle Siamte ka kawk muh pah a, amau le inndongta kihou ding a ci uhi. Bang tan hiam nung in, bangkim fel in, lemtan louh na om lou ding ahihdan hon gen ua, ka kipak mahmah hi. Himahleh ani di kei tel di'n a koih ua, huai pen kei lemsak hunhun ci uhi. Ken le March 16 ka deih thu ka gen a, a ziak bel hiai ni ka Birthday ni ahih ziak in ka deih tuam se hi. Siamte ngei le a kipak a, ka ngaklah tuak mahmah uhi. Tutung suti pai cu zi nei di ka hih dan ka seppihte ka hilh a, ahon kipahpih thei siausiau mahmah uhi.
Nikhat, ofis a ka om lai in, amhai/lungam in ka puk phut a, ka khanloh inbel damdawi inn ana himai mah a, ka lu gik ka sa mahmah hi. Doctor te'n ka BP asan luat ziak a puk ka hih dan a hon hilh ua, hoih nawn pah di ka hih dan le a hon gen uhi. Huci in kei le ngeina dan in ofis ka kai nawn a... Bangtan hiam bangmah cilou a ka om nung in, nikhat ofis ah ka puk nawn hi. Huai hun inbel khatvei a ka puk lai toh a kibang nawn ta kei. Ka gim mahmah mai hi. Doctor te'n damdoi inn a kietkol ngai ding ahih dan a hon gen ua, huai hun inbel ka nu-le-pa le a hong hoh ta uhi. Damlou a om det a nin huai ngei mai. Damdoi inn ah khakhat di vel mahmah ka om nung in, inn lam ah paithei ta di ka hih dan ahon gen ua, ka kipak mahmah hi, himahleh nidang bang in haatna ka nei nawnkei a, ofis kai thei nawn di ka hi ta kei. Ka tha la haat thei lou, gimgim mai ka hih na ah, hoih tak a kichekup sak di ci in, doctor ka va naih nawn a. Ngentel tak a ka kichek-up sak nung in BLOOD CANCER ka na hi maimah a, ka lungtang teipi a sut a bang hial hi. Siamte hilh ka ut alah, ka hilh ngam kei a, hilh louh di lah ka ngaingam kei zel a. Atawp incu ka hilh khong a, amah le a hong kap top mai hi. Ka kiteen ni di u lah kha 5 lel in samta, bang kim felta, man le kipe khinta, himahleh kei lah hi ci mai, dam di leh damlouh di bel gentheih ahi nawnta kei. December hong hi a, ka kiteena di uh kha 3 khawng lel om ta a, inn lam ah pai ka sawm uhi. Huci in December 16 in inn ka tung ua, mi tamkhop in hon na dawn uhi. Siamte mel ka mu zaw anuam ngei mai, aman la a nuihmai a suah gige a. Inn ah kikep theih dandan in ka kikem ua, Siamte inle ahihtheih dandan in hong kem zel a, khat veivei ahong giah changle om hi. A chang a buai phutphut ka hih na ah, oxygen kha 4 daih di toh inn lam pai ka hi uhi. December kha tawp lam a hong hi a, ka damtheihna ahong keniam mahmah mai a, ka story gelh sunzom zou nawn lou ka hih man in, ka lawmpa Lalte kiang ah hon na sutzop sak di'n ka ngen hi.
Ka lawmpa Sangboi damlouh na hi poi kasa mahmah a, huai ban ah kho mipi te'n le poi a kisa mahmah hi. A kiteen ni di u lah nai deuhdeuh mai, amah lah halh tuak mahmah lou, beidot huai mahmah mai hi. A nu-le-pa ka en a lah, teek kuan hi ta uh, amah lah kikem den himai. Siamte ka en a lah hehpih huai mahmah.
Kumte hong thak a, a kiteen ni di uh nai deuhdeuh, himahleh kisak kholhna bang mah paithei lou hi. Amau la ki-iit mahmah mai, kimu lou a om thei lou, Siamte in om pih den mai hi. February hong hi a, ka halh deuh lah cituan lou, lum bet mai, a chang a oxygen piak ngai zawmah ka cih cia bel, a damzoh ka ging kei hi. Hun hong paipai in, a kiteen na di uh nai deuhdeuh, bang hong cidia cih miteng bildawh hita. Himahleh amah lah gim deuhdeuh !! Huciin March ni 10 hong hi a, pau zoulou leh oxygen bulh det ngai ta, ka mangbang petmah hi. I houpih na le za hia za lou cih kithei bun ta lou. March 15 hong hi a, a hong gim mahmah a, a naak lel et hi ta. Siamte lah agei a khitui toh tu ngiungeu mai. Nitak in nungak-tangvalte kisam khawm ua, zanhah pih di ci ua, keile akiang a ka va tu den hi. March 16 zinglam ahong hi a, amit awl in ahong hak a, "Siam" hon ci a, Siamte inle, "usang lunglau ken, na kiang a om den ka hi" a ci a. Sangboi le pau zou lou sasa in, "siam, SIHNA'N GIBANG KHEN MATENG ci a i kiciam na nathei lai mo?" a ci a, Siamte ngei inle, "hi usang thei mah ing e, sihtanpha in nang a ka gige, kon iit den ding" a ci a, hucin awl in amit a si a, samsam mahleh adawng nawn ta kei hi. Siamte a hong kap khe ekek a, hihtheih a om nawn ta kei, ka iit mahmah ka lawm Sangboi in thupina gam hon zot santa. Ama adia ahun kipah nipen, a pianni leh a íit mahmah Siamte toh kumtawn a thuciam abawl ni di in, a tangtawn mun ding a zuan ta !! A nu-le-pa ka en a, teek kuan hi ta, kemtu di omlou, Siamte ka en alah, a iitpen a Usang inlah nuseta, hehpihhuai mahmah tuak uhi. Iit in khelah mah le hang, a si toh a hing omkhawm theilou ahih man in, vuiliam in om ta hi.
Himahleh, Siamte in SIHNA'N GIBANG KHEN MATENG ci a athuciam uh suk bucin na di'n, Sangboi nu-le-pa teek kuan kem di'n lut veve hi...
BEITA
© Siamsinna leh Vakiangbu
On 24-11-2012, Saturday at 8:55am
[Kei' min cihlouh min khem zang ka hi a, kei' min toh kibang na om khak zezen ua leh, poi ana sa kei un. ]
Nikhat, skul (college) canteen ah kei kia ka tut lai in, ka kiang ah numei khat a hong pai a,"Hi ! Usang, lonely na cia, kong tu thei diam..?" hon ci a, ka et leh ka klasmate te mah Siamte ahi a, kenle,"tu thei tham e", ka chi a, huciin amah le a hong tu hi. Mipautam lou ka hih toh gen di le ka thei kei a, aman a hon houpih na teng ka dawng lel hi. Bang tan hiam paulou a ka om nung un,"Usang, tuni sum ka pokha kei a, ka gil a kial sim a, sum na neih lem leh non ba sak thei diam..? Hunlem masa pen2 ah piak kon sawm di, kisuanlah huai sim na a, kon ngen mai" hon ci a, kenle,"kisuanlah na di bang mah om lou ahi, na duh2 va la ou, dencia sum ka pe na di, dit kik ngai hial lou e lawmta kal ah", ka chi a, amah le ding pah in ava la pah a, ka kiang ah ahong tu nawn hi. Ka nek kawm un,"kare usang, nang om kei lecin gilkial a kibuai di a kei maw; na na om zenzen a, kipahhuai lua", ci in kamsiamtak in kipahthu hon gen a, "khemkhem, kipahna tham kei" ka cih leh, "mood fuh lou sim hia le ? ! cih sim2 te toh kinakha u maw ?" ci'n nui selsal kawm in hon ciamnuih a,"kihu cihpih di bek om leh ka cimah ve", cih teng in ka dawng nawn hi. "Usang na pau ut kei ngei, kong tut leh hehsim na hi hia le", hon ci nawn a, "mawkmawk eive", ci'n ka dawng leuhlauh zel a. Mi pau nuam mahmah a hi a, a paupau a, himahleh ken kam khat khawng in ka dawng leuhlauh zel a. Mi pau tawm mahmah ka hih ziak in, ka mizia thei loute' a di'n bel heh gige ka bang hi. Hucia ka om sung un, daak a hong ging a, klas la di'n ka kizui pawt ta uhi.
Klas ka lak lai un, Siamte kia ka lungsim ah a hong lang a, thildang le ka ngaihtuah thei kei hi. Nidang a mu ngeilou leh houpih ngeilou hikei mahleng, tuni a ka om dan a tuam a, ka hi heuhau mawk hi. Canteen a ka om dante uh, kamsiamtak a hon houpih dante leh ka dawn dante bang ka suangtuah nilouh hi. Ka dawn dante bang ka kisiik mahmah a, bang a cingaih de aw. Khauh a salaw dia a ngaisiamkei kha de aw, cih peuh ngaih tuah in ka na guk buai mahmah hi. Tawp ciang a a fon number nget di ka ci hi. Hucia thil ngaih tuah a ka om lai in, ka Sir pa un chalk in hon deng a, ka tal a hon kha a, miteng in hon en duam ua, ka zum mah2 a, ka lu bang lian tultul hial in ka thei hi. Sir pa'n ding dia hon sawl ziak in, ka ding tou a, ka daak khiat leh, Siamte in lamdang sak citak in hon na en kil kel a, ka zum zosem hi. Huai tan di ka sak leh, a explain na apat dotna a hon dong a, ana ngaihsak lou ka hih na ah, bangmah ka thei kei. Sir pa le heh lua ahi ngei dia,"if you are not interested, you are welcome to leave the class..", ci'n kam neem tak in a hon ci a, himahleh ka pawt khe zen kei a, awl in ka tu suk nawn hi. Ka na ngaihtuah na tengteng, ka maizum na di phet a hong suak maimah hi. Siamte houpih ngam di ka hi nawn ta kei a, huai ban ah, a fone number nget di plan ka bawl teng fail bei., ahaiiiiii....!!!
Tawp a kuamah le houpih ngam lou in kei kia a pai di ka cih leh, ka nunglam apat hon kisam ging ka za a, kinunghei a ka et leh, Siamte ahi a, ka zum mahmah mai hi. "Hon na ngak ou usang", hon cih ziak in ka na ngak a. Ka kiang hong tun tak in, "nang kia na pai a, kiton le la..", hon ci a, "aw..poilou", ka ci lel hi. Ka zum toh, gen di le ka thei kei a, a mel le hoihtak in ka en ngam kei. Bangtan hiam ka pai nung un,"usang tuni bang ana ci om e ? Na zum mah di maw..?", hon ci ta phut a. Kenle," kon na ngaihtuah lo kha a eive", ka cih leh, "na zuau hi", ci'n ka liang a hon beng kauh a, kenle serious deuh in,"ka tak tak", ci teng a ka dawn leh, lamdang sak citak in a hon en a, a mel bang a hong lamdang hial in ka thei hi . Amah le gen di thei lou a diam ah ahihkeileh zum sim a diam ah, a hong pau nawn kei a, ka kisuanglah sim hi. Pau lou a bang tan hiam ka pai nung un, a inn paina uh lamkaak ka tung ua,"painuam in oleh usang..." hon ci a, "nangle painuam", ka cithuk hi. "Eh ! Usang na fon number non pe thei diam...?" ci'n hong nung kik a, kenle,"hi tham e", cih toh piak ka thuah hi. Ka kipak gu mahmah a, a ziak bel ken ama a ngen ngam lou ka hih ziak in. Huci in ka innlam tuak uh ka zuan ta uhi. Ka lampai kawm in a hon houpih dante khawng ka ngaihtuah nilouh a, a kamsiam dante, a nuihmaite leh a mel kilawm mahmah te ka mitkha ah a hong lang dundun hi. Kingaihtuah kawm a ka paipai leh suang ka sui kha laizang a, na ka sa mahmah a, ka tawm longlong zezen hi. Huciin khe nna pi in inn ka tung ta hi. Ka room ah ka lutsuak ngal a, kikhek ngal in, singpi khawng dawn in ka tawldam hi. Singpi khawng dawn zou in, hih di le om tuan lou ci in, ka guitar ka lakhia a, zaila ka awi ngiahngiah mai hi.
Siamte' te ahihleh mineizou mahmah ahi ua, neih-le-lam ah kuamah eng lou ahi uh. Huai ban ah, apa mifel leh kizen, khosung a dia hoih ahih nakleh hihlit neilou mi ahi. Mite' kingakna taak ahi uhi. Alehlam ah, kou bel Pathian hehpihna toh khosa thei lou lua ka hi sam kei ua, himahleh Siamte te toh bel teh theih vual ka hi kei zel uhi. Mi hausa mahmah ta, deih deih nei zou a nezou ahihhang un, Siamte in kisaktheihna himhim nei lou a, mikingainiam tak, paunuam leh polhnop mahmah hi. A melhoih mahmah a, duangcing in a maitai zou gige a, huai in a hon hiip mahmah hi. A hauhsak mahmah hang un, kicheina uang bawl mi ahikei a, simple taktak in a om a, a kilawm lah tuankei hi. Huan ah, kholaimi lua ahi kei a, poimawh lou a pawt mengmeng lou mi ahi hi. Alehlam ah kei ka hihleh, lai lam a lunglut khol lou, sang taktak a pass ngei lou, pass hamham cìh khawng ka hi tangpi hi. Lai lam ah mitung ah ka leng kei himhim hi. Himahleh, music leh sport ka siam mahmah ziak in mite' theih phak in ka om veve a, ka skul uah hon thei loute bel mithak hi deuh uhi. Function na leh Biakinn a programme liandeuh a om ciang in kei lou a hitheilou sim khat in a om a, khat veivei kisaktheih huai simsim hi..!! Music ka lunglut na bel ka nu apat ka cilou thei kei. A ziak bel, neucik ka hih apan ka nu'n laa hon sak pih zel a, huaiban ah, a nungak lai a tuailai lak a kizang mahmah mi ahi hi. Sport lam a bel, ka pa ka suun leuleu a, football hi in volley ball hi ta leh ka siam mahmah a, huai kia le hilou in, basket ball, handball, table tennis cihte zong ka kimawl lah tuan kei. Ka nu-le-pa' talent neikhawm ka himai a, hamphatna cikhat hi in ka thei. Tutan inleng ka nu toh guitar tum a laa ka sak khawm hun uh a tam mahmah a, huan ah, ka pa toh nitaklam khawng in ka kimawl khawm lai thou ua, kou khomkhom in nuam kasa mahmah ua, kua dang ka eng tuan kei uhi. Ka nu-le-pa'n a hon duat mahmah ua, huai theilua ka hihman in, a lungsim uh suknat di ka veng mahmah a, ka hih theih tan in a thu uh nial ka sawm kei hi. Deih teng nei zou kei mah leng, ka poimoh teng bel ka nei vek hi. Poimoh ka sak louh ngen ngei lou ka hih ziak in, poimoh ci a ka gente hon leisak khial kei uhi. Tangval sim hi ta mahleng, pawt ding hiam, lawmte'n pawt dia hon zot u hiam in leng, ka nu-le-pa'n hon phalkei ua leh, ka pawt kei a, amau thumang in, inn ah ka om zaw a, huai in ka nu-le-pa kipaksak mahmah a, a kha uh muang sak mahmah hi. Pasal himahleng, innsung nasep ah ka hih theih dandan in ka nu ka kithuahpih zel hi.
Ka hih zel dan in, nitaklam ann nezou varandah ah ka tu a, Siamte toh sun a ka kithuahdan khawng uh ka lungsim ah a hong lang dundun mai a. Keile lamdang ka kisa hial hi. Gentam ngailou a Siamte in ka lungtang tengteng luah dim khin ahita mai hi. Ka lungsim in ka vei mahmah a, thildang ngaihtuah theilou in, Siamte kia ka lungsim ah a om den mai a, aman le hi ci dan in hon na ngaihtuah sam de o peuh ka ci hi. Hucia bangtan hiam ka tut nung in, ka fone ah message a hong lud a ka et leh number vuak ahi a,"Usang, bang hih e..? Ann ne ta..? ci'n a kigelh a, kenle kua amah mah de aw, hon hoih theih tuak mahmah e ci in,"He, ne khinta, nang kua e? ka ci thuk a,"Siamte ka hi", ci'n a hon dawng nawn a, huci'n kenle dawng nawn tuanlou in, a number save in, laisim di'n innsung ah ka lut ta hi. Huai ni apat, Siamte in a hon wish khial ngei kei a, kenle hoih taktak in ka dawng zel hi. Ka kihou tam deuhdeuh ua, ka kimaingal deuhdeuh ua, keile paunuam deuh hi'n ka kithei hi. Huaiban ah,imm neilou in ka haksatna bangkim uh ka kihilh tuah zel uhi. Hunte hong mualliam zel a, ka kithuah tam deuhdeuh ua, ka iitna hong lian mahmah a, amanle hon iitna ciang nei hi'n a om dan apat ka thei hi. Huciin, ka ki message ciang un leng ka iitna thu ka heem gen zel hi .Amanle hope hon pia hileh kilawm tak in a hon dawng zel hi. Bangtan hiam ka iitna thugenkhe ngamlou in ka om a, himahleh imm thei nawn vuallou ka hih ziak in, ka iitna thu gen ka sawm ta hi. Fone a va gen di lah ka ut kei deuh a, kam mah in kigen leh ka ci a, gen di thupuk na ka bawl ta hi. Skul a kimuh lem hun a gen di ci in kei le ka lum ta hi.
Zingkhua hongvaak a, poimoh moh hihzou in, ann ne zou phet skul kai di'n ka kisapah a, ka phur mahmah hi. Skul kai dia ka kuan kawm in, ka gen didante ngaihtuah in ka buai mahmah a, bangmah lou kal in skul ka tung hi. Room ka lut tak in Siamte ka mu kei a, daak le ging nailou hi ven ci in ka lungmuang mahmah lai hi. Dak hong ging a lah, Siamte mel ka mu ta kei. Ka hehtha bang a suak a, ka nguizou top a, skul kai ka phur na teng le bei zou hial hi. Bang ziak a hong kai ou ahi de aw, cih peuh ka ngaihtuah hi. Skul tawp in inn lam zuan in ka pai vengveng hi. Inntung in, singpi khawng dawn in ka kihahsiang a, hih di le om kei ci in guitar ka tum nawn a. Sawt kihal lou in ka nu'n,"Sangboi, na lawmte hong hoh", hon ci a, kenle ka room apat,"hon lut sak mai ou", ci'n ka dawng a."Kong lut thei diam usang", hong ki ci a, Siamte ahi a.
Ka gintak louhpi a hong hoh ahih ziak in, lamdang kasa zezen a, ka muh in ka kiguih hial hi."hong lut in Siam", ka ci a, tutna piak ka thuah hi. Ka nervous mahmah mawk a, ka kho-ul in hon buak lut lut in ka thei hial hi. "Usang keile guitar tum dan hon hilh ve, kei le nang dan dan in ka tum siam ut", nui kawm in a hon ci a. "He....he....(zumsim) ei hon hilh khong na ut nak incu, kon hilh lo tham di", ka ci tei a, "nang hilh khawng i ut louh maizen in a kua dang hilh i ut mawk di hia usang", cih kawm in, omze neitak in hon melh ceuh a. Huciin kenle ka theih dandan in ka hilh hi. Huai kawm in skul a hong kai louh ziakte hon gen a, note kopy di khawng a om leh hong kan dia hong hoh a hih dan hon gen hi. A hong kailouh ka miss thu ka gen leh, aman le hon miss lua a hih dan hon gen tei hi. Hucia bang tan hiam a om nung in, pai hon sawm a, kenle ka va kha hi.
Hiai hun lem a la in, ka iitna thu gen kon sawm ta hi. Bang tan hiam ka pai nung un, aw liing pipelh kawm in,"Siam, hon gen ding lah ka kisuanglah a, hon gen louh ding lah", ka cih pat leh, "hon gen ve usang, kisuanlah na d om lou pi", hon na ci pah a, huai in hangsanna hon pia hi. Hu la thak zezen in, "Siam, kei na mit a nin neng tu zou le hilou himahleng, mihing khat a ana piang khesam ka hih man in, kon na iit mahmah hi. Neih-le-lam ah non theisa ka hi. Himahleh zum-le-zah khual lou in kon na iit mahmah a, kon iitna non sansak thei diam ? Na ngaihdan loulam ahih leh hon ngaisiam in aw...", ka ci khe khongkhong a, zaang tuan inle ka kithei hi. Siamte le nuailam nga in a kun hi. "ka iitna hon san sak thei lou di na hih leh, sengual lai ah nuihciam hon lel ken aw ", ka ci beh hi. Amah le awl a hon daak tou in, "usang na gen bang in, iitna mah a thupi pen ahi. Himahleh, iitna hici mai a kipiak theih hilou ahih man in, kong kingaihtuah lai di aw, ngaihsiat in ngai ken aw usang", hon ci a, "ole hitham e, kon nangak den di, hon iit gige ka hi", ka cithuk hi. Ka kihou sung un, a innkong uh ka tung ua, ka kikhen ta uhi. Sawt pek a pan a ka thil gel leh tup hih tangtung a ka kitheih man in, ka lungsim a nuam tuan mahmah hi. Himahleh, bang ci'n hon dawng dia, hon NO ta leh ka zum di dan khawng ka ngaihtuah khol hi. Huciin kei le inn ka tung a, ann nek lah hun nailou deuh ci in, ka guitar mah ka tum nawn a. Ka tumtum lai in, ka lungsim ah laa khat a hong lang lian mahmah a, kon sa ta hi <<<<-----
*Melmuh ciil lunglai hong kuai lianu aw..
I Love You kon cih ding lah zeh in zum veng...
But I can't stop loving you,
Gawm ding simthu lel mai ni..
Leenpih gual zatam zong tuibang gawm ta...
#Aw saannem ngaih aw nang lou in..
Aw saannen ngaih aw without you..
Khattang kumsawt gamgua bang hing zou kei ning..
**Where ever you go, na lailung sung ah..
Ka vang mubang hon ngai om cih gel in..
I've no one to rely on,
Nang lou belh ding dang nei ke'ng..
Selung geel siam inla tongdam hon sang in..
Ka sak zoh nung sawt lou in, ka nu'n ann ne di'n hon sam hi. Nidang bang lou tak in, Siamte in nitak in a hon message kei a, ka lung a himoh mahmah a, ka thilgente ngai theilou a de aw, a lungsim lou lam genkha ka de aw ci in ka kingaihtuah a, ka lung a nuam thei kei hi. Ken ka message hial d lah ka ut kei zel a, atawp in ka lum mai hi.
Zingkhua hong vak a, ngeina dan in skul kai di'n ka kisa nawn hi. Siamte mel muh kilamen in skul ka kuan hi. Skul ka tun in room lut ngal in zon bawl mah leng ka mu kei hi. Bang ci a de aw, hong kailou nawn di a de aw cia ka kingaihtuah lai in, ka nung lam apat ka liang a hong kibeng keuhkeuh a, ka et leh Siamte a hi a, nuih mai tak in, "hi ! usang, morning", hon ci a, kenle, "morning, morning", ka ci namnam hi. A mit in kong lam a melh zauh a, kenle a gen om zia thei ka hih man in ka kizui pawt ua, park lam manoh in ka pai uhi. Park pen ka skul huangsung mah ua om a hi a, a mun a nuam mahmah a, a etlawm in a tawldam huai mahmah hi. Koule singkung nuai khat a tutna kidoh ah ka tu ua, ka gei uah diil lian lawlou khat a om a, a tui a siang petmah hi. Bang tan hiam thu vantang ka houlim nung un, "Siam zan a kon gen pen bang ngaihdan na nei ?", ci'n ka dong a. Aman le, "usang, non iitna na gen ma pek in le kon iitna nang kon pe khinta. Non iitna thu non gen ka zaak in ka lungsung nop na in a dim hi. Non iitna kon san sak thei lo tham di usang. Tuni a kipan nang a ka hi den ding a, nang le kei a na hi den di aw usang..", ci in ka khut hon len a, ka liang ah hong kingai suk hi. Kenle ka iitna hon sansak ziak a kipahthu gen in leh, bang teng hong tung zong taisan ngei lou di ka hih dan ka hilh hi. Klas lak di lam le ngaihtuah nawn selou in, ka ki iitna thute uh gen in, singdang kuamah englou in hun ka zang khawm ta uhi. Gin om den a, SIHNA'N GIBANG KHEN MATENG ki iit den ding leh gin om den ding in thuciam ka bawl ngal uhi. Hiai ni bel ka damsung a dia ni poimawh le mangngilh vuallouh a hong hi hi.. Kei a di'n bel hiai leitung ka pian khiat apat ka iitna mi ka piak masak pen ahi.
Hunte hong pailiam zel in, phalbi lam a hong hita a, khua bang le vot sim mahmah ta hi. Nikhat Siamte in a inn ua hoh din hon zawn a, nial mah leng hon nget ngutngut ziak in ka lawmpa Lalte toh hoh di ka hih dan ka gen hi. A inn ua hoh ngeilou hikei mahleng, a nute' om a hoh ngei lou ka hi a, skul tawp ciang a vabang ceuh lel ka hih na ah, a guuk in ka lin mahmah hi. Himahleh ka iitpen' hon cial na nial vual ka hihlouh man in, hoh di thupuk na bawl ka hi hi. Nitaklam in ka lawmpa Lalpu message in, Siamte teh hoh dia tawn tou di ka hihdan ka hilh a, aman le lem hon sakpih hi. Nitak ann ne khin in, ka gensa bang in Lalte ka tawn a, Siamte te' innlam kon manoh ta uhi. A inn uh ka tun tak un, ka lawmpa lut masa dia ka sawl leh, nang a neitu deuh, na lut masak ken a, ci'n hon ciamnuih a, huci ahihleh ci in kong ka kiuh a. Siamte in a hong hon a, "hong hoh mo usang? ulal nang le mo ?", ci in kamsiamtak in hon na vaidawn a, a nuam mahmah hi. Hucia bangtan hiam meiphu awi kawm a tuilum dawn di khawng suang a nuam satak a ka om lai un, Siamte' nu room apat a hong pawt a, "THANGMUANSANG, BANG HONG HIH E ? STUDENT MAIMAI HILAI LOU MO, NUNGAK KHAWNG NA HEL. PAWT PAWT LOU IN NA LAI KHAWNG SIM ZAW VE, SIAMTE NGAIHBAWL A HONG HOH NA HI D MO ? NANG PHIANGSAN A DI'N KA TANU NU KA PHAL TEUH KEI. LAI LA SIAM LOU, SANGGAM LE NEILOU HI LOU NA MO ? BANG A KIVAK SAWM E, NA GUITAR TUMTUM A NEK PIANG DI NA SA A HIA. SANGGAM BELH DI NEILOU LEL TAK NEI VELE. TUN LE TUTU LOU IN PAIZOK", hon ci motmot mai a, na kasa petmah hi. "Hi e, nungaak", ci in ka pawt ngal a, ka lawmpan hon zuih leh zuih louh le ka theikei a, ka manoh na lam le thei lou in ka pai vutvut a..
Siamte nu hon cih dan ka posiam kei mahmah a, mi khasebaih le kingaise baih mahmah mi ka hih ziak in na kasa mahmah a, ka mit a pat khitui kham vuallouh in a hong luang suk zungzung hi. Bangdang teng sang inle sanggan neilou hon cih pen in ka lungtang nasak mahmah hi. Pianpih sanggam neilou bel ka hi kei. Unau thum ka hi ua, kei a neupen ka hi. Vangsiatna ziak in ka U lian pen numei in kum 8 mi a hih in sinna ziak in hon mualliam san a, huan ah, keitung a geih pen pasal in kum 11 mi ahih in tui ah kia in hon na mualliam santa. Hicibang a vangsiatna ka tuah pen kenle thei den mah ka hi a, ka u te ngai a khitui-naptui ka sen ni atam a, unau kituak tak a om te ka muh ciang in ka eng thei mahmah hi. Himahleh ka leitung hinkhua ah ka u te' mel ka mu nawn ta kei ding.. Siamte nu hon cihdan mangngilh sawm mah leng, ka mangngilh thei het kei hi. Sanggam nei hileng zaw, mi simmawh, mi nelhsiah a om lou di hi ing a, ci in Pathian bang ka mawhsa a, himahleh phatuam di a om kei. Siamte in hon call den a, pick-up lou in ka ging den sak zel a, Lalte inle hon call den a, pick-up tuan lou in, ka SWITCH OFF zaw ta hi.
Zan le sawt nailou ahih man in, ka u te' kivuina hanmual lam manoh in khitui-naptui toh ka zuan hi. Ka u te hantung ah ka tu a, bangmah le genthei lou in ka kap ek ek mai hi. Ka kah lai in, ka nunglam apat vak thupi tak a hong om a, "Bawi....", ci a hon kisam ging ka za a, ding tou a ka et leh ka u tegel a hi ua, lamdang ka sa mahmah hi. Amau puan ngou a silh ua, a vak pha mahmah uhi. "Bawi, na thuak kon theihpih mahmah uh, himahleh kisulungkham kenla, kipasal sak in. Hampha na hih dan kithei inla, i nu-le-pa nang khut a om a hi uh. Duat tak leh hawmthoh tak in na enkoi di aw.. Tun haksa sa in kap mah lecin, nikhat tei nuamsa mahmah di na hi. Pathian in hon ompih gige ahi, amah muang in", ci'n a hon gen ua, a mang hiau uhi. Ka manglam a bang hial a, gintak haksa ka sa sim a lah, ka mit mahmah a ka muh a hih ziak in gingta lou vual ka hikei. Huci'n keile innlam zuan in ka pai ta hi. Inn tung phet, ka room a lut ngal in lum mah leng ìhmu vual ka hi kei hi. Hicibang a mi' muhsit ka tuah pat na ahi a, huai le kuadang hilou in, ka iit Siamte nu ahi. Sawt kuam tak ihmu lou a ka om nung in, ka ihmu khong khong a. Ihmu pan ka kisak leh ka nun hong phawng a, ka lu ana mahmah a, ka mit le ka hak zou mahmah kei a, ka luna a, thou ngam lou di ka hih dan ka gen hi. Ka lungsim ah bangmah le a om kei a, thoh di lungsim le neilou in ka lum bet den hi. Skul le kailou in lupna tung ah hun ka zang den a, ka kingaihtuah khop a, kuamah theihpih louh in ka khitui ka nulnul mai hi. Gimlua zaw ka hingei dia, nitaklam deuh in ka ihmu nawn hi. Sawt simtak ka ihmut nung in, ka room ah guitar ging leh la kisaging in hon phawng a, awl a ka daak touh leh Siamte ana hi maimah a, lamdang kasa zezen hi. Keile ihmu dan in ka ki lim neih lai a, a lasak ka na ngaingai a, siam ka sa mahmah hi. Ka lungsim in Siamte laa hici tel a siam na hi maw ka ci lel hi... A aw hoih in, a siang mahmah a, siam ka sak lampang tak ahi hi. A lasak ka ngaihngaih leh nalh ka sa mahmah a:
*Ngaih na mel etlawm, maimit suan encim thei ke'ng.
Hi simlei tung ah, nang kaan a hoih tang dang om kei cia...
#Haksatna-le-nopna thuak khawm in, en kaan tan khawm ni.
Lunglau ken ngaih aw, na siang ah kei hong om den ning.
Singdang englou'n, maciang aw......suan khawm ni..
Hiai laa hon sa zaw, siam in nehsoh ka sa mahmah mai. Keile bangtan hiam a theilou dan a ka om nung in, thawm ka nei a. A lasak hong khawl zot a, ka lupna tung ah, ka kiang ah hong tu hi.. Ka mit a bawk a, a san zawmah a, ka mel a hon muh leh a mel bang hong tuam hial in ka thei. Amel ah kisuanlah na haih vual ahi kei. Bang mah le gen tuan selou in ka sam hon zut hiauhiau a, hong kun suk a, ka tal a hon tawp sak hi. Pau het lou in ka lum dildel a, haksat na tuak mah le ung, hon iit den di a hih dan hon gen a, ka kipak mahmah hi. Kipak mamah mahleng ka pau tuan kei hi.
Kum nawn hong hi leh pawl XII board exam di ka hi a, huai a dia kisak khawl ka pan ta hi. Krismas khawng nai mahleh ka exam na mah ka pibawl zawk a, lengkhawm khawng le tellouh di ka tup ahi. Krismas lah nai deuhdeuh, lungleng tak in ka om hi. Skul kikai nonlou ahih man in, Siamte toh ka kimuh theih na di uh lampi a om kei. A inn ua lah hoh ngam di ka hi nawn ngal kei a... Himahleh fone tungtawn in bel ka kithuzak den uhi.
Mikhen khat ki-iit, ki-ngai te bang lou tak in, ka kal uah mi hong kigolh lou in nuam ka sa mahmah ua, ka thoveng mahmah uhi. Himahleh, Siamte nu'n hon sit mahmah hi. Huai thei lua ka hih man in, laisiam lou hon cih thei den kawm in, lai hoih tak in ka sim hi. Krismas khawng hong hileh, kienjoy zek ut sam ding hi ven, ci in ama in ka hahpan mahmah hi. Khat veivei, Siamte ka inn uah hong guk hoh zel a, sun nileng bang in lai ka sim khawm sek ua, nuam mahmah hi. Ni te hong pailiam zel a, Krismas a hong nai deuhdeuh ta a, Krismas lopna programme ni 20 nitak in a kipan a, nitak teng in ka kikhawm zel hi. Siamte toh ka ki-iitna uh a ni ni in a khang a, ka ki iitna thu uh gen louh ni a om kei. Krismas ni a hong tung ta ngei a, hondam pa Jesu Kris pianni lawm di'n a kiphur thei mahmah hi. Ahihhang'n, kou inkuan a di'n bel hunlui ngaih na, iit-le-ngaih hon na mualliam san sa te phawk kik na ni ahi a, innkuan kim in Krismas zang nuam laiveng, cih a hi mai hi. Keile kikhawm di ci in, nalh thei pen in ka kichei hi. Ka coat suit, a cream rong pen silh in, ka khedap BATA no. 6 avom bun in, kamis a sandup ka silh a, neck-tie ka ok a, ka sam ka koih tou firfer hi....( Lolzalolzz.z.......). Nalh kisa huntawk ka hi dia, limlang ah ka kien tuantuan a. Man ta ci in Siamte toh kingak di ka cih na lam zuan in ka paita hi. Amun ka tun in ana tung nai kei a, minute 5 vel ka ngak nung in, numei khat, kei lam manoh a hong pai ka mu hi. A duang la cing mahmah, puan ak sandup silh, khedap saang huntawk bun, amel la hoih mahmah mai, kua amah mah de o ci a ka na et vengveng leh ka ngaihnou ana hi mai mah a.... haih sim le ka hi mai ! Ka kiang hong tun tak in, "kare, hong nalh na tel cia Siam, hon haih dek i kei maw.. Krismas chibai", ci'n nui vevu kawm in Krismas chibai ka buk a, aman le, "usang, na iitpen haih tel di maw? Kei zaw ka kingaisia", ci'n hon ciamnuih thuk tei a, chibai hon buk hi. Kou adia bel, ka damsung ua Krismas ka zat khawm masak na pen uh ahi hi. Biak inn lam manawh in kong kizui ta ua, biakinn ka tun un Pastor te, Upa te leh mi tuamtuam biakinn kong ah Krismas chibai buk in ana kivual deudau uhi. Biakinn sung ka lut dek un, ka lawmpa Lalte in, "merry christmass, nice couple, na kituak lua uh", cih toh hon thumbs up a, Krismas chibai buk hon thuah hi. Kenle,"kipak e Lal", ci'n ka dawng hi. Siamte toh ka kien tuah ua, ka nui lel uhi. Mi lah kitam petmah, biakinn dim phitphet uhi. Special programme khawng om a, tuailai pawl te'n special number in laa hon sa ua, siam sa lua zaw ka hi ngei dia, ka "HALLELUI" kha zezen a, Siamte zum kisa in hon sik ek a. Thugen bang cu nuamlua in ka na lusu su a, Siamte in hon phawng phawng a, ka nuihsan lel hi. Kikhop tawp in, kou le hunlem zong in ka pawt ua, Siamte toh ka om nak le bel ka deih teng kim himai hi. Nitaklam ann nek hun dek in, inn lam pai di ka ci ua, Siamte nu te le lengkhawm ahih man un, amau in ah ka pai uhi. Siamte kikhek di'n a room ah alut a, ken common room ah ka na ngak a. Sawt lou nung in, "usang hong lut dih", ci'n hon sam a, kei le ka va lut hi. "Koi pen nalh nasa zo usang? Nalh nasak pen ka silh di", ci'n a khut langnih tuak a apuan ak tawi a hon lak a, "a nalh tuak ka sa, na taklam a na tawi pen silh lecin", ka ci a, hucin aman le thumang tak in a silh hi. Aman tak in kou inlam ah ka pai leuleu ua, kei le kikhek in, biakinn lam a ann ne di'n ka kizui pawt ta uhi. Ann nek zoh incu ka kikhen phot ua, nitak kikhawm nawn di ka kici uhi. Nitak hunte bang le ka zang khawm thei ua, nuam ka sa mahmah uhi. Kikhop tawp in ka lengkhawm ua, mi lah kitam, phur thei mahmah mai, lasak la nuam, ka iit pen toh hi zomah ka hih cia, nuam petmah himai. Dak 10 vel hong hih in, lengkhawm kitawp a, nuam sa mahmah na pi in ka pai siausiau ta uhi. Kenle Siamte ka va kha a, lamtawn in ka kikawi den ua, hun zat khawm nop ka sak dan u leh ka ki iit dan te uh gen kawm in ka pai uhi. A inn uh ka tun tak un, mangpha khak a paimai di ka sawm leh, ka khut ah hon len a, ka et leh, ka liang ah a khut a hon koih tou a, kawi hon thuah in, a khatvei na di'n ka muk ah a hon tawp tenten a, kenle deihthoh tak in ka na tawp thuk tei a, ka kitawp ta nilouh uhi..
Hunte pai zungzung in, Krismas-Kumthak te kizang zou ta. A ni ni in ka exam na di uh a hong nai hiai a, ka hah simthei mahmah a, Siamte nu' lungtang khek ut vilvel ka hih man in, rizal hoihtak muh sawm in ka pang tinten hi. Ka nute'n le hi citel a laisim a ka hahpat lam thei ngeilou a hih na uah lamdang hon sak u toh hon kipahpih mahmah ua, hon tosawn ngitnget uhi.. Bang mah lou kal in exam hun hongtungta ngei a, hih hoihthou a ka kitheih ziak in, lungmuanna khat ka nei hi. Siamte bel laisiam mahmah ahih ziak in dotse ngailou a, ahih hoih di theihsa ahi. Lai ka sim khawm ciang khawng unleng, kei sang in a thei masa zaw gige hi. Exam zou, hih di om lou ci in, khat veivei nitha kiloh in ka kuan zel hi. Nitak ciang a inn a om lel, nungak hel di lah agen le gen ngam huai nawn lou ahihciang a maw.
Nikhat, ka kisil kaal in ka fone ana ging a, ka nu'n ana la a, company te ahihdan a hon gen hi. Himahleh, Siamte toh ka kaal thu uh a hon dong a, kenle iimlou hial in ka hilh vek a, ka vahoh nitak a anu hon na bawl dan leh a lungtang khek vilvel ut a, lai hoihtak a sim ka hihdan khawng ka gen leh hon pakta mahmah hi. Bang cidan a Siamte toh ka kal thu uh hon dong a de aw, ka cih leh, ka wallpaper a Siamte toh Krismas lai a lim ka kilak na uh koih ka hi a, company te' call lai a va lakha hi ven, huai a amuh ahih dan hon gen a, ka zum sim mahmah hi. Hun-le-ni te hong pailiam zungzung a, rizal suah di a hong kigen thang vengvung ta hi. Niteng in zingciang a suak di cih a hi ta mai, zingkhua hong vak a lah zingciang di cih hi zel. Zingciang cih cih kal in kaal khat bang a hong kivei a, a tawp incu a hong suak ta ngei a. Ka gintak sang in ka hih hoih mahmah a, 1stDiv. bang ka tung tou velvol mawk a, lamdang bang ka kisa mahmah hi. Siamte ngei leng 1stDiv. in a pass a, himahleh amah a per cent a sang zaw a, zum huai ka sa sim hi. Himahleh, lametna khen ah lohcinna ka ngah cu kipak lotel himai, Pathian kiang a kipahthu ka gen hi.
Kenle maban sutzop di dan ngaihtuah in, mundang a pai sawmlou in inn mun mah ah hih ka sawm hi. Hucimah bang in, Siamte inle inn mun mah ah hih in, koleg khat ah ka kai khawm ua, subject lak le kibang zomah in klas khat ah ka tu khawm nawn ua, ka kithuah den uhi. Iit pen toh sun nileng a kithuah a nuam ngeimai, ni bang tom ka sa thei mahmah a, koleg kai di bang cu kiphur thei himai. Nuam ka sa tuak mahmah ua, klas off neih ciang bang in library khawng, canteen khawng leh park khawng ah hun ka zang tangpi uhi. Kikhanglian deuhdeuh, ka ki iitna u le lian deuhdeuh in, ka thuciam sa uh peellou a SIHNA'N GIBANG KHEN MATENG ci in, ka thuciam sa uh ka hih kip semsem uhi. Siamte in lah, "Usang ken kumtawn a di'n kon telta, nanglou pasal dang ka neikei di, vangtah na ziak a kikhen khak na a om tak lele, pasal neilou in ka om di", hon ci a, "nang kan a khovel a ka iit leh hon iit tu di zong di hi leng le, ka mu zou tuan kei di, kon iit lua Usang... ", hon ci in ka aang ah a hong belh a. Kenle ciamnuih in, "a dik hi", ka cih leh, "seisui mi le thulak kei vanglak", hon ci a. "Siam kon ciamnuih ahi, kenle..", ka cih pat leh, ka aang apat thakhat in hong thou a, "ki ciamnuih le ahun tawk om, mi'n thutak a gen leh kihiciamnuih cih himhim ka lungkim dek kei", hon ci a, kei le ka kisuanglah petmah a, "ngaihdam lua o Siam, ka paukhial kha", ka ci a, hong dawng kei hi. Ka ngaihnou aw khauh ka zak pat na ahi a, na ka sa mahmah a, aw khauh za theilou ka hi a, kei' moh himahleh ka khasiat tha a suak mahmah a, pau lou in amel le en ngamlou in ka kuun den a.. Hucia ka om ahon muh in angaih a pha kei mahmah a, ka mel a hon en a, ka mai mual mahmah in, ka mit paak lik liak a, hon theisiam ngal in, "Usang bang ci e ? Hi ci keive, kon cikhauh lawkha a eive mo, hehpihtak in hon ngaidam in o usang. Ka hihkhial lua, hon ngaidam ve mo usang..." hon ci ngutngut a, ka ngawng ah hon kawi bet hi. Ka khasiat baih leh ka kingaihsiat baih lam a theih sa ahi a, kisuanglah mahmah in hon kawi kawm inle ngaihdam a hon ngen thakthak hi. Kenle ngaihdam ka ngen a, ka kingaidam tuah uhi. Himahleh ka pautam nawn kei, ama gen teng khawng ka dawng lel hi. Hucia ka om cia nuam asa kei a, hon nuih sak sawm teitei in thil tuamtuam khawng hon gen a, a hon iit dante khawng a gen a, himahleh hon sunui zouta kei !! Aman le bangmah gen nawn tuanlou in ka khut hon len a, ka aang ah a hong kingai suk hi.
Kenle koleg ka kai kawm in exam piak theihtheih ka pia a, huai te' lak ah SSC Combined Higher Secondary Level (10+2) ka exam na ah lohcinna kon ngah a, ka kipak petmah a, ka nu-le-pa bang kei sang in a kipak zaw uh abang hial hi. Kou area a exam pe teng lak a kei kia in lohcinna ngah ka hih man in, kho mipi hon kipahpih lou a om kei uhi. Kaam lopna ci a hong chibai a, kipahpih etsakna a chini hon tawi pawl bang om a, ka kipak petmah a, bang mah lou apat hici bang a lohcinna hon pia, Pathian' min ka phat lou thei kei hi. Kaam ka hon nei hial cu ka tup leh ka ngim gige, Siamte nu' lungtang ka khek vilvel zou hi. Amau le kipahpih na ch in, a inn ua ann ne di'n hon cial uhi. Khatvei nitak a ka hoh nung ua ka hoh nawn pat na ahi. Krismas lai a pen cih lou a. Numawi (Siamte' nu) inle hon na bawl khak dan kisik mahmah ahih dan hon gen in, ngaihdam hon ngen a, ka ut hunhun a a inn ua hoh thei di ka hih dan le hon gen tel bok. Huci in, sungkuan khat bang in ka khosa uhi. Siamte le midang pe lou a, kei a di mahmah ahihdan hon gen bang tu, kipah nak om lua hi'n mo. Ka vahoh ciang bang in le a siam mahmah a, Siamte sang in a hon houpih masa zaw gige hi. Keile ka kimaingal sak mahmah ta a, singpi bang ka nget lecu min pah himai...(hehe).
Hunte hong mualliam zungzung a, ka sepna lam di a ka kuan hun ta a, keile ka iit mahmah ka nu-le-pa banah Siamte nusia in ka kuan ta hi. Siamte in konna ngak den di a ci a.
Ka sepna bang nuam ka sa mahmah a, kei a di mawngmawng in ka ngai a, ka kipak mahmah hi. Ka thanuam a, diktat in ka ginom a, ka heutute'n le a hon deihsak mahmah uhi.
Kum 2 khawng kon sepnung in, ka pa le a sepna a kipan hong pension a, ka nu toh kia a om uhi. Thawmhau kisa sim uh adiam a, ka pa'n mou neih a lunggulh thu hon gen hi. Kenle Siamte ka kawk muh pah a, amau le inndongta kihou ding a ci uhi. Bang tan hiam nung in, bangkim fel in, lemtan louh na om lou ding ahihdan hon gen ua, ka kipak mahmah hi. Himahleh ani di kei tel di'n a koih ua, huai pen kei lemsak hunhun ci uhi. Ken le March 16 ka deih thu ka gen a, a ziak bel hiai ni ka Birthday ni ahih ziak in ka deih tuam se hi. Siamte ngei le a kipak a, ka ngaklah tuak mahmah uhi. Tutung suti pai cu zi nei di ka hih dan ka seppihte ka hilh a, ahon kipahpih thei siausiau mahmah uhi.
Nikhat, ofis a ka om lai in, amhai/lungam in ka puk phut a, ka khanloh inbel damdawi inn ana himai mah a, ka lu gik ka sa mahmah hi. Doctor te'n ka BP asan luat ziak a puk ka hih dan a hon hilh ua, hoih nawn pah di ka hih dan le a hon gen uhi. Huci in kei le ngeina dan in ofis ka kai nawn a... Bangtan hiam bangmah cilou a ka om nung in, nikhat ofis ah ka puk nawn hi. Huai hun inbel khatvei a ka puk lai toh a kibang nawn ta kei. Ka gim mahmah mai hi. Doctor te'n damdoi inn a kietkol ngai ding ahih dan a hon gen ua, huai hun inbel ka nu-le-pa le a hong hoh ta uhi. Damlou a om det a nin huai ngei mai. Damdoi inn ah khakhat di vel mahmah ka om nung in, inn lam ah paithei ta di ka hih dan ahon gen ua, ka kipak mahmah hi, himahleh nidang bang in haatna ka nei nawnkei a, ofis kai thei nawn di ka hi ta kei. Ka tha la haat thei lou, gimgim mai ka hih na ah, hoih tak a kichekup sak di ci in, doctor ka va naih nawn a. Ngentel tak a ka kichek-up sak nung in BLOOD CANCER ka na hi maimah a, ka lungtang teipi a sut a bang hial hi. Siamte hilh ka ut alah, ka hilh ngam kei a, hilh louh di lah ka ngaingam kei zel a. Atawp incu ka hilh khong a, amah le a hong kap top mai hi. Ka kiteen ni di u lah kha 5 lel in samta, bang kim felta, man le kipe khinta, himahleh kei lah hi ci mai, dam di leh damlouh di bel gentheih ahi nawnta kei. December hong hi a, ka kiteena di uh kha 3 khawng lel om ta a, inn lam ah pai ka sawm uhi. Huci in December 16 in inn ka tung ua, mi tamkhop in hon na dawn uhi. Siamte mel ka mu zaw anuam ngei mai, aman la a nuihmai a suah gige a. Inn ah kikep theih dandan in ka kikem ua, Siamte inle ahihtheih dandan in hong kem zel a, khat veivei ahong giah changle om hi. A chang a buai phutphut ka hih na ah, oxygen kha 4 daih di toh inn lam pai ka hi uhi. December kha tawp lam a hong hi a, ka damtheihna ahong keniam mahmah mai a, ka story gelh sunzom zou nawn lou ka hih man in, ka lawmpa Lalte kiang ah hon na sutzop sak di'n ka ngen hi.
Ka lawmpa Sangboi damlouh na hi poi kasa mahmah a, huai ban ah kho mipi te'n le poi a kisa mahmah hi. A kiteen ni di u lah nai deuhdeuh mai, amah lah halh tuak mahmah lou, beidot huai mahmah mai hi. A nu-le-pa ka en a lah, teek kuan hi ta uh, amah lah kikem den himai. Siamte ka en a lah hehpih huai mahmah.
Kumte hong thak a, a kiteen ni di uh nai deuhdeuh, himahleh kisak kholhna bang mah paithei lou hi. Amau la ki-iit mahmah mai, kimu lou a om thei lou, Siamte in om pih den mai hi. February hong hi a, ka halh deuh lah cituan lou, lum bet mai, a chang a oxygen piak ngai zawmah ka cih cia bel, a damzoh ka ging kei hi. Hun hong paipai in, a kiteen na di uh nai deuhdeuh, bang hong cidia cih miteng bildawh hita. Himahleh amah lah gim deuhdeuh !! Huciin March ni 10 hong hi a, pau zoulou leh oxygen bulh det ngai ta, ka mangbang petmah hi. I houpih na le za hia za lou cih kithei bun ta lou. March 15 hong hi a, a hong gim mahmah a, a naak lel et hi ta. Siamte lah agei a khitui toh tu ngiungeu mai. Nitak in nungak-tangvalte kisam khawm ua, zanhah pih di ci ua, keile akiang a ka va tu den hi. March 16 zinglam ahong hi a, amit awl in ahong hak a, "Siam" hon ci a, Siamte inle, "usang lunglau ken, na kiang a om den ka hi" a ci a. Sangboi le pau zou lou sasa in, "siam, SIHNA'N GIBANG KHEN MATENG ci a i kiciam na nathei lai mo?" a ci a, Siamte ngei inle, "hi usang thei mah ing e, sihtanpha in nang a ka gige, kon iit den ding" a ci a, hucin awl in amit a si a, samsam mahleh adawng nawn ta kei hi. Siamte a hong kap khe ekek a, hihtheih a om nawn ta kei, ka iit mahmah ka lawm Sangboi in thupina gam hon zot santa. Ama adia ahun kipah nipen, a pianni leh a íit mahmah Siamte toh kumtawn a thuciam abawl ni di in, a tangtawn mun ding a zuan ta !! A nu-le-pa ka en a, teek kuan hi ta, kemtu di omlou, Siamte ka en alah, a iitpen a Usang inlah nuseta, hehpihhuai mahmah tuak uhi. Iit in khelah mah le hang, a si toh a hing omkhawm theilou ahih man in, vuiliam in om ta hi.
Himahleh, Siamte in SIHNA'N GIBANG KHEN MATENG ci a athuciam uh suk bucin na di'n, Sangboi nu-le-pa teek kuan kem di'n lut veve hi...
BEITA
© Siamsinna leh Vakiangbu
Comments
Post a Comment