SIAN SIAMLOUH ITNA
By ~ Prince Oioi
Kum 2008 in, lawm le vualte leh nu-le-pate toh hun nun nuam ka zatlai
un, nopna a omleh haksat na om cih a hihmah bang in, haksatna nasatak
ka tung ah kigin kholhna omlou pi in hong tung hi. Tangval khat a ka
hihsam chiang in, nungak bang neih sam leh lungulh theih na bang ki
neithei samta ahih man in nungak hel ding in ka kuankuan sek uhi. Lawmte
a ngen va helhel le pasal huai kei chi'n, kei a ding leng ka hon zong
panta hi. Oct kha lak a hong hih in, ka lawmte panpih na ziak
in,melhoih kasak leh nunnem ka sak mahmah, duangzen etlawm Gelmawi chuh
ka hon bei panta hi.
Ka iit ziak bel a mel in hon zoulua ahih ban ah a khohei dan leh a
tatdan teng natawm in hon zoulua a hihlam ka lawmte kiah ka gen chiang
in lawmte'n leng hon ngaih poimoh sak uh ahi ding ua, a awng lai tak ahi
chi in panmun hoihtak kon bawlsawm ta uh hi. A guktak a ki ngailua a
hihman in, niteng phial in kava pot ta hi. Gelmawi khohei dan ka muh
ciang in, ka lung sim nopna in a dimzel hi.
Hun hong paitou zel in, kha khat val bang ka va heel nung un, ka
ittna simthu a kiang ah gen ding chi in ki thalawp tak in lawmte toh
nitaak in kava pot ta uh. Full moon nitak a hihman in, kha a vak pha
mahmah hi. A inn uh kava tuntak un Gelmawi leng huansung ah mei chih in
anau te 2 toh ana ki houlim uh hi. Kou hon muhtak in, tutna ava lapah a,
tuding in a hon sawl hi. Anau te innsung a lut ding in a sawl
a,sawtsim ka ki houlim nung un ka lawmte'n kava potdi uh chi in, kei a
ding in hun lemchang a hon bolsakta uh hi. Ka ki ciamnuih den ua, hunte
a hong bei hulhul maita hi. Ka nungak gen masak di pen a hihman in, gen
ngamlou a ka omom lai in, ka lawmte a hong tungkik man hial uh hi.
Dak 9 pelta a hihman in, gen ngamlou a thawnkik in ka paisan phot ta
maimah hi. Lawmte'n leng ka paikawm un, na gen hia chi in hon dong ua ,
kenleng gen ngamlou ka chih leh, ka lawmpa khat in, hun ki khelthei a
hi aw hon chi a, ka lungsim a hon khoih mahmah mai hi. A ni nawn
zingkal in, lawmte toh ki mu khawm in, propose ngeingei ding ka hita chi
in kaki chiam ta hi. Ka lawmte kia'h nitak chiah pwt nawn ding i hi uh
ka chi a,amau leng enle akei dia chi a nui kawm in hon amen pih ua, huai
zawh in Innlam ah ann nechiat din ka hon ki khen ta uhi. Gelmawi
ngailua ka hihman in, zahtaak pipi kawm in message ka khak den mai hi.
Huchih lai in, ka lawmpa'n hon phone a, ei a dia thil lau huai mahmah
om a hi hon chita hi, keileng bang thu a chih theinuam ka hih man in ka
lawmpa te in ah kava paisuk ngal a, a thu ka dot ciang in, unau
thadou pau zang a hon phone om a, thah ding tanpha a gen ban ah na inn
mun uh hon gen in a chi uh chih hon hilh a,hiai thu hon ki gen chih ka
zak chiang in lamdang sa in ka ki ngaituah vungvung a huchih laitak in,
phone hon ging nawn a, ka pick up takin, ka hon thatdi, han mual ah
hongpai aw, na inn uhleng ka thei chi in a hon gen kheta metmet mai hi
hi. bang thu a,bang ziak a chih theilou leh lungbuai ka hih man in
valnou ki muang huntawk ka hih laitak a hih toh lau mahleng ka lawmpa
toh kuan din kakisata uh hi.
Huchih lai in sungten hon theiman in, a thu kansui ding chi in hon
mantang uh hi. A hon phone nawn zel a,kenleng bang thu ahia ka chih leh
ka lawmnu apan ki hemkhia in , ken sih ngam a ka ngaih a hi chih khawng
hon gen ciang in, Gelmawi chu ka mitkha ah hong ki lang huaihuai a.ken
bel hon phone pa banglou tak a hinpih ngam a Gelmawi ngai ka hih man in
kaki piching sak a ka hou ngaih san hi. Himahleh Town comander tamna
Lamka leh a seh vel ah, pau tuam deuh te Bijang ah hong posting chi a
hon ki gen kha a hihman in,kou leng pilvang zawk sem kan a poimoh omlou
chi in Pawlpite kiah a kintheilam in kava report pahta uh hi. Ka ki hou
khit tak un, ka phone uh hon kepsak ua, potlou din a hon gen uh hi.
Tuate ka zak tak in, Gelmawi chu ka mitkha ah hong lang in, ka mit tui
pawt din hong ki sata maimah hi. Sungkuante toh om ka hihman un, ka dai
dide uhi. Ka ki-contact thei nawnta kei ua, huai ni a pan in hun hong
pai zelte ah lungkham na leh dahna in ka hon zangtou maimah ta hi.
Pawlpi ten thilteng hon suikhit nung un, Bijang ah pasal khat a hon
mankheta uh hi. Thudotna neih a hih zawh in a zuaugen te mankhia ua,amau
lam pawlpi ten leng gawtna piak ding ahi chi a a gen tan uh ka theikha
a,pia uh hiam chih bel theisau tuanlou in mipa a tonpih mangta uhi. Ni
tamlou nung in hiai thute hong dai panta a, himahleh ka simcard teng uh
hon laksak a hih man un Gelmawi toh leng ka ki contact thei nawn kei
uhi. Gelmawi lah muh khak ding dan lampi a hong om nawnta kei.Number
lakna ding lah omlou , sung te'n lah pawt hon khaam bikbek uh a hih
chiang in, ki muh khak na ding a haksa mahmah a, hun lem zong ding chi
leng leng ka mu thei zok nawn kei hi. Hiai bang hun sung in kha 6 bang a
hong beita hi.
Nitak khat pawt ding chi in a guuk in ka lawmpa toh kava potkhe
teitei ua, a inn uh ka muh lel in leng ka lungsim a nuam tuam mahmah
hi.Tua zaan in nuihmai pua leh lamen tak in kong kava kiuta hi. A nu'n
kong hong hon in, ka va lut ua, himahleh Gelmawi muh ding in hon omta
kei hi. Sotlou nung in kenleng, Nu, Gelmawi la chi in ka dong ta hi. a
nu'n leng "kha lui in pasal a neita" a hon chih san a,lamdang satak in
aman leng nou ana theikha lou na hi uh maw? hon chi hi, huai hun chiah
in bel ka lungsim ah bang mah a omkei, lamdang leh mak sakawm in ka dai
dide mai hi. Maitai sawm in ka om hamham a, ka pai ding kuan in amah
houpih na ding number ka ngetleh a hon pe vanglak hi. Huchi in innlam
dahtak in ka paita uh hi.
Sawtlou nung in inn ka tung ua, kei leng ka lum pah a, lupkawm in
Gelmawi ka phone ngal hi, ama aw za masa ding ka ki sak leh a pasal in a
hon dawng a, huai in ka lungsim a suna petmah hi. Gelmawi kon houpih
thei diam ka chih leh amah leng pau nawn tuanlou in a phone a pia a,
Gelmawi aw ka zak in ka lungsim ah thil tampi a hong ki lang ngal
hi.Gelmawi aw ka zak masak ni bang, a kiang a ka tut ni bang leh ka hun
zatkhawm sa uh sawtlou chik te manpha a hih dan ka musuah a, gen ding
thei zawsam bang omlou in ka om uhi. Ken leng amah kiang ah pasal a neih
kipak keimah leng kipahpih ka hih dan haksa sa pipi in ka gen nilouh
hi.
Hun hong paizel in ni khat tuh phone ah hon houpih zenzen a, awng
nawnta ka hi hon chi mawk hi, itt lolai ka hih man in thildang te
manghilh in ka luplai bang thou zezen in, nuihmai pua in ka houpih
lolop hi. Kipak lua kisa in lawmte kiang a ka gen leh lawmte'n tuni
April fool a hi hon cih ualeh, lungnopna teng dahna suak maimah nawnta
hi. Gelmawi kiang ah ka kan thak zezen a, aman leng hon khem ahih dan
hon gen hi. Hiai bang ittna piakkhiak theih sunsun kana piak khiak sa
lakkik a hak man in sian siam louh itna gimthuak pih in ka lunglai ah
tuni tan in vai bang tham den ta hi.
BEITA.
©Siamsinna leh Vakiangbu
Comments
Post a Comment