PAA TUZAN SAWT KA TULUA KHA A AHI
By : H.Lal Phaipi@zokhanthang
I lunglutna ah jo ki peihdeuh mah hi mo a kua kua hileh. Ut le utlouh
thu hilou, a lou theilou a peih ngaite bel thutuam hiphot ta leh. Eilam
paidan jo zingkarhun: thohhun, sunhun: nasephun, zaanhun :ihmuthun te
hideuh tangpi hi. Gam changkang lam ate toh iki bat louhna uh khat hong
hipah lel hi. Na chikei mo ? Bangteng hileh ka gen nuam te hong gen suk
phot peuhmah leng aive.
Zingkar khat nisuak kilawmtak mai ka en a, khua bang san vak
philphial jejen, a etlawm tel mai. Kumthak 2012 zingkar ahi, tulai a I
thangsak mahmah uh FACEBOOK (maibu) social network ah “ZINGPHA 2012”
chih bang ka gelh pah velval hi. Thoubaih kisa sim chuh hi ing a aw,
midang leng ana thou baih zolaiuh hiding eive. Eh kumkhen ni a zanhak
suakte hijo din ka gingta, huaini zingkar ka thoh baih luat jiak ahi
nidang toh teh a, a thou baih penpen ka hi kichi nuamlua le jo hisam
keng, athou baih pen hihna bang kong kituh kha dek jejen a. Facebook
apan huai kon gelh touh in ah, numei khat in akhonung sawtlou in ah, hon
na dawng a, mangkang pau in “Good Morning SWEETY” cin ahon dawng hi.
Kenleng ka chiamnuih dawng a ”Na min 2012 hia ? Zingpha 2012 kiang ah
ahi ka khak “ ka cih leh heh sim adiam ah hon dawng nawn hetkei ve. Hon
dawng nawnlou dek hitan teh chin ka potsan a, innsung ah sep theihtheih
sem in ka sungkuan te toh annkuang kikhop nate nei in ann kuang ka um
khawm uhi. Huchi in kumthak ni masa pen bang jang jou, nitak ann nek joh
in lawmte toh kikhawm din ka ki zawn khawm ua kikhop tawp in ah nungak
bang ka va heel tei sam uhi. Dak 9:30 in inn ka tung a, ka sungkuante
ana lumjou vek ua lumdin ka kisa pah hi. Lum baih lodeuh ka diam ah, ka
ihmut suak mahmah lou, halh in ka halh deuhdeuh mok hi. Ka thou khe thak
a, computer bang ka va on thak thep thup a, huchih laitak in ka lungsim
ah zingkar a SWEETY chia hon sam nu bang ka phok guih a, Facebook khoih
utna bang in hon pha phut hileh kilawm khop hial in kiloptak in ka
khoih pah tottot hi.
Petmah o, hon na dawng dia ka gingtak louh mah. Message ka khak a,
“Zingkar a kon dawngdan heh sim mo ? Ngaihdam lua “ chiteng in ka khak
hi. Poikei ahon chi lelauh a, ahon dawng na apan in jo lungkim lo
lawmlawm lou ahi chih haih di vual ahi hetkei. Ka lungsim anuam thei
reng reng kei, kei leh kei a kihou kawmkawm in ‘Nang lungsim noplouh na
di om mahmah kei na theihngei le hikei’ ka ki chih kawmkawm lai in,
minun msg ahon khak zom a, tuma lam in na limlakte kana baan et leh ka
hon star a SWEETY ka hon chih ahi, poikei mo ? ahon chi hi. Hiai msg ka
hon sim khit tak inchuh nui heuhau jejen, lungsim bang nuamtuam mahmah
in ka thei. Mihing jo phat ngaina lou omkhang mo ? Dawngkik pah jejen
lou in ama limlakte bang ka en thakthak jejen a, UK apan ahi chih bang
ka khonung theih khe phing hi. Ken leng amah ka leh phat kik ek a, ka
omna uh, sungkuan nungthu te khawng ki dong tuah in kong ki hou thei
mahmah uhi. Himahleh dak in ahon ngak kei a 12 bang an aging tou velvol
man hial ta, ka ihmut san nuam ta a, a theihsiam louh di ka lauh na jiak
in, hiailam khuamial hun, Annnek hun, luphun, thohhun te hilh chian
masa phot jejen in ka lupsan ta hi. Ani nawn zingkar apat in sungkuan
vai ah buaina khat ahong om man in ka ki hou theikei ua, nitak inlah ka
gim mahmah jiak in ka kihou theikei uhi. Ka lungsim khat theihlouh kal a
ana luahsim ahidi, ka lung anuam kei mahmah huai jan ka ki hou louh
ujo. Ani nawn zingkar in Singtang lam ah ka hoh ngai teitei in ahong
guih a, ni 5 tak va giahngai ding hijomah. Ka lungsim guk in minu kana
vei mahmah a, ni 5 sung kihou theilou lai ding kei ve ua mo ka lungsim
in ka chi vengveng sam hi. Ka va hohtou, ni 5 hun va jang jou kong kik
suk ta hi, ka gari tuang kawmkawm bang in ka ngaihtuah vettak a, mak ka
sa jejen ka lung sim ah ahong hichi teng mok. Damtak in inn ka tung a,
nitak ann nekjoh apat intuh dak 10 hun (amah man hun) ngak in ka ngak
lah penmah hi. Tv bang ka na en a, kuva bang hai thi the sana bang en
deuh jihjeh in ka om a, Dak 10 bang huai nitak a gingtou hak mahmah diak
hi. Atawp tawp in jo ka ngakjou khong a, Facebook ka lut pah jok a, ka
houpih theihlouh sung a hon na hou pih na a om a, hon na miss lua
bangjiak a houpih lou chih te ana khak hi. Kenleng ka hou pih theihlouh
jiak hilh in ah, ka hun jat te nuamtak a le jang theilou amah kia
ngaihtuah khakha ka hihdan te ka hilh hi.
Huai nitak ka ki hou na uh jo anuam mahmah mai, ei paite nam I paidan
te uh khawng ka hilh a, chitak jou ahon sa a inam uh ahon phat mahmah
hi. Ka kihouna uh ahon bottan a, Keileng noulam ka ut, ka hon zin diam
chi in ahon ki ngen mok a , a gen taktak bang hi kha leh chi in ka
chiamnuih dawng ngam kei , amau lam khosak dan toh hiai lam kikhai lua
ahihman in, haksa sa lo ding ahi chi in nial in ka nial hi. Ka ki nial
nial na lam un ah ka ki su nuak kha jojen ua, hileleng ahong lungkim
nawn pah vanglak hi. Ka kihou theih sung uh ka am mahmah tuak ua, sawt
pi ki hou di ki lupsan pah lou di bang in ka na kichiam jejen uhi.
Huchi in ka hong ki hou toutou uh chuh ak bang ahong khuang panpan ta
hi. Ka itna ana pekha jo keita ve mo, anung ama di le khual nawn lou in
ah hichi in ka hon genta ” Kei adin mun a awng thei lai diam ka itna hon
pe nuam ka hi “ ka chi neknek sam hi. Sawt khop ahon dawng na ka ngak
nung in lem ahon sak pih thu ka mu hi. Ka kipak mahmah a, hileleng
lehlam daih ah haihuai bang ka sa jejen a, ki muh pih phak di le hilou
toh kingaih phatuam lou ahi, bang ka kichi a ka lungsim lehlam ah kana
buai gu mahmah hi.
Huchi in theihlouh kal in khua ahong vak a, ka pa sa lei a kuan bang
hong tung kik hial ta hi. Hiaitan in ihun sak phot mahmah ta dia nitak
chiah ki hou thak nawn ni mo ka ci a mangpha ka kikhak ta uhi. Ka hak
mei muai a tomkhah bek ihmu di chi in ka lum suk pah hi. Dak kal thum
hoih leng ihmu man lou in ka pan ahon phawng pah a, thou khia ow
kikhopna nei di ahon chih in mak ka sa sim a bang kikhop na ei diam mo
ka chi numnum hi. Ka phone ah calendar ka et leh Sunday ahih lam bang ka
thei khe thak phing hi. Ka thou khia a, ha nawt kawm kawm bang in ka
lusu puk dek dek hial hi. Ihmut kham louh chu a poi mahmah ve. Ka man
tak in kikhop na ka hon nei ua, ka pan thumna ahon neih kal in ka tutmun
ah ka na ihmu suak kha laizang hi. A neihjoh tan inleng ka phok naikei,
ka ihmu lim mahmah mai a, ka manglam bang in ka sungkuan ten hon na
phawng phawng un ka thei a, tha khat a ka hong khanglou zot chuh ka mang
lam ana hi himhim lou, hon phawng tak tak uh ken ana mang theih ka na
hileltak hi. Ka kisuanglah penmah a, ka pa melh tou gau gau kawm in ah “
PA TUZAN SAWT KA TULUA KHA A AHI “ ka chi tou keuh hi. Huci in Toupa
thumna ka gen khawm ua, ka annkuang kikhopna uh ka zang zou uhi.
NB: Phuahtawm a gelh ahi, kua mah kawktuam aneikei.
©Siamsinna leh Vakiangbu
Comments
Post a Comment