KEN HUAI KHUATE ZINDOU SIAMPEN SANG..!!! [Zodon Zinna-I]
Shared by: Awxel Tomolo
(Based on True Story)
By ~ Mwanlian Hauzel
Ni tamlou hun va zang ding leh amau toh
kivehtuahna program zang ding in June 29, 2011 zing ann nekhin dak
9:00am lakvel in DI a tuang in Lamka nusia in ka hong kipan kheta uhi.
Mun gamla leh lamsau pai ngai ding ahihman in phur huaisim mah leh a
lehlam tak ah tawlhuai mahmah ding hi. Tua ziak leng ahi ngei ding, mi
14 lek ka kingah zoh uh. Huchi in mualkhat apan mualdang, khat khit khat
in ka hon pel zungzung ua, huchia a dakkar a sim ka hong taikhit nung
un gari luttheih nonlouhna mun ding tan ka hong tungta uhi.
Huaimun ah kou mahni van chiat kipuak in
anntang & 2nd puante tanpha kong kipuak chiatta uhi. Tuamun ah khe a
ka hong kipatkhiatna muh uah Leipi (Bridge) in hon na vaidawm pah hi.
Ka hong paipai ua, lamsuk lamtou, lam koi leh tang, ka hon tawnsuak ua,
guam thuk pipi bangzah hiam ka hon kankhit nung un, a khua uh naih
panpan ta maw chih ding in khaw mipite’n, khualgam apan min hong veh
ding ahih uleh chi in lamnawl ana vatsiang in social work nasatak in ana
nei ua, tua zoh in ka van puakte uh hong dawn in a khua tan uh hon
puaktung sak uhi.
A khua uh bel mualtung ah kisak a khonawl
ahihman in inn leng tamlou hi.A khua uh ka tuntouh un, “ute-naute dam
in na hong tung na uh maw ? Bang na hong chi ua ? Na hong gimlua uh
hia?” chi in kamsiamtak toh hon na vaidawm in tua toh kiton in
nungakte’n dawntheih ding banghiam hon hawmpah ngal uhi. Tua in lamkal a
i gim-i tawlna teng bang hon mangngilhsak hileh kilawm hial hi.
Huchi in ka hong kihahsiang khit un nitak
ann ka hon neta ua, chikmah a ka nek ngeilouh ngasa (meitei guun apan
mat) te bang nekkhak in ompah a, hamphat huai sawnsawn hi. Ann nekhin
niang leh tai tak a ka om zoh un nitak program biakinn ah ka hon zangta
uhi.
Hiai prog hun in self introduction bang
ka nei ua, tau ban ah 2nd hand ka puakte uh leng piakkhiatna ka nei uhi.
Biakna hun ka hon zatkhit un hausate inn ah ka tukhawm siausiau ua hiai
ah kipolhlimna hun nuamtak ka nei uhi. Khosung mite kipezou mahmah ua
ka giahna ding un tenna inn khat hon pekhia ua, tuakia hilou in zan a ka
silh ding uh puanlum (blanket) tanpha kaihkhawmsa in hon na koih sak
diam uhi.
Tua inn ah ka hong giak ua zingsang hong
hih in ka thoupah a, tui bang ka hon tawikha zozen hi. Zing ann nekkhit
in koumau utna leh lunggulhna lam chiat ah ka hong kikhenzakta uhi. Hawn
khat ngakuai khai dia kuan bang, hawn khat tengkol sawk dia kuan bang,
hawn khat len toh lui lam zuan bang, akhen lah bangmah peihlou a giahna
mun a chim zen a ana om pawl toh hun ka hon zang uhi. Kei bel tengkol
sawk in luidung ah ka hoh a, chikmah a tuilak a om mengmeng lou chih
mahtak tuilak ah ka buai dektak hi. Ni hong niamta maw chih ding in
hausate inn ah ann ne din ka hong paikhawm nawn uhi. Chikmah a nek
ngeilouh leh nek ut nonlouh ding Uisa tuinei a huan ka hon ne uhi. Nitak
hun ahihleh ngeina bang in biakna hun ka nei ua, hiai hun ah thu leh la
a kipolh limna nuamtak toh hun ka hon zatkhit nung un hausate inn ah
farewell program zatna hun ka hon zang uhi. Hiai hun ah kipolh limna
nuamtak ka nei ua a khen CJC dance pawl toh, a khen houlimna tuitak
neipawl toh lum in ka lum zelzul uhi. Zansawt dekta maw chih ding in ka
hong kikhen ua ka giahna buk uh ka zuanta uhi.
Zingsang a hong hih in nesep ding
tuamtuam ka zou ua, zing ann ka nek zoh un thazoitak toh Lamka lam zuan
in ka hong kipan kheta uhi. A khomite bangzah hiam in ka gari ding uh
kingakna tan a hon zui ua, huchia kampha a ka hong kikhakkhit nung un ka
hon taisan vungvung ta mai uhi.
Ni tamlou sung chouh hun va kizang ahihna
ah khiatlah huai tuntun a bang hi. Amual a sim ka hon pel ua, dakkar a
sim ka hong taikhit nung un, buaina omlou in nitaklam in Lamka ka hong
tungkik nawn uhi. Himahleh mitkha a asakmel uleh a tongsuah O nemte uh
vaibang thamden hi. Lungzuang tak leh thazoi tak a hong tungkikte,
innlam ah ana omsate’n a lungzuanna uh ana theihpihna di uam maw ??!!
©Siamsinna leh Vakiangbu
Comments
Post a Comment