KHANGTHAKTE’ LAMPIAL THU A KAH LA

By ~ Vz Vualnam

Note: Shillong BYF te'n Tuailaite Ni, 2013 a 'Kahtam' kidemna ding gelhsak ding a ngetna bang a gelh:

Khangthakte’ Lampial Thu A Kah la

Ka vei khamkha aw, kha ka kiakloh ding hiam aw
Ka sial ngaihtam aw, kulsin kankong ka hon na’ng hiam aw
Ka luanli aw chikleh na theu ding hiam aw
Ka naktui aw chikleh khaltui bang na kang ding hiam aw
Sunchin in mau ing e zanchin in lawkta tau zil ing e
Khangsawn lia-le-tang tuanglam khial zatamte aw
Chikleh sunnau bang oih ka baang ding hiam aw

Khangsawn lia-le-tangte na dondon ing e
Tuun’ tha kheek ding zua’ tha kheek ding ka sakkal in e
Ngaihtamsial beng bang suan e tuun in lou bang lel
Tum bang vuai kuan tuun-le-zua tutkhawl a lawmte aw
Tut a khawl meel in theilou e sunchin zanchin ngaihtam sial
Lum bang sung ding avon tuaidawng kumsawt hai bang angak
A sen a nunkhumnou a haam bang ahuai
Lungtup teng laan bang ngakna vondawng zouzaam
Sial bang lian e lal leidou bang e khuai bang haang
Lelliang tuun-le-zua sian in na sung ve aw

I thaamna aw i thaamna, i thaamna ningzu aw
I thaamna ningzu lah chik in al bang manglou dia
Lia-le-tang al bang i mang zaw ding hiam aw
Lia-le-tang gawl bang i puukna vaimang’ zatui in
Kumchin zata kulsin ah sialzin bang kha e
Dawnlai loh zata sakluang kulsin ah thaamzou e
Sakluang’ thaamna kulsin hi e, laukha thaamna gelngam la’ng
Gelngam la’ng e don ngam la’ng, laidiip hawmlua sa’ng e
Heihaaa, Ka hehluat aw, ka dahluat aw, koi ah sawl bang ka baang ding hiam
Sian in lengvan tuanglam ahon nua’n aw
Ziinleng’ kammei sungneek tang di’n i laukha i phal hiam aw
Lia-le-tang aw selung khuam bang gelthak dih ni e

Seinou zata nua chiang miimphung huai ding aw
Tu a simlei paal lou bang lel a gawl bang i puuk
Nuachiang kua’n miimphung ahuai ta diam aw
Sianmang simthu zu bang i nial aw al bang man na’n lawm sa’ng e
Sianmang’ simthu tuu bang chiinglou in
Simlei ah chikleh i paal ding hiam
Sianmang toh lou gamsing bang i mang hal in
Kumsawt phuhsing bang i khauh diam chi’ng
Zanggu bang zen e, lia-le-tang zatam lai ah
Sinlai kulthuk a Sianmang simthu pai bang pom
Sial ngam la’ng e litui bang chinglou ding aw
Lia aw e, an bang it aw, tang aw e, zua’ lungtup aw
Tomkaal simlei nunnop mu bang i ngaihman in
Tangtawn gua bang hing ding i laukha
Ziinmang’ simsal in i bawl nuam eimah e

I siang a luang chiaului minthang
Lohchiang bang i daina hi khinzou e
Singta’ gamlei a luang chiaului minthang
Kha i kiakna hikhinzou e
Nuaiziin khuai bang hong haanglua sa’ng e
Gi bang hon nehta lua sa’ng
Lia-le-tang aw zuangthou dih ni e
Sianmang’ simthu’n kisung dih ni e
Ziinleng dai bang nawk ni e
I tou lungdeih in tulta leel a
Tual akhiatsa hi e gawl bang puuksa hi
Tou lungdeih liimsawl bang beel in
Zata’n machiang suan ni e
Zata’n machiang suan hen aw
Ka luanli zingdai bang theng hen aw

----------------------------------------------------

Ka vei khakham ka sihpih ding hiam
Ka lungkhamna hon sisaktu ding ahi hiam
Ka khitui aw chik chiah na theu ding hiam
Ka naptui aw chikchiang in na kang ding hiam
Sunteng in ka mau a, zanteng in ka kap hi
Khangthak nungak leh tangval lamkhialte
Chik chiang in amaute kah ka tawp ding hiam

Khangthak nungak leh tangvalte ka na enen a
Nu-le-pate’ tha hon kheek ding uh ka sak kaal in
Lungkhamna aguan zaw ua, nute’n a thuakzoukei uhi
Teek kuan/teek ding a kisa nu leh pa tawldamta ding a kilawmte
Tawldam chih himhim atheikei ua, asun-azan in lungkhamna’n abawm hi
Amaute humbit ding ata tuailai kum sawtpi ana ngak
A neu a nawitui a akep
Lam-et teng ngakna ta deihthoh huai
A hong lian a, galte mah bang in ahaang a
Pathian in nu-le-pate ana hum in

I hihkhelhna/puukna, i puukna uh zu aw
I puukna zu lah chikmah chiang in abei/mangkei dia
Nungak leh tangvalte mangmang zaw ding i hi uhiam
Nungak leh tangval i puukna mite’ damdawi in
Kumteng in mi tampipi hanmual ah akha/sawl hi
Haatlai a si in tampite aluang uh vuiliam in a om uhi
Luang zaw haan ah a om ding a, kha om na ka ngaihsun ngamkei
Ka ngaihsun in ka suangtuah ngamkei, ka diip ahawm hi
Ka hehluat, ka dahluat koi a paikhe ding ka hia
Pathian in vangam lampi ahon nung in
Dawimang’ meikuang ann ding in i kha i phal hiam
Nungak leh tangvalte’n ngaihsun thak n

Tuailaite tunung chiang a nam makai dingte aw
Tu a khovel thupina leh nuamtaalna dou zoulou a i puuk uh
Denchiang a kuate’n i nam hon makaihta ding uh ahia?
Pathian thu i pom noplouh zaw i manthatna ding uh hi ding ahi
Pathian thu zuilou in
Leitung ah chikchiang in i khangkhe ngei ding hiam
Pathian tellou in leitung ah i thupita zong in
Sawt a hon daih na ding hiam
Nungak leh tangvalte lak ah
Lungsim taktak a Pathian thuzui
Ka sim/ngaihsun ngam mahmahkei, atawm lawtel dia
Ithuai nungak aw, pate’ lam-etna tangval aw
Tomchik sung nopsakna i khiatlah man in
Tangtawn a si ngeilou ding i kha
Dawimang’ suak/sal di’n i pe ding hiam

I gam a luang lui minthang lah i zahlaakna ahi khinta a
Mite’ gam a luang lui minthang lah i sihna ahi maimah hi
Dawimangpa ahong maingal ka sa mahmah a
A hon nopneh lua ka sa hi
Nungak leh tangvalte aw, thou ni
Pathian thu a kiliah in
Dawimangpa dou ni
I Toupa’n singleek a azohsa ahi, apuuksa ahi
Toupa beel in
Mailam nawt ni
Nungak-tangval hon in mailam hon nawt hen
Ka khitui kangta hen

©Siamsinna leh Vakiangbu