BANG CHI ITA MAI HIAM AW?

By ~ Eric Muan Paite 

June 28, 2013 sunni mual dawn ah hong tangkhia a, avak kilawm takmai in Lamka khopi hon tanvak singseng hi. Zinglam dak 9(kua) vel ahi a, kitenna a tel dinga chiala ka om bangin kei leng ka nalh theihtawp a kichei in Usher a pang ding in inn nusia in ka kuan khia hi. Ka heutupa un hon tawnsuk in a chih manin a inn uah ka bang suk a, ana man phialta uhi. Zinglam in bel khua pha mahmah singseng a, himahleh sun in vuah a hong zu thei mawk hi. Hucia hong kuan khia in kitenna ah ka hong tel tou a, mitampi tak kitenna uap dingin a hong pai ua, biakin sung a tat louh ziakin inn pua ah leng mi tamtak om uhi. Hun bangtan hiam nungin kitenna zou in mou lopna nei dingin YPA Hall, Hiangtam Lamka zuanin ka paiphei uhi. Ka zekai sim man un mi ana dim mahmah ua, a sawng tunglam (balcony) a paitou in huaiah ka om uhi.

Huchi a van hepfel na a tel in, tui khong ka hon tawi khawm ua, nuam kasa mah mah hi. Hiai hunte bel ka hinkhua adia thil pawimawh tak a hih manin mangngilh thei ding vualin ka ki koih kei hi. Huchiin, nite hong tum in mahni inn lam chiat ah ka hong kikhen nawn uhi.

Nitaklam ann nekhin in amah (ka nanau) mah ka hon houpih nawn a, huchi'n message tungtawn in ka hong kihou tou jel uhi. Ngaihzawng a neih leh neih louh thu khong ka dong a, huchi'n aman leng ngaih a neih louh thu a hon hilh a, ken leng ka hinkhua a ding a mi poimoh pen (gf) a hong hithei diam chih thu ka dong a, aman leng a hon dawng pah kei a, bangtan hiam nungin a hon dawng a, a hih theih ding thu a hon hilh a, tua zan chet zaw, puan kawm ale zan khangpi a hatu dawk fife mai dan ahi.hehee...! Huchi'n tua ni a kipan ka hinkhua uh kipan a hita hi. Huai hunin zo hiaitan tung dingin ka ki ngaihtuah kei.

Huchiin, itna lampi ka hon zui khawm tou ua, ka kipak un nuam kasa thei mahmah mai uhi, hunte hong paiin kituak takin hinkhua ka hon zang tou ua, himahleh amah bel a nu leh pate'n hon deihsak kei ua, a hi zong amah ka it in ka muang a, aman leng huchibang mah in a hon muang mahmah hi. Bangkim amah apan ka thei jel hi. Ka man chiangin a inn uah ka hoh jel a, a nu leh pate'n leng pangai takin ana pawl jel sam uhi. Himahleh, kei om leh om louh a anu leh pate om dan a kibang kei hi.

Pathian in mihingte ading a asiam hun leh nite hong paitou jel in November 2013 te bang a hong tung tou a, Christmas gimte bang hong nam panta hi, khenkhat in mass late bang a hon khah panta ua, tuate khong in lungsim hon suthak sak tuan mahmah hi. Kei leng Lamka a omlai ka hih manin ka hun awl neih tengteng ka it mahmah ka nanau toh zatna ding in kapia a, ka om na uh ki gamla mahleh ka tung lah tuan kei hi. Hun awl neih teng a ki thuah in mailam hun pai ding dan khong ka hong ki kum jel uh a, nuam kasa un ka ki tuak mahmah uhi.Tun leh zua hal ka hih man un nu-le-pate om louh chuh kou a ding a hun lem a hita mai hi. Himahleh, nu-le-pate'n bel kei zak ding leh theih ding in ka it mahmah ka nanau kiangah bang mah a gen ngei kei ua, kei leng bangmah theilou bang in ka om jel hi. Ka nanau in bangkim hon hilh jel a hih man in amah ah ka muan na bangkim ka koih a, aman leng kei ah muan na a hon nei mahmah sam hi.

Huchiin, December khate bang hong kaitou in Jesu pian champha Christmas bang a hong nai tou a, a buai huai mahmah khat bel ka nanau toh Saptuam khat a omkhawm lou ka hih man un hun khenkhat ah vai ding a kituah louh hun a om thei jel hi. Hun hong liam in Christmas ni bang a hong tung tou a, tua hun bel kou a ding a kipahni pen chih hial ding a bang hi. Tua ni in sunkhua in ka it mahmah ka nanau toh ka ki thuah den ua, nuam kasa un ka kipak mahmah tuak uhi. Sun hunte bang sawtlou a hong beipah hi in ka thei hial a, ka kham kei mahmah hi. Huchiin Christmas nite bang hong bei in khua mial dingin hong kisa nawnta a, kikhop dak/biakinn dak te bng hong ging in kei leng ka ngeina dan in ka nanau te inn lam juan ding inka hong ki thoi nawnta hi. Ka hun awl neih teng asun azan in amah ading in ka hon zang a, ka om khawm louh jek chiang un ka lungsim anuam thei kei hi. A lungsim noplouh khak ding bang lau in, ka itna jiak in ama a ding kia a hing hi in ka ki koih a, ka damsung a ding a it ka hih dan leh ginom taka om gige ding in thu ka hilh gige hi.

Hun leh kumte hong bei in kumthak 2014 te bang Pathianin hon pii kai a, ka nanau te Class-x exam ding uh a hih man un skul hostel aom ding a hihiam chih thu a hon dong. Haksa kasa a himahleh, maban a hoih nang hi a ka theih man in kengleng om phot ding in thupukna kalak sak a, himahleh ginom na bel chikmah a taisan lou ding in thu ka hilh gige a, aman leng hoihtak in hon dawng jel hi. Huchi a hih lai in keileng ka sungkuan ten singtang lama sem ding in a hon sam ua, kenleng haksa sa mahleng amah(ka nanau) leng hostel a om ding a hih man in singtang lama ka sep sawm thu ka hilh a, aman bel ahon nial tuan kei hi. Huchiin, maban a om khom thei lou phot ding ka hih man un ka hun zat khawm khak te uh am tak leh hawmthoh tak in ka jang jel ua, tua hun in nuam sa mahmah le ung leng, maban ding ngaihtuah chiangin haksatna in ka dim a, himahleh si le mang a damsung a ding a ki khen ding hi lou hi ven ka chi a ka ki lungnuam sak hi. Nibangjah hiam nung in Hostel a alut ding ni a hong tung pah a, kenleng a inn ua vapai in Hostel tan kava kha sam hi. Hostel sungah ka lut ua, bangtan hiam hun ka jat nung un pai dingin ka kisa a, ginom taka om ding thu ka hilh a, aman leng aw nem tak in 'awle hitham e' hon chi a, huchiin ka hong ki kha khe theita uhi.

Hunte hong paijel in, keileng ka sepna ding mun juan in lungzuang tak leh thawmhau takin kapai a, ka nanau lou dang ka lungsim ah bangmah dang a om theikei, ka kithuah dante uh khong ka ngaihtuah a, a khen chiangin ka khasiat tha bang a suak a, lamtawn tungin lungjuang takin ka om hi. Himahleh si leh mang a damsung a kikhen den ding ka hih louh jiak un ka nuam tuam deuh hi. Keileng singtang lam(ka khua uh) a om in nu-le-pate toh hih theih theih hih in ka hun ka jang a, hun bangtan hiam nung in ka sepna ding ah ka join theita hi. Huchiin, ka hon sem tou a, naupangte toh skul a kithuah in ka hun leh nite ka hon jang tou hi. Ni leh khate hong bei in Summer Vacation hun ding hong naitou hiai hiai a, hun hong paitou in, naupangte exam jou in ka hong khawl uhi. (a tom zawng in ka hon gen maiding)

Keileng khawl neih sun sun chi in Lamka lam ka hon juan tou a, lampi bang sau sim mahmah hi. Ni sotta a hih man in Lamka ka tung hak kei ua, ka tun phet in ka kisil a, kisil khin ka tawldam phot hi. Tua chi in ann nejou kisa in ka vangngaih nanau te innlam zuanin ka hong kalsuan ta hi. A mun leh mual khong lah a ngei ngei in ana om lai a, nidang a ka pawt khawm lai uh khong ka ngaihtuahna ah a hong lang zung zung hi. Sawt lou nung in a inn uh ka tung a, a nu leh paten Hostel a pan hong pawt nailouh thu a hon hilh ua, keileng a nu leh pate toh ka houlim ua, sawtlou nung in ka pai hi.Kapai in a omna Hostel kiang kava pha a, himahleh huchia muh theih mai ding ana hikei uhi. A aw uh bel aki za a, lung a hon sulengin nidang lai khong a hon phawk sak mahmah mai hi. Kenleng muh theih ding dan ka hon ngaihtuah a, Hostel a om ten tui a tawi sek na uh Hostel polam ah well khat a om chih thu well kianga tengte apan thu kaja a, tua atui toi chiang uh ana tang dingin lunggel ka hon neita hi.

Huchiin, a zingchiang nitaklam dak 4(li) velin tua well geia innte khat ah a tui tawi ding hun uh ngakin ka hong omta hi. Bangtan hiam ka ngak nungin a hong kuan ngei ua, kana sap leh lamdangsa in a kiguih hial hi. A ki mu gige lou ka hong kimu uh jo gen ding bang a vang hial hi. Huchiin, bang bang hiam genin ka hong ki hou ua, tui tawi lel a hih man un sawt ka ki thuah thei kei ua, sawt lou ka kimuh uh tuh kou a dinga ka kimuh theih dan uh om sun ahi. Huchibang in niteng phialin ka om sung teng kava ngak jel a, letter te bang ki khak tuah in ka om uhi. Hun bangtan hiam nungin examte bang hon jou thei ua, ka nanau leng Hostel apan hong pawt in innlam a ki thuah ka hon pan nawn uhi. Keileng ka khawl sung ua hong zintou jual ka hih man in sawt ka om theikei a, ka lut uh hun nawn a hih man in ka omna vangkhua lam ka zawt hun a hong tung a, mangpha khakna va bawl ding chiin ka nanau te innlam nitaklam an nekhin in nidang bang in ka hon zuan nawnta hi.

Huai nitak jo hun leng a tom diak a bang a, bangmah lou kalin dak 11 bang hong gingtou pah a, kenleng ka omsung in ka nanau kiangah mailam hun om dingdan thute ka hon hilh a, huchi in ki it kingai tawk le hang leng ki omkhawm nailou a hih manin, chi in ka tut mun apan ka paiphot mai ding aw nanau zan sawt tak toh chikawm in ka hong ding tou a, inn kong khak hong in ka pawt a, ka nanau inleng gate chabi la in a hon jui hi. Gate ka tun in ka khawl a, a mai nou tak mai ka etleh a biangah mittui a hong luang suk a, kenleng a itna mittui hong luang te nul in ka angah ka kawi phei hi. Ki khelah tak in ka hong ki kawi ua, aman leng, "uu paitou maiin awl a ana hoih na ding kahi", a hon chi a, kenleng,'ginom takin om in aw nanau, keileng ka omna peuh a nang dinga hong pang den ding kahi', chiin ka hong ki khakhe thei khong uhi. Huchibang a ka ki khen ding chiang un itna mittui toh haksa sa kawm pipi in kaki khakhe sek uhi.

Hun hong paitou jelin, keileng ka sepna sunjom in ka kholam uah ka om nawn ta a, phone in bel ka ki thujak jel uhi. Himahleh, ka omna mun tak ua network/signal omlou a hih manin phone jang ding in khokhung lam va naih jel a ngai hi. Huchibang in ka hong ki houtou theijel uh a, a chang in lunglen hun bang a tam a, lungngaih vung vung hun bang a tam thei mahmah hi.

Itna ka pat tung lai un, ka nanau in facebook lam himhim a khoih kei a, himahleh hun bangtan hiam apan in a/c a hon neia, ken leng ka phal louh himahleh nei a hih tak manin ka pomzam suk mai a, a khoih tam ding bel ka phal kei hi. A ziak bel facebook ichih thil hoih lua hi a ka theih louh man leh a jatkhelh khak ding ka venna jiak ahi.

©Siamsinna leh Vakiangbu