KHEN THEILOU TUI BANG GAWMNA:

~HP Nowluck Vontawi

November 13 ni ahih manin Salley in Rakesh zon in Dipawali Party nei dingin akuan khawm uhi. Mitampite in nuamsa tak a, hun nuam zang in alaamna mun uh ahi ziakin Rakeshte lawmta zong tua mun a tel ding in hong kuan ahi uhi. Mihonpi laamna mun ah amau zong hong tel uhi. Nungak tangval in hun nop azat theih hun tak uh ahih ziak in nuam as amah mah uhi. Salley mel hoih mah mah mai ahih man in tangval khen khatin haza in a thoh bawl uhi. Tangvalte’n Salley aki thoh leh ciamnui uh anuh ciang in Rakesh aheh hong suak guih hi. Hu chin mi tawh hong kisual a, aliam sa in inn lam a ciah hi. Zato inn, (Hospital) lian mah mah ah hong ki enkol in dam mah leh dam siang theilo ahih man in tutna tawh aki tawl thoh ta hi. Amel in Rakesh sun zo nawnlo a, kua man Rakesh ngai nawnlo in alawmte’n zong ki thuahpih ut nawnlo uhi. Salley in Rakesh angaihna pung deuh deuh a, Himaleh anu leh apa’n Rakesh tawh ki thuah nawnlo ding in a thu hilh uhi. Hihthu azak ciang in Rakesh adah suak in akap kap mai ta hi.

Rakeshte inn leh Salleyte inn ki nai cik ahih man in inntung lam a pat ki gal muh thei zel uhi. Hun hong paitou zel in, zingkal khat inntung ah tu in Rakesh a om lai tak in Salley zong puan phou ding in inntung ah hong kah tou hi. Rakesh in na mu pah a, kisuanglah ahih man in sam ngamlo in azak khop ding in “ ka hin khua aw genthei kei hin khua” cihla sa ngauh ngauh hi. La kisa aw ging azak ciang in Salley ki hei in aet leh Rakesh inntung a tu amu hi. Akin thei bang in inn sung lam ah tai lut in alupna tung ah nakpi tak in akap hi.

Rakesh in lawm leh ngaihzawng nei nawnlo a ki thei ahih man in lai(lekha) nakpi tak a sim ding hong ki pan hi. Gawng hun hun zenin lai nakpi tak in hong sim a, Anungak nu mangngilh sawm in pan nakpi tak a la kawm in, hucin amah lae amah ki heh nem kawm in hong pang touta hi. Lung lutna lianpi tawh ama ban hong zom tyou ahih man in sang tak hong tung tou hi. Hucih kawm kal in Salley nu leh pate’n Salley ata naute khat Rahul ki chi khat tawh ong kiteng sak sawm vai hong hawm uhi. Rakesh leh Salley bel akal uh a veng thei nai kei a, himahleh ki thuza thei nawnlou a bang tan hiam om ta uh ahih man in Salley in bang mah gen leh sak a nei thei tuan kei hi. Kumnih bang ki houlo a aom nung uh hi ta mah leh Salley in Rakesh a mangngilh thei tuan mah mah kei hi.Bangtan hiam zoh in Rakesh zong a pan lakna te ziak in Officer khat hong kaita a, zi neih utna lungsim hong nei thei ta sam hi. Shair tung a tu kawmin hong ki ngaih tuah a, Salley khat vei ka va en him him ding cih hong ngaihtuah hi. Atutna a pat a ding khiat dek lai tak in amah a ding laithon khat hong tung a, alai thon pen Salley in akhak cih atheih ziak in sim ding hong ki sa masa hi.tua laithon asim leh hi cin hon ki gelh hi.”Dam a hinkhua na mang lai nak leh hiai lai na sim cingin na khitui pawt sak kei in la, Kum 7(sagih) lam bang inn nai cik a om hi mah leng zong iki mu kha thei nawn kei a, nang zong hong ngailo ding in kong gingta kei hi. Nang ngaih na in sun leh zan in ka khitui in tui bang hong tum a, nihgel itna cihloh itna dang ka tuak nai kei hi. I om khawm lai a kong itna sangin iki muh louh a kong itna lian zaw lai hi.

Nai cik a om himah leng ki suanlah na tawh ka om ziakin kong hoh ngam sam kei a hon ngaidam tei tei in aw? Hun sawt tak I om khawm louh nung in huih nung hiau hiaute in thu hong puak in, kei a ding in lampi khat hong ki hong a, tung Pasian in nang tang ding in mi hong guan in , a hong tung ding next Sunday ciang in kitenna vaiguan (marriage programme) neih sawm ka hita uhi. Lem nong sakpih leh tua mopawi ah hong tel ding in kong ngen a, ahizong ion nang thu bang hita hen.Singdang anglai ah zal ding nong phalloh leh mopawi ma in hong ki ten pih inla, nong ki ten pih ngam kei leh damsung suangkul tang ding ka hi ta hi. Kong ngai mah mah mai, na lungsim a om bangin itna a ka gen theih ding leh nop kasak ding nang thu hi ta hen. Hih lai khak na muh phet ciang in hong thuk kik pah in aw, Na nau it Salley…!”Rakesh in hih thu azak ciangin a om ding dan tuan theilo in Salley in hucituik a ait lai lam atheih ciang in ki sik mah mah in akap kap mai hi. Pasal aneih ding thu ah aki pah pih mah mah a, himahleh aitloh tawh akiten ding angaihtuah ciang in ahehpih tah a suak mah mah hi. Ahihtheih lah om tuan kan lo ahh ciang in a room ah lut in akap niloh hi. Nitaklam hong hih ciang in alukham nuai a akoih a man/lim(photo) la in a tawp ngoih ngoih mai hi. Thuteng gel fel ding angaihtuah ciangin ahun lah tung dek ta ahih ziak in a photo tawh aki ho ho maita hi. Nitak annek hunta ahih man in Rakesh sanggamnu in a Rakesh ava sap leh kei tuni anne lo ding a ki ciam ka hih man in ka ne kei ding ci in an zong ane ngap kei hi. Kam nemtak a laithon piak ding lah ngai ngamlo in om a, amah leh amah ki thupukna lak hak as mah mah mai hi.Bang teng hi leh lai ka khak mah mah ding chih ngaituah in lai hi cin hon gel maita hi. “Na hong lai khak ka mu a, lam khat ah dah mah mah leng zong lam khat ah kong kipahpih mah mah mai hi. Kei ka ki ngaih siat luat ziakin hong mangngilh ding in kong koih mawkna pen hong maisak tei tei in maw Salley…? Nong thu dot kong dawnna ding in lai ah hong gelh theilo ka hihman in thai ciang ziltawpni in Depawali aki zatna mun ah hong pai in la, tua mun ah thu I genkhawm ding hi. Nong lai khak ka muh ni a na kiang a hong hoh ka sawm leh n alai khak hong tung man a hong pai nawnlo thak ka hi. Tuan a lai khak ka muh ni a pan in annelo tui dawnlo in asun azan in ka om niloh a, ka luankhi in tui bang hong tum hi. Nong itnate ka theih lai ziak in kei bang mahlo a ding a tutan nah in khua nong siitsak laite ka muh ciangin ki suanlahna ngen tawh ka pum dim hi. Ka mawhna hang leh ka pilzohloh na hang a tutan gimna na thuakna avek in ngaihdam kong ngen ngut ngut hi. Namai muh ding zong kei a ding in ki suanlahna tawh ki dim in ka gen ding zong ka thei kei hi. Hitan in kong gen ding dam ni genkhelh a om leh ki ngaihdam ni maw!”

Tualai amuh ciang in Salley in lawp mah mah na tawh avan teng mansa in ana ngak hi. Rakesh hong tung ciang in Salley avan teng tawh mansa in a om amuh ciang in lamdang sa in a dip akua hi. Apau ngam zosam omlo in tawl khat sung ki en tuah in amittui uh atak khe zung zung mai uhi. Atawp in Rakesh in nong ngakna asawtta hia? Cin dong in holim a pan thei pan uhi. Salley in zong Rakesh kiang ah U ka mawhna hong maisak in la, tuni a pat in na ang sung ah sam bang zal ding in hong pom maita in ci hi. Rakesh in kei mawhna ahi, ka damlo a pat in kua man hong ngaih loh ziakin nang zong hong ngailo ding ka na sa kha a hi. kei mawhna mah ahi hong ngai dam tei tei in aw. Tomcik bang mah leh zan hong sawt deuh deuh ahih man in Rakesh gen ngam khollo pipi in na kitenna uh kong uap ding acih leh hi adik nang tawh kit eng ding a hongpai ka hi. bang hang hian cih leh nong puak kei leh nong taan ding hi. Rakesh in dawng leu leu a, citak tak in kong hilh ahi. Na hinkhua a na nopsakna ding hong gen ka hi a, nu leh pa thumang nahlohpek ki ci ahi. Ka itna hong lak khiak sakin la, ei a pen sianlaitan loh ci mai ding ihi, puak siam in maw ci in kap kawm in a pau meuh meuh hi. Tua teng agen khit ciang in Salley kha ding in a car ah tuang to in a inn kong ciang ah ava kha hi.

Salley innsung lam ah lut nawn tuanlo in azan zan in Train station lam ava ma nawh hi. Zainkal in Mumbai lam zuan in apai mang ta hi. Train a pat akum khiat phet in suamhat pawl khat in ana man uh a, Tua amat ni pen uh Sunday dak 7 ahi ta hi. Sun day zing kal lamin Rakesh mopawi sim ding in ava kuan a, innsung ah kua mah ana om kei hi. Salley pen tai mang hiam ki that hiam hi ding in a gingta hi. Tua ahih man in azong ding in a kuan khia a, Delhi sungteng a zong suak hang in amu zo kei hi. Atawpna ah NEWS aki suah hong mu kha a, sum tawh tat theih ding in suamhatte khut ah aom lam hong theita hi. Tua thu azak ciang in Rakesh in Mumbaio lam va delh pah vingveng in Sum tawh Salley ava tan khiata hi. Inn lam hong tun phet in Salley pate’n Rakesh in a pii mang ahi cih ngohna hong nei uhi. Policete khut ah pekhia uh a, vuakna eawh thu a dot hang un Rakesh in dawng thei truanlo hi. Policete in Rakesh khah khiat ding sawm uh a, himahleh Salley pa in a nak gen luat ziak in Jail ah kha nih sung a khum uhi. Khanih zohin Rakesh jail a pat hong pawt nawnta a, Salley in pasal ana nei tuan nailo hi.

Ni khat Rakesh kholai hong pawt leh ni dang lai a, Depawali ni aki sualpihte un Salley akaih uh hong mu khan awn hi. Aheh suak lua ahih man in suh ding in aki sak leh anungaknu temta tawh ana dawt man ta uhi. Aman zong a car kong hong in nak pi tak in tai phei a, Salley om na atung ciang in anu ngaknu ana si man ta hi. Aman zon tua tem dok khia in migilote khat a dawt le dawt khalo in, amah anung lam a pat in mi khat in khetbuk khat tawh ana khen ahih man in atuk pah hi. khen kha hoih mahmah ahih man in tua mun ah amah zong asi suak pah hi.

Amau gel sih zawh in Salley pa in hong tuak nawn leu leu in, Policete tua migilote hong man sak in damsung jail a om ding in a khumsakta hi. Rakesh leh Salley kua mah hal zoh nonlo in tunglam ah mopawi nuamtak aneita uhi. Amau gel ki itna sihtheihna in zong khen zo nawnlo in leitung noploh dan thu khong gen in a nui khawm ta uhi.Rakesh in Sapliantak sem a, azi in ki-itna sang(school) hong in Asng inn lian tak leh Office liantak nei uh a, kua mah hauhna englo in nuamtak in khosa uh a, Gari thum nei in Khat pei khat nei, khat pei nih nei, leh peithum nei in, tapa melhoih khat leh tanu melhoih nih nei uhi.

Note: Hiai phuah tawmtangthu ahi a, himahleh bang teng haksatna I tuak zong in itna I khah suah loh nak leh abei thei hi mawk lo hi. Itna tak tak gamteng a hawm theih ahi kei a, Itna in I lauh beisak ahi. Itna lauh san I siam ding uh cih theisak ut na ziak a kong gelh khiak ahi.

THEITUAK: Zomkite movie bawlna bang ah leng kua mah I phak zoh nailouh ziak ua, hong khangtou ding te in I gam a khantouna tuam tuam hong neih khak ua leh, Lampi tuam tuam ah I gam kahng sak thei ihi cih ka hon han thon nuam mah mah hi……………….. AW LE;;;;;;;;;

©Siamsinna leh Vakiangbu