LOUTUAL PATNEEM' PHUNNA

~Vz Vualnam

Buh kung sumte tung a huih muut in
A langlang a awn diamdiam in
A niteng hun uh a zang uhi.
Amau pat ahi ua, tua bang hinkhua nuam asa uh.
Himahleh nikhat vaang in a taisanta.
Ahihkaleh vaang in naih hizaw hia!
A kung ua pan malkhiat in a om ua,
Kawlzaalpi sung a guan in a om uhi.
‘Bang hon loh na hi ua?
Hon koihkiik in. Hon khah in.
A miallua. Ka lau. Vaak ka ut.
Ka pouna ka kung mah ka ut,’
Chi in pat in sakhaupi a ngen nguutnguut a.
‘Dai dih. Hiai bang bangmah ahi kei.
Mailam a na tuah ding na thei hetkei,’
Chi in kawlzaal in a sal hi.
Hakvang a zalh in a om a, nisa a phou in a om hi.
‘A vaaklua, a vaaklua. Ka mutheikei. A salua.
Ka omna kawlzaal sung mah ka ut,
Hon thun kiik un,’ chi’n a kikou a.
‘Dai dih. Hiai bang bangmah ahikei.
Mailam a na tuah ding na thei hetkei,’
Chi in hakvang in a sal hi.
‘Ut ut, ut e ut, nang na ut leh kei ka ut,
Ut, ut, ut e ut,’ chi sunkam lai dai zikzik nuai ah,
Helhhawt in tua pat tuh a heekta a.
‘A na lua. Bang ding a ka tang toh hon khen?
Ka chii omlou in kei kia bang ka hia?
Ka kizalhna hakvang mah ka ut.’
Chi in helhhawt a hankhum a.
‘Dai dih. Hiai bang bangmah ahikei.
Tu a mansuah na kisak, na pun na’ng ahi.
Mailam a na tuah ding na thei hetkei,’
Chi in helhhawt in a sal hi.
A nitak in thal in a kaap ekek a,
‘Bang dia hon hichih tel na hi ua.
Hon hehpih ding kuamah omlou na hi umaw?’
Chi in pat tuh a kap huphup a.
‘Dai khemkhem dih, hiai bang mah ahikei.
Denchia na tuah ding na thei hetkei.’
Chi in thal in a sal leuleu hi.
‘Ka naak theikei, hon khah un.
Bang dia hon hichi chiip hual na hi ua?’
Chi in a kikou sawksawk a.
‘Dai tanla. Hiai bang bangmah ahi hetkei.
Denchia na tuah ding na thei hetkei.’
Chi in mui in a sal hi.
‘Bangtan vei thuaklai ding ka hia?
Ka guh ka taang zaangawp ding hilou amaw?
Bang dia hon hichi tahgawp na hi ua?’
Chi in chiampeek tahna naa sa in a hawk a.
‘Khatvei k’on tatlai dia, huai a tawpna ahi di.
Zingchia bang hong om ding hiam na thei hetkei.’
Chiampeek in a chi a.
A zingchiang in puan ze kilawmtak a suak a,
Nungak khat kawng a kivial a a omlai in,
Ahi, khosung a nungak melhoihpen’ kawng ngei a;
Miteng in a kilawmdan a phat ua,
A en ua, a zuut ua, ‘A naak hoih e maw,’ a chi uh.
Huchihlai in tua pat in tuma khawng a
A phun a akahnate hai a kisa phiing a;
A kung a pan alohlouh khaak di uh a lau a,
A phou ua, a heek ua, akaap ua,
A khuuk ua a gatlouh khaak ding uh alau peetpeet hi.
Ahi, huai mah tuh i hinkhua chiat uh ahi!
 
©Siamsinna leh Vakiangbu