KA NGAIHNOU KIANG A LAIKHAK
By ~ Thang Haulai Ffetg
To,
Ka sanlai ngaihnou,,
Ngaihnou
aw tu hun a laipek a na kiang a lai kon khak mawkmawk pen lamdang nasa
sim di maw? Phone tungtawn a kihou gige himah le hang, nidang a i
kihou dan ngeina lou in kihou in, thu tamlou kikum khawm le chi kahi.
Phone zang a thugelh a I ki hou chiang in kampau khum pipi iki muam sek
a, a chang chiang in iki hehsan ni le a om khasek hi. Huaite a poimoh
in a manpha kei ka chihna bel hilou in, lamdang sasim lah kipak kawm
ngal a na om na dia hiai laidal tungtawn a na kiang ah, thu poimoh ka
sak mahmah gen nuam a kon khak ahi. Na itna toh na lungtang tengteng le
tel in ngentel tak a hon na simsuak sak din ka hon ngen masa hi.
I
ki ngaihna le hun bangtan hiam paita ahih man in, ikal a iki zopna
khaugui pen khauh semsem leh hoih semsem in ka thei hi. Nang toh
houlung kup nuam in navak huai kasa a, na’ng le nuamsa nahi chih nang a
pan za kahih man in ka hon ngaihna pen nisim in a khang semsem hi. Na
omdan leh na kamsuak khum ngingei, na mit hah kilawmtak te kamuh a
kazak na a pan in, na hon it mahmah a, tu hun leh maban a hun hong tung
di te ah hon muang mahmah a, hon lamen mah mah nahih dan ka chian
semsem hi. Ken leng kei a pan nang adia ka piak khiat theih zahzah
pekhia a, nang a dia muanhuai a om ding in ka hon chiam hi.
Mi
sang zatam lak a pan in kei sese na hon it in na hon muang a, na tung
ah kaki pahna a lian petmah hi. Khat veivei in i mihing hihna in hon
pumluah leh hon thazoh mahmah ni te om ahih man in non it taktak a non
ngaih taktak a leh hiai thil kon gensuk te hoihdeuh in ana chiamteh
inla, nang leh nang dai ana ki kaihkhum din ka hon ngen hi.
Mihing
te pen iki kholh tam deuhdeuh, iki houpih mun deuhdeuh leh ki nelzawk
sem na leh ki zopsem na piang a, iki houlim na apan in, banglam sem ut
a, banglam in a lungsim la hiam? chih te leh i vei mahmah thilte
theihtheih in om hi. Ei tegel zong ki houtam ta, ki thuah tam ta i hih
man in, i ki naih semsem in iki nel semsem hi. Ngaihnou aw ka hon it
ziak leh kon ngaih ziak a , nu leh pa le hi nailou pi a kawi a hon tawp
ka sawm khak a leh ana kiveng in aw, lauhuai kahi. Huai hun chiang in i
omna mun a pan in hon paikhiak san in. Nungak leh tangval i hih lai a,
kikawi a ki tawp chih pen khelhna hikei mah leh,khelhna hon tunthei, a
meikuang hon pansak theitu ahi uhi. A kuansak di leh di louh di pen
nang tung ah hong ki nga lian mahmah ding hi. Huaihun chiang in, a
khonung a meikuang phelhmit sawm sang in hon halsak dah vet mai in. Mei
in a hal khak thilkhat peuhmah a ngeina batsak theih hi nawnlou a,
zong i pilvan kei a leh haltum dimdem man thei lai hi. Hehpih tak in
huchi bang hun hong tun khak zenzen a leh hon halsak dah vet inla,
huaimun apan hon paikhiak san pah mai in. Nou numei te leh kou pasal te
kibang mahmah lou i hi uh. A tangpi in numei te’n kikawi chih khawng
ah ngaihsutna dang nanei kei ua, kou pasal te’n s3x lamlam ana ki
ngaihtuah man khanak hi. Na hon it taktak a leh, kei leh midang apan
in dai kikhung inla, huai dai pen zong kem in humbit ngam in. Non it
ziak leh non ngaih ziak a, a hunlou pi a keikiang a non ki pumlat
hetlouh ding ahi. Pasal te’n dai kikaih khumlou, a huangsung a ut dandan
a lut theih zial zial numei te pen ki zahtak vet lou a, a tawntung a
tenpih ding in zong deihna khat zong ki neilou hi. Na hon it ziak in
nang kon itna leh zahtak na kon neih pen hon lak khiak sak ding in nna
bangmah hon sepsak kei in.
Na siang ah laitual ka hong
leng zeel a, nuamtak leh lungtai tak in na sungte mai ah hon zahpih
hetlou in non tutpih a, non ki kholhpih zeel ziak in le na tung ah ka
lung a dam mahmah hi. Nang ka hon ngaihluat ziak a biakinn a ki
khawmlou zen a ka hon hoh khak a leh, maitai tak in hon na dawn het ken
aw. A taisia , a kitam dek, a khaang lel lel pasal khat ngaikha nahi.
Kitam leh a neng te in nang hon suna thei a, hon liamsak theih ahih man
in hon na kipahpih kenla, ki vengsiam tak kawm in ka kitap louh nang
in hon veng hoih in.
Eigel chouh a hun i zatkhop zeel pen
manpha kasa a,nuam le kasa hi. Khat veivei eigel chouh in i pawt zeel
a, huaihun te ka ngaihtuah khak chiang in hampha kisak na toh, ka hon
itna a pung deuh deuh a, ka mai a nuihmel hon belhsak tu leng ahi hi.
ka ngaih aw, nitak a pawt di ka sawmpih khak zihzeh leh , non itna leh
ngaihna pen a langkhat ah koihkhe zual in la, na lungsim chiimtak zang
in hon ki ngaihtuah masa in. A poimoh hun a kon zot khak chiang in le,
nang chouh in hon mawk paipah ken. Na lawmte hiam, na sang gam te
hiam, mi khat bek hon tonpih teitei in. ei gel kal thu ki maituah a,
limtak leh hoihtak a kikup khop di a om chiang in, sun, khovak lai in
nou inn hiam ahih kei a leh restaurant khawng ah genkhawm ni chi in hon
hilh zaw in. Huai hilou a mun daih zikzek na mun, kuamah omlouh na
mun ah kon nget khak a leh a na pilvang ain. Sawmkholh ahih louh hang
in, sisan hatlai ahih ban ah mihing taksa ki polai ahi. Ki ven kan
omlou hi. Ka hon ngai mahmah ngal a, thilhoih ka tel khak louh hun in
nang ei a ding in hon tel in aw. Theisiam lou a ka om khak zenzen a leh
na lungsim ana vak kual sak in. I kikhen khak di nalauh main a ka
gengen non mawk pawng zuih ding zong hisam lou hi. Limtak in na
ngaihsun masa ding a, a san na hon dong lai ding a, huai zoh chiang in
non aw di leh di louh di thupuk na ana lapan in. Huai ka chih hang in
thil ka gen khempeuh mah non nial ding zong hisam lou hi. A poimoh hia?
poimoh lou, chih thukhentat siam na pen i hahzil hong kisam mahmah
ding hi.
Kei non khual siam mahmah a, ka lawmte lak a ka
zahlak ding zong na hon khual siam mahmah hi. Ka ngaih aw, na hon khual
ziak a kei a di mawng mawng a thil non hihsak te kei di’n manpha lua
a, na migit na hon chian semsem ing. Nang kiang a om ut a ka hon hoh
chian in leh kon pawtkhiak khak pih chiang in, na sapum ah dai ki
kaihkhum inla, na ki vatna, na silh leh ten te a pan in hon theisak in
aw. Kon maingal luat theih ding leh zahtakna kon neihtheih louh na di
tan a hon kivan lou ding in kahon ngen hi. Na kivatna te ah; niik siing
lua, khekol tom lo zozen a pheiteng dawk zozen thei te in hon kivan
ken la, khekol gaklua, puanak ngawng bak lo zozen leh, puansilh pan lo
zozen te in hon kivan kei hamham in. Ka mit a ka muh, ka kam a ka gen
khiat louh hang in, ka lungsim a hong om thil te, gen ngam huailou
thil te hikha thei hi. Huaiteng zong kei a dia etlawmpen na hih theih
na dia non hihsak ahi chih ka theisiam a, a langkhat lam ah kei non
khual a, na ki piakzohna thupi kasa lua. Nalh zaw na nalh lua a, himah
leh na kilawm het kei hi. Nang ka hon ngaituah chiang a na ki cheidan
te toh hon kilang khawm ding ahih man in, maban ah poi mahmah kha thei
ding in upna nei ing. Niteng a kon ngaihtuah gige khat nahi. Niteng a i
ngaihtuah gige thilte in i lungsim leh i hinna hon khoih kha a ,
thilkhat peuhmah ah ki lawpna hon tun hi. Huai kilawpna i neih te leh i
lungsim a i vei te pen alangtang a nasep khiatna in hon zui zeel hi.
Huai ahih man in ngaihnou aw, a hunlou pi a theigah loh utna, thanop na
leh kilawpna apan hon veng in. Numei etlawm leh zahtak huai kasak te
kon hilh diam? hehe..
Kei a dia a kilawmpen a na om ut a
leh maw, nahih sasa bang in honki zuun in la, ki susiangthou gige in
maitai na toh. Na kizep na ah aleklua thil te, atung a kon gen te dan
in omken la, makeup zang khengval lua in omkei le chin, na sakmel
maitak tak et in lawm pen ding a, na duang mawi leh nalhpen ding a,
zong na ngaih huaina hong pung semsem ding a, ngaihbaang pen ding hi
chia. Eh! Na sam sau ngihngiah na ki lawmpih mahmah pen kha maw, na tan
khak zenzen a leh le, tomlua in tan ken aw. Na sam sau ngihngiah toh
kilawm khawm kon salua.
Relationship i chih pen khat leh
khat kizopna hi a, ki hanthawn na leh ki dopsang tuahna in zat theih a,
ki kaihniam na leh ki suksiatgawp na in zong zat theih veve hi. I
malam hun ding saupi enkawm in i nih in kal suankhawm ni maw. Tu leh tu
in ki it leh ki ngaitak in i om a, kikhen ngeilou ding bang in i
lungsung ah kizopna nei mah le hang, kawlni in hon suahpih theih gige
thilte ki theilou sak kei ni in pilvang ni. I kal ah Pathian I omsak
ding a, i gen teng i za sak ding a, i thil hih teng amah theihpih na
toh sem ni.
Eh!... kon gen nop khat omlai, sau leh le poisak dah suk mai ni maw.. hehe
“Mihing
te ki itna pen chiklai peuh in beithei gige, tulthei gige a, Pathian
in hon itna pen tulthei ngeilou hi. Nihgel itna pen a kiam hun hong
thung thei gige ahih man in, Pathian itna pen ki kop pih ni. Huaiziak
in kei sang in Toupa it in ngaih penpen in nei masa zaw in la, kei sang
in muang zaw thamtham in la, kei kiang a naki piak sang in amah a din
kipe masa zaw in. kei thu sang in amah thu man in ana nei masa zaw le
chin,ka sanlai ngaih aw, nang a dia siam kahih nak a leh Pathian in na
angsung ah hon koih lo mahmah ding ahi. Kei toh i kal sang in Pathian
toh na kal ngaihkhawk in nei masa zaw in aw. Kei maipha sang a Pathian
maipha na zon masak zawk ding ahi. Hileh thilteng ei a ding hi taktak
ahi.
“Khovel leh asung a om tengteng Toupa thil neih,
Toupa a ahi. Leitung leh asung a teng mi tengteng le amah a vek ahi.”
SAM 24:1
*Kon itna pen hon ginlelh sak het ken la, Pathian thuchiam te muanzawk in nei in.*
Nang hon it leh hon ngai.
suanthang H.
©Siamsinna leh Vakiangbu
Comments
Post a Comment