ZAAN KHAT DAWIMANGPA' ANGSUNG AH..!!

Written By: K Lianthansang

‘Khuga Dam Sex Clip’ ziak a, Churachandpur Police Station in ana siat lawh banah hinna manphatak khat I mansuah nitaak uh ZO’ suan te’n theilai chiat di’n ka kigingta..(?) Huai pen gennuam kahikei a, ka thiltuah pen huaini ahi chih ka gennop ziak a ‘thumapi’ chihdan pian leh ‘eh huaini eive maw?’ chi a I theihsiam pah na ding ua kongen masak ahi……

Ani: 30th June, 2013(Pathianni/Sunday).

Pathianni biakna kikhop tawp in, Khominthang, NewLamka a lawmpa hong ‘kholaileng’ tou (kou inn Khominthang saklam chihna) a, huailai a ‘burning topic/hot issue’ tawh ki zawitawn deuhmai a “……’‘Khuga Dam Honna’ neih ahih zawh nunga, ‘Dam Leak’ chih mawk thil maktak ahi. Dam HONNA neih ma a LEAK ahih leh bel chillum tawh le valhtum haksalou deuh di hi a..!!.  I Gam ua Dam I neih sunsun uh, a mun a CANAL te vuak leak lou a, INTERNET tanpha a hong leak chiang in zaw…?” hon chih leh awm kasa mahmah ve…!!

Huchibang a, thu tuamtuam gen a ka houlim nilouh uleh, ann neek hong hun man a, ka lawmpa(Khupboi) kiang ah ‘’ann nezousa in paimai in..’’ chi’a ka khouh leh nidang a ka sawlzawh ngeilouh pa’n ka topic uh nuam salua ahi ngei dia, hon “aw” pah a, ann neek lai nasan in ka houlim nilouh kha uhi.

Ann nezouphet, lawmpa kava khasuk a, lampi a ka tailai nasan un leng, koilam a hong kipan a chih theihlouh in……..lawmpa’n gen di tatsatlou in anei den hi. Huchia lampi hoih lawlou a tuansuk pheuhpheuh in, ‘PT Sports Complex’ ka tungsuk ua, huaihun in khua a mialta. College Road tawn a tai kahi ua, PT Sports Complex gate kong lak(lampi kawina mun) katun un, mipi hon hongsuakkhe guih le uh kilawm a hong chiaktou noinoi kaza guih a, ken leng hungaih bawl in, kana khawl zozen hi (facebook khawng a Police Station lam naih di chi a kisam vengvung ua, huai a hoh dek te didan a koih kahi).

Huchia second 30 vel ka-om nung un, mi pauging di himhim zaak ahi nawn kei…!!. Bangteng hileh chi’a ka taisuk uleh, lampi kawina a ka suah uh tawh kiton in, ka mai lak a vom belbul hong taiphei zot khat kamu a(ka lawmpa’n bel mulou) gari brake man zot in, ka khawl kha phut zozen uhi. Ka kiim leh kiang uh ka et chiang ua lah bangmah muh di omlou ahihman in, gari start nawn dia kong kisak leh….gari chabi ka laakkhiat louh pi, lampi lai ah ana kesuk leulou hi.

Huaikia leng ahikeilai…gari chibi pen ah sisan ana baang mawk a, kakhut ka veel chiang in lah a kehna di himhim kamukei…lawmpa lah ama a pauthei pen, a daai sipsip tamai a..thil theih banghiam nei hi peuhmah di’n ka gingta gusim hi. Gari chabi a sisan nuulsiang a, taai dia kong kisak nawn ualeh…gari start zohlouh in hong om zel a…atawp a start zou sunsun, taai dia kong kisak uleh a malam tyre ana theep dekdok zel a, buaina khuukpi a kia zaw kahi peuhmah ve ua…!!

Uut leh uutlouh genlou in, ka gari uh chu mialnuai ah ka sawnthoh keuhkeuh mai uhi. Gari sawnthoh a ka pai laitak un; Class X kahih lai, School a Sports ka neihdek kuan ua, Complex huangsung a Physical Training(PT) dan a kava taai leh(field khangnung zawpen ahi ka taai na), field saknung zawpen a goal post kiang khawng a mi kitawm sauhsauh ka gaalmuh tou a, a pauging uh leng ki za tiptip hi. Kei le, lawmdi om chi a kava naihtouh leh kuamah muh di kanei nawnlouh lai khawng ka ngaihtuah khe dundun a, nung khawng bang zau huanhuan zozen in, deek sam khawng thou sungsung hileh kilawm hial hi.

Ka lawmpa te’ inn ka tungsuk ua, a sungte teng ana kikhawm ahi ngei di ua…innsung ana mial bekbuk hi. Detvaak theihtheih devaak ngal in, kikhawm tawp ka ngak kawm un, facebook mah ah ka lut tuak uhi. Kikhawm tawpnung bangtan hiam ka omlai a, paitouh di ka ngaihtuah chiang in ka lin mahmah mai..!! Gari lah sia ahihcia lawmte inn a nawtsiat ngai, khe a Complex gei mah tot-touh di hi zomah…!!

Ki pasal sak teitei in, ka paitou a…phone a lapawl neih sunsun khawng bang ka play tou hauhhauh hi. Huchia ka paitouh laitak in, ka mitsiik ah banghiam muh kon nei guih hi. Complex fencing lam ka etphei leh pasal naupang (kum 5 mi ding vel) khat fencing a kal(kah) sawm nilouh ana hi laizang. Ken leng vanaih ngal in, “bang hih sawm e, na inn uh koimun lak a nangkia hiaimun a na om mawk?”   chi’a ka dot leh en le hon en sese lou in banghiam chu a gen a, zachianglou kahih man in, ka laa play off dia kisa in ka phone screen ka en a, ka laa off khin, naupangpa ka et leh ana omnawn takei…!!

Lamdang tak zaw ahi, nulla kuak sung khawng ka zong hoih a, nulla pang a loupa (khuk tantan pha hiven) lak khawng ka zon leh…..ka liang hong ki beeng kauhkauh a..ka nung et leh vom petmah a vom khat ana hi a, a meel bel ka mutheikei…ka muh tuung in kei chia ahi a, kamuh tawh kiton in hong khang hulhul maimah hi. Huaihun chiah in zaw..tailou thei vual kahi nawnkei…

Zuktal bangmai in, tangtak a Pearson lam nga in ka kikhohtou a, hattai lua kahi ngei dia…bil sung khawng a ‘cyclone’ kipei bangmai in huih khawng hong kizial lut vitvit hial uhi. A lamdang nawn mahmah ahihleh, tangtak a taitou dan a ka kikoih hi zeen pi..Zenhang Lamka Haanmual ka tung mawk hi. Ka taai lai in bel huailam ahi chih katheikei.”...ahai zaw hizeen kei veng aw…hon pii khat om hidi hiveh..” chih khawng bel ka ngaihtuah a lah ka manglam abang heihuai maimah..

Ka omna apan, Police Station a te thawmging ka zapah a, thawmhau lua kahihman in, mipi lak ah vaki tel leh adan om inte chi’n Police Station lam ka naihtou hi(taitouh thoh hi zozen nawn). Police Station kong ka tung a, huaihun in nitaak sawtsim ana hita a, himahleh mipi bel asah mahmah lai…Pathianthu genna mun a kikhopna hileh bel mi teng paibei phial ta ding un ka gingta..?. Mi hihdan in ken leng ka phattuam ngaihna suah in, Police Station kong a foothpath bawlna di chi a sung kikoih-te Police Station huangsung ah kava lawnlut tei a, Police ten leng bangbang hiam hon kaap pawt uhi.

Lamdang kasak nawn mahmah ahihleh, Police te’ ‘Blank Fire’ in mi bangzah hiam kapkha in Damdawi Inn tut in om uhi. Blank Fire lou hileh bel siluang tam kikham mahmah di’n ka gingta. Ka gennop pen bel ‘Blank fire’ ahikei a, huaihun a kapkhak a om pasal khat focus deuh nuam kahizaw..Pathian’ thupi na I muhtheih khak ua, phunhaat I tawpsan theih khaak ualeh..

Huaihun a kapkhak a om tamsim mahleh, pasal khat(amin leh vengmin theinawn sese lou kahi) a lutung ah thautang in nolkha a, a luvun nengchik nawkkhe kha zek hi. Hiai in, “Inchi khat lel in leng sihna hontun thei a, inchi khat lel in leng hinna hontun thei ahi..” chih hon pawksak hi. Bang chidan in eita..? Huai a kaapkhak a om pa’n a din tomlua sa in, Pathian ana mawhsa khangei maithei(a huchi teitei di chihna ahikei)….himahleh huai nitaak apan in bel ‘Pathian in ahunchet mi tengteng honna bawl ahi’ chih theichian di’n ka gingta.

Ngaihtuah mah dih, Pathian in I sam uh a vom a ana bawlziak leng om di hiveh. Mitmul, lenuai mul chih khawng bohkhiat khen sese bang leng indirect a Pathian soisel na chikhat ahi. Pathian up-to-date sa nawnlou ihi uh hialeh…hon bawldan I kam leh omdan a I soisel pen un, hoihna lam sang a hoihlouhna lam hon tunzaw din ka gingta. Khedap tuulsang deuh bun te bang a neep tawp in gen leng, khengawng siik khep kha a damsung a poihlong det theih ahi. Mihing piansual kikheellou ahihman in, Pathian’ honbawldan piandangsak law lawmlawm nawnkei deuh leng a poilaw diam?  

Eh..ziltheih I neihkhak uleh chihziak in, thutuam daih sau kongen lawkha dek…!. Huai nitaak a buai vengvung laitak in, Imphal lam apan Commando-te hongtung tou ua, mipi-te hon hawldalh uhi. Keikia ka taaituam khanawn a, koilam man-oh a taai kahia chih kathei bunkei. Ka theihkhiat tak in, lupna tung a om kana hi maimah hi. Bang chidan a chih kateikei..Zaan Khat Dawimangpa’ Aangsung ah ana om kahi maimah a hia?.Innsung ka luutlam leng kateikei a….chi’n ka lungbuai mahmah. Himahleh, TU’N BEL KA THEIVEK TA….!!

Theihtuak Kasak Khenkhat:

• Khuga Dam pen Multi-Purpose Project himahleh a zatdaan siam ni.
• Leitung a Dawi leh Kau kichite Jesu hongpai nawn matan omden ding ahi uh.
• Tulai a Dawi in a pii kichi te a omthei mah ahi. Pathian thu awilouh ziak ahikei.
•  Pathian hon bawl dandan ah lungkim ni, Indirect a Pathian soisel hihkhak di lau ni.

“TANTAWK A LUNGKIM DAN KISIN IN, HUCHI’N KHAWVEL A MI NUAMSAPEN NA HONG HI DING HI”

2510 – KAKIPAK – 2014 

©Siamsinna leh Vakiangbu