PANGPALEEK LEH MIHING

By ~ Vz Vualnuam
 
I ngeeklai un
Mihing i hi ua;
I naupan un
Mihing i hi ua;
I pichin un
Mihing mah i hi uh.
 
Himahleh pangpaleek;
A ngeek in lung ahi a;
A naupan in awl ahi a;
A pichin in pangpaleek ahi phet!
 
Ei leng i hi.
I meel khengkei mah le’ng;
Lungsim leh ngaihsutna ah;
I khang dungzui in
Meltuam chiat i puu hi.

Naupang’ ngaihsutna;
Khangnou’ ngaihsutna;
Piching’ ngaihsutna;
Amaute muhtheih hileh
Lung, awl leh pangpaleek bang in
Khat hi na pi in
Meel tuam chiat a pu ding uh.
 
Kua’n lung peuh
A khut in a tawi ut dia?
Awl in bang kilawmna
A nei mahmah a ahia?
Himahleh kua ahia,
Pangpaleek kilawmna phatlou ding?
 
Naupang in kilawm sa in
A khut a tawi ut in
Adelh-adelh a;
Himahleh lung amuh in
Lau in a kihemkhia!
Tu a lau a ataihsat
Den chia’n deih in
A delhdelh ding hi.
 
Naungek pahtaakhuai i sa a
A biang peuh i eu sak.
Khangnou’ kilawmna
Enlahlou kua a om dia?
Deih tuntun in i delh,
I man a,
Ah, bang dia a kilawmna
Hong tul maimah a hia?

Hiai ah i kilamdanna a om-
Pangpaleekte zaw
Hoihlou apan hoih a suak ua,
Ei mihingte zaw
Hoih apan hoihlou i suak hi.
Himahleh kuapeuh in
Ngaihsutna’ meelpuak muthei a
Huai’ kilawmna mu a ateel leh,
Huai kilawmna a tulkei ding

©Siamsinna leh Vakiangbu