KHANGNOU' ITNA: BANG I LOH DIA?

By ~ Vz Vualnam
 
Tangval dia na hong kisak chia’n;
Ahihkaleh nungak ding a;
Itna’n naaktak in a hon buan ding.
Patau ke’n la, lamdang sa ke’n.
Ngeina ahi.
Himahleh pilvang in!
 
Itna a hong kilaak baih a
A koldan i theihma’n a hong suak.
Khenkhatte’n bang chichi hiam in
A khoizual thei ua;
Tampite’n khoizual zoulou in
A hinkhua uh a tokbuai gai.
 
Itkei le hang lah
Mi banglou hi zel di hang a;
A hunphet theikei le hang lah
I hinkhua hon tokbuai gai dia;
Bang loh mahmah ding i hia?
 
Khangnou lai a itna zaw
Nisuah kuan a nizungte’n
Meipi hon kaapvaak bang in
Ngaihsun in.
Tua vaak kilawm na sa maw?
A kaapvaak tu a ni mahmah
Hong suak lai ding akei maw!
 
Itna chia na delh zaw
Hawktui luan ging za
Hilim teh!
Tawltak a na delh nung in
Dawnlouh ding pi
A na himai mah!
 
I khangnou lai in
It mah ni;
Himahleh huai hun in
Itna sang a awlmoh zawk ding
A omlam mangngilhkei ni.
 
Hiai hun a i pilsiam a
Itna kituah mangsaklou a
I hinkhua ding i bawl leh
Mi khat i suak ding hi.
 
Himahleh hiai hun a
Itna kituah mangsak a
Thildang himhim i limsak ke’h
Hinkhua a vuallel in
Vual leh paai eng in
Hinkhua i zangden ding hi.
 
I khangnou thahaatlai in
Itna kituah mangsaklou in
I mailam hinkhua ding
Geel zaw ni.
A huchih ka leh zaw
Hawktui bang in a hon tuah dia
Buannawi lak ah
A hon nuse ding!
 
I khangnou lai in
A phatuam ding thilte ah
I lungsim leh tha seng ni.
Tu in it mankei le hang leng
Den chia’n i it man law na ding.
Itna lah lungtang’ a ahi a
It ding in a teeklaw ngeikei.
 
Himahleh khangnou lai in
Sin in semkei le’ng
I thate hong ke ding a
Sin a sem thei nawnlou
Ding hi hang.
 
I khangnou itna
Atawp tunglou thei a
Himahleh sin a i sep khempeuhte’n
A tawptan hon tun ding hi.
 
Bang i awlmoh zaw dia le?
A kikheel theilou itna maw?
A kikheel thei sin a sep maw?

©Siamsinna leh Vakiangbu