INNKUAN AH KIK NI

By~ Zo Lander

INNSUNG pan in zingsang phalvak in napawt a,biakinn ah khitui kekawm in na thum a,na haksatna,chidam-ludam,nek leh taak zonna a lawhchinna na ngen a,phungvuh in na om a,nu lawhching ,pa lawhching,tate kankuah zou chi in miteng in hon thei uh.Na tate na it mahmah a,amau a ding in sun nisa nuai leh vuahzu daikai nuai ah azu aham thuak in na diang a,na sumbuukte a luun a,na mehzuakte na khawng a,na bussiness a paifuh mahmah a,na sepna ah na tuitum a deihsakna ki suangsawn natang a,kaikai tuan leng ngailou in na om a,nahau a,mi tampi ading in enghuai zi/pasal/nu/pa manpha himah lechin na lungkim nadia kalbi masapen na innsung a kuangzak ta hi.Khosak nadia na ngiim leh na gintak pipen -sum hauh a,mite toh tehkim a om na lunggulh hang in na innsung a na goumanpha na tate a vakmang zawta uh.Chingtu neilou belam bang in pai nading a theikei ua,khem leh thanghuai na chiteng a tuakta uh,na lamsuahsa neih-leh-lam khamzoulou in mite enna lungsim toh akidim den ua,kam a ne a taw a pawt mai hilou in mi neksik laksuh in kholak ah gen-leh-sak in GUTA in a om uhi.

Hilhlouh tapa nei lah nahi kei a, bilvuhlouh tanu nei leng nahi samkei,ahi inzaw a pilna dingzah ua poimawh itna,taihilhna ,deihsakna kampaute a hilh manlou a sum kia ngaisang a pusuak tamzaw nahi khading.A hon ngaihlai un sahkhua/khotang vai in na pawt sansan a,a hong piching ua nang natek a,na chim hun a amau nangaih hang in amau nang sang a ngaihzawk aneihtak man un na khouzou takei.Na tate mi tate toh na tehkak a,amau tate huchi ua ,kei tate huchi sese uh chi in na lung ake vungvung ,endih nu/pa...mi tate ann nekzah leh nang tate annek zah aki bangkei,mi tate duh leh nang tate duh leng aki bangkei,tehkhin sedah mai in,mi tate tui duhzah leh nang tate tui poimawh zah aki bangkei,na tate poimawh zah thei in,na tate theisiam in ,innsung ah kik inla kipahna a poimawh zah uleh itna a poimawh zah uh suizui inla pia in,vailak zunthak bang a muhtawm beitawm a kangpah a a omsang in a om bangbang ne a,ngolh angaih hun a theisiam tak a innsung khat anuam a haksa thuakkawm a ki houlim diamdiam kan a thupi zaw a om dia hia?

Endih hiai bangte maw pilna ahi nachih ?Sum ahi a poimawh pen,sum in thilteng a leithei na chih,sum neileng mite'n hon zahtak ding na chi a ,enve tu in zahtakna koi ah namu a le? kholai a HERO,innsung a ZERO maw natel zawk mai ding?Miten na sum hauh ziak in thu nagen teng in alu uh sungaungau mah le uh na innsung ah na thugen hun in kua a hon thulak ?Thu nagenlouh hun -na omlouh hun a na tate aknguai bangmai a lusu ngaungau uh hilou hia?na gamlat hun in na tate zalen kisa in akham ua,a thangtat ua,lu-leh-taw phawklou in a om ua,natheih hun in na pona a akikhel tampi a suakta. Na thugente diksa a akhonung a lusu uh hidin na um a hia? Na innsung ah nagen dingteng kholai a hotel munte,bazar lai,biakinn sungte ah vagen bei pahpah na hikha ding.Gendia seh Pastor leh Upa ten a genna ve uale..thuhoih thei a bangziak a na tate kiang a zuaklou a kholai a zuak nahia? Mitate hoih nadia na tate siat poi salou khop hial a hai teitei ding namaw?

Na mawhpuakna innsung zoulou in khotang na vei zaw maw? Gam-leh-nam navei a,ngolvei sungkuan,nu inlah sahkhua ngolvei pih,pa inlah sum,khotang leh politics ngolvei pih,tate'n lah khamtheih ngolvei pih in khasetak in na omta.Khotang kilchih na dapkual a,na musuak vek a,himahleh na innsung a GU ki selgu namu kei,na tate sakhau sung a MIBATLOUHNA damdawite leng namu kei,na tanu/tapate toh phone hoihhoih tawi naki khel ua,a sung a kamkei kual-lim hoihlou leh hukna kiselgute naneih uh aki bangta,na uptodate a,a leak thakthak na tate sangmah in na neibaih zota a,tu in endih na tapa in a sanggamnu vuaktanna zumtak in a en a,na tanu in a sanggampa selguk gige a zahmohpi a muta,na zi in na khoval dan a zamun a,na pasal in nang sang in huainu zei asa zota.

Nupi sia nahih nung in naki cheithak angaita,papisia nahih nung in na papi na na mangngilh ta,tangval bang in ki fuhsak tak in naki khoh faufau a,innsung ning in taimawhna teng ah natai a,milak ah nazi nava dem a,na pasal na gensia a,na tate kholouh dan kikum khawm in tangsang lam ah nava thum a,en dih pathian in nathumna aza na hia chih na genchiang theikei,na thumna gimlim a sangtaak ahi kei a adiam dawnna namuh louh ?Na thumna in inntung lel leng kanlou a atunna ding tunglou ahi kha ding .Tangsang lam ah pathian a tam tuankei..kik inla aza ding na tate,na pasal,nazi leh innkuante omna innsung ah kik in,azak ding un na khasiat leh awlmawh na zahzah khitui kekawm in thum in,na innkuante mai a khetbuk toh thuhoih gen a na hangzak phomphom sang in tua azading na awlmawhte zak a nathum in gen anei zoding.Na gou omna en in,na innsung sang in na bank account a manpha zaw nawnkei,na tate hinna humbit lou in maw khotang sung a genthei na chihte na humbit sawm zawk?Nang innkuan saifel lechin amau hongki tungding pah mai ding uh ahi.Khotang naa nasepna a na kuahguk tengteng ziak a amau tanding tangbanlou a zawng uh hizaw ding eive.Na fund saikhiak zah sang a na kuahguk a tamzawk ziak a khotang sia hilel eive.Mihing gentheite tung a summet bawl naki sak lai in na innkuante DAU leh Vualzawlna natan ding teng zuak hizaw ding nahi.

 

Khotang hoihna ding in huipek apan tutan kholai ah ina tangkouta uh,gamsung veina ,sahkhua veina leh ngolveina chiteng tawh panlak nung in siatna in I gam,inam,i khotang leh saptuam a neksiat behta .Khotang,gam leh nam thoveng a piantheih nading inzaw kikhawm a thuhoih kigente nang zak di mahmah zaw hia chi a kikawkmuh hun ahi nawnkei,Khotang hoihna ding in Toupa ,toupa chi a nangvuak a kahkah hun ahi nawnkei,na innsung na Pathian thutheih bangtak toh kituak in pi inla, gamtang masa lechin na tate'n a leitung pathian uh(nu-leh-pa) it in a zahtak ding ua,van a Pa ngeileng a zahtak ding ua,nukhat pakhat hong hihhun unleng a muanhuai ding uh.Innsung enthak ni...innkuan ah kik ni,michih in a innkuan a thuzawh a bawlhoih hunchiang in gamsung a thoveng dia,khotang a siangthou ding a,i gam a changkang dia,gamdang leh mundang a pilna leh hauhna zong a vialdiang a kuul nawnkei ding .

BEITA

©Siamsinna leh Vakiangbu