A TULLOU ITNA
By ~ Paumuanlal Guite BaBs
Sunni tumkuan lenmui hong kai chiichiaita a, huchi'n Muanpu leng loukuan innlam hon zuanta hi. Inn tungphet kihahsiang a, ann ne in anekzoh phet in Tuailai pawl lazilna ah kuan ding in kisapah hi.
Muanpu ahihleh a pa sihsan nung sawtlou a anu'n pasal dang a neihsan ahi a, a papite'n a etkol uh ahi. Laisiam mahmah hinapi in skul kai zou nawnlou a, mite simmoh tang in utziak hilou in lou lam akuan gige angai hi. A lawmvualte skul kai dia kuan diamdiamte amuh chia'n englua ahihman in mi skul kuanma in lou lam a zuan gige hi.
Hunte hong paizel a, nikhat lazil atawp un a khua a ahausapa uh tanu hawmthoh leh melhoihtak mai Kimte in "UMuan, khatvei bek non pawtkawm in honkha ve.." chi'n zawn a, Muanpu leng kiguih zozen in "hitham e Kim.." chih toh zuih a thuah ngal hi. Chikmah a akinep phaklouh ahihman in Muanpu a kipak gu mahmah a, Kimte te inn bang tungbaih a kisalua hi. Kimte-te inn alut ua, gintak mah bang in Alex leh a kaih zatamte Kimte ngak in ana tu neinai uhi. Muanpu in kisuanlah huai asak nakkal in Kimte nu'n Muanpu ana khentuam mahmah zomah in a tanu toh Alex a tukhawmsak sese lai hi.
Muanpu ahihna kithei mahmah ahihna toh pautam selou in tutna nawlkhat ah dai dide in ana tu hi. Huchihlai in Alex leh alawmte'n simmoh bawltakin "Muanpu na puante le kumtam silhna chia, puanthuap bang na siamta mah ding maw, athak konpe diam..." peuh chihkhum uhi. Muanpu in bel ana nuihsan lel a, a dawng vetkei. Hiai bang kampauten Kimte in Muanpu ahehpihna liansak deuhdeuh a, Alex ahuatna kibehlap semsem hi.
Alex ahihleh Muanpu nupi toh unau ahi ua, khamtheih a sumdawng ahihman in a hausa mahmah hi. Aman Kimte tankhak teitei sawm in asun-azan omlou in veh den hi. Ahihhang in Kimte in bel ahihna thei chiang lua ahihman in a deih hetkei hi.
Nite hong pailiam zungzung a, kigen tuah kei mah le uh Muanpu leh Kimte kal a itna a khang semsem hi. Himahleh Kimte nu'n deihsaklou lua ahihman in kimuhna ding hun ahau hetkei uhi. Muanpu in hunlem amuh teng in Kimte kiang a a itna thu gen tumzel mahleh a pianna tualniam lua kisa in a gen ngamkei hi. Himahleh a itna lian deuhdeuh ahihman in thuaksiam haksa asa mahmah zel a, bang a pasal chi'n kipat sawmzel mahleh a sansi in a ngam zoukei.
Muanpu hichi bang a om ahihlam theisiam mahmah hileh kilawm in nikhat Kimte in a lawmnu Mawite tungtawn in kimuhna ding hunlem hon bawl hi. Muanpu leng kipah leh dipkuat thuah in Kimte genna mun lam manoh in a pawtkhe pah vengveng hi.
Muanpu amun a vatun in Kimte ana tungkhin hi. Muanpu leng kisuanglah sim in "Kim, kon zekai lua a ngaihsiam aw.." chipah a, Kimte in leng "UMuan, poilou, sunnitum hilele nang ngak chu haksa ka sa kei ding..." chi'n a nuihmai kilawmtak asuah hi. Kimte in a Umuan mit hah etlel in leng kisit mahmah ahihdan thei in "UMuan, na lungsim a om penpen hon gen mah.." chi'n dong a, Muanpu'n leng kizumpih simsim kawm in "Kim, nangkia na om..", "Ahihleh Umuan, bangziak a kei kia omkha ka hi ding.." chi'n nui hiuhiau kawm in dong thuk hi.
Muanpu leng kingaihtuah deudau in a tawp in "Kim, kon it luat ziak himai inteh.." chi'n aw liing pelhpelh kawm in gen a, Kimte in leng "UMuan, huai na chihkal haibang na ngaklah lua ka hi..." chithuk in khovel a midang omlam leng phawk nawnlou khop in a kipom chenchen uhi.
A kiguk ngaihdante bang uh sutkhawm ua, akal ua palbang nangtu za in tam ahihdan leh melma zalai ah khuambang kip a buanlei suakdong chiampellou din tongchiam uhi. Huchia nuamtak a a omlai un apai uh ana hun gawp man a, amau leng ginom gige ni chih toh siang lam zuan in a chiahta uhi.
Mualliamsa hunte sang in Muanpu le Kimte zatamte melmuh in hong kholkhawm tam zawta uhi. Huchi'n Zomite chiindan bang in a langlang ah mite'n kingai uh ahihdan hon genthang vengvung ta uhi.
Hiai bang a thu hong thang vengvung pen Alex leh a lawmte banah Kimte nu a din zak thadah huai mahmah hi. Huchi'n Kimte nu'n leng Kimte pawtkhiat ding banah Muanpu toh a kimuh ding uh khaam bikbek a, lazil nasan in kuansak nawnlou hi. Tuabang mah in Alex leng heh mahmah ahi ding a Muanpu enkoltu a nupi (Alex sanggamnu) kiang ah Muanpu lungsim sia, a itpen nasan tuhsak, a huatdan thu naktak in vagen hi.
Muanpu nupi in hiai bang thu a sanggam ittak apan azak chiang in a hehtha suak mahmah hi. Huchi'n nikhat a pasal khem in Muanpu deihtak in house zialzial a, a van teng pawkhia a innsung apan pawt ding in thu peta hi. Muanpu papi inlah a nupi thuthu mang ahih chia'n hut malak a hehsan zomah a, hiaitan kon etkol nung ua nang kiphasak lai maw chi'n chiangpum khat toh a soisa gawp hi. Muanpu khase mahmah mahleh kipasal sak teitei a, a nupi sawl bang in a vanteng guang in a it a ngaihpen Kimte le a nu le pa lubuk phumna khua nawse din kisata hi.
Muanpu'n a van teng a guanzoh in a papite kiang ah tutan a ompih uh kipahthu gen in inn apan a pawt kheta hi. Thakhat thu a pawt dia sawl ahihman in paina ding mel a theikei a, alou lampi uh zuan in apaita hi. Lamdung a akhote utoh a kituak zel a, a vanteng pua a lou lam manoh ahihman in mite'n lamdang a sathei mahmah uhi. Amel etmai in leng a nguimel in lungkham mahmah ahihdan a theimai uhi.
Alehlam a Muanpu tanchin a lawmnu Chiinnu apan Kimte in ana zavek a, pawna lua in a kapkap mai hi. Alex lah Muanpu om nawnlou chi'n kiphausaktak in om lanlan hi. Ahizong in Kimte in a lungsim siatdan toh a huatna pung deuhdeuh a, amel himhim leng enpeih nawnlou hi.
Muanpu leng pailiam vengveng a, a lou uh atun in a niteng hunzatna ahihtoh ngaina mahmah ahingei dia a vatawlnga hi. A lam paina a gil kiallua a a omkhak ding lau ahihman in a lou kiim ua kawlkai khawng amuhsun kaikhawm in a kawlzal ah aguang hi.
Sun ninem vel in a loubuk apan kipankhe nawn hi. Gammang lian taktak hong tung a, khua in leng a mial khumta hi. Meivak lah neilou ahihman in gammang ah a giahmai a ngaita hi. Singbul khat hahsiang in huai ah a tawlngata hi.
Khua hong mial deuhdeuh a, vuah bang hong zu zomah hi. Muanpu'n lah puanlum leng neilou ahihman in a liing keuhkeuh a, ihmut leng a ihmu theikei hi. Huchi kawmkal a thawmging lamdang pipi bang aza a, a paam khawng a singkungte bang a sawitu om hileh kilawm in a kallak in a liing zungzung zel uhi.
Huchibang a gamdai a thawmhautak a a omlai in Muanpu lungsim ah a nu leh pa mel bang hong lang dundun a, a maban ding ngaihtuahna toh, a nu leh pa itna toh, Kimte a ngaihna toh kidek zoulou in a mittui luangkhe zungzung hi.
Zingkhua hong vakphet in Muanpu leng kawt nimnem sa in kipankhe nawn hi. A gil kial mahmahta ahihman in a kawlkai puakteng a negai hi. A tha chau gawpta a, a lam paina a gim toh Muanpu mel adaang kikeuhta a, a bah mahmahta hi.
Haksatak a bangtan hiam a painung in khota khat atung hi. A innte a en velvel a, huaite lak a ana hoihdeuh khat ah a valut hi. Innsung ah nupi khat leh pitek khat ana om ua, Muanpu'n leng a gilkial lua ahihman in ann vangen hi. Himahleh nupi nu'n "kou ann neilou, innkong a ana om aw.." chi'n hangsan zomah hi. Muanpu leng kisuanlah toh zum thuah in innkong a pawt ua, a innka ua khuambul a tu in a kingai hi. Huchia mangbang tak a a omlai in piteknu hong pawtkhia a, ann-khal nih Muanpu apia hi. Gilkial laitak ahihtoh Muanpu a kipak mahmah a, bangmah kallou in a negai pah hi. A tha bang omtuam in nuam a satuan mahmahta a, malam suan ding a lunggelta hi.
Mailam nawt din Muanpu kisakhe nawnta hi. Koi khua a pai ding ? Kua kiang pansan ding ? Bang hih ding ? Chih himhim leng theilou ahihman in a buai mahmah hi. Khepi ngatna lamlam zuan ding chih ahimai hi. Lamkal ah lui bang amuh chia khawl tawldam zel in awl in apai nilouh hi. A khenchia mual a kaltou, a khenchia a suk bekbek zui in haksatak in mailam a zuanzel hi.
A lehlam ah Kimte leng Alex te inndongtate'n va hel uhi. Anu'n bel lem ana sapah a, himahleh apa'n a eithu kia hitheikei, amah a neitu ding pen Kimte a kingap taktak na hiam kong kan masa ding ua, huaizoh chiang in athu omdan genfel pan ni hang chi'n ana kiksak hi.
Muanpu leng gilkial dangtak thuak in hong paipai a, ama nitak bang in gammang lak a khua in mialkhum ahihman in lin mahleh a giah mai a ngaita hi. Giahbuk dan khat bol in nahtang teh phah in alum hi.
A kiim akiang khawng a sa hia bang a theihlouh a gamlum mahmah man in a ihmu thei hetkei hi. Muanpu leng bangchi mahmah hiam chin zuntha kawm a va enkhe ding in a thoutou hi. A pamdeuh paipan chih ding in thau hon ging a, a dinna mun apan Muanpu a puksukta hi.
Kimte ngei leng apa'n nikhat samtuam a, "Bawi, Alex te'n hon hel ua, bang na chidia, na kingam diam ? Na nu leh pa'n bel a neihzoh toh hon deihsak ka hi uh.." achi a, himahleh Kimte in, "Pa, ka hawkei, ahihhang in ka ngaithei hetkei. Huai chia pasal nei din naupang ka kisalai a, ka ngap naikei.." chi'n a dawngthuk hi.
Kimte pa'n leng dawngtam nawnlou in a pawtkhiatsan hi. Kimte in bel Muanpu a itna khauhsak semsem a, nikhat tei kimu nawn a, kiteng thouthou ding chi'n a maban hun ding a suang tuahtuah zaw hi.
Muanpu leilak a lumsuk hong thoukhia a, a etleh a khe a sisan ana dim hi. Papi nih in delhphei ua, Muanpu amuh un gamsa sa a akap uh mihing ahihlam phawk ua, kisuanglah tak in om uhi. A zawnna ding bawl in Muanpu damdawi inn a puak hong sawmta uhi.
Dakkal thum bang a paizoh un khopi liantak Lamka a tung uhi. Kintak in damdawi inn zotpih pah ua, a kapkha tupa'n a tanu khat leh a tapa khat a ompih din sampah in a ki-enkol uhi. Doctor leh nurse te'n a khe a thautang taang lakkhiatsak in a tuamsak uhi.
Niteng thukizakna tuamtuam ah Muanpu tanchin kisuahvek ahihman in innlam ate'n leng ana theivek uhi. Kimte ngei in leng atheih phet in om theilou a, a room a lut in a lupna tung ah akap nilouh hi. A ngaihtuahna ah vadelhsuk a va ompih mai sawm a, huchi'n a nu kiang a Lamka zin ding in kingen hi.
Himahleh anu'n Kimte tup nak theihlaw mahmah ahihman in a phalkei bilbel a, "Alex toh kiteng unla na nih un vaveh ve ua, huai tagahpa kiang a paisawm na hih lah ka theihsa.." chi'n a enghou zomah hi. Huai in Kimte a khasesak semsem a, a Umuan a itna lian semsem in dal vuallouh mittui in a tuum nawn hi.
Muanpu kapkha a enkoltupa ahihleh Pa Thang, Officer pension, mihoih leh mi hausa mahmah khat ahi. A ngaih tuahtuah chiang in Muanpu gammang lak a amah kia a a om mawk lamdang sa in Muanpu hinkhua tengteng akip-akawi in a kankhe vek hi. Muanpu hinkhua a theihchian hehpih deuhdeuh a, ama hinkhua toh zong kituak mahmah ahihman in a dam hunhun a inn ua ompih a mikhat suah ngeingei ding chih a tum tinten hi.
Muanpu leng hoih gawpta ahihman in damdawi inn apan a pawtsakta ua, Pa Thang in a inn ua hoihtak a kem in a enkol a, a limlim pia ahihman in Muanpu'n leng nuamsa mahmah in a mel bang leng kikhek sot mahmah hi.Muanpu in leng damlam manawh deuhdeuhta hi. Himahleh a khe pen a ngeina bang in om thei nawnlou ding a, chiangkhun toh a omdet ngai ding hi. Huchia pawt khezou zaw deuh a hon om apan Pa Thang in skul khawng kaisak thak in achiah-akuan gari toh kha in pii den hi.
A kholam uah zankhat Kimte pa khualzin kal in anu toh Alex pangkhawm in ana kitengsak uhi. Kimte utlou in kipekpek mahleh pasal tha zoulou ahihman in mittui tampi toh Alex zi ding in a omta hi. Khomi tamzaw in thil paidan thei mahmah uh ahihchian Kimte a hehpih mahmah uhi.
Kha khatvel painung in Muanpu bazar a hohna lam a Kimte lawm Ngainu toh va kimukha uhi. Ngainu in thil omdan teng a gen leh Muanpu in pawna mahmah a, bazar lai chih omlou in Muanpu leng a mittui in a pumtuamta hi. Ngainu in lah hih ding dan theilou in a lawmta un a kikah khum uhi.
Nitaklam ann leng ne zoulou in Muanpu a lupna ah a lumden hi. Zankhua in a kingaihtuah den a, vangtah din leng vangtah sawnsawn hina ing e maw !! chi'n kua mah muhlouh in a kidiikdiik mai hi. Hehnemtu ding lah omlou, leitung haksatna tuangnungsiah a khapham mai bang a ut hi. Kimte leng a pasal neih apan ann nangawn duhlou, a kahkahna in a melteng segai a, a gawng hiaihiai hi. Nitak teng alah a pasal zukhamsa a pai, vuak thuakden zomah ahihman in a hinkhua genthei a kisa mahmah hi.
Zankhat zukhamsa a Alex innpai, athu omloupi a heh mawk in Kimte hon vua hi. Hah vuak kha deuh ahi ding a Kimte mit langkhat a sia a, Lamka damdawi inn kintak a zotpih a ngaita hi. Kimte lah kap leng kap khe zou nawnlou in zoi dildel in lupna ah a lum hi.
Lamka damdawi inn hong tunpih chiang un Doctor te'n a mit tang kisia ahihman in a mitdel ding ahihdan ahilh ban uah mit hoihlai khektheih ding na muh ua leh a hoihkik thei ding chi'n hilh uhi. Hiai thu in Kimte sungte a lungliap sak mahmah a, Kimte nu ngial bang a thilhih kisik in a kapkap mai hi.
Hiai bang a Kimte in mangbat tawpkhawk tuak ahi chih Muanpu in ana zakha a, a zakphet in a Pa Thang kianga thil omdan teng, Kimte a itdan teng hilhvek a, Pa Thang in lem salaw kei mahleh nial ngamlou in Muanpu deihtelna bang in a mit langkhat Kimte pe ding in a kuan uhi.
Damdawi inn atun un Kimte omna lam a zuanpah uhi. Muanpu mel le puam kikhek gawp ahihman in ana theikei ua, Muanpu leng a kigenkhe ut tuankei hi. Kimte nu kiang ah hiai mihoih khat in mit langkhat a taan sang in kei a poihlawng sa ka hi a kei a ka pe zaw ding chi'n vangen hi.
Muanpu bel lungmuangtak bang in om mahleh a itpen leh Alex amuhkhawm chian a hehtha lah suak, Kimte lah hehpih lawzel, a khasiat tha bang asuak mahmah a, a mittui pawt ding bang a kiveng petmah hi. A lungsim tawng in Kimte a itna a pung deuhdeuh hi.Doctorte'n a sep ding bangbang uh hon sem pah uhi. Muanpu mit langkhat lakkhiatsak ua, Kimte mit siatna ah bulhsak uhi. Muanpu a leng zattheih ding hi tuankei mahleh Kel mit a thuahsak uhi. Huchi'n Muanpu mitsia asuak a, Kimte bel ngeina bang in a hoih nawnta hi.
Alex in sum tamkhop Muanpu pe ding in kisa a, himahleh Muanpu in "kei sum leh pai ziak a hong pai ka hi kei a, itna ziak a hong pai ka hi.." chia dawng in bangmah gen tamlou in a paisan uhi. Alex leh a innkuante a kipak mahmah ua, ahi alah kua ahia ? Koi akipan? chih himhim leng a kankhak louh man un poi asa mahmah uhi.
Hunte hong pai zel a, Alex leng a sep ngeite mah sem in khamtheih pua in vakuan nawn hi. Huchia lungmuangtaka gari a khamtheih tampi pua a atailai un sepaih te'n ana khaam ua, himahleh khawl utlou in a tai teitei uhi. Huaiphet in sepaihte'n akap ua, Alex a kaplum uhi.
Hiai bangteng thu hong om chia'n Kimte a lungkhamna a pung semsem hi. Meithai hita ding, a tanu khat toh a nuta ua damsung khosak ding a ngaihtuah chia'n haksa asa deuhdeuh hi. A itpen Muanpu lah a omna gam thei nawnlou, thei lele vanaih ngam ding a hi nawnkei hi. A lungkham haksatnate ziakin Kimte a melte se semsem a, upat suak deuhdeuh hi.
Kum nga bang hong pailiam zoh in Kimte a tanu toh khosak nopzawk khak leh chi'n Lamka ah hong pemlut uhi. Kimte nu'n leng mi innzut bek a kilawh sawm in mihausa dia a gintak khat kiang ah a vakingen hi.
Muanpute inn ah Kimte vakingen kha a, Kimte in thei nawnkei mahleh Muanpu in bel thei mahmah lai hi. Pa Thang in leng Muanpu ziak a meltheih ahihman in ana uh semsak a, amau huang mah ah a buukta ding uh lamsak in a nuta un omsak hi.Muanpu in Kimte khosakdan enen in aguk in a mittui a nulnul mai hi. Kigen hetlouh ding chi mahleh nikhat kidekzou nawn mahmah lou ahi ding a, Kimte a room sung hahsak ding dan in samlut hi.
Kimte in leng a niteng a mu gige ahihman in a neel simta a, chiamnuih in "nang le niteng in sun glass na bunden a.." chi'n nuihsan hi. Muanpu in leng a mitbulh lakhia in hiai maw ka itpen adia ka piak ahi hon chi a, Kimte in banghiam phawk nei hileh kilawm in a dingtang zot zozen hi.
Pauzom nawnlou a Muanpu biang ah mittui hong luang keuhkeuh Kimte in amuh phet in a romol kintak a lakhia in a nulsak hi. Kimte inle Muanpu mel en thakthak a, atawp in "UMuan ei..." chi'n pumkawi in a kahkhum ekhekhta hi.
A nih ua a hinkhua teng uh khawng suutkhawm in a kallak in nuizel ua, a kallak in akap zel uhi. Hiai ni sun nitum in bangmah sem manlou in hunlui suutna in a zangbei uhi.
Nitaklam bang hong hih hial chiang in Muanpu'n Kimte en a, "Kim, nang a dia ginom gige lai ka hi a, na hon bel ngamta diam ?" hon chikhia hi. Kimte in leng kisuanglah toh kipah thuah in pautam lou in a Umuan ang ah a belhsukta hi. Tunzaw khen ding simthu lel ding om nawnlou in lungnuamtak in PaThang etkolna toh a khosa denta uhi.
BEITA
Sunni tumkuan lenmui hong kai chiichiaita a, huchi'n Muanpu leng loukuan innlam hon zuanta hi. Inn tungphet kihahsiang a, ann ne in anekzoh phet in Tuailai pawl lazilna ah kuan ding in kisapah hi.
Muanpu ahihleh a pa sihsan nung sawtlou a anu'n pasal dang a neihsan ahi a, a papite'n a etkol uh ahi. Laisiam mahmah hinapi in skul kai zou nawnlou a, mite simmoh tang in utziak hilou in lou lam akuan gige angai hi. A lawmvualte skul kai dia kuan diamdiamte amuh chia'n englua ahihman in mi skul kuanma in lou lam a zuan gige hi.
Hunte hong paizel a, nikhat lazil atawp un a khua a ahausapa uh tanu hawmthoh leh melhoihtak mai Kimte in "UMuan, khatvei bek non pawtkawm in honkha ve.." chi'n zawn a, Muanpu leng kiguih zozen in "hitham e Kim.." chih toh zuih a thuah ngal hi. Chikmah a akinep phaklouh ahihman in Muanpu a kipak gu mahmah a, Kimte te inn bang tungbaih a kisalua hi. Kimte-te inn alut ua, gintak mah bang in Alex leh a kaih zatamte Kimte ngak in ana tu neinai uhi. Muanpu in kisuanlah huai asak nakkal in Kimte nu'n Muanpu ana khentuam mahmah zomah in a tanu toh Alex a tukhawmsak sese lai hi.
Muanpu ahihna kithei mahmah ahihna toh pautam selou in tutna nawlkhat ah dai dide in ana tu hi. Huchihlai in Alex leh alawmte'n simmoh bawltakin "Muanpu na puante le kumtam silhna chia, puanthuap bang na siamta mah ding maw, athak konpe diam..." peuh chihkhum uhi. Muanpu in bel ana nuihsan lel a, a dawng vetkei. Hiai bang kampauten Kimte in Muanpu ahehpihna liansak deuhdeuh a, Alex ahuatna kibehlap semsem hi.
Alex ahihleh Muanpu nupi toh unau ahi ua, khamtheih a sumdawng ahihman in a hausa mahmah hi. Aman Kimte tankhak teitei sawm in asun-azan omlou in veh den hi. Ahihhang in Kimte in bel ahihna thei chiang lua ahihman in a deih hetkei hi.
Nite hong pailiam zungzung a, kigen tuah kei mah le uh Muanpu leh Kimte kal a itna a khang semsem hi. Himahleh Kimte nu'n deihsaklou lua ahihman in kimuhna ding hun ahau hetkei uhi. Muanpu in hunlem amuh teng in Kimte kiang a a itna thu gen tumzel mahleh a pianna tualniam lua kisa in a gen ngamkei hi. Himahleh a itna lian deuhdeuh ahihman in thuaksiam haksa asa mahmah zel a, bang a pasal chi'n kipat sawmzel mahleh a sansi in a ngam zoukei.
Muanpu hichi bang a om ahihlam theisiam mahmah hileh kilawm in nikhat Kimte in a lawmnu Mawite tungtawn in kimuhna ding hunlem hon bawl hi. Muanpu leng kipah leh dipkuat thuah in Kimte genna mun lam manoh in a pawtkhe pah vengveng hi.
Muanpu amun a vatun in Kimte ana tungkhin hi. Muanpu leng kisuanglah sim in "Kim, kon zekai lua a ngaihsiam aw.." chipah a, Kimte in leng "UMuan, poilou, sunnitum hilele nang ngak chu haksa ka sa kei ding..." chi'n a nuihmai kilawmtak asuah hi. Kimte in a Umuan mit hah etlel in leng kisit mahmah ahihdan thei in "UMuan, na lungsim a om penpen hon gen mah.." chi'n dong a, Muanpu'n leng kizumpih simsim kawm in "Kim, nangkia na om..", "Ahihleh Umuan, bangziak a kei kia omkha ka hi ding.." chi'n nui hiuhiau kawm in dong thuk hi.
Muanpu leng kingaihtuah deudau in a tawp in "Kim, kon it luat ziak himai inteh.." chi'n aw liing pelhpelh kawm in gen a, Kimte in leng "UMuan, huai na chihkal haibang na ngaklah lua ka hi..." chithuk in khovel a midang omlam leng phawk nawnlou khop in a kipom chenchen uhi.
A kiguk ngaihdante bang uh sutkhawm ua, akal ua palbang nangtu za in tam ahihdan leh melma zalai ah khuambang kip a buanlei suakdong chiampellou din tongchiam uhi. Huchia nuamtak a a omlai un apai uh ana hun gawp man a, amau leng ginom gige ni chih toh siang lam zuan in a chiahta uhi.
Mualliamsa hunte sang in Muanpu le Kimte zatamte melmuh in hong kholkhawm tam zawta uhi. Huchi'n Zomite chiindan bang in a langlang ah mite'n kingai uh ahihdan hon genthang vengvung ta uhi.
Hiai bang a thu hong thang vengvung pen Alex leh a lawmte banah Kimte nu a din zak thadah huai mahmah hi. Huchi'n Kimte nu'n leng Kimte pawtkhiat ding banah Muanpu toh a kimuh ding uh khaam bikbek a, lazil nasan in kuansak nawnlou hi. Tuabang mah in Alex leng heh mahmah ahi ding a Muanpu enkoltu a nupi (Alex sanggamnu) kiang ah Muanpu lungsim sia, a itpen nasan tuhsak, a huatdan thu naktak in vagen hi.
Muanpu nupi in hiai bang thu a sanggam ittak apan azak chiang in a hehtha suak mahmah hi. Huchi'n nikhat a pasal khem in Muanpu deihtak in house zialzial a, a van teng pawkhia a innsung apan pawt ding in thu peta hi. Muanpu papi inlah a nupi thuthu mang ahih chia'n hut malak a hehsan zomah a, hiaitan kon etkol nung ua nang kiphasak lai maw chi'n chiangpum khat toh a soisa gawp hi. Muanpu khase mahmah mahleh kipasal sak teitei a, a nupi sawl bang in a vanteng guang in a it a ngaihpen Kimte le a nu le pa lubuk phumna khua nawse din kisata hi.
Muanpu'n a van teng a guanzoh in a papite kiang ah tutan a ompih uh kipahthu gen in inn apan a pawt kheta hi. Thakhat thu a pawt dia sawl ahihman in paina ding mel a theikei a, alou lampi uh zuan in apaita hi. Lamdung a akhote utoh a kituak zel a, a vanteng pua a lou lam manoh ahihman in mite'n lamdang a sathei mahmah uhi. Amel etmai in leng a nguimel in lungkham mahmah ahihdan a theimai uhi.
Alehlam a Muanpu tanchin a lawmnu Chiinnu apan Kimte in ana zavek a, pawna lua in a kapkap mai hi. Alex lah Muanpu om nawnlou chi'n kiphausaktak in om lanlan hi. Ahizong in Kimte in a lungsim siatdan toh a huatna pung deuhdeuh a, amel himhim leng enpeih nawnlou hi.
Muanpu leng pailiam vengveng a, a lou uh atun in a niteng hunzatna ahihtoh ngaina mahmah ahingei dia a vatawlnga hi. A lam paina a gil kiallua a a omkhak ding lau ahihman in a lou kiim ua kawlkai khawng amuhsun kaikhawm in a kawlzal ah aguang hi.
Sun ninem vel in a loubuk apan kipankhe nawn hi. Gammang lian taktak hong tung a, khua in leng a mial khumta hi. Meivak lah neilou ahihman in gammang ah a giahmai a ngaita hi. Singbul khat hahsiang in huai ah a tawlngata hi.
Khua hong mial deuhdeuh a, vuah bang hong zu zomah hi. Muanpu'n lah puanlum leng neilou ahihman in a liing keuhkeuh a, ihmut leng a ihmu theikei hi. Huchi kawmkal a thawmging lamdang pipi bang aza a, a paam khawng a singkungte bang a sawitu om hileh kilawm in a kallak in a liing zungzung zel uhi.
Huchibang a gamdai a thawmhautak a a omlai in Muanpu lungsim ah a nu leh pa mel bang hong lang dundun a, a maban ding ngaihtuahna toh, a nu leh pa itna toh, Kimte a ngaihna toh kidek zoulou in a mittui luangkhe zungzung hi.
Zingkhua hong vakphet in Muanpu leng kawt nimnem sa in kipankhe nawn hi. A gil kial mahmahta ahihman in a kawlkai puakteng a negai hi. A tha chau gawpta a, a lam paina a gim toh Muanpu mel adaang kikeuhta a, a bah mahmahta hi.
Haksatak a bangtan hiam a painung in khota khat atung hi. A innte a en velvel a, huaite lak a ana hoihdeuh khat ah a valut hi. Innsung ah nupi khat leh pitek khat ana om ua, Muanpu'n leng a gilkial lua ahihman in ann vangen hi. Himahleh nupi nu'n "kou ann neilou, innkong a ana om aw.." chi'n hangsan zomah hi. Muanpu leng kisuanlah toh zum thuah in innkong a pawt ua, a innka ua khuambul a tu in a kingai hi. Huchia mangbang tak a a omlai in piteknu hong pawtkhia a, ann-khal nih Muanpu apia hi. Gilkial laitak ahihtoh Muanpu a kipak mahmah a, bangmah kallou in a negai pah hi. A tha bang omtuam in nuam a satuan mahmahta a, malam suan ding a lunggelta hi.
Mailam nawt din Muanpu kisakhe nawnta hi. Koi khua a pai ding ? Kua kiang pansan ding ? Bang hih ding ? Chih himhim leng theilou ahihman in a buai mahmah hi. Khepi ngatna lamlam zuan ding chih ahimai hi. Lamkal ah lui bang amuh chia khawl tawldam zel in awl in apai nilouh hi. A khenchia mual a kaltou, a khenchia a suk bekbek zui in haksatak in mailam a zuanzel hi.
A lehlam ah Kimte leng Alex te inndongtate'n va hel uhi. Anu'n bel lem ana sapah a, himahleh apa'n a eithu kia hitheikei, amah a neitu ding pen Kimte a kingap taktak na hiam kong kan masa ding ua, huaizoh chiang in athu omdan genfel pan ni hang chi'n ana kiksak hi.
Muanpu leng gilkial dangtak thuak in hong paipai a, ama nitak bang in gammang lak a khua in mialkhum ahihman in lin mahleh a giah mai a ngaita hi. Giahbuk dan khat bol in nahtang teh phah in alum hi.
A kiim akiang khawng a sa hia bang a theihlouh a gamlum mahmah man in a ihmu thei hetkei hi. Muanpu leng bangchi mahmah hiam chin zuntha kawm a va enkhe ding in a thoutou hi. A pamdeuh paipan chih ding in thau hon ging a, a dinna mun apan Muanpu a puksukta hi.
Kimte ngei leng apa'n nikhat samtuam a, "Bawi, Alex te'n hon hel ua, bang na chidia, na kingam diam ? Na nu leh pa'n bel a neihzoh toh hon deihsak ka hi uh.." achi a, himahleh Kimte in, "Pa, ka hawkei, ahihhang in ka ngaithei hetkei. Huai chia pasal nei din naupang ka kisalai a, ka ngap naikei.." chi'n a dawngthuk hi.
Kimte pa'n leng dawngtam nawnlou in a pawtkhiatsan hi. Kimte in bel Muanpu a itna khauhsak semsem a, nikhat tei kimu nawn a, kiteng thouthou ding chi'n a maban hun ding a suang tuahtuah zaw hi.
Muanpu leilak a lumsuk hong thoukhia a, a etleh a khe a sisan ana dim hi. Papi nih in delhphei ua, Muanpu amuh un gamsa sa a akap uh mihing ahihlam phawk ua, kisuanglah tak in om uhi. A zawnna ding bawl in Muanpu damdawi inn a puak hong sawmta uhi.
Dakkal thum bang a paizoh un khopi liantak Lamka a tung uhi. Kintak in damdawi inn zotpih pah ua, a kapkha tupa'n a tanu khat leh a tapa khat a ompih din sampah in a ki-enkol uhi. Doctor leh nurse te'n a khe a thautang taang lakkhiatsak in a tuamsak uhi.
Niteng thukizakna tuamtuam ah Muanpu tanchin kisuahvek ahihman in innlam ate'n leng ana theivek uhi. Kimte ngei in leng atheih phet in om theilou a, a room a lut in a lupna tung ah akap nilouh hi. A ngaihtuahna ah vadelhsuk a va ompih mai sawm a, huchi'n a nu kiang a Lamka zin ding in kingen hi.
Himahleh anu'n Kimte tup nak theihlaw mahmah ahihman in a phalkei bilbel a, "Alex toh kiteng unla na nih un vaveh ve ua, huai tagahpa kiang a paisawm na hih lah ka theihsa.." chi'n a enghou zomah hi. Huai in Kimte a khasesak semsem a, a Umuan a itna lian semsem in dal vuallouh mittui in a tuum nawn hi.
Muanpu kapkha a enkoltupa ahihleh Pa Thang, Officer pension, mihoih leh mi hausa mahmah khat ahi. A ngaih tuahtuah chiang in Muanpu gammang lak a amah kia a a om mawk lamdang sa in Muanpu hinkhua tengteng akip-akawi in a kankhe vek hi. Muanpu hinkhua a theihchian hehpih deuhdeuh a, ama hinkhua toh zong kituak mahmah ahihman in a dam hunhun a inn ua ompih a mikhat suah ngeingei ding chih a tum tinten hi.
Muanpu leng hoih gawpta ahihman in damdawi inn apan a pawtsakta ua, Pa Thang in a inn ua hoihtak a kem in a enkol a, a limlim pia ahihman in Muanpu'n leng nuamsa mahmah in a mel bang leng kikhek sot mahmah hi.Muanpu in leng damlam manawh deuhdeuhta hi. Himahleh a khe pen a ngeina bang in om thei nawnlou ding a, chiangkhun toh a omdet ngai ding hi. Huchia pawt khezou zaw deuh a hon om apan Pa Thang in skul khawng kaisak thak in achiah-akuan gari toh kha in pii den hi.
A kholam uah zankhat Kimte pa khualzin kal in anu toh Alex pangkhawm in ana kitengsak uhi. Kimte utlou in kipekpek mahleh pasal tha zoulou ahihman in mittui tampi toh Alex zi ding in a omta hi. Khomi tamzaw in thil paidan thei mahmah uh ahihchian Kimte a hehpih mahmah uhi.
Kha khatvel painung in Muanpu bazar a hohna lam a Kimte lawm Ngainu toh va kimukha uhi. Ngainu in thil omdan teng a gen leh Muanpu in pawna mahmah a, bazar lai chih omlou in Muanpu leng a mittui in a pumtuamta hi. Ngainu in lah hih ding dan theilou in a lawmta un a kikah khum uhi.
Nitaklam ann leng ne zoulou in Muanpu a lupna ah a lumden hi. Zankhua in a kingaihtuah den a, vangtah din leng vangtah sawnsawn hina ing e maw !! chi'n kua mah muhlouh in a kidiikdiik mai hi. Hehnemtu ding lah omlou, leitung haksatna tuangnungsiah a khapham mai bang a ut hi. Kimte leng a pasal neih apan ann nangawn duhlou, a kahkahna in a melteng segai a, a gawng hiaihiai hi. Nitak teng alah a pasal zukhamsa a pai, vuak thuakden zomah ahihman in a hinkhua genthei a kisa mahmah hi.
Zankhat zukhamsa a Alex innpai, athu omloupi a heh mawk in Kimte hon vua hi. Hah vuak kha deuh ahi ding a Kimte mit langkhat a sia a, Lamka damdawi inn kintak a zotpih a ngaita hi. Kimte lah kap leng kap khe zou nawnlou in zoi dildel in lupna ah a lum hi.
Lamka damdawi inn hong tunpih chiang un Doctor te'n a mit tang kisia ahihman in a mitdel ding ahihdan ahilh ban uah mit hoihlai khektheih ding na muh ua leh a hoihkik thei ding chi'n hilh uhi. Hiai thu in Kimte sungte a lungliap sak mahmah a, Kimte nu ngial bang a thilhih kisik in a kapkap mai hi.
Hiai bang a Kimte in mangbat tawpkhawk tuak ahi chih Muanpu in ana zakha a, a zakphet in a Pa Thang kianga thil omdan teng, Kimte a itdan teng hilhvek a, Pa Thang in lem salaw kei mahleh nial ngamlou in Muanpu deihtelna bang in a mit langkhat Kimte pe ding in a kuan uhi.
Damdawi inn atun un Kimte omna lam a zuanpah uhi. Muanpu mel le puam kikhek gawp ahihman in ana theikei ua, Muanpu leng a kigenkhe ut tuankei hi. Kimte nu kiang ah hiai mihoih khat in mit langkhat a taan sang in kei a poihlawng sa ka hi a kei a ka pe zaw ding chi'n vangen hi.
Muanpu bel lungmuangtak bang in om mahleh a itpen leh Alex amuhkhawm chian a hehtha lah suak, Kimte lah hehpih lawzel, a khasiat tha bang asuak mahmah a, a mittui pawt ding bang a kiveng petmah hi. A lungsim tawng in Kimte a itna a pung deuhdeuh hi.Doctorte'n a sep ding bangbang uh hon sem pah uhi. Muanpu mit langkhat lakkhiatsak ua, Kimte mit siatna ah bulhsak uhi. Muanpu a leng zattheih ding hi tuankei mahleh Kel mit a thuahsak uhi. Huchi'n Muanpu mitsia asuak a, Kimte bel ngeina bang in a hoih nawnta hi.
Alex in sum tamkhop Muanpu pe ding in kisa a, himahleh Muanpu in "kei sum leh pai ziak a hong pai ka hi kei a, itna ziak a hong pai ka hi.." chia dawng in bangmah gen tamlou in a paisan uhi. Alex leh a innkuante a kipak mahmah ua, ahi alah kua ahia ? Koi akipan? chih himhim leng a kankhak louh man un poi asa mahmah uhi.
Hunte hong pai zel a, Alex leng a sep ngeite mah sem in khamtheih pua in vakuan nawn hi. Huchia lungmuangtaka gari a khamtheih tampi pua a atailai un sepaih te'n ana khaam ua, himahleh khawl utlou in a tai teitei uhi. Huaiphet in sepaihte'n akap ua, Alex a kaplum uhi.
Hiai bangteng thu hong om chia'n Kimte a lungkhamna a pung semsem hi. Meithai hita ding, a tanu khat toh a nuta ua damsung khosak ding a ngaihtuah chia'n haksa asa deuhdeuh hi. A itpen Muanpu lah a omna gam thei nawnlou, thei lele vanaih ngam ding a hi nawnkei hi. A lungkham haksatnate ziakin Kimte a melte se semsem a, upat suak deuhdeuh hi.
Kum nga bang hong pailiam zoh in Kimte a tanu toh khosak nopzawk khak leh chi'n Lamka ah hong pemlut uhi. Kimte nu'n leng mi innzut bek a kilawh sawm in mihausa dia a gintak khat kiang ah a vakingen hi.
Muanpute inn ah Kimte vakingen kha a, Kimte in thei nawnkei mahleh Muanpu in bel thei mahmah lai hi. Pa Thang in leng Muanpu ziak a meltheih ahihman in ana uh semsak a, amau huang mah ah a buukta ding uh lamsak in a nuta un omsak hi.Muanpu in Kimte khosakdan enen in aguk in a mittui a nulnul mai hi. Kigen hetlouh ding chi mahleh nikhat kidekzou nawn mahmah lou ahi ding a, Kimte a room sung hahsak ding dan in samlut hi.
Kimte in leng a niteng a mu gige ahihman in a neel simta a, chiamnuih in "nang le niteng in sun glass na bunden a.." chi'n nuihsan hi. Muanpu in leng a mitbulh lakhia in hiai maw ka itpen adia ka piak ahi hon chi a, Kimte in banghiam phawk nei hileh kilawm in a dingtang zot zozen hi.
Pauzom nawnlou a Muanpu biang ah mittui hong luang keuhkeuh Kimte in amuh phet in a romol kintak a lakhia in a nulsak hi. Kimte inle Muanpu mel en thakthak a, atawp in "UMuan ei..." chi'n pumkawi in a kahkhum ekhekhta hi.
A nih ua a hinkhua teng uh khawng suutkhawm in a kallak in nuizel ua, a kallak in akap zel uhi. Hiai ni sun nitum in bangmah sem manlou in hunlui suutna in a zangbei uhi.
Nitaklam bang hong hih hial chiang in Muanpu'n Kimte en a, "Kim, nang a dia ginom gige lai ka hi a, na hon bel ngamta diam ?" hon chikhia hi. Kimte in leng kisuanglah toh kipah thuah in pautam lou in a Umuan ang ah a belhsukta hi. Tunzaw khen ding simthu lel ding om nawnlou in lungnuamtak in PaThang etkolna toh a khosa denta uhi.
BEITA
Writer's note: Simtu teng tung a kipahthu kon gen ahi. Fiction mahmai, chimthoina dan a phuahtawm lel ahi.
©Siamsinna leh Vakiangbu
©Siamsinna leh Vakiangbu
Comments
Post a Comment