KEI PATHIAN HILENG ZAW!

By ~ Rex Peapy Tangpua

Nikhat, pasal kum upa law nailou, mel-et a tuailai mahmah lai khat khualzin in nisapi nuai ah kho-ul luang puappuap in gimtak in hongpai kheuhkheuh a, a zinna a a thilsai di leh sep dite ngaihtuah kawmkawm in malam hon nawt zel hi.

Huchia bah kisatak a hongpai lai in lamkiang ah Thei-he kung sang a sang, buk lihliah, a liim khawltawldamna lou dia pammaih ngoihngoih khat a hon mu a, amah leng a gim toh huai singliim nuai ah a vanpuak ngakhia in hong khawl hi. A lukhu lakhia in hong kizaap heuhheuh a, sawtlou in a vanpuak lukham a nei in hong thallup iu-iau hi.

Huchia vandak eu-au a hong khawl tawldam kawm in a tunglam hon etleh a liim a belh Thei-he gahpha mahmah leh min dup zezen a hon mu a, hichiin ngaihtuahna hon nei hi:
"Pathian le zaw thilsiam a nak siamkei tel mai. Hiai singkung bang a kung a letlet toh a gah lah khutpi chia lel hisak a, maipuang khawng lah a gui ngat chik chilou dia a gah let a liansak zel. Kei Pathian hileng zaw singkung liante a gah le liansak ding ing a, a kung neute a gah le neusak ding hiveng...."

Huchibangteng khawng ngaihtuah nilouh a a omlai in a tawl toh a ihmut suak in a hong mitsi a, ihmu man dektak chih in banghiam khat in a tal hon deng a, kiguih zot zezen in bang hi peuhmah hiam chi a a etleh Thei-he min pulh ana hi a, a denkhakna a tal bang a san zezua zezen hi. Denzek a a ngaihtuahna thakhat in hon kikhek guih a, hichiin hon ngaihtuah kik hi:
"Oho! Pathian hai kasak leh ana pil lua a, ken a pilna leh lemgeelna ana banpha deklou ana hi keive le! Kei hoihsakdan a thil pai hileh, hiai singkung let a lian bang a gah leng lian ding a, tua kei a gahpulh in hon deng zomah hiven, maipuang chia mahmah hileh hon denglum ding ei vele! Pathian in zaw Amah thilgeel ah a diklou omlou ana hi eive, Pathian lemgeelsiam ana hi"

Ngaihtuah mah dih, na thilgeel, na lungtup bang chetchet in paithei leh Pathian thupina na muhlouh mai hilou in nang mahmah adia siatna ding, nang ngaihtuahna a kilawm mahmah ana hikha thei hiveh aw!!!

[April 5, 2013 a meikuang apan accident ka tuahkhak ziakin tuni, hiai thu ka gelh tan in thoukhe theilou, zun-le-ek nangawn leng nawn theilou in lupna ngak in ka om a, tuahsiatna ana tuaklou hileng zinna di leh sep di geelsa ka nei diam a, tua ka ngaihtuah chiang in Toupan kei deihteelna hon pompihlou ahi chih theihsiamna nei in, hiai tangthu tom, kana zakzak sa ka lungsim a a omluat ziakin kon share ahi. Simtute'n banglam hiam beek a phattuampihna i neih uh ka lam-en.

MEN PROPOSE, GOD DISPOSE]

©Siamsinna leh Vakiangbu