AMAH ZIAK IN.........

By ~ Muana Guite

A kum leh ni chu ka thei nawnchiah kei,himahleh pawl 8 ka sim kum hi in ka thei. Tangval panpan aki hi a, class khat sung ah le hoih sak leh deih lam bang chu lawm le vual te lak ah aki bang thei mahmah hi. Tangval tung te adin chu a deih huai mahmah a, tang sinlai kuai tu pen ana hi a. A bul tung in chu ken le ka ngaihsak kei a, himahleh lawm le vual ten a gengen chiang un kei leng ka theih louh kal in amah ngai in duang ka na vul man hi. School kailai aki hih man in Heutu te hon theih ding bang aki lau gu mahmah mai hi.

Hunte hon pai zel in, lunglai ah zong ka na vei ngeilou chu tun ah ka lunglai luah dim pen ana hi daih ta hi. Ki naupang lai chih mah tak Nu le Pa gen tak louh,lawm le vual te hon theih ding bang ki lau petmah himai. Hon chiamnuih chaing ua ki zakta petmah, hi mahmah kei khong ki chi in chi, lungsim guk tak ah chu hi thou mah e ki chi zel. Kuamah theihlouh a amah toh om khawm bang chu nuam kisa petmah, amah toh Ekbuk zong ana nuam mahmah hi. Naupang lai, sum muh suah na ki nei nailou ahih ziak in, amah tung ah sum a tawm lamlam sen ka tum hi, amah ading ahih nak leh Nu leh Pa te kiah sum ka ngen zel hi. School kailai na ngawn, class lak lai na tan in ka lungsim teng hon luahdim gai hi.

Amah toh ka om khawm nak leh ka lung a nuam a, ka kha a muang mahmah mai hi. Amah ziak in ka lehkha sim bang ka thei ut deuh hi in ka koih a, himahleh a taktak in zaw amah ziak in ka lehkha sim ka bah zaw hi. Hun in hon ngak lou ahih chiang in, piching lam manoh kawmkawm in amah ziak in Nu leh Pa, Heutute tai leh vuak ka thuak zel hi. A khen chiang in a guk in khen ka sawm zel a, himahleh kei mahmah ka ki control zou kei a, ka va naih kha pahpah zel hi. Hibang itna ka mu naikei a, lamdang bang ka sa zawzen. Ni 2/3 khong ka khen thei zel sam a, himahleh kei mahmah in ka va naih zel a ka khen zou mahmah kei hi. Hi chi tuk in it in ngai mah leng le aman a itna kampau khat vei mah le hon gen ngei kei a, ka lungsim in ka buai mahmah a, khen mai ka sawm sek. A omdan apat hon hua kei chih chu ka thei,huia ziak mah le adiam ah ka khen thei mahmah kei hi. Aman a hon it dan a gen louh chiang in chu Itna vangtah houh adiam maw ka tan tawk ka chi zel hi. A khen chiang in chu vang sia ka ki sak hun a tam mahmah a, hi mah leh ka lung kiak sawm kei hi.

Ka sinlai luahtu ka khen theih khak leh chi in Lawm le vual ten lenndang a tam chi’n hon gen pih uh. Kei la amah ngai in duang vul zel ing. Amah tellou in ka lung a muang thei kei, amah kia ahi ka kipahna. Hon deihsak tu ka lawm ten ah na khen pah kei leh na kisik ding chi in deihsak thu hon gen ua, himahleh kei la ka maban di khual lou in khen ding simthu ka leel thei mahmah kei zel hi. A gim huai tel mai. Khen di hia? khenlouh di?? Chih ka lung buai mahmah lai in,thupuk na khat ka la thei khong hi. Lawm le vual, Nu le Pa te vang in gibang khen ding simthu leel kei ning chi in thupukna chu kon la thei hi. Nu leh Pa, Heututen hon theih ma khong uh ana nuam petmah a, a guk a sai lai mah ana nuam hi veh aw chi in Nu leh Pa, Heututen hon theih khiak nung ua a nop luat na a om tuan louh apat ka thei khia hi.

Amah ziak in dawr te ah Batbu ka neih loh a, thildang adia sum chil petmah himah leng, amah ding in chu ka it thei mahmah kei hi, amah ziak a ka thuak na te,ka sum sen na te, ka zahlak na te......khong ka ngaihtuah kik chiang hai ka ki sa mahmah a, lawm le vual, sungkuan te deihsak louh pi tuh deihlouh tei mai di chu hia, himahleh ka khen thei nawn kei a, a hai leh a vangsia chu ka himai hi. Ka lungsim nop louh na chu Vai dawr bawl ten a maingal mahmah mai ua, Vaite thuthu in a om hi. Amah tuh BABA 120 ZARDA tutan in ka khen zou nai mahmah kei hi.

21/04/2013

©Siamsinna leh Vakiangbu