NIKHAT DAKPUPA [POSTMAN]

By ~ CescFà L Tawmbing 

NI KHAT:

Huchia bazar kai khin, gim kisa a sitting room a ka tut khawl lai in innsak a kipan Dakpu (postman) pau ging ka za hi. “ Pu Kam, hiailai vel ah ********** kichi om hia ?” chi a ka inn luahna pa dong in Dakpu ana buai petmah a. Kin-le-buang a taipawt in, ‘ Pu aw, keimah hi’ng, ka thil di om hia ? ’ chi in ka dong hi. A mel suanhuai ngelloupi toh nui vemvom kawm in dakbawm (envelop) lianpi khat hon pia a, suai hon kaihsak khit a paikik ngal mai di ka sak leh innsung hong lut in tuivot dawn di hon kan zui lai hi. Sawt tukei mah leh a tuidawn sung kia leng sawt ka na sa man petmah a, naupang dong/van thak nei mah bang in ka phe kual velvul a. Minit 5 nung vel in hon paisan thei ham a, kipahthu nangawn gen gina manlou in dakbawm ka hong zui ngal hi.

Ka lamet bang ngei in Siamsinna leh Vakiangbu  heutute a kipan kipahman (memento) ana hi petmah a. Kithalawp takin ka U kiangah ‘Ka thil di hong tungta eive’ chiin room-ah ka nui lut seusau a. Ka en a, ka lawng tadih sek hi. Pathian vualzawlna ziakin ‘kipahman’ kichi hi bangzah hiam ana dong khata mahleng, ka chipihte apan bel Sunday sikul kaikim lawman chih khawng loungal don khak ka nei ngei naikei a, thamlou in, ka chipihte a kipan sese hichibang thil, dong kha ding in leng ka kilamen pha ngeikei hi. Tua ziak mah in ka kipahdan a chituam a; keimah a a sepdan a nuam tuam vengveng hi !

Ka en a, ka en thak zihzeh hi. Ka lamet sang in a thupi zaw daih a, sawtlou nung in hichi’n ka ngaihtuah sunzomta hi...

Nitak lup kuan thumna toh pang a Zomite’ Pathian ka na nget sek –

‘Ka khovel damlai, hun tomchik sung beek in hiai, ka Nam, mite muhsit leh simmoh a hih det phal ken la; hon suangtute’ gitlouhnate thei gige lou in khangthakte hon domsang in. Huchi in Nang ka hon pahtawi ding ua, Nam a hon bawltu ka hon phat ding uh.

‘Ka hon chiam ahi Pa aw, tulai changkannate, koute’ aa ding a namel liahtu ahih sang in ka batphaklouh uh phal zaw in la; ahihhang in mite bang a zatdan siam ding a pilna bel koute’ aa ding in iit ken.

‘Daikilkal mi, huhtu bei – gentheih nak lai a natna huaise pen vei a mahni damna ding natawm lei zouloute’ hinna hutna ding leh thil hoih zaw sepsuahna ding a mite’n a zat lai ua koute’n, kitotna ding lel, leh na duhthusam gamgi bohpelhna mun ding mai mai a ka zat uh phal den ken.

‘Na lei vualzawlna tung a mahni kiliansak mai mah ding in hon phal ken la: sum leh pai, neih-le-lam a non vualzawlna pen nang mah-a suak lungtang pilna toh a tonkhawm kei ding leh, la mang zaw mai in. A nak a suangmantam bilbah lah Vokpi’ daina phet a hi ngal a!

‘Chihtak luat ziak a kigensiat thangsuahpih, Nam’ aa ding in ngaihsamna lungtang kon ngen kei ua; na thu koihdap a mihing’ chihtakna ameet louh dan theisiam ding a pilna bel ka taksap uh ahi. Mi khat beek gense masa lou a ann-kam lim thei nawnlou, nupi bangzah hiamte leh ihmut limna ding a innvengte’ neihzah thei masa nuam, nupa-a kiningching Nam hih sang in mihoih hilou, mipil tam luat ziak a Nam mawl hih a zahlak-huai dan hon theisiamsak zaw lechin ka ut uhi.

Mahni gilpi leh compound kan vei phalou makai neih khak ziak a lungkimlou mipite’ lungtang ah mahni phu tawk a lungkim dan hon sinsak ding in ka hon ngen uh; mipi leh gam in’ a phu tawk makai nei zel ding a na gelsa ahih ziak in’.

Pau lou in ka dai dedu nilouh a, sungte’ mitmei ka ven ziak hi lou in deih luat ziak a genkhelh, sak-khelh a om khak di ka veng thawng zaw gawp!!

Akoi-abang hitaleh, khatvei hihfuh ziak mai a kipahman saang kha a ka om ziak a ka kipahna khenlam ah eimite akipan eimi’ pa’n deihsakna ka tan hi ‘tantuan’ ka chi lou thei kei ! A tung-a thuumna dawnna chi 1 bang in ka ngai a; simtute’n leng non ngaihkhiat sak uh ka lamen hi.

©Siamsinna leh Vakiangbu