UPA PEN MOHPUAK NA
By Muana Guite
Khua khat a Nupa khut nasep a nektawm zong a om ua, amau tapa 2 a nei
uh hi. A neu ua pat Nektak zong na ziak in a Nu leh Pa’n a enkol hoih
taktak man kei uh hi.Unaute leng amau in a kitou delh ua,a khua ua Govt
school ah chu a kai tei uh hi.
Nu le Pa’n hoih tak a enkol manlou chih mah tak chu,amau le a hinkhua
uh a nuam thei bang pen in zat hon sawm uh hi.School kai leng a ut
dandan un a kai ua,a ut chiang un school kai lou in gamlak khong ah a
Unau un a om zel uh hi.Khatvei chu a Nau zaw pen in a U kiah,”U,hinkhua i chih bang ahia?” chi’n a dong hi. A U’n chu “Hinkhua i chih chu maw a nuam thei bang pen a zat”
chi in a dawng hi.Aman le thumang tak in a U thugen chu ging in a
hinkhua anuam theipen a zat din a thupukta hi.A U’n chu a hinkhua a nop
khak leh chi in Nganza chu hon tep pan hi. A Nau pen ahihleh a tep phal
kei hi.Hunte hong pai zel in, Nganza addict chu hon hita mai hi. A Nau
pen in a U pa omdan a muh chiang in nopsak mel a sa mahmah hi. Khatvei
chu a U kiah aman le tep ut ahih dan ahilh hi.A U’n le i Nu leh Pa kiah
na gen louh di ahi chi kawm in a tep sak tei hi.A nih un niteng in hon
tepta uh hi.Khovel chu nuam tak in hon zang uh hi.A Nu leh Pa la chu lou
nasep ah tha-it mahmah ziak un a enkol taktak man kei uh hi.Huialou in a
U pa pen amuan mahmah ziak un le a Nau toh a kithuah nak ua leh a lung
uh a muang mahmah hi.
Hunte hong pai zel in a Unau un a duh lam uh kibang ahih chiang in a
kithutuak mahmah uh hi.A U pen in Nganza a tepna a sawt deuh tak man in
Nganza kiah a a lungkim nawn kei a ,huai sang a hat zaw a lunggulhta hi.
Khosak a nop zawk khak leh chi in a Nu leh Pa’n chu a Upa zaw pen Lamka
ah kilohna zong din hon sawl suk uh hi. Lamka a hong tung takin
khamtheih chi tuamtuam hon hih in ,nasem taktak peih louh in Guktak chu
hon panta hi.Guk di a muh chiang in a hih tam a,huchia hinkhua hon zat
sung sawt daih lou in a hinkhua chu hon zang beita hi.A khua ua vui ding
in a pua ua,a khua uah chu a Nu leh Pa ,a Nau leh khosung mite'n mittui
tampi toh a vuiliamta uh hi.
A Nau pen in le a hinkhua chu a U pa hilh dan in hon zang tei a,a
nuam thei pen di’n hon zang hi. Nganza kia a a hinkhua nuam sa zou
nawnlou ahih chiang in adang hihbeh a ut ta hi.Himahleh a kingaihtuah
chaing in a U bang a a hinkhua hichia abei mai ding a lau hi. Khatvei
chu a U haan ah a vahoh a,”U aw,hinkhua i chih nuam tak a zat di” na
chih hang in,tun ah nuam tak in ka zang thei nawn kei hi. Bang dia hon
khem na hiam?? Hinkhua hichilou deuh a zat didan hon na hilh le te zaw
maw ! U aw, hong thou kik inla , hinkhua nuam tak a zat didan khatvei
bek hon hilh thak ve maw?? Nang toh hinkhua nuam tak in i zang khawm
ding. Hong thou in. U aw, hinkhua nuamtak a midangte adia phattuam deuh
a zat didan hon hilh ve. Kei le mite bang in hinkhua nuam tak in ka
zang ut voi. Hong thou in, hon itlou na hiam?? chi in a vakap
ngoihngoih hi.
Himahleh, hun paisate lah lakkik theih ahih louh manin bangmah a
phatuam nawnta kei. Zomi namsung ah Upa pente'n gou a luah ua, Nu le Pa
dinmun ah a ding pah mah bang un, U pen te' mohpuakna ana poimoh tel
mai. A Neulai un a U pa pen in Pathian lau kawm a hinkhua zat didan ana
sinsak hi leh a Nau zaw in thumang tak in ana zui dia, hinkhua chu nuam
tak in a zang ding hi. A U pa pen in Pathian lau kawm in a neulai un a
Nau lampi dik ah ana paipih hileh kisiknate omlou in a hinkhua uh chu
nuam sa tak in a zang ngei ding uh hi. Huai ziakin U pa pen in a
mohpuakna thei kawm in ,ittak toh a Naute ana thuhilh a poimoh mahmah
hi.
©Siamsinna Leh Vakiangbu
Comments
Post a Comment