KHA KA PHAM CHIA'N

By ~ Vz Vualnam Ospa

My Testament: Kha Ka Pham Chia’n
{chihna bang omsak le.....}

Ka pham chia’n, kha ka pham chia’n
Kulsin daidam a ka zal chia’n
Tuun aw gua bang na hinlai leh
Na von’ sakmin manmoh na’ng chi’n
Mantung saumang na salou aw
Thulguah luang pal bang anan a
Tangni’ hai siallum hon sun a
Phalbi vuukkang anan leh
Teenna’n phazou bualna’n phazou e
A sung a hei dialdial tapeuh le’ng
Nalgo chial sausuan zong nun in nuam e
Von min mangmoh hen na chihleh
Vangkholai a silhpuan bansam
Nihthum ngaihkhua na tuah ve aw
Phamsa laukha ka muan na’ng hi e

Ka pham chia’n, kha ka pham chia’n
Kulsin daidam a ka zal chia’n
Kawi aw gua bang na hinlai leh
Na kiang’ sakmin manmoh na’ng chi’n
Mantung lumsuang hon dohlou aw
Sakmin va bang atuantheih a
Kumsawt simsing bang agil leh
Chiau a lumsuang phazou e
Laukha lah kulsin ah thaamlou dia
Sakluang lah siatlei suak ding a aw
Kulsin ngakdi’n mantung lumsuang paam sa’ng
Kiang’ min mangmoh hen na chihleh
Lel a liang siamsil suut bansam
Nihthum ngaihkhua na tuah ve aw
Phamsa laukha ka muan na’ng hi e

Ka pham chia’n, kha ka pham chia’n
Kulsin daidam a ka zal chia’n
Von aw gua bang na hinlai leh
Na zua’ sakmin manmoh na’ng chi’n
Mantung sawmsial in hon khalou aw
Huangvulh lulvok in hon khalou aw
Thipdial in kulsin ah ei kha aw
Phamsa sul hong heilou dia
Gua bang hing teng’ machiang khankhua ding
Lou bang kikhualtuah chiat zaw ni e
Khaphamte vual’ genthang pialgal kai dia
Sakmin than ngai nawnlou ding aw
Gua bang hing teng ngaihkhua kituah
Sawnbaan kikhaakkim chiat le’ng e
Phamsate’ laukha zong muang zaw’n chia

--------------------------------------------
Ka sih chiang in nu aw na damlai leh na tapa’ min manmohna ding chi in sum tampi seng in inn thupitak hon lamkhumke’n. Vuah in ahon thahlouh a, nisa in ahon haailouh a, phalbi vuuk in ahon thahkei naakleh teenna ding in ahun mahmah hi. A sung a omte kituak dialdial lehang go inn leng nuamlua ahi. Ka tapa’ min mangmoh hen na chihleh khosung a silh-le-teen neizouloute ana khotuah zaw in. Ka kha leng a lungkim zaw ding hi.

Ka sih chiang in zi aw na damlai leh na pasal’ min manmohna ding chi in sum tampi seng in suang hon dohsak hetke’n. Min akigelh theih a, sawtpi a om di naakleh lui a suang maimaite leng ahunlua hi. I kha lah haan a omdenlou dia, i taksa lah lei suak dia, han vuak ngak ding in suang mantam apaammaih maimai hi. Na pasal’ min mangmoh hen na chihleh, gentheih ziak a laisim zouloute ana khotuah in. Ka kha leng a lungkim zaw ding hi.

Ka sih chiang in tate aw na damlai uleh, na pa uh min manmohna ding chi in sial leh vokte in hon kha hetkei un. Thoveng tak in hon khazaw un. Misite lah hong kiiklou ding ua, a hinglai teng mabaan ding kikhual chiat zaw ni. A sisate’n lah akigen minthang luigal kai ding ua, minthan chih khawng bang ding chi nawnlou ding ua, a hinglai teng kipanpih tuah in, kitung ding siausiau le hang a sisate’ kha leng a lungkim zaw ding hi.

©Siamsinna leh Vakiangbu