PAMMAIH NA MAIZEN CIA MAW
By ~ LRay Zomi Tungnung
Ka
ngaihtuah kawm in bang loh theih ka neihloh dan ka theih chiang si a,
Himahleh bang ka loh tuan dia kon ngaihtuah non kei di. Kon mangngilh
di, ka chih semsem leh ka lungsim na luah deuhdeuh si............. Ka
ngaihtuahna in hon suhai zou di hial abang. Kei le kei nangawn leng ka
kihua hi. Ka heina peuh lah nunlui tangta. Ama in ana theikhol leng zaw
ka Itna hiai bang ding a zaw phal hetlou hing a......
Hiai
khovel a dia ka Itpen leh kei a dia ka na bilseh gige, tua singdang
siang hong zaalsanta, Sianhawm itna tanbang kimna ana chih uh zaw ei
tegel adin adik kei tel maw ? 'Nau', nang adia khuambang kip ding ka hi
na cihlai nite, ka luankhi samkhetu ahisek hi. Na min tak a le hon sam
ngamlou zawzen a duat tak a 'NAU' chi a kon sap lai nite a na nuihmai
mel etlawm dante khong mitkha ah mang theilou hi. Himahleh tuchiang in
zaw thilteng khut lumleh a suakta. Nou leng nu le pa na hihna uh
namkipna ding in na vonkhatna mel kilawm tak bang namuta ngei ding ua.
Himahleh hiai ziak a na lunglen ding bel ka deih tuankei hi. Innlam kong
pai lai a na pasal toh na kinak ua, kalkhat na nute inn a nong om khong
ka theih in kidek haksa ka sa mahmah hi. Hichi di khong maimai a maw
pasal dang nonna neihsan chi'n, kei tang lungmawl in poi kon na sakpih
mahmah hi. Achang bang in ngaihtuahna sual tantan bang a hon pilut
dekdek hi. Min Nu le Pa thumangte anahlawhpek chi uh hilou maw ?? Nang
bang dia loulou na hia ??..
Ka laisimna maban sutzop hong
hun nonta a, i vangkhua nusia a ka pawtkhiak ni nangawn in leng, midang a
hitamah le chin le ka lungsim ah na mang theikei hial hi. Ka zin ding
chiang bang a Kikim toh khomual tan non khak ua, na khut non vailiam
nite ka mitkha ah hong lang dundun mai hi. Hun le nite hong kivei dia
nang ngaihna le liampih maidin ka na gingta hi. Himahleh nang mangngilh
nak sang in ka lunglai ah mun na luah semsem hi. Bang doh-ai tui dawnkha
ka hiam aw? Hiai kankan zaw doh-ai acih uh leng hituansam ding in leng
ka ging kei .....chi in ka kingaihtuah vungvung zel hi. Hun leh nite
leng ana sep di uh khawl tuanlou in kihei zel ua, kei leng ka kumthum
course ka zohna ahihtoh ka nu le pate'n innlam ah tukum Khristmas
zangkhawm ni achih ziak un, kei leng innlam pai ding in kong kisata
hi...
Rail a kong paina ah nidang a classmate te khat
toh kong kisutuah kha ua, amah leng nurse zilzou innlam a suty zang dia
pai ana hi hi. Lampi ah nidang hunte bang kong kikum tou ua, lampi
saulam bang le mangngilh kha zawzen ka hi duam ah sawtlou kal in Zogam
khopi lut d hial bang in kong omta uhi. Zingciang mah a i vangkhua lam
hong zotsawm ka hihna ah bazaar ah bang leitheih om hiam innlam a
puakding chi in bazar lam zuan in lawm Ching toh Paupu auto te in kon
kikhohsuk vengveng uhi. Zenhang bazar ah lutsuk ngal in van chi tuamtuam
kon dawp kualta uhi. Ching in ama van di tuamtuam alei lai in, ka
lehlam gal ua puan kikhai in ka mit ala mahmah mai hi, ken leng Ching
hiah ana om zual in kon paipah ding chi in gal lehlam ka panpheita hi.
Amun ka tun in ka ngaihtuahna ah hiaibang hong om hi. Nanau te akiten
lai ua lah kiomlou ahihciah, hiai naupang puannak kilawm takmai a tanu
adin kipuakleh chih ka lungsim ah hong om phut mawk hi. Lehlam khat ah
lah, ken hiai pemawk hita leng le mite ngaihdan bang ahide aw ? A nupa
kal uh susetu lel in a pang kha diam maw ? chi a ka kingaihtuah nilouh
lai in azuaktupa'n ka pu lei d maw leilou di ? chi in hon dong a. Ka
kingaihtuah dedu sim zawzen a atawp in ka piak ngam kei le lah hicin ka
koihden mai ding chih lungsim a nei kawm in ka leita hi. Gal lehlam a
Ching in hon na ngak ahih chia chi in ka zuanpheita hi. Ching in bang
eita na lei ? Chi in hong dong a, dialzat di ka kitasam lua a ka lei ahi
chi a ka vanlei ka et bawl leh......kare !! polythene ngoute a pailette
a hon tunsak uh ana hi. Kimu chiang law mahmah, kisuanlah huai sim
zawzen. Van lei di bang teng kon leikhit un, ni le niam panta ahih manin
cin innlam kon taikhu tou vengveng non uhi.
Inn
ka tung chiah chu, zingchia kholam paitouh sawm ka hihmanin, khonung
buai sang in chi in ka van dite saksa in ka koih hi. Nitak ann nek khit
in, khuamial ding ngak in Vuvung Pan Dukan ah annek khit kom kuva
hai din ka kuan phei hi. Sawtlou ka tut nung in, Ching in nitak chiah
hong pawtin chi hiven, pawt din amau innlam kon manohta hi. A inn uh ka
tun in , kua hiamngaklah hileh kilawm in a verandah uah ana tu hi. Ka
tunphet leh ka nute'n van khat pedia kapute inn lam a hon sawl ua, nang
honna ngak, chi in a van tawi thuah in ka pawtkhe ngal uhi. Lampi a ka
pailai un Ching in ka khut hong len kawm in hichin hon chita hi. U Lal
nidang i ki class lai in nonna ngaikha hia ? Lawmte bang in hon demsek
ua, hon chi hi. Hiaibang thu ka zakin ka neu apan ka na ngaih mah, Nau
nanglou ngal zaw kuamah ka lungsim a omlou ahihlam hon phokkhe sak
zungzung mai hi. Dawnna bangmah ka piaklouh tak in Ching in hichin hon
gen zawm nawn hi. Ulal bang ngaihdan na nei hiam ch ihbel ka theikei;
hilele, ken chu nidang a i ki class lai ua pan a honna star ing
a, lawmte'n hon demnate khong bang a guk a ana kipak mahmah ka hi, nang
a kipan bang hiam bek hon suak na'n teh chi a i na ngakngak lehlah nang
lah bangmah hon genlou, ngaihzawng zaw bangzah hiam ka na nei man ,
hilele tutan a ka lungsim a hing gige pen tuh nangmah na hi, hon chih
behlap hi. Hiai khong bang kei zak dia le ka na kinep hetlouh leh ka
phuloh a ka na ngaihte ; Nau, kei apan na pawtkhiak ni apan in ken hiai
bang khatvei le ana tuak nawn din leng ka kilamen kei. Khovel in hon
taisan, kuamah tung ah leng muanna ka koih ngam non kei hi. Sawtlou nung
in apute inn ka tung ua, huchi in a van paik di pen pia in, amau innlam
ah ka kiktou non ngal uhi. Dawnna ka piakloh ziak in hon dong non a ken
leng hichin ka dong hi. Ching, tulaitak dinmun haksapi in ka ding in,
na hon it a na hon ngai a, ka kipak, hilele tu leh tu in zaw huailam
pang bangmah gen naidah ni, kei leng zingchiang a kholam paitou ding ka
hi a, dam a kon kik suk non lam chiah ngaituah na ni mo ! chi in o
damtak in ka dawng hi. Huaitak in amah leng a genhak hetkei a, awle !
nang a pasal nahih chia, nang thuthu eivoi hon chi hi. Ken leng ka
thugente nonna theisiam a ka kipak petmah ka chih behlap hi.
Huchi
in sawtlou kong pai nung un a inn uh ka tung ua, kei leng sawt omlo in
zingchiang a kholam paidi bang suanlam kawm in innlam ka zuanta hi.
Nitakin ka ihmu thei mahmah kei hi. Lungsim khatah Chingnou hon thugen
in hon kamki, alangkhat ah innlam paidi chi a hih helhhawlh sim toh ka
ihmu thei het kei hi. Chingnou bel a ngailou le ka hi tuan kei a,
hicibang dinmun setak leh mahni kingaisia tak lungtang ka put lai a kei
hon it leh hon ngai ding ka tuah zaw kei adia vualzawlna khat in leng ka
ngai hi. Himahleh, Nau nang kong ngaihna tungtawn a kan a tuahte bang
tuak non kha leng chih kia ka lungsim in omden ahihziakin,ka lungsim
tawng a ka ngaihtuahna leng genkhe ngamlou ka hong suakta hi. Mite
ngaiha zaw mi dawilokpa chih suak di ka maimahve maw..........cihte
khong bang poimoh hetlou pi'n ka lungsim ah hong suak zungzung hi. Ka
haksatna pipen ahihleh bel, von nih thumna toi zong a ka lunglai a kon
ngilh theihlouh ahi. Khovel kilawmna leh siamtu thupinate muhtheihna
ding in ka nu gilsung apan in ka hong potkhia a, siamtu in ama batpih a
siam mihingte adia bilseh ITNA ka hon kengtel sam hi. Huai Itna kici pen
in tuni in kei a ding a nopna leh kipahna sang in dahna leh lungzuan
luankhi nulna hon tuntu ana hilel dan ahi chih kon theisuah phing leh
huai itna bang le huat theih hileh huat a haw tuntun ding ka hi.
Himahleh huai itna nang tungtawn a ka na neihpen huatna sang in nang
kong ngaih semsemna a suakta hi. Kholam tun a nu-le-pate toh kimuh tuah
ding ngaklahna sang in NAU nang kong muh ding mah ka kipahna lian zaw
tham hi. Nidang a i hunluite ah nuam i sakdante khong ka ngaihtuah kikna
dak nih lam ana sat non zelta.....bang ka loh tuan dia, Sian in lungsim
hon piak bangbang apat hong potkhia tuh ka ngaihtuah ahimai. Atawp in
chu kong ihmu theisam khong hi. Ziongkhua hong vak philhphelh chih ding
in ka Nuneu in hon phong a, ihmut khamlou sasa in kei leng innlam
paiding in kong kithoi kheta hi.
Station ka hong
tung in khote bang le paiding bangzah hiam toh ka kisutuah uhi. Huaite
apat ka thuzakin ka lungsim hon sunuamloa mahmah hi. Huaithu tuh
bangdang hilou in Nanau damloh danthu ana hi. Phailam a laisim dia ka
kuan khit sawtlou in Nanau leng damlouhna nasatak ana tuakin,
khenkhatte'n agen chiang bang un anak(Breath) maimai ki-en ahita
cihkhong bang in agen uhi. Gari a ka tuan hang in ka tuanlam leng
theilou hial khop in Nanau ka ngaihtuah khop hi. A chang in Pathian bang
ka mohsa kha nak hi. Bangziak a ama tung sese a hiaibang tungsak sese
hiam ? Kei toh ka omkhawm ding lemsalou nahih lele, bangdia ahinkhua
nuamtak a a zat ding phalsaklou na hiam ? chi in hon siamtu ka mohsa
tuntun hi. Nidang a ka hunluite uh ka mitkha in hong lang dundun mai in,
gari sung ah agukin ka mittui ka na nul nilouh hi. Nanau ahihleh
midamthei lua bel ahikei chih ka thei, ahihhang in anatnate khong mite
kiang a gen chihvel khong a utlam ahi hetkei hi. Naa asak tawp in leng
kamkhat kamnih kan in 'anaa' achi ngeikei hi. Nidang a JB Skul a ka
kipawl lai un leng khatvei skul saklam ah ka kimawlna uah theikung
apatin hong kia a, akhut taklam leh akhe suhek kha hi; huaitung bang in
leng anaa acih lam ka za hetkei hi. Tua a natna bel khuthek khehek
sawtlou a dampah ding a ngaktheih ahikei, khovel a doctor siam mahmah
kici tenle haksa asak mahmah uh CANCER natna ahi. Bangdia hiaibang
vangsiatna aman tuak sese ade o ! cihbang ka ngaihtuah vungvung mai hi.
Hiaibang khong ka ngaihtuah kawm in mittui dai cihmahtak ka mittui hong
luangkhe nak hi. Ka kiang a tu nupi theih ding bang kalau sim zel a,
himahleh ka ngaihtuah khak ciang in, ka mittui hong pawt nilouh hi. Aman
leng achang a hong etphei dan in zaw hon hehpih mahmah in akilang hi.
Himahleh hiai khovel a kihehpihna in bang a ahihtheih, kenle ka Nanau ka
hehpih lua aka. Himahleh huai hehpihna latsakna dia ken bang a ka
boltheih ? Ka boltheih bangmah a omkei, achang bang in keilam ah
kimohsakna ding bang ka zong hi. Nanau toh ka kingaih uh kumnihna ding
vel in, laisim a ka omna lam a ka paisuk dekin hicin hon chi hi, U ei
non mihing i maban ding leng kitheilou, kei lah tomkhah ka damsung na
kiang bek ah om nuam ing, non paitouh non ciah honpi mai in hon cihlai
nite a AW cihbeka ka na dawnlouh hi poi ka sa petmah hi. Mi damtheilou
ahihna ka theiciana himahleh hicibang natna khirh tak ana tuak ding in
lunggelna ka neikei hial hi. Ken bel thutak deuhmai in huai khong cihcih
louh ding, lai hon sim ding ing a sepna ka neih ciah i kiteng ding chin
ka dawng hi. Himahleh Sian vaihawmna c uh kuan apel thei a, nu le pate
deihsakna jaal in pasal hoih mahmah leh ka lawm Lian toh ana kiteng ua,
ka deihsakna thupipen ka piak vetei a ngaita. Hunluite ka ngaihtuah kawm
a ka tutna ka om laitakin ka liang hong kibeng theuhtheuh a ka ettouh
leh conductor pa'n na khua uh tungta i hi hon chi hi, kei leng ka vante
pokhiain innah ka lut hi. Ka nu le Pate kuamah hohna nei ana omkei uhi.
Inkuante toh kimu nanana cu lungsim neukha azang deuh mahmah hi. Van
puakte khong enin naute bang leng akipak thei mahmah ua, huai bag kawm a
Van ka puak khat Nanau tanu adi ka cihpen a guk in innsung lamah ka
vakoihkhia hi. Huchi in sawtlou kong kihou nung un, ka tawldeuh a kong
tawldam zualdi chih suanlam a neikawm in lupna lam ah ka lutsanta hi.
Gimsim chu ka hi ngeidia zannih bang nunlui sialna leh ngaihtuahna a
ihmulou bang a kihih hial chiang in, sawtlou kalin ka na ihmu kha hi.
Nitum di kuan in ka nu'n, " Bawi aw, na lawmte hong hoh uh eive non thou
diam ? " hon chi a, kei leng awle nu, chin ka thou khepah hi. Nidang a
lawmte ka na kithuahpih sek Siampu, Muana leh Suannou ana
hi uhi. Kimuhlohna bang sawtsimte ahihman in ka kingaina mahmah uhi.
Huchi in sawtlou thu vantang khong gen a ka om nung un amau leng annek
hut chi in hon paisanta uhi. Nitak annek khit khua mial ma deuh in
innkong ah khuamial ngakna leng hikawm chi in, ka tu khia hi. Lianpu
leng tuitawi din hon kuan a, ka inn uah hong bang malam hi. A loinu bang
chi deuhta hiam chih ka dot chiang in gen haksa asa mahmah hi. Ken leng
nitak chiah hong vak kong sawm ding aw lawm Lian chi in ka vaikhah hi.
Lawm Lian le nidang a i kipolhpih ana hihman in kimaingap mahmah thou
hi, amah bang leng mi kisuanglah mahmah ahi a, adiak in kei tung diak ah
bang a kisuanglah diak hi. Aziakbel Nanau toh ka kingaih uh a theihsa
ahi a, hilele cihsa bang in nu-le-pa gawm ahihman un, ken leng kuamah
mohsak ding leng ka neikei a, lawmta ka hihna uh beituan lou hi.
Lawmta
kichi mah leng le bangtan hiam in halna hon neita ahihman in vakipolh
gige dan leng omthei tuanlou hi. Nidang Nanau toh a kiten tung uh chih
di hinteh zudawn chih bang ching zeuhzeuh in, khatvei nitak khat zaw a
zukham lung in hon chouchou mawk a, paukam kilawmlou tak hon zatkhum
nung in kidek haksa sa law sam zaw ka hi dia, ka kisual kha uhi.
Himahleh a zingciang in kisuanglah mahmah in ngaihdam bang hong ngen kik
thepthup zel hi. Huai nungsang kihou cih luat le omlou, khua bang a
leng ki-om tamlou ahihman in kitangnel khollouh toh kuamah polh di pi
leng ka theih khollouh toh innlam ka pai chiang in leng inn ah ka om
nilouhta mai zel hi.
Tuabang a lungsim suangtuahna a
ka na lutlai tak in Bawi kikhomlou ding na hia? chi in ka nu'n hong dong
hi. Tuni zaw kong kikhom dah di chi in ka hilh a, ka pa toh amau leng
kikhom ding in a kuan uhi. Kei leng Nanau vaveh ding ka chihsa ahihman
in ka van puak pen ka vala a kong kithoi kheta hi. A diktak in bel Nanau
te inn khatvei leng sik kha nailou ka hihman in ka huphurh gusim mahmah
hi.Huaiban ah mi hong theih khak ding bang ka lau gusim mahmah hi.
Mihing lungsim kibanglou ahihman in a selam khong a ana lak khak ding
bang uh ka lau mahmah hi. Sawtlou kong pai nung in a innkong uh chu kong
tung petmahta, kong kiu di ka hia, sap thoh di ka hia? chih ringot in
leng ka buai khop hi. Nidang tangvalnou lai a hoih saksimte inn a hohdek
lut ngamlou, innkong ua ding in ka kik mai de aw ka lut de aw? chi a
lungsim neih hunlai toh kibang hileh kilawm in ka lut ngam zok pah kei
hi. A tawp in Hangsanna teng suahkhawm in kongkhak chu kon kiuta a,
gintak ngei bang in Lawm Lian in kong hong hon a kei leng ka lut ngal
hi. Innsung a nupen tangtheilou cihmah chu a innsung uh a thang nuaih
mai hi. Nanau dam a semzou hileh bel a innsung uh khosung a dia siangpen
leng hidin ka um hi. Nidang ka kithuahkhawm lai khong ua lawmte'n hon
chiamnuih na gige uh khat tuh Nang a Nu (Nanau) te inn zaw hoh ngam huai
kei phalbi lam chiang khongbanga khua vot si, amau inn lah siang si hoh
tenga khedap sut gige ngai, mooza kekna khong, a namse deuhte khong
kilang lua in chin chi a hon chiamnuih na gige khat uh ahi hi. Himahleh
Nupen in innsung na asep theihlouh chu van bang leng kichuptak a koih
chih leng om thei kei hi. Tua mah bang in a innsung uh ana thang
zengzung mahmah hi. Common room ah sawtlou lawm Lian toh kihoulim in
huai nung in room lam ah Kum nih nung a Nanau ka khatvei muhna ding in a
pindan lam uh ka zuanta uhi. Lupna tung ah Nanau chu ka mu ngei a,
himahleh hiai ka Nanau ahikei bang chihtheih khop in lamdanna tampi ka
mu hi. Kei hong muh tak in pau haksa sa pipi in 'U' dam a hong tung na
hi maw ? chi in chibai hon buk ding in a khut hon van tou a ken leng ka
chibai hi. A khutte ka en a kilawmna ding himhim ka mu kei. A vot dekduk
a, guh ngen hileh kilawm mai, et a haksa ngei mai, nidang a a melhoihna
leh a minthanna bahsam sau ngiingeite lah muh ding a omta kei. Taksa
kiphut hoih mahmah chi a atek akhang in hon gensek nate uh koilam tungta
ahia ?Nau...! Ngaihtuah dia kilawmlou hileh kilawm pipi ka lungsim ah
hong lut nilouh hi. Drip buk khat kikhai kawm leh gim leh tawl kisa
mahmah hinapi a non houpih nate khong ka zak chiang in dawn nak sang in
ka mit apan mittui dan vuallouh in hong pawt zungzung mai hi. Sawtpi va
omna chi leng hilou ahihman in kei leng innlam pai phot ka hon sawmta
hi. Ka ipsung a ka van puak ka piak kawm in hiai na tanu ana silhsak in
chi in ka pawtsanta hi.
Lampi a ka pai kawmkawm bang
in ka mittui hong kia-kia mawk hi. Inn ka tun in kei leng lupna pindan
lam ah ka lut ngal hi. Ka window ka hong a solkhapi taang singseng bang
ka en a; nunlui chu genseng louh in mitkha in ahong lang dundun mai.
Lehlam ah tu dinmun ka ngaihtuah chiang in Nanau ka hehpih mahmah hi.
Sawttak mahmah ihmu theilou in ka om nilouh hi, mit ka shing chi leng ,
Nanau mel hong lang zel. Ka ngaihtuah khak in lah ka biang ah mittui
hong kai zel, Lohtheih lah ka nei kei. A tanu dinmun ding bang ka
ngaihtuah sak a, lawm Lian dinmun ding bang ka ngaihtuah sak zel a, ka
lungsim toh ka kisualsual nalam in ak masa hong khuangta hi.
Tuabang
lungsim suangtuahna khovela ka lut lai ka cih leh dak hong kikhen ging
hileh kilawm kaza a, hoihdeuha ka ngaih leh misi dak ana hi a, kei leng
thoukhia in innkong khong ah kuahiam muhtheih a , kan theih ding a om
hiam chi in ka pusuak hi. Innkong ah mi hong paite ka na dot leh, tamai
zen aw, damlohna nasatak ana tuak himahleh hicibang a hon beisan phut
mawk din leng ka koih theihlouh, nidang a Nau chi a duattak leh Ittak a
ka na sap gige, Nanau in khovel gentheihna leh luankhi nulna gam a
kiknawn lou ding in van a Pa kiang honna zawtsanta. Ka zak tung in bang,
ka lung khong hong am veivui in ka thei mawk hi. Innsung ah ka lutkik
a, loh didan tuanlah ka theikei a, aguk in ka kapkap maita hi. Zingkhua
hong vak ding a hiai khovel a ka na itpen leh ka na ngaihpen leivui
suakta mai ding zaw... Ka phalthei kei law mahmah hi. Huai ni chu nidang
a hanhoh gige leh han laihna mun khong ah makai khong ana kihisek mah
leh, huai ni zet chu, kuamah kiang a le om utlou keikia a om ka tel zaw
hi. Hunlui ngaihtuahna lel ka tantawk ahi chih ka theihsa himahleh, hiai
khovel a non dampih laiteng zaw Nanau nei suak hing a, tua Nau chi a ka
sap ding kua omta...? Sun nitum dong in ka luankhi ka nul nilouh mai
hi. Nitaklam sivui khit zawh vel in Nanau lawm ngaih mahmah Kim ka inn
uah hong hoh a, ka mel hong muh in zaw haksa satei ahi dia, a mittui
khong bang le hong nulsam hi. Nanau in a damlai a kei adia laithon ana
gelh lianlou chik a kitun khat hong pe dia kisa zaw ana hin, ken le kal a
a ka simpah hi..........
Ulal
I kichiamnate bohpelhtu ka hi a, hiai bang laithon le na kiang a gelhtak le ka hi nawn kei. Himahleh hiai ka laithon kon khak nana simkhak chiang in khovel mihing a simtheih in ka om nawnta kei dia, haankhuk sung mial ngemngum lak ah koihkhiak in ka na omta ding hi. Himahleh , hiai honna simsak in aw....
U ei, hiai ka damlohnate na kiang a om a thuak hileng zaw dam khosuahna ding tum in ka beih mahmah ding. Hiai khovela nanglou ka it ding leh ka ngaih ding omlou hi. Hiaibang ngaihtuahna in kum hong kivei a ka natnate dou ding lunggel sang in, sihsuk mengbang ka na tel zaw hi. Nidang a na omna lam apat a zungbuh kilawm leh hoih mahmah non puak pen kon khak kik hi. Pasal ka neih apat in khatvei leng ka bulh nawnta kei hi. Nang leng Nungak hoihtak leh feltak hon zong inla, Sian awina tuibang nong gawm ni chiang un hiai zungbuh na zi ana bulhsak in.
Huan a tawpna ding in ka tanu na muhkhak chiang in midang et in ana en ken la, kei mel a na muhtheih omsun ahihman in na muhkhak chiang in leng na tanu bang a ana houpih sek ding in kon ngen hi.
Nang hong it gige leh hon ngai gige...........
Nanau
Ka hon simkhin chu bawl di omlou mit apan mittui hong luang zungzung mai hi. Kumte hong kivei dinga hiai ka ngaihtuahnain bangtan hong tun ding hiam cihleng ka theizouta kei hi. Nanau in hon paisan nung ninih vel in a han ah lawm Lian toh a tanu toh Kim toh ka vahoh uhi. Pak kilawm mahmah leh hoih ka sak mahmah Rose pak khat ka keng tei a, Nanau han ah ka koihtei hi. Kalkhat zoh nung in kei leng Lamka lam ah ka vazinsuk a, Ching toh kong kithuah tou ua, kong ki it in kong kingai mahmah uhi. Himahleh kei lunglai a ka ngilh theihlouh Nanau zaw kei adia siam hikei mah lele........Hiai khovel a a nunsung tom ka sa mahmah hi. Mi hiaizah lailak a amah khelkhel in natna deihhuai hetlou hiaibang a ana vei a khovel nuse din zaw ''PAMMAIH HINA MAIZEN CIA MAW NANAU"
chi
in ka gel vungvung sek hi. Ching toh Sian lemgeel na a tuibang kong
kigawm ni un, Nanau last wish suk pichin sakna ding in Ching khut ngei
ah huai zungbun cu ka bun sakta hi. Nanau toh ka tanchin bang uh Ching
kiang bang ah ka gen a numei mittui dai cihmahtak a mittui peuh hong
taakkhe kha zel hi. Hiai khovel a ka hin dawng in Ka Nanau bel ka
mangngilh theikei ding hi.
BEITA......
Writer's Note : Hiai tangthu ahihleh phuahtawm (fiction) ahi a, hiai a sung a min te leng phuahtawm vek ahi. Hiaibang min kibatpih i omkhak leleng, kuamah i kigenna leng hilou, phuahtawm ahi chi in ana thei ni.....LUNGDAM
Writer's Note : Hiai tangthu ahihleh phuahtawm (fiction) ahi a, hiai a sung a min te leng phuahtawm vek ahi. Hiaibang min kibatpih i omkhak leleng, kuamah i kigenna leng hilou, phuahtawm ahi chi in ana thei ni.....LUNGDAM
©Siamsinna leh Vakiangbu
Comments
Post a Comment