A VULSA ROSE PAAK

By ~ Gou Lian Lun Tonsing

Pawl Xii (sawm-le-nih) ka zil kum in lawmte'n facebook account khong nei ahingei ding ua. Keile account hong diing in hon sawl sek ua, himahleh, ken bel  Xii ka zohma hong lou diing ka hihdan ka gen zel hi. Hunte, nite, khate beizel ahihman in Xii exam zouta, sepdi omlou ahih manin homeguard in ka pang zel hi. Inn a omom le chimhuai ahihman in nasep nang ka zon leh ka mupah a, a ziing in ka vakuanpah hi. Nasep hi nuamlua ahih dan bang ka vaphawk suah phiing a. Kha khat phialdi khong nasem a, ka kuan nung in result (Xii a) hong suak petmahta. Pathian hehpihna ziak in second in ka pass tei a, ka kipak petmah chih louh gendi le ka thei tuankei huai hun in zaw.

Maban sunzom di'n leh neihziak hilou, belhding a om ziak in.Vangkhua nusia a Vaigam a siamsinna sunzom ding in capital (Delhi) ah ka vapai a. Huaimun a sawtlou ka omnung in, ken le a sakmin lawibang i thansak un Facebook account ka nei khongkhong ta. Fb ahihleh kei di'n lawm hoihpen a suak tamai hi. Asuun-azaan in ka kipolhpih a, hunte ka zang khom zel uhi. Mibang a melhoih hikei mah eng numei melhoih bang kithei mahmah sam ahi ngei ding a; Nikhat ka online leh people you may know kichite lak a khat (Buangte) in, ka mit lalua kha, alemlakte(photo) ka baan et tamai zaw. Et maimai in ka lungkim teuh kei. Friend Request ka khak pahchet mai, minute 5 nung di khong in honna except pahchet vanglak a.

 Kei le kipaklua ka hi ngei diing a, inbox pah vitvit mai. Bangdangle genlou himahleh kamsiam loupi kikam siamsak chihdan pian in, kipahthu khong ka gen thethu mai hi. Huaini apan facebook leh Buangte ka ngaihhna a lian hulhul tamai hi. Ka online khak chiang in Buangte ka text deuh gige a. Lem upload te, status khong ki like, comment saktuah deuh gige ka hih man un ka na vei petmahta.Nidang a nungak melhoih ka sak mahmah leh ka lungsim luahzou mahmah ka chihte, Buangte kon muh ni apan zaw,,,,Huai tengteng ka lungsim apan paihkhiak hileh kilawm takin, mang vengveng mok uhi. Ken le lamdang ka sa khop mai. Nidang a nungak tampipi melhoih sasek pa'n, hiai nungak kha t(Buangte) ziak in, khovel a numei dang omlou hileh kilawm takin ka na vei mahmah tamai hi.

Hunte mualliam zel himahleh kei lungsim a zaw Buangte a mang theikei. Nikhat fb apan a phone No. ka nget leh ei a khong na deih peuh a eita chi kawm in piak toh hon thuah chat vanglak hi. Fb ahih louh tawp a ki text zelni chi'n ka kithukimta uhi. Hiaidan khong a, a hong om chiang in ka kipiak hoih ziak adiam a, lametna omlai chi'n kuamah theih pihlouh in ka na kipak gu mahmah a. Hilele alehlam ka ngaihtuah chiang in numei pilte'n a deih leh ngaihlouhte u zong a kibang a, pawldan Siam leh thuahthei achihte uh tuakkha hidiing in ka kikoih zel hi. Aziak tuh melhoih lua ahihman in, kei maimai khong a kamsiam lel hon piak hi ding in ka ummok hi. Huai teng khong ngaihtuah kawmkawm in melhoih sak kia, phone No. neih a lungkim thei di ka hi nawn kei. Phu leh phulouh chih om selou in a tanchin khong dong zel, akaal a itna thu (melhoih ka sakdan leh ka ngaihdan) khong hel cheuhcheuh zel. Tuadan a hunte ka hon zat zaw nite atawm thei khopmai. Melhoih petmah himahleh kiliansak na e, ka chih na ding ka thei hetkei zel. Ka text chaing leh thudotna ka neih chiang in, a hon thuk, dawng khial ngeikei. Hiaite ziak in ka itna a kibehsap semsem.

A kiang a chiamnuih thutak dan a, it ka hih dan tamveipi ka na genkhinta. Amah apan lametna liantak neilai ka hihman in, ka lungsim a ka puak zoh nawnlouh itna pediing in ka thupukta. Himahleh a hon haal khat om zel ahih ziak in ka gen ngamkei zel hi. Gen kei mawk leng maban a kisiik ding ka hi chih kithei ka hihman in heina khatlouh vaag in, Ka itpen Buangte kiang ah ka itna ka pekhe loih tamai hi. Buangte sakmin piandang Facebook apan namel etlawm takte apan ka mit seldi ka chih chiang in ka sel thei nawn kei a.Itna ka neih sunsun nang a ding in chi'n kei mah leh, nang apan pialkhe utlou leh paikhe ngei nawnlou ding in kon na it in, kon na ngaita. Kei a ding in na sinlai dawngkot a awng lai diam Buangte? Gen theih dandan a gen in ka itna chu pekhin ka suakta. Kei nasep di semkhin ka hih man in, Buangte in nna ahon sepsak di ka ngak ta hi.

 Hiai bang a itna thu ka gen zoh sawt lou in, Buangte in "uLian aw,  na itna manpha takmai kei bang leltak na hon piakziak in ka kipak petmah, himahleh hehpihtak in hon thei siam mai in o. Nang a ding in chitna ka nei kei lua a, kon dawng ngam kei. Ngaihsiam o, uLian". Hiai teng a dawnna ka ngah mawk pen lamdang ka sa a, ngaihzawng nei mo leh ? Na hon deihlouh ziak a chinlou chih paulam khong na hi di e ! Ahih kei leh bangziak ahon it thuk ngamlou na hiam ? A ziak na hon hilh kei le zaw kingaise petmah di ka hi. A ziak om ahihleh hoihtak in hon genchian mai in aw Buangte. Huchi lou in zaw ka hon ngaidam thei kei di, kon theisiam thei kei di. Chi'n khauhsim tak in ka gen nawn a.

Sawtlou in hiai bang in thukna ka ngah nawn, uLian i kitheih ni apan ken le polhnuam kon sa a. Ka omna ua na high skul kaipih leh college kaipih ahon thei chiang mahmah ka lawmte kiang ah, na hinkhua na omdante ka na thei khinta. Nang huchi tuk a mihoih leh siangthou pen in kei bang leltak na hon itpen kisuanglah ka hi. Nang a ding in zaw  nin bangbang ka hi a. Hiai khovel a numei sangtampi, etlawm taktak leh apaak palhdia kisa lellelte itzaw/ngaizaw mai in. Kei zaw  "A VULSA ROSE PAAK"  ka hi . Nang a di'n etlawm lua leh namtui ding in ka kikoih kei. A vulsa rose paak maimai ka hi, midang nang toh kituak di ana zong mai in o. Nang di'n zaw ka chin kei lua, hon itlou, ngailou ka hi kei. Ka dinmun nang a toh a kituak kei lua..... (Hiaiteng hon genzoh in) Buangte bangziak a, "A VULSA ROSE PAAK" kichi na hiam ?? Hichi tuk a melhoih chin a, kamsiam, thuahnuam leh na kiliansak kei a.Himahleh A VULSA ROSE PAAK bangziak a kichi e leh? Ulian na kiang a gen dia kilawm hetlou leh zum huaipi ahi na a, kon genmai di aw. Hiai leitung mu dia ka pian khiak in ta nu melhoihtak mai leh deihthoh huai tak mai in ka na piang a.Tanu melhoih leh neihsun ka hih ziak in ahon duat ua,ka khasiat ding a lau petmah uh.Melhoih lua leh mite mit ana hiip ka hi ngei ding a, naupang chik class 9 ka zil lai in. Pasal melse hetlou khat in hon na ngai sam a, naupang lai ihih ziak in melhoihte mah kingai sang ahih chia, ka na ngaithuk tei a. Amah pen sepaih pang ahi a, sawtlou ka kingaihzoh un nute pate phalna tellou in ka na kiteng ua. Sawtlou ka kiteng nung un  a sepaih panna lam ah,kei leh a innkuante honna beisan a. Bangchi bang a si hiam chih ka thei kei uh. Hilele a lawmte'n bel vuuk lak a,ka pailai un a hong tolh a (vuuktoh) huchia si ahi achi lel uh.

Ka pasal in hon paisan nung kei le naupang lolai ka hihman in, lungzuang leh ka nute ngailua ka hihman in.Inndongta kihou lemna toh huchia kei le ana nawkiik ka hi. Hiaiziak ahi "A VULSA ROSE PAAK " ka kichihna. Ka kiphatna hilou in Pathian vualzawlna ziak in, melhoih mahmah sam himah leng. Nang leh mite a dia a Vulsa ka hi a, huaiziak a kisuanglah leh nang a dia kisit ka hi. (chi'n Buangte in ahon gen a) Hiaite ziak in ka itna a kiam tuankei, It semsem ka hihman in a kiang ah hichi'n ka gen thuktei non a, "Buangte ka kiang ah thutampi na hon gen a asia hi'n apha hileh, thupi kon salua. Na thugente nang ut ziak ahi kei a. Kei di'n zaw A VULSA na hi zenzen kei. Hihmalak sang in kei din na etlawmna genseng di ahi kei. Paak hong paakpalh dia kisa lellel bang na hi zaw. Phabi zingkal khovot mahmah lai a, mualdawn a ziing ninou etlawmtak hong suak khia bang in, na etlawm a; Ka hinkhua nanglou in zaw a bukim thei kei di. Hiai khovel etlawmna ngei zong a bukim ngeikei di. Ka hon itna theisiam in la'n,hehpih in hon sansak mai in o. Lungleng tak a lawm leh vual ka polh gige pen nang na hi atheng saktu di.Hon itthuk sam in o, Buangte . Kon itdan ngaihdan ka gensiam louh hang in na theihsiam kinem ka hi o. " Siamlou sasa a ka gen himahleh ka itdan, ngaihdan haihlou ahi ngei ding a. Ulian hiai teng na kiang a ka hon gennung a hon sit hetlou a, ka hihna bangbang a na hon pomsak ziak in ka kipak petmah a, hiai bang a na itna thupitak ka tan ziak in, tuni apan in lungmuang tak in pheiphung ana suanta in aw. Ka paakzu ana kitawp khin leh ana vulngei mah leh nang adiing in ka paakzu akhumthei pen di leh namtui thei pen di'n ka hinkhua ka na zang di o. Ulian lailung muang inlan, i omna peuh ah ginom ni aw. Nang a diing bek a hing ka hi ta.

Lungzuan hun a kihehnem tuah ding in August 15 in tongdam naubang honna saansak(Buangte) toh tongchiam pellou di'n tong ka na kichiam ua. Huai ni apan zaw ka hinkhua bukim tuan in ka thei a. Ka pheiphung suan ngeile zaangtuan hileh kilawm in, ka heisuk, heitouhnate lamzang leh baihsam tuan in ka kithei hi.

Naupang chik himahleh a lungsim a piching a,ahon itdan a lamdang mahmah mai. Kei le a itlou ka hikei,himahleh kei saang in ahon itna a lianzaw a, Ka lung amuang a lawm leh vualte ka polh hun inle lungleng vungvung kawm a. Ka hinkhua ka zat lam huai ni apan huih in amuutkhiak hileh kilawm tak in ka siang apan a lengmangta. Kei di'n khovel bukim louhna gam himah leh bukim zouphial inle ka thei zou hial hi.

Ka kingaih mahmah hang un,haksa ka sak mahmah khat tuh heina mual leh taangte a kibang kei a. Bangchik leh mel kimu tuah di ka hi ua chih ka thei zoukei uh.Himahleh kougel duhthusam in zaw kumtawp chia Lamka vangkhua a kimuh di chih ahipen mai.

Buangte Ami zalai a sawlbang i heizong in chiamsa simthu paitem bang kuah den in aw. Kumsawt khenlou dia i chiamsa simthute, khuamual hon suah aw khen diing gellou in Heina mual-le-taang adang zong in ngaih, nang a hiing e chi in aw, nang akia chi'n. Sakmel dawnbang kituak a, lungzuan i sialnate suutkhom a tuibang kigawm di kaal ngaklah lua ing e. Chih peuh in ka hehnem zel a, kei le kei le kihehnem ka hi veve mai (a diktak in zaw)..

Phalbi anai mahmah ta, a "ber"  khakhat bang le bei nuam ahihtak man in. Kou gel adin zaw kipahhuai semsem a bangta. Hun awl ka neih chiang un ka kihouzel, text zel in. Itna thute leh lungzuan simthu lelkhom in ka ki itna uh ka kipsak semsem uhi. Ken ahihleh ka itdan atuam a, a lamdang a, ka itpetmah mai. Lawmte'n bang lamdang ahon satawp mai uhi. Hichi bang a a vulsa khat na huchi ngaih nang di na bang kei lua khong a hon chisek ua, hilele ka itna a kiamthei himhim kei. Mite adi'n zaw vulsa himahleh kei din zaw a vulsa chih atan di ka phal himhim kei. Buangte nang zaw A VULSA chih min na tangta, himahleh kingaisia hiam leh kisiit hetken aw. Na vuldan a siangthou a, ka hon ngaisang veve. Nanglou na khanvualte zaw a pawlam et in asiangthou ua, nungak lai tampi aom uh. Himahleh bangkim thei TOUPA leh kuate hiam theih in nang sang in A vulzaw ua, a kihhuai zaw thamtham numei tampi a om uh. Chih khong gen saihsaih in ka duat luat Buangte lem ka en a. Hichi bang in ka gen beh lailai hi. Hinkhua hiaitan ka zaat nung in mun tuamtuam ah paak etlawm taktakte. Namtui taktak tampi ka na mu a, paak etlawm mahmah bangzah hiam ka khut a, lohmai theih di le tampi ana om sam uh. Himahleh bangziak a hiai paak vulsa pen in ka lungsim ahuchih luat hihiam.Selung ka mawl vang hiam aw, ahih kei leh ziin vaihawm hihiam?? Tanglung mawl in theisiam kei veng aw Buangte. Na kha vangngaih lai ah na lua sa ing. chikom in Buangte lem ka tawp zat a (amah lah tawp pha lou ka hih mokchia).

Hunte,khate tuibang a luangliam zungzung in, kumtawp anai hiaihiai ta. Ka ngak lah ua ka kimuh chiang ua hun ka zat didan uleh nawp ka sak didan peuh uh ka ngaihtuah chiang in. Ka om thei nawnkei, ka lai zilna bang tawp mai a, amah toh kiten mai bang ka lunggulh tuntun sek. Buangte te Shillong a khosa ahihziak un kumtawp chia ka kimuh theih louh di uh bang ka lau ua, nikhat kei le Buangte nu kiang ah hichi bang in. Zum zou nawnlou ka hi ngei ding a, nu aw kumtawp chiang in Lamka ah hong zin un aw, na innkuan ua ahih louh tawp Buangte na hon zinsak di uh ahi. Ngailua ka hihman in, kumtawp chiang a dam leh amah tawh ka kimuh tuah theih nang un hunlem hon gel sak un aw, nu aw ka chih khe zoihzoih tamai chu aw... Anu'n zong ka kingaih uh thei khin leh ka kaal uh hon hal lou ahih ziak in, huailai in bel aw chi kei mahleh Buangte in phal ahihdan ahon gen a. Ka kipaak tuak mahmah mai uhi.

 I ngaklah mahmah sek uh kumtawp tuang a hong tungta. Buangte in a hon ngaklah mahmah mai. Lamka ana paipah dilah tanaute, pi leh pute kia tung di himahleh. Kei ka tun nichia tun a ut sese ziak in a honna ngak chet chet a. Kei le ka college kaina bangteng felta innlam pai nang zong, flight ticket lakhinta,himahleh ni nga(5) khong omlai ahih ziak in, tanau laina leh lawm leh vualte zinpaak dia neektheih leh van khong lei in. Ka pai di ngak in ka omta. Buangte le a van diteng mansa a kei paini chia hong pai dia mansa in a om chih khong a hon hilh a. Ka phur tuak mahmah mai uh.Zinghal chia pai di ka hih taak man in ken le Buangte van di banghiam khat puaknuam ka hihman in, shopping din Sarojini market lam ka zuan vengvengta. Ken le a van di khat leh nih leizou, innlam zuan in ka pai pah tingteng a.Inn tungphet ka vante koih khia Buangte ka call chiang in a phone apai thei kei mok  hi.Lamdang chu ka sapetmah mai. Himahleh huchitel a lamdang sakluat na di omlou (zingkal ale ki txt ka hih ziak un) ahihman in. Ken le denlam deuhchia ka houpih zawdi chia ka vante khong suah in.ka van pauk dite khong packing bawl a ka omlai tak in.

Ka phone hong ging a,ka etleh unknown Number  ahi a. Himahleh ka pick-up veve. Huchia ka pick-up leh Lialian maw? hong kichi a ken le himah ing e nang kua e ka chi sukpah a. Kei maw Buangte lawm ka hi aw,,  chikhin phet a tongsuah kidang pah ahihman in. Kei le ka lungsim a nuam kei pah a, kidiip hawm komkom a,a thugen (haksa sakom tak leh tongsuah tuam deuh a a hon gen tuh) mittui taak keuhkeuh kom in ka ngaih khiaksak vongvong tamai hi.  Ka van di lei a,a vapawt nalam ua vatuahsia a, a it mahmah a sungkuante, l awm leh vualte leh kei mahmah zong hon munuam mahmah himahleh hiai leitung gim gentheihna gam. Tuangnung siah di'n hon na paisanta.

Hiai bang thu ka zaak in ka mit apan siiktui piandang takmai khaam vual louh in a hong luangkhe zungzung a. Aw ka it Buangte buanlei suak di'n paamlua chia. Nanglou a hinkhua ka zat di zaw ka ngai ngamkei. Lungzuan simthu suutkhom a, nang toh hun tawmchik bek zangkhawm di i chih lai a. I tung a hiai bang thil deih huai hetlou leh zaak ut huai hetlou ka siang ahong tun zaw.... Thuaksiam a haklua, Tung Thianmang aw ki awi na hiam chi peuh in tung Thianmang bang ka ngoh ut phial alah hihtheih ka nei tuan kei. Ka it ka ngai petmah a, hiai bang a ka duat Buangte in mual a hon liamsan mai zaw mihing hihna ziak in; a thuak hakkhop mai. Hiaitan ginom tak a ka kingaih zoh nung ua. Kimuh dek sunsun chia kipaktak a innlam pai di chi a ka na ngaklah luat lai in; Buangte mualliam ahi chih ka zaak apan zaw inlam a ka pai di le ka phur nawn kei a. Ka ticket le ka cancel top mai hi. Buangte nang ngilhni tuang tung ngei lou di a, na aw neemtakte, ka bilkha ah a ging den ding a. Na sakmel etlawm takmai ka mitkha ah luan den ding ahi aw....Buangte. Hiai simlei ah tuibang in kigawm thei kei mah leng Thangvan ah aksi bang in tangkhom ni aw Buangte. Na muuk rose paak bang a etlawm tak mai itna toh kon tawpdi kaal ka ngak lahlah maizen toh mo ... tunlah itna toh hon tawp nuam mah leng ahi thei nawn kei maw......Himahleh khatvei bek ka hon tawp di aw chi kawm in Buangte lem ka phone apan ka etlai tak tuh ka kiss chot tamai a, Buangte chiaugaal ah dawn bang kituak ni aw..................kon ngailua. Kimuh mateng ginom tak in hon na ngakngak in aw, Sawtlou in kei zong nasiang ah ka hong paipah di aw Buangte, chi kawmkawm in chiklai peuh a ka muh ut gige Buangte tuh mittui toh ka khakheta a. Kei le innlam pai di ka chih pen pai nawnlou in lungzuang tak leh nguitak in Kolgam-Vaigam ah X-mas leh Kumluite ka zang beita. Chik leh Buangte ngilh ding ka hiam aw.... tuni tan inle Buangte sakmel ka enchiim naikei. Hon na beisan khin himahleh ka lunglai ah a hing den lailai tuni dawng in.

Beita

©Siamsinna leh Vakiangbu