KHENTUAM NEILOU ITNA

By ~ EEm Woo Ti 

Khovel a mihing a piang photphot leh ganhing nangawn in itna kinei vek hi chile kikhial din ka gingta kei hi. Hiai a itna ka gen pen mihinpihte toh kal a itna, Pathian toh i kal a itna khaugui ahi chih i theih ka deih hi. Jesu in "Ki ittuah chiat un" a chihna san pen bang dang ziak hilou in,  mite tung a khentuam neilou a i vaihawm theihna ding ahi ka chi hi. Tulai khovel ka ngaihtuah ciang in kikhentuamna, kideihsaktuamna leh kiguptuamna atam mahmah a, skul hi in pawlpi leh organisation tuamtuam banah inkuan sung nangawn ah hucibang muh ding tamkhop ana om hi. Kideihsaktuamna ziakin deihsak a ompen a ding in kipahhuai in hamphathuai himahleh alangkhat ah midangte adia hazaatna leh ki siatna tunthei ding ana hizel hi. Makai khentuam neilou a,kirualtak a vaihawm thei mi kitamlou a,i khantouh theih hetlouh na uh khat hi din um ing.

Hiai kikhentuamna bangziak a hong piang hiam i cihleh i mihinpihte ki it zoulou a kihih ziak hi kha ding hi. Zawl kal thu a itna pen zaw ka genthei kei a, himahleh zawl kal itna toh mihinpih kal itna pen kibang din ka gingta kei hi. Kei mimal nasut dan in, It leh Ngaih kichi pen Itna vek himahleh It pen zawlkal thu genna a kizang tangpi a, Ngaih pen i mihinpihtoh kal a Itna genna a hikha diam ka chi hi. Tulai khangthakte lak ah itna chitampi omta a bang a, i mi itdan zong kibang lou dia, akhente'n thangtak toh it a, a khente'n siangthouna toh it dia, akhente'n sanggam itna toh en dia, akhente'n lah itna taktak toh it kha ding hi. Himahleh ka itna tan pen bang itna ahia chih theilou a kitalpaih tampi ki om maithei lai hi. Tulai itna a kiptheihlouh ziak ahihleh sa a kipat itna piang atam ziak hidin ka um hi. Melhoih i sak ziak a deihmawk, it chimawk,huchi ding hilou in,  i sung a, i lungtang a kipat a dalzoh vuallouh a itna leh deihna hong piang taktak hileh itna pen kip dia manpha zaw sem ding in ka gingta hi.

I topic ah lutnawn le, bang ziak a mihinpihte ki it zoulou a hidia i chih chiang in, i Christian hihna pen kip zoulou hidin ka um hi. Jesu Khrist a i om taktak a, khasiangthou thopna toh om a, khasiangthou sungtenna toh om mite'n mihinpihte itna taktak nei uh a, veina toh en thei uhi chi leng ka genkhial kei ding ka chi hi. Christian i kichi ua, i theihlouh kal a alem maimai i hihkhak ding uh lauhuai hi. Christian inkuan apat a pian ziak a Christian i kichih leh ana hituankei a, milem Pathian bete toh i dinmun kibang lai veve hi. Christian diktak i hong suahna din ah Tatna leh Ngaihdamna, thupha ngahna kul a, Jesu i lal leh kumpi dia i lungtang taktak toh i santak chiang in Christian ka hita kichi thei pan phet ding hi.

Huaiziak in khentuam nei a i leitung hinkhua ana zangzang i hihkhak leh i mihinpihte ana ki it zou khalou kihikha ding a, mihinpihte i na it zoh kei leh i Christian hihna ana dik khalou a, a minpu lel ana kihi kha ding hi,  chih ngaihsutna om a, kivelthakna ding deihna toh ka hon gelh hi.

Simtute teng Pa Pasian in hong vualzawl hen ! Amen.

©Siamsinna leh Vakiangbu