NOPNA NI SUAKLOU DING HI TA HIAM?
By ~ Xb Naulak AtFb
Writer's Note : Siamsinna leh Vakiangbu ahihna toh kisintouh nawn kisuanlah huai lua din ka koih kei. Phuahtwm tangthu gelh ahih ziak in, a peihloute'n sim teitei louh theih ahi...
Khovel kitaitehna sangtak, neih-le-lam a kidemna thupitak, mihau leh mithupite kitaitehna khovel a tai tei dia kei bang mi zawng leh genthei ka na piankhiak sese ka ngaihtuah chiang in ka kisik vungvung a , pianglou hizaw maileng maw ka chih hun a tam mahmah mai. Khristian inkuan a piang himahleng biakna lam ka limsak nuam ngelkei hi . Ka nu leh pa mibang a neizou a nuamsa a khosa ana hihlouh ziak un, mite silh -eh-teen nalh taktak te bang hon leisak zou kei ua, nalhtak a kicheina ding ka neihlouh ziakin a diakin Pathianni zingkal biakin kai ka thadah thei mahmah hi. I theihsa bang in biakna leng Pathian bedia kuan himah lehang khenkhatte a dia fashion show na hileh kilwm, anei leh hau deuhte adia kipahtawina leh kimai etna abang mai a, amaute a din zaw kikhop leng paradise a bang hial ding. Hilele, mizong daikilkal a mite adin zaw biakna kikhop leng gotmun kimkhat ahi mai, a zawng leh hau kal a kikhai luat ziakin. Kikhop d bang zum tuntun in Pathianni zingkal khat kikhwmlou in inn ah ka om hi.. Tapa tangkhat neihsun ka hi a, ka nu le pa'n ittak leh duat tak in hon kemtou ua, nek tom zong in kei maban ding khualna in haksa pipi in lai hon na zilsak tei uhi. Minek bang ne a dawn zou hikei mah le ung Pathian hehpihna zal in kou khomkhom in ka kitoudelh zou hamham ua ; unau tanau laina d lah a vang khop mai. Hon mullit hi le uh kilawm in kuamah inn ah hong ui dak di leng a omkei hial hi. Kikhawm hong tawp un ana ihmu kha ka hi ding a, ka nu'n hong phawng kawm in laithem khat na lwmnu hon piak chi in hon pia a, ka et leh, 'bag chi e uSang nawng kikhawm kei a , damlou maw ?zingciang skul kai kuan chiah hon manoh mangngilh ken o,' chih ana kigelh hi.
Ka lawmnu ahihleh skul dang apat kei ana kaina a hong kisuan ahi a, vengkhat ka hihziak un a hong kai tung apat midang pawl lou in ka na kipawl ua, kuan leh pai in ka kiton zel uhi. Ken xii simlel ka hi a, amah ka nuai ua geihte ahih ziak in class room khat a tukhawm theilou in , room tuamtuak ah ka tut uh a ngai a , haksa ka sa gu sim mahmah hi. Aziak bel nidang pek a kei kaina a hong kaima a le hoih ka na sak leh ka gukvei mahmah khit ka lawm Chingnou ahih ziakin.
Hun leh nite a ngeina bang in hong mualliam zel a. Kou leng Chingnou toh angei bang in ka kithuah tou zel ua, a chang in a inn bang uah ka vapawt zel hi. Ka vapawt khak chiang in ka gentheihziak mah in a nu le pa te'n hon na limbawl hetkei ua, ka kithuah d nasan ule hon phallou uh hileh kilawm in paulou hial in hon et thoh gemgam ua, himahleh Chingnou in hon ngaihnat ziak leh apilvang ziak in zumlua in ka va om kha ngeikei vanglak hi. Lawm hoih mahmah bang a kipawl himahle ung hon theihpih louh in ka na vei petmah mai a, im zoh vual hi nawnlou khop in ka itna a nini in a pung hulhul a, atawpkhawk in a guk in ka na it petmah hi. Ka itna thu vagen mawk d chih lah kei bang leltak mi neih bang neizou le hilou silhpuanpha le batzou lou, lawmte'n skul a nektheih Rs.50 man a khilai chiang ua ken Rs.10 man le khilai zoulou,huchi bang mi toh anbang ki it chi a zalai lawi bang thanpih ding in hon sit law ding chi in ka gen ngam mahmah kei hi. Skul kai kuan leh pai ka kiton khak zel ua ka kichiamnuih zelte uh kei a din ka damsung a thil manpha pen,Solomon innsung a agou manphate sang inle manpha ka sa zaw tham hi. Skul ah lah nu le pa hausa pipite tate ngen toh kithuah ka hi ua, lawmte lak a om leng nuam ka sa taktak theikei hi. Kei ka pianphung a ka tualniam luat hang in, kumkim bang nuamsa tak a ka hong kithuah touh nung un ka classmate te uh khat in Chngnou hon ngaihbawl a, ka classmatepa lah pate neihsa a nuamsatak a khosa , skul kai le gari ngen a hong pai ahih ziakin nungaknou sum le pai a nopsakna zongte adin a etlah huai mahmah mai.
Monday zingkal khat Chingnou in, 'uSang tuni zaw hon manoh dah in, na classpa uh, uLal in kong manoh d hon chi a, agari in ka na kuan mai d uh,' chi'n hon message a ken le, ole skul ah kimu ni aw leh, chi in ka thuk hi. Huaini zaw ka lungsim anuam kei diak a ka classmatepa u lah hong kailou, Chingnou lah melmuh phak dia omlou,skul kailou a koilak hiam a hunnuam zang a om khawm hingei un teh chih khong ka ngaihtuah a, ka pawna petmah hi. Kei a hikei mahleh ka itpen ahih ziakin midang toh hichia a om pen hazatna a lian petmah mai. Sum le pai hauh ziakin nungaknou siangthou tak leh lungsim mawltak a ut le dah in a bawl gop kha ding chih khong ka ngaihtuah a, ka lungsim van a khai bang mai in anaa hi.Nitak nasan ihmu lou hial in tuni bang a chi phet mah dia o, chi in ka it Chingnou ka ngaihtuahtuah mai hi.
Azing skul kai kuan in ka ton kha nawn ua,,,,
"Ching zan a bang chi e ? nong kai kei a, hon na miss lua keive," ka chih leh,
Hehehe...Kamsiam na chia, eikhong hon miss mahmah kei nite hon chi a ; kisuanlah meltak in, " uLal in skul hon tunpih d ka sak leh mun tuamtuam hon phak pih a hong kai khalou mah ka hi, " chi in hon gen zawm a,
Ken le ka lungsim in den chiah midang toh ana kingai in ka tangzou kei kha d chih lau in hunlem omsun leng ahi d chi in gensuk mai ka sawm a, ka kam in a genkhiakma in ka lungsim in 10 vei bang ana gen khin man zel hi.. A tawptawp in ka hangsanna leh ka hatna tengteng suah in hichi'n kon genta mai hi.
"Ching, kon gen ngam ngeilouh hang in ka omdan leh na kiang a ka om chia ka mel kipahna a adim zel dan in hon itlua ka hi chih na theihlouh ka gingta kei, huaiziak in sum-le-pai, neih-le-lam a hon en zawlou in nang kon itna a letdan en masa zaw din kon ngen hi. Kei bang leltak migenthei na lawm tak le hi kei mah leng kei ding a mun na hon phal leh singdang en nawnlou in kei le kei kimangngilh khop hial in nang a din ka hingta ding, hauhna a lei dng hi le zaw a lei zoulou d pen mah ka hi. Hilele maw Ching itna mit toh hon en inla, hehpih takin a chingpen bang in hon pom mai ve"
dang awk pi in ka genkhe notnot khong a, ka lu bang aktuam chia pha hileh kilawm in ka thei hial hi. A dai dide a amel bang nguai zou hial in ka thei hi. Kamkhat bek in hon dawng ve, Ching ? ka chih leh.
"hichi bang a nawn gen kal ngaklah tak a ana ngakngak mah zaw hi ve ing maw, hon itlou hon ngailou zaw hi keng uSang,hilele nang lah hon gen ngeilou chin a, zan a ka uLal toh ka pawt ua aman hon gen a , ana dawng khinta ka hi, hon ngaisiam in aw" hon chi hi.
Gen d a vang khop mai. aw ka lungtang teipi hiamtak a dawt pailet zot bang hial in a thugen in hon suna mahmah mai. Kei din solkha leh sunni tang nawnlou a bang hial hi. Ken le Chingnou kiang ah hi chi in ka gen nawn a, "na uLal in hon it taktak mah hia? Na pakpalh zu khuai bang a top nop ziak maimai adiam ? Nikhatni chiang in na pallaini hong vul dia, huai hun chiang in hon taisan maimah kei di na chi ngam na maw ? Na uLal in hon it taktak din ka gingta theikei. A hih kei leh sum le pai hauhna na etlah man a na kingaihpih phut mawk hia leh ? Itna zaw itna mah lou ngal in leithei lou eive ! Bang teng hileh hong pilvang in aw , Ching . Itna lampi na zuihna ah, sum le pai, melhoihnate a itna om hetlou ahi chih mangngilh ken aw.. Singdang siang sanmun na muang zong na laukha bek in hong leng zel in aw, zan khoswt a suihlung ka muanna din..Zanteng a nawn mangpha khak ka tantawk kei din kahna mai asuak ding maw.." ka chi suk ek mai hi. Aman le, ' aaaaa ,, ana dawngkhinta ka hih chiah ka suahsuah uh kong suak d uh . Hon buaipih dah mai in uSang,' hon chithuk hi..A uLal ana dawng lou hi ta him leleng kei zaw hon deihkei himhim d chih haihvual ahi kei . Ka pian tualniam luat vang in. Himahleh a kamsiam lel ka tantawk ahi, chi in hon kipak sak mahmah hi. Hucia itna khovel a om a, khovel dang ka phok hetlouh lai un theihlouh kal in classroom ka tung ua kainuam aw ... chi in ka room tuak uah ka kikhen ta uhi.
Huaini apan in zaw ka gentheihna a kibehlap petmah mai. Hiai khovel gentheite gentheih sawnsawn na khovel khapham tuangnungsiah thei mai leng, albang dahna lung a ngilh in hiai nuai simlei tuang nungsiah tang e. Ka it Chingnou lah a uLal toh nuamsatak in hong khosa ua. Kei lah amah vangngai a phamlou puldou pa a hon phok nawn mawngmawng kei. Ka hih theih om sun tuh a uLal toh kipaktak a a om uh a nunglam ua pat etliam vungvung ahita mai hi. Nitak nasan ihmu theilou in ka kingaihtuah nilouh a, pianphung a gentheih ziak in tunitan in ka gentheihna a kibehlap semsem a, kei zong mibang a hau hileng nungakte'n hon ngai mah di hiven ka chi vungvung sek hi. Khovel a ka pa liangtung mun sangpen ahih lai khong leh nektheih man ding Rs.2 khong hon piak chiang ua kipaktak a nektheih lei dia tai vengveng lai khong ka ngai ngoihngoih tel mai. " Kon itna lian mah leh sesum in aliah gai vek zel a, hithei lezaw van a aksinelkai nasan nang a dia hon laksak nuam hi ve ing maw Ching.. Nang lah nuam in laitual lengta d chin a, i sulnung teng ah khattang in koilam maimit suan ding ka hiam ? Nang ngai a lunglen banni lah om lou dia ! Navang ngai sanggah lelliang lung in hon gelthak inla ka gentheihna apat nunnopna hon tun mai ve !!! Pianglou ana himai lechin zaw kei damna hizaw kha maithei hiven maw !! Khapham kulsin tangthei himai leng maw !! " chi a ka genpah louh kisik a ka ngaihtuahtuah lai in taikhua val ding bu-al hong khuang ngelngel a lukham kot ngiingei zou hial in maimit singlou in taikhua ka vak nawnta hi. I kisik chiang in zaw bang teng a kikhel khin lam ahita. Chik leh mite bang a lungnuam leh kipak tak a ka thohkhiak d Ni hong suak ding hiam ? chi in ka thou khe nomnom nawn hi.
Nuam i sak chiang in zaw nikhat leng dakkal khat lel bang a tom himah leh, khosakna haksat ziak leh ka itpen chan a hun haksatak a zat kei a din zaw khovel kipei nawnlou a khol dide a bang hial hi. Sunkhua a sawt in zankhua a sawt thei ngeimai..Chingnou lah a uLal te mineizou tak ahih ziak un tuak fuh kisa in nuamsa thei mahmah mai. A damsung a hon mangngilh den ding hileh kilawm hial in a uLal toh khovel nopna palzou in hong lengta uhi. Haksatna tampi kal ah skul lam leng kumtawp farewell ni ding hong tungta a, hiaini ban lah ka it Chingnou mukha nawnlou maithei ka hih chiah, chi in kimuh pih teitei ka swm hi. Ka nu kiang ah pocket money d Rs.100 ka ngen a, huai toh skul lam zuan in nidang a Cingnou toh ka paina sek uh lampi tawn in kei chauh kong kuan a, ka lung a leng khopmai. Ka mitkha in a nuihmai kilawm takte ka mu dundun a, ka bil ah lah nidang a a O nemtak a "uSang nang zaw pasal dang toh na kibang kei na polhnuam lua" hon chih te khong aging den maimah hi. Thazoi tak a kapai napnap lai in Chingou leng a uLal toh gari a hong kipua in hon makhelh ua , Chingnou in hon sap kawm in hon bye bye a ken lah mittui vung pelpol in ka enliam vungvung a, ka lungsim in lah,
"aw ka phallou singdang tan ding in ,hon phal mahmah lou kei ve Ching, Keile mibang a hau a hihtheih nei hi leng zaw maw, nang lah na lungtup toh nuam in lengta chia, kei zaw i sulnung teng ah khattang in maw" ka ci vung2 phet hi.
Skul ka tun in programe zatna d hall ah ka lutpah a Chingnou le a uLal toh ana tungkhin ua ana tukhawm letlat zawmah ua , ka mit in ama om na thei hileh kilawm in ka enkha pah hi. Kei le a nunglam deuh ah ka vatu a ana guk melhmelh ka hihman in a chang in ka ki entuah kha zel ua, hong nui seih zel a anuihmai ka mitkha ah athaam sawt theitel mai. Itpen midang toh nuamsa tak a hon phokpha hetlou a om etet maizaw a haksa telmai. Ngaihtak a kah khiak zoihzoih mai bang a ut huai hial hi..
Programe zat zoh in skul campus ah Refreshmnt khong ne in kikhiak lah chitak in akuakua a kithuah khawm ua, huchih lai in ken refreshment le ngaisaklou in Chingnou hangsantak a ka maituah ngam na d chi in campus pua lam ah zu ka vadawn zek a, ka dawn ngeilouh ziak mah a diam ! Ka kham sim mahmah hi. Campus ka lut nawn in vangphat huai tak in singlim khat ah Chngnou amah kia in ana tu zenzen a, keile hunlem mu kisa in akianglam zuan in ka hoi phei sim naknak hi. A kiang a ka tut suk kawm in, I wish i could carry your smile in my heart, chih la ka sa napnap a,
e ,,, uSang , ' nang maw, lunglen chi na chia' ,hon na chi a,
" lungleng thou mah ing e, nang chauh natu a, na uLal la ? " ka chi thuk pah zungzung hi . Kipaunuam hun phet ahih chia.
'alawmte toh vapawtkhe zual hi ve u aw , hon chi a,
ken le na fuh zelna umaw? Nidang a kuamah englou a i kholh lainite ngai na ing e khong ka vachi khe gawp hi . Ching i tutna singlim anuam maw ? Kei a singkung hi in nang kei liim ah hong khol hi lechin ut huai na e maw ? khong chi in ka vachiamnuih lailai hi. Kituak tak in nawng khosa d ua, mitampite'n ana mualsuah zohlouh uh himah leh nouzaw na itna uh hon mualsuah teitei sawm un aw. Na deih anglai a sambang nawng zaal hun chiang in genthei kei khatvei bek non gel thak sam di aw. Tuban lah kimu mengmeng nawn khollou d i hihman in, nu manpha tak nawng hih kon deihsak petmah,khong ka vachi naknak a, khamsim chih mahtak amah bang ka pausak man kei dek zezen kha hi. Aman le hicin hon gen a, uSang kisik lua ka hi. Ka uLal toh nuamsa tak in khovel ka zang khawm ua, ka sianthouna teng le ka mansuahta. Nang a din zaw puansenin bang lel ka hi. Na lawmtak le ka hi nawn kei. Eh ! Ching, kei a din chikmah ni chiang in na chinglou ngeikei d. Na hihna bangbang a hon pom thei gige ka hi. Lung a honsit hileng na vangngai lou d ka hi, chi in ka na pau tuh a. A hon gen zom zel a, kei ziak in vangtah kisa hetken aw, uSang . Kei ka hi a vangtah zaw. Sum le pai, hauhna ka na tel zok khak ziakin, ka uLal lah zu chauh lou le khamtheih dang a kibual mi ana hi a, ka vangsia ngei mai maw , uSang. Hon ngaidam in aw, chi a nehnou tak a hon gen pilhpilh lai in, a uLal koulam zuan a hong pai ka mu a , ana dinkhiak ka sawm hi. Bang teng hileh nang deihtelna mah ahih ziak in kon mohsa kei, Ching. A hi a , lungsik simthu na lel nop leh nang toh gawm ding simthu lel ni maw. Ka na pai masa d aw . chih toh din ka thuah a, kei zak khop in,"Damn i wish i was your lover" chi in ka hoi phei naknak a, miteng le paibei simta ahihman un, keile campus apat pawtkhia in ka neihsunsun in lunglen thuak nopdeuh khak leh chi in zu ka vadawn beh ek hi....
Ka zudawn khamgop ka hi ding a inn ka tung zou hamham hi Nitak dak 9 bang ana gingta mah leh ka nu'n hon na ngak lai a. Inn ka lut phet in,bang chi e, bawi, hong paihak na tel chia ? chi in hon na delhpah a, bang mah ka chikei chi in lupna ka kidenna ngal hi.
Lunglen thuaknop deuh na d chi a vadawn ek himah leng zu inle hon nem zoulou in Chingnou kia ka ngaihtuah kha nilouh a, a chang in 'zalmang bek in sul hong hei ve maw, ka chikhe kha numnum zel hi. Khamlua ka hih man in huai nitak zaw ka imu pah vanglak hi. Phulouh vangngaih ziak in ka hin khua in siatloh gop ding a bang a niteng in lungleng thuaknopna d chi in ka vadawn gige a, theihlouh kal in ka na zongsang gop ta hi. Zukham chiang in zu in hon ihmu sak pahpah a lunglen thuak zaw nuamtuam deuh mah e . Hilele ka hinkhua in siatloh gawp a, nu le pa kinepna tan tungzou lou dng ka hi chih ka ngaihtuah chiang in ka pawna mahmah zel hi. Huchia numei khat ziak a zu-le-sa a kong kibual tak in , ahon na it gige leh kei a kinepna liantak nei ka nu le pa lungtang su nna mahmah ka hi ding a, asalh a lah hon salh thoh ngamlou a hihman un, zingkal khat ka nu'n :
"Bawi,tulai bang hong chi na hia, Zu nawn hah dawn ngei ? Zu dawnna in na hun hoih laiteng na hon zang bei kha d chih ka laulua, hichi bang mai in nawng om d chih zaw hi hetlou eive, ka kinepna uh, tuisik na hih apat nang a kinepna lianpi nei ing a,ka duh ka deihzawng ne a dawn ngamlou a nang maban hoihna d leh mite englou a nawng khosak theih na d chi a guhtui kang zen a nang a dia ana pang kei ve ua,nikhat tei nang zalzou a ka leitung hinkhua uh a beikuan bek a nuamsa leh mi eng hetlou a khosak theih kinemlua hi ung ua maw, khamtheih sal a tang mai din zaw kon phal mahmah kei bawi, i gentheih ziakin hiai khovel ah i haksat luat ni a le panpihtu d neilou in kon na enkol tou ua, kou ka hat nawnlouh ua, tekpu-tekpi ka hong hih chiang un kuan hon enkol mahmah d ahia, bawi ? Nang chauh neive hiai khovel a ka kinepna om sun uh. Bang ziak a hiai bang a hang om mawk na hia? Bang teng ziak hilele,enkoltu d neilou na nu-le-pa nasiat tawp a le hon na it gige te hon ngaihtuah thak inla hong kibawl hoih mahmah in aw. Na lawm mihausa pipi te om bang a om theivual hilou na hi..Hithei le zaw a hoihpen leh mi-eng hetlou a na khosak hon deihsaklua sam hi ing a" chi in hon gen ngitngit a, gen ding a vangkhop mai ka khasiat bang a suak hial hi.
A hon thuhilhna in hon zou mahmah a, kei le ka kingaihtuah ngitnget a , genthei na lalai zu-le-sa in kibual tou lai leng ka nu le pa ka suk lungkham d ban ah ken leng kuamah ka pha ngeikei d. Khovel a ittu d neilou a ka om a le hon na it gige ka nu-le-pa ka kipahsak theihna om sun zaw, a thu uh man ahi mai. Itna simthu zatam lellel zong leng tun-le-zua itna bangbang itna omlou ahi,chih khong ka lungsim in ka ngaituah a, haksa sa pipi in ka zongsatsa zu dawn kidek teitei kon sawmta hi.
Hun leh nite hong bei zel in tumalam a ka exam na result uh hong suak a ken le lohchinna ka ngahtei a ka kipak mahmah mai uhi. Himahleh maban sunzawm zou d dinmun a ka om nawn louh manin ka lung a kham gu sim mahmah mai. Sutzop ut sim lai mah leng nu-le-pa'n hon chawm zou nawnlou d ahih man un ka khol mai a ngaita. Kipah sung zaw asawt kei tel lunggimna in hon zuipah zel a, lawm le vual te'n lah va-uk a hon lensan in gamdang a sunzawm ding in a om vek sim uhi.
Huhci bang kallak ah Chingnou leng A uLal mundang a laizil sunzom a om ding a hihman in, a nu-le-pa lemsak pihna toh, a uLal kaina koles a kai ding ahi chih thu ka za a, a uLal bang ka entha a suak ngoihngoih hi Anglai a pomlouh lunglai ah lengmang maita leh chih ka ut vungvung mai. Himahleh, ka ut thu a mangngilh theih ahi ngal kei a. Kei lah laisim sunzawm zou nawnlou ka hihman in , nitha a kiloh a nasep hong ngaita. Nu-le-pate lah hat nawnlou ahihman un kei khut a kinga a hita mai ua ; puak a gik khop mai. Niteng a nasem a kuan ngai ahihman in lampi ah nidang a lawmlu te khong nalh taktak a kichei a skul kai kuan khong ka muh chiang in ka zum tuntun a, ka kibuk bawl zel hi. Ka eng thei mahmah a piang vangsia bang ka kisa petmah hi.
Nikhat ka nasepnate uh tanu, nungak melhoihtak leh duangching tak mai Kimnou kichi in singpi hong pia a, ka mit a hon la mahmah mai. A na kimumu sa ka hihman un kong kinel panpan ua, niteng a singpi hong piak chiang bang in hon deihsak piak tuam hileh kilawm in ka thei hial hi. Sunkhat singpi hong piak kawm in uSang nang insung ah hong dawn mai in o , ka gen nop le om a, hon chi hi. Mihausatak insung a nasep puan toh singpi dawn a va ut d ka zum lua a, lah ka sel nuam kei hi. Table ah kimaingat in singpi hon dawnpih a, zumsim tuak ka hi ding ua, sawt smtak dai dide a ka tut nung un, nervous chitak in,"uSang a hun leh mun in zilkei mah leh ka lungsim a ka puak a gik luat ziakin kon gen dia hon ngaihkhiak sak in aw," hon chi a. Hitham e bang thu a , Hon gen ve ? ka na ngai d .ka chithuk pah hi.
"I maw ka inn ua nasem a nawng kuan tung apat hoih hon nasalua ing a hon na ngailua ka hi. Ka hon muhmun deuhdeuh a kon itna a lian semsem, ka nu-le-pa kiang a leng kon ngaihdan khong ka gen zel a nang lah na omdan mihoih hon sak chithou ua, nang toh i kingaih d hon nial lou uh eive. USang neizou in nuamsa tak a khosa bang mah leng, nang kon itna ziak a ka hinkhua genthei kisa lua ka hi. Hon theisiam inla, na nasem maimai uh ka hi chi mai lou in itna in azawng ahau khentuam neilou eive maw chi zaw inla hon it thuk sam mai ve"
hon chi a, kei bang lel tak a nasem maimai uh hon na it mawk bang lamdang ka sa hial hi. Ka gen d pen theizok lou in, "ol in kihouthak ni o ", chi in nasep sunzawm din ka pawtkhiaksan hi. Kei bang leltak hichii bang a mihausa tanu hawmthoh khat in hon na ngaih mawk ka ngaihtuah chiang in ka kipak mahmah a, a langkhat lam ah lah ka phulouh ahi ka chi zel a, ka guk buai mahmah mai, A hon nget itna kan eih lai sun teng piak mai a kitenph pah mai d hia ! chih khong sunkhua a nasep kawm in ka ngaihtuahtuah nilouh hi. Nitaklam nasem inn ka tun in ka nu kiang ah ka nasep nate uh tanu in hon na ngailua ahih dan ka hilh leh, ka nu te'n le hauhsakna mah ana enlah sam ahi ding ua, na hampha lua hichi bang mihausa tanu in hon ngai ahih leh khahsuah hetken la ahon ittaktak leh kitenpih pah in o .Sungte zal ale nopsak theih ahi,a hon chi a. Ken le ka nu hon gente theikawm in Chingnou ka mangngilh theihna ahih khak leh dawn suk mai bang ka ut mahmah a,hilele huchi bang mi toh kingai a om d ka ngaihtuah chiang in ka zum mahmah zel hi.
A zing nasem dia ka kuan nawn in a gate uah ana ding a, houpih hetlou a ka nasepna mun lam zuan a paisuak ka sawm leh,
"uSang ana kholzual dh kisathei na chia ! Zingpha bek hon chi ve" a hon chi a.
Ken le, eimah ve maw , Zingpha Kim, zanitak na imu thei na maw ? Ka chithuk a.
imu thei mahmah lou, nang hon ngaihtuah den ing a, na nasep puan toh na om nimnem khong ka ngaihtuah chia kon hehpih tha suak a, kon itna lian deuhdeuh mai ahi. Ka itna hon vuaksuak sak mahmah ken aw', hon chi nawn a.
Ken le , " Kim na h0n theikei a ahi. I khosakna himhim le kikhai lua a, kei migentheitak nang a dia chinglou ka hi. Ka phulouh na hi. Hon ngaihtuah nawn dah mai inla, kei ziak in kisu lunggim nawn ken aw," ka chi a,
Hmahleh aman , "ka taktak ahi uSang . Genthei kisa in nang kisit mah lechin ken ka damsung a ka tulph dia le hon sitlou ka hi," hon chi a.
" Kim ngaihtuah sau deuh mah dih insung a na nopsak na teng taisan in kei na damsung adin nawn tel taktak ngam dia hia ? I nek i dawn hong kikhe lua pah dia . Haksa salua d na hi. Kei toh hinkhua zat d zaw ", ka chih chiang inle ahon gen teitei a, atawp in ken le nial zou nawnlou in,
" Kei bang leltak nawn it ka kipak lua. Ken le na hon itna zahzah in kon it ding ," ka chithuk a. Kingai khat kong suak maimah uhi.
Taktak maw uSang ka kipak lua , " I kal ah a sianglou damtui hong luang zong huaite pal galkai in tuibang gawm ding simthu lel pah ni maw," hon chi a.
Ken le, hithamtham e , kei le huai ahi ka ut chih toh nasepna lam zuan in ka paisan phot hi.
Sunchia a inn ua nasepna ah ka kimu zel ua,nitak chiang in fon tungtawn in itna simthu khau bang hualkhwm in nuam ka sathei mahmah uhi. Ka kingaihna uh sawt naikei mah leh , nitak khat zansawtlua nailou dak 9pm lak vel in Kim in hon message a, .uSang lem hon sak pih inla nang toh omkhawm det ut gopta ka hih man in tunitak mah in hongpi maive,hon chi a. Kei le sawtlou kingaihtuah zek in kua sunghoih leh nei zou deuh deihlou om dia ? Miteng etlah hausakna, leh neih le lam mah hiven chi a ka ngaihtawh nung in.."na chih taktak hia, Kim ? Na chih taktak ahih a na pasal dia hon sitlou taktak na hih leh kei le omkhawm utlota ka hi. A na kisa in kongpi d,chi in ka msg thuk a,aman le,ole hong kin deuh in o, chi in ngak lah chitak in hon thuk pah hi. Kei le zi gu di chi a kithalop deuh in bangmah ngaihtuah sau sese lou in ka kuan khia a; huai nitak a pat in Kim toh anuam ahaksa palkhawm ding leh damsung a khen nawnlou a pumkhat hi denta ding in tuibang kong kigawmta uhi. A zing in nidang a lawmluite khong mou en chih dan in hong pawt khawm ua, ahon chiamnuih pawl toh, hunluite khong gen khawm in singpi ka dawnkhawm ua nuam ka sa mahmah uhi..Himahleh ka tanau nai deuhte uh ~ ka nu a lamte leh ka pa a lamte kuamah hong dak om kei ua lamdang sa in lawmte hon paisan nung sawtlou in ka nu kiang ah ,'nu bang chi dan a ka pute, ka ni leh ka papi chihte khong kuamah hong dak om hetkei ua , Ka zi neihlam theilou uhia ?' chi a ka dot leh, ka nu'n,bawi lamdang saken i kipahni leh i dahni a hon kipahpih d leh hon dahpih d omlou khop a i gentheih ziak a i tanau naiteng in hon gamlat vek uh ahi. Nidang a na neulai in napute kiang khong ah nitak an huantawm d khong leh na skul fee d khong leiba zong in haksa sapipi in mi maitang ka vasi zel a, a chang in bangmah ka neikei uh chi a hon thawnkik sak hun uh a tam mahmah hi, a hon mul-lit thei mahmah ua i vapawt maimai chiang nasan in anhuan tawm d neilou get u maw chih khong in hon na hou sek ua..ei a din zaw tanau a vang khopmai.,bang teng kon hlh dah d na lungtang in a pawlah lua kha dia na khasiatna d lel ahi kha d,chi in khasetak in hongen a, ken le ka theisiam suk mai hi.
Hun bangtan hiam Kim toh ka kiten nung un tapa melhoihtak khat kon nei ua ka kipak petmah uhi. Himahleh i zawn i gentheih lam hon theihsa a hon kitenpih hi tawk lele Kim in hichi bang a gentheite insung a khosak haksa sapet mah ahi ding a a nunglam bang a phamun mahmah mai. Inn a nu tek, patekte kep sang in kholak pawt khong a utzaw a tekpu-tekpite donlou in thawmhau tak a in a nusia in kholak a pawtsansan mai hi. Ka gntak mah bang in ka kinep a hang bang kei lua a, ka puakgik a kibehlap sawnsawn hi.Nikhat nasem inn ka tun in Kim in thil hithei hetlou d pi hon gen a, nutek patekte kempeihlou in inntuan din hon ngen mawk hi. I nu le pa kemtu d neilou a inntuansan ahi theikei chi in ka nial bilbel a, a heh mahmah mai. Kei zaw hon it mah e hlele ka nu-le-pa hon it pih hetkei chih a chiang khopmai. Mi nuamsatak leh sum tuizat a zang a khangkhia ahih chiang in kou mizong tak insung a khosak haksa a sak banah nu-le-pa tekte kem peihlou ahi ding a, "kikhen mai ni" hon chiphut mawk a lamdang bang ka sa hial hi. Ken le, " Kim na itna te koi a omta uhiam? Sum-le-pai neihlou ziak in ta khat i neih nung in kikhen nawn sawm mawk a, i ta tagah a om ding chih laulou na hiam Kim ? Ahitheikei haksa mah leh anuam ahaksa palkahwm a khen nawnlou dia tong kichiam a tuibang gawm i hi.Tongchiamsa ngilhta na hiam, Kim ? I kiguk nitak a nop i saksak maizen toh maw,chi a chiamnuih zawm in ka nui nalhnalh a, Kim in zaw hon nuihpih nuam vak kei. Huainung siah ka zi it Kim leng kipahna d omlou sa in hong khel gamtat a, ka-le-pa tektate bang ama a bawl a bawl nuamlou in inkong a uipi inngak bang phet in a hon bawl a, nek le dawn ah lah akhentuam mahmah mai, bazar apawt chiang in ka tapa uh a di nektheih lim taktak a puak zel a , ka nu le pa tek nitumkuante pelou in amau a nek uh khava tak in a ki ensak maimah sek uhi. Kim in lah ka tapa uh a pi le pute don ding leng aphal kei a, ka ta un le api le pute a ngaina hetkei maimah hi. Ken zaw a vek ua itdan kibang a ka it hiven maw ! Koi pen tel zawk di a chih ka theizoukei a, ka zi ittak leh ka nu le pa ittak kal ah dinmun haksa tak a ding in ka selung a zing mahmah mai. Nidang a numei khat ziak a lungkham khong neplua ahihdan kon theikhe thakthak hi. Kei lah niteng a nasem a ka kuan zel ngai ahihman in Ka zi ittak Kim in a chang a ka nu le pa an leng ana pelou a gilkial tak a ana om sak sek ahi ding a, na sem ka tun chiang in ka nu'n hon en a bangmah hon genkei mah leh amit a pat tui hong pawt te ziak in khasia mahmah ahi chih haihvual ahikei. Ka lung a khamthei mahmah mai a achang in lungnopna bukim omna Jesu Khrist nei thei a khamuanna ka neihtheih na dia counselling hon neihpih thei d mi ka deih mahmah mai . Himahleh huchi bang zaw kinep phak ding ahikei. Zawnluat ziak in, saptuam upa leh pastorte nasan in inn leng hong sik nuamlou a hon pelpel uh ahihman in.. hun leh nite haksa tak a zangliam tou zel hi.
Nitaklam khat nasem inn ka tun in, ka tapa pa leh anu chauh in an ana ne ua, ka nu le pa kongbul ah a chiangkhun uh toh kinepna nei nawn hetlou in lungkiak chitak in ana tu khiukheu uhi.."eh..Kim an ana ne umaw, i nu te'n la nekhin uhia? " chi a ka dot leh. Hon neksan mai un ka duh naikei uh,a chi ua ka neksan uh eivoi.Hon chi thuk pah zatzat a. Kenlah ka lungsim in a piak noplouh ahi chih ka haih hetkei hi.Kei le thazoitak in munkhat a ka tusuk in, ka lungsim in," Kim..hichi bang tel d honsa leng zaw hon neilou mah d hi ve ing, na inn ua nasem a kong kuan sek lai khong a nuam hi lel eive maw. Ngaih huai na e maw ! " Ka chi vungvung phet h. Lungsim mittui luang zungzung kawm in ka nu le pa kei a dia guhtui kang zen a pang a gong phinphen leh hat nawnloute ka hon en nawn a, "nu...pa.,hon ngaidam un aw,na tapa uh , kei na kinep bang uh tung zoulou ka hi ta. Nou gentheih sawnsawn a na khasiat luat na d uh lel ahihlam thei leng zaw ka zi ittak kitenph lou mah d hi ve ing maw !! Nu..pa..na hun tawpkuan natan un gentheitak in kon khosa sak lai kha a,ka ut thu zaw hi hetlou ahi o. Hon ngaidam mahmah un o. Nou le na tuailai hun laite uh khong na ngaimah d uh maw. Leitung a nopsakna kichi himhim theikha lou a hon paisan pahta d na hi ua na nopsak na d un mite gen pialgal gamnuam loungal kinepna dang a om nawn kei. Ei a din zaw hiai khovel ah nopna ni asuak ngei nawn kei di maw !! Nu ei..pa ei..phamna chiaugal i kai chiang un zaw hiai leitung haksa leh khitui nulna gam i ngai nawnkei mah d uh maw. Mite gen pialgal gamnuam ah dawn bang i tuah chiang un huai mun bek ah kipaktak leh nuamsa tak in i khosa khawm d uh aw. Hiai khovel ah zaw mizawng leh gentheite a din lampi a mial lua. Pai ngaihna himhim ka thei nawnkei, na leitung nisa uh a tumkuan nasan in nopsak na kon tun zoukei. Na khasiat na d lel uh kon tun zaw a, na puakgik pen uh ka hih lailai man in hon ngaidam mahmah un" chi a ka lungsim a kei le kei ka kihouhou laitak in ka fon hong ging a ka pickup leh....
"Hello,uSang damzel maw, hun le nite nuamtak in na zangzel na maw?" a hon chi a, a No. ka theih ngeilouh himahleh a aw nidang a ka zakzak sa ahihman in ka haih kei . "hi damzel,nang Chingnou maw ?" ka chi a. Hi.. Chngnou ka hi. Welcome hotel ah hong kimuh pih zual in,chih toh koih a thuah hi.. Khua muisimta mah leh keile huai lam zuan in ka nasep puan le kheng tuanlou in ka vapai pah a..amun ka tun in akil khat a table ah Chingnou a na tu a, nidang a ka na itluat Chingnou a bang nawn hetkei hi. Ka muh leh ka hehpih tha bang suak in ka khasia hial hi. E !! uSang hongtung maw? Na hong fel ekhai. I kimuh topna le himaitheita d chi a kon sap ahi. Hon na chi a, ken le bang dang genlou in,bang chi e Ching hichitel a na gawn lawmlawm, damlouh luatna nei ngei maw ? ka chih leh..uSang deihtel thei dinmun a ka din lai in kuamah phutluih hilou in kei deihtelna mah zui in ka uLal toh asia apha khenlou in ka na omkhawm ua., tun ka uLal in kumlui in OD ziakin hon na mualliamsanta. A hön paisan nung in ka beidong mahmah a khamtheih ka na hih zongsatsa te uh ka muh theihna din ka sapum nasan ka zuak a ngaita. Ka ut ziak hilou in kizuak hinkhua zang ka hita uSang. Nang hon na tel zaw kha mai leng zaw maw chi in khasetak in hon gen a..Ka gen d le ka theikei ka hehph mahmah mai, dai dide in ka tut leh,hicin hon gen zom a, uSang sum le pai a zaw kipahna omlou eive maw, kipahna sang in gentheihna hon tun zaw a.. tumalam in HIV natna ziakin sihsual in ka om a ,tunle sawt ka dam nawn kei d. Usang nang gen nop khat bek neilou maw. Hon chi a, ken le poina maizen e maw Ching. Nang bek nuamsatak a nawng khosak a nu manpha tak nong hih hon deihsak lua hi ing a. Nang deihtelna leh khovel nopsaknate ziak a hiaitan tung hi a kon mohsa kei, a poilua chih lou gen d ka neikei..uSang hun mualliam sapkik theih himai leh zaw maw !! A hon chi nawn a. Ka itluat Chingnou ka hehph luat ziak in, luankhi'n tuibang hon tuum a gen d theilou in, Ching ka napai d," Damtak in mangpha" chi in ka paisan ta. Lampi a kapai kawm in ka ngaihtuah a haksa mahmah mai, Sian aw miza tanbang na hawm keitan hi bang lel maw. Nopna nisuak lou ding h ta hiam, ka hinkhua aw genthei ka hinkhua sanggah kei din sulkik lel ta in, chi vungvung kawm in tha zoitak in inlam zuan in ka kik napnap hi (-(:-(;-(
BEITA
©Siamsinna leh Vakiangbu
Writer's Note : Siamsinna leh Vakiangbu ahihna toh kisintouh nawn kisuanlah huai lua din ka koih kei. Phuahtwm tangthu gelh ahih ziak in, a peihloute'n sim teitei louh theih ahi...
Khovel kitaitehna sangtak, neih-le-lam a kidemna thupitak, mihau leh mithupite kitaitehna khovel a tai tei dia kei bang mi zawng leh genthei ka na piankhiak sese ka ngaihtuah chiang in ka kisik vungvung a , pianglou hizaw maileng maw ka chih hun a tam mahmah mai. Khristian inkuan a piang himahleng biakna lam ka limsak nuam ngelkei hi . Ka nu leh pa mibang a neizou a nuamsa a khosa ana hihlouh ziak un, mite silh -eh-teen nalh taktak te bang hon leisak zou kei ua, nalhtak a kicheina ding ka neihlouh ziakin a diakin Pathianni zingkal biakin kai ka thadah thei mahmah hi. I theihsa bang in biakna leng Pathian bedia kuan himah lehang khenkhatte a dia fashion show na hileh kilwm, anei leh hau deuhte adia kipahtawina leh kimai etna abang mai a, amaute a din zaw kikhop leng paradise a bang hial ding. Hilele, mizong daikilkal a mite adin zaw biakna kikhop leng gotmun kimkhat ahi mai, a zawng leh hau kal a kikhai luat ziakin. Kikhop d bang zum tuntun in Pathianni zingkal khat kikhwmlou in inn ah ka om hi.. Tapa tangkhat neihsun ka hi a, ka nu le pa'n ittak leh duat tak in hon kemtou ua, nek tom zong in kei maban ding khualna in haksa pipi in lai hon na zilsak tei uhi. Minek bang ne a dawn zou hikei mah le ung Pathian hehpihna zal in kou khomkhom in ka kitoudelh zou hamham ua ; unau tanau laina d lah a vang khop mai. Hon mullit hi le uh kilawm in kuamah inn ah hong ui dak di leng a omkei hial hi. Kikhawm hong tawp un ana ihmu kha ka hi ding a, ka nu'n hong phawng kawm in laithem khat na lwmnu hon piak chi in hon pia a, ka et leh, 'bag chi e uSang nawng kikhawm kei a , damlou maw ?zingciang skul kai kuan chiah hon manoh mangngilh ken o,' chih ana kigelh hi.
Ka lawmnu ahihleh skul dang apat kei ana kaina a hong kisuan ahi a, vengkhat ka hihziak un a hong kai tung apat midang pawl lou in ka na kipawl ua, kuan leh pai in ka kiton zel uhi. Ken xii simlel ka hi a, amah ka nuai ua geihte ahih ziak in class room khat a tukhawm theilou in , room tuamtuak ah ka tut uh a ngai a , haksa ka sa gu sim mahmah hi. Aziak bel nidang pek a kei kaina a hong kaima a le hoih ka na sak leh ka gukvei mahmah khit ka lawm Chingnou ahih ziakin.
Hun leh nite a ngeina bang in hong mualliam zel a. Kou leng Chingnou toh angei bang in ka kithuah tou zel ua, a chang in a inn bang uah ka vapawt zel hi. Ka vapawt khak chiang in ka gentheihziak mah in a nu le pa te'n hon na limbawl hetkei ua, ka kithuah d nasan ule hon phallou uh hileh kilawm in paulou hial in hon et thoh gemgam ua, himahleh Chingnou in hon ngaihnat ziak leh apilvang ziak in zumlua in ka va om kha ngeikei vanglak hi. Lawm hoih mahmah bang a kipawl himahle ung hon theihpih louh in ka na vei petmah mai a, im zoh vual hi nawnlou khop in ka itna a nini in a pung hulhul a, atawpkhawk in a guk in ka na it petmah hi. Ka itna thu vagen mawk d chih lah kei bang leltak mi neih bang neizou le hilou silhpuanpha le batzou lou, lawmte'n skul a nektheih Rs.50 man a khilai chiang ua ken Rs.10 man le khilai zoulou,huchi bang mi toh anbang ki it chi a zalai lawi bang thanpih ding in hon sit law ding chi in ka gen ngam mahmah kei hi. Skul kai kuan leh pai ka kiton khak zel ua ka kichiamnuih zelte uh kei a din ka damsung a thil manpha pen,Solomon innsung a agou manphate sang inle manpha ka sa zaw tham hi. Skul ah lah nu le pa hausa pipite tate ngen toh kithuah ka hi ua, lawmte lak a om leng nuam ka sa taktak theikei hi. Kei ka pianphung a ka tualniam luat hang in, kumkim bang nuamsa tak a ka hong kithuah touh nung un ka classmate te uh khat in Chngnou hon ngaihbawl a, ka classmatepa lah pate neihsa a nuamsatak a khosa , skul kai le gari ngen a hong pai ahih ziakin nungaknou sum le pai a nopsakna zongte adin a etlah huai mahmah mai.
Monday zingkal khat Chingnou in, 'uSang tuni zaw hon manoh dah in, na classpa uh, uLal in kong manoh d hon chi a, agari in ka na kuan mai d uh,' chi'n hon message a ken le, ole skul ah kimu ni aw leh, chi in ka thuk hi. Huaini zaw ka lungsim anuam kei diak a ka classmatepa u lah hong kailou, Chingnou lah melmuh phak dia omlou,skul kailou a koilak hiam a hunnuam zang a om khawm hingei un teh chih khong ka ngaihtuah a, ka pawna petmah hi. Kei a hikei mahleh ka itpen ahih ziakin midang toh hichia a om pen hazatna a lian petmah mai. Sum le pai hauh ziakin nungaknou siangthou tak leh lungsim mawltak a ut le dah in a bawl gop kha ding chih khong ka ngaihtuah a, ka lungsim van a khai bang mai in anaa hi.Nitak nasan ihmu lou hial in tuni bang a chi phet mah dia o, chi in ka it Chingnou ka ngaihtuahtuah mai hi.
Azing skul kai kuan in ka ton kha nawn ua,,,,
"Ching zan a bang chi e ? nong kai kei a, hon na miss lua keive," ka chih leh,
Hehehe...Kamsiam na chia, eikhong hon miss mahmah kei nite hon chi a ; kisuanlah meltak in, " uLal in skul hon tunpih d ka sak leh mun tuamtuam hon phak pih a hong kai khalou mah ka hi, " chi in hon gen zawm a,
Ken le ka lungsim in den chiah midang toh ana kingai in ka tangzou kei kha d chih lau in hunlem omsun leng ahi d chi in gensuk mai ka sawm a, ka kam in a genkhiakma in ka lungsim in 10 vei bang ana gen khin man zel hi.. A tawptawp in ka hangsanna leh ka hatna tengteng suah in hichi'n kon genta mai hi.
"Ching, kon gen ngam ngeilouh hang in ka omdan leh na kiang a ka om chia ka mel kipahna a adim zel dan in hon itlua ka hi chih na theihlouh ka gingta kei, huaiziak in sum-le-pai, neih-le-lam a hon en zawlou in nang kon itna a letdan en masa zaw din kon ngen hi. Kei bang leltak migenthei na lawm tak le hi kei mah leng kei ding a mun na hon phal leh singdang en nawnlou in kei le kei kimangngilh khop hial in nang a din ka hingta ding, hauhna a lei dng hi le zaw a lei zoulou d pen mah ka hi. Hilele maw Ching itna mit toh hon en inla, hehpih takin a chingpen bang in hon pom mai ve"
dang awk pi in ka genkhe notnot khong a, ka lu bang aktuam chia pha hileh kilawm in ka thei hial hi. A dai dide a amel bang nguai zou hial in ka thei hi. Kamkhat bek in hon dawng ve, Ching ? ka chih leh.
"hichi bang a nawn gen kal ngaklah tak a ana ngakngak mah zaw hi ve ing maw, hon itlou hon ngailou zaw hi keng uSang,hilele nang lah hon gen ngeilou chin a, zan a ka uLal toh ka pawt ua aman hon gen a , ana dawng khinta ka hi, hon ngaisiam in aw" hon chi hi.
Gen d a vang khop mai. aw ka lungtang teipi hiamtak a dawt pailet zot bang hial in a thugen in hon suna mahmah mai. Kei din solkha leh sunni tang nawnlou a bang hial hi. Ken le Chingnou kiang ah hi chi in ka gen nawn a, "na uLal in hon it taktak mah hia? Na pakpalh zu khuai bang a top nop ziak maimai adiam ? Nikhatni chiang in na pallaini hong vul dia, huai hun chiang in hon taisan maimah kei di na chi ngam na maw ? Na uLal in hon it taktak din ka gingta theikei. A hih kei leh sum le pai hauhna na etlah man a na kingaihpih phut mawk hia leh ? Itna zaw itna mah lou ngal in leithei lou eive ! Bang teng hileh hong pilvang in aw , Ching . Itna lampi na zuihna ah, sum le pai, melhoihnate a itna om hetlou ahi chih mangngilh ken aw.. Singdang siang sanmun na muang zong na laukha bek in hong leng zel in aw, zan khoswt a suihlung ka muanna din..Zanteng a nawn mangpha khak ka tantawk kei din kahna mai asuak ding maw.." ka chi suk ek mai hi. Aman le, ' aaaaa ,, ana dawngkhinta ka hih chiah ka suahsuah uh kong suak d uh . Hon buaipih dah mai in uSang,' hon chithuk hi..A uLal ana dawng lou hi ta him leleng kei zaw hon deihkei himhim d chih haihvual ahi kei . Ka pian tualniam luat vang in. Himahleh a kamsiam lel ka tantawk ahi, chi in hon kipak sak mahmah hi. Hucia itna khovel a om a, khovel dang ka phok hetlouh lai un theihlouh kal in classroom ka tung ua kainuam aw ... chi in ka room tuak uah ka kikhen ta uhi.
Huaini apan in zaw ka gentheihna a kibehlap petmah mai. Hiai khovel gentheite gentheih sawnsawn na khovel khapham tuangnungsiah thei mai leng, albang dahna lung a ngilh in hiai nuai simlei tuang nungsiah tang e. Ka it Chingnou lah a uLal toh nuamsatak in hong khosa ua. Kei lah amah vangngai a phamlou puldou pa a hon phok nawn mawngmawng kei. Ka hih theih om sun tuh a uLal toh kipaktak a a om uh a nunglam ua pat etliam vungvung ahita mai hi. Nitak nasan ihmu theilou in ka kingaihtuah nilouh a, pianphung a gentheih ziak in tunitan in ka gentheihna a kibehlap semsem a, kei zong mibang a hau hileng nungakte'n hon ngai mah di hiven ka chi vungvung sek hi. Khovel a ka pa liangtung mun sangpen ahih lai khong leh nektheih man ding Rs.2 khong hon piak chiang ua kipaktak a nektheih lei dia tai vengveng lai khong ka ngai ngoihngoih tel mai. " Kon itna lian mah leh sesum in aliah gai vek zel a, hithei lezaw van a aksinelkai nasan nang a dia hon laksak nuam hi ve ing maw Ching.. Nang lah nuam in laitual lengta d chin a, i sulnung teng ah khattang in koilam maimit suan ding ka hiam ? Nang ngai a lunglen banni lah om lou dia ! Navang ngai sanggah lelliang lung in hon gelthak inla ka gentheihna apat nunnopna hon tun mai ve !!! Pianglou ana himai lechin zaw kei damna hizaw kha maithei hiven maw !! Khapham kulsin tangthei himai leng maw !! " chi a ka genpah louh kisik a ka ngaihtuahtuah lai in taikhua val ding bu-al hong khuang ngelngel a lukham kot ngiingei zou hial in maimit singlou in taikhua ka vak nawnta hi. I kisik chiang in zaw bang teng a kikhel khin lam ahita. Chik leh mite bang a lungnuam leh kipak tak a ka thohkhiak d Ni hong suak ding hiam ? chi in ka thou khe nomnom nawn hi.
Nuam i sak chiang in zaw nikhat leng dakkal khat lel bang a tom himah leh, khosakna haksat ziak leh ka itpen chan a hun haksatak a zat kei a din zaw khovel kipei nawnlou a khol dide a bang hial hi. Sunkhua a sawt in zankhua a sawt thei ngeimai..Chingnou lah a uLal te mineizou tak ahih ziak un tuak fuh kisa in nuamsa thei mahmah mai. A damsung a hon mangngilh den ding hileh kilawm hial in a uLal toh khovel nopna palzou in hong lengta uhi. Haksatna tampi kal ah skul lam leng kumtawp farewell ni ding hong tungta a, hiaini ban lah ka it Chingnou mukha nawnlou maithei ka hih chiah, chi in kimuh pih teitei ka swm hi. Ka nu kiang ah pocket money d Rs.100 ka ngen a, huai toh skul lam zuan in nidang a Cingnou toh ka paina sek uh lampi tawn in kei chauh kong kuan a, ka lung a leng khopmai. Ka mitkha in a nuihmai kilawm takte ka mu dundun a, ka bil ah lah nidang a a O nemtak a "uSang nang zaw pasal dang toh na kibang kei na polhnuam lua" hon chih te khong aging den maimah hi. Thazoi tak a kapai napnap lai in Chingou leng a uLal toh gari a hong kipua in hon makhelh ua , Chingnou in hon sap kawm in hon bye bye a ken lah mittui vung pelpol in ka enliam vungvung a, ka lungsim in lah,
"aw ka phallou singdang tan ding in ,hon phal mahmah lou kei ve Ching, Keile mibang a hau a hihtheih nei hi leng zaw maw, nang lah na lungtup toh nuam in lengta chia, kei zaw i sulnung teng ah khattang in maw" ka ci vung2 phet hi.
Skul ka tun in programe zatna d hall ah ka lutpah a Chingnou le a uLal toh ana tungkhin ua ana tukhawm letlat zawmah ua , ka mit in ama om na thei hileh kilawm in ka enkha pah hi. Kei le a nunglam deuh ah ka vatu a ana guk melhmelh ka hihman in a chang in ka ki entuah kha zel ua, hong nui seih zel a anuihmai ka mitkha ah athaam sawt theitel mai. Itpen midang toh nuamsa tak a hon phokpha hetlou a om etet maizaw a haksa telmai. Ngaihtak a kah khiak zoihzoih mai bang a ut huai hial hi..
Programe zat zoh in skul campus ah Refreshmnt khong ne in kikhiak lah chitak in akuakua a kithuah khawm ua, huchih lai in ken refreshment le ngaisaklou in Chingnou hangsantak a ka maituah ngam na d chi in campus pua lam ah zu ka vadawn zek a, ka dawn ngeilouh ziak mah a diam ! Ka kham sim mahmah hi. Campus ka lut nawn in vangphat huai tak in singlim khat ah Chngnou amah kia in ana tu zenzen a, keile hunlem mu kisa in akianglam zuan in ka hoi phei sim naknak hi. A kiang a ka tut suk kawm in, I wish i could carry your smile in my heart, chih la ka sa napnap a,
e ,,, uSang , ' nang maw, lunglen chi na chia' ,hon na chi a,
" lungleng thou mah ing e, nang chauh natu a, na uLal la ? " ka chi thuk pah zungzung hi . Kipaunuam hun phet ahih chia.
'alawmte toh vapawtkhe zual hi ve u aw , hon chi a,
ken le na fuh zelna umaw? Nidang a kuamah englou a i kholh lainite ngai na ing e khong ka vachi khe gawp hi . Ching i tutna singlim anuam maw ? Kei a singkung hi in nang kei liim ah hong khol hi lechin ut huai na e maw ? khong chi in ka vachiamnuih lailai hi. Kituak tak in nawng khosa d ua, mitampite'n ana mualsuah zohlouh uh himah leh nouzaw na itna uh hon mualsuah teitei sawm un aw. Na deih anglai a sambang nawng zaal hun chiang in genthei kei khatvei bek non gel thak sam di aw. Tuban lah kimu mengmeng nawn khollou d i hihman in, nu manpha tak nawng hih kon deihsak petmah,khong ka vachi naknak a, khamsim chih mahtak amah bang ka pausak man kei dek zezen kha hi. Aman le hicin hon gen a, uSang kisik lua ka hi. Ka uLal toh nuamsa tak in khovel ka zang khawm ua, ka sianthouna teng le ka mansuahta. Nang a din zaw puansenin bang lel ka hi. Na lawmtak le ka hi nawn kei. Eh ! Ching, kei a din chikmah ni chiang in na chinglou ngeikei d. Na hihna bangbang a hon pom thei gige ka hi. Lung a honsit hileng na vangngai lou d ka hi, chi in ka na pau tuh a. A hon gen zom zel a, kei ziak in vangtah kisa hetken aw, uSang . Kei ka hi a vangtah zaw. Sum le pai, hauhna ka na tel zok khak ziakin, ka uLal lah zu chauh lou le khamtheih dang a kibual mi ana hi a, ka vangsia ngei mai maw , uSang. Hon ngaidam in aw, chi a nehnou tak a hon gen pilhpilh lai in, a uLal koulam zuan a hong pai ka mu a , ana dinkhiak ka sawm hi. Bang teng hileh nang deihtelna mah ahih ziak in kon mohsa kei, Ching. A hi a , lungsik simthu na lel nop leh nang toh gawm ding simthu lel ni maw. Ka na pai masa d aw . chih toh din ka thuah a, kei zak khop in,"Damn i wish i was your lover" chi in ka hoi phei naknak a, miteng le paibei simta ahihman un, keile campus apat pawtkhia in ka neihsunsun in lunglen thuak nopdeuh khak leh chi in zu ka vadawn beh ek hi....
Ka zudawn khamgop ka hi ding a inn ka tung zou hamham hi Nitak dak 9 bang ana gingta mah leh ka nu'n hon na ngak lai a. Inn ka lut phet in,bang chi e, bawi, hong paihak na tel chia ? chi in hon na delhpah a, bang mah ka chikei chi in lupna ka kidenna ngal hi.
Lunglen thuaknop deuh na d chi a vadawn ek himah leng zu inle hon nem zoulou in Chingnou kia ka ngaihtuah kha nilouh a, a chang in 'zalmang bek in sul hong hei ve maw, ka chikhe kha numnum zel hi. Khamlua ka hih man in huai nitak zaw ka imu pah vanglak hi. Phulouh vangngaih ziak in ka hin khua in siatloh gop ding a bang a niteng in lungleng thuaknopna d chi in ka vadawn gige a, theihlouh kal in ka na zongsang gop ta hi. Zukham chiang in zu in hon ihmu sak pahpah a lunglen thuak zaw nuamtuam deuh mah e . Hilele ka hinkhua in siatloh gawp a, nu le pa kinepna tan tungzou lou dng ka hi chih ka ngaihtuah chiang in ka pawna mahmah zel hi. Huchia numei khat ziak a zu-le-sa a kong kibual tak in , ahon na it gige leh kei a kinepna liantak nei ka nu le pa lungtang su nna mahmah ka hi ding a, asalh a lah hon salh thoh ngamlou a hihman un, zingkal khat ka nu'n :
"Bawi,tulai bang hong chi na hia, Zu nawn hah dawn ngei ? Zu dawnna in na hun hoih laiteng na hon zang bei kha d chih ka laulua, hichi bang mai in nawng om d chih zaw hi hetlou eive, ka kinepna uh, tuisik na hih apat nang a kinepna lianpi nei ing a,ka duh ka deihzawng ne a dawn ngamlou a nang maban hoihna d leh mite englou a nawng khosak theih na d chi a guhtui kang zen a nang a dia ana pang kei ve ua,nikhat tei nang zalzou a ka leitung hinkhua uh a beikuan bek a nuamsa leh mi eng hetlou a khosak theih kinemlua hi ung ua maw, khamtheih sal a tang mai din zaw kon phal mahmah kei bawi, i gentheih ziakin hiai khovel ah i haksat luat ni a le panpihtu d neilou in kon na enkol tou ua, kou ka hat nawnlouh ua, tekpu-tekpi ka hong hih chiang un kuan hon enkol mahmah d ahia, bawi ? Nang chauh neive hiai khovel a ka kinepna om sun uh. Bang ziak a hiai bang a hang om mawk na hia? Bang teng ziak hilele,enkoltu d neilou na nu-le-pa nasiat tawp a le hon na it gige te hon ngaihtuah thak inla hong kibawl hoih mahmah in aw. Na lawm mihausa pipi te om bang a om theivual hilou na hi..Hithei le zaw a hoihpen leh mi-eng hetlou a na khosak hon deihsaklua sam hi ing a" chi in hon gen ngitngit a, gen ding a vangkhop mai ka khasiat bang a suak hial hi.
A hon thuhilhna in hon zou mahmah a, kei le ka kingaihtuah ngitnget a , genthei na lalai zu-le-sa in kibual tou lai leng ka nu le pa ka suk lungkham d ban ah ken leng kuamah ka pha ngeikei d. Khovel a ittu d neilou a ka om a le hon na it gige ka nu-le-pa ka kipahsak theihna om sun zaw, a thu uh man ahi mai. Itna simthu zatam lellel zong leng tun-le-zua itna bangbang itna omlou ahi,chih khong ka lungsim in ka ngaituah a, haksa sa pipi in ka zongsatsa zu dawn kidek teitei kon sawmta hi.
Hun leh nite hong bei zel in tumalam a ka exam na result uh hong suak a ken le lohchinna ka ngahtei a ka kipak mahmah mai uhi. Himahleh maban sunzawm zou d dinmun a ka om nawn louh manin ka lung a kham gu sim mahmah mai. Sutzop ut sim lai mah leng nu-le-pa'n hon chawm zou nawnlou d ahih man un ka khol mai a ngaita. Kipah sung zaw asawt kei tel lunggimna in hon zuipah zel a, lawm le vual te'n lah va-uk a hon lensan in gamdang a sunzawm ding in a om vek sim uhi.
Huhci bang kallak ah Chingnou leng A uLal mundang a laizil sunzom a om ding a hihman in, a nu-le-pa lemsak pihna toh, a uLal kaina koles a kai ding ahi chih thu ka za a, a uLal bang ka entha a suak ngoihngoih hi Anglai a pomlouh lunglai ah lengmang maita leh chih ka ut vungvung mai. Himahleh, ka ut thu a mangngilh theih ahi ngal kei a. Kei lah laisim sunzawm zou nawnlou ka hihman in , nitha a kiloh a nasep hong ngaita. Nu-le-pate lah hat nawnlou ahihman un kei khut a kinga a hita mai ua ; puak a gik khop mai. Niteng a nasem a kuan ngai ahihman in lampi ah nidang a lawmlu te khong nalh taktak a kichei a skul kai kuan khong ka muh chiang in ka zum tuntun a, ka kibuk bawl zel hi. Ka eng thei mahmah a piang vangsia bang ka kisa petmah hi.
Nikhat ka nasepnate uh tanu, nungak melhoihtak leh duangching tak mai Kimnou kichi in singpi hong pia a, ka mit a hon la mahmah mai. A na kimumu sa ka hihman un kong kinel panpan ua, niteng a singpi hong piak chiang bang in hon deihsak piak tuam hileh kilawm in ka thei hial hi. Sunkhat singpi hong piak kawm in uSang nang insung ah hong dawn mai in o , ka gen nop le om a, hon chi hi. Mihausatak insung a nasep puan toh singpi dawn a va ut d ka zum lua a, lah ka sel nuam kei hi. Table ah kimaingat in singpi hon dawnpih a, zumsim tuak ka hi ding ua, sawt smtak dai dide a ka tut nung un, nervous chitak in,"uSang a hun leh mun in zilkei mah leh ka lungsim a ka puak a gik luat ziakin kon gen dia hon ngaihkhiak sak in aw," hon chi a. Hitham e bang thu a , Hon gen ve ? ka na ngai d .ka chithuk pah hi.
"I maw ka inn ua nasem a nawng kuan tung apat hoih hon nasalua ing a hon na ngailua ka hi. Ka hon muhmun deuhdeuh a kon itna a lian semsem, ka nu-le-pa kiang a leng kon ngaihdan khong ka gen zel a nang lah na omdan mihoih hon sak chithou ua, nang toh i kingaih d hon nial lou uh eive. USang neizou in nuamsa tak a khosa bang mah leng, nang kon itna ziak a ka hinkhua genthei kisa lua ka hi. Hon theisiam inla, na nasem maimai uh ka hi chi mai lou in itna in azawng ahau khentuam neilou eive maw chi zaw inla hon it thuk sam mai ve"
hon chi a, kei bang lel tak a nasem maimai uh hon na it mawk bang lamdang ka sa hial hi. Ka gen d pen theizok lou in, "ol in kihouthak ni o ", chi in nasep sunzawm din ka pawtkhiaksan hi. Kei bang leltak hichii bang a mihausa tanu hawmthoh khat in hon na ngaih mawk ka ngaihtuah chiang in ka kipak mahmah a, a langkhat lam ah lah ka phulouh ahi ka chi zel a, ka guk buai mahmah mai, A hon nget itna kan eih lai sun teng piak mai a kitenph pah mai d hia ! chih khong sunkhua a nasep kawm in ka ngaihtuahtuah nilouh hi. Nitaklam nasem inn ka tun in ka nu kiang ah ka nasep nate uh tanu in hon na ngailua ahih dan ka hilh leh, ka nu te'n le hauhsakna mah ana enlah sam ahi ding ua, na hampha lua hichi bang mihausa tanu in hon ngai ahih leh khahsuah hetken la ahon ittaktak leh kitenpih pah in o .Sungte zal ale nopsak theih ahi,a hon chi a. Ken le ka nu hon gente theikawm in Chingnou ka mangngilh theihna ahih khak leh dawn suk mai bang ka ut mahmah a,hilele huchi bang mi toh kingai a om d ka ngaihtuah chiang in ka zum mahmah zel hi.
A zing nasem dia ka kuan nawn in a gate uah ana ding a, houpih hetlou a ka nasepna mun lam zuan a paisuak ka sawm leh,
"uSang ana kholzual dh kisathei na chia ! Zingpha bek hon chi ve" a hon chi a.
Ken le, eimah ve maw , Zingpha Kim, zanitak na imu thei na maw ? Ka chithuk a.
imu thei mahmah lou, nang hon ngaihtuah den ing a, na nasep puan toh na om nimnem khong ka ngaihtuah chia kon hehpih tha suak a, kon itna lian deuhdeuh mai ahi. Ka itna hon vuaksuak sak mahmah ken aw', hon chi nawn a.
Ken le , " Kim na h0n theikei a ahi. I khosakna himhim le kikhai lua a, kei migentheitak nang a dia chinglou ka hi. Ka phulouh na hi. Hon ngaihtuah nawn dah mai inla, kei ziak in kisu lunggim nawn ken aw," ka chi a,
Hmahleh aman , "ka taktak ahi uSang . Genthei kisa in nang kisit mah lechin ken ka damsung a ka tulph dia le hon sitlou ka hi," hon chi a.
" Kim ngaihtuah sau deuh mah dih insung a na nopsak na teng taisan in kei na damsung adin nawn tel taktak ngam dia hia ? I nek i dawn hong kikhe lua pah dia . Haksa salua d na hi. Kei toh hinkhua zat d zaw ", ka chih chiang inle ahon gen teitei a, atawp in ken le nial zou nawnlou in,
" Kei bang leltak nawn it ka kipak lua. Ken le na hon itna zahzah in kon it ding ," ka chithuk a. Kingai khat kong suak maimah uhi.
Taktak maw uSang ka kipak lua , " I kal ah a sianglou damtui hong luang zong huaite pal galkai in tuibang gawm ding simthu lel pah ni maw," hon chi a.
Ken le, hithamtham e , kei le huai ahi ka ut chih toh nasepna lam zuan in ka paisan phot hi.
Sunchia a inn ua nasepna ah ka kimu zel ua,nitak chiang in fon tungtawn in itna simthu khau bang hualkhwm in nuam ka sathei mahmah uhi. Ka kingaihna uh sawt naikei mah leh , nitak khat zansawtlua nailou dak 9pm lak vel in Kim in hon message a, .uSang lem hon sak pih inla nang toh omkhawm det ut gopta ka hih man in tunitak mah in hongpi maive,hon chi a. Kei le sawtlou kingaihtuah zek in kua sunghoih leh nei zou deuh deihlou om dia ? Miteng etlah hausakna, leh neih le lam mah hiven chi a ka ngaihtawh nung in.."na chih taktak hia, Kim ? Na chih taktak ahih a na pasal dia hon sitlou taktak na hih leh kei le omkhawm utlota ka hi. A na kisa in kongpi d,chi in ka msg thuk a,aman le,ole hong kin deuh in o, chi in ngak lah chitak in hon thuk pah hi. Kei le zi gu di chi a kithalop deuh in bangmah ngaihtuah sau sese lou in ka kuan khia a; huai nitak a pat in Kim toh anuam ahaksa palkhawm ding leh damsung a khen nawnlou a pumkhat hi denta ding in tuibang kong kigawmta uhi. A zing in nidang a lawmluite khong mou en chih dan in hong pawt khawm ua, ahon chiamnuih pawl toh, hunluite khong gen khawm in singpi ka dawnkhawm ua nuam ka sa mahmah uhi..Himahleh ka tanau nai deuhte uh ~ ka nu a lamte leh ka pa a lamte kuamah hong dak om kei ua lamdang sa in lawmte hon paisan nung sawtlou in ka nu kiang ah ,'nu bang chi dan a ka pute, ka ni leh ka papi chihte khong kuamah hong dak om hetkei ua , Ka zi neihlam theilou uhia ?' chi a ka dot leh, ka nu'n,bawi lamdang saken i kipahni leh i dahni a hon kipahpih d leh hon dahpih d omlou khop a i gentheih ziak a i tanau naiteng in hon gamlat vek uh ahi. Nidang a na neulai in napute kiang khong ah nitak an huantawm d khong leh na skul fee d khong leiba zong in haksa sapipi in mi maitang ka vasi zel a, a chang in bangmah ka neikei uh chi a hon thawnkik sak hun uh a tam mahmah hi, a hon mul-lit thei mahmah ua i vapawt maimai chiang nasan in anhuan tawm d neilou get u maw chih khong in hon na hou sek ua..ei a din zaw tanau a vang khopmai.,bang teng kon hlh dah d na lungtang in a pawlah lua kha dia na khasiatna d lel ahi kha d,chi in khasetak in hongen a, ken le ka theisiam suk mai hi.
Hun bangtan hiam Kim toh ka kiten nung un tapa melhoihtak khat kon nei ua ka kipak petmah uhi. Himahleh i zawn i gentheih lam hon theihsa a hon kitenpih hi tawk lele Kim in hichi bang a gentheite insung a khosak haksa sapet mah ahi ding a a nunglam bang a phamun mahmah mai. Inn a nu tek, patekte kep sang in kholak pawt khong a utzaw a tekpu-tekpite donlou in thawmhau tak a in a nusia in kholak a pawtsansan mai hi. Ka gntak mah bang in ka kinep a hang bang kei lua a, ka puakgik a kibehlap sawnsawn hi.Nikhat nasem inn ka tun in Kim in thil hithei hetlou d pi hon gen a, nutek patekte kempeihlou in inntuan din hon ngen mawk hi. I nu le pa kemtu d neilou a inntuansan ahi theikei chi in ka nial bilbel a, a heh mahmah mai. Kei zaw hon it mah e hlele ka nu-le-pa hon it pih hetkei chih a chiang khopmai. Mi nuamsatak leh sum tuizat a zang a khangkhia ahih chiang in kou mizong tak insung a khosak haksa a sak banah nu-le-pa tekte kem peihlou ahi ding a, "kikhen mai ni" hon chiphut mawk a lamdang bang ka sa hial hi. Ken le, " Kim na itna te koi a omta uhiam? Sum-le-pai neihlou ziak in ta khat i neih nung in kikhen nawn sawm mawk a, i ta tagah a om ding chih laulou na hiam Kim ? Ahitheikei haksa mah leh anuam ahaksa palkahwm a khen nawnlou dia tong kichiam a tuibang gawm i hi.Tongchiamsa ngilhta na hiam, Kim ? I kiguk nitak a nop i saksak maizen toh maw,chi a chiamnuih zawm in ka nui nalhnalh a, Kim in zaw hon nuihpih nuam vak kei. Huainung siah ka zi it Kim leng kipahna d omlou sa in hong khel gamtat a, ka-le-pa tektate bang ama a bawl a bawl nuamlou in inkong a uipi inngak bang phet in a hon bawl a, nek le dawn ah lah akhentuam mahmah mai, bazar apawt chiang in ka tapa uh a di nektheih lim taktak a puak zel a , ka nu le pa tek nitumkuante pelou in amau a nek uh khava tak in a ki ensak maimah sek uhi. Kim in lah ka tapa uh a pi le pute don ding leng aphal kei a, ka ta un le api le pute a ngaina hetkei maimah hi. Ken zaw a vek ua itdan kibang a ka it hiven maw ! Koi pen tel zawk di a chih ka theizoukei a, ka zi ittak leh ka nu le pa ittak kal ah dinmun haksa tak a ding in ka selung a zing mahmah mai. Nidang a numei khat ziak a lungkham khong neplua ahihdan kon theikhe thakthak hi. Kei lah niteng a nasem a ka kuan zel ngai ahihman in Ka zi ittak Kim in a chang a ka nu le pa an leng ana pelou a gilkial tak a ana om sak sek ahi ding a, na sem ka tun chiang in ka nu'n hon en a bangmah hon genkei mah leh amit a pat tui hong pawt te ziak in khasia mahmah ahi chih haihvual ahikei. Ka lung a khamthei mahmah mai a achang in lungnopna bukim omna Jesu Khrist nei thei a khamuanna ka neihtheih na dia counselling hon neihpih thei d mi ka deih mahmah mai . Himahleh huchi bang zaw kinep phak ding ahikei. Zawnluat ziak in, saptuam upa leh pastorte nasan in inn leng hong sik nuamlou a hon pelpel uh ahihman in.. hun leh nite haksa tak a zangliam tou zel hi.
Nitaklam khat nasem inn ka tun in, ka tapa pa leh anu chauh in an ana ne ua, ka nu le pa kongbul ah a chiangkhun uh toh kinepna nei nawn hetlou in lungkiak chitak in ana tu khiukheu uhi.."eh..Kim an ana ne umaw, i nu te'n la nekhin uhia? " chi a ka dot leh. Hon neksan mai un ka duh naikei uh,a chi ua ka neksan uh eivoi.Hon chi thuk pah zatzat a. Kenlah ka lungsim in a piak noplouh ahi chih ka haih hetkei hi.Kei le thazoitak in munkhat a ka tusuk in, ka lungsim in," Kim..hichi bang tel d honsa leng zaw hon neilou mah d hi ve ing, na inn ua nasem a kong kuan sek lai khong a nuam hi lel eive maw. Ngaih huai na e maw ! " Ka chi vungvung phet h. Lungsim mittui luang zungzung kawm in ka nu le pa kei a dia guhtui kang zen a pang a gong phinphen leh hat nawnloute ka hon en nawn a, "nu...pa.,hon ngaidam un aw,na tapa uh , kei na kinep bang uh tung zoulou ka hi ta. Nou gentheih sawnsawn a na khasiat luat na d uh lel ahihlam thei leng zaw ka zi ittak kitenph lou mah d hi ve ing maw !! Nu..pa..na hun tawpkuan natan un gentheitak in kon khosa sak lai kha a,ka ut thu zaw hi hetlou ahi o. Hon ngaidam mahmah un o. Nou le na tuailai hun laite uh khong na ngaimah d uh maw. Leitung a nopsakna kichi himhim theikha lou a hon paisan pahta d na hi ua na nopsak na d un mite gen pialgal gamnuam loungal kinepna dang a om nawn kei. Ei a din zaw hiai khovel ah nopna ni asuak ngei nawn kei di maw !! Nu ei..pa ei..phamna chiaugal i kai chiang un zaw hiai leitung haksa leh khitui nulna gam i ngai nawnkei mah d uh maw. Mite gen pialgal gamnuam ah dawn bang i tuah chiang un huai mun bek ah kipaktak leh nuamsa tak in i khosa khawm d uh aw. Hiai khovel ah zaw mizawng leh gentheite a din lampi a mial lua. Pai ngaihna himhim ka thei nawnkei, na leitung nisa uh a tumkuan nasan in nopsak na kon tun zoukei. Na khasiat na d lel uh kon tun zaw a, na puakgik pen uh ka hih lailai man in hon ngaidam mahmah un" chi a ka lungsim a kei le kei ka kihouhou laitak in ka fon hong ging a ka pickup leh....
"Hello,uSang damzel maw, hun le nite nuamtak in na zangzel na maw?" a hon chi a, a No. ka theih ngeilouh himahleh a aw nidang a ka zakzak sa ahihman in ka haih kei . "hi damzel,nang Chingnou maw ?" ka chi a. Hi.. Chngnou ka hi. Welcome hotel ah hong kimuh pih zual in,chih toh koih a thuah hi.. Khua muisimta mah leh keile huai lam zuan in ka nasep puan le kheng tuanlou in ka vapai pah a..amun ka tun in akil khat a table ah Chingnou a na tu a, nidang a ka na itluat Chingnou a bang nawn hetkei hi. Ka muh leh ka hehpih tha bang suak in ka khasia hial hi. E !! uSang hongtung maw? Na hong fel ekhai. I kimuh topna le himaitheita d chi a kon sap ahi. Hon na chi a, ken le bang dang genlou in,bang chi e Ching hichitel a na gawn lawmlawm, damlouh luatna nei ngei maw ? ka chih leh..uSang deihtel thei dinmun a ka din lai in kuamah phutluih hilou in kei deihtelna mah zui in ka uLal toh asia apha khenlou in ka na omkhawm ua., tun ka uLal in kumlui in OD ziakin hon na mualliamsanta. A hön paisan nung in ka beidong mahmah a khamtheih ka na hih zongsatsa te uh ka muh theihna din ka sapum nasan ka zuak a ngaita. Ka ut ziak hilou in kizuak hinkhua zang ka hita uSang. Nang hon na tel zaw kha mai leng zaw maw chi in khasetak in hon gen a..Ka gen d le ka theikei ka hehph mahmah mai, dai dide in ka tut leh,hicin hon gen zom a, uSang sum le pai a zaw kipahna omlou eive maw, kipahna sang in gentheihna hon tun zaw a.. tumalam in HIV natna ziakin sihsual in ka om a ,tunle sawt ka dam nawn kei d. Usang nang gen nop khat bek neilou maw. Hon chi a, ken le poina maizen e maw Ching. Nang bek nuamsatak a nawng khosak a nu manpha tak nong hih hon deihsak lua hi ing a. Nang deihtelna leh khovel nopsaknate ziak a hiaitan tung hi a kon mohsa kei, a poilua chih lou gen d ka neikei..uSang hun mualliam sapkik theih himai leh zaw maw !! A hon chi nawn a. Ka itluat Chingnou ka hehph luat ziak in, luankhi'n tuibang hon tuum a gen d theilou in, Ching ka napai d," Damtak in mangpha" chi in ka paisan ta. Lampi a kapai kawm in ka ngaihtuah a haksa mahmah mai, Sian aw miza tanbang na hawm keitan hi bang lel maw. Nopna nisuak lou ding h ta hiam, ka hinkhua aw genthei ka hinkhua sanggah kei din sulkik lel ta in, chi vungvung kawm in tha zoitak in inlam zuan in ka kik napnap hi (-(:-(;-(
BEITA
©Siamsinna leh Vakiangbu
Comments
Post a Comment