Ka lutung ah a khut nga in, ka sam ah ahon zut henhen a, amel ah kei
naupang mai a di'n leng a lungkham ahi chih haih vual louh in hong lang
khia hi, "Boi, na kiang a nget ut leh hon thukha ut ka nei a, "Boi, ka
thugen hoihtak in ana ngaikhia in aw, i pu-pa khang apat a pasalpha,
gamvak mi ihihna uh tuni tan in ken ka zui lai a, ahih theih liai leh ka
deihna bang in, nang leng na hon zuih ka deih ahi, tangtung sakthei
nang kia om na hihmanin, nang khut a kinga ahi". Khinpi tunglam kawk in,
"Boi, khinpi tung a i pu-pa khang a i gou kilat zel pen uh, ken tuni a
nang khut a hon latkhiak ut ka hi, naupang mai himah lechin, ken lah
sawt hon dampih nonlou di ka hih chiah", chi'n a hon pekhia
hi....................!!!
Kum thum (3) ka hih
in ka Pi leh ka Pu kiang ah ka giak pan a, ka pi leh ka pu damsung teng a
kiang uah ka giak hi. Ka pu adia a tupa neihsun ka hih ziak in ka pu'n
hon duat in a hon ngai mahmah hi. Ka Pu'n hon duat ahi chih ka theih man
in, kei leng ka nu-le-pa sang mah in ka pi leh ka pu ka ngai zaw a, ka
thil deih teng leng ka pu'n hon hihsak theih teng chu a hon hihsak vek
zel hi. Huai mai hilou in ka min leng ka pu tap (phuah) a hih ziak leng a
hi maithei, kum 70 a upa hi mah leh, a tupa kei a ding in chu tuailai
thahatte mah bang in ka nget leh ka deihte hon hihsak ding in a che
velvel thei hi.
Kei hon suangtute, ka Pu-pa tan ka thei a, huai
nunglam a hon suangtute kuate hi hiam chih ka thei kei a, kuamah leng ka
dong tuan kei hi. Himahleh, hon suangtute a pang in theihlouh vual louh
in, gamvak a, sape'l ka lunglutna in, kei hon suangtute gam vakvak a,
sape'l mi a hihdan uh chiangtak in hon theisak a, huai tuni tan in ka
si-san ah kituh ahihman in haih vual louh in ka thei chiang mahmah hi.
Kum
7 mi ka hih in ka Pu natna thuak in, lupna ngak in hong damlou hi, ka
pu natna ahih leh ka nu-le-pa'n leng bangmah a thei khezou kei ua, huai
hunlai in Doctor chih leng om tuanlou ahihman in, thil thei deuhte kiang
khong ah damdoi ding ka dong kual zel ua, gamlak a singnah, singgui,
leh singhawngte leh khau-gui khong zang in, ka gintak dandan un ka enkol
mai uhi. Ka pu natna ahih leh huai damdoite a hih damtheih a hih
louhdan kei chauh in ka thei hi. A ziakbel ka Pu'n a sihdek in a natna
hong hilh pan a, himahleh ka nu leh ka pate kiang a bangmah gen khelou
dia a hon nget ziak in, ken leng tuni tan in, ka pu sihna thu ah ka ni
leh ka pate kiang ah bangmah ka gen khe naikei hi.
Kum 1 vengveng
damlou a lupna ngak a a om nung in, ka pu, ka it leh ngaih mahmah in
hon mual-liam santa hi. Ka pu'n a sihdek kuan in a lupna kiang ah hon
sam a, kei leng kintak in ka diang phei ngal hi. Ka pu lupna tung a si
hia hing chih leng theih khen zohlouh khopa natna thuak a gim ka muh in
ka lainat mahmah mai a, kei naupang kum 8 mi lel a di'n, ka pa sanga le
ka ngaihzawk ka pu muh haksa ka sa petmah hi. Ka pi, ka nu, ka pa toh
kou ka li (4) un ka pu lupna um kimvel in ka tu uh hi. Haksa sa kom pi
pi in ka pu hong pau khia a, "Boi ka kiang ah hong pai dih, na kiang a
thil khat gen-nop ka nei a, chi'n. Ka pu'n, "Boi na kiang a hon nutsiat
di GOU bangmah lah ka nei kei a, hichia ka sih mai di zaw na tung a
kisiamtan thei mahmah lou di ka hi. Ka Gou neihsun, na Pute apat a Gou
ka kipiak sawn zel pen uh tuni'n nang lak a hon piak khiak ut ka hi. Na
pa kiang a piak ding himahleh, na pa zaw hon suangtute kuamah a suun kha
kei a, gamvak leh gamnuai nuam sakna himhim a nei kei a, huai ziak in
nang tu'n naupang mai himah le chi'n, na pute nung na hon zuih a, ka
sulnung, pasalpha i hihna uh na hon tawpsak louh ding ahi aw Boi, "
chikawm in, khinpi tawng a ameithal koih, gamsa tampi ana kaapna lading
in hon sawl hi.
Kei leng kintak in khintung lam manawh in ka pai
a, ka pa'n hon muh takin lamdang a sa mahmah a, "Boi bangdia huai na pu
meithal lak sawm-mawk na hia oi? Chi'n hon dong a, ken leng ka pu hon
sawl ahihdan ka gen pah hi. Ka pa lamdang sa in ka pu lupna lam ah hong
paiphei pah ngal hi. Ka pu'n "Boi, hiai thau i pu-pa apan a i Gou
neihsun uh ahi, ka tu-pa neihsun nahih ziak in na khut ah ka hon pekhia
a, hoihtak in na kem dia, gamsa tampi na hon mat theih nang in, hiai
thau kawi in la, ken ka hon vualzawl di" chi'n bangbang hiam gen in, a
phun nimnim hi. (Bang gen ahia chih ka pa'n leng thei tuan kei.)
Ka
pu hon deihdan mah in, gamvak leh sa chan khong Ka sisan a kituh ahih
ziakin, gamnuai nuam ka sa petmah a; Kum 15 ka hih in, ka pu Gou hon
nutsiat, ka Meithal ngeimai in, Sakhi tal ka kap pah ngal hi. Ka hun
tamzaw gamnuai, gam-mang kawm ah ka zang bei, chi leng ka genkhial
lawmlawm di'n ka ging kei. Kristian himah leng, biakinn kai a kikhop
nang hun ka nei ngei kei a, khawlni(sunday) leh nilou kei a ding in a
kibang vek a, gamvak ka utna a hong suah chiang in khawlni leh ni lou,
sun leh zan leng gen lou in ka diangkhia khia mai hi. Lawm leh vualte
toh vak khiat sang in keimah a vak nuam ka sa a, ka nu-le-pa'n leng,
"hon oilou ahihman un, vuai tampi hon tai ta uhi. Himahleh kei mah a
vakkhiak nuamsa zaw ka hihman in, a hon hilhna uh bangmah in ka ngai kei
hi.
Ka khanvualte kei bang a sa kap thei kuamah om lou ahihman
un, nungak te'n leng a hon kipahpih thei mahmah ua, himahleh nungak hel a
pawt sang a gamvak nuam sa zaw ka hihman in, nungak lam in ka lungsim a
khoih kha ngeikei a. Mite ngaih in, Ngaihzong khong neithei, tuailai
lai hun zang himah leng ka lungsim ah gamvak leh sachan bak bangmah dang
a om thei tuan kei hi.
Zankhat mumang lamdang tak ka hon nei
mawk hi. Ka mang in, ka theih ngeilouh nungak khat in, hon houpih a, ka
min a hon sam in, "zingchiang in, suangpi mual ah hong hoh lechin, sazuk
tal kon pedi" chi'n a gam omdan tanpha in a hon musak mawk hi. Kei leng
lamdang sa lua ka hih manin a sun nileng in ka mang ka ngaihtuah den a,
nitaklam hong hih in, gamvak ka utna in hon se tuntun ahihman in, a
nitak a ka mang leng thei pha nawnlou in, gamnuai lam manawh in ka
Meithal toi in ka diangkhia hi.
Bang bang hiam ngaihtuah a ka pai
zel lai in, ka gintak louh pi in, suangpimual ka na tung maimah hi.
Suangpi mual a hoh sawm ka hi kei a, khotaw mual a suaklu gah sakhi in
naknek lua ahihman a, chi a khotaw mual a suaklu kung chang a kuan sawm
ka hi. Ni-lah tumdi hita ahihman in, ki'k leng lawhsam a inn tungdi ka
hi, chih ka kitheih ziak in malam manawh in ka paizel hi. Huchih lai in
ka mang a nungak khat in a hon muhsak na mun ka va tung mawk a, khua in
leng hon mial khum ahihman in, a kiang a tuaiteng gah chang ding in,
tuaiteng kung omna lam ka zuan ngal hi.
Singkung lianpi khat ah
akaapi ah ka tuang a, sakhi hong pai dia ka gintak nalam nga in ka tu
hi. Tuibuk muamdat hun dikhong ka tupan, chih in, ka nunglam ah thawm
hong om hi, kei leng kinunghei in, ka nunglam ka enpah ngal hi. Himahleh
bangmah ka mukei a, tutkik ka sawm laitak in, kuahiam khat ni hon sawn
(push) mawk hi. Kiging manlou ka hihman in ka kia a, lamdang ka sa
mahmah mai hi. Huchih lai in ka pu hon thuhilhna ka lungsim ah hong lang
hi. Ka pu'n, "huchibang natuah ngeingei leh, sapi hong suakdi chih thei
inla, himahleh thum (3) vei tan a na lunglelh louh di ahi, thum (3) vei
sang a tamzaw ahihleh a kin lam a kihepkhiak san di ahi" chia hon hilh
ka lungsim ah hong lang ngal hi.
Kei leng lunglel lou in ka
kaltou nawn a, huchibang mah in, hon sawn (push) zel a, khatvei hon sawn
nawn le chu ka pu gendan a innlam paisandi, chih lungsim a nei kawm in
ka kaltou nawn hi. Ka kigin louh laitak in, sazuk tal, mam hinhen, a kii
bang mun 10 phial a kaa hileh kilawm khop a lian, ka taklam ah hong
suak mawk hi. "Sakhi chang hi'ng a, bangziak a sazuk hong suak mawk ahi
dia aw ! Kaapdi ka hi hia kaap lou di" chia ka kingaihtuah lai in, "sapi
tuakkha kaap louh in koih mawk lou e", chih ka lungsim ah hong lang a,
hoihtak a ngiim in, a taltang tak a kaap ding in ka kisa hi. Huchih
laitak in, huihpi hi awmtak, hat tak a hong nung in, miihing Aw ka za
hi. Ka Meithal ka lakkik dek laitak in, chil siatphak lek a nai hong
tung ahihman in kaap ka sawm hi. Thau ka mekdek laitak in a tung ah ka
mang a nungak ka muh ngeimai in hon nuihsan kawm in hon en a, amel
hoihdan leh a nuih kawm a a biang sumkuak khong zanmial lak himahleh
chiangtak in ka muthei mawk hi.
Lauhna leh lamdang sakna in hon
pum mat ahih manin ka zuktal muh kapthei vual di ka hi nawnkei hi.
Kintak a kumkhiak a innlam zuan a pai di, chi a ka kumkhiak lai tak in;
ka nungak muh hong paukhia hi. "Tua na zuktal muh na deih chih kon
thei, kei a ahia, na deih leh kon pe thei, himahleh kon piak ma'n
thilkhat nawn chiam ngai ahi" hon chi a, ka manglam hia a taktak chih
ngaihtuah thei ding ka lungsim leh ka taksa khol tengteng khawlvek hi'n
ka thei hial hi. Bang hiam ka chiam di ? Amah dong ding in ka aw a suak
khe zou kei. Ka kingaihtuah halh guih a, gamnuai a om ka hih lam ka
kithei a, kintak in innlam zuan in ka paisan hi.
Lamdang sakna in
ka dimlet a, thildang ngaihtuah thei ding in ka ngaihtuahna a kidaih
zou mahmah kei. Ka ngaihtuahna tengteng a luahdim vek hi. Himahleh ka
inkuante leh ka khanvualte lak ah bangmah ka gen nuam kei, a ziakbel
zuau gen a hon chi thouthou di-uh chih ka theih ziak ahi. Ka niteng
hunzat ngeina dan in, zingkal Dak 3:00 in ka thou nawn a, tawpsan
theilou, ka sisan a kituh ahih ziak in gamnuai lam zuan in ka Meithal
toh ka diang liam nawn hi.
Khua apat a gamla lou ka pai nung
in(phalvak kuan hita) ka sak, lamsak ah vagik nupa zan-giak ka mu a,
kaap di hia, kaap louh di ? Chia ka kingaihtuah lai in, ka pamlam ah
thawmdag ka za nawn hi. Kintak in thawm omna lam ka en phei ngal hi.
Chiang tak in zan-nitak a ka nungak muhmah ka mu nawn a, lamdang ka sa
a, lauh di et in le ka en nawn kei, a ziak bel, ka manglam a ka muh kia
hilou, a taktak a nihvei ka muhna ahih ziak ahi. Paizel hoih di hia,
innlam a kik mai di ? chia ka kingaihtuah lai in, innlam a pai hoihzaw
chi'n innlam zuan in lohsam in ka kik naw hi.
Inn ka tung in ka
nu-le-pa kiang ah ka mumang apat, huai zingkal a ka thil muhdan tengteng
ka hilh vek a, ka inkuante'n leng lamdang a sa mahmah uhi. Ka pa'n ahih
leh, lamdang sakmel himhim apu kei, "hiai khong chu gamvakmi, pasal
phate tuah mah aka hia, himahleh thil hoihlou na tung a ahong tungma in,
Pathian kiang ah thumna kon neihsak dia, nang le kalkhat sung khong bek
gamvak lou in inn ah na om maimai phot di" a hon chi hi. Ka pa thu oi
in, kalkhat sung vengveng gamvak lou in, inn ah ka om top a, haksa ka sa
in, kuapen ngai ka hia, chih leng theilou in ka lungleng thei mahmah
hi. Gamvak lou a ka om maimai hang in, nitak chiah ka mang neihte
theihsiam haksa ka sa thei petmah hi. Ka hinkhua a thil tung ngeilou, a
khen chiah zi ka nei a, a khen chiah ngaihzawng ka nei, a khenchiang in
houh inn thupi taktak khong ah ka na teng zel hi. Ka mangte ka pa kiang a
ka gen chiang in, " mumang maimai" ahon chihsan zel zawmah hi.
Kal
khat (1) sung vengveng gamnuai mulou a ka om nung in, gamvak ka utna in
honse tu-n tu-n ahihman in, omdan ding leng ka thei zou kei hi.
Nitaklam hong hih in, ka inkuante theihlouh kal in gamvak di'n ka
Meithal toh ka kuan khia a, manawh nalam ding leng theilou a ka pai lai
in, (a khaw min iim) khawkal gamla sim ka tung man hi. Huaikal lam ahih
leh lamlianpi le pailou, khawkal lampi himahleh a lun lawmlawm kei hi.
Lamkhang a pialkhia in zuanmuat gah taan, sakhi ka vachang hi. Sawtkuam
tak ka tut nung in leng thawm zakdi himhim a omlouh man in, inn lam zuan
in ka paikik hi.
Sau kuam tak ka pai nung in, kei lam manoh a mi
hong pai ka galmuh a, "tu khomial nungnung a bang hih dia gamnuai lam
zuan a pai ahi dia aw !" chi a ka kingaihtuah lai in ka kiang hong tung
hi. Ken leng kua a ahih chih theilou in, "koilam pha di, bang hih di na
hia ? "chi'n ka houpih masa hi. Aman ka dotna hon dawng pah a, "huai mun
a hong kipan ka hia, mikhua a giah sang in chia, azan azan a pai sawm
mai ka hi" chi'n hon dawng hi. "Nang kia maw ? Numei-mei, tu nitak
nungnung a nangkia a pai chihdan omkei, na khua-tan uh kon khak theih
hial kei le le, khodai tanbek kong kha di " ka chi a; aman khak a
ngaihlouh dan leh a paipaina sa ahihdan gen mah leh, phatuam ngaihna,
ka pu hon thuhilh nate, zuilou thei lou a ka kingaih man in, a nung ah
paulou in ka zui hi.
Dak-kal khat (1) phial mahmah ka kizuih nung
un leng ka kihoupih het kei ua, a tawp a tawp in, amah hong paukhia in,
"hiai khanglak ahi ka khua uh, nang zaw hiaitan hon kha inla'n, na
innlam uah ana kiksan mai aw!" a hon chi hi. Himahleh "hiai khang" a
chihna mun a khua a omlam theilou ka hihman in, a khua tan uh vaphak ka
utna hong suak mawk hi. "Na khua tan uh ka hong kha vanglak di" ka chih
leh aman leng "na ut nakleh, poilou, tuzan ka inn uah, ka pa'n khaw
mipite sa nek-khawmpih na (party) a neidek a, na-ut leh huai ah leng na
hong tel thei di" a hon chi hi. Lampi apat saulou pai hi'n ka kithei,
sun bangmai in hong vak a, ka mikhak le kuadang hilou in, nidang a ka na
muhmuh sa mah ahi chih chiangtak in ka thei a, khopi thupi mahmah ah ka
om chih leng ka kithei hi.
Khopi ka lut nung uh, sawtlou in ,
inn lianpi khat ka tung uhi. Gate lianpi ah security te uniform silh
hileh kilawm tak a minih chiang-tawi a ana ding ka mu hi. Numei nu'n a
kiang uah bangbang hiam a gen nung in, inn sung ka lutta uh hi. Innsung a
thupi in, mipi a tam mahmah mai ua, laasa toh, laam toh, zudawn pawl
toh, kuamah kingaihsak bik omlou in, amau buai buai in a buai mahmah ua,
numei nu'n a nu-le-pa kiang ah hon paipih a, kimeltheihna hiai bang in
hon nei hi. "Hiai ahi ka gengen, tuni'n ka pawtna ah ka kituak kha ua,
kei mah a ka pai di hon phal lou in hiai tan a hon kha a, eite lak a
atel lem nasak uh kon ngen". A nu-le-pa'n leng hon kipahpih mahmah ua,
ama room ah tawldam ding in hon thuailut hi.
A room a ka omlai
un, ka kiang ah "na pu na pa khang a kon deih mahmah na hi ua, na pu
leng vuaitam tak, koute lak a hong tel a, ka pasal di'n tam veipi ka na
zawn ta hi. Himahleh na pu lungsim khauhtak, bang teng in khem mah
le-ung , a nem thei tuankei a, atawp in kei leng thangpai lua ka hihman
in, napu ka hamsiat a, natna lauhuai leh lamdang, mihing doctor te
hihdam theihlouh in ka gawt a, na naupan lai in, na pu'n hon sihsan chih
ka thei, huai leng koute gawtna ziak a si ahi" huai ziak in nang leng
na pu bang a gawtna thuak na ut kei leh koute na hon belh a, kei lal
tanu toh i kiteng ngai di ahi".
"Na pu-pa khang apat in ka mi
ngaihnat zawng leh deih zawng na hi ua, na gamvakna ua na gamtat dante
khong uh ka na enen sek hi. Na pute tangkha lou ka hihman in, ka
lungkham thei mahmah a, himahleh na pu suante lak a amah nungzui thei
kuamah omlou chih ka thei in, hon hih buai louh a, hon tawpsan ka na
sawm man hi. Himahleh ka nungzuite lak a khat in, nikhat a kholak vakna a
ahon muh dan hon gen tak in, nang theihchiang ut in kong zawng ua, a
tawp atawp in kon theichiang khong uhi".
"Ka hon deihna ziak uh
ahihleh thildang ziak hilou in, na pute dungsun in, gamvak leh sakap
thei tak na hia. Gamnuai a na khosak dan, ngakik helh sawm a suangpi na
tawmkan dan khong. Kol sang pi pi lak a khaugui a na luai khiak dan
khong kon muh chiang in, kithazou ka hon sa in hangsan ka hon sa thei
mahmah mai a, vuaitampi nang muding a ka pawtkhiakna uh ahita. Tu in chu
ut-in ut-lou hi lechin, bangmah suanlam na bawlthei nawn kei di" a hon
chi hi.
"Ka thumang lechin vualzawlna chikim in ka hon vual zawl
dia, lawhsapna himhim in nang ah mun a tang kei dia, gamsa na deihdeih
na kaap dia, huaikia hilou in sum-le-pai, louma haigah, buh-le-bal
bangkim in a hon lawi kei ding" a hon chi hi. Himahleh ken bel, tu a
thupuukna bawlthei mai ka hih louh dan leh, hun sawtlou hon pe ding in
ka ngen a, aman leng ka ngetna hon phalsak a, pai di chi a ka dinkhiak
leh mikhat kiang ah inntan motor a hong kha ding in sawl a, inntan motor
in hong kha hi. Inn ka tung in ak-masa a khuangta hi (zinglam dak 3:00
vel chihna ahih chu)..................!
PART~II
Nidanga ka hih gige ahih ziak in, zan sawt tak inn tunglou a, gamnuai a
om himah leng ka inkuante'n lunghimohna himhim hon nei kei ua, (a hon
taibol chiang un leng, "Pasal gamvak, Ni thum (3) tan a hong tung lou ka
hih leh na hon ngaihtuah pan di-uh," chi a ka genzel ziak le a hi
maithei) ihmut nang hun omlou ahihman in, tap-tung ah mei oi in ka tu
hi. Ka taksa gimsim ahihman in, ka na lusu kha a, ka Nu zingthou in a
hon phong a, "Zan-nitak koilam a vak na hia oi ? Bangmah hon pawlou
maw"? Chi'n hon dong pah ngal hi. Bangmah thudang leng gen tuanlou in,
lawhsam ka hihdan kia in ka dawng hi.
Ka lungsim ngaihtuahna,
thildang in a luah thei mahmah kei a, huai zan a ka Nungak muh in ka
kianga a thil gente kia ngaihtuah in ka hun-le-ni te ka zang bei hi.
Gamvak ding in ka tha a om kei a, nek-le-dawn lam leng lung-gulhna
himhim ka nei zou kei hi. "ka Pa kiang a ka thil tuahte hilh di ahi dia
aw ! ", chi a lupna tung a ka kingaihtuah lai in, khuhthawm ka zak in
hon halhsak guih a, thawm gin-na lam ka etphei leh ka Pa ka mu hi.
Gen-nop nei ahi chih ka Pa mel ah haih vual louh a kilang ahihman in,
ken leng ka pa kiang ah. "Pa bangthu om ahia ? Tu zan nung nung a ka
kiang a non pai mawk"? Chi'n ka na dong pah hi.
Ka Pa'n "Boi, tulai
na omdan diklou om hi'n ka thei a, midangte theih alah gen-nuam lou di
na hihman in, chi'n, midangte ihmut lai a hong hoh ka hi. Khakhat bang
pha di hita, bangmah lah ne ngeilou chin a, zan alah ihmu gin-na lou
china, nidang a, Ni lengleng a gamvak, tua lah gam lah vak ngeilou chin
a, na taksa, na mel-le-puam le nidang bang zoulou ahi. Huaiziak in,
bangmah iim neilou in hon hilh lechin, chi ka hi. Na gamvakna a banghiam
diklou vatuak-kha hidia hon gingta ka hi". Hon chi a. Ka Pa kiang a
bangmah genkhiak utlou ka hihman in, "bangmah lungkham nang omlou, ka
taksa agim sim a, huaiziak hi, zingchiang a gamvak-khiak sawm ka hi"
ch'in ka dawng hi. Huchi'n ka Pa'n leng ngaih phalou tak in hon paikhiak
san nawn a. Kei leng ihmut sawm in, a thal, akhup, asi'k zawng in ka
kilumlet den hi. Huhchih lai in ka na ihmu a, ka Nu meitawh ging in hon
phawng a, kei leng kintak in lupna tung apat in ka thou khia hi.
Nidang
teng a, kou inkuan a thou masapen ka hi gige a, mei ka tawh a, tuilum,
singpi di ka suang a, huchia gamvak khe zel ka hia, himahleh ka Nu'n kha
khat phial mahmah hon thohkhalhta ahihman in, ka Nu leng a ngaih apha
nawn hetkei chih, ka zing thoukhia hon etdan in ka thei siam mai hi.
Himahleh, ka Nu'n bel bangmah huailam thu hon dong lou in, "Tulai gam
na vak ngei nawn kei a, i sameh louhna le sawt lawta, i khintung khong u
le, ei khintung di le bang nawn kei. Nidang a zaw khintung khong awng
man ngelou hia ! " Chi'n gamvak dia hon deih hi omtak in hon en hi.
"Gamvak di ka chihna zaw sawtta hi a ; tulai zaw, zingkar lam chia lah
thawh haih gige ing a, nitaklam chia lah ka ut-tha suaklou zel a,
tunitaklam zaw ka vavak-khe himhim di, chi'n, pangkhang lam ah maiphiat
di'n ka pawtsan hi.
Ka Pi'n zankhat mang lamdang tak hon nei a,
ka kiang ah "Zan-nitak ka mang in na Pu ka mu mawk a, ka lungkhong hon
lengsak sim mawk veh aw. Na Pu hatlai a zaw i khintung khong uh sahou in
lawi ngeilou hi a, na Pu'n a sihdek a ahon thukhahte khong mangngilhta
na hidiam ah ! ", chih a gen laitak in, banghiam ngaihtuah khiat nei
hileh kilawm in ka Pi hong om hi. Ken leng a thilgen lakloh lua ahih
ziak in kintak in, "Bangchi e Pi"? Chin ka dong pah hi. "Ka mang ka thei
khe guih a, Na pu'n Boipu gam ana vaksak nawn kei un, a tung a banghiam
thil hoihlou a tung maa in, chia hon gen mawk a, lamdang salua ka hi"
chi'n hon gen hi. Ken bel "mumang khong bang enle lamdang taktak inei
zel aka hia, mumang khong bang ka Pa'n le, "mumang mai mai" a chizel
vele, "bangmah lungkham nang omkei Pipi, tuni, nitaklam chiah Mualkoi
lam ah ka vavak dia, sa kon man dia, kapu hatlai a, i khintung uh sahou
in lawi ngeilou na chih mah bang in, ken le ka lawisak nawn kei di" chia
ka gen leh, ka Pi leng kipahmel tak in hong nui khia hi. Himahleh ka
pi in amumang agen pen in ka lungsim akam mahmah mai a, akhen chiang in a
selam ka kipia a, akhen chian lah "mumang maimai " chi'n ngaihthah ka
sawm sek a, himahleh tunai zek a ka thiltuahte ngaihtuah in ka pi mang
dikdi'n ka gingta tlat hi.
Gamvak Utna himhim nei nawnlou ka
hihman in, nitaklam anhuan huntan in leng inn ah ka om maimai lai hi. Ka
Pi ka kiang a hong pai in, "boi na gamvak na a na ken di " chi'n tuibuk
thol khat a dim in hon pia hi, "bang ngaihtuah na nei ahi dia aw,
banghiam thilkhat in ka Pi dawi hai ahi dia aw, ahih kei leh gamlak sa
lung-gulh lawta ahi dia aw !!" chi'n ka kingaituah den hi. Bangteng
hileh ka inkuante lak a "gamvak di, chia genta ka hih chiah" chi'n,
thazawi tak in ka meithal liangpuak in Mualkoi lam zuan in ka diang khe
nawn napnap hi.
Ka sacha'n nang gamla lou ahihman in, amun ka tun
in leng Ni a sang mahmah lai hi. Ken leng phavang ol-len lai ahih tawh,
loulam a le, mihing thawm omlou di hi a, Sangal lou lut khong tuah khak
leh chi'n, loulam ah ka paisuak a, lou ka tun in, Theham betkhiak bang
mai in a daih in a dai di-de mai hi. Banghiam ka ngaihtuah chih ken le
ka thei zou kei ! Loubuk a ka tut leh ka na lusu kha mawk hi. Ka
khanlawh in Ni tumdi kawlbul ana tan eng sing-seng ka mu a, bangziak a
diam ah ka lungleng in hong leng mawk a, Nitum di en a faifuk in laa ka
sak hiauhiau leh, lougal gam-mang lak ah Ngalhon thom ging ka za hi,
"Lou lutsawm Ngalhon hita'n teh, ama a chan ka sawmna lah ka lusuk khak
ziak a, alut hun lapman nawn lou di ka hih chiah, chi'n, loulai a sing
ding khat ah a cha'n nang ka bawl a, ka bawlkhit in kei leng huai ah ka
tu ngal hi.
Khua in leng honmui khum ngal ahihman in, vauzul lam
en in, kiging tak in ka meithal tawh ka tu hi. A gal a Ngalhawnte thawm
in hon naih zel ahihman in, hong lut haklou di ei ve, chi'n ka lunngsim a
kipak gu mahmah hi. Huchih lai in ka gintak louh na lam, loukhung lam
ah Ngalkhaat thawm ka za nawn a, koilam pen ngai poimoh zaw di ka hia ?
Chia buai tak a ka kingaihtuah lai in. Loukhunglam ah Ngalkhaat hong lut
petmah hi.
Huai Ngalkhaat ahihleh kum khat paita a Pasalpha mahmah khat Pu, Thongluai
in ana kapliam sa ahi a, himahleh man zolou in, mikhat in ana sihlawh
hial hi . Pu, Thongluai in a gendan in, "Huchia gamnuai a Sakhi chang a
ka tut lai in, ka gintak louh tak in ngalkhaat hong suak mawk hi. Kei
leng kin-le-buang a kibawl rem in ka kap ngal hi. Himahleh kintak a kap
ka hihman in ka ngiim hoih man kei a, a pheipi lak ah ka kaap kha hi,
silou ahi chih thei mah leng, gamla a taizawh ka gintak louh ziak in,
pilvang tak in a nung ah ka suizui ngal hi. Himahleh ka gintak sang a
sau zaw ana pai ziak in, a zing chiang a lawmte toh vasuithak di, chi'n
ka paisan hi.
A zingchiang in ka lawmte 2 toh sanung sui di'n ka
kuan thak nawn ua, a sisan leng hunkhop bua ahihman in haksa-lou chik in
ka sui thei ua, himahleh gintak lou pi'n gamla atung zou zaw a, muzou
nawnlou dia ka ki gaih ziak un, a ngalkhaat liam lam le ngaihtuah
nawnlou in, munkhat ah ka khol uhi. Sawtlou ka khol nung un, awl a
paikhia in, saliam nung leng sui nawnlou in, mahni utna lamlam ah vak
kual ni hang in, chi'n kingak-khawm nang leng chiangtak in ka kihilh
uhi. Huchia sawtlou ka kikhen nung un, ngalkhaat thawm hia, mihing
thawm, chih theihkhen vual louh ka za a, dinkhawl zen in thawm ka
ngaikhia hi. Theichiang theikei mah leng thawm hong suahna lam kin tak
leh pilvang tak in ka naih zel a, a kiang nai ka tun'n in, saliam leh
mihing kisual chih chiangtak in ka thei a, himahleh kuapen tawh kituak
kha uh ahia, chih ka thei kei, pilvang ngai ahi chih ka thei a, huaiziak
in pilvang thei bangpen in ka naih zel hi. Huchih laitak in ka hunpaisa
teng a ka tuah khak ngeilouh, nidang chiale ka muh dia ka deih louh, ka
mu hi. Ka lawmte, a naupang zawpen tawh ka ngalkhaat kapliam kisual ana
himaimah hi. A saliam pen ahihleh ka mumai kei a, ka muh ahihleh ka
lawmpa gilpi, ngawi teng teng lotkhia in munkhat ah ana lum hi. Himahleh
saliam koi a om ahia chih ka theihlouh man in, ka lawmpa kiang leng ka
tung pah ngamkei hi. Ka min (name) in ngaihtak in hong kisam a, ka
saklam a ka lawm pa'n, ka sakaap liam amuhthu hon gal hilh a, ken leng
kintak a hong pai suk ding in ka hilh hi.
Ka kiang hong tun in,
"hiai ah ana duty in lan" chin ka lawmpa si hia hing chih leng theihlouh
buaipih din a kiang ka naih ngal hi. A sisan pai khawl kei mahleh
damsuah dia lamet huailou chih ka theih manin ka lawmpa kiang ah,
"khualtai hia na ut, lawmpa, bangmah theilou kiang a om"? Chi'n ka dong
hi, inlam a panpihtu di sap a ut ziak in, kei ka lawmpa kiang ah ka om
a, amah innlam zuan in a paikhia hi. Theitawp suah in, a hinna humbit
sawm mah leng ka hihtheihna in a daihlouh ziak in, ka lawmpa painung
sawtlou in hon mual-liam san hi.
Huchia loukhung lam a ngalkhaat
hong suak in kei lam hon manawh zel ahihman in, kiging tak in ka tu hi.
Buhvui tung ah leng a nungzang, thukvum khong lang thei ahihman in,
neu-selua chu hikei chih ka thei mai a, buh kal hong phu-awn dialdial a,
"kapkhial nawn hauh kei di" chih ka kithei tak in, a taltang tak a ngim
in ka pu hon gousiah, ka meithal ngeimai in a khatvei nang in sapi ka
kaap hi, a taltang mahmah a kaapkha ka hihman in, laamkhat di khong lel a
tai a, amun mahmah ah a si ngal hi. Sawt tai lou ahihman in kei leng
singkung apat kumkhia in, pilvang kawm tak in ka naih a, maukeu khat a a
sih leh sihlouh theih nang chia ka holh leh atatlouh ziak in, ngaihpha
tak in, innlamte hilh din ka pai hi.
Phavang hun-nawp lai ahia,
van leng a siang in, ak-si le kilang phik-phiak a, khapi leng gam-mang
lak tanvak di khop in vak hiilhial hi. Zan leng sawt nailou ahihman in,
kinlou hial in ka pai hi. Gam-mang lak ka lut dek in, thawmging ka za a,
kua dang hilou in, vuaitam ka muh tak, leh ka na kipawlhpih hial Nungak
Aw ahi chih chiangtak in ka thei, ka min in hon sam a, bangmah dang
genlou ahihman in ka pai zel hi. Huchih laitak in, ka sak gam-mang kawm
apat menchim ging hi awmtak in hong ging zawizawi a, "tu vuahzuk lai le
hilou, bangchi dan a men khong hong chim mawk ai dia aw", chi'a menchim
in hon vuk khak lau a tai ka sawm laitak in, ka ma ah, lampi khaktan
zawng in singluang lianpi khat ana ki kham mawk hi. "ka kuan-lam in lah
ka mu het kei a, bangchik kal a ana pukman ahia"? Chia kingaihtuah kawm
in, singluang haksa tak in ka kaan thei vanglak hi.
Kho-ul kai
zen a singluang ka kantan nung in thawm leng hong daita a, khawl tawldam
kawm a, meitep ka bawl laitak in, sunlai bangmai in ka kim hong vak a,
kei leng ka kiguih hial hi. Lamdang sa a ka et kualkual leh huai Nungak
mah kei lam manawh in hong pai nawn hi. Kei bel khatvei ka muhna
ahihlouh ziak in ka lau ut nawn kei hi. "Thildiklou om di ahi" chih thei
in paikhiak sawm mah leng ka tat theih louh ziak in, munkhat en in ka
tu maimah hi. Mitphiat kal louh in ka kiang hong tung in, a
mel-le-puamte mihing toh kilamdanna himhim a om kei a, a mel hoihdan lah
ka pian nung a ka mimuh tengteng le kuamah a phazou di om lou, huai kia
hilou in, apian leng analh mahmah zawmah lai hi,"Zanlam nitak a ka
thugen, ka dotnate, dawn-na na bawlta di maw ! Bangziak a gam kuankhe
ngeilou na hia? Kon muhlouhna sawt lawtelta, na inn ua lah hong kihoh
ngamlou a, na thupuukna non hilh theita diam ? " Chi'n hon gen hi. Ka sa
huhut a, bangpen gen a, bangchia dawng di ka hia, chi'n ka ngaihtuahna
abuai mahmah hi. Himahleh melhoih ka sak na leh ka ngaihnatna lian law
mahmah ta ahihman in, a heh khak ka lau mahmah thou hi. "Hehpih takin
hon hihbuai non mahmah kei un, kei mihing ka hia, noute mihing le hilou
tawh bangchi'n i kingai in i tengkhawm thei mahmah di-ua ? " Ka chi a.
"Nidang chiah kimu non din hon paikhiak san a, kei leng innlam zuan in
ka pai nawn a, buaina dang tuaklou in inn ka tung hi.
Inn ka tung
in ka inkuante lak ah, ka sakaap thu ka hilh a, himahleh thildang
bangmah ka hilh nuam kei hi, "tua-lah zan sawtta ahih chiah zingkal
baihtak in na vaenthak mai di uh " ka pa'n hon chi a, lupna tung ka
kidenna ngal a; zankhang lai in ka mumang in hon halhsak guih hi. Ka
ngaihtuah den a, "bangziak a mihing ahi kei chihlah thei ing a, a hon
zotna uh lem ana sa maimah ka hia, kimu nawn le-ung ka mang a ka gen ana
gingta taktak di adia aw ! " chih khong ka ngaihtuah hi. Ka mang in,
huai nu mah in, "thupukna na bawlta chih kon thei a, huai nang mah
paukam ngei a zak ka ut ziak a hong pai ka hi, sun a na Sangal kaap leng
kei hon sawl ahia, ka hon zotna, lem salou a, na hon nial ahihleh huai
nasakaap leng na tangkha kei di". Ahon chi a, kei leng khatveina sapi
kaap ka hihchiah, a luang inn puaktun louh di ka ngaingam thei kei a, a
hitak in chu mite'n pasalpha ka hihna thei semsem le uh chih ka deih
ziak ahi. Mite lak ah thudik, ka thiltuahte gen leng lah kuaman hon
gintak saklou di hi ua, chi'n, ka sangal kaap ka deihluat ziak in ka na
Yes mawk hi.
Ka mang a nungak nu hon zotna ka dawng chih
zingkal tan in leng ka thei a, himahleh kisikna himhim ka nei kei. Amah
melhoih ka sak ziak leh, sapi ka khatvei kaapna ahia, phur tak in ka
lawmte toh loulam zuan in, Ngalkhaat pawdi'n ka kuan khia uhi. Amun ka
tung ua, ka gintak sang in ana lian zaw tham a, kipahna in ka dim a,
lawmte'n leng a hon ngaisang uh chih ka theih a, "nawn kaap zelzel di
aw" chi'n a deihsakna paukam khong kei a di'n zak anuam ngei mai.
Ka
hun tamzaw gamnuai ah zang bei in, gamnuai ka utna leh ngaihnatna hong
lian mahmah ahihman in, ka sungte khouhna leng bangmah in ka ngaikei hi.
Himahleh ka vak-khiak tam leh sa kaaptam ka hihman in, ka sungte'n leng
hon kipahpih mahmah uh hi'n ka thei hi. Ka hinkhua ah bel thildang
kilamdanna himhim a omlam ka thei tuankei. Himahleh midangte'n, bang hon
chi muh uh ahia chihbel ka thei kei.
Gamvak ka utna in hon siat
chiang in, dainai khong ah ka vavak-khia a, dainai, gan tatphak na
lellel khong ah, sakhi, khong ka vakaap zel a, kei leng vangpha kisa in
ka kipak thei mahmah mai hi. Kei mah ah kiginlelh nang bangmah ka thei
kei a, ngalkhaat ka kap zan a, ka mang a nungak ka muh ban, ka mu
nawnkei a, ken leng ka lungsim ah "hon paisanta uh hi'n teh" chi'n ka
kipak sawnsawn hi.
Huchia nikhat a gamsa 2/3 kaap chang khong nei
ka hih chian ah, khotang mipite ngaihven ka lawh panta a, ka inkuante'n
leng ka kiang ah, a ngaihphat louh thu khong uh hon gen zel ua.
Himahleh kei mah lam ah kilamdan-na bangmah omlou ahihman in ka
kingaikhok tuan kei hi. Himahleh ka lungsim a hon theisaktu khat om tlat
in ka thei a, huai ka lungsim a hong om chiang in, kuamah khouh vual
louh in gamvak ka ut tuntun zel a, ka vak nang lampi tan in, mumang lah
hichiah lou, in hon theisaktu om hileh kilawm in, ka thei zel hi.
Ni
2 vengveng gam kuankhe lou a ka om nung in, sunkhat gamvak ka utna in
hon pha nawn a, vuah lah zuzu ahih chiah, vuahzu nuai a kuankhiak dan
omlou ahih chiah, chi'n tutphah tung ah ka lum a, ihmu dia ka kisak lai
in, neu apat a ka kikholhpih, ka lawmhoih mahmah Sangpu hong lut
in hon phong a, kei leng "hong tu ou " chihtoh tutna tung ah ka tupah
hi. "Lawm tulai khodung khovai ah na tanchin a kithang mahmah a,
himahleh ken bel na gen ka zak kei leh gingta theilou ka hihman in, na
kiang a dong dia hong ka hi", a hon chi hi. A thil gen theihsiamna
chiang nei thou mah leng, "bang thu bang laa om ahia"? Chi'n ka dong
nawn hi.
"A,,,,,,thil thupi lua zaw hikei, tulai sa na kaap
theih dan lawmlawm, zan nitak a ka nungak helna a, inntekpa'n hon gen
khe mawk a, ken huailam himhim ka na ngaihtuah kha kei na a, hon gen leh
ka gintak na chiang om mawk ahi. Na lungsim loulam genkha ka hih leh
hon ngaisiam mai in aw", chi'a pawtkhiak mai sawm in a tutna apat in
hong ding khe mawk hi. "paisawm na maw ? Na thilgen bangmah ngaihmoh ka
nei kei, a diktak in ken leng kiginlelhna ka nei", ka hun paisa a ka
thiltuah tengteng leng ka genvek hi. " Huchi ahihleh pilvang tak a na
om hoih di eive maw, vuah le theu di abangta, ka vapai phot di", chi'n
hon pawtsan a, kei leng gamvak di'n ka kisa nawn hi.............
PART ~III
Vuahzu nipnip nuai ah gamvak di'n ka meithal toh ka kuankhia a,
"khaw-omdan in a zir bok a, tuni chu kilohching mahmah in teh" chih
lungsim nei kawm in ka paizel hi. A lehlam ka ngaihtuah chiah, ka lawmpa
Sangpu thugen ka ngaihtuah khe zel a, sakaap ut thou mah leng
lohsam a ki'k le poi sak louhna ka nei thou hi. Gamnuai ka lut nung in
leng sa thom himhim zak di a om kei a, banghiam thilkhat in hon se
tuntun hileh kilawm in ka om a; innlam a ki'k mai khong ut sim mah leng,
kiik zen lou in, nikum a loutul ka tung hi.
Sawtkuam tak loutul
buk a tu a, ka manawh nang lam thei lou a ka kingaihtuah lai in, "ni le
sanglai thou hiven" chi'n lounawl luidung ka gamzuih suk mawk hi. Ka
paipai leh luipi ka suak khia a, munkhat a ding a ka dak kualkual leh
luipi gal lam apat in sakhi-tal tuisan nawinawi liau galkai din hong
kisa ka mu hi. Kei leng hon muhkhak lau in muisu'm liah ah kintak in ka
kibu a, a hong suahkhiak nang a ka gintak nalam ol ol in ka naih phei
zel hi. Tui hat lua ahihman in sakhi in le hon liau galkai zou zoklou
ahihman in, panmun ka deihthusam a rem in ka na kibawl man hi. "A hon
leuh galkai ngeingei leh lui nawl a hong tun chiang a, kising hul di
hiven" chi'n, a kising hul sung a kaap man ngei ding in kiging tak in ka
om hi.
Hon naih zel a, a hong suahkhiak nang leng ka theitheita
hi. Ka meithal tang thun in, ka kam a, sakhi in leng luinawl piaunel lak
a hong tung a, ka gintak bang ngeingei in a hong kising hul a, kei le
kimansa a om ka hihman in kaap di'n ka kisa a, ka ngi'm a, mitkhap kal
lek in, ka sakhi muh koi lam a mangman ahia ! chih ka thei kei, a kiang
a suangpi leh muisum kunglou ngal muhdi himhim a omkei, lamdang salua
ka hihman in, aki'm akiang en in ka dak kualkual maimah hi. Huchih
laitak in ka sakhi muhna mun mah ah thil tang zualzual ka mu a, ka mit
vai hia ! chi'n ka mit ka nuai a, ka et-thak lele bangmah muh chiang di
omlou in, thil tang zualzual mah ka mu nawn hi.
Ka etna suan
hetlou in, Kintak in ka naih phei zel a, amun chi't mahmah ka tu'n in,
nidang a ka muhmuh sa Nungak mah ka mu nawn a, "hun hiaitan mulou a omta
hi'ng a, hon paisanta hi'n teh ka chih lai a, amel munawn mawk ka hih
ziak in lamdang ka sa petmah hi. Lamdang satak a ka et lai in, kei lam
hon en in, luidung teng ah kithon zuazua khop a ngaih in a hong nui a,
nidang a anuih ging zak a nop theihtheih maizen toh, tutung a anuih ging
ka zak in, lauhna in ka pumdim mawk hi.
Nui kawm in, ol ol in
kei lam manoh in hong pai zel a "Nidang a hichibang a hon bawl ngeilou
hi a, tua bang chidan hita ahia le ? Ka lauh nang a hon khem sawm ai ta
di e ! Bangteng hileh, sapi liam leh sahang, dawi leh sikha le laulou
ka Pu tupa ka hi kei ahia ? Hiai khong maimai ka lau maimai sin kei"
ch'n, ka lungsim ka sukhauh a, "ka mang lam a amah lak a ka thuchiam ka
tangtun zohlouh ziak a hon hihbuai sawm le hi maithei ahi. Bang teng
hileh ka kiang hong tung phot leh" chi'n ling pepep kawm in, amah kia en
in munkhat ah ka ding maimah hi. A diktak in, a nuih ging vuak ka zak
in le lauh chih petmah in ka lau mawk hi.
Ka Pu tangval lai in,
ka Pute tenna khua ah sahang gilou a la'ng mahmah mai a, ganvulh
tengteng a keihlup vek nung in leng deihkhop mai lou in, khosung kholai
teng ah, "kei Lal pen ka hi" chi bang mai in, a mei sautak pei leplep
kawm in a vak sek hi. Tangval hangsan, thahat leh pasalphate'n leng lawh
ngaihna theilou in, sahang gilou a hong lut chiang in, kibuk nang zong
in buai thei mahmah mai uhi. Amah ka Pu hon hilh dan in.....
Ganvulh
tengteng keilum vekta ahihman in, a gilkial chiang in mihing nangawn
keihlup sawm in, innnuai kawtawng leh ak-gi'l sung khong ah nek di zong
in phe velvul hi. Nikhat tangau hong au a, "Naupang mang om, a zong dia,
nungak tangval kuankhiak chiat di" chi'n hon gen hi. Bang chidan a
Naupang mang mawk ahia ? chi'n kintak in tangaupa kiang ah ka dong a.
"zing an nekham, dai nai a sing paw dia kuan, tutan hong tunglou ahi"
chi'n hon dawng hi. Ka lungsim ah "sahang gilou in tuah hita e, a guh
leh a puansilh kan muhdi om ken teh" chi'n, a gamkuanna lam ka dong ngal
hi.
A sing puakna, a genna lam uh, tangval hawn, ka lawmte mi
thum (3) toh kin-le-buang in ka zuan ngal ua, neu lai a, papite thugen
"sahang in, vok, bawng khong a tuah chiang in, mihingte'n anung a su'i
theihlouh nang un, leilak a taalkaih mai lou in, a theih dandan un a
vawk-ka'ng sek uh" chih khong ka lungsim ah hong lang a, a rem lailai
ah, singkung khong a kal in, ka galdak zel ua, a tawp a tawp in, nahsawl
thak mah mah kisekhawm ka mu hi. Kintak in nahsawlte ka paikhia a, ka
et leh. Ka gintak bang ngeingei in, sahang gilou in, Numei naupang kei
um in, a sa teng phial mahmah a nek nung, a guh tamlou, a taksa tamlou
leh a puansilhte ka vamu uhi. Nahsawl a khuh na ziak ahihleh a ne-k nawn
dia adeih ziak ahia, pilvang tak a buaipih in, ka puan tawite un ka
tuam ua, ka tuam khit un, midangte ka sam khawm uhi.
Huaini apat
in ka thang apai mahmah mai a, hiai gamsa maimai in mihing a keihlup
ngam chih ka ngaihtuah a, sahang gilou thah dan di ngenta ka ngaihtuah
hi. Himahleh ka Pate'n ka malaknate hon dang/dal zel ua, ka ut bang in
thil ka hih theikei hi. Numei naupang a keihlup pen deihkhop maidi ka
sak lai un, a bul panpan chouh ana hi zawmah lai a, niteng phial in
Naupang sahang keihlup thu zak di om gigeta hi. Khosung a pasalphate'n
kicha'ng zel mah leh pilvang lua ahihman in, a kituak kha thei mahmah
kei a, khotang mipi, naupang, numei lam leh atek lamte bang patau lawta
ahih ziak un, mahni inn a giak ngamlou in, munkhat a khozang in
kigiakkhawm a, pasalte'n a theih dandan ua sahang gilou mat sawm in a
kibei hi.
Sahang lah kituak kha theilou, mihing lah niteng a kei
lum gige ahihman in, val-upa leh khotang makaite kimukhawm in, khodang a
galtai di'n thupukna hon bawl uhi. A zingching in khozang mipi in
galtai di'n kipawkhia ua, himahleh kei bel sahang khat ziak a taisiat ka
ut bilbel kei hi. Ka nu-le-pa'n khem chih petmah in hon khem mah le uh,
ka ut tuan kei a, himahleh kei ziak in a galtai di-uh kikhel sak tuan
kei uhi. Ka Pa kiang ah "Kei hong paitei lou di ka hihman in, na meithal
(tua ka pu'n gou hon nutsiat pen) hon nutsiat inla, hiai sahang gilou
ka thah ma i khua uh potsan lou di ka hi" ka chih leh, ka Pa'n a meithal
hon pe phal hetkei a, "kuaman om teitei di'n hon sawl sam a, sahang
laulou a, galtai utlou na hih leh, hiamhei bangmah zanglou in, na
khut-tum in thah na sawm ke" chi'n hon dawng hi. Ka inkuante'n bel "sih
ut na hi" a hon chi hial uhi.
Ka Pa lungsim ahihleh suangpi
bangmai ahi chih ka thei a, a gensa chu a gensa himai. Bangchi zong teng
in ngen mah leng hon phal lou di chih ka theih ziak in, midang lak a
khelh di zong in kholai teng ah ka vial diang hi. Himahleh ka khua uah
kei kia'n om leng sidi chih miteng in hon thei uh ahihman in, kuaman a
meithalte uh khelh di aphal himhim kei ua. Kei leng beidong in innlam ah
ka ki'k hi. Kou khua ahihleh inn 60 vel om ahia, khozang in galtai in,
ka khokiang lam zuan in, aneu alian, amei apa, atek akhang in hong
liamsan ua, khua ah kei kia'n ka om hi. Sahang gilou a di'n le inn 60
lak a innkhat a mihing om chu zonkhiak haksa lawmlawm din a gintak huai
kei.
Nitak a hong hi a, khosung a keikia om ka hih manin, sahang
gilou in le, kou innlam hon zuan pah din ka gingta a, kiging tak a om di
chimah leng vanzat di bangmah ka nei kei a, tempong toh sahang gilou
ana beidi'n chu, "sih ka ut" chi'n a kam bul ah va om le, huai toh
kibang vel di'n ka ging. Lungsim buai tak a ka om lai in, " tem leh
heipi bek ngai ahi " chi'n khintung lam ah heipi zong di'n ka kal tou
hi. Heipi ka muhloh ziak in thildang tempong toh zatkhawm theih di dang
ka zong hi. Huchih lai in khinpi tawng ah teipi khat ka mu a, kintak in
ka dok-khe ngal hi. Ka etchiang a, a hiam nawnlouh ziak in, azan azan in
suangtaat in ka taat hiam ngal hi. Mihing a keihlupsate nek di neilai
ahi diam ah, huai zan in a hong lang het kei hi.
A zan nih na
leng hong lut ka gintak lou ziak in, ka teipi toh, tempong toh, kiging
tak kawm si in ka lum hi. Zanlai in ka khanglou a, thawm zak ka nei hi.
Theih chiang sawm a ka ngaihkhiak leh, sahang gilou thawm mah ahi chih
ka thei a, innnuai a hong lut ahi chih leng ka thei hi. Su-al/tuang (sual kichi khah, huai hunlai in maupek kiphah ahi)
ka phenvang a, ka et leh, aman leng lauhna himhim neilou hileh kilawm
in kei lam hon melh gegu hi. Ken leng lau thou mah leng, ka lauhna
latsak ka ut kei a, teipi a khoh di chi leng lah, ka khoh ma a kihemkhe
mandi chih ka thei a, amun a vanaih di chi leng lah, sih utlou a dia
vanaih vual hilou ahih chiah " a hon et tantan en di " chi'n innnuai
lam ka en den hi. Sawt kuam tak ka ki- et-tuah nung un, aman le gamnuai
lam zuan in hon paikhiak san a. " amah lauloute thei mahmah e " chi'n ka
nui phaphalh hi.
Hapta khat vengveng ka om nung in le sahang
gilou mel/thawm himhim zak/muh di a omlouh ziak in, " gamdang a hon
paikhiak santa hi'n teh " chi'n, khomipite vahilh di'n ka kuan hi. Si
dia hon gingta vek uh ahihman in, ka mel amuh un lamdang sa tak in hon
en hehu mai uhi. A vek un hong kik ut kei mah le-uh a tamzaw thamte ka
khua ua hong kikta uhi.
Lau a ling pepep kawm a amah lam ka
etlai in, thil tengteng hong kikhek vek hi'n ka thei a, ka lauhnate
thakhat thu in amang vek a, nidang a ka ngaihnat dan mah in ka ngaina
thei nawn mawk hi. " Na ut ut hon ngen o " a hon chi a, himahleh bangmah
ka gen kei, "deih lou maw, tu-le-ta, sum-le-pai, buh-le-balte hon
pethei ka hi" hon chi nawn hi. "Huaite hon ngen leng bang ziak a hon pe
di e"? Chi'n ka dong nawn hi. "ka gen gensa eivoi, kei hon ngaizawng
lechi'n, kisik lou hial di na hi", chi'n khem theih chiteng in hon khem
hi. A tawp in ken leng amah hoihsa a, ngaina ka hih chiah chi'n lem ka
sa ta hi.
Hon paikhiak san maidi ka sak lai in, a inn ua pawt
di'n ahon zawn zawmah a, kei a dia nial vual hilou ahihman in thumang
tak in, a inn ua hoh dia a hon zotna rem ka sa ta hi. Amah toh ka kimuh
chiang in, ka omdan a lamdang vek zel mawk hi. Saulou ka painung un
lampi lian ka suak khia ua, himahleh ahidi mah in ka ngaithei mawk hi.
Lamlian ah Motor a hon ngak pih ah, car nalh deuhmai khat hong tai a, a
inn kel kong uah hon tailut pih a, innsung ka lut ua, innsung ah mi
tamlou leh anu leh apate ana om uhi. Khatvei ka muhsa ahihman in ka thei
ngal a, amau leng kigen ngailou in hon thei ua, hon kipahpih siam
mahmah zawmah lai uhi.
Inn nuam leh thupi mahmah ahia. Tukverh
ah dak in, enkual vel leng lah khopi athupi mahmah mai a, anuam in a
khiaklah huai ka sa gu mahmah hi. Nek ding thil chi tuamtuam a hon pia
ua, alimdan leng a tuam mahmah. Chikmah a ka ne'k, ka dawn ngei louh
ahih ziak le a himaithei, vah tak a ne a, dawn a ka om nung un, "innlam
pai ka ut" chi'n a kiang ah ka ngen a, inkong ka pawtkhiak leh zing
nisuak di in kongbul ana tan eng singseng hi. "Hiai a inn tan uh na
vakha di aw" chi'n mikhat a sawl a, himahleh kei ka ut bilbel kei a, kei
mah in, innlam zuan in, ka pai hi.
Saulou ka pai nung in,
lamtangpi ka suak khia a, kin hetlou in ka pai hi. Huchia ka pai lai in,
lamsak loupa kawm a hong ging a, ka et-touh leh sakhi tuai hoih mahmah
khat ka mu nawn hi. Huchia ki entuah a ka om nung ua leng taisiat
sawmlou ahihman in, ka meithal tang ka thun a, atal tang tak ah ka kaap
hi. Kei lam ah hong kipek suk a, lampi ah khol in, sawtlou nung in a
sipah ngal hi. Kolzalpi a kuah dia lah liandeuh ahihman in, gamkhau ka
satkhawm a, huchi'n bag kuahdan in inntan ka kuah tung hi.
Hun
hong pai zel a. Kei mah kizephok ka hi hia, chih ka thei kei, ka
innkuante leh midangte' hon etdan nidang bang ka sa nawn kei a, kipuang
khiak hial bang ka ut sek hi. Himahleh, kuamah a dia poi ahihlam ka
theih louh ziak in, kei mah ka kisiamtan a, genkhe lou in ka om nilouh
hi. Ka hun tamzaw huai Nungak tawh ka zang ua, kingaihzawng kia deihkhop
lou in, kiteng ding hial hon sawmta hi. Kiten hial ka ut kei a, "utlou"
chi'n gen leng lah, ka tung a a thangpaih ka lau zel hi. Aziak bel
vualzawlna tampi, buh-le-baal, sum-le-pai, leh thildang tuamtuam ah,
nidang sang in ma-ka sawn ua, ahih ziak in, lungsim gu'k anuam thei tuan
kei a, kiteng dia hon zotna leng, kingaihtuahna hun honpe di'n ka ngen
hi.
A gu'k a paikhiaksan theihnang lampi ka zong a, himahleh,
paikhiak san di'n, kei mahmah in le ngailua ka hih chiah, nikhat a
nihvei bek mulou a om theilou zawmah, ka lungsim a buai mahmah mai hi.
Zankhat lupna tung ah kei mah in ka kingaihtuah a, "ka thilhih diklou
ahi chih bel kuamah haihvual ahi kei. Hiai dan a ka om zel leh den chiah
a thuaktu di keimah thou ka hi a, huaisang in, tu ahunlai in tawpsan
leng kei a di'n ahoih zaw di" himahleh tawpsan di'n bang pen ka hih hoih
di ahia" chih in ka lungsim hon hih buai mahmah mai hi.
Ka
innkuante'n nek-le-dawn ding a bawl himhim uh, ka duh kei a, nungak nu'n
ka gilkial hun in, nekdi lim taktak a hon pesak a, huaite lim tak in ka
ne in ka dawn zel hi. Ka omdante ka pa'n hoihtak a hon enkhe gige chih
bel ka thei a, himahleh hih di dan tuan bangmah ka thei kei. Nikhat a
nungak nu leng a hong pawt a, tukverh ah a gu'k in a hong lut a, lupna a
ka omkhawm lai uh, ka pa'n hong man khia hi. "Nang kia lah na om a,
bangdia thu mu-mal lou pipi gen a paupau na hia, kua ahia na houpih"?
Chi'n aw ham tak mai in hong pau gugu hi.
Kipuan khiak nang hun
remchang ahi chih thei in, sih leh sih, dam leh dam in ka omdan tengteng
ka gen khevek hi. Huaithu azak in ka pa khawphok lou in apuk a, ka nu
kintak in ka sam a, ka hihtheih bangbang a ka buaipih nung un, ka pa
hong halh thei vanglak a, ka nu kiang ah, "saptuam Upa khat sam ding in a
sawl hi. Ka nu misap, Saptuam Upa pa hong tung in, "hiaipa thumsak ngai
ahi" chi'n ka omdan tengteng genkhe vek hi. Upa pa'n thumsakna hon neih
khit in, "khanawn chiah i saptuam ah Gospel crusade om dek a, huai hun
ah suanlam bangmah bawl lou a na hong telsak ngeingei di-uh ahi" a chi
hi.
A gu'k in ka kipak a, lehlam ka ngaituah chiah lauhna'n ka
dim hi. Gospel Crusade a tel di ka hih lam nungaknu'n leng thei ahihman
in, khemna chiteng in hon khem hi. (Gospel Crusade a ka lut dek chih a
theih apat a, ka lut maa, ahon khemna le gelhdi tampi om, ahih ziak in,
gen vek dah mai di) . Ahih ziak in, "kei thu hilou ahi. Ka pa'n lut dia
hon sawl ziak a lut dek ka hi. Hun hiaitan ka nu leh ka pa thu mang lou
in, kei ut dan in ka na omta a, huaiziak mah a nang toh leng ana kizawl
kha i hi. Tu'n zaw ka nu-le-pa thu nial lou in, amau deihdan a ka om
hunta ahi. Hehpih tak in hon theisiam mai aw" ka chih leh, ka thu na
mang kei leh, na tung a vualzawlna ka hon piaksa tengteng ka lak-kiik
vek di, chi'n a hon vau hi, "kei hon phatsan a na om leh, nuamsa tak a
hing tuan lou di na hi" chi'n hon paikhiak san hi.
~Kattie Mawite Ka ngaihnou ka ngaisang top. Ka dinmun uh kikheng hileh ama lungsim bang ka put zoh ka gingta kei. Iitna tak toh hon iit hi in kathei a, kenleng ka it petmah. Keilam apan ngiat a hon neikei a, apasal ka hihtheihna din CONDITION bangmah hon bawlsak kei. Tulai in hihna kibang(homosexual) kingai tampi om mahleh, kei ngaihnou bel NUMEI ahi. A hon itna thupi kasa. Ka phulouh iitna tang hi in ka kithei a, ka kipak petmah. Himahleh alangkhat ah ka kisuanglah zel. Ka kingaihsiat theihna di leh ka lungsim hon kam gegu di kampau chikmah in hon zatkhum ngeikei a, milak ah leng a hon zahpih kei. Kei ziaka nuam asaklouhni leng atam din ka gingta. Himahleh kei kianga a om chiangin maitai tak in hon houpih a, huai in a ngaihhuaina nakpi in a behlap hi. Ka ngaihnoute bel innkuan nuamsa ahi uh. Apa Evangelist teacher pension ahi a, a upa'n leng apa sulnung zui in Evangelist teacher mah a sem hi. Amah tuh college kailai ahi a, anau pasal nihte bel high school kailai ahi
By ~ Paumuanlal Guite BaBs Chikmah a zak ngeilouh, lungsim tawng a leng gelphak ngeilouh COVID 19 in khovel pumpi hong sawiliing ta hi. It leh ngaihte toh tui leh nga bang bualkhawmna, a sakminthang Lamka khopi leng natna in hong hawi tuankei. Niteng in a vei a pung hulhul chih kuapeuh in thei, himahleh gamsung vaihawm solkalte’n hiai natna apan i suahtak theihna ding ua hon thupiak uh Policete mat utlouhna ziak lel in i zui hamham chiat uhi. Huai bangle Policete galmuh chiang khawng a zui hamhamte i hilai uhi. A tamzawte bang in a omna mun uh i pel chetchet zomah uh, lamka chihmah a ka tuamtuam tam i theitel ua. Siamsinna innte, nasepna buuk tuamtuamte kikhak zungzung a, i biakna munte tan leng kikhak hial in inn a kuapeuh kikhum chiat ding i chih lai un kholai a hih ding poimoh nei a pungdiak a bang maimah hi. I natna minthang ziak ua mual honna liamsan niteng in zak ahigige mai. It tak in a luangbul ah kap zoizoi ut mahlehang mangmat phak ahinawnkei, silhpuan piandang toh kithua
Comments
Post a Comment