VONDEIH ZATAM NA TAWI DONG IN......
By ~ Paumuanlal Guite BaBs
Phalbi khovot hunte hong beita a, louvat, lou haal leh mangtomte khat khit khat in hong kizomtou hi. Tulvuah hong kia a haichi tuamtuam tuh ding ngakkawm in nungak-tangvalte awllen in hun nuamtakmai a zangkhawm diamdiam uhi.
Nipini khat biakinn a kikhop zoh in Lianpu leng chim kisa in a lawm ittak Thangpu melmuhlouh tongsan tungtawn in houpih hi. Thangpu in lawmte toh kimukhawm ding ahihdan hilhkawm in Lianpu leng vapai sam ding in sam hi. Lianpu leng chim kisasam ahingei ding a alawmte laitual lenna lam zuan in khaubang a chiahta hi.
Hun tomchik sung in Lianpu leng a lawmte omna mun vatungtou pah hi. Kong kiu in lutsukpah a, a lawmte leng ana kimphial ua, nuihchiamte leel in singdang kuamah englou in naubang nuikhawm in hun nuamtak a vazang uhi.
Hiai nitaklam hun hi Lianpu ading in tuambiik na khat om abang hi. Nidang a amuh ngeilouh, a theih ngeilouh leng hilou, lungsim piak dia leng ana koih ngeilouh a lawmhoih mahmah uh Mawite in a mit la mahmah mawk hi. A nuihmaite, a tongsuah kilawmtak maite Lianpu adi'n etchimlouh, zakchimlouh asuak a, a lunggel teng pian in dang zou hi'n athei hi.
Lianpu'n lungsim a buai deuhdeuhta hi. Itna simthu valeel ding chihlah lawmta hih banah amah genthei kisakna lian semsem, phetlou Mawite ana hitheikei leh a lawmta kal ua thil nuamloupi tungthei ding chih theichiang mahmah. Ahihhang in genlouh ding chihlah a lungsim in thuakzou lou ding abang zel hi.
Mawite in bangmah ana phawkkei mahleh Lianpu bel zankhua dainuai a leng sambang zal zong leh maimit singlou in lunggel puaksing bang giktak mai toh taikhua a val zel hi. Mawite kiang a itna simthu leel asawm zel a, a tawpkik zel hi. A lawmte kia gen ding chih lah alawmte'n leng Mawite deihthou ahi uh chih atheih man in gen ngamvual ding hilou zel hi.
Hun leh nite khawllou in hong pai zel a, Lianpu'n Mawite a itna pung deuhdeuh in nikhat mel mulou a om ding leng haksa asa mahmah hi. Ahi alah amah a tualniam penpen in vaveh det ding achih chian kisit deuhdeuh a, Mawite theihlouh in ana thuak toutou hi.
Mawite kuanzelna Lengtonghoih Tailoring kong bang ah Lianpu va kivialleh mun mahmah hi. Mawite muh kinem thei mahmah napi in a mukhatam hetkei hi. Ahihhang in omthei tuanlou ahi dia a puankhuina mai ua vapai zel a, azumselna kawm leh amuh khak lametna toh a sum neihsun bang in Mawite puankhuina maitak a dukan ah nektheih alei mun mahmah hi.
Panpihtu ding lawmhoih neilou Lianpu niteng in a tha kiam deuhdeuh a, Mawite a itna pung deuhdeuh hi. Hichi bang a nungak ngaikha ngeilou ahihman in haksa asa mahmah a, ahihhang in a loh theih ding a om tuankei. Tantawk a lungkim asiam mai a ngai hi. Hiai bangteng athuak Mawite in thei lezaw hehpih lawsam ding hia maw...!!
A kha asim bang hong pai hial chia'n Lianpu in leng Mawite tangvalpa ka hikha kei zong in a lawmhoih bek ka hih sawm teitei ding chi'n thupukna hon bawlta hi. Huchi'n zum mahleh Mawite kiang bang a vahoh zel in thu tuamtuam vahoulim pih zel zaw hi.
Mawite toh Lianpu kal ah kingaihnatna hunpaisa sang in alian zawta. Nungak-tangval dan a kipawl lou in lawmta bangmai in om ua, a thuguk teng bang uh im hetlou in a genkhe zel uhi. Mawite in tangval neilou ahihdan khawng leh a nute deihsak louh neih ding a utlouh thu bang a hilh zel hi.
Ahihhang in Lianpu in bel lawm bang lel kia in a enthei tuan mahmah kei. Mawite hinkhua, a omdante'n a lungsim la deuhdeuh hi. Himahleh a itna thu vagen mawk ding chih Mawite ngaihdan ahihlouh ding lau a, a ngailou bang a a om ni tam mahmah hi. A itna thu bang genkhe khadek zel a, haksatak in a omden hi.
Nikhat Lianpu kingaihtuah in Mawite in tangval lah nei tuanlou ahihchiang in hon ngaih leh ngaihlouh pen thutuam, ka omdan alah thei mahmah ta ding ahihtoh iit ka hihdan ka kam inle ka zasak himhim ding chi'n a itna simthute Mawite kiang a hilhvek a sawmta hi.
A sawm bang ngei in haksa sakawm pipi in Lianpu'n it ahihdan theisak a, "Mawi, na hon iit theih mi ka hilou zong in ken hon it mahmah ka hi chih ana thei in aw. Mihing i lungsim, deih tuamchiat mah ahi, kon theisiam. Tangval dang na ut leh ngaimai in, na kipahzawkna ding ahihleh kei le kipak ding ka hi..."chi'n genzom thei nawnlou in Lianpu'n Mawite a itluat ziak in a mittui hong luang zungzung hi.
Mawite in a Ulian mittui luang amuh chiang in aman leng thuak haksa asa mahmah hi. Ahitak in Mawite in leng a ngailou ahi zenzen kei, a dam theihlouh banah a nute a etkol petmah ngai ahihman in a khonung a lunggimtak a a om sang un chi a abul apan a itna thute uh ana saansak lou mah ahi.
Lianpu in lah Mawite lou nungak dang ah lunglutna himhim a nei theikei. A lungsim teng ah Mawite kia a dim. Ahihhang in huai a lungsim teng va gengen lelah a itluat Mawite mi damthei ahihlouh toh a lungsim, taksa sugim phet ahihkhak ding lau in a gen ut kimkhat leng a gen ngamkei hi.
Unau bang kitam henla, innsung vai bang buaipih ngai hetlou ding in Mawite kipanpih zel leh chih khawng Lianpu ngaihtuah tampen ahi gige. Himahleh a hithei kei. Nek louh ding vonggah bel kei kha ahiphot peuhmah. Ahihhang in hiai bangteng nung in leng Lianpu nikhat lel Mawite mulou in a omthei tuankei hi.
Lianpu leng beidong kisa mahmah a, Mawite ana mukhalou hileh chih bang a utlua hi. A lehlam ah Mawite ngei in leng haksa asa mahmah. Lianpu ngaihtuah ding teng, a thuak ding dan teng atheivek hi. A hehpih mahmah, himahleh thupukna lah alaphut thei tuankei, nungak pil mahmah ahihman in.
Hunte paizel in Lianpu a kingaise deuhdeuh a, zu leh sa a kibual in a ut bang in hong khosata hi. Lianpu omdan mite'n amuh chiang un lamdang asa mahmah uhi. Lianpu in leng a thilhih hoihlouh dan a theivek, hilele a lungsim anat luat chia'n a hihkha zel hi.
Lianpu omdan lah khawk deuhdeuh dinmun a om, Mawite a houpih chiang a lah a hehna ding lamkia a houpih. Mawite adia leng a thuak nop tuanlou. Amah deihtelna, ama thubang a paithei hileh Mawite in leng Lianpu itna a sansak thamta ding hi. Ahi in lah ama thu in bangmah a gen ngam tuankei.
Huchibang a lungkhamna toh khovel azat nilouh lai un nikhat theih khollouh in Lianpu nu'n sihsan phut hi. Lianpu tagah taktak asuak ta. A lungkhamna a kibehlap semsem. Amah hehnemtu ding lawmhoih lah a neikei a, a heina peuh lungzuan sialna lel asuak ta. A nu itna toh Mawite a itna toh a hihtheih omsun chu a mittui nuul ahilelta hi.
Lianpu amah kia in a inn uah a khosata a, thawmhau a kisa petmah hi. Tanau khenkhatte'n zi nei ding bang in sawl mahle uh Lianpu in ahitheilou Mawite loungal lungsim a kuamah a koih theikei. Huchi bang in Mawite ngei in leng tangval dang a ngaihsan ngamkei. Kimuh gige a ut ua, himahleh a kimuh chiang ua kingai deuhdeuh zel ahihman un kimangngilh theihna ding lampi a zon uh angai zel hi.
Huchi bang a hunte a zattouh lai un Lianpu leng kingaih tuahtuah ahingei ding a athil hoihlou hih teng tawpsan in hinkho thak pat ding dan hon ngaihtuahta hi. A khua ua om nilouh leh a maban miallua ahihlam thei in gamthuuk lamah zinmang a sawmta hi.
Sum leh pai neihsa lah bangmah neilou ahihchiang in a inn uleh a van neihsun teng uh zuak a, a bat teng din ah aval omlai teng hoihtak a kem in a mailam kalsuanna a zat ding in a siit hi.
Nitak khat a tawpna hiding chi'n Mawite kiang ah vahoh hi. Mawite in lah Lianpu thilsawm theihpihlou in nuamsatak in a lengla dangte peuh khawng toh a nui zaizai uhi. Hiaibang muh hi Lianpu adin a thuakhak semsem hi. Himahleh amah le kipasalsak in bangmah khuallou bang in chiamnuih peuh a bawl hi. Nidang a hichia om ngeilou ahihman in Mawite in aguk in lamdang ana sa mahmah hi. Bangtan hiam nung in Lianpu pai din kisa a, Mawite in le kelkong tan vakha hi. Lianpu'n a sakhau apan dakbawm khat sawkkhia in Mawite khut a koihsak a, bangmah gentam nawnlou in a kikhen uhi.
Mawite in a laithon muh simpah utlua hinapi lengla nei ahihman in asim pah theikei hi. A lenglate paizoh a sim ding chi mah leh a ihmutsan kha hi. Zingkal a khanloh phet in phawk a, asim leh hichi'n ana kigelh hi,,,,,
"Ka itpen leh ka ngaihpen Mawite, ka laithon ana simsuak in maw. Kong itna a let semsem hang in thil hitheilou om ahihman in aphatuam omlou hi. Huaiziak in tuni apan na ut dandan a om ding in kon khah kheta hi. Na mailam kalsuanna peuh ah Pathian in hon vualzawl henla, pasal hoihtak nei a, malam hun nuamtak a zang din kon deihsak hi. Keibel ngaihtuah in leng hon nei nawnken aw. A chingloupa ka na himai ding a, ka thuakthuak ka thuak dia, thuakdan siam ka na kizil ding hi.
Hiai laithon na muh kei non muh tawpna ahita ding, khualgam a hong zinsan ding ka hita a, ka hong kiknawn leng ka lamen kei. Ahizong in VONDEIH ZATAM NATAWI DONG IN KA ITPEN LEH TEMBANG KA DEIHPEN NAHI GIGE DING. Mangpha.
- Hon tangzoulou Lianpu
A laithon a simzoh phet in abiang apan khitui a luangkhe keuhkeuh a, a lukham bang a kawtzou hial hi. A sana a etleh dak 6 bang ana gingta a, Mawite leng a Ulian muh ut mahmah ahihman in thoukhia in a mittui khawng nulsiang a, a mai phiat in station lam a vadelhsuk hi.
Station atun phet in Lianpu in ana mupah a, himahleh kimuh khembawl hi. Mawite in zongzong a, atawp in a Ulian mitsan gilgial a romol a kinul amu hi. Va delhphei a vahoupih sawm a, himahleh amau ki-itna kuaman theihpihlou ahihman in a gari un a tai liamsanta hi.
Gari hon taikhiat hialleh Lianpu leng omthei samlou in a tukvelh a dakkhia a, Mawite toh a kigalmuh phaksung teng uh khut kivaituah den uhi....
BEITA...
Writer's note : Simtu teng tung ah kipahna alian mahmah.
©Siamsinna leh Vakiangbu
Phalbi khovot hunte hong beita a, louvat, lou haal leh mangtomte khat khit khat in hong kizomtou hi. Tulvuah hong kia a haichi tuamtuam tuh ding ngakkawm in nungak-tangvalte awllen in hun nuamtakmai a zangkhawm diamdiam uhi.
Nipini khat biakinn a kikhop zoh in Lianpu leng chim kisa in a lawm ittak Thangpu melmuhlouh tongsan tungtawn in houpih hi. Thangpu in lawmte toh kimukhawm ding ahihdan hilhkawm in Lianpu leng vapai sam ding in sam hi. Lianpu leng chim kisasam ahingei ding a alawmte laitual lenna lam zuan in khaubang a chiahta hi.
Hun tomchik sung in Lianpu leng a lawmte omna mun vatungtou pah hi. Kong kiu in lutsukpah a, a lawmte leng ana kimphial ua, nuihchiamte leel in singdang kuamah englou in naubang nuikhawm in hun nuamtak a vazang uhi.
Hiai nitaklam hun hi Lianpu ading in tuambiik na khat om abang hi. Nidang a amuh ngeilouh, a theih ngeilouh leng hilou, lungsim piak dia leng ana koih ngeilouh a lawmhoih mahmah uh Mawite in a mit la mahmah mawk hi. A nuihmaite, a tongsuah kilawmtak maite Lianpu adi'n etchimlouh, zakchimlouh asuak a, a lunggel teng pian in dang zou hi'n athei hi.
Lianpu'n lungsim a buai deuhdeuhta hi. Itna simthu valeel ding chihlah lawmta hih banah amah genthei kisakna lian semsem, phetlou Mawite ana hitheikei leh a lawmta kal ua thil nuamloupi tungthei ding chih theichiang mahmah. Ahihhang in genlouh ding chihlah a lungsim in thuakzou lou ding abang zel hi.
Mawite in bangmah ana phawkkei mahleh Lianpu bel zankhua dainuai a leng sambang zal zong leh maimit singlou in lunggel puaksing bang giktak mai toh taikhua a val zel hi. Mawite kiang a itna simthu leel asawm zel a, a tawpkik zel hi. A lawmte kia gen ding chih lah alawmte'n leng Mawite deihthou ahi uh chih atheih man in gen ngamvual ding hilou zel hi.
Hun leh nite khawllou in hong pai zel a, Lianpu'n Mawite a itna pung deuhdeuh in nikhat mel mulou a om ding leng haksa asa mahmah hi. Ahi alah amah a tualniam penpen in vaveh det ding achih chian kisit deuhdeuh a, Mawite theihlouh in ana thuak toutou hi.
Mawite kuanzelna Lengtonghoih Tailoring kong bang ah Lianpu va kivialleh mun mahmah hi. Mawite muh kinem thei mahmah napi in a mukhatam hetkei hi. Ahihhang in omthei tuanlou ahi dia a puankhuina mai ua vapai zel a, azumselna kawm leh amuh khak lametna toh a sum neihsun bang in Mawite puankhuina maitak a dukan ah nektheih alei mun mahmah hi.
Panpihtu ding lawmhoih neilou Lianpu niteng in a tha kiam deuhdeuh a, Mawite a itna pung deuhdeuh hi. Hichi bang a nungak ngaikha ngeilou ahihman in haksa asa mahmah a, ahihhang in a loh theih ding a om tuankei. Tantawk a lungkim asiam mai a ngai hi. Hiai bangteng athuak Mawite in thei lezaw hehpih lawsam ding hia maw...!!
A kha asim bang hong pai hial chia'n Lianpu in leng Mawite tangvalpa ka hikha kei zong in a lawmhoih bek ka hih sawm teitei ding chi'n thupukna hon bawlta hi. Huchi'n zum mahleh Mawite kiang bang a vahoh zel in thu tuamtuam vahoulim pih zel zaw hi.
Mawite toh Lianpu kal ah kingaihnatna hunpaisa sang in alian zawta. Nungak-tangval dan a kipawl lou in lawmta bangmai in om ua, a thuguk teng bang uh im hetlou in a genkhe zel uhi. Mawite in tangval neilou ahihdan khawng leh a nute deihsak louh neih ding a utlouh thu bang a hilh zel hi.
Ahihhang in Lianpu in bel lawm bang lel kia in a enthei tuan mahmah kei. Mawite hinkhua, a omdante'n a lungsim la deuhdeuh hi. Himahleh a itna thu vagen mawk ding chih Mawite ngaihdan ahihlouh ding lau a, a ngailou bang a a om ni tam mahmah hi. A itna thu bang genkhe khadek zel a, haksatak in a omden hi.
Nikhat Lianpu kingaihtuah in Mawite in tangval lah nei tuanlou ahihchiang in hon ngaih leh ngaihlouh pen thutuam, ka omdan alah thei mahmah ta ding ahihtoh iit ka hihdan ka kam inle ka zasak himhim ding chi'n a itna simthute Mawite kiang a hilhvek a sawmta hi.
A sawm bang ngei in haksa sakawm pipi in Lianpu'n it ahihdan theisak a, "Mawi, na hon iit theih mi ka hilou zong in ken hon it mahmah ka hi chih ana thei in aw. Mihing i lungsim, deih tuamchiat mah ahi, kon theisiam. Tangval dang na ut leh ngaimai in, na kipahzawkna ding ahihleh kei le kipak ding ka hi..."chi'n genzom thei nawnlou in Lianpu'n Mawite a itluat ziak in a mittui hong luang zungzung hi.
Mawite in a Ulian mittui luang amuh chiang in aman leng thuak haksa asa mahmah hi. Ahitak in Mawite in leng a ngailou ahi zenzen kei, a dam theihlouh banah a nute a etkol petmah ngai ahihman in a khonung a lunggimtak a a om sang un chi a abul apan a itna thute uh ana saansak lou mah ahi.
Lianpu in lah Mawite lou nungak dang ah lunglutna himhim a nei theikei. A lungsim teng ah Mawite kia a dim. Ahihhang in huai a lungsim teng va gengen lelah a itluat Mawite mi damthei ahihlouh toh a lungsim, taksa sugim phet ahihkhak ding lau in a gen ut kimkhat leng a gen ngamkei hi.
Unau bang kitam henla, innsung vai bang buaipih ngai hetlou ding in Mawite kipanpih zel leh chih khawng Lianpu ngaihtuah tampen ahi gige. Himahleh a hithei kei. Nek louh ding vonggah bel kei kha ahiphot peuhmah. Ahihhang in hiai bangteng nung in leng Lianpu nikhat lel Mawite mulou in a omthei tuankei hi.
Lianpu leng beidong kisa mahmah a, Mawite ana mukhalou hileh chih bang a utlua hi. A lehlam ah Mawite ngei in leng haksa asa mahmah. Lianpu ngaihtuah ding teng, a thuak ding dan teng atheivek hi. A hehpih mahmah, himahleh thupukna lah alaphut thei tuankei, nungak pil mahmah ahihman in.
Hunte paizel in Lianpu a kingaise deuhdeuh a, zu leh sa a kibual in a ut bang in hong khosata hi. Lianpu omdan mite'n amuh chiang un lamdang asa mahmah uhi. Lianpu in leng a thilhih hoihlouh dan a theivek, hilele a lungsim anat luat chia'n a hihkha zel hi.
Lianpu omdan lah khawk deuhdeuh dinmun a om, Mawite a houpih chiang a lah a hehna ding lamkia a houpih. Mawite adia leng a thuak nop tuanlou. Amah deihtelna, ama thubang a paithei hileh Mawite in leng Lianpu itna a sansak thamta ding hi. Ahi in lah ama thu in bangmah a gen ngam tuankei.
Huchibang a lungkhamna toh khovel azat nilouh lai un nikhat theih khollouh in Lianpu nu'n sihsan phut hi. Lianpu tagah taktak asuak ta. A lungkhamna a kibehlap semsem. Amah hehnemtu ding lawmhoih lah a neikei a, a heina peuh lungzuan sialna lel asuak ta. A nu itna toh Mawite a itna toh a hihtheih omsun chu a mittui nuul ahilelta hi.
Lianpu amah kia in a inn uah a khosata a, thawmhau a kisa petmah hi. Tanau khenkhatte'n zi nei ding bang in sawl mahle uh Lianpu in ahitheilou Mawite loungal lungsim a kuamah a koih theikei. Huchi bang in Mawite ngei in leng tangval dang a ngaihsan ngamkei. Kimuh gige a ut ua, himahleh a kimuh chiang ua kingai deuhdeuh zel ahihman un kimangngilh theihna ding lampi a zon uh angai zel hi.
Huchi bang a hunte a zattouh lai un Lianpu leng kingaih tuahtuah ahingei ding a athil hoihlou hih teng tawpsan in hinkho thak pat ding dan hon ngaihtuahta hi. A khua ua om nilouh leh a maban miallua ahihlam thei in gamthuuk lamah zinmang a sawmta hi.
Sum leh pai neihsa lah bangmah neilou ahihchiang in a inn uleh a van neihsun teng uh zuak a, a bat teng din ah aval omlai teng hoihtak a kem in a mailam kalsuanna a zat ding in a siit hi.
Nitak khat a tawpna hiding chi'n Mawite kiang ah vahoh hi. Mawite in lah Lianpu thilsawm theihpihlou in nuamsatak in a lengla dangte peuh khawng toh a nui zaizai uhi. Hiaibang muh hi Lianpu adin a thuakhak semsem hi. Himahleh amah le kipasalsak in bangmah khuallou bang in chiamnuih peuh a bawl hi. Nidang a hichia om ngeilou ahihman in Mawite in aguk in lamdang ana sa mahmah hi. Bangtan hiam nung in Lianpu pai din kisa a, Mawite in le kelkong tan vakha hi. Lianpu'n a sakhau apan dakbawm khat sawkkhia in Mawite khut a koihsak a, bangmah gentam nawnlou in a kikhen uhi.
Mawite in a laithon muh simpah utlua hinapi lengla nei ahihman in asim pah theikei hi. A lenglate paizoh a sim ding chi mah leh a ihmutsan kha hi. Zingkal a khanloh phet in phawk a, asim leh hichi'n ana kigelh hi,,,,,
"Ka itpen leh ka ngaihpen Mawite, ka laithon ana simsuak in maw. Kong itna a let semsem hang in thil hitheilou om ahihman in aphatuam omlou hi. Huaiziak in tuni apan na ut dandan a om ding in kon khah kheta hi. Na mailam kalsuanna peuh ah Pathian in hon vualzawl henla, pasal hoihtak nei a, malam hun nuamtak a zang din kon deihsak hi. Keibel ngaihtuah in leng hon nei nawnken aw. A chingloupa ka na himai ding a, ka thuakthuak ka thuak dia, thuakdan siam ka na kizil ding hi.
Hiai laithon na muh kei non muh tawpna ahita ding, khualgam a hong zinsan ding ka hita a, ka hong kiknawn leng ka lamen kei. Ahizong in VONDEIH ZATAM NATAWI DONG IN KA ITPEN LEH TEMBANG KA DEIHPEN NAHI GIGE DING. Mangpha.
- Hon tangzoulou Lianpu
A laithon a simzoh phet in abiang apan khitui a luangkhe keuhkeuh a, a lukham bang a kawtzou hial hi. A sana a etleh dak 6 bang ana gingta a, Mawite leng a Ulian muh ut mahmah ahihman in thoukhia in a mittui khawng nulsiang a, a mai phiat in station lam a vadelhsuk hi.
Station atun phet in Lianpu in ana mupah a, himahleh kimuh khembawl hi. Mawite in zongzong a, atawp in a Ulian mitsan gilgial a romol a kinul amu hi. Va delhphei a vahoupih sawm a, himahleh amau ki-itna kuaman theihpihlou ahihman in a gari un a tai liamsanta hi.
Gari hon taikhiat hialleh Lianpu leng omthei samlou in a tukvelh a dakkhia a, Mawite toh a kigalmuh phaksung teng uh khut kivaituah den uhi....
BEITA...
Writer's note : Simtu teng tung ah kipahna alian mahmah.
©Siamsinna leh Vakiangbu
Comments
Post a Comment