KINOH KEN, NA ZEKAI KHA DING...!!

By ~ Leon Guite

Kiginni a hong hi a, vante siang in khua anuam mahmah hi. Kei leng kalkhat mawngmawng sikul sung ah kikou den ka hihman in kisukhalhna kawm ding chi'n Tuitha lui ah ngakuai khai ding in ka hong kisakhia hi. Buallian khotaw lam ah nga tamdeuh chi a mite gen theisam ka hihman in huailam khai ding chi'n ka naihtou hi. Amun ka tun in ka ngakuai bawlpah in ka kam pah hi. Ka vang in hon zou ahi ding a, bangzah hiam ka manpah hi. Nisa hong san deuhtak in ka kiang a singliim khat bel in ka kisuan phei hi. Khua lum lopetmah ahihman in ka imut a hong suak mahmah mai a, awl a singbul kiang ah lumsuk kawm in ka tawldamta hi. Hon khim om mah bang in ka mit hak zoulou in ka ihmu suk riairiai ta hi. Ka ngakuai khai bel ka sunzom toutou thou hi.

Huchi'n ngakuai khai kawm in hunte ka hon zangtou a, nitaklam nitum ding a a hong kisaktak in kei leng paimai ka hon sawmta hi. Pai ding a ka vante hemkawm a ka kisak laitak in, ka sakdeuh apat in numei aw neemtak leh ngaihbang tak mai in ka min in a hon sam a, "Lianpu, hiai ah bang hihna hia?" a hon chi hi. Ken leng lamdang satak kawm in hon houpihtu ka en a, nungak melhoihtak mai leh duangchingtak mai ahi chih ka theita hi. Himahleh, tu nineem nung leh nitum kuan hita hi a, bang zong a hiaimun ah hong pai mawk ahi diam ? Gammang khat houh ahi diam ? Ka lung abuai sim mahmah mai hi. Ken leng hiaimun ah a hong paina san ka dong hi. Aman leng nemtak in, "Nidang in hiaimun ah ka itpen a damlai in hun ka zang khawm sek uhi. Vangsiat huaitak in aman a hon sihsan a, ngailua ka hihman in ka sulnung uh sui a ka lunglen khikhe ding a hiaimun ah paizel ka hi." chi'n a hon dawng hi. Huchi'n ka hehpihta mahmah mai a, kamsiamlou pi kikamsiam sak in ka nep theihdan lam chiteng in ka hehnem tei hi.

Ka ngaina pah mawk a, ka muh apan in lamdang takin ka lungsim teng aluah gai vek hi. Ngakuai khaikawm in ka kihoulim tou zel ua, a omna munte dong in thu tuamtuam gen in nuam ka sa mahmah uhi. Hunte khawllou ahihman in, khua mial ding in hong kisata a, ama'n leng "zekai ding ka hita, ka na pai ding. Hun na neihchiang a ka inn uah hong ding na hi a, himahleh nang zaw KINOH KEN, NA ZEKAI KHA DING" Chi'n a hon paisan hi.

A hon paisan nung in thakhat in ka halh phut a, khua a mialta, ka lupna mun ngeimah ah ka na lum lai hi. Ka mumang hi ding eive chi'n pai ding in ka hong kisa ta hi. Ka ngabawm ka et leh nga tampi matsa in ana om a, lamdang ka sa mahmah hi. Inn ka tung a kihahsiang in ann ka ne a, pawt nawnse lou in ka lumpah hi. Ka nungak muhnu hon thugen ka bilkha ah a taamden hi. KINOH KEN, NA ZEKAI KHA DING..!! bang a gen utna ahi dia aw? Chi'n ihmu moh zen in ka kingaihtuah nilouh hi.

A zinglam hun awl nikhat in a khua uh ka vapha hi. A inn uh ka kan vel a, a tawp in piteek khat in ka mimuh pen toh a tanu melpuak kibang ahihdan ahon hilh hi. A tanchin ka dot leh; hun bangtan hiam paisa a a tangvalpa toh lui hoh tuahsia tuak ua, tua nungsang a tanchin uh suibut louh a om ahihdan a hon hilh hi.

Aw... A kha mu hiding kei ve !!  Chi'n lau mahmah kawm in kinohtak in ka kholam uh zuan in ka tai thoh zozen hi. Ka kinoh luat nalam ah lampam sik khialkha in khophawk lou in ka puk a, silou phet in kalkhat nung in damdawi inn ah ka halh khe zou hamham hi. Ka kingaihtuah a, ka nungak/sikha muhnu in ka kiang a ahon thugen ka theisiamta, KINOH KEN, NA ZEKAI KHA DING ! chihpen, huai hunlai in piangthak lou ka na hi a, ka kinoh luatna lam in ka kha gawtmun ah apai man dektak hi.

KINOH KEN, NA ZEKAI KHA DING. LAUHNA LEH DIPKUATNA NA TUAH HUN IN LENG KINOH KEN, PILVANGTAK IN GAMTA IN, NA ZEKAI KHA DING HI.

©Siamsinna leh Vakiangbu