HICHI DING SA LENGZAW -II
By ~ Leon Guite
Suty khanih zangzou in joining ka vabawl nawnta hi. Tua hunlai bel bouruak siangthou in nuam mahmah mai hi. Law and order lah kichuptak a etkai ahih manin Lamka khopi sung thoveng in nuam mahmah mai hi. Sualna in kiamlam nawt hiaihiai ahih manin Police Dept. te a ding in leng neuchik nak a nuam deuhta hi.
Nikhat, ka ofis ah thadah chair tung ah kingai ngehngah kawm a ka hunluite ngaihtuah kawm a ka omlai in. Pa khat naknoh hehu in a hong diang lut hi. Ka kiang ah thugen ut nei ahi chih amel apan ka thei a, himahleh agimluat ziakin bangmah gen thei pahlou in anak huthut hi. Ken leng adawn ding tui pia in huchi'n a sou hong kiam deuh a, hichi'n a hon genta hi. "pu aw, tuzing baihtak in News hawm din ka pawtkhia hi. Khuga Dam lam ah ka vahawm in bel dak 8am a gingta hi. Dangtaklua in canal a tuite dawn ding in ka vanaih hi. Dawn ding a ka kunsuk tak in, pu aw, endih, numei khat vuaktanga sisa in canal sung ah ana om hi. Ken bel mobile fon natawm neizoulou ka hihman in, kuamah hilhman lou in ka cycle in kintak in nang kiang ka hong delhsuk hi. Hongpai inla hong en in pu aw." ahon chita mai hi.
Lamdang ka sa mahmah mai a, tu galmuan laitak, sualna a kiakniam laitak leh, mite lungmuan laitaka hiaibang thil mulkimhuai a hong tun mawk pen in ahon hamhaih sak mahmah hi. Gang group record omteng lah sukmit hita. Helpawl lah omlou. Kua khutnung ahita dia?
Kintak in ka nuai ate mansa a om din thu ka pepah hi. Ka lawm SI Khualpu toh constable mi 5 pi in thu hon tunpa toh kintak in Khuga Dam lam zuan in ka taitou pah uhi. Amun ka tun un mitamtak in ana en liailuai ua, amaute'n hon muhtak un "Policete' zia nei hon" chi'n ahonna mohsa mahmah uhi. Nungak luang pen puan a tuam in gari sung ah ka koih uhi. Ataksa ah liamnama tam a omkei. Himahleh, a ngawng lak a sidup ban ah abangkhem pen et ngamlouh phial in a ki atsia hi. A kiim ka etvel uleh laithem kinusia khat ka mu ua, tua laithem ah laitui san in hiaibang in a kigelh hi. "SANGTE SIHNA THU KUAMAH IN HON SUI KEI UN. NA KIPAT UHLEH NA LUTANG UAH THAUTANG THUN AHI DING." Kua(te) sulnung ahi dia? A sinu Sangte kichi toh kinaihna bang anei (ua)? Sangte nu-le-pate kuate ahi ua? Bangziak a Sangte that uh ahi ua ? Bangteng hileh postmortem bawl phot a Sangte sungkuante zon khiak phot ding chi'n Lamka zuan in ka hong kipankhe nawn uhi.
Damdawi inn ah postmortem ka vabawlsak ua, tua kawmkawm in mipi a theipha liai teng kiang ah ameltheih kha a om hiam, chih ka kan uhi. Alak ua tangval khat in theikha ngei ahihdan a hon gen hi. A omna veng ua Pa Thangpum leh Nu Zenman te tanu neihsun ahihdan a hon hilh hi. Anu-le-pate sampah in ka ensak ua, a tanu uh luang sisa amuh phet un kidek zoulou in mipilak ah kap in a hong kap khe zuazua uhi. A nung sawtlou in apa pen awl a samtuam in thu Ka dong pah hi. Kua khutnung hidin na muangmoh a? Midang toh kimelmakna nanei kha hiam? Chi'n ka dong hi. Aman bel, huchidan in zaw midang toh kimelmakna ka neihlam ka theikei. Kua khutnung hiding ahia chih leng ka thei zoukei. Ka tanu omdan hoihtak leh thumangtak ahi a, lawm-le-vual tung ah thusia bawl ngeilou mi ahi hi. Hiaibang thil a tung ah tung ngei ding in ka ngaihtuah theikei. chi'n a hong kap khe huphup hi.
Thudang dot theih ding dan ahih nawnlouh man in thuzak naneih leh hon theisak pah in aw, chi'n police station lam zuan in ka paikhiaksan nawnta hi. Thu hon tuntupa statement la in FIR brutal murder case ah ka register pah hi.Nitak in ihmu theilou hial in ka ngaihtuah a, i gam uah hiaibang mulkimhuaitak thiltung apun deuhdeuh mawk lamdang ka sa mahmah hi. Khristian kichi a, i gam uah tangthupha a hong lutna kum 100 val bang phata hi a, khalam ah dinmun sangtak a omta ding a kingaihtuah lai a hiaibang sualna niteng a apun deuhdeuh mawk pen kua mohna hi ding ahia le? A gam neitu eite pen 100% Khris nungzui kichinuam hang a. Namdang hong tenglut Pathian hing theiloute sang a ngong zaw a hinkhua i zat mawk pen uh, bangziak ahia ? I Khristian kibul phuhna uh a kip zohlouh ziak ahi diam? Nu-le-pate'n Pathian thu a i tate uh i sinsak ua, i chiil zohlouh ziak uh hidi'n ka gingta hi. I tate uh sang a sum-le-pai mah pibawl zaw a, Pathian phawklou zen a a hon vualzawlnate chauh delh a i kidelh tuah lailai ziak ua i tate khahzan lawkha a, siatna khukpi ah tummang gai ding i hita uh e... Chi'n ka ngaihtuah nilouh hi. Huchia ka ngaihtuah lai in theihlouh kal in ka na imu kha khong hi.
Ka khanloh in zingkhua ana vak mahmah manta hi. Kintak a thou in ka kihahsiang a, singpi dawnkawm in News ka sim hi. News ah "POLICE TEN NUMEI SILUANG PHONG. A THATTU THEIH HILOU." chi'n a kigelh hi. Tuazing news pen Lamka khua sung a Organisation om tengteng mohpaihna thupuan in a dimvek hi. Organisation i tamtuk un i MOTTO te uh semtam lehang hichitel a sualna i lak uah maingal lou ding hi a maw !! Ka chi vungvung phet hi. A huntak a i sep ding i mohpuaknate uh i seplouh ziak a i hihtheihsun uh MOHPAIHNA THUPUAN puankhiak ahi maive. Hiai ahi a huntak a dai i kaihlouh uh a poina... Chi a ka ngaihtuah neuhneuh laitak in ka mobile a hong ging lengleng a, ka et leh DSP pa ana hi a, hello..! Bangthu a om a? Ka chih a leh, aman, Sir, kintak in station lam hon zuan in mipi kiphinte ahat lua uh. Bang ka na loh ding ua? A hon chi hi. Ken leng awle , ka hong pai chihtoh thuah in ka koih a, ka angkawi kiang ah, "Nau, tuzing ann nekhawm manlou ding i hi. Ofis lam ah hihding poimawh neuchik a om zual a Ka vapaizual ding aw...ngaihsiam aw, nau." chi'n a biang nou ngingei tawpsak cheuh in kintak in ka kisa a, ka pawt dek in ka angkawi in, "u, hong tuahpha in aw...Sian in hon kem hen." chi'n ka muk ah a hon tawp cheuh a, hiaibang thubuai giktak mai lunggim huai mahmah tuak a, lunggim tak a omlai a, angkawi, ka it in kamkhumtak toh hon kha a, a hon tawp cheuh leh zaw... Lunggimna tengteng THE betkhiak mah a bang hi.
Huchi'n lungsim zangkhaitak in police station lam ka zuanta hi. Ka tun in mipi ana tam mahmah mai a. A na kikou nuainuai mai ua, "Tualthattu hon pekhia un." chi'n a kikou zuazua uhi. Ka gari amuh tak un lampi bel a hon awnpah vanglak uhi. Huchi'n mipite kiang ah tualthattu mat a ompah ding leh a tung ah dan in aphaltan a hehpihna bei a gawtna piak a om ding ahihdan ka gen hi..
Himahleh, kua ahia tualthat? Koi ah om ding ahia? Kitheilou ahih manin zuau a mipite khamuan maimai suah khak ding alauhuai mahmah hi. Ahi alah tualthattu kitheilou, matkhiak hun ding kitheilou ahi. Vachih thahah ding lah mipite sousang semsem ding uh ahih manin zuau a kikhem lungdam phot chu a ngaita mai ve. Mipite leng ka thugen in neuchik khamuanna pesam ahi ding a, awl in a hong dai thei vanglak uhi.
Tuani bel Lamka khopi sung ah thildang bangmah genkhak leh sep ahikei. Tualthahna in miteng lungtang phawng chiat ahi ding a Student organisation tuamtuamte makaihna in skul naupangte'n lampi zuihna nei ua, pawlpi tuamtuam kigawmte'n tualthattu mat ahihma nuakna neiding chi'n Bandh a bawl uhi. Nidang a khopi muang leh thoveng pen tun buainapi in a buak vekta hi. Police te'n na sep ding uh semlou na hi uh chia police te sual sawm toh kipumbuai hi. Police station kong ah mipi sousangte toh kinawktuahna thupitak om in tear gas tampi mahmah ka kapkhia uhi. Guta te'n lah hiaihun hunlem ala in guktheih teng gu in atai duaiduai phet uhi. Hiai kiphinna gutate'n phattuam pihpen ding un ka gingta hial hi. Kuamah amau subuai ding omlou ahih manin lohching mahmah uhi. Nitaklam in kiphinna azia hong om deuh ahih manin DSP khut ah mohpuakna pia in damdawi innlam ah ka vahoh a, postmortem result vala in huchi'n innlam zuan in ka pai nawnta hi.
Maban panlak dingdan ah ka lung a buai mahmah hi. A mel theihte kiang bang ah kankual zel mah leng apa' hon hilh dan bang deuh kia dawnna ka mu hi. Huchi'n hunte hong pai zel in khakhat val bang a hong kivei nawn manta hi. Mipi lak a ka thuchiam tangtun zoulou ka hihmanin poi ka sa mahmah hi. Tualthattu matkhiak hun ding a ka chiam hun sung teng hong bei nawnta ahih manin, pawlpi tuamtuam apan nohna husa kiza pan nawnta hi. Bandh khawng toh hon thuah tou nawn lemlum uh ahih manin police dept. a ding in zahlakhuai mahmah mai hi.
Nikhat CIDte apan in thukhat ka za hi. Tua thu bel, nidang a Sangte kingaihpih khat Muante kichi om ahih dan leh amah apan a thu bang hiam muhkhiak a kinep huaidan a hon hilh uhi. Ken leng a address kimtak ka dong pah a, huchi'n Muante mu ding in ka taikhepah vitvit hi.
Muante te' inn ka vatun in anu chauh ana om a, police uniform a kivan leh thau hoih taktak tawi a amau innlam zuan lai a hon muhtak in, lau in ana liing kekeuh hi. Ken leng "Nu aw, hon lau ken, bangmah hon loh lou ding k ahi. Muante omna ka thei nuam ua hong kan ka hi uh. Na hon hilh thei diam?" chi'n ka dong hi. Tuatak in nupi nu'n lauh meltak in "ka tapa in thilhih khial lou ding ahi. Thumangtak leh Pasian lau mi ahi hi. Hon pimangsak kei un hehpih takin, amah omlou a kei chauh bangchi khosak mahmah ding ka hia? Hehpihtak in hon puak mangsak kei un" chi'n a hong kap keuhkeuh hi. A inn uh ka en a, inn hoihlou khah leh neuchik a kilam ahi a, a baang mauten, a tung bii ahi hi. A baangte aluiluat tak ziak in a vang hemhom a, atung a biite leng aluiluat tak ziak a muat gai dek bang in ka mu hi. A khosakna uh haksa mahmah ahi chih amuh theih hi.
Huaitakin ken leng, "Nu aw lauken amah bangmah loh lou ding ka hi uh. Lungkham ken, thu dong ut maimai ka hi uhi. Ka thilsuina uah a hon panpih theihna a omkhak leh chi a amah muang a hong naih ka hi zaw uhi." chi'n ka hehnep kawm in ka dawng hi. Tuatak in, nupinu mel ah lauhna omte awl a hong bei in angeina hon pu nawnta a, hichi'n a hon dawng hi. "Ka nau Muante pen kiloh a azin laitak ahi a, damleh zinghal chiang in a hong tung ding. Huaini chiang in hong enthak mai un aw bawite."
Ka mizon uh lah ana omlou ahihtak chiang in kou leng, "Awle, nu aw, kipaklua ung." chi'n ka paisan nawnta uhi. Ka lung abuai mahmah mai a, Muante omlouh dan in ka lungsim a kisual nak sak mahmah hi. Amah lah Sangte toh kingai ngei hizomah, athil hih ziak a lau a zinmang ahi diam? Ahihkeileh theikha lou himhim ahi zaw diam? Lungsim giktak toh innlam ka zuan hi. Inn ka tun in ka angkawi in sangkil bul ah nuihmai hiuhiau kawm in honna dawn a, vaidawnna in hon kawi in hon na tawp cheuh hi. Ka lunggimna teng THE betkhiak bang in a lengmang pah hi. Ka angkawi ka en a, ka enchim theikei, a nuihmai leh a gamtat etlawmtak te'n a hon zou mahmah mai a, ka kipak in ka itna a lian deuhdeuh hi. Khovel a pasal a piangkhe tengteng lak a hampha pen
ka hihdan kithei in ka lung a kim mahmah hi.
Ni nih nung in Muante te inn ah ka vahoh nawn ua, amah leng ana omta ahih manin kihou nang poimoh tak om ahi. Na panpihna poimoh ka hi uh chi'n police station lam zuan in ka kipawsuk uhi. Police station ah thudot ka hon pan ua, amasapen in Sangte toh a kal thu uh ka dong hi. Lamdang a sa mahmah mai a, bangziak a huaithu hon dong mawk na hi hiam , sir ? Sangte bangchi a ? Chi'n a hon lehdot hi. Huaitakin ka hehtha a hong suak phut a, Muante pen muanmoh pipen hiphot ahih manin khauh deuh in a kiang ah, "Muante, ki im se dah mai in, Sangte tung ah bangziak a huchi gamtat a, theilou bang a omlai na hia? Thudik hon hilh in." chi'n zep ding in ka kisa hi. Lamdang salua leh kap kawm in, "Sir, ken bangmah thu thei khalou ka hi. Mundang ah kiloh ding a kha 5 val vaomkhia ka hi. Sir, hehpihtak in ka it Sangte tung ah bang tung ahia ? hon hilh ve maw?" chi'n a hong kidik huphup hi. Ken leng Sangte sihna lemlakte ensak in "Nang hih ahihkei leh kua hih ahia? En in, zuau nagen ngeingei leh nalu ah thautang thun ding ka hi." ka chi gugu hi. Muante in leng limlakte a et tak in amelte hong kilamdang in hehna leh thangpaihna mel a kimu a, lungkhamna, khasiatna leh kisikna mel amuh theih hi. "Sir, hiai khutnung zaw ka muanmoh om ahi. Nidang a ka kingaih lai ua, a hon daltu leh hon subuai tupa khutnung ahi ding." chi'n khasia leh thangpaitak a kap zoihzoih kawm in "Sangte, aw, ka it, HICHI TEL DING SA LENG ZAW ... Na hon ngetna bang a haksa lehle honna pi mai ding hing a... Hon ngaidam in aw Sangte." a hon chikhe huphup hi. Ken leng awl a khem in a tanchin uh ka dong a, Aman leng a aw hon bawl hoih thak in, hiai bang in a tanchin uh a hon hilhta hi.
Lamka apan km.10 vel a gamla tang kitawi litlet ah khua nuam mahmah Mualchin kichi khua khat om hi. Inn 300 lakvel om in khopi toh kinai ahih manin khosak nuam mahmah hi. Tua khua ah nupa khat Khupkam leh Zualningte teng uhi. Amau tapa khat Muante kichi nei uhi. Innkuan kithutuak leh nuamsatak ahi ua, louna sem in kivak uhi. Huchia nuamsatak a a om lai un, Muante kum 2 ding khawng aphak in apa'n damlouhna hon tuak a, sawt kikem manlou in Muante te nuta nusia hi. Apa uh sihnung in Zualning in ginom tak in atapa Muante enkoltou in Pathian thu muamden hi. Muante leng anu thuhilhnate thumangtak a zuitou zel in kum a hong liam touhzel toh kiton in, tangval thumangtak a hong hi hi. Lamka ah skulte hong kai zel in HSLC sangtak in zoukhia hi. Maban sintouh zel ut mahmah a, mundang a siamsintouh ut mahleh a khosakna un zillou ahih manin Lamka mah ah sunzom a, hun awl aneih teng in a fee ding kiloh tawmzel in a siamsinna Rayburn College ah hon zomtou hi.
Muante ahihleh melhoih lokholkei mahleh a omdan hoihtakte ziakin a college uah a luck mahmah vanglak hi. Himahleh, a khosakna uh haksalua ahih manin nungak lam buaipih lou in a laisimna mah pibawl zaw a, nikhat tei sepna lianpi neih a anu toh nuamsatak a hong khosak uh tuppipen in anei hi. Hunte hong paizel in tangval khat a simtheih a hong hihsamtak man in Pathian thilsiam ITNA in amah a pel tuankei. Laisimna subuai lel dia nungak himhim ngaihsak lou ding chih tup in nei mahleh, Sangte melhoihtak leh duang etlawmtak amuh a kipan in a lungsim aluah denpah hi. A khosakna uh a etchiang in nungak ngaingam vual ding in kikoih lou a, tua ziakin Sangte ngei leng mangngilh mai sawm hi. Himahleh mangngilh mai sawm a pan anak lak deuhdeuh leh a lungsim a luahdim semsem hi. A tawp in ki im zou nawnlou in a lawmhoih mahmah Suanpu kiang ah genkhe khong hi. Suanpu in leng a lawmpa lunggulh pen tangtunsak sawm in pan nakpi takin la hi. Sawtlou nung in result lungtunhuai tak toh Suanpu in a lawm Muante kiang ah thu hon tunta hi. Huchi'n Muante leh Sangte in itna tuipi tuh a hon zap khawm panta uhi. Nuamtak in hong kithuahzel ua, maban ah bangthil hong tung ding ahia chih theilou hial in kituaktak leh ki it tak in hunte hon zang tou zel uhi.
Sangte te bel innkuan nuamsa ahi ua, apa'n government ah SDO nasem in khosathei mahmah uhi. New Lamka ah teng ua, aman unau pasal khat nei hi. Apa ahih leh saptuam upa leng hi a, anu bel Dorka pawl makai khat in a pang hi. Saptuam ngaina mi mahmah ahi ua, kikhop a taima un thohlawm thoh bang taima mahmah uhi. Tuate hang in mite zahtak in om ua, a thu uh pai mahmah lel hi.
Nikhat Sangte in a it mahmah Muante a inn uah hoh ding in zawn hi. Muante in leng kisuanglah kawm pipi in a itpen zotna nial ngamlou in vazuitei hi. Sangte te' inn atun un thupi sa mahmah mai a, a sung ah lut ngamlou phial hi. Himahleh, Sangte in a khut ah man in kai lut teitei hi. Muante kisuanglah lua a kho-ul pawt zen a om amuh in Sangte in a ziak a dongpah hi. Muante in leng a damsung a hiaibang a inn hoih leh thupi sung a a lut patna ahihdan gen in, a itpen toh khosakna kikhailua ahihman a kisuanglah ahih dan gen hi. Huchia bangbang hiam gen a a houlim laitak un innkong lam ah gari hong ging hi. Sangte nu-le-pate bazar kai hong pai ahi ua, Muante amuhtak un atanu uh kiang ah a lengla pa uh kua hi hiam chih dong uhi. Sangte inleng college a alawm hoih mahmah ahihdan gen in, amin Muante ahi chi'n anute kiang ah pulakna nei ngal hi. Alehlam ah, Muante pen zahkaipi khat ahih manin ana kisuanglah gawp a, a itpen toh akhosakna uh kikhailua ahih manin ana kisit gu mahmah hi. Huaiziakin sawt om ngamlou in a zekai paulam in sawt om ngamlou in paipah hi. Lamtawn in kingaihtuah den a, Sangte nute'n ka khosakna uh hon theile uh atanu uh phal ding un gingta lou hi. Ahi alah Sangte ngailaw petmah khin ahihtak manin haksa sa mahmah hi. Aw genthei hinkhua zaw haksa hina e maw !!! chi vungvung phet hi.
Alehlam ah, Sangte nu'n Sangte kiang ah Muante tanchin dong thakthak a, Sangte in leng tagah ahihdan leh anu toh kia a khosa ahihdan hilh hi. Anu'n a kingaih uleh kingaihlouh uh dong a, Sangte in leng imse lou in kingai uh ahihdan anu hilh hi. Tua takin anu'n Sangte kiang ah........
"Bawi, lawmthuah ah hong pilvang inla, ei dinmun leh khosakna toh kituakte khawng toh kipolh ding ahi. Hiai Muante tagah lubawk na ngaih zenzen. Bang a kivak sawm uh e? Kintakin tawpsan in. Na nu-le-pa non suzahlak lua. Tulai mihausa eive et di. Mihainu." chi'n atanu taisuk gawp pah hi. Sangte in leng anu kiang ah kamdam takin, "Nu aw, na thugen a hoih, sum-le-pai omlou in khosak ahaksa ding chih ka thei. Himahleh, sum-le-pai in itna dik lei zoulou a, kipahna leh kithutuahna lei zoulou hi. Nu aw, hauhsakna sang in omdan leh gamtat hoih mah poimawh zaw hilou maw?" chi'n a dawng hi.
Atanu thugen a zaktak in anu leng hehlua in a tanu kiang ah, "Mihainu, na maban ding bangmah tan mulou na hi. Huai tagah toh kiteng lechin nagum sem ngap ding maw nang ? Semlou a nuamtak a hin a, mite tung-et hih ding midangte kituh lai a, Nang, hiaibang lungsim naneih zum le zum lou maw? Hiai bang tagah ka makpa din ka deih kei. Mite nuihzabuk ding lel hih ka ut kei. Ka khan kilumlet mahleh ka makpa ahi ngeingei kei ding." chi'n hangkhum motmot tamai hi. Aw !!!! Sangte lungsim nat ding dan zaw gensiam a haksa. A itpen kumsawt loubang tulpih dia ateel toh hal a a om mai. "Nu aw khatvei sim sing paak a, khatvei zou sing paak ahi. Mizawng leh tagah chih ziak a simmoh ding kuamah omlou ahi. Pathian in miteng a kibang a hon siam ahi." chi'n khase takin a pindan ah lutsan hi. Lupna tung kidenna in a itpen a u Muante ngai in kap huphup hi.
Nitaklam apa ofis kai a hong tun in anu'n thil omdan teng ana hilh vek hi. Apa mah in leng anu thugen danteng mah vagen khum zel ahih manin, Muante toh akal uh bing deuhdeuh hi. Himahleh, hichimaia a u Muante tawpsan mai sawmlou in a itna pung deuhdeuh zaw hi. Daltu atam peuh leh itna chitak deuhdeuh a, kip semsem zaw hi.
Hunte hong paizel in, buaina tuamtuam kal ah lawmtate' ki itna in khanlam manoh semsem hi. Sangte in a nu-le-pa lungputte a u Muante kiang ah hilh ngamlou hi. Aziakbel Muante kingaihsiat luat khak ding a lauhman ahi hi. College kaina ah kimu zel a kithuah theizel ahihman un amau a ding in holiday nite chimhuai diak a bang hi.
Kiginni khat Sangte leng skul khawlni ahih manin inn ah om a, a nu nasepte huh in hun hon zang hi. Huchih laitak in innkong lam ah gari hong ging in sawtlou in a kong uh hong kikiu hi. Sangte in leng hong lut un chi'n sam hi. Tua sapna aw a gintakin, kong hong kihong a tangval melhoihtak leh nalh tak a kichei khat a hong lut hi. Etmai in leng mihausata ahi chih a kitheithei hi. Sangte nu'n amuh takin, "Ehe...! Lampu nang na hi maw. Hong tu in chi'n ana phe soisoi pah hi. Lampu leng kisuanglah lou hial in Sangte bul ah hong tu sukpah in cigarette lakhia in petpah veuvau hi. Sangte in bel a mitsik natawm in a enkei. Himahleh, a nu pen a nungak zaw mah bang in Lampu maipha zong in a na phe tottot hi. Bangtan hiam nung in a na om un, chi saisai kawm in pawtkhiaksan hi.
Anu' pawtkhiaknung in Lampu in Sangte kiang ah hoih a sakdan leh a ngaih dan khawng gen in hon try panta hi. Himahleh, Sangte in Lampu kiang ah ngaihzawng neita ahihdan leh tua a itpen khenlouh sawm a a itpen a dia ginom den ding ahihdan genkhum hi. Tua bang thu a zaktak in Lampu heh mahmah a, Sangte kiang ah, "Nang hon nial mah lechin, na nu-le-pa toh kihoulem khinsa ka hihman un hon nialmah lechin, kei a dingsa na hi. Tua na tangvalpa hinna na it leh kintakin tawpsan in." chih khum hi. Sangte in bel bangmah a dawng selou in a pindan ah lutsan in kong kikalh khum a, pawtkhe nawn vetlou hi. Lampu leng amah chauh a tuden theituan samlou ahih manin a tawp in paikhong hi.
Atung a thiltungte ngaihtuah in nasalua in Sangte kap keuhkeuh hi. Anu-le-pa'n ama deihtelna donglou a midang kiang ah zuak mai uh chih a ngaihtuah chiang in khase mahmah hi. Muante a ngaihna toh anu-le-pa bawldante a ngaihtuah chiang in khaselua in a uMuante minlou kawmkawm in tuani sunkhua in kapden hi.
Nitaklam ninem in anu a hong pai a, Sangte nguaitak a om amuh tak in a ziak dong pah hi. Sangte in leng a nu kiang ah, "Nu aw, ka hon it in ka hon ngai mahmah, himahleh, ka tung a na thil bawldan uh zaw thuakhak ka sa lua. Nu aw,, na tanu it ganzuak bangmai a Lampu kiang ah maw na hon zuak mai uh. Naa ka salua, Nu aw Lampu toh ka kitensang un sih ka ut zaw. Hehpihtakin na tanu a ut louhna ah hon sawl dah mahmah mai in aw." chi'n kidiik huphup hi. Zenman in a tanu thugen a zaktak in heh petmah hi. A tanu kiang ah, "Mihainu, na uLampu lunggimtak a paisak na hi maw? Huai Muante tagahpa sang a etlah huaizotham hilou maw? Neih-le-lam ah lah kuamah englou, a pa sumdawng hausa nekseng louh nei hizomah. Ka tanu mihausatak ahih ding deih a zum-le-zah khuallou a na maban din ka et lai a maw nang ka thu na hon nial ding? Lampu lou ngal kuamah toh kiteng lou hial ding na hi chih kithei oh." chih khum zialzial hi. Sangte in a nu kiang ah, "nu aw hauhsakna in lungkimna petheilou hi. Nang leng ka pa na itpen ziak a na kitenpih ahi. Na nu-le-pate'n honna hal hile uh bangchituk in naa na sa dia? Nu aw nungak hun teng palsuakzou na hita. Itna bang ahia chih kei sang in na thei zaw hi. Na tanu itna tellou a zuak mai ding maw? Na tanu in leng itna leh it neisam keive nu aw." chi'n zakta zou nawnlou in a nu hon dawng tamai hi. A nu'n a tanu thugen a zaktak in hong heh semsem a, "zummohnu, nang nanu thugen nial ngam lai ding maw?" chi'n hehpihna bei in a tanu zep ek-ek hi. Sangte lah na salua in kap keuhkeuh mai a, bangmah lah genngam nawn lou in sialpi vuahthuak in thuak mai hi.
Nitakin a pa hong tuntak in thil omdan teng a nu'n a pa kiang ah gen nawn a, a pa leng hehlua in thumanglou chi'n hehpihna bei in a tanu zep ek nawn hi. Muante in amah ziak a a itpen a nu-le-pa khutlum thuak mu leh bang chi'n a om dia? A haksat dingdan ngaihtuah vual hilou hi. Himahleh, itna diktak zaw phelhmit zoh vual ahikei, buahmit sawm a a hahpan peuh uhleh a kuang zak nasa semsem zaw hi. A tawp in Sangte in leng thuakzou nawnlou in a pa kiang ah lau kawm pipi in hichi'n hon chi hi. "Pa aw, na tanu itlou na hiam? Pa aw, Biakinn ah hauhsaknate mangthei thil ahihdan leh itna mah poimohpen ahihdan na gengente koilam tungta ahia? Hauhsakna in kipahna hon tunlou hi , chi a pulpit tum ging dupdup a na gente kua a dia na gen ahia? Nu aw, Khovel hauhsaknate engken, chihla sakawm a Amen...! Amen...! chi kawm a na laam daldalte koilam ah mang ahita ua? Kei natanu na gen louh lam uh leh na laampih louhlam uh zui dia na hon sawl ua, na hon sawi uh. Pa aw nalua, hon that zaw maive maw hehpihtakin." chi'n hong kap khe hithit hi. A pa lah a tanu thugente a zaktakin heh kisa in nak zawsem in vuakbeh zawmah hi. A tawp in a lunggimnate leh a pa' vuaknate thuakzoulou in Sangte khophawklou in hong puk hi. A tanu khophawklou a a hong puk hial takin a pa leng hong lauthawng thak a, a tanu kintak in kempah a, lupna ah sial in a khophawk ding ngak in a bul ah tu khovak den hi.
Hunte hong pailiam zel in December kha bang hong hita a, Muante leng laisimna ah hahpan semsem in, nikhat tei mikhat suahsawm in hahpan thei mahmah hi. A it Sangte' sungte'n a hal lam uh theilou ahih manin Sangte toh a kiten dingdan peuh uh ngaihtuah in nui heuhau zel hi. A itpen toh haksa satak a khosak ding ngaingam lou ahih manin tua in a laisimna ah hahkat semsemna din tha pe mahmah hi. Nikhat college tawp baih uh ahih manin amah leng Sangte te' inn ah hoh ding chi'n Sangte toh hong ton sukta hi. Innsung lutpan chih ding in Sangte nu'n a na mupah a, "Muante zakta lou maw? Nang mi tagah leh nekding neilou, meithai tapa in ka tanu na hong hel ngam himhim. Na dinmun enve. Ka tanu nou khawng maimaite a ding vual ahikei. En in, a pasal ding a khaamsa hiah a om." chi'n Lampu kawk kawm in Muante a na kou zialzial hi. Muante in a itpen tunnu tongsuah a zaktak in zaktalua in bangmah genlou in innkong lam ah taipawt hi.
Hiai thute a gen kawm in Muante in amai hum in kap huphup hi. Nileng kaita ahih manin a bahara ding pia in ka paisak a, zingchiang dak 10am a hong ki report nawn ding in ka hilh hi. Kei leng lungsim nuamlou tak kawm in innlam ka zuan hi. A zing in Muante toh houlim ka pan nawn ua, a tanchin lungkhoih huaitak mai a hon genpan nawnta hi.
Muante lah a itpente inn ah pawt ngam nawnlou a, college natawm ah leng Sangte toh kimuh ding lin thei mahmah mai hi. Ahitheitan in kibuksan zel hi. Alehlam ah Lampu leng Sangte tan teitei sawm in azing-azan in tung thithe tamai hi. Sangte' nu-le-pate'n a kintheilam a kigawm mai ding in gen pihpih sek zawmah uhi. Tua in Lampu maingal sak deuhdeuh a, tuitum semsem hi. Anu muh natawm in kilawmlou tak in Sangte khoih sawm zelzel hi. Sangte utlou in kamsia in hou ek-ek zel a, tuahun chiang in a tanu panpihnak sang in tai zawsop hi.
Hunte hong pai zel in, Muante te'n leng pawl XII exam hon panta uhi. Buaina bangmah omlou hial in exam hon neitou zel ua, Muante leng gelh hoihthou lohching ngeingei ding chi'n kimuanna lianpi toh hong exam tou zel hi. Sangte ahihleh asun azan a Lampu in kualpih den ahihman in haksa sa mahmah hi.
Exam laitak nikhat Lampu leh a lawmte'n Muante ana taang uhi. Muante bel khosak haksatnate ziakin gari tuanman natawm nei zoulou ahihman in khe ngen a kuan in kileh zel hi. Thingkangphai a hong tuntak in, Lampu'n a lawmte mithum toh ana khawlsak uhi. Lampu in Muante kiang ah, "Muante, tuban Sangte ana khem non kenla, na itna leng tawpsan in. Kei a ding a khaam ahita a, na hong kidaihlah leh na hinna la ding ka hi," chi'n gen hi. Muante in kam khatmah a leng dawnglou in paisan sawm hi. Himahleh, Ngilpu kichi Lampu lawmte khat in bangziak a pai e ? Chi'n a awm ah man in amai suksak hi. Muante leng leilak ah puksuk a, lawmtate'n hehpihna bei in leitoh chil khawm zialzial uhi. Bangtan hiam a soisak zoh nung un Lampu'n a kiang ah, kama dal a napan teitei lai leh hiaisang a khawkzaw ahi natan ding. Chi'n paikhiaksan uhi.
Muante leng apukna apan awl a thoutou in si kai niuniau in bai leihleih kawm in innlam hon zuan hi. Inn ah anu'n ana muhtak in aziak dong a, Muante in leng thu omdan teng anu hilh hi. Khaselua in kingawngkawi kawm in anuta un, eileng mibang a neisam in ka pa mah in hon dampih lai hileh zaw maw...hiaibang a kisimmoh nate tuaklou ding hi hang a !! Pa aw hong ngailua ung. Hong tualkum inla, na angkawi leh von momnou hong en laive maw !!! Chi'n kap huphup uhi.
Awl in anu'n Muante liam nate silsak in apuan a sisan bangte sawp siangsak hi. Azing a khat exam ding neilai ahihman in Muante in leng haksa sa kawmkawm in lai hon sim hi. Mite simmoh nate a ngaihtuah chiang in naa sa mahmah mai a, nikhat tei amaute tung ah leen ding tup anei in peihlou kawmpi in lai hon sim hi.
Azing in exam din kuan nawn hi. Sangte in college gate ah ana ngak a, Muante chi kehnate amuhtak in lamdang sa mahmah hi. Muante kiang ah aziak dong a, himahleh Muante in awl a natheih hun hong omna ding ahi, lungnuamtak in exam phot ni; i zoh chiang in vak khawmni chi'n exam hall hon naihta uhi. Exam zoh in ki it tegel hong vak khawmta uhi. Pangzawl khosak lam a munnuam mahmah khat ah hong tukhawm in, hong houlim uhi. Sangte in a uMuante chi kehna mate aziak dong nawn hi. Tua takin, Muante in leng im neilou in athil tuahte hilh vek hi. Muante thugen Sangte in a zaktak in a kiang ah, "uMuan aw, kei ziak a nathuak nate poi ka sa mahmah. Na theihsa bang in eigel kal ah hon suse ut tampi a om. Ka sungte'n leng Lampu toh hon gawm a sawm uh chih leng na thei hi. Huaiziakin uMuan, tu in a kikhelma in honpi mai in, nang toh tulkhawm ut ka hi. Ka pallut nate midang in a hon lohmai ding na hon phal ka gingta kei. UMuan hehpihtak in honpi mai in." chi'n mittui luang zungzung kawm in ngen hi. Muante a ding in ahaksa tel mai. A itpen midang ang ah zal din aphal kei. Himahleh, amah lam a ki-et chiang in ji neithei ding vual in a kikoih kei. Naupang khah ahi lai a, huaiban ah, khosakna haksatak toh thupukna bawl haksa asa mahmah mai hi. A itpen a ang ah mittui luang zungzung a om amuh chiang in lah a hehpih mahmah zel hi.
Atawp in Sangte kiang ah a sam zut kawm hiauhiau in hichi'n a hon chita hi. "Sangte, aw ka it, kon itlua chih na thei a, midang a ding in kon phal kei chih na thei. Himahleh, tu'n honpi taleng, naupang khah i hilai a, na nute'n hong zong khe ding ua, Lampu mah in leng hon that ngam mai ding ahihman in hichi'n hih zaw ni. Lampu toh gawm teitei a hon sawm ua, lampi dang om mahmah lou ahihleh. Huaihun chiang in ka hong pi zaw mai ding aw."
Sangte in leng tua bang a a itpen thugen hon zak chiang in a kahlai tawp in, "U aw nang hoih na sak bangbang leh lem na sak bangbang in hihen. Himahleh zekai ken aw , u kon ngailua." chi'n Muante ang ah belh in kikhelah tak in hong kikawi ua, ki it takleh kideihthoh tak in maban ah bang hong tung ding ahia chih theikei mahle uh a tawpna pen ding mah bang in hong kitawp vengveng uhi. Sawt tak a kikawi ua a kitawp nung un, ni leng niamta ahihman in a omna mun ua pan hong ding khia in, innlam hon zuanta uhi.
Muante in leng ahun awlte ah kilohna ding hon zong in hong kiloh tou zel hi. Nikhat contractor pa'n zoudawnlam ah sep ding om ahihdan gen in a nasemte lak ah fel leh kizen a sak mahmahte sawl hi. Amaute enkai ding in Muante muang mahmah in sep hi. Muante leng ut mah leh; inn ah anu teek leh hatnawnlou om pen ngaihtuah lua ahihman in a boss pa kiang ah a haksatna vatun hi. Contractor pa'n lungkham lou ding leh anu ana etkolsak lawtel ding ahihdan gen in ana khamuan hi. Muante in leng a khotuah nate hang a kipahthu gen in huchi'n zoudawn lam manoh in hong zinkheta uhi.
Sangte leng ahun awlte ah sep ding thupilua omkei mahleh a maban ding khualna in septheih a om teng kisin in buaithei mahmah hi. A uMuante zinlam natawm theilou hi. Huchih lai in Lampu in asun azan chih omlou in vahel den a, a itna thu vagen den hi. Himahleh, Sangte in thulim dawn ngeilou hi. Sangte dawnnate Lampu in a zak chiang in heh in thangpai mahmah hi. Sangte thuzoh sawm teitei ahihman in zuauthtu in Sangte kiang ah Muante hekse gige hi. Bangchi teng in panla in thusia gen mahleh Sangte in a uMuante a itna khuambanga kip pen sawi ling zou mawngmawng lou hi.
Sangte lungtang a zoh louhtak in, Lampu thangpai mahmah mai a, huchi'n Sangte' nu-le-pa thuzoh in kitenpih sawmta hi. Sangte sungte'n bel Lampu omdan enlou a a sum-le-pai pe'n enlah zaw uh ahihman in ana AMEN pah uhi. Huchi'n Sangte theihlouh kal in a kiten ni ding natawm uh gen fel in omta hi. Himahleh, Sangte in athil tup teng uh thei ahihman in a sungte kiang ah a utlouh dan gen in Lampu omdan hoihlou teng a sungte hilh a, hiaibang a omdan hoihlou toh gawmlou ding in a innkuante kap kawm in ngen ngutngut hi. Himahleh, sum-le-pai it zaw a innkuante'n amau thu mah paipih tinten uhi.
Nikhat Sangte hel ding in Lampu vapawt hi. Sangte kiang ah kimuangsak tak leh kivualzou sak tak in vapau eng-ang hi. Huaitak in Sangte hehlua in Lampu kiang ah A zi ding hingei lou ding ahihdan leh amah toh kiten sang a sih leng ut zaw ahihdan genkhum hi. Lampu in tua bang thu a zaktak in heh mahmah kawm in Sangte sam ah man in ut in ut kei leh a zi hi veve ding ahihdan genkhum in suam hon sawm hi. Sangte leng hehlua in kitung ek-ek a, Lampu khut a kipan hong kipek kheta hi. Huchi'n hehlua in Lampu kiang ah, zummoh pa, ka sianthouna ka pasal a ding kia ahi. Nang bang midukdak loute a ding ka hikei. Kintak in pawt inla, ka inn uh khatvei mah leng hong sik nonken, pawt khia in. Chi'n gen hi.
Lampu leng heh mahmah kawm in paidi'n kisa hi. Huchih kawm in Sangte kiang ah, tunitak mahmah a a kisuanpih a sianthouna pen laksak ding ahihdan gen in paisan hi. Tuani nitaklam in a lawmte phone tungtawn in Sangte toh kihou khathei zenzen uhi. Thu omdan teng Sangte in hilh vek a, huai ziak in amah leng lung nuamlou tak in om hi. Hun lem masapen a innlam phak ding in thupuk a, himahleh hun lem mukha theilou ahihman in a hong paitak in thilteng ahi ding teng ana hikhinta hi.
Muante in a thugen a zohtak in a hinkhua uh im neilou a ahon hilh ziakin kipahthu ka gen a, tualthattute kintak a mat khiak a gawtna khauhtak piak ding, tua ding a amah Muante in leng panpih theihna a hon neihna teng a hon panpih ding a ngen in a lampaiman ding pia in a annhuan ding uh anntang bag 3 toh ka paisakta hi.
Huchi'n thuguk saipawlte thupia in kintak a Lampute omna zongkhe ding in ka ngen hi. Amau leng pan hon la in kintak in kansui ua, huchikawm kal ah, Lampu' pa Police Station ah sam in Lampu omna ka dong uhi. Aman leng a tapa omna theibun lou leh kithuzak ngei nawnlou ahihdan uh ahon hilh hi. A thugente gingta lou ka hihman in a tapa omna a hon hilh kei leh gawtna pe ding ka hihdan leh a tapapa mat a a om ma suangkulh ah khum ding ka hihdan ka gen khum hi. Tua bang thute a zak tak in lau mahmah mai hi. Kimu kha ngeilou uh ahihdan a gen a, himahleh, khakhat a khatvei bank tungtawn a sum pezel ahihdan hon gen hi. Huaitakin, kei leng Lampu mat theih nang tua thaang pen kam pah ding in ka hong kisata hi.
Huchi'n pa Thangpum kiang ah a tapa sum khak nawn ding in ka ngen hi. Bank te kiang ah Thangpum lem khak in hiai mipa'n account khat ah sum a hong koih chiang in tua account pen ana chiamteh a, asum draw ahih chiang a a draw khetu ana chiamteh ding in ka ngen ngal hi.
Hunte tuiluang bang in paihat mahmah hi. Nikhat bank te apan in call ka ngah hi. Sum ki deposit pen alatu ding tulel a bank ah om lel ahihdan ahon hilh uhi. Tua phet in ken leng Khualpu leh midang 5 tonpih in sum draw khetu man ding in ka kuan uhi.
Mihausa tak bank ah sum lakhe ding hi awmtak in civil dress a kivan in kei toh ka lawm Khualpu bank ah ka lut ua, a dangte'n kong lam ah panmun bawl in ana tangpang uhi. Clerk pa'n ahon muhphet in sum draw khe ding tupa ahon kawkmuh pah hi. Huchi'n pilvang takin ka envel ua, amahkia ahihdan ka theihtak un akiang ah vapai in thu tuamtuam ka houlim pih uhi. Kipawlnelta chih ding in amin ka dong hi. Amin Tuanpu ahihdan a hon hilh hi. Ken leng ka min Lianpu ahihdan gen in kimeltheih tuah semna ka bawl uhi. Huchi'n mi tamlua chih paulam in kong lam ah meltheih tuahna singpi dawn ding in ka ngen hi. Aman leng lemsa pah in ka thum un ka kizui pawt uhi. Konglam ka tun tak un ka lawmte signal pia in kintak in a hong pai ua, Tuanpu man in police station lam ah ka taipih uhi. Station ah thudotna ka nei pah ua, a tung in bangmah theilou dan in pansawm mahleh a degree ka khen tak un bel thuakzou nawnlou in a hong kipuangkh ta hi.
Tuanpu pen Lampu a ding a amizat leh amuan mahmah khat ahi a, Sangte pikhiakna ah leng pan naktak in la hi. Lampu leh amah toh midang nih in Sangte pikhia uhi. Sangte' te inn ah tua nitak in vahoh uhi. Lampu in a thilsawm dan teng alawmte hilh vek hi. Pikhiak a munkhat ah suam a, huaizoh a taisan ding. A lawm teng sum tamthamtak piak ding chin Lampu in gen hi. Amau leng a ut lamtak uh ahihman in pai dia kisa Sangte in kong tan a vakhak tak in man in kaikhe ngal uhi. Sangte utlou in kipek khiak sawm a, himahleh mantang in gari in taikhiak pih uhi. A thawm uh Sangte' nu-le-pa'n thei mahle uh Lampu in a zi ding a pi dia gingta in vasubuai selou uhi. Amau leng Sangte Khuga Dam lam ah taipih in mun thoveng khat ah deihtawk in kisual huan uhi. A soisakna uh thuakzou lou in Sangte amun ah khophawk lou in om a, amau te'n athil hih ding teng uh azoh tak un denchiah Sangte in Police te kiang ah a hon report kha ding chi in a gawl ah mek ua, a bangkhem temta in at siatsak uhi. A si chih a theihtak un laigelh in Sangte luang canal ah pai lut uhi.
Tuazoh in amau leng mi theihkhiat khak ding lau in mun tuamtuam ah kibu ua, Lampu in apa kiang ah sum ngen in tuate in galvan lei uhi. Tua galvante zang in mite suam in mun tuamtuam ah kibu kawikawi uhi.
Tuanpu a kipuanzoh in tulel a akibukna uh ka dong nawn hi. Himahleh gen utlou in dai dide a, ka dot dot hang in alawmte omna gen ut bilbel lou hi. Tuatak in ka thangpai lua in Tuanpu kam ah puansia hen in tui ka sun khum ua, haksa salua in hong kipek ek-ek hi. Ka dong zomzel a, agen ut mateng akam ah tui ka leih den hi. Atawp in im zou nawnlou in akibukna mun uh ahon genkhe khongta hi.
Tuanpu hon hilhna mun lam zuan in nitak mah in Sehken khomunlui lam zuan in ka hong kipankhia uhi. Khuga Dam tan gari a tuang in dam apan in long in ka pai uhi. Satellite pansan in amun hoihtak in ka vel masa uhi. Mi 10 chauh khawng om ahihman un luhkhiak haksa lawtel din ka koih kei ua, Hiai bang operation ah kikhuankhe vang mahmah ta ahihman in ka lawmte nervous simsim bang a om uhi. Kei ka kuan ding hon phallou uhi. Khualpu ngial in heh phial in ahon khaam hi. Himahleh, Lampu gamtatdante mulkimhuai lua ahihman in keimah khut ngei a mat ka tum tinten a, tua ziakin ahon kham zoukei uhi.
Sehken khomunlui ka tuntak un pawl 3 a kikhen in khat kei makaih, akhatpen Khualpu maikai sak in athumna pen Mangboi ka makaihsak hi. A camp uh mualtung mun nuam mahmah khat ahi a, alutna ding lampi khat chauh a om hi. Munbit leh luhkhiak haksatak mun ahihman ahi ding a, lungmuan tuak mahmah uhi. Ka panmun ding uh ka hon hawm ua, Khualpu pawlte'n lampi omsa pen apan ahon pantou ding ua, kei leh ka pawlte'n bel a nunglam apan kaltou a, sentri om louhna lam ah lut ding. Mangboite pawl bel mi 2 in sniper toh atangpan ding uh. Adangteng bel apoimoh lamlam panpih ding a mansa a ana om ding uh chih ahi. Huchi'n ka panmun ding chiat uh manoh in dak 9:30 pm in ka hong kipan kheta uhi.
Gintaksang in kou panna ding lampen ana haksa zaw a, gamkawm lampi omlouhna ngen ahihman in a daibul uh ka tun un dak 11 bang a ging ut simta hi. Lawmte lah kinoh simta, ka order ngaklah lua in ahun ding hon dongdong mai mah uhi. Himahleh, dak 11pm a duty kikhek ding ahihman un huai ka ngakpih hi. Dak 11 a hong gintak in duty lelte aban ua ding phawng in apaikhia uhi. Tuatak in ka lawmte thupia in chikmah a ka mangngilh nawnlouh ding operation chu pan ka hita mai uhi.
Koulam ah sentri duty omlou ahihman in sikdai teptan in ka lut pah uhi. Khualpu te'n leng duty awn kal suam in kintak in camp sung ah ana lut in panmun ana la khin diamta uhi. Duty thak ding amau kianglam zuan a paite thawm omlou hial in ana koih hoih pah ua, huchi'n camp dia inn sautak kilam nawl khat ah ka hong kimu khawmta uhi. A i muta leng a om uh chih a kithei thei a, himahleh, room khat vak lai a om a, tuasung apan music hong gingkhe nguainguai om ahihman in party bawl uh hidin ka gingta hi. Huchi'n kou leng kapan ding dan uh kihawm thak in Mangboi pawlte ka samtou ua, Khualpu te lawmta teng in music hong kikhah khiatna room pen vabuluh ding. Mangboi pawlte'n barrack sung a omte buluh ding leh kei leh kapawlte'n Lampu giahna inn lamteng mohpaw ding chi in ka na uh ka hon panta uhi.
Ka panmun chiat uah pan hoihtak ka lak khit nung un ataktak pan ding in ka hong kisata uhi. Ka omna munchiat uah thumna nei in, ka khelhnate uh thupha tawi in PATHIAN kiang ah panpihna ka ngen uhi. Huchi'n thupiak ka hon pia a, ka thupiak zoh second khat paipan chih ding in lawmte'n ana uh ahon pan ngal uhi. Ken leng thakhat in Lampu giahna room hingei ding a ka gintak na mun ah kongkhak tuanhong in ka lut ngal hi. Light a ki off man in bangmah a kimu theikei. Himahleh mikhat chauh a omkei chihbel thawm omdan apan in a kithei. Kintak in light ka on a, lupna mun thau a ngimphei kawm a ka et leh... Kare...! Maizen Lampu leh nungak melhoih mahmah ka meltheih. Omdan hoih a ka theih leh saptuam sung a kizang mahmah khat in savuak pingpeng a hunnuam ana zang ana hi ua, lamdang satak in a honna en heuhou uhi. Kou hon muhtak un numei pen lau a kikou in a taksa khuhna ding zong in aphe lemlom hi. A puan-ak te uh pia in silh ding in ka theisak a, Lampu pen man in ka nung leh hen ngal uhi.
Lawm dangte'n leng ana uh hon pan in kilchih ah thau a ging churhcurh hi. Kou gintak banglou in mitam simtak ana pha ua, ken leng ka lawmte mi 2 kiang ah Lampu leh a lawmnu ana enkai ding a hilh in lawm dangte panpih ding in a dang teng toh ka diang khia uhi. Hoihtak a ana kiging man hile uh bel luh khiak zoh vuallouh ding a tam ana hi phiangsan uhi. Galte muh masak kap thal teptep kawm in lawmte kiang ka vatung uhi. Sawt kuamtak ka kikap tuah nung un galte tengteng gawtmun ah transfer order ka suah khumta uhi. Himahleh, vangsiat huaitak in kou lam ah Mangboi leh midang 2 in liamna a tuak ua, Mangboi pen a awm ah thautang lut in sisan tampi pawt a adinmun lauhuai mahmah hi. Adang 2te bel thautang in nawk kha zek maimai ahihman in buaipihluat ngailou uhi. Huchi'n Mangboi puakna ding ka bawl ua, ka man tak un, Lampu leh a lawmnu ban ah, party zang a kuan nungakte tengteng toh Lamka zuan in ka hong paikik nawnta uhi.
Lamka Police station ka tun un khua avak philhphelhta a, vai pathiante leng athou panpan ta uhi. Kou leng ka mimatte uh lock up ah khum in tomchik tawldam kawm in ka ihmu uhi. Zing ann nekzoh in thudotna ka pan pah ua, numei teng anu-le-pate uh sam in thuhilhna hoihtak ka pia ua, huchi'n court ah ding sak in ka paisakta uhi. Lampu' giahpihnu pen kou veng a saptuam ah kizang mahmah khat ahihman in zahlak kisalua leh kisiklua in kap huphup hi. Anu-le-pa kiang ah hiaibang in hon gen hi,
Suty khanih zangzou in joining ka vabawl nawnta hi. Tua hunlai bel bouruak siangthou in nuam mahmah mai hi. Law and order lah kichuptak a etkai ahih manin Lamka khopi sung thoveng in nuam mahmah mai hi. Sualna in kiamlam nawt hiaihiai ahih manin Police Dept. te a ding in leng neuchik nak a nuam deuhta hi.
Nikhat, ka ofis ah thadah chair tung ah kingai ngehngah kawm a ka hunluite ngaihtuah kawm a ka omlai in. Pa khat naknoh hehu in a hong diang lut hi. Ka kiang ah thugen ut nei ahi chih amel apan ka thei a, himahleh agimluat ziakin bangmah gen thei pahlou in anak huthut hi. Ken leng adawn ding tui pia in huchi'n a sou hong kiam deuh a, hichi'n a hon genta hi. "pu aw, tuzing baihtak in News hawm din ka pawtkhia hi. Khuga Dam lam ah ka vahawm in bel dak 8am a gingta hi. Dangtaklua in canal a tuite dawn ding in ka vanaih hi. Dawn ding a ka kunsuk tak in, pu aw, endih, numei khat vuaktanga sisa in canal sung ah ana om hi. Ken bel mobile fon natawm neizoulou ka hihman in, kuamah hilhman lou in ka cycle in kintak in nang kiang ka hong delhsuk hi. Hongpai inla hong en in pu aw." ahon chita mai hi.
Lamdang ka sa mahmah mai a, tu galmuan laitak, sualna a kiakniam laitak leh, mite lungmuan laitaka hiaibang thil mulkimhuai a hong tun mawk pen in ahon hamhaih sak mahmah hi. Gang group record omteng lah sukmit hita. Helpawl lah omlou. Kua khutnung ahita dia?
Kintak in ka nuai ate mansa a om din thu ka pepah hi. Ka lawm SI Khualpu toh constable mi 5 pi in thu hon tunpa toh kintak in Khuga Dam lam zuan in ka taitou pah uhi. Amun ka tun un mitamtak in ana en liailuai ua, amaute'n hon muhtak un "Policete' zia nei hon" chi'n ahonna mohsa mahmah uhi. Nungak luang pen puan a tuam in gari sung ah ka koih uhi. Ataksa ah liamnama tam a omkei. Himahleh, a ngawng lak a sidup ban ah abangkhem pen et ngamlouh phial in a ki atsia hi. A kiim ka etvel uleh laithem kinusia khat ka mu ua, tua laithem ah laitui san in hiaibang in a kigelh hi. "SANGTE SIHNA THU KUAMAH IN HON SUI KEI UN. NA KIPAT UHLEH NA LUTANG UAH THAUTANG THUN AHI DING." Kua(te) sulnung ahi dia? A sinu Sangte kichi toh kinaihna bang anei (ua)? Sangte nu-le-pate kuate ahi ua? Bangziak a Sangte that uh ahi ua ? Bangteng hileh postmortem bawl phot a Sangte sungkuante zon khiak phot ding chi'n Lamka zuan in ka hong kipankhe nawn uhi.
Damdawi inn ah postmortem ka vabawlsak ua, tua kawmkawm in mipi a theipha liai teng kiang ah ameltheih kha a om hiam, chih ka kan uhi. Alak ua tangval khat in theikha ngei ahihdan a hon gen hi. A omna veng ua Pa Thangpum leh Nu Zenman te tanu neihsun ahihdan a hon hilh hi. Anu-le-pate sampah in ka ensak ua, a tanu uh luang sisa amuh phet un kidek zoulou in mipilak ah kap in a hong kap khe zuazua uhi. A nung sawtlou in apa pen awl a samtuam in thu Ka dong pah hi. Kua khutnung hidin na muangmoh a? Midang toh kimelmakna nanei kha hiam? Chi'n ka dong hi. Aman bel, huchidan in zaw midang toh kimelmakna ka neihlam ka theikei. Kua khutnung hiding ahia chih leng ka thei zoukei. Ka tanu omdan hoihtak leh thumangtak ahi a, lawm-le-vual tung ah thusia bawl ngeilou mi ahi hi. Hiaibang thil a tung ah tung ngei ding in ka ngaihtuah theikei. chi'n a hong kap khe huphup hi.
Thudang dot theih ding dan ahih nawnlouh man in thuzak naneih leh hon theisak pah in aw, chi'n police station lam zuan in ka paikhiaksan nawnta hi. Thu hon tuntupa statement la in FIR brutal murder case ah ka register pah hi.Nitak in ihmu theilou hial in ka ngaihtuah a, i gam uah hiaibang mulkimhuaitak thiltung apun deuhdeuh mawk lamdang ka sa mahmah hi. Khristian kichi a, i gam uah tangthupha a hong lutna kum 100 val bang phata hi a, khalam ah dinmun sangtak a omta ding a kingaihtuah lai a hiaibang sualna niteng a apun deuhdeuh mawk pen kua mohna hi ding ahia le? A gam neitu eite pen 100% Khris nungzui kichinuam hang a. Namdang hong tenglut Pathian hing theiloute sang a ngong zaw a hinkhua i zat mawk pen uh, bangziak ahia ? I Khristian kibul phuhna uh a kip zohlouh ziak ahi diam? Nu-le-pate'n Pathian thu a i tate uh i sinsak ua, i chiil zohlouh ziak uh hidi'n ka gingta hi. I tate uh sang a sum-le-pai mah pibawl zaw a, Pathian phawklou zen a a hon vualzawlnate chauh delh a i kidelh tuah lailai ziak ua i tate khahzan lawkha a, siatna khukpi ah tummang gai ding i hita uh e... Chi'n ka ngaihtuah nilouh hi. Huchia ka ngaihtuah lai in theihlouh kal in ka na imu kha khong hi.
Ka khanloh in zingkhua ana vak mahmah manta hi. Kintak a thou in ka kihahsiang a, singpi dawnkawm in News ka sim hi. News ah "POLICE TEN NUMEI SILUANG PHONG. A THATTU THEIH HILOU." chi'n a kigelh hi. Tuazing news pen Lamka khua sung a Organisation om tengteng mohpaihna thupuan in a dimvek hi. Organisation i tamtuk un i MOTTO te uh semtam lehang hichitel a sualna i lak uah maingal lou ding hi a maw !! Ka chi vungvung phet hi. A huntak a i sep ding i mohpuaknate uh i seplouh ziak a i hihtheihsun uh MOHPAIHNA THUPUAN puankhiak ahi maive. Hiai ahi a huntak a dai i kaihlouh uh a poina... Chi a ka ngaihtuah neuhneuh laitak in ka mobile a hong ging lengleng a, ka et leh DSP pa ana hi a, hello..! Bangthu a om a? Ka chih a leh, aman, Sir, kintak in station lam hon zuan in mipi kiphinte ahat lua uh. Bang ka na loh ding ua? A hon chi hi. Ken leng awle , ka hong pai chihtoh thuah in ka koih a, ka angkawi kiang ah, "Nau, tuzing ann nekhawm manlou ding i hi. Ofis lam ah hihding poimawh neuchik a om zual a Ka vapaizual ding aw...ngaihsiam aw, nau." chi'n a biang nou ngingei tawpsak cheuh in kintak in ka kisa a, ka pawt dek in ka angkawi in, "u, hong tuahpha in aw...Sian in hon kem hen." chi'n ka muk ah a hon tawp cheuh a, hiaibang thubuai giktak mai lunggim huai mahmah tuak a, lunggim tak a omlai a, angkawi, ka it in kamkhumtak toh hon kha a, a hon tawp cheuh leh zaw... Lunggimna tengteng THE betkhiak mah a bang hi.
Huchi'n lungsim zangkhaitak in police station lam ka zuanta hi. Ka tun in mipi ana tam mahmah mai a. A na kikou nuainuai mai ua, "Tualthattu hon pekhia un." chi'n a kikou zuazua uhi. Ka gari amuh tak un lampi bel a hon awnpah vanglak uhi. Huchi'n mipite kiang ah tualthattu mat a ompah ding leh a tung ah dan in aphaltan a hehpihna bei a gawtna piak a om ding ahihdan ka gen hi..
Himahleh, kua ahia tualthat? Koi ah om ding ahia? Kitheilou ahih manin zuau a mipite khamuan maimai suah khak ding alauhuai mahmah hi. Ahi alah tualthattu kitheilou, matkhiak hun ding kitheilou ahi. Vachih thahah ding lah mipite sousang semsem ding uh ahih manin zuau a kikhem lungdam phot chu a ngaita mai ve. Mipite leng ka thugen in neuchik khamuanna pesam ahi ding a, awl in a hong dai thei vanglak uhi.
Tuani bel Lamka khopi sung ah thildang bangmah genkhak leh sep ahikei. Tualthahna in miteng lungtang phawng chiat ahi ding a Student organisation tuamtuamte makaihna in skul naupangte'n lampi zuihna nei ua, pawlpi tuamtuam kigawmte'n tualthattu mat ahihma nuakna neiding chi'n Bandh a bawl uhi. Nidang a khopi muang leh thoveng pen tun buainapi in a buak vekta hi. Police te'n na sep ding uh semlou na hi uh chia police te sual sawm toh kipumbuai hi. Police station kong ah mipi sousangte toh kinawktuahna thupitak om in tear gas tampi mahmah ka kapkhia uhi. Guta te'n lah hiaihun hunlem ala in guktheih teng gu in atai duaiduai phet uhi. Hiai kiphinna gutate'n phattuam pihpen ding un ka gingta hial hi. Kuamah amau subuai ding omlou ahih manin lohching mahmah uhi. Nitaklam in kiphinna azia hong om deuh ahih manin DSP khut ah mohpuakna pia in damdawi innlam ah ka vahoh a, postmortem result vala in huchi'n innlam zuan in ka pai nawnta hi.
Maban panlak dingdan ah ka lung a buai mahmah hi. A mel theihte kiang bang ah kankual zel mah leng apa' hon hilh dan bang deuh kia dawnna ka mu hi. Huchi'n hunte hong pai zel in khakhat val bang a hong kivei nawn manta hi. Mipi lak a ka thuchiam tangtun zoulou ka hihmanin poi ka sa mahmah hi. Tualthattu matkhiak hun ding a ka chiam hun sung teng hong bei nawnta ahih manin, pawlpi tuamtuam apan nohna husa kiza pan nawnta hi. Bandh khawng toh hon thuah tou nawn lemlum uh ahih manin police dept. a ding in zahlakhuai mahmah mai hi.
Nikhat CIDte apan in thukhat ka za hi. Tua thu bel, nidang a Sangte kingaihpih khat Muante kichi om ahih dan leh amah apan a thu bang hiam muhkhiak a kinep huaidan a hon hilh uhi. Ken leng a address kimtak ka dong pah a, huchi'n Muante mu ding in ka taikhepah vitvit hi.
Muante te' inn ka vatun in anu chauh ana om a, police uniform a kivan leh thau hoih taktak tawi a amau innlam zuan lai a hon muhtak in, lau in ana liing kekeuh hi. Ken leng "Nu aw, hon lau ken, bangmah hon loh lou ding k ahi. Muante omna ka thei nuam ua hong kan ka hi uh. Na hon hilh thei diam?" chi'n ka dong hi. Tuatak in nupi nu'n lauh meltak in "ka tapa in thilhih khial lou ding ahi. Thumangtak leh Pasian lau mi ahi hi. Hon pimangsak kei un hehpih takin, amah omlou a kei chauh bangchi khosak mahmah ding ka hia? Hehpihtak in hon puak mangsak kei un" chi'n a hong kap keuhkeuh hi. A inn uh ka en a, inn hoihlou khah leh neuchik a kilam ahi a, a baang mauten, a tung bii ahi hi. A baangte aluiluat tak ziak in a vang hemhom a, atung a biite leng aluiluat tak ziak a muat gai dek bang in ka mu hi. A khosakna uh haksa mahmah ahi chih amuh theih hi.
Huaitakin ken leng, "Nu aw lauken amah bangmah loh lou ding ka hi uh. Lungkham ken, thu dong ut maimai ka hi uhi. Ka thilsuina uah a hon panpih theihna a omkhak leh chi a amah muang a hong naih ka hi zaw uhi." chi'n ka hehnep kawm in ka dawng hi. Tuatak in, nupinu mel ah lauhna omte awl a hong bei in angeina hon pu nawnta a, hichi'n a hon dawng hi. "Ka nau Muante pen kiloh a azin laitak ahi a, damleh zinghal chiang in a hong tung ding. Huaini chiang in hong enthak mai un aw bawite."
Ka mizon uh lah ana omlou ahihtak chiang in kou leng, "Awle, nu aw, kipaklua ung." chi'n ka paisan nawnta uhi. Ka lung abuai mahmah mai a, Muante omlouh dan in ka lungsim a kisual nak sak mahmah hi. Amah lah Sangte toh kingai ngei hizomah, athil hih ziak a lau a zinmang ahi diam? Ahihkeileh theikha lou himhim ahi zaw diam? Lungsim giktak toh innlam ka zuan hi. Inn ka tun in ka angkawi in sangkil bul ah nuihmai hiuhiau kawm in honna dawn a, vaidawnna in hon kawi in hon na tawp cheuh hi. Ka lunggimna teng THE betkhiak bang in a lengmang pah hi. Ka angkawi ka en a, ka enchim theikei, a nuihmai leh a gamtat etlawmtak te'n a hon zou mahmah mai a, ka kipak in ka itna a lian deuhdeuh hi. Khovel a pasal a piangkhe tengteng lak a hampha pen
ka hihdan kithei in ka lung a kim mahmah hi.
Ni nih nung in Muante te inn ah ka vahoh nawn ua, amah leng ana omta ahih manin kihou nang poimoh tak om ahi. Na panpihna poimoh ka hi uh chi'n police station lam zuan in ka kipawsuk uhi. Police station ah thudot ka hon pan ua, amasapen in Sangte toh a kal thu uh ka dong hi. Lamdang a sa mahmah mai a, bangziak a huaithu hon dong mawk na hi hiam , sir ? Sangte bangchi a ? Chi'n a hon lehdot hi. Huaitakin ka hehtha a hong suak phut a, Muante pen muanmoh pipen hiphot ahih manin khauh deuh in a kiang ah, "Muante, ki im se dah mai in, Sangte tung ah bangziak a huchi gamtat a, theilou bang a omlai na hia? Thudik hon hilh in." chi'n zep ding in ka kisa hi. Lamdang salua leh kap kawm in, "Sir, ken bangmah thu thei khalou ka hi. Mundang ah kiloh ding a kha 5 val vaomkhia ka hi. Sir, hehpihtak in ka it Sangte tung ah bang tung ahia ? hon hilh ve maw?" chi'n a hong kidik huphup hi. Ken leng Sangte sihna lemlakte ensak in "Nang hih ahihkei leh kua hih ahia? En in, zuau nagen ngeingei leh nalu ah thautang thun ding ka hi." ka chi gugu hi. Muante in leng limlakte a et tak in amelte hong kilamdang in hehna leh thangpaihna mel a kimu a, lungkhamna, khasiatna leh kisikna mel amuh theih hi. "Sir, hiai khutnung zaw ka muanmoh om ahi. Nidang a ka kingaih lai ua, a hon daltu leh hon subuai tupa khutnung ahi ding." chi'n khasia leh thangpaitak a kap zoihzoih kawm in "Sangte, aw, ka it, HICHI TEL DING SA LENG ZAW ... Na hon ngetna bang a haksa lehle honna pi mai ding hing a... Hon ngaidam in aw Sangte." a hon chikhe huphup hi. Ken leng awl a khem in a tanchin uh ka dong a, Aman leng a aw hon bawl hoih thak in, hiai bang in a tanchin uh a hon hilhta hi.
Lamka apan km.10 vel a gamla tang kitawi litlet ah khua nuam mahmah Mualchin kichi khua khat om hi. Inn 300 lakvel om in khopi toh kinai ahih manin khosak nuam mahmah hi. Tua khua ah nupa khat Khupkam leh Zualningte teng uhi. Amau tapa khat Muante kichi nei uhi. Innkuan kithutuak leh nuamsatak ahi ua, louna sem in kivak uhi. Huchia nuamsatak a a om lai un, Muante kum 2 ding khawng aphak in apa'n damlouhna hon tuak a, sawt kikem manlou in Muante te nuta nusia hi. Apa uh sihnung in Zualning in ginom tak in atapa Muante enkoltou in Pathian thu muamden hi. Muante leng anu thuhilhnate thumangtak a zuitou zel in kum a hong liam touhzel toh kiton in, tangval thumangtak a hong hi hi. Lamka ah skulte hong kai zel in HSLC sangtak in zoukhia hi. Maban sintouh zel ut mahmah a, mundang a siamsintouh ut mahleh a khosakna un zillou ahih manin Lamka mah ah sunzom a, hun awl aneih teng in a fee ding kiloh tawmzel in a siamsinna Rayburn College ah hon zomtou hi.
Muante ahihleh melhoih lokholkei mahleh a omdan hoihtakte ziakin a college uah a luck mahmah vanglak hi. Himahleh, a khosakna uh haksalua ahih manin nungak lam buaipih lou in a laisimna mah pibawl zaw a, nikhat tei sepna lianpi neih a anu toh nuamsatak a hong khosak uh tuppipen in anei hi. Hunte hong paizel in tangval khat a simtheih a hong hihsamtak man in Pathian thilsiam ITNA in amah a pel tuankei. Laisimna subuai lel dia nungak himhim ngaihsak lou ding chih tup in nei mahleh, Sangte melhoihtak leh duang etlawmtak amuh a kipan in a lungsim aluah denpah hi. A khosakna uh a etchiang in nungak ngaingam vual ding in kikoih lou a, tua ziakin Sangte ngei leng mangngilh mai sawm hi. Himahleh mangngilh mai sawm a pan anak lak deuhdeuh leh a lungsim a luahdim semsem hi. A tawp in ki im zou nawnlou in a lawmhoih mahmah Suanpu kiang ah genkhe khong hi. Suanpu in leng a lawmpa lunggulh pen tangtunsak sawm in pan nakpi takin la hi. Sawtlou nung in result lungtunhuai tak toh Suanpu in a lawm Muante kiang ah thu hon tunta hi. Huchi'n Muante leh Sangte in itna tuipi tuh a hon zap khawm panta uhi. Nuamtak in hong kithuahzel ua, maban ah bangthil hong tung ding ahia chih theilou hial in kituaktak leh ki it tak in hunte hon zang tou zel uhi.
Sangte te bel innkuan nuamsa ahi ua, apa'n government ah SDO nasem in khosathei mahmah uhi. New Lamka ah teng ua, aman unau pasal khat nei hi. Apa ahih leh saptuam upa leng hi a, anu bel Dorka pawl makai khat in a pang hi. Saptuam ngaina mi mahmah ahi ua, kikhop a taima un thohlawm thoh bang taima mahmah uhi. Tuate hang in mite zahtak in om ua, a thu uh pai mahmah lel hi.
Nikhat Sangte in a it mahmah Muante a inn uah hoh ding in zawn hi. Muante in leng kisuanglah kawm pipi in a itpen zotna nial ngamlou in vazuitei hi. Sangte te' inn atun un thupi sa mahmah mai a, a sung ah lut ngamlou phial hi. Himahleh, Sangte in a khut ah man in kai lut teitei hi. Muante kisuanglah lua a kho-ul pawt zen a om amuh in Sangte in a ziak a dongpah hi. Muante in leng a damsung a hiaibang a inn hoih leh thupi sung a a lut patna ahihdan gen in, a itpen toh khosakna kikhailua ahihman a kisuanglah ahih dan gen hi. Huchia bangbang hiam gen a a houlim laitak un innkong lam ah gari hong ging hi. Sangte nu-le-pate bazar kai hong pai ahi ua, Muante amuhtak un atanu uh kiang ah a lengla pa uh kua hi hiam chih dong uhi. Sangte inleng college a alawm hoih mahmah ahihdan gen in, amin Muante ahi chi'n anute kiang ah pulakna nei ngal hi. Alehlam ah, Muante pen zahkaipi khat ahih manin ana kisuanglah gawp a, a itpen toh akhosakna uh kikhailua ahih manin ana kisit gu mahmah hi. Huaiziakin sawt om ngamlou in a zekai paulam in sawt om ngamlou in paipah hi. Lamtawn in kingaihtuah den a, Sangte nute'n ka khosakna uh hon theile uh atanu uh phal ding un gingta lou hi. Ahi alah Sangte ngailaw petmah khin ahihtak manin haksa sa mahmah hi. Aw genthei hinkhua zaw haksa hina e maw !!! chi vungvung phet hi.
Alehlam ah, Sangte nu'n Sangte kiang ah Muante tanchin dong thakthak a, Sangte in leng tagah ahihdan leh anu toh kia a khosa ahihdan hilh hi. Anu'n a kingaih uleh kingaihlouh uh dong a, Sangte in leng imse lou in kingai uh ahihdan anu hilh hi. Tua takin anu'n Sangte kiang ah........
"Bawi, lawmthuah ah hong pilvang inla, ei dinmun leh khosakna toh kituakte khawng toh kipolh ding ahi. Hiai Muante tagah lubawk na ngaih zenzen. Bang a kivak sawm uh e? Kintakin tawpsan in. Na nu-le-pa non suzahlak lua. Tulai mihausa eive et di. Mihainu." chi'n atanu taisuk gawp pah hi. Sangte in leng anu kiang ah kamdam takin, "Nu aw, na thugen a hoih, sum-le-pai omlou in khosak ahaksa ding chih ka thei. Himahleh, sum-le-pai in itna dik lei zoulou a, kipahna leh kithutuahna lei zoulou hi. Nu aw, hauhsakna sang in omdan leh gamtat hoih mah poimawh zaw hilou maw?" chi'n a dawng hi.
Atanu thugen a zaktak in anu leng hehlua in a tanu kiang ah, "Mihainu, na maban ding bangmah tan mulou na hi. Huai tagah toh kiteng lechin nagum sem ngap ding maw nang ? Semlou a nuamtak a hin a, mite tung-et hih ding midangte kituh lai a, Nang, hiaibang lungsim naneih zum le zum lou maw? Hiai bang tagah ka makpa din ka deih kei. Mite nuihzabuk ding lel hih ka ut kei. Ka khan kilumlet mahleh ka makpa ahi ngeingei kei ding." chi'n hangkhum motmot tamai hi. Aw !!!! Sangte lungsim nat ding dan zaw gensiam a haksa. A itpen kumsawt loubang tulpih dia ateel toh hal a a om mai. "Nu aw khatvei sim sing paak a, khatvei zou sing paak ahi. Mizawng leh tagah chih ziak a simmoh ding kuamah omlou ahi. Pathian in miteng a kibang a hon siam ahi." chi'n khase takin a pindan ah lutsan hi. Lupna tung kidenna in a itpen a u Muante ngai in kap huphup hi.
Nitaklam apa ofis kai a hong tun in anu'n thil omdan teng ana hilh vek hi. Apa mah in leng anu thugen danteng mah vagen khum zel ahih manin, Muante toh akal uh bing deuhdeuh hi. Himahleh, hichimaia a u Muante tawpsan mai sawmlou in a itna pung deuhdeuh zaw hi. Daltu atam peuh leh itna chitak deuhdeuh a, kip semsem zaw hi.
Hunte hong paizel in, buaina tuamtuam kal ah lawmtate' ki itna in khanlam manoh semsem hi. Sangte in a nu-le-pa lungputte a u Muante kiang ah hilh ngamlou hi. Aziakbel Muante kingaihsiat luat khak ding a lauhman ahi hi. College kaina ah kimu zel a kithuah theizel ahihman un amau a ding in holiday nite chimhuai diak a bang hi.
Kiginni khat Sangte leng skul khawlni ahih manin inn ah om a, a nu nasepte huh in hun hon zang hi. Huchih laitak in innkong lam ah gari hong ging in sawtlou in a kong uh hong kikiu hi. Sangte in leng hong lut un chi'n sam hi. Tua sapna aw a gintakin, kong hong kihong a tangval melhoihtak leh nalh tak a kichei khat a hong lut hi. Etmai in leng mihausata ahi chih a kitheithei hi. Sangte nu'n amuh takin, "Ehe...! Lampu nang na hi maw. Hong tu in chi'n ana phe soisoi pah hi. Lampu leng kisuanglah lou hial in Sangte bul ah hong tu sukpah in cigarette lakhia in petpah veuvau hi. Sangte in bel a mitsik natawm in a enkei. Himahleh, a nu pen a nungak zaw mah bang in Lampu maipha zong in a na phe tottot hi. Bangtan hiam nung in a na om un, chi saisai kawm in pawtkhiaksan hi.
Anu' pawtkhiaknung in Lampu in Sangte kiang ah hoih a sakdan leh a ngaih dan khawng gen in hon try panta hi. Himahleh, Sangte in Lampu kiang ah ngaihzawng neita ahihdan leh tua a itpen khenlouh sawm a a itpen a dia ginom den ding ahihdan genkhum hi. Tua bang thu a zaktak in Lampu heh mahmah a, Sangte kiang ah, "Nang hon nial mah lechin, na nu-le-pa toh kihoulem khinsa ka hihman un hon nialmah lechin, kei a dingsa na hi. Tua na tangvalpa hinna na it leh kintakin tawpsan in." chih khum hi. Sangte in bel bangmah a dawng selou in a pindan ah lutsan in kong kikalh khum a, pawtkhe nawn vetlou hi. Lampu leng amah chauh a tuden theituan samlou ahih manin a tawp in paikhong hi.
Atung a thiltungte ngaihtuah in nasalua in Sangte kap keuhkeuh hi. Anu-le-pa'n ama deihtelna donglou a midang kiang ah zuak mai uh chih a ngaihtuah chiang in khase mahmah hi. Muante a ngaihna toh anu-le-pa bawldante a ngaihtuah chiang in khaselua in a uMuante minlou kawmkawm in tuani sunkhua in kapden hi.
Nitaklam ninem in anu a hong pai a, Sangte nguaitak a om amuh tak in a ziak dong pah hi. Sangte in leng a nu kiang ah, "Nu aw, ka hon it in ka hon ngai mahmah, himahleh, ka tung a na thil bawldan uh zaw thuakhak ka sa lua. Nu aw,, na tanu it ganzuak bangmai a Lampu kiang ah maw na hon zuak mai uh. Naa ka salua, Nu aw Lampu toh ka kitensang un sih ka ut zaw. Hehpihtakin na tanu a ut louhna ah hon sawl dah mahmah mai in aw." chi'n kidiik huphup hi. Zenman in a tanu thugen a zaktak in heh petmah hi. A tanu kiang ah, "Mihainu, na uLampu lunggimtak a paisak na hi maw? Huai Muante tagahpa sang a etlah huaizotham hilou maw? Neih-le-lam ah lah kuamah englou, a pa sumdawng hausa nekseng louh nei hizomah. Ka tanu mihausatak ahih ding deih a zum-le-zah khuallou a na maban din ka et lai a maw nang ka thu na hon nial ding? Lampu lou ngal kuamah toh kiteng lou hial ding na hi chih kithei oh." chih khum zialzial hi. Sangte in a nu kiang ah, "nu aw hauhsakna in lungkimna petheilou hi. Nang leng ka pa na itpen ziak a na kitenpih ahi. Na nu-le-pate'n honna hal hile uh bangchituk in naa na sa dia? Nu aw nungak hun teng palsuakzou na hita. Itna bang ahia chih kei sang in na thei zaw hi. Na tanu itna tellou a zuak mai ding maw? Na tanu in leng itna leh it neisam keive nu aw." chi'n zakta zou nawnlou in a nu hon dawng tamai hi. A nu'n a tanu thugen a zaktak in hong heh semsem a, "zummohnu, nang nanu thugen nial ngam lai ding maw?" chi'n hehpihna bei in a tanu zep ek-ek hi. Sangte lah na salua in kap keuhkeuh mai a, bangmah lah genngam nawn lou in sialpi vuahthuak in thuak mai hi.
Nitakin a pa hong tuntak in thil omdan teng a nu'n a pa kiang ah gen nawn a, a pa leng hehlua in thumanglou chi'n hehpihna bei in a tanu zep ek nawn hi. Muante in amah ziak a a itpen a nu-le-pa khutlum thuak mu leh bang chi'n a om dia? A haksat dingdan ngaihtuah vual hilou hi. Himahleh, itna diktak zaw phelhmit zoh vual ahikei, buahmit sawm a a hahpan peuh uhleh a kuang zak nasa semsem zaw hi. A tawp in Sangte in leng thuakzou nawnlou in a pa kiang ah lau kawm pipi in hichi'n hon chi hi. "Pa aw, na tanu itlou na hiam? Pa aw, Biakinn ah hauhsaknate mangthei thil ahihdan leh itna mah poimohpen ahihdan na gengente koilam tungta ahia? Hauhsakna in kipahna hon tunlou hi , chi a pulpit tum ging dupdup a na gente kua a dia na gen ahia? Nu aw, Khovel hauhsaknate engken, chihla sakawm a Amen...! Amen...! chi kawm a na laam daldalte koilam ah mang ahita ua? Kei natanu na gen louh lam uh leh na laampih louhlam uh zui dia na hon sawl ua, na hon sawi uh. Pa aw nalua, hon that zaw maive maw hehpihtakin." chi'n hong kap khe hithit hi. A pa lah a tanu thugente a zaktakin heh kisa in nak zawsem in vuakbeh zawmah hi. A tawp in a lunggimnate leh a pa' vuaknate thuakzoulou in Sangte khophawklou in hong puk hi. A tanu khophawklou a a hong puk hial takin a pa leng hong lauthawng thak a, a tanu kintak in kempah a, lupna ah sial in a khophawk ding ngak in a bul ah tu khovak den hi.
Hunte hong pailiam zel in December kha bang hong hita a, Muante leng laisimna ah hahpan semsem in, nikhat tei mikhat suahsawm in hahpan thei mahmah hi. A it Sangte' sungte'n a hal lam uh theilou ahih manin Sangte toh a kiten dingdan peuh uh ngaihtuah in nui heuhau zel hi. A itpen toh haksa satak a khosak ding ngaingam lou ahih manin tua in a laisimna ah hahkat semsemna din tha pe mahmah hi. Nikhat college tawp baih uh ahih manin amah leng Sangte te' inn ah hoh ding chi'n Sangte toh hong ton sukta hi. Innsung lutpan chih ding in Sangte nu'n a na mupah a, "Muante zakta lou maw? Nang mi tagah leh nekding neilou, meithai tapa in ka tanu na hong hel ngam himhim. Na dinmun enve. Ka tanu nou khawng maimaite a ding vual ahikei. En in, a pasal ding a khaamsa hiah a om." chi'n Lampu kawk kawm in Muante a na kou zialzial hi. Muante in a itpen tunnu tongsuah a zaktak in zaktalua in bangmah genlou in innkong lam ah taipawt hi.
Hiai thute a gen kawm in Muante in amai hum in kap huphup hi. Nileng kaita ahih manin a bahara ding pia in ka paisak a, zingchiang dak 10am a hong ki report nawn ding in ka hilh hi. Kei leng lungsim nuamlou tak kawm in innlam ka zuan hi. A zing in Muante toh houlim ka pan nawn ua, a tanchin lungkhoih huaitak mai a hon genpan nawnta hi.
Muante lah a itpente inn ah pawt ngam nawnlou a, college natawm ah leng Sangte toh kimuh ding lin thei mahmah mai hi. Ahitheitan in kibuksan zel hi. Alehlam ah Lampu leng Sangte tan teitei sawm in azing-azan in tung thithe tamai hi. Sangte' nu-le-pate'n a kintheilam a kigawm mai ding in gen pihpih sek zawmah uhi. Tua in Lampu maingal sak deuhdeuh a, tuitum semsem hi. Anu muh natawm in kilawmlou tak in Sangte khoih sawm zelzel hi. Sangte utlou in kamsia in hou ek-ek zel a, tuahun chiang in a tanu panpihnak sang in tai zawsop hi.
Hunte hong pai zel in, Muante te'n leng pawl XII exam hon panta uhi. Buaina bangmah omlou hial in exam hon neitou zel ua, Muante leng gelh hoihthou lohching ngeingei ding chi'n kimuanna lianpi toh hong exam tou zel hi. Sangte ahihleh asun azan a Lampu in kualpih den ahihman in haksa sa mahmah hi.
Exam laitak nikhat Lampu leh a lawmte'n Muante ana taang uhi. Muante bel khosak haksatnate ziakin gari tuanman natawm nei zoulou ahihman in khe ngen a kuan in kileh zel hi. Thingkangphai a hong tuntak in, Lampu'n a lawmte mithum toh ana khawlsak uhi. Lampu in Muante kiang ah, "Muante, tuban Sangte ana khem non kenla, na itna leng tawpsan in. Kei a ding a khaam ahita a, na hong kidaihlah leh na hinna la ding ka hi," chi'n gen hi. Muante in kam khatmah a leng dawnglou in paisan sawm hi. Himahleh, Ngilpu kichi Lampu lawmte khat in bangziak a pai e ? Chi'n a awm ah man in amai suksak hi. Muante leng leilak ah puksuk a, lawmtate'n hehpihna bei in leitoh chil khawm zialzial uhi. Bangtan hiam a soisak zoh nung un Lampu'n a kiang ah, kama dal a napan teitei lai leh hiaisang a khawkzaw ahi natan ding. Chi'n paikhiaksan uhi.
Muante leng apukna apan awl a thoutou in si kai niuniau in bai leihleih kawm in innlam hon zuan hi. Inn ah anu'n ana muhtak in aziak dong a, Muante in leng thu omdan teng anu hilh hi. Khaselua in kingawngkawi kawm in anuta un, eileng mibang a neisam in ka pa mah in hon dampih lai hileh zaw maw...hiaibang a kisimmoh nate tuaklou ding hi hang a !! Pa aw hong ngailua ung. Hong tualkum inla, na angkawi leh von momnou hong en laive maw !!! Chi'n kap huphup uhi.
Awl in anu'n Muante liam nate silsak in apuan a sisan bangte sawp siangsak hi. Azing a khat exam ding neilai ahihman in Muante in leng haksa sa kawmkawm in lai hon sim hi. Mite simmoh nate a ngaihtuah chiang in naa sa mahmah mai a, nikhat tei amaute tung ah leen ding tup anei in peihlou kawmpi in lai hon sim hi.
Azing in exam din kuan nawn hi. Sangte in college gate ah ana ngak a, Muante chi kehnate amuhtak in lamdang sa mahmah hi. Muante kiang ah aziak dong a, himahleh Muante in awl a natheih hun hong omna ding ahi, lungnuamtak in exam phot ni; i zoh chiang in vak khawmni chi'n exam hall hon naihta uhi. Exam zoh in ki it tegel hong vak khawmta uhi. Pangzawl khosak lam a munnuam mahmah khat ah hong tukhawm in, hong houlim uhi. Sangte in a uMuante chi kehna mate aziak dong nawn hi. Tua takin, Muante in leng im neilou in athil tuahte hilh vek hi. Muante thugen Sangte in a zaktak in a kiang ah, "uMuan aw, kei ziak a nathuak nate poi ka sa mahmah. Na theihsa bang in eigel kal ah hon suse ut tampi a om. Ka sungte'n leng Lampu toh hon gawm a sawm uh chih leng na thei hi. Huaiziakin uMuan, tu in a kikhelma in honpi mai in, nang toh tulkhawm ut ka hi. Ka pallut nate midang in a hon lohmai ding na hon phal ka gingta kei. UMuan hehpihtak in honpi mai in." chi'n mittui luang zungzung kawm in ngen hi. Muante a ding in ahaksa tel mai. A itpen midang ang ah zal din aphal kei. Himahleh, amah lam a ki-et chiang in ji neithei ding vual in a kikoih kei. Naupang khah ahi lai a, huaiban ah, khosakna haksatak toh thupukna bawl haksa asa mahmah mai hi. A itpen a ang ah mittui luang zungzung a om amuh chiang in lah a hehpih mahmah zel hi.
Atawp in Sangte kiang ah a sam zut kawm hiauhiau in hichi'n a hon chita hi. "Sangte, aw ka it, kon itlua chih na thei a, midang a ding in kon phal kei chih na thei. Himahleh, tu'n honpi taleng, naupang khah i hilai a, na nute'n hong zong khe ding ua, Lampu mah in leng hon that ngam mai ding ahihman in hichi'n hih zaw ni. Lampu toh gawm teitei a hon sawm ua, lampi dang om mahmah lou ahihleh. Huaihun chiang in ka hong pi zaw mai ding aw."
Sangte in leng tua bang a a itpen thugen hon zak chiang in a kahlai tawp in, "U aw nang hoih na sak bangbang leh lem na sak bangbang in hihen. Himahleh zekai ken aw , u kon ngailua." chi'n Muante ang ah belh in kikhelah tak in hong kikawi ua, ki it takleh kideihthoh tak in maban ah bang hong tung ding ahia chih theikei mahle uh a tawpna pen ding mah bang in hong kitawp vengveng uhi. Sawt tak a kikawi ua a kitawp nung un, ni leng niamta ahihman in a omna mun ua pan hong ding khia in, innlam hon zuanta uhi.
Muante in leng ahun awlte ah kilohna ding hon zong in hong kiloh tou zel hi. Nikhat contractor pa'n zoudawnlam ah sep ding om ahihdan gen in a nasemte lak ah fel leh kizen a sak mahmahte sawl hi. Amaute enkai ding in Muante muang mahmah in sep hi. Muante leng ut mah leh; inn ah anu teek leh hatnawnlou om pen ngaihtuah lua ahihman in a boss pa kiang ah a haksatna vatun hi. Contractor pa'n lungkham lou ding leh anu ana etkolsak lawtel ding ahihdan gen in ana khamuan hi. Muante in leng a khotuah nate hang a kipahthu gen in huchi'n zoudawn lam manoh in hong zinkheta uhi.
Sangte leng ahun awlte ah sep ding thupilua omkei mahleh a maban ding khualna in septheih a om teng kisin in buaithei mahmah hi. A uMuante zinlam natawm theilou hi. Huchih lai in Lampu in asun azan chih omlou in vahel den a, a itna thu vagen den hi. Himahleh, Sangte in thulim dawn ngeilou hi. Sangte dawnnate Lampu in a zak chiang in heh in thangpai mahmah hi. Sangte thuzoh sawm teitei ahihman in zuauthtu in Sangte kiang ah Muante hekse gige hi. Bangchi teng in panla in thusia gen mahleh Sangte in a uMuante a itna khuambanga kip pen sawi ling zou mawngmawng lou hi.
Sangte lungtang a zoh louhtak in, Lampu thangpai mahmah mai a, huchi'n Sangte' nu-le-pa thuzoh in kitenpih sawmta hi. Sangte sungte'n bel Lampu omdan enlou a a sum-le-pai pe'n enlah zaw uh ahihman in ana AMEN pah uhi. Huchi'n Sangte theihlouh kal in a kiten ni ding natawm uh gen fel in omta hi. Himahleh, Sangte in athil tup teng uh thei ahihman in a sungte kiang ah a utlouh dan gen in Lampu omdan hoihlou teng a sungte hilh a, hiaibang a omdan hoihlou toh gawmlou ding in a innkuante kap kawm in ngen ngutngut hi. Himahleh, sum-le-pai it zaw a innkuante'n amau thu mah paipih tinten uhi.
Nikhat Sangte hel ding in Lampu vapawt hi. Sangte kiang ah kimuangsak tak leh kivualzou sak tak in vapau eng-ang hi. Huaitak in Sangte hehlua in Lampu kiang ah A zi ding hingei lou ding ahihdan leh amah toh kiten sang a sih leng ut zaw ahihdan genkhum hi. Lampu in tua bang thu a zaktak in heh mahmah kawm in Sangte sam ah man in ut in ut kei leh a zi hi veve ding ahihdan genkhum in suam hon sawm hi. Sangte leng hehlua in kitung ek-ek a, Lampu khut a kipan hong kipek kheta hi. Huchi'n hehlua in Lampu kiang ah, zummoh pa, ka sianthouna ka pasal a ding kia ahi. Nang bang midukdak loute a ding ka hikei. Kintak in pawt inla, ka inn uh khatvei mah leng hong sik nonken, pawt khia in. Chi'n gen hi.
Lampu leng heh mahmah kawm in paidi'n kisa hi. Huchih kawm in Sangte kiang ah, tunitak mahmah a a kisuanpih a sianthouna pen laksak ding ahihdan gen in paisan hi. Tuani nitaklam in a lawmte phone tungtawn in Sangte toh kihou khathei zenzen uhi. Thu omdan teng Sangte in hilh vek a, huai ziak in amah leng lung nuamlou tak in om hi. Hun lem masapen a innlam phak ding in thupuk a, himahleh hun lem mukha theilou ahihman in a hong paitak in thilteng ahi ding teng ana hikhinta hi.
Muante in a thugen a zohtak in a hinkhua uh im neilou a ahon hilh ziakin kipahthu ka gen a, tualthattute kintak a mat khiak a gawtna khauhtak piak ding, tua ding a amah Muante in leng panpih theihna a hon neihna teng a hon panpih ding a ngen in a lampaiman ding pia in a annhuan ding uh anntang bag 3 toh ka paisakta hi.
Huchi'n thuguk saipawlte thupia in kintak a Lampute omna zongkhe ding in ka ngen hi. Amau leng pan hon la in kintak in kansui ua, huchikawm kal ah, Lampu' pa Police Station ah sam in Lampu omna ka dong uhi. Aman leng a tapa omna theibun lou leh kithuzak ngei nawnlou ahihdan uh ahon hilh hi. A thugente gingta lou ka hihman in a tapa omna a hon hilh kei leh gawtna pe ding ka hihdan leh a tapapa mat a a om ma suangkulh ah khum ding ka hihdan ka gen khum hi. Tua bang thute a zak tak in lau mahmah mai hi. Kimu kha ngeilou uh ahihdan a gen a, himahleh, khakhat a khatvei bank tungtawn a sum pezel ahihdan hon gen hi. Huaitakin, kei leng Lampu mat theih nang tua thaang pen kam pah ding in ka hong kisata hi.
Huchi'n pa Thangpum kiang ah a tapa sum khak nawn ding in ka ngen hi. Bank te kiang ah Thangpum lem khak in hiai mipa'n account khat ah sum a hong koih chiang in tua account pen ana chiamteh a, asum draw ahih chiang a a draw khetu ana chiamteh ding in ka ngen ngal hi.
Hunte tuiluang bang in paihat mahmah hi. Nikhat bank te apan in call ka ngah hi. Sum ki deposit pen alatu ding tulel a bank ah om lel ahihdan ahon hilh uhi. Tua phet in ken leng Khualpu leh midang 5 tonpih in sum draw khetu man ding in ka kuan uhi.
Mihausa tak bank ah sum lakhe ding hi awmtak in civil dress a kivan in kei toh ka lawm Khualpu bank ah ka lut ua, a dangte'n kong lam ah panmun bawl in ana tangpang uhi. Clerk pa'n ahon muhphet in sum draw khe ding tupa ahon kawkmuh pah hi. Huchi'n pilvang takin ka envel ua, amahkia ahihdan ka theihtak un akiang ah vapai in thu tuamtuam ka houlim pih uhi. Kipawlnelta chih ding in amin ka dong hi. Amin Tuanpu ahihdan a hon hilh hi. Ken leng ka min Lianpu ahihdan gen in kimeltheih tuah semna ka bawl uhi. Huchi'n mi tamlua chih paulam in kong lam ah meltheih tuahna singpi dawn ding in ka ngen hi. Aman leng lemsa pah in ka thum un ka kizui pawt uhi. Konglam ka tun tak un ka lawmte signal pia in kintak in a hong pai ua, Tuanpu man in police station lam ah ka taipih uhi. Station ah thudotna ka nei pah ua, a tung in bangmah theilou dan in pansawm mahleh a degree ka khen tak un bel thuakzou nawnlou in a hong kipuangkh ta hi.
Tuanpu pen Lampu a ding a amizat leh amuan mahmah khat ahi a, Sangte pikhiakna ah leng pan naktak in la hi. Lampu leh amah toh midang nih in Sangte pikhia uhi. Sangte' te inn ah tua nitak in vahoh uhi. Lampu in a thilsawm dan teng alawmte hilh vek hi. Pikhiak a munkhat ah suam a, huaizoh a taisan ding. A lawm teng sum tamthamtak piak ding chin Lampu in gen hi. Amau leng a ut lamtak uh ahihman in pai dia kisa Sangte in kong tan a vakhak tak in man in kaikhe ngal uhi. Sangte utlou in kipek khiak sawm a, himahleh mantang in gari in taikhiak pih uhi. A thawm uh Sangte' nu-le-pa'n thei mahle uh Lampu in a zi ding a pi dia gingta in vasubuai selou uhi. Amau leng Sangte Khuga Dam lam ah taipih in mun thoveng khat ah deihtawk in kisual huan uhi. A soisakna uh thuakzou lou in Sangte amun ah khophawk lou in om a, amau te'n athil hih ding teng uh azoh tak un denchiah Sangte in Police te kiang ah a hon report kha ding chi in a gawl ah mek ua, a bangkhem temta in at siatsak uhi. A si chih a theihtak un laigelh in Sangte luang canal ah pai lut uhi.
Tuazoh in amau leng mi theihkhiat khak ding lau in mun tuamtuam ah kibu ua, Lampu in apa kiang ah sum ngen in tuate in galvan lei uhi. Tua galvante zang in mite suam in mun tuamtuam ah kibu kawikawi uhi.
Tuanpu a kipuanzoh in tulel a akibukna uh ka dong nawn hi. Himahleh gen utlou in dai dide a, ka dot dot hang in alawmte omna gen ut bilbel lou hi. Tuatak in ka thangpai lua in Tuanpu kam ah puansia hen in tui ka sun khum ua, haksa salua in hong kipek ek-ek hi. Ka dong zomzel a, agen ut mateng akam ah tui ka leih den hi. Atawp in im zou nawnlou in akibukna mun uh ahon genkhe khongta hi.
Tuanpu hon hilhna mun lam zuan in nitak mah in Sehken khomunlui lam zuan in ka hong kipankhia uhi. Khuga Dam tan gari a tuang in dam apan in long in ka pai uhi. Satellite pansan in amun hoihtak in ka vel masa uhi. Mi 10 chauh khawng om ahihman un luhkhiak haksa lawtel din ka koih kei ua, Hiai bang operation ah kikhuankhe vang mahmah ta ahihman in ka lawmte nervous simsim bang a om uhi. Kei ka kuan ding hon phallou uhi. Khualpu ngial in heh phial in ahon khaam hi. Himahleh, Lampu gamtatdante mulkimhuai lua ahihman in keimah khut ngei a mat ka tum tinten a, tua ziakin ahon kham zoukei uhi.
Sehken khomunlui ka tuntak un pawl 3 a kikhen in khat kei makaih, akhatpen Khualpu maikai sak in athumna pen Mangboi ka makaihsak hi. A camp uh mualtung mun nuam mahmah khat ahi a, alutna ding lampi khat chauh a om hi. Munbit leh luhkhiak haksatak mun ahihman ahi ding a, lungmuan tuak mahmah uhi. Ka panmun ding uh ka hon hawm ua, Khualpu pawlte'n lampi omsa pen apan ahon pantou ding ua, kei leh ka pawlte'n bel a nunglam apan kaltou a, sentri om louhna lam ah lut ding. Mangboite pawl bel mi 2 in sniper toh atangpan ding uh. Adangteng bel apoimoh lamlam panpih ding a mansa a ana om ding uh chih ahi. Huchi'n ka panmun ding chiat uh manoh in dak 9:30 pm in ka hong kipan kheta uhi.
Gintaksang in kou panna ding lampen ana haksa zaw a, gamkawm lampi omlouhna ngen ahihman in a daibul uh ka tun un dak 11 bang a ging ut simta hi. Lawmte lah kinoh simta, ka order ngaklah lua in ahun ding hon dongdong mai mah uhi. Himahleh, dak 11pm a duty kikhek ding ahihman un huai ka ngakpih hi. Dak 11 a hong gintak in duty lelte aban ua ding phawng in apaikhia uhi. Tuatak in ka lawmte thupia in chikmah a ka mangngilh nawnlouh ding operation chu pan ka hita mai uhi.
Koulam ah sentri duty omlou ahihman in sikdai teptan in ka lut pah uhi. Khualpu te'n leng duty awn kal suam in kintak in camp sung ah ana lut in panmun ana la khin diamta uhi. Duty thak ding amau kianglam zuan a paite thawm omlou hial in ana koih hoih pah ua, huchi'n camp dia inn sautak kilam nawl khat ah ka hong kimu khawmta uhi. A i muta leng a om uh chih a kithei thei a, himahleh, room khat vak lai a om a, tuasung apan music hong gingkhe nguainguai om ahihman in party bawl uh hidin ka gingta hi. Huchi'n kou leng kapan ding dan uh kihawm thak in Mangboi pawlte ka samtou ua, Khualpu te lawmta teng in music hong kikhah khiatna room pen vabuluh ding. Mangboi pawlte'n barrack sung a omte buluh ding leh kei leh kapawlte'n Lampu giahna inn lamteng mohpaw ding chi in ka na uh ka hon panta uhi.
Ka panmun chiat uah pan hoihtak ka lak khit nung un ataktak pan ding in ka hong kisata uhi. Ka omna munchiat uah thumna nei in, ka khelhnate uh thupha tawi in PATHIAN kiang ah panpihna ka ngen uhi. Huchi'n thupiak ka hon pia a, ka thupiak zoh second khat paipan chih ding in lawmte'n ana uh ahon pan ngal uhi. Ken leng thakhat in Lampu giahna room hingei ding a ka gintak na mun ah kongkhak tuanhong in ka lut ngal hi. Light a ki off man in bangmah a kimu theikei. Himahleh mikhat chauh a omkei chihbel thawm omdan apan in a kithei. Kintak in light ka on a, lupna mun thau a ngimphei kawm a ka et leh... Kare...! Maizen Lampu leh nungak melhoih mahmah ka meltheih. Omdan hoih a ka theih leh saptuam sung a kizang mahmah khat in savuak pingpeng a hunnuam ana zang ana hi ua, lamdang satak in a honna en heuhou uhi. Kou hon muhtak un numei pen lau a kikou in a taksa khuhna ding zong in aphe lemlom hi. A puan-ak te uh pia in silh ding in ka theisak a, Lampu pen man in ka nung leh hen ngal uhi.
Lawm dangte'n leng ana uh hon pan in kilchih ah thau a ging churhcurh hi. Kou gintak banglou in mitam simtak ana pha ua, ken leng ka lawmte mi 2 kiang ah Lampu leh a lawmnu ana enkai ding a hilh in lawm dangte panpih ding in a dang teng toh ka diang khia uhi. Hoihtak a ana kiging man hile uh bel luh khiak zoh vuallouh ding a tam ana hi phiangsan uhi. Galte muh masak kap thal teptep kawm in lawmte kiang ka vatung uhi. Sawt kuamtak ka kikap tuah nung un galte tengteng gawtmun ah transfer order ka suah khumta uhi. Himahleh, vangsiat huaitak in kou lam ah Mangboi leh midang 2 in liamna a tuak ua, Mangboi pen a awm ah thautang lut in sisan tampi pawt a adinmun lauhuai mahmah hi. Adang 2te bel thautang in nawk kha zek maimai ahihman in buaipihluat ngailou uhi. Huchi'n Mangboi puakna ding ka bawl ua, ka man tak un, Lampu leh a lawmnu ban ah, party zang a kuan nungakte tengteng toh Lamka zuan in ka hong paikik nawnta uhi.
Lamka Police station ka tun un khua avak philhphelhta a, vai pathiante leng athou panpan ta uhi. Kou leng ka mimatte uh lock up ah khum in tomchik tawldam kawm in ka ihmu uhi. Zing ann nekzoh in thudotna ka pan pah ua, numei teng anu-le-pate uh sam in thuhilhna hoihtak ka pia ua, huchi'n court ah ding sak in ka paisakta uhi. Lampu' giahpihnu pen kou veng a saptuam ah kizang mahmah khat ahihman in zahlak kisalua leh kisiklua in kap huphup hi. Anu-le-pa kiang ah hiaibang in hon gen hi,
"nu-le-pate aw, tuni in nou deihtelna
ka zuih khak ziakin hiai bang teng ka tung ah atungta hi. Sum deihtakna
zaw sual chiteng bul ana hi taktak ahi. Na sum deihna hang un ka itpen
toh hon hal in Lampu toh gawm na hon sawm ua, ka lei Pathiante' thu nial
ngamlou in ka sianthouna ka khawng gaita. Tun koilam ka nga ta dia? Nu
aw ka naute zaw sum in hon khawng nawn mahmah kei un aw. Hichi ding
saleng zaw ka itpen len tinten zaw ding hinga... Ka hun mualliamsa hon
sapkik sak mai un nu aw."
chi'n amai hum in kap huphup hi.
Anu-le-pa'n leng gen dingdan tuan theilou in kah khum mai uhi. Atawp in
apa'n, "bawi, Pathian min in hon ngaidam in aw, Hichi ding sale ung
zaw... Na it toh hon khenlou mah ding hive ung. Kou duh gawl, nang
thuakna ahimaimah ve maw... Hehpihtak in hon ngaidam in aw..."Chi'n a
innkuan ua kikawi in akap huphup uhi. Kipaktak a va et chih thil haksa
tak ahi. Hehpihhuai na uh e chihkan gen ding omlou hi.
Lampu leh Tuanpu amau pawl ah adam omsun ahihman un amau gel court ah dinsak in om uhi. Court in Rape case, Murder case leh case dang tuamtuam 31 ah Lampu mohpaiha ngakuai a khailup ding thutankhum hi. Tuanpu pen Rape leh murder ban ah case dang 12 ah mohpaih in om a, damsung suangkul tang ding a thutan khum in om hi. A khanawn ani sawm-le-khat ni geih in misual Lampu tuh ngakuai a khailup in omta hi. A thugen nanung pen hiai ahi,
Lampu leh Tuanpu amau pawl ah adam omsun ahihman un amau gel court ah dinsak in om uhi. Court in Rape case, Murder case leh case dang tuamtuam 31 ah Lampu mohpaiha ngakuai a khailup ding thutankhum hi. Tuanpu pen Rape leh murder ban ah case dang 12 ah mohpaih in om a, damsung suangkul tang ding a thutan khum in om hi. A khanawn ani sawm-le-khat ni geih in misual Lampu tuh ngakuai a khailup in omta hi. A thugen nanung pen hiai ahi,
"ka nu-le-pate' hon deihsakna leh a hon duatna uh ka na zang
khial kha a, poi ka sa mahmah hi. A hon itna ziak ua ahon sawinate uh
thei siamlou in thangpaihna a la in ka hinkhua ka na suse khata hi.
Nu-le-pate aw, hehpihtakin hon ngaidam un aw... Tunung in natate uh
natai ua, na sawi chiang un, na itna uh langsak kawm in hon sawita
unla, na sawi nate uh a theisiamna ding un A ZIAK hilh masa teitei ta un
aw... Kei zaw ka hinna bei ding ahita. Hichi ding saleng zaw ka hinkhua
ahoihlam a zang ding hing a, ka lawmte aw ka sulnung zaw hon zui hetkei
un aw... Mangpha..."
Hunte pailiam zel in kumthak bang a hong hinawnta hi. Nikhat laibawm a kitun laikhat dak hawm pa'n a hong pia hi. Phel a ka sim leh Sangte suangphuh honna ding a chialna ana hi hi. A ni a hong tun in kei leng chial a omsam hiveng chi'n ka angkawi leh ka von momnoute toh Sangte' te innlam ka zuan uhi. Sangte pa Pu Thangpum in honna vaidawn a, gintak hetlouh pi in Muante te nuta toh ka vakimu khawm kha ua, kipahhuai lah bang lah khasiathuai mahmah zel in ka hi ek-ok zawzen hi. Han mun hunzeek ka zoh un, innmun ah ann nekkhawmna ka nei ua, ann nekzoh in Pu Thangpum in kou leh Muante te nuta hon sam in a gen nop pen hichi'n a hon genta hi.
Hunte pailiam zel in kumthak bang a hong hinawnta hi. Nikhat laibawm a kitun laikhat dak hawm pa'n a hong pia hi. Phel a ka sim leh Sangte suangphuh honna ding a chialna ana hi hi. A ni a hong tun in kei leng chial a omsam hiveng chi'n ka angkawi leh ka von momnoute toh Sangte' te innlam ka zuan uhi. Sangte pa Pu Thangpum in honna vaidawn a, gintak hetlouh pi in Muante te nuta toh ka vakimu khawm kha ua, kipahhuai lah bang lah khasiathuai mahmah zel in ka hi ek-ok zawzen hi. Han mun hunzeek ka zoh un, innmun ah ann nekkhawmna ka nei ua, ann nekzoh in Pu Thangpum in kou leh Muante te nuta hon sam in a gen nop pen hichi'n a hon genta hi.
"Tuni a
noute ka hon sapkhawm na ziak ahihleh kipahthu gen leh ngaihdam nget ka
ut ziak a hon samkhawm ka hi hi. Amasapen in Pu Lianpu aw, ka tanu sihna
tungtang ah na hinna itlou hial a panla a, a case na hon saifel sak man
in na tung ah ka kipak mahmah uhi. "
Muante, nidang a
ka hon simmoh nate uh leh, ka hon kou siatna te ziak un na mai mutaak le
ka hi nawnkei uh. Ka sum deihtakna ziak un tuni in milak leh nou ang ah
maizumna nasatak ka tuak ua, ka innsung natawm uah kikhenna atung hi. HICHI DING SALENG ZAW...
Na itpen ka tanu toh hon khenlou mah ding hiveng maw...! Ngaihdam taak
ka hih louh zong un hehpihtak in Pathian min in hon ngaidam in aw
Muante...
Aw ka it ka tanu, na itpen toh khenlou a tulkhawm dia
hong kik nawnthei hilechin ut hi nang e... Ka tanu Sangte aw, hon
ngaidam in aw..." chi'n a mittui ahong luang zungzung hi. A kiang a
tuteng leng kuamah dak khe ngam omlou in ka mittui uh nul chiat in ka
thei hi.
~Beita~
©Siamsinna leh Vakiangbu
~Beita~
©Siamsinna leh Vakiangbu
Comments
Post a Comment