BANGDOH AI-TUI DAWNKHA KA HIAM

By~Quptong Bawngmei

Zingninou hongsuaka chingcih thelna huikhi honglaang in, vasate honghaam siausiau paktui buah chu ahong hunzel.. Lia Chingno leh lugiik sak simpitaw thobaih gige lehaksa sasim komin, azaalna laikhun panin hong thou khe liamliam ta hi.Keu'n noulain tui in paak etlawm takte honban buah hi. Ching inleng angaihtuahna tuh paakte tuipiak louh chia zaw vulpapah danin mu hi. Hiai bang teziakin paakzaw etlawm nadin tui kiphat mawh dan musem sem hi.Leh lama ah enta leng Tang khualpu leng lungleng hitwan samlou'n tangte mualte kisoi diamdiam amuh chia asinlai ling gubang dou om hileh kilawm omtakin, asanchim louh kiangmah kipahna bukim amuhna mah hinte zuanzatam sialna te khikhe nuamin kalhong suan khe lengleng hi.

hiaia lek kik zualta le khualpu pen nidangin ahun mualliamsa te a, navangtah kha mahmah mina himok hi. Hinkho nuamna paal vang mah mah gintak louhpi'n Chingno toh bangcici hiam in, hongkimai kha wa huchiin hongkikhe lah hial uh. Gennawn leh Chingno pen paak ngaina kem azuun nuam mina himawk ve, twa bangmah in Khual adin angaihno toh hunnuam zatmah a ud pen hong himawk hi. nisimin in Chingno kiang valengla mah leh kisap khat nei hih leh kilawm khat omveve mawk? Tuapen nidanga athiltuahte'n alungsung luah den mawk hi. Adamsak ding mi omhilo maw? Chingno in bangtan neem kha adiam mo? Bukim louhna khovela zaw lungzuanna anaa om e...lungleen nakhat nei hile kilawm takin, ngaihthuahna khat in omdedu nak hi.Hiaipen zatam lawm leh vualten zong ngaihsut in neimah unte, tuabang in Chingno in zong dot tamin nei mah mah hi. Amaugel kal bang achang in kithei siamlouhna pen dek dek hi. Ahi atuh hiai te hang in Itna pen sulkik theisam kei... Khatvei vei Khual tuh hunluite ziakin alailung sung nuam taktak theilo hi.Himahleh chingno kipahna pentuh a U.khual toh hun-awl tomciik azat sung uh ana hi. Hiai leencil tongsan te ki-itna pen mile lamdang ana sasim uhi. Hangbel akithuah theidan uh leh akikholh dan te uh mite sulung nuam zou hial uh, Niteng hunteng in Khualin Chingno toh hunnuam zangzel mahle alungsim kam khat bel angaihno lungsim noplouh hunte bangin nadahpih in, mangpha bang akhakman louh chia anaguk khasiat sim thei mahmah mawk! Achang in ngaihdan uh bangki bang theilou kisuk heh hunbang hau thei zel sam uhi. Ahih hangin nite paizelin bangcici hiamin kikhen theilou nana lamdangtak in, hongkithu kimthei zel uh..Anbang itna zaw lamdang zel ahi.Awle phalbi laidin leh khualum lawta ve aw! Kisil ding bangle tuilum suan ngainawn kei ve...khohun zaw kihei tak ahi. Mite le keugawp leivui latuh himai thuakhak maimai ve o! PAAK zaw etlawm eive maw? Khenkhat bang agimtui in nuam mah mah hi. Kuapeuh in lengpaktaa uh hi'n kathei Khual khual pu' chih in Kawlgit in amah sam hi omtak in, innkatau a hong haam kaukau hi. Khualpu'n inleng amangzak sim milmial amang alut nawn hi.

Chingno pen a Itluat manin amah ngaihdan in anuih maimai gige ud hi. Khual in huaiziakin paak toh Ching tehkhin nak hi. Mihingte adiakin numeite paak abatna chiang uh omsa hi. Zingkal lamin Paak etlawm tak hong paak a, Tungsuuni hongliap zela nihong kiak leh vuul hiai hiai mawk! Mihingte i etlawm hunsung uh atom tel mai... Huchiin nituh mualdawn ah hongtum petmah ta. Chingno leng zingthoh apat nasem nihong kiak hiai hiai bangin, amai amel hongmual dundun hi. Twate bangdang ziak hylou'n nasep gimtawl manlel uhi. Chingno inleng anaa tengzou vek paak tevuul khinta amuh chia? A etlawm nate mualta cih in Keu'n tuila'n hongbuak hiahhiah nawn hi.Hiaite ziakin numei toh paak tehkhin ahi. Huaiziak numeite mah manpha in thupi uh. Numeite kipah leh innsung bangle nuamin kipahna om mai hi. Adah uh leh khovel bangle nguizou hial hi.

BEITA

©Siamsinna leh Vakiangbu